بعدك يابوي اصبحت دنياي عرجاء بلا عكاز

11

ببيت ابو زايد .. المغرب
صقر متمدد جنب امه : خلاص بتمشون بكره يعني
حليمه : ايه ان شاء الله
صقر : توصلون بالسلامة
ام زايد : عاد يمه موب تبطون خذي المهم وتعالي
حليمه : اسبوع بس وجايه وان تأخرت ترا من جميلة انا مالي دخل
صقر : لا تعجلينها يمه خلها تخلص اغراضها على رواق
ام زايد : اي عاد وانا امك العرس ترا ماهوب بعيد يعني بتقعد اسبوع وبيبقى اسبوعين عليه وانا ما ابيها وقتها تدور بالأسواق ترهق نفسها
صقر انسدح : عاد والله مدري عن سواليفكم انتم ابخص
ام زايد : يدك توجعك؟
صقر : لا كويسه تطمني
زايد دخل : حليمه جهزتي شنطتك؟
حليمه : اي
زايد : طلعيها طيب خليني اركبها السيارة
قامت حليمه ..ام زايد : قبل تطلعينها تأكدي يمه اخذتي كل شي
حليمه : ابشري
صقر : متى بتمشون؟
زايد : خلني احمل الأغراض وبروح اريح لي شوي عشان بالطريق اكون مصحصح
صقر : اجل شكلك بتمشي الصباح
زايد : لا لا على الفجر
صقر : زين واذا احتجتوا شي ازهموا علي (اتصلوا علي)
ام زايد : بتجلسون عند جميلة ببيتها؟
زايد : لا باخذ لنا شقه بغرفتين لي ولحليمه
ام زايد : عاد ها قفلوا البيبان زين
صقر ضحك : اهوه بدت افلام امي
زايد مبتسم : تشوف
ام زايد بزعل : هذا جزات الي تخاف عليكم؟
زايد ارسل لها بوسه بالهواء : يابعد عمري على هالخشم
-
بعد خمس ايام مرت على الجميع بشكل عادي مع برودة الجو الي كل ماله يزيد ..

ببيت ابو نايف ..
طلع جابر ..ام نايف : على وين؟
جابر : بروح مع العيال
ام نايف : لا تتأخر عشان ابوك
جابر : طيب
طلع وتوجهه للقهوه جلس وبتفكير يحك دقنه ، جاء وجلس واهو يدق الطاولة : يالطيب
جابر فز له : ياهلا والله
مصلح : لك البشاره
جابر : تكفى بشرني ترا النفس ضايقه
مصلح : لا لا تشيل هم البيت ولقيناه وحتى المبلغ الي معك يكفيه وزود
جابر : والله؟
مصلح : اجل استهبل عليك! بس ماهو بعيد
جابر : انا ابيه بعيد شوي عن بيت ابوي
مصلح : وش عندك تبي تبعد! وبعدين البيت ورا بيت ابوك
جابر واهو يتذكر ليلى : ناوي اتزوج
مصلح : في ذمتك!
جابر : بس اصبر لا تطير بالعجه خلني اخلص البيت اول شي
مصلح : الله يوفقك
جابر : امين .. عاد ها يا مصلح لحد يدري الين بعد عرس نايف ما ابي اسوي مشاكل بفترته
مصلح مستغرب من حكيه : لا ولا يهمك كل شي بيصير سكاتي
جابر ابتسم له براحه ماهو متأكد من موافقة ليلى بس على الأقل يوريها انو جاد بموضوع البيت المستقل : اشرب شاهيك
مصلح : ابشر
-
بالدمام عند جميلة وحليمه..
حليمه سحبت اللبس من يد جميلة : مجنونه! ماراح البسه
مشت وتركتها..
جميلة واهي تسحب سلوى بنتها معها ومعصبه : امشي يا بزر تعالي
حليمه لفت عليها متنرفزه : انا جايه اشتري ملابس سنعه وساتره!
جميلة مسكتها من زندها : تراه زوجك ماهو ولد الجيران
حليمه تكتفت : ادري زوجي بس ماراح البس عنده كذا
جميلة طنشتها واهي تاخذ لها اشكال وانواع تحت صدمة حليمه الي اتسعت عيونها : عمى عمى خـلاص!!
جميلة : وش خلاص! توني ما اخذت الا اربع
حليمه بملل : بتبقى بالدولاب صدقيني
جميلة : بيجي اليوم الي بتسحبيني انتي بنفسك تشترينها
حليمه : ايه اذا جاء وقتها يصير خير
جميلة تكلمها بهدوء تحاول تقنعها : حليمه حبيبتي انتي ما عادك بزر ترا! هالملابس طبيعي تنلبس لزوجك حتى انتي غيري وتدلعي خذي راحتك
حليمه بزعل : خلاص طيب خذي واحد
جميلة : باخذ كذا واحد
حليمه بترجي : شي ساتر طيب للنوم مو على طول بلبس كذا عنده استحي ترا
جميلة ابتسمت وقامت واهي شايله الملابس : ابشري يلا
بعد ساعة ونص فره بالسوق ..طلعوا لزايد
زايد : خلصتوا؟
جميلة : خلاص بكره اخر شي
حليمه : ليه وش بقى؟
جميلة همست : بكره بتعرفين
سلوى : خالي ابي بقاله
زايد : ابشري
-
و انطوت قصة اسبوعين و ثلاث ايام ..جابر اشترى البيت وللحين ما فاتح احد بالموضوع حتى اخوانه ، ام عزيز رجعت عشان زواج حليمه من عزيمة ام نايف لها ، وحليمه خلصت جهازها و جالسه تنتظر يوم زفافها بتوتر ..ابو زايد قرر يسوي العرس بمزرعته واهل الديره كلهم جايين وجملته للحين ترن بأذن حليمه يوم قال..
ابو زايد بين الكل : عرس بنتي بيكون بالمزرعه ، عرس كبير ما يليق الا بمقام أميرة ابوها ..
..
بقى يومين على العرس و عائلة ابو نايف و ابو زايد يحملون اغراضهم لروحة المزرعه بيباتون فيها الين ليلة العرس ..وبنات سليمان بيجون بطلب من حليمه و اصرار امها ام زايد عشان يخففون من توتر حليمه ..
نياف شايل الشنطه فوق راسه ويصارخ : يـا وضحى يا وضـحى
وضحى طلعت بغطوتها : ها وش تبي!!!!
نياف : ذي شنطة مين؟
وضحى : امي
نياف : لا يكون حاطه فيها جثة
وضحى : مناديني عشان كذا؟
نياف : قولي لأمي تجهز بسرعه ترا العيال سبقوني ماعاد بقى الا انا
وضحى لفت : ها هذي امي جت
ام نايف مستعجله : يلا يلا نياف بسرعه
نياف ركب الشنطة وربط الأغراض زين وشدها وركب الددسن ..و توجهه للمزرعة..
وضحى شغلت المسجل وبدت تصفق بحماس ..نياف عصب : لحد يشوفك يا مره
ام نايف مبتسمه واهي تناظرها : خل اختك تستانس
نياف : تروح تتمرقص هناك موب قدام الناس
وضحى : تراني بالسياره محد شايف
-
عند البنات ..
جودي تركض : بشير بس بقى هذي
بشير ماسك راسه : ماما مافيه مكان!
جودي بترجي : حاول تكفى ادعسها بأي مكان
وريف واهي تلبس عبايتها : يلا بنات حليمه متصله تقول كلهم اكتملوا..
ليلى بتوتر : الله يبعدنا عن ابو نايف واهله
الكل : امين
سُلاف : ماعليكم انا معكم
وريف : محد ناكبنا الا انتي اركبي بسرعه بس
وجود واهي توزع عليهم لحف صغيره من برودة الجو : تدفوا
سُلاف صرخت : الله امطرت
ركبت وجود بسرعه عشان ما تتبلل ..
توجهوا للمزرعه والحماس لفرحة حليمه طاقه مليون عندهم و لا يهون توترهم من ابو نايف وام نايف ..انفتح باب المزرعه الكبير وبشير يدخل بهم بالسيارة وريف واهي تناظر الرجال الي فوق الخيول ..عرفتهم لفت بسرعه : ليلى جابر
ليلى فزت تشوفه مع عيال عمه على الخيل ..جابر على اليمين ويساره نياف ومتوسطهم صقر و بالخلف ثامر كان يصور ويوثق كل شي بطلب من ام زايد ..
جودي مبهوره من منظر الجو و رش المطر و اشكالهم على الخيول : الله ابي اركب خيل
سُلاف وعيونها على صقر الي ماكان منتبه لها همست : جرحه شكله برى
ليلى لفت عليها : تكلميني؟
سُلاف هزت براسها : لا
بشير : وين انت انزل ؟
وريف تلتفتت ماتدري من وين بيدخلون بالضبط ..نزلت من السيارة واهي تنزل برقعها من على عينها لمحته جاي : ياخوي وين نروح؟
زايد الي عرفها ونزل عيونه واهو يأشر : من الجهه الثانية من الجهه الثانية
جت بتركب بس زايد وقفها : مايحتاج السيارة امشوا على رجلكم السيارة هذا حدها ، سمعوه البنات ونزلوا واهم يشيلون اغراضهم بمساعدة بشير ..جاء زايد : وخروا احنا نشيلها
وريف : لا لا ماتقصر
زايد من دون لا يناظرها : ادخلوا يالنسوان واغراضكم بتجيكم
لف على العيال ويأشر لهم : تعالوا
جو نياف و صقر الي اول ماشافته سُلاف دخلت عشان ما يشوفها و ثامر مستمر يصور حتى بنات سليمان لف الكاميره عليهم ..
جابر بعصبيه واهو على الخيل : ياولد
ثامر بفهاوه : هلا
جابر : نزل الكاميره لا تصورهم
ثامر طفاها : طيب
جابر شد لجام الخيل ولفه من الجهه الثانية وراح وعيون ليلى عليه ماتدري وش السالفه عصب ولا ناظرها حتى واهي متأكده انه شايفها
دخلوا ورحبوا فيهم ترحيب قوي كعادة ام زايد وبناتها و فرح و وضحى..
-
عند الشباب الي رجعوا الخيول لـ الأسطبل ..
جابر يغسل يده و ضايق صدره ..صقر : وش بلاك؟
جابر : شايف اللثمه ؟
صقر تنهد : وش بتسوي يعني؟
جابر بعصبيه : العيون كلها طالعه
صقر الي ما لاحظ سُلاف ، توقع كعادتها ماتحضر : جاين كلهم؟
جابر بصدق : ما انتبهت الا عليها
مشى واهو ومسك ثامر : عطني الكاميره
ثامر مستغرب منه حركاته : خذ
جابر اخذ الشريط الي طلعت فيه وحطه بجيبه ورجع الكاميره لثامر الي كان قاعد بالخيمه ..ثامر : وش صورت؟ ختمت كل المزرعه تصوير
جابر : انتبه لها لليلة العرس تصور
ثامر : ادري
دخل زايد الي شايل الحطب معه : وخروا وخروا
ابعدوا و رماه بمكانه ..وبدوا يشبون النار يدفون شوي من برد الجو
ابو نايف دخل : قاعدين هنا ونايف و ابو زايد والعمال يشتغلون؟
نياف : يبه السما تمطر وش لون بنقيم الخيام و نفرش الزل بهالمطر؟
ابو نايف بعصبيه : قم انهض على حيلك العرس ماعاد بقى عليه الا يومين وانتوا الخيام للحين ما ثبتوها
زايد بهدوء : ابشر ياعمي اجلس انت وبنجهز كل شي
طلعوا واهم يرفعون ثيابهم على خصورهم ..ناظروا بعض واهم صافين بنفس الصف ..
ثامر : اخر اثنين اهم الي بيثبتون الخيام ..
ركض ثامر بسرعه ولحقه صقر الي يصارخ : اخوك انا لا تسبقني
جابر ركض بأسرع ماعنده وتعدى ثامر ..ثامر ويالله صوته يطلع : اهب ياوجهه
زايد و نياف الي كانوا يحاولون يسبقون بس طاحوا بالطين ..
وقف صقر وانحنى من الضحك على اشكالهم ، جابر جلس بالأرض ياخذ نفس ويضحك بنفس الوقت ، اما نياف الي وقف بصعوبه من الطين الي غطس فيه وزايد للحين على حاله منسدح على جنبه ماهو مستوعب..
ثامر ميت ضحك : الرجال ماعاد تحرك
جابر وقف واهو يكح من الضحك ويمد يده لزايد : قم
زايد : لا بارك الله بلعبكم يالبزارين انا وش خلاني اركض معكم
صقر مسك يده الي شدت عليه واهو يضحك وفجأه تغير وجهه : عمي عمي ياعيال جاي
لف وركض وقاموا كلهم يلحقونه واهم يتلفتون ورا واهم يشوفون ابو نايف طالع عليهم من الخيمه بعصاته وواضح انه معصب ..
صرخ ابو نايف : تعالوا ياعيال الكلب تعـالوا
جابر واهو مستمر يركض : اركضوا لا يوقفكم شي
دخلوا للأسطبل ياخذون نفس ..
نياف ووجه نصه طين : يا كنا بناكلها اكل
صقر : انت ماكلها وخالص
ورجعوا يضحكون الا على دخلت نايف واهو معبس : عرسي بعد بكره وانتوا هنا ما وقفتوا معي؟
زايد : والله اننا جايينك بس شايف اشكالنا؟
نايف ماسك ضحكته : وش الي مسوي فيكم كذا؟
ثامر : تسابقنا وذولي قبعوا بالطين
نايف : روحوا روحوا غسلوا و صقر وثامر تعالوا معي ..
-
عند البنات الي دخلوا غرفة مخصصه لهم ورتبوا اغراضهم ..سُلاف فتحت الدريشة: خلنا نشم هواء ربي
وانصدمت: بنات تعالوا شوفوا ..ركضوا كلهم ناحية الدريشه..
وريف تبعد راس ليلى : وخري بشوف
ليلى : اي لا توجعيني
جودي ضحكت : ركضهم يضحككك
ماهي ثواني الا يشوفون نياف طايح و طاح بعده زايد والعيال وقفوا يضحكون ..وجود واهي ميته ضحك : بنات من الي قعد؟
ليلى مبتسمه وبهدوء : جابر
كلهم نظرهم صار عليها لوهله ورجعوا يناظرون بألي قاعد يصير ..وجود ابعدت واهي تضحك : خالد طلع عليهم ياويلهم
سُلاف الي كانت تناظر صقر يضحك وماسك يده وبلمح البصر صرخ وركض وركضوا وراه وابو نايف يصارخ يناديهم ..
وريف واهي تضحك : خلاص ابعدوا ابعدوا لا يشوفنا خويلد بعد ويجينا
جودي واهي قاعده بالارض وماسكه بطنها : يا اشكالهم تحفه تحفه
ليلى : ياعمري الي طاحوا شكلهم توجعوا
طق باب الغرفة ..سُلاف : تفضلي
فرح : تعالوا تقهوو معنا ..البنات : يلا
عدلوا اشكالهم بشكل سريع وطلعوا بشيلاتهم ..
-
عند النسوان بالخيمه ..
جميلة : وين البنات؟
ام زايد : راحت فرح تناديهم
وضحى وحليمه دخلوا واهم شايلين صواني..
ام نايف : من مين؟
وضحى : بنات سليمان جايبينها
ام زايد : يا حليلهم
ام نايف سكتت واهي مقرره ما تتكلم ولا تسوي شي مو على شانهم لا ما تبي تخرب وتنكد بشي وعرس ولدها قريب.
جميلة لوضحى : قريبه لمنا
وضحى تمده لها : خذي
دخلوا البنات مع فرح ، وجلسوا وبدت سوالفهم ..
ام نايف: حليمه للحين متوتره ولا ؟
حليمه ابتسمت : لا عادي
ام زايد : يالله ياربي انك تتم هالليالي على خير وتفرحنا بعيالنا
الكل : امين
جميلة تمد لسلوى الأكل : خذي
سلوى: ما ابي
جميلة : كلي ما اكلتي شي
ام زايد : تعالي وانا امك عندي
جميلة : يمه حاولي فيها تاكل وجها مصفر
وريف : يازينها يختي كبرت ماشاء الله
وجود مبتسمه : يوم كبرت صارت تشبه لك
جميلة بفرحه : صدق؟
ام فرح الا صادقين بالذات العيون
سُلاف وقفت وهمست لليلى: بروح الحمام
ليلى لوضحى : الحمامات وينها؟
وضحى مسكت سُلاف : تعالي معي
وام نايف تناظرهم وكشرت ماتبي وضحى تكلمهم ..
-
عند الشباب الساعة ٩ الليل ..يجهزون فرشهم
ثامر يدف نياف : ابعد ابعد مناك
نياف بتعب : ثميروه تراني تافل العافيه وخر خلني انسدح
نايف : اسكتوا خلونا ننام
نياف بعصبيه : القلق ذا ازعجني
زايد الي كان منسدح ظهره ويده على عينه : ثامر لو ما تسكت بترقد عند الخيول ترا
ابو زايد واهو ينسدح : محد صاحي فيكم الا جابر
كلهم ناظروه ..نياف : ماشاء الله مسرع مانام
جابر واهو على جنبه ومغمض عينه : انتوا تخلون الواحد ينام؟
ابو نايف دخل الخيمه واهو يمسح وجهه من المويا : ذولي للحين مارقدوا!
نايف : خلونا نصبح ونخلص الخيام بدري عشان لا جاء العرس ما نتقروش
ابو زايد : ايه والله صادق
سكر ابو نايف الخيمه و طف نورها الي كان منور الخيمه بمصباح كبير ..بعد خمس دقايق دخل صقر واهو يحاول ما يوطى احد ..صرخ ثامر بألم : وجهي يا اعمى
صقر سد فمه وهمس : اسكت ماشفتك
ابو نايف بغضب : ثـامر
ثامر : معليش يا عمي
انسدح صقر واهو ماسك ضحكته حس بملامح وجه ثامر برجله يوم وطاه..
صقر همس له وبنبرة صوته الي تهتز من كتمته لضحكته : شكل بيجي العرس و وجهك مطبوع
ثامر عصب : اقول نم لا اقوم واطبع وجهك انا
جابر الي كان جنبهم : يبه شف صقر وثامر ماخلونا ننام
ابو نايف : اني سامع حسهم ..بسمع حس مره ثانيه بينطردون
وبشكل مفاجئ عم الهدوء بالخيمه و شوي شوي كل واحد راح بسابع نومة ..
-
بغرفة البنات ومعهم فرح ياكلون من الحلويات ويسولفون..
دخلت حليمه : وما تنادوني!
وريف : تو وضحى طالعه لك
فرح : ياربي عسى محد يمسكها ويشرشحونا على هالسهره
حليمه تربعت وتصب لها قهوه : تبون نطلع؟
جودي بحماس : وين؟
حليمه : اكيد العيال نايمين امشوا نتمشى محد شايفنا ونرجع
وريف : روحوا انتوا انا صراحه خوافه
حليمه : ياشينك بس والله ان تجين
وريف : و الرجال؟
حليمه : مالهم حس اكيد نايمين وبعدين ولو طلعوا بنكون بغطاوينا
جودي : بنشوف الخيول تكفون تكفون
حليمه : تمم
دخلت وضحى : بنات مالقيت..انتي هنا وانا ماخليت مكان ادورك فيه
حليمه : اقول وين جميلة؟
وضحى : نايمه مع بنتها
وريف : صدق ولدها ماشفته
حليمه : بيجي مع ابوه
فرح وقفت : يلا قوموا نطلع
نقزت سُلاف واهي تاخذ لثمتها وطرحتها بدون العبايه ، وكذلك البنات قلدوها ..طلعوا شوي شوي يتسحبون لبرا
وضحى نقزت على عتبة الباب الخارجيه : اه اخيرًا طلعنا
وجود ضربتها : اسكتي لا يسمعونك
كملوا مشيهم بشويش ويسولفون عن المزرعه بهمس ..جودي : وين الأسطبل؟
حليمه : من الجهه الثانية امشوا
وريف بخوف : خلاص بنات ابعدنا ترا
ليلى مسكتها : يوه ياوريف امشي نستانس
كملوا طريقهم الين الأسطبل ..وضحى : ندخل؟
حليمه بخوف : لا لا اخاف يسمعون صوتهم
جودي طلت براسها وطلعته : بخاطري اركب تكفون
حليمه : بقول لواحد من العيال يركبك بس اهم شي تعرفين؟
جودي : لا بس ودي بفره
فرح بخوف : بنات فيه صوت صح؟؟
كلهم سمعوا الصوت ومن الخوف دخلوا الاسطبل وسكروا الباب ..وجود بخوف : يمه!
وريف :شفتوا قلت لكم لا نطلع بس ماتسمعون
وضحى بهمس : اشش وريف اسكتي
كانوا يسمعون صوت مشي على الأغصان ..ثواني وسمعوا صوت القطوه ..
سُلاف زفرت براحه : قطوه يا غبيات
ضحكوا بشويش واهم يطلعون وركضوا بأسرع ماعندهم لقسمهم ماعاد فيهم حيل يمشون بشويش من بعد خوفهم
-
الصباح ، بالمزرعة بقى يوم على الزواج..
وريف واهي تكوي لبسها : ليلى جيبي فستانك اخلصي اكويه قبل اسحب عليك
ليلى قامت من فراشها : لا لا اصبري
فتحت شنطتها وطلعت كل اغراضها وعبست بضيق : خير وينه!
فتحت الأكياس تدوره ولا لقته وراحت تفتح اغراض خواتها تدوره برضو مالقته ..لفت على وريف : شكلي نسيته
وريف شهقت : لا تقولينها!
ليلى بزعل : والله مالقيته
وريف قامت تدور معها ولقته : انتي وين تتذكرين حطيتيه؟
ليلى : بالشنطة كل شي دعسته فيها
وريف : تهقين بالبيت؟
ليلى : لا ياربي مو وقته
دخلت سُلاف وشايله لبسها تعلقه : خلصتوا؟ امشوا نفطر
وريف : اختك ناسيه فستانها
سُلاف : تستهبلين؟
ليلى جلست واهي متنكده : ياربي مني ياربي اف
سُلاف تعالي ندور التليفون نتصل على بشير يجي ياخذك ، قامت ليلى بسرعه واهي تلبس غطوتها ..دخلوا بخيمة النسوان
سُلاف : ام زايد الله يعافيك وين التليفون؟
ام زايد : ماعندنا تليفون هنا
سُلاف عضت شفايفها ولفت على ليلى : رحتي فيها
وضحى : ليه وش السالفه؟
ليلى : نسيت فستاني
وضحى : يالفاهييه وش بتسوين؟
ليلى : ابي بشير يجي اجيبه من البيت
ام فرح قامت : لا ماعليك اصبري بس
طلعت وليلى تناظرها ماتدري وش بتسوي ..جلست واهي متنكده بالمرره ووجها احمر من الزعل..
ام نايف وحليمه و وجود و جودي بالمطبخ..
جودي : اطلعي انتي عروس مايمدي تطبخين
حليمه : يوه يابنت الحلال خليني بس اسوي شغلي
جودي مسكتها من كتوفها واهي تطلعها : برا برا ماعندنا عرايس ينكرفون قبل عرسهم بيوم
حليمه تأففت وابتسمت: طيب
ام نايف بهدوء : وجود اعطيني السكين
مدت لها وبدأوا يشتغلون مع بعض بدون ولا كلمه ..
-
عند الرجال..
ام فرح دخلت عليهم واهي تسلم : وش اخباركم؟
ردوا عليها .. ام فرح : من الي فيه شده يروح للديره الحين؟
زايد : امري وش بغيتي؟
ام فرح : ما مايمر عليك عدو ..بس بنت سليمان ناسيه لبسها بالبيت وتبي تجيبه
زايد : خلاص خلي حليمه تجي معها و اوديهم
ام فرح ارسلت له بوسه بالهواء : لبى قلبك
ابو نايف : مريم
ام فرح وقفت ولفت تناظره : سم
ابو نايف: منهي اي وحده؟
ام فرح : ليلى
جابر الي كان منسدح فز ..
ابو نايف لجابر : قم انت
زايد : ماعليه ياعمي انا بروح
ابو نايف : انا قلت جابر قم و اعرف شغلك
قام جابر واهو فاهم وش يبي ابوه ..ام فرح راحت تنادي ليلى و وضحى ..ليلى ماتدري انه جابر ركبوا السياره وجاء بعدهم وركب واهو يسلم .. جتها ام الركب حتى السلام ماعرفت ترده تفشلت تحس موقفها ماله داعي ..
وضحى واهي تشغل المسجل : بشغل اغنية
جابر بهدوء : شغلي
وضحى كانت متعمده تشغل شي عالي عشان الجو المشحون الي صاير ..بعد ساعة وصلوا للبيت ونزلت ليلى بسرعه تجيب الفستان ..
عند وضحى وجابر
جابر مسكها من يدها بسرعه : اسمعي
وضحى فزت : بسم الله وش بلاك!
جابر : بروح اكلمها
وضحى انصدمت : وشـو! انهبلت انت
جابر : وضحى يرحم امك لا تسكرينها بوجهي اقعدي بالسيارة خمس دقايق بس بكلمها
وضحى بتوتر : تدخل بالبيت عندها! مستحيل والله بعلمها ترا
جابر عصب : وضحى! اعقلي وخلك راكده وانتي عارفتني مالي بذا الحركات انا بوقف هنا عند الباب امداها تغطت وبكلمها
وضحى : طيب
نزل جابر ودخل لعند الباب ودخل يده بجيوبه ووقف ينتظرها مالها ثواني الا جايه ، كانت مستعجله لا تطول عليهم بس رجعت على ورا متفاجئه : وشو صاير شي؟
جابر بدون مقدمات : شريت البيت يا ليلى
ليلى مافهمت وش يقصد: اي بيت؟
جابر : بيتنا ، بخطبك مره ثانيه و وافقي
ليلى بزعل : جابر ليش تسوي كذا؟
جابر لف للباب واهو يسكره شوي وأشر لوضحى تجلس لأنها كانت بتجي .. تقدم لليلى بسرعه واهو يمسكها من زنودها : كل ذا ماهو باين بعينك؟
ليلى خافت منه : ابعد
جابر احتدت ملامحه من العصبيه : تكرهيني؟
ليلى توترت : لا
جابر : يابنت الحلال ارحمي قلب مغليك والله اني شاريك وابيك ..وافقي
ليلى دمعت عيونها : طيب فكني
شد عليها اكثر قرب لعند اذنها وهمس : والله ان تنقلب الديره لو تصيرين لغيري
ابعدت عنه واهي تضبط لثمتها وتمسح دموعها ..جابر : يلا اركبي
طلع برا واهو شايف وضحى واقفه عند باب السيارة وميته توتر
جابر بعصبيه : اركبي انتي الثانية وش نزلك!
ركبت وضحى على طول من الخوف ولفت تناظر ليلى الي واضح على عيونها البكي ..قلبها رجف خوف ان اخوها سوا شي
طول الطريق كان هدوء ، وصلوا للمزرعه ونزلت ليلى بسرعه ولحقتها وضحى : وش سوا؟
ليلى : ولا شي
وضحى تنرفزت : اقول تكلمي اخلصي
ليلى تلفتت وتكلمت بصوت واطي : يقول بيخطبني
وضحى بشك : بس؟
ليلى : ايه
زفرت براحة وسحبتها للمخزن ووقفت قبالها: بقولك شي بتصدقيني؟
ليلى : تكلمي صبت عظامي
وضحى : ابوي كان يبيك لنايف ويوم درا جابر وقف وقال انا الي ابيها ولما ابوي وافق انتي رفضتي وابوي عصب على جابر و قال له كلام ماينقال ..الصدق يوم جابر فز وقال انه يبيك شكيت ان بينكم شي بس يوم رفضتيه راحت هالشكوك
ليلى واهي تسمع بهدوء : كملي
وضحى خنقتها العبره : يعني لا تخافين على نفسك من شخص وقف قدام خالد على شانك
ليلى سكتت ماتوقعت ان جابر اهو الي اختارها ، توقعت ابوه متدخل بكل تحركاته..
وضحى : تكفين ارفقي بقلبه
ليلى حضنتها : خلاص هدي
وضحى : بتوافقين؟
ليلى : عطيني وقت افكر
وضحى ابتسمت : تعرفيني ياليلى ما ارضى بالظلم والله لو ادري ان اخوي جابر ماهو كفو لك ما بكيت خوف على قلبه لا ينفطر
ليلى تنهدت : مطولين هِنا؟
وضحى وقفت بسرعه : لا لا امشي ندخل لا يشكون فينا
-
عند الرجال .. الساعة ١١ الصباح
نياف رمى نفسه بالأرض : كرفت لعشر سنين قدام
صقر لبس جاكيته يغطي جرحه الي نزف : لو ادري اني بتعب كذا مازوجته اختي
نياف ناظروا للخيمه الي كانوا قاعدين فيها ابو نايف و ابو زايد ونايف يتقهوون : شف مروقين وهادين حيلنا
جابر جلس واهو يربت على كتفه ويقلد نبرة ابوه : الرجال بيتزوج لا تتعبونه بليلة زواجه
نياف : ابن المحظوظه
جابر ضحك : اذكر ربك ياشيخ!
صقر كان ماسك يده ويناظر الأرض بتعب ..جابر : وش فيك؟
صقر ابتسم بتسليك : سلامتك
نياف وقف : امشوا نبدل ونريح
قاموا ودخلوا لقسمهم ..زايد طلع لهم واهو ينشف شعره بالمنشفه: وين كنتوا؟
نياف : ادخل لا يلفحك البرد مجنون انت
زايد لف الشماغ على راسه : ها يالنياف الحين يمديني اطلع؟
نياف : اطلع
دخل صقر للغرفة واهو يفصخ ثوبه يشيك على جرحه : اشوا موب كثير
دق باب غرفته وفتح له ..ثامر : ابوي وعمي ينتطرونا ترا
صقر : يلا دقايق بس اغسل والبس
راح ثامر يلحق زايد و جابو ونياف وصقر يحاولون يسرعون عشان ابو نايف ما يقلب عليهم..
-
بالمطبخ عند النسوان ..
سُلاف تقطع البصل وعيونها تدمع : اه يا عيني
ليلى : خلاص وخري خليني اكمل
سُلاف : ماعاد بقى شي خليه
ام زايد دخلت المطبخ واهي تبتسم : قواكم الله يا بنياتي
ليلى : الله يقويك ..تبين شي؟
ام زايد : بساعدكم
ليلى وقفت واهي تسحب ام زايد لبرا : عندنا قانون العروسه و امها مايدخلون المطبخ
ام زايد : بس يابنتي بتتعبون خلوني اساعدكم
ليلى : متعودين وبعدين فرح و وريف بيجون بعد شوي
ام زايد : زين اجل اذا احتجتوا شي نادوني
سُلاف غسلت يدها ومسحت دموعها : الله يجزاني الخير استلمت اصعب مهمه
ليلى: انتي تحبين الشقى اقولك خليني اكمل عنك رفضتي
دخلت وريف واهي شايله الصينيه : تأخرت عليكم؟
سُلاف : لا
وريف : يلا بغسلها وبركب الغداء
فرح : انا بغسل المواعين هاتي
كل واحده اخذت شي تسويه عشان يخلصون بسرعه ..ماجت الساعة ١ الا والبنات طالعين من المطبخ نظيف و الأكل جاهز ..
ام نايف تشم ريحة الأكل : تسلم يدك يا وريف
وضحى لفت على امها مستغربه من روقانها ..
وريف ابتسمت : كلنا تساعدنا فيه
حليمه : يازينكم بس ماتقصرون والله
فرح تخصرت : يلا ماعاد بقى الا الزوج كل شي جيده فيه انا
ضحكوا البنات عليها ..قاموا جودي و وجود وام فرح ينكبون الغداء ويقسمونه لهم وللرجال ..
-
الساعة ٤ العصر
طلعوا الرجال لبرا واهم ينادون النسوان كعادتهم بالمزرعه لازم يجتمعون ..
وريف : نطلع معهم ولا اشكالنا غلط؟
جودي : خلينا قاعدين احسن
ليلى : طيب دامنا بنقعد هنا لازم لنا قهوة و خرابيط نوسع صدورن..
انفتح الباب بسرعه ..فرح واهي تنفس بسرعه : خالي يافع يقول خلهم يطلعون يجلسون معنا
وجود : لا لا يمه ما نمون على رجالكم خير
فرح : امشي بس ترا الرجال يمين واحنا يسار
وريف : حتى ولو خلينا هنا بس
فرح طلعت : بعلم بقول مايبون
راحت تركض وهدت لما قربت تطلع : خالي ما يبون
ام زايد وقفت : بروح لهم انا
وبعد اصرار دقايق عليهم طلعت ام زايد بغطوتها واهم وراها بلثمتهم ..نياف همس لجابر واهو يبتسم : ام العيون الزينه جت
صقر على طول لف عليه بعصبيه : نـياف!
نياف : خلاص سكتنا
جلسوا البنات بجهة اليسار جنب بعض صفه وحده واهم يشوفون مزح و استهبال العيال مع البنات ..وحليمه الي ماطلعت عشان مايشوفها نايف قبل الزواج ونايف تدور عيونه يحاول يلمحها
وجود ابتسمت وهمست : بنات شوفوا نايف كيف يدورها
ليلى لفت عليهم واهي تهمس: ياعمري يا حليمه وش هالجديه الي طاحت فيه
سُلاف ناظرتها بطرف عين واهي تقصد جابر : ولا يهون الي جنبه
طاحت عيون ليلى بعيون جابر الي جالس طول الوقت يناظرها..كانت تتجاهل وجوده بس يوم شافته كيف يتأملها وواضح معصب توترت ..
سُلاف : لا تخافين ماراح ياكلك بس شكله غيران على عويناتك الحلوه
ليلى تنرفزت : ماله دخل بلثمتي
جودي مستغربه : سُلاف
البنات كلهم التفتوا عليها ..سُلاف : وشو؟
جودي : انتي طاعنته بيده ولا عقله؟
اتجهت نظراتهم ناحية صقر الي يناظر سُلاف ويبتسم..
وريف ضحكت : لا والله شكله عقله
سُلاف انصدمت : عمى ذا ليش يبتسم كذا قدام اهله!
استمرت سوالفهم مع بعض بعد ساعة ونص ..قاموا البنات بيروحون لحليمه ..
وريف : اكيد انها طفشت لحالها
ام زايد : اي زين تسوون
مشوا وتركوهم ..وابو نايف كانت عيونه على جابر الي ملاحظ انه من جلس معصب ويناظر بليلى ..
و كان متجاهل البنات تمامًا وهذا الي ريح البنات حتى ام نايف هاجده شياطينها ..
-
مر اليوم ومشاعره تختلط مابين التوتر والحماس والتعب!
توجهوا الكل للنوم ..و المزرعه صارت هادية ماينسمع فيها الا رشاشات المويا تسقي الثيل و النخيل و الهواء البارد الي يهب فجأه ويرجع يهدا..اصبحوا على اذان الفجر والكل من بعدها ما ذاق طعم النوم من فرحتهم و حماسهم .. جودي فتحت الدريشة واهي تشوف العيال على الخيول يتسابقون و ابو زايد يصفق لهم بينما ام زايد يدها على قلبها تناديهم : شـوي شـوي
جودي لفت بزعل : بنات بنروح وانا ما ركبت الخيل
وضحى وقفت وسحبتها : امشي والله ما اخليها بخاطرك
طلعوا الثنتين برا ووضحى تنادي نياف : تعال
مشى لناحيتهم بالخيل وعيونه على وضحى : وشو؟
وضحى تأشر لجودي : ركبها
نياف ناظرها : تعرفين؟
جودي هزت براسها بـ لا
نياف نزل : طيب تعرفين تركبين؟
جودي : بحاول
علمها كيف تركب الخيل وبمساعدة وضحى لها ركبت وضحكت : وضحى لا تبعدين امشي حولي
نياف لازال ماسك اللجام ويمشي بالخيل ووضحى تناظرها: ها سليتي؟
جودي بحماس : توني توني
نياف واهو شايف العيال جايين بالخيول بسرعه وبدأ خيله يتحرك بسرعه ، اختفت ابتسامة جودي وتوترت : وش فيه ؟ وش فيه؟
نياف يحاول يتحكم بالخيل واهو يأشر لهم يغيرون مسارهم لا يجون عند خيله بس الواضح محد ملاحظه ومستمرين يتسابقون بخيولهم نياف ابعد وضحى بيده عن الطريق : وخري
وركب ورا جودي بسرعه ولف اللجام وغير مسار الخيل وبدا يركض خيله بسرعه جنونيه وبلمح البصر اخوانه وعيال عمه بالخيول جنبه واهم يناظرون الي معه ..نياف واهو يصارخ : غيروا مساركم
جودي وقتها ماعاد تقدر تتحمل فكت يدها من اللجام وغطت وجها لو يدين نياف ماهي محاوطتها واهو ماسك اللجام كان طاحت ..العيال هدوا بخيولهم وغيروا مسارهم واهم مو عارفين من الي معه ..دقايق ورجع واهو نازل من الخيل و جودي فوقه تبكي ..تكلم بعصبيه واهو يشوفهم واقفين : م•• والدين انتم! ماتشوفوني أشر لكم روحوا المسار الثاني!
ثامر : واحنا وش بيخلينا نشوفك من هالمسافه
زايد : انت الغلطان عارف هالمسار للسباق تمشي بخيلك شوي شوي ليه!
وضحى نزلت جودي الي كانت تبكي ..صقر بهدوء : خلاص يابنت الناس ما صار شي
نياف لف عليها : يوجعك شي؟
جودي هزت راسها بـ لا ..اخذتها وضحى ودخلتها واهي مو مصدقه الي صار ..وضحى : والله مادريت اسفه
جودي خانقتها العبره : حصل خير
شافوها البنات وجها محمر من البكي
جميلة : وش فيك؟؟
وضحى علمتهم بالسالفه ..ليلى شهقت : ركب وراك!
جودي بكت مره ثانيه من الفشله ..وجود ضربتها : فشلتيها اسكتي
ليلى : زين محد من الكبار شافكم
وريف بعصبيه : ليلى انطمي ماتشوفين البنت تصايح
جميلة : عادي يا حبيبتي اهم شي انك بخير الحين تعالوا تعالوا نفطر