بعدك يابوي اصبحت دنياي عرجاء بلا عكاز

10

ببيت ابو زايد ، الساعة ١١:٣٠ الصباح..
حليمه تهز رجولها من التوتر : يمدي اهون؟
ام زايد : اقول اعقلي بس لعب بزران اهو
حليمه تحط يد امها بمكان قلبها : يمه اسمعي قلبي احسه بيطلع من مكانه من الخوف
ام زايد : ماعليه بتتعودين وبعدين روحي تجهزي اكشخي شوي
حليمه : ليش! بيجي المملك ونوقع وبس
ام زايد : بس على الأقل ابرزي زينك بذا اليوم
حليمه قامت : طيب
جاء زايد واهو شايل كرتون فواكة وحطها بالأرض : مريت سوق الفاكهة وجبت الي تحبين
ام زايد ابتسمت : الله يطول بعمرك ياوليدي وافرح فيك معرس بعد اختك ان شاء الله
زايد يسلك : ان شاء الله
صقر جاي واهو ماسك يده ..ام زايد : توجعك يا صقر؟
صقر : لا يمي بس تعودت المسها
ابو زايد بأعلي صوته وركضوا له مسرعين ..تكلم : هذا الي قدركم الله عليه؟
صقر وعيونه تلف للحوش كله على تجهيزات الملكه الي بيحضرونها الرجال بس : ليه يبه وش ناقص؟
ابو زايد بغضب : وين الزوالي الي جايه من مكه حاطين لي ذا القديمه ليه!
زايد : ثامر اهو الي قالنا
ابو زايد : وثامر ينسمع منه؟ بسرعه لموا هالزوالي وجيبوا الجديدة ، وانت ياصقر انهض جب لي اخوك
صقر قام : ابشر
زايد : وانا يبوي بحمل الزوالي لحالي يعني؟
نياف دخل واهو مبتسم : انا معك
وجابر جنبه ماسك طرف ثوبه بيده اليسار : ولا ناسي انها ملكة اخونا بعد؟
ابو زايد : عن الهذره الزايده و ابدوا شغل
عند صقر الي فر الحاره كلها وانهد حيله لما شاف ثامر : ي•• راسك ادورك ساعة!
ثامر : وش تبي؟
صقر : قم اخلص ابوي يبغاك الواضح بتندبج منه
ثامر وقف : لا تقولها وش اني مسوي؟
صقر : قايل لنا نفرش الزوالي القديمه وابوي معصب
ثامر : امي الي مختارتها المشكلة.. وش اسوي الحين!
صقر : انقز له لا يعصب اكثر
ثامر مسك شماغه و جيبه وقام يركض بسرعه مثل المجنون وذا الي خلا صقر ميت ضحك على شكله : مرجوج
-
ام فرح وفرح بالشارع ..
ام فرح : خفي رجلك اعجلي
فرح بتعب : ياربي يا يمه شوي شوي محد لاحقنا
ام فرح : اخلصي بس خلنا نساعدهم بالمطبخ
فرح فيها النوم : يلا طيب
دخلوا لبيت ابو زايد الي كان بابه مفتوح و ريحة البخور لأخر الحاره واهم يشوفون جابر وزايد ونياف وصقر وثامر يجهزون الزوالي ومنحاسين منها..
جابر واهو شايل الزوليه على كتفه ويصارخ : ثامر ولعنه ابعد
ثامر الي شايل زوليه ثانيه على كتفه اليمين ونفسه منقطع : انت الي وخر
جابر لف الزوليه وخبطت بوجه ثامر جهة اليمين وبكذا وجه ثامر صار منحصر بين الزوليتين صرخ بألم : ي•• ياكلـب
صقر قعد بالكرسي مات ضحك واهو يمسك جرحه الي حس انه شد عليه ..جابر بضحك ولازال شايل الزوليه : قلت لك وخر
ثامر رمى الزوليه الي معه وهجم على جابر الي كان يحاول يضربه بزوليته : لا تـمد لا اكسر يدك
زايد يفك بينهم واهو يضحك على وجه ثامر الي امتلى تراب : ابعد ابعد
نياف الي يعزز لثامر واهو يضحك : اجلده لا تسكت له عليك فيه
ما فك بينهم الا صوت ابو نايف بغضب : يـا ورعـان
فز نياف واهو يبوس راس ابوه : مساك الله بالخير
ابو نايف : انا وعمكم مخلينكم تجهزون المكان واخر شي ذا شكله!
زايد بتوتر : بس ياعمي ماهو ناقص الا الزوالي بنفرشها ونخلص
ابو نايف ناظر لجابر : وانت بس ذا الي فالح فيه؟
جابر لف ولا رد عليه ..نياف تكلم : خلاص يابوي دقايق ونكون مخلصين
كان هالموقف كله تحت نظر ام زايد وام فرح وفرح و حليمه الي يناظرونهم من دريشة المطبخ وميتين ضحك ..
ام فرح : ياعمري على فزتهم من صوته
ام زايد ضحكت : نكد عليهم
حليمه : الحين عمي بيصير ابو زوجي الله يعين صدق
فرح ضربتها : اسكتي لا يسمعك ..وبعدين يلا ماعاد بقى شي على العصر البسي
حليمه لبست جلالها عليها : يلا
على طلعتها الا وضحى تصرخ : حـليـمه
ارتعبت حليمه : خيـر؟
وضحى حضنتها ونفسها منقطع : جايتك والله ركض
حليمه : سلامات احد لاحقك انتي؟
وضحى : لا جيت اساعدكم بالمطبخ
حليمه : وخالتي بتجي؟
وضحى هزت راسها : بتجي بتجي بس قاعده مع نايف بتجي معه
حليمه وخرت جلالها وبتوتر : شعري ومكياجي حلو؟
وضحى شهقت : واو مين مسوي لك؟
حليمه : انا ليش ماهو حلو؟
وضحى هزت راسها : لا لا يجنن اول مره اشوفك كذا ..نايف بيدخل عليك؟
حليمه : لا لا امي قالت اكشخي بالأخير اكيد بيجون الناس يسلمون علي
وضحى : اي بعد على بالي انصدمت من متى عندنا شوفه شرعيه
حليمه : لو عندنا رفضت تبيني ادوخ عنده من الخوف
وضحى بضحكه دقتها من كتفها واهي تغمز : بتتعودين عليه وبتحبينه بعد
حليمه : وع يا وضحى روحي للمطبخ عندهم بس
وضحى : ابشري من عيوني يا زوجة اخوي الحلوه
طلعت واهي تركض تحت نظر نياف اخوها : مرجوجه ذا البنت
صقر ضحك : خلها ياخوي مستانسه
نياف : قم قم بس نستعد احنا بعد
صقر : يلا توكلنا على الله
-
عند البنات الظهر ..
وريف تناظر يد ليلى : ودي انقش لك
ليلى : لا خليها الين تقرب ليلة العرس عشان ما يبهت
وريف : اي صادقه
وجود : كلمتوا حليمه؟
وريف : لا موب الحين تلقينها منشغله تتجهز
ليلى : الله يوفقها يارب
الكل : امين
فزوا على صراخ سُلاف و جودي ..
سُلاف طايحه بالأرض وفوقها جودي ماسكه شعرها ..ليلى ركضت لعندهم وبكل قوتها سحبت جودي : بتذبحينها يا مجنونه!!!!
جودي تحاول تفك ليلى وصرخت : فكيــني
وجود شالت سُلاف الي طايحه بالأرض وتصارخ : والله اقطع شعرك المنتف هذا اصبري
وجود واهي ماسكه سُلاف الي تبي تهجم على جودي : عمى يابنت اهجدي
وريف واقفه بينهم تناظرهم راحت لجودي اعطتها كف ولفت على سُلاف واعطتها كف ثاني وقفوا منصدمات يناظرونها .. بسبب حركتها ذي عم الهدوء بينهم لثواني ..
وريف بهدوء لجودي : هالكف عشان يبرد قلب سُلاف ..وناظرت سُلاف : وهالكف يا سُلاف عشان يبرد قلب جودي ..تصافيتوا كذا؟
جودي تعدل قميصها وتكتفت بزعل و سُلاف تضبط شعرها الي احتاس وتعقد: اهي الي هجمت علي مثل المجنونه!
وجود بصدمه : ياساتر اول مره وريف تمد يدها
وريف مشت وتركتهم : بروح وبخليكم لو اسمع صراخ بجي انا و اعلمكم الجلد الصدق خلوا هاليوم يعدي على خير
راحت وليلى تخصرت : وانتوا وش خلاكم تتشابكون كذا!!!
جودي تفك شعرها : شوفي كابه صابون غسيل الملابس علي
ليلى ناظرت شعرها : ليه يا سُلاف
سُلاف ببراءة : كنت بمزح معها بس واضح نفسيتها قابعه على طول اكلتني
وجود ماتت ضحك : يابنات والله جتكم كفوف سكتتكم
ليلى حطت يدها على فمها واهي تضحك : استغفرالله
سُلاف ناظرت جودي : يتشمتون فينا
جودي : ملاحظه!
سُلاف مشت ناحية جودي واهي تحط يدها على كتفها : يلا كملوا شماته
ليلى عرفت انه جايهم الدور رفعت قميصها ومسكت وجود وركضوا بأسرع ماعندهم حول البيت كله واهم ياصرخون : وريــف وريــف
وجودي وسُلاف وراهم يركضون ويضحكون : تعالوا ليش تنحاشون!
ووريف تناظرهم من فوق بالدريشه وميته ضحك على شكل ليلى وجود الي خافوا من تكاتف سُلاف و جودي المفاجئ..نزلت تركض وتصنعت الجديه : وش قلت انا؟
جودي واهي ميته ضحك على شكل ليلى وقميصها المرفوع كل فخوذها طالعه وتسحب وجود معها الي طار شبشبها وصارت تركض حافيه : ما اتحمل ما اتحمل
ليلى وقفت ورا وريف : انهبلوا خواتك امسكيهم
سُلاف ضحكت على اشكالهم ..
سُلاف تخصرت : يا خوافات
وجود : على الأقل شعري ما تنتف ولا انصب على شعري صابون
وريف لفت عليهم واهي تعض شفايفها : اسكتي لا تزيدين الطين بله
دخلتهم وريف لداخل : الحين الجيران كلهم عرفوا اننا متهاوشين
ليلى : وخزياه بس طلعت مفاتني لكم خسارة محافظتي عليها ماطلعت الا لكم
وجود ناظرت وريف واهي تبتسم : شكلها مخزنه واجد لعريس الغفله
وضحكوا البنات على جملة وجود ..وعم السلام بينهم
—
على مشارف المغرب .. في بيت ابو زايد ..
بملحق الرجال المملك متوسط الملحق مد الكتاب والقلم واهو يبتسم : وقع يا نايف
وقع نايف و قام ثامر اخذ الكتاب ودخله لداخل واهو يتنحنح لاتطلع وحده من البنات عنده : حـليمه تعالي
قام المملك قرب من ورا الباب يسمع موافقتها و ثامر مد الكتاب لها والقلم ووقعت ..زفر ابو زايد بهدوء ومسح دمعة الفرحه : الحمدلله
ابو نايف وقف ووقف معه نايف وحضنه : مبروك ياولدي منك المال ومنها العيال
نايف : الله يبارك فيكم
والتموا عليه الشباب الي يبارك والي يطقطق عليه..
صقر شد على يده واهو يسلم على نايف : هالله هالله بأختي
نايف همس له باذنه : بعيوني
وقف زايد واهو يشيل دلة القهوة والفناجيل وبدا يصب للجميع بمساعدة جابر و الفرحه ماليتهم ..
داخل عن النسوان ..
حليمه اول ما وقعت تركت القلم على الكتاب وحطت يدها على قلبها وهمست : يارب
ثامر تقدم واهو يبوس راسها : مبروك يا اختي
حليمه : الله يبارك فيك
طلع وتقدموا لها يباركون و يزغرطون : مبـروك مبروك
ام نايف حضنتها : يا فرحتي فيك
حليمه ابتسمت بخجل وحضنتها وضحى بقوه واهي تبكي : الحمدلله مبروك حليمه
حليمه واهي تمسح دموع وضحى : بسك بكي
وضحى : فرحانه
قطع حكيهم صوت شهقات لفوا على ورا لقوا ام زايد مغطيه وجها بشيلتها وتبكي ..راحت لها حليمه تحضنها : يمه تكفين بتبكيني معك بتخرب كحلتي
رفعت راسها واهي تبكي : من فرحتي فيك لا تلوميني
حليمه باست راسها : الله يخليك لي
ام فرح جابت منديل لأم زايد : مسحي دموعك بقي شوي للعرس هذا واهي توها ملكة
ام زايد بكت زياده ..ام فرح انصدمت : وش قلنا ياكافي
ام نايف الي مسحت دموعها وضحكت ..وضحى : ليت جميلة وعيالها معنا تكتمل فرحتنا
حليمه قامت واهي تهف بيدها على عيونها تنشف الدموع
فرح شالت دلة القهوه : يلا يلا قهوه خلنا نروق ونستانس
اجتمعوا كلهم والفرحه ماهي ساعيتهم وحليمه مشاعرها متخربطه ماهي فاهمتها بس الي متأكده منه انها متوتره بشكل كبير..
-
بعد العشاء ..ببيت البنات
ليلى تلعب بشعرها : تتوقعون كتبوا كتابهم خلاص؟
وريف تناظر الساعة : اي اكيد
ليلى قامت : بتصل عليها
سحبت التليفون وجلست حوالين خواتها ..رنت مره مرتين وجاها الرد ..
صقر : الو
ليلى انتفضت وسكرت على طول : يمه
جودي : خير ليه سكرتي!
ليلى : صقر
سُلاف تغيرت ملامح وجها بس ماحبت توضح : ارجعي اتصلي
رفعت السماعه واهي متردده واتصلت ورجع نفس الصوت بس شكله معصب شوي : الـو
ليلى بتوتر : اء ابي..
سحبت السماعه من يدها وتكلمت بعصبيه : حليمه وين؟
صقر عرف صوتها وفز قلبه وشد عليه آلم جرحه : ياهلا بصاحبة الصوت
سُلاف بجديه : نبي نكلم حليمه
صقر ابتسم وهمس : ما تبين تعرفين اخباري طيب؟
سُلاف سكتت واهي تناظر ليلى الي قبالها على طول ومدت لها السماعه : كلميه هذا معتوه شكله
ليلى اخذت السماعه : السلام ، نبي نكلم حليمه
صقر : عطيني سُلاف
ليلى : اقول مو وقت سوالف عطنا حليمه
صقر تأفف بملل : حليمه داخل ..شوي وارجعوا اتصلوا
سكر على طول واهو يسب حظه ..حط التليفون قريب واهو ينادي احد ياخذه
وجت فرح تاخذه بعد ماراح ..ماهي خمس دقايق الا ومتصلين البنات على حليمه يباركون لها ..
ام نايف بعد ماسكرت حليمه المكالمه : بيجون العرس؟
حليمه : ان شاء الله
ام نايف كشرت ودها ترفض بس ماتبي يكون بينها وبين حليمه حساسيات بس عارفه ان ابو نايف لو طقت براسه بيمنعها منهم زي ما منع وضحى..و وضحى تبي تضيع الموضوع : حليمه بتطولين هناك بالدمام؟
حليمه : لا بخلص بسرعه و برجع
فرح : شكلي بجي معك
ام فرح مسكتها : اقول بس اقعدي وين بتروحين
فرح : بروح اساعدها بجهازها
ام فرح : جميلة تعرف وبتدبرها اقعدي بس
فرح تكتفت بملل : طيب
-
الساعة ٩ الليل ..عائلة ابو نايف نزلوا من السيارة ..
ام نايف دخلت البيت وفصخت عبايتها : الحمدلله يارب فرحتني بفرحتي الأولى يلا عقبال الباقين
نياف : من بؤك للسما
ابو نايف : بعض الناس ظني بيقعد معلق كذا
جابر فهم قصده وباس راس امه ودخل غرفته يستعد للنوم بعد الكرف الي من الصباح ..ولحقه نياف و وضحى كل واحد وراح غرفته
اما نايف استأذن منهم ودخل غرفته وعجز ينام ..متوتر نوعًا ما من طريقة تعامله كيف بتكون وشخصيتها كيف صارت ، زفر وانسدح وتاهه بأفكاره ..
ابو نايف لميثاء : بكره ان شاء الله يبدا نايف يضبط الحجره الي هناك
ام نايف : مايحتاج لها تعديل بزياده بس تتضبط وبتزين اكثر
ابو نايف : على خير ان شاء الله
ام نايف بتردد : خالد
ابو نايف : نعم
ام نايف : ارفق على ولدك لا تنفره منك
ابو نايف : الي ما يسمع كلامي ماله عندي شي
ام نايف : بالأخير ولدك وتراك غلطت بحقه واجد لا تغير عليك بعدين لا تقعد تتشره
ابو نايف : ميثاء راجعين تعبانين لا تصدعين براسي
ام نايف سكتت شوي وناظرت بطرف عين : بنات سليمان بيحضرون العرس
ابو نايف ناظرها : حليمه عازمتهم؟
ام نايف هزت براسها .. ابو نايف : خلهم يجون ومنها ذا الي متسدح هنا يشوف شغله
ام نايف مافهمت عليه : وش تقصد؟
ابو نايف انسدح : طفي النوم وسكري الباب نبي ننام
تأففت بعصبيه وقامت تطفي النور وهمست بنفسها : بالطقاق الي يطقكم انا وش علي فيكم
-
عند جابر الي طلع يتسحب من البيت ..الحاره هاديه و الجو بارد دخل يده بجيب ثوبه وكمل طريقه مشي بالطريق الي كان ظلام ما ينوره الا اضاءة بسيطه من لوحات المحلات وضوء القمر ..جلس صخره كبيره واهو يفكر يستثمر المبلغ الي معه و يفتح له بيت على قده يبعد عن ابوه .. لأن يحس نفسه طابت و جرح كبريائه بيعرف وش بيصير من قيل وقال بس اصر على هالقرار بعد زواج اخوه عشان ما يسوي شوشره ويحوس الدنيا ، بالمعنى الأصح بيشتغل ويستثمر من دون لا احد يدري وبيصدمهم بالأخير سوا تزوج ليلى ولا لا ، جلسه ببيت ابوه ماراح يجلسها .. اشتد البرد عليه وقرر يرجع ..
طول الوقت كان تحت نظر نياف الي حس على طلعته من البيت ولحقه وشافه كيف يهوجس و واضح الضيق عليه تنهد ورجع بسرعه قبل يشوفه جابر ، دخل البيت وسكر الباب بشويش الي قابلته وضحى مستغربه وبفمها كوب المويا : وش طلعك ذا الحزه
نياف سحبها معه للمحلق : اسكتي ناويه تصحين ابوي علينا
وضحى تركت الكوب وتخصرت : اخلص وين كنت!
لفت على صوت الباب وركضت تطلع تشوف ناظرته ولفت على نياف : طالعين تتمشون عماني اجل
جابر : ماتعرفين تقصرين صوتك انتي؟
وضحى : وين كنتوا طيب الساعة ١٠
جابر : طالع امشي
نياف : وانا وقفت عند الباب اشم هواء
وضحى شاكه فيهم مسوين بلوه : والله مايندرى عنكم انتم
مشت لغرفتها وعيونها عليهم : اراقبكم ترا
نياف : اقول ناظري طري..
ماكمل كلامه الا وخابطه بالجدار ..نياف مسك راسه : وانا مايمديني اكمل كلامي الا وصاير لهم مصيبه
جابر ضحك بصوت واطي واهو يشيلها واهي تتألم وماسكه خشمها : اح
جابر :روحي روحي غرفتك
ومن بعدها كل واحد توجه لغرفته ..نياف يفكر بأيش شاغل بال جابر وجابر يفكر من وين يبدا شغل واي مكان بيلقى فيه بيت كويس ووضحى تفكر انهم طالعين يدخنون بس ماشمت فيهم شي واخوانها اساسًا ماهم حقين تدخين همست : مصيري بدري وش مطلعكم
-
الصباح ببيت ابو زايد ..
ام زايد تكلم جميلة : والله مدري عن ذا البنت ماقالت لي شي
جميلة : انا بكلمها اجل
ام زايد واهي تشوف صقر جاي أشرت له بـ تعال
جلس صقر واهو يأشر لها بـ وشو؟
اشرت له بـ انتظر
ام زايد : خلاص اجل اكلمك بعدين
جميلة : يلا بالسلامة
سكرت منها ..ونزل السماعه : متى بتغير اللفة؟
صقر : اليوم يمه لا تشيلين هم
ام زايد : معند ما ترفع الشكوى؟
صقر : لا ابد
ام زايد : حسبي الله عليه جعل يده الكسر
صقر عض على شفايفه بخوف: الله يهديه
زايد نزل واهو يلف شماغه على راسه : وين حليمه؟
ام زايد : نايمه
زايد : اوله الساعة ٨ يمه
ام زايد : خلها ترتاح من امس مانامت زين
صقر ابتسم : اي عروستنا خلها تتدلع
زايد : اي والله تتدلع ليش ماتتدلع
ام زايد : والله ودي امشي معكم للدمام بس شايله هم اخوانك وابوك والبيت كيف اخليهم لحالهم
صقر : اي يمه بدونك نضيع اقعدي وجميلة يعني عارفتها بتدبر لها كل شي
زايد وقف : يلا بروح مع ابوي للدكان
صقر : انتظرني بجي معك
ام زايد : ثامر وينه؟
صقر : شفت ابوي ساحبه معه قبل شوي
ام زايد : ايه احسن له لا يقعد يتمشى للمزارع مع نياف
صقر : يمه بالله بخاطرنا طلعه فاتحي ابوي بالموضوع قولي له يا البر يا المزرعه
ام زايد : زين زين ان شاء الله انت الحق اخوك بس
صقر باسها : مع السلامة
-
عند البنات ..
جودي واهي تلبس عبايتها ضربت راسها : ياربي نسيت ليلى وش قلتي تبين؟
ليلى قامت : اقول اصبري خلني اكتب لك واضح انك راعية طويلة
جابت ورقه وقلم وكتبت كل الأغراض الي يبونها ..سُلاف جت تركض : بجي معكم بجي
جودي : ماتكفي السياره
سُلاف تخصرت : بجي حتى انا ناقصتني اغراض الرسم
جودي تأففت : ياليل صدق تحبين تزاحمين الواحد
ليلى واهي تقرا الجريدة : كذابه ترا تبي تمر على فالح تشوفه
سُلاف رجفتها على رجلها ..ليلى بألم : شفتي اني صادقه!
جودي : بالله بتجين عشان فالح؟
سُلاف بعصبيه : يختي دامنا رايحين لمحلنا بنمر اشوفه اتطمن على محبوبي
ليلى تقرفت : يعوه ياناس مايناسب
سُلاف تشمق بعيونها وترفع عبايتها على كتفها وتمشي بغرور ..ليلى : عششتو شفتي وش سوت؟
جودي بضحك : ايه..يلا وريف اخلصي
وريف : خلاص دام سُلاف بتروح روحوا بطني يوجعني
جودي : يلا اجل مشينا
طلعوا من البيت و سُلاف تلفتت بالحاره يمين يسار ماشافت احد وقامت ترقص ..
جودي سحبتها : الظاهر جبتك عشان نشتري الناقص موب تتمرقصين بالشارع
سُلاف تضبط لثمتها : شكلي حلو؟ كحلتي مرتبه؟
جودي بدون لا تناظرها سبقتها بخطوات سريعه : زينه
سُلاف لحقتها : يوه جودي تكفين شوفيني حلو شكلي؟
جودي ناظرتها : اي اي ودخلي شعرك طالع
مشوا الين قربوا لمحل ابو فالح كان لاهي ويشتغل بهالحدايد ومحتاس ..سُلاف : ياويلي يهبل شوفي الغمازه بس
جودي بملل : خلصتي؟
سُلاف : اف منك يارب تحبين واحد وتحسين بشعوري
جودي : طيب امشي يلا
سحبتها معها وعيون سُلاف على فالح الي ما انتبه لها من زحمة محله وشغله وابتسمت وبانت عيونها مع لثمتها ..وصلوا لمحلهم وطلع لهم بشير الي سكر المحل واخذهم لسوق يبعد عن الديرة بمسافة ..
-
بدكان ابو زايد ..
ثامر يعد الفلوس عند ابوه : ٥٠٠
ابو زايد : زين حطها بالتجوري وانا ابوك
صقر : بطلع اشتري لي بارد تبون؟
ثامر : جب لي مشكل
ابو زايد : ما ابي شي
صقر ناظر لزايد الي كان منشغل يصلح المكيف : وانت ؟
زايد : مويا ريقي نشف
طلع صقر واهو يعدل يده المطعونه بألم : هذا واهو سطحي
رجع خطوتين يوم شافها واقفه مع الي جنبها وتأشر : اوب اوب
دخل بين الأغراض ويسوي نفسه مشغول وعيونه عليها درا انها تناظر فالح الي ماكان معطيه نظره وحده حتى ، شد قبضه يده بغضب واهو يشوف الي معها سحبتها و سُلاف لازالت تناظره وتبتسم بعد ، تكلم بصوت مسموع للي حوله : قليلة حيا
مسك اعصابه وراح يشتري ورجع لدكان ابوه وخبط بالأغراض بالطاولة ..
ابو زايد : وش بلاك يا ولد!
صقر بتصريفه : يدي تعبت من حملها ماصدقت احطها بالطاولة
ثامر اخذ وشرب : اويلي يالعصير البطل
صقر جلس على الكرسي ويهز رجوله : يا يبه وش تقول عن البنت الي تبصبص بالرجاجيل؟
كلهم التفتوا له مستغربين من سؤاله ..ابو زايد : وش الطاري ؟
صقر : جاوبني
ابو زايد : ماتربت ولا مين تحط عيونها على رجال ماهو محرم لها
صقر زفر بعصبيه.. زايد مستغرب : شايف شي انت؟
صقر : لا ..عطني مفتاح السيارة
زايد مدر له المفتاح : وين بتروح؟
صقر أشر على يده : بغيرها
ثامر قام : يلا انا بسوق بك
رمى صقر المفتاح عليه من دون لا يرد وطلع ولحقه ثامر واهو يفتح السيارة ..
ثامر : وش علامك راجع و شياطينك راكبتك؟
صقر : يا ابن الحلال فكني من هالأسئلة
ثامر بهدوء : طيب
-
ببيت ابو نايف ..المساء
جابر : وش بقى؟
نايف حط يده على ظهره : تشوف نغير الزل ولا نخليه بس؟
جابر : لا ماينفع كل شي لازم يصير جديد
نايف : اجل هالموضوع على ابوي يجيب على ذوقه
جابر ربط ثوبه على خصره : يلا قم نشيل نخفف شوي
دخلوا للغرفة الي كانت بمساحة كافيه وحمام داخلي ..ام نايف دخلت واهي تبتسم : قواكم الله
نايف : ومن يقول
جابر : يمه وش رايك الزل يكون مشجر احمر ولا اخضر؟
ام نايف ناظرت ثواني : خلوه انا باخذ حليمه ونروح نختار على ذوقها
نايف زفر : اجل زين
جابر : هيه وين بتروح امش نطلعها
نايف رجع له : نسيتك
ام نايف طلعت من الغرفة الا بوجهه وضحى : يمه ابوي متصل يبي نايف يجي
ام نايف : ونياف ماهو معه يعني؟
وضحى رفعت كتوفها : مدري بس قالي خلي نايف يجي
ام نايف اشرت لها واهي ماشيه : ادخلي علميه
اول مادخلت ابتسمت بأعجاب : الله من زمان مادخلت هالغرفة وماقصرتوا والله ضبطتوها
نايف : تهقين بتعجبها؟
وضحى هزت براسها : حليمه حليله ما تخالف واجد
جابر ناظر نايف : اذا تبي مساعدات عندك ذي تعلمك وش تحب وماتحب
نايف ضحك : ايه والله
وضحى : طيب ابوي يبيك انهض له
نايف نفض التراب : بغسل وبروح له
-
عند سُلاف و جودي بالسوق ..
جودي تلفتت على مدار السوق : ذي وين طست!
سُلاف من وراها : وش احسن السايل ولا ولا الجاف؟
جودي فزت : خير وين رحتي؟
سُلاف : بالمحل وين يعني بروح!
جودي تأشر : خذي الجاف
سُلاف جلست بتعب : اجل روحي رجعي السايل تعبت من الفره
بعد نص ساعة خلصوا كل شي ، وطلعوا لبشير الي كان ينتظرهم..
بشير : ها ماما خلاص كل شي؟
جودي : اي
سُلاف : بشير خل السوالف عنك وخذ حملها بالسيارة
ركض لعندها واهو ياخذ الأغراض ..وركبوا السيارة
سُلاف : بشير انت اعرف صقر ؟
بشير : بيبي يافع؟
جودي : كل ذا و بيبي يا بشير
سُلاف : وفي غيره يعني؟
بشير التفت عليها بحماس : اي ماما في صقر ابراهيم صقر سالم
سُلاف : بس بس خلاص بيعدد لي كل صقور الديرة
جودي همست مستغربه : وش عندك تسألين؟
طنشتها وكملت : اهو كويس؟
بشير رفع كتوفه : مافي معلوم انا مافي شوف كثير
سُلاف واهي تعلج : ايـه زين
جودي : ورعه وش عندك تسألين؟
سُلاف : مدري جاء ببالي فجأه
جودي تغمز لها : ياحليلك شكلك على مشارف تنسين فلوحي
سُلاف سندت راسها على الدريشه وبهيمان : آه يا محلى هالطاري
جودي ناظرتها : والله ما ظنتي تنسين
-
عند البنات بالبيت ..
ليلى تناظر الساعة : حشى ثلاث ساعات كلها سوق
وريف : لا تنسين تراه يبعد عن الديرة
ليلى : طاب بطنك؟
وريف : توني شربت شي دافي وخف علي
دخلت وجود : السلام عليكم
ليلى : خلصتي؟
وجود بتعب : ايه انهد حيلي
وريف : عشان كذا ما احب دوري بغسيل الملابس تهد الحيل
وجود جلست تتقهوى واهي ساكته وبدون تعابير وريف وليلى ناظروا بعض مستغربين ..
ليلى فيك شي؟
وجود : لا ليش تسألين؟
وريف : مدري وجهك تغير مره
وجود : تعبت من الغسيل بس
ليلى : تعبتي من الغسيل ولا عزيز؟
وجود ناظرتها وشربت قهوتها واهي ساكته..
ليلى : ماتبين تتكلمين براحتك بس ترا واضح الزعل عليك
وريف : خلاص خليها براحتها
وجود : الصدق قررت قرار
كلهم بنفس الوقت : ايش هو؟
وجود : انساه فعلًا ، ما اتصنع قدامه اني نسيته
ليلى ابتسمت : اي والله زين تسوين
وريف : وان حصل وشفتيه بعد احقريه
وجود تنهدت : ذا الي بيصير
سمعوا صوت دق الباب ..ليلى : بقوم انا
فتحت لجودي و سُلاف الي داخلين بأكياس كثيرة بمساعدة بشير الي قربها لهم للباب..
ليلى تناظر الأغراض : ما عاد بقى الا تجيبون بشير بالكيسه
جودي بتعب : اقول احمدي ربك وناديهم يدخلونها داخل انا سُلاف خلصت مهمتنا هِنا
طلعوا وريف و وجود يدخلون الأغراض وفتحوها بالمحلق ومستانسين لتجهيزات زواج حليمه ..
وريف : سُلاف عاد انتي رسامه يعني يدك ماشاء الله فنانه بدعي بوجيهنا
سُلاف : وحده تحط وجها عندي اجرب ما ابي اجيب فيكم العيد
وجود انسدحت : يلا سوي لي