بعدك يابوي اصبحت دنياي عرجاء بلا عكاز

18

عند البنات بعد ما حطهم صقر بالبيت ..
جودي بصدمه : ماتوقعت حليمه حامل ابد
وريف : الله يكون بعونها الموقف الي حصل مره ماله داعي
سُلاف واهي متسنده على المركى : الصدق ماتوقعت علاقتها بنايف سيئه ما وضح عليها ابد
وريف : يختي البيوت اسرار واكيد ماراح تمشي وتتكلم بعلاقتها الزوجيه
سُلاف : اكيد
وجود : عيوني كانت على نايف طول الوقت ملامحه بدون تعابير الله يستر على حليمه
وريف : مسكينه يمكن كانت بتسويها مفاجئه يعني مو شرط بينها وبين نايف شي
جودي : اف خلاص بنات سكروا السالفه ماعلينا من احد المهم انها بخير
وجود الي تبي تغير الموضوع : ليلى ماقالت متى بتسافر؟
وريف : لا ما امدانا نسولف حتى بس مصيرها بتجينا
سُلاف : دام ماتعشينا امشوا نسوي شي ناكله ميته جوع
وجود : يلا مشينا..
-

بييت ابو نايف ..
كان الكل جالس بالملحق والسكوت سيد الموقف ..
ام نايف ناظرت وضحى واهي معصبه : بين حليمه ونايف مشاكل تدرين عنها؟
وضحى هزت براسها واهي فعلًا صادقه ماتدري عن شي : والله مدري بس اشوفهم عادي يتكلمون مع بعض
ابو نايف بعصبيه : اجل حملها ليش يعرفه الحين ماهو من بدري!
وضحى بخوف : تقولي مادرت الا متأخر وقررت تعلمكم كلكم بس قدر الله وماشاء فعل
نياف بنرفزه : تحققون مع وضحى وش دخلها اهي خلاص
ابو نايف بعصبيه : انت اسكت ولا كلمه
ام نايف تنهدت : الله يستر بس لا تجي المصايب من ورا هالاثنين
ابو نايف وقف وتكلم بحزم : يلا كل واحد على فراشه
وضحى : يبه ماقال متى بيجي؟
ابو نايف بعصبيه : ما ادري عنه اهو ومرته بالطقاق الي يطقهم
ام نايف ناظرته وهمست : بسم الله عليهم
-
ببيت ابو زايد ..
ام زايد واهي تبكي : لو انكم مخليني عند بنتي موب احسن قلبي يوجعني عليها
جميلة : يا يمه الله يهديك شفتينا ما رجعنا الين تطمنا عليها حالتها مستقره وجنينها بخير وش تبين بعد بكره ان شاء الله تشوفينها
ابو زايد والضيق واضح عليه : خلاص يا ميساء فقعتي روسنا بذا الصياح الي فينا مكفينا
صقر الي كان جالس ويهز رجوله بعصبيه ..زايد حط يده على فخذه ..
زايد : هد
صقر يتكلم بصوت واطي و العصبيه واضحه بملامحه : اقسم بالله لو ادري ان نايف مسوي لها شي اني لا اكسره تكسير
زايد بحزم ورزانه : اعقل وخل الأمور تهدا ونفهم منهم بعدين
ثامر بهدوء : يبه
ابو زايد ناظره : ها
ثامر نزل عيونه : نسيت مركاك بالبر
ابو زايد ناظره وكشر بوجهه : وهذا الي فالح فيه
جميلة ضحكت بعز ضيقتها : ياربي ياثامر انت وين واحنا وين
ثامر الي يبي يلطف الجو لأن بعادته مايحب هالجو الكئيب : اجيب لك مركى جديدة ولا يهمك
ابو زايد وقف وثامر ابعد عنه بخوف ..
ابو زايد : بروح ارقد مانيب جالدك ارتاح
ثامر زفر براحة : الحمدلله
قبل لا يطلع التفت لأم زايد وجميلة : لو ادري ان عندكم علم بألي بين نايف وحليمه مايصير لكم طيب
جميلة شهقت بخفه : والله ما ادري عن شي
ام زايد ناظرتها : خليه يهدد لين يطيح الي براسه
-
يوم جديد ، الظهر بالمستشفى..
نايف وقع على اوراق الخروج و توجه لغرفة حليمه الي لما دخل عليها كانت تلبس عبايتها ..
نايف ببرود : يلا
حليمه شالت شنطتها واهي ساكته كانت حاسه بألم ببطنها بس ما تكلمت له ..
نايف : بروح اقرب السيارة خلك هنا
طلع وتكتفت تنتظره واستغلت عدم وجوده وتوجهت لأقرب ممرضة ..
حليمه : لو سمحتي
الممرضة ناظرتها : نعم مدام
حليمه بتردد : ابي الدكتورة
الممرضة : اجلس هنا شويه بس
حليمه : لا ابيها الحين ضروري رجاءً
الممرضة ناظرتها بملل وتأففت بخفيف : الدكتورة عندها مريض
لفت على بوري السيارة وتوجهت له ..
الممرضة تناديها : مدام اصبر شويه
حليمه ناظرتها : خلاص شكرًا
طلعت وركبت السيارة جنبه واهي تعدل شيلتها ..
نايف : وش تقولك؟
حليمه : ولا شي
نايف ناظرها : بتقولين ولا انزل اسأل؟
حليمه بنرفزه : بطني يوجعني وابي الدكتورة بس صارت مشكلة يعني
نايف وقف السيارة بمكانها المخصص ونزل : انزلي
حليمه ناظرته : وشو؟
مشى تاركها ونزلت من السيارة واهي تسكرها وتتأفف بعصبيه ويدينها على مكان الوجع الي ببطنها ..
الممرضة : ماما انتي مافيه اسمع قول انتظر ليه روح
حليمه بملل : طيب اكشفي علي انتي
الممرضة جلستها : ايش مشكل؟
حليمه تأشر على بطنها : انا حامل و بطني يوجعني
الممرضة طلبت منها تنسدح على السرير وبدت تكشف عليها ..
الممرضة : مغص طبيعي مافيه مشكله مدام
نايف الي كان متكتف ويناظر بتدقيق : متأكده؟
الممرضة هزت براسها : ايه
طلعوا من المستشفى وبالسيارة ..
حليمه بهدوء : نايف
نايف لف يناظرها ينتظرها تتكلم ..
حليمه واهي تناظر الطريق : بروح لأهلي الين اولد وبعدها طلقني
نايف : ماراح تروحين بيت اهلك وانتي حامل
حليمه شدت على يدها : نايف
نايف بعصبيه : مجنون انا اخلي ولدي ولا بنتي معك لحالك وانتي بأي لحظه بتضرينه
حليمه ناظرته و عيونها اتسعت من الصدمه : ايش قلت!
نايف : ناسيه وش مسويه امس؟ بتكونين طول الوقت قدام عيني الين ما تولدين وبعدها بسلامتك
حليمه : مو على كيفك نفسيتي تعبانه وابي اروح لأهلي خايفه يتأثر الي ببطني
نايف ناظرها : حاولي تتقبلين حياتك معي على الاقل هالتسع شهور
حليمه بصدمه : تسع! مستحيل انت قلت ست شهور
نايف : وانتي بتولدين بست شهور؟
حليمه : لا تنسى اني بالثاني ومع هالسته قول اني بالثامن بيضرك يعني شهر تخليني عند اهلي؟
نايف زفر بعصبيه : بنرجع البيت الحين وخلي الوضع بيني وبينك طبيعي قدامهم
حليمه : بس ماهو طبيعي ليه تكذب
نايف وقف سيارته على جنب وتكلم بعصبيه : بتجننيني!! ليش تعاندين خلاص تبين الطلاق بتتطلقين بس اول شي اولدي الي ببطنك اما الحين احلمي
حليمه بعصبيه وعيونها امتلت دموع : وش بيفرق الحين وبعدين! كلها واحد
نايف بهدوء مفاجئ : حليمه الكلام معك ضايع! وضايع بشكل كبير خليني اكمل الطريق بهدوء لا ترفعين ضغطي
حليمه لفت على قدام واهي تتكتف بقوه ..
نايف : شوي شوي على بطنك
حليمه : مالك دخل
نايف تجاهلها وكمل الطريق وعيونه على يدينها الي تلمس بطنها كل شوي وعيونها الي ما ارتفعت عن بطنها ابد ، الواضح انها تبكي و بصمت بعد..
-
العصر ..بالحارة ما بين تجهيزات الأحتفال وفرحة الناس
وريف مستغربه : هاو وش عندهم يجهزون!
جودي مسكت اول بزر مر من عندها : تعال تعال
ابراهيم واهم مبتسم ومستعجل : هلا
جودي : فيه احد بيتزوج؟
ابراهيم : فالح ، زواج فالح
ابراهيم ركض وتركهم من صدمين ..
وريف : ياويلي سُلاف بتنهبل
جودي سحبتها : امشي نشتري بس وخلينا نرجع البيت قبل يمتلي المكان
خلال ربع ساعة رجعوا للبيت ولقوا وجود وسُلاف بالحوش يتقهوون..
وجود : وش سالفة هالصجه وذا الزينات المعلقه؟
جودي جلست بعبايتها : اول شي السلام عليكم ثاني شي امسكوا سُلاف
سُلاف انصدمت: ليش مصروعه يوم تمسكوني
وريف ضحكت : بلاك ماتدرين محبوب القلب بيودعك
سُلاف فزت على خفيف : مين؟
وجود انصدمت : مين؟ من كثرهم
سُلاف تنرفزت : اسكتي انتي ..ولفت على وريف : مين ؟اخلصي علي
جودي : فالح
سُلاف شربت فنجالها : الله يوفقه
جودي استغربت : مافيه ردة فعل؟
سُلاف : وش اسوي يعني ابكي اكسر زينة عرسه؟
وريف تسندت براحة : الحمدلله حسبت بتنهبلين علينا
سُلاف : هذاك اول الحين ماعليك اعجبك
وجود ابتسمت : دام ماهمك ذا اكيد فيه واحد ببالك غيره اختي و اعرفك
سُلاف ضحكت بخفه : والله شوفوا
وريف بفضول تقرب منها : ايوا ؟
سُلاف وقفت واهي تعدل قميصها : بقولكم بس بدون صراخ
جودي : اخلصي عسى مايصير ابو فالح وتجلطيني
سُلاف صرخت بـ : صقر
شهقوا بصدمه ..وركضت لداخل تنحاش من خواتها الي لحقوها على طول واهم مصدومات
جودي مسكتها : بذمتك؟
سُلاف واهي تضحك وتحاول تفك يدها من قميصها : والله ما امزح
وجود تخصرت : الحمدلله والشكر مالقيتي الا صقر!
سُلاف : ادري انه مو صاحي بس عيوني عليه خلصت المهمه من فالح بقى اهو
وريف ضحكت واهي مصدومه : مستحيل ما اصدق
وجود : انا ماعاد استغرب من سُلاف شي
سُلاف : خلاص عاد لا تكبرون السالفه
جودي اتجهت للمطبخ واهي تفصخ عبايتها : والله بكيفك بس اختيارك غلط
وريف : انتبهي لنفسك لا تنسين سواياه تراه مو سهل
سُلاف : ولا انا سهله
وريف : لا تاخذين الوضع تحدي واهجدي لك شعور اتجاه صقر عيشيه من بعيد لبعيد مثل ماسويتي مع فالح اما اذا عندك خطط ثانيه فأقولك من الحين لا تدخلين بالمشاكل
سُلاف نزلت يدينها بتوتر : وش دعوه وش بسوي يعني
وريف رفعت كتوفها ومشت : اقولك بس
دخلوا البنات للمطبخ وما بقى الا اهي واقفه وتفكر بكلام وريف ..دق الباب وركضت لعنده ..
سُلاف : مين؟
صقر : افتحي
سُلاف فزت بخوف وهمست : يمه
صقر رجع يدق الباب ..
سُلاف الي جت تركض واهي تلف طرحتها عليها وفتحت نص الباب ..
سُلاف : هلا؟
صقر تسند على الباب : كيف حالك؟
سُلاف وعيونها بعيونه : بخير تبي شي؟
صقر تكتف واهو متسند على الباب : جاي اشوف كيف نفسيتك
سُلاف تخصرت وابتسامتها بانت من عيونها : ابد عالي العال
صقر رفع حاجب : صدق والله؟
سُلاف بدلع : مو واضح يعني؟
صقر استغرب دلعها واهو يعدل وقفته : بنت وش فيك انتي؟
سُلاف كتمت ضحكتها واهي تشوفه مصدوم : خير وش تبي جاي؟
صقر يمازحها : جاي اتطمن ومنها اعزمك لعرسي
سُلاف بيدها اليسار تسند على الباب وبيدها اليمين حطتها على خصرها : انا العروس اكيد
صقر ابتسم ابتسامة مايله وبنظرات غريبة : تبين تكونين العروس؟
سُلاف عدلت وقفتها وسكرت الباب شوي : لا تناظر كذا ياقليل الحياء ويلا رح لأهلك يا الهايت
سكرت الباب واهي تسمع ضحكه عليها ..
سُلاف فصخت لثمتها واهي راجعه لداخل : يا حليلك ياصقر ماتدري وش ابي
وجود واهي متخصره : صقر اجل
سُلاف بملل : ادري سمعتي كل شي و الي سمعتيه صح
مشت عنها و وجود تلحقها و واضح من نبرتها انها معصبه ..
وجود : تستهبلين سُلاف وش الطاري عليك! صقر صقر نسيتي وش مسوي!
سُلاف لفت عليها بعصبيه : لا مانسيت ولأني ما نسيت ما ابيه يتزوج وحده ثانيه ياخذ الي يبي و يروح لغيري ليه؟ لعبه عنده انا
وجود بصدمه : يعني ماتحبينه؟
سُلاف بقهر : لا تفسرين الأمور على كيفك! قلت ابيه لأني ابيه ومالك دخل احبه ولا ما احبه
وجود مسكت راسها واهي تناظر وريف و جودي الي واقفين يناظرونها مستغربين..
جودي بهدوء : سُلاف وش الي براسك؟
سُلاف انقهرت : كلكم عشتوا هالمشاعر لا تتدخلون فيني دام اني ما تدخلت فيكم
وريف : لأن الواضح يا سُلاف هالحب الي طلع فجأه وراه خطط
سُلاف : مالكم دخل وانا اعرف وش اسوي ولو اني مخططه اسوي شي سويته من زمان مو بعد حركته لي بخمس شهور
جودي : يكفي انك طعنتيه لا تزودينها
سُلاف حمر وجها من العصبيه : وش علتكم انتم! ماراح اسوي شي حرام اعيش هالشعور معاه؟؟
وريف بعصبيه : بكيفك يا سُلاف انتي ماعادك بزر مثل اول كبرتي وعقلك براسك
جودي : ماقلتا لا تحبينه لا حبيه بس انك مخططه تتزوجينه شي غريب
سُلاف : غريب اذا حبيته وابيه حلالي؟
وجود : خلاص هدي ماله داعي ذا الانفعال
سُلاف : انكم قهرتوني كلكم تتخيلون وتتمنون بس لا جاء الموضوع علي شفتوني الشيطان المخطط الي مستحيل اعيش حياتي طبيعي تراني بشر احب وانحب وابتزوج وين المشكلة؟
جودي جت وحضنتها : طيب خلاص اسفين
سُلاف تنهدت من الكتمه الي فيها وبكت : تقهرون والله محد يفهمني الا ليلى
جودي شدت عليها بحضنها لما شافتها تبكي : خلاص سوي الي تبين بس ابعدي عن المشاكل طيب؟
سُلاف بنبرة باكيه : طيب
-
بـ بيت ابو نايف ..
ابو نايف يناظره من فوق لتحت : يعني منت متكلم؟
نايف حط فنجاله ووقف واهو يلف سبحته على يده : الي بيني وبين حليمه سوا زين ولا عكسه محد يتدخل فيه
ابو نايف : انا عمها يا نايف ولا انك ناسي
نايف : لا مانسيت و لا تنسى اني زوجها والي بيني وبينها يبقى بيني وبينها ما يحتاج امشي واتكلم فيه مانيب بزر ولا طايش يومني ادخلك ولا ادخل عمي بحياتي الزوجيه ..ولف يناظرهم كلهم وتكلم بحزم : هذا اخر كلام اقوله لا اشوف احد منكم يحاول يتعدى حدوده بحياتي لا تسألوني ولا تسألون حليمه
ابو زايد بعصبيه : واذا بنتي ماهي مرتاحه يا نايف تدري وش بسوي معك؟
نايف ببرود : رح اسألها
ابو نايف بعصبيه : تكلم زين مع عمك
صقر وقف ومسكه على طول زايد وجلسه : اجلس
صقر : بروح لحليمه
طلع صقر متوجهه لحليمه الي طلعت منها وضحى ..
صقر : نايمه؟
وضحى هزت راسها : لا
دخل عليها واهو مبتسم عكس التساؤلات و الريبه الي بداخله ..
حليمه لفت عليه واهي مبتسمه : واضح فيه شي
صقر سكر الباب واهو يتنهد : مرتاحه؟
حليمه اختفت ابتسامتها : صقر
صقر مسك يدها : انتي بس قولي ما ابيه والله لا اخذك منه ولا علي منهم كلهم علميني اذا متعبك يا حليمه
حليمه حضنته واهي تبكي : صقر انا تعبانه
حضنها صقر : يا جعله فيني ولا فيك علميني وش فيك
سحبها وجلسها على طرف السرير وجلس جنبها : تكلمي
حليمه : ماني مرتاحه معه قلت ابي اروح لأهلي الين اولد ورفض
صقر عقد حواجبه : وبعد الولادة؟
ناظرته حليمه بعيونها الغرقانه دموع وسكتت ..
صقر : الي ببالي صحيح؟
حليمه غطت وجها بيدها وبكت بخفيف ..حضنها وحط راسها على صدره ..
صقر : قولي لي الحين تبين ترجعين معي للبيت ؟
حليمه هزت راسها : ودي بس ما ابي المشاكل
صقر : دامني موجود لا تخافين من المشاكل ..وقف : قومي شيلي اغراضك
قامت على طول ماصدقت تحس بالأمان وان احد يساندها شالت الي تقدر عليه بمساعدة صقر ولبست عبايتها وشال شطنتها واهو يطلعها تحت انظارهم ..
نايف بعصبيه وقف : ما عاش يا صقر من ياخذ حرمتي من غير راضي
لف عليه صقر : ولا عاش من يزعل اختي يا نايف
ابو نايف : صقر خل اختك ترجع لا تسببها بينا
صقر ناظره بحقد : علم ولدك كيف يتعامل مع بنات الناس
زايد قرب لعندهم وهمس : حليمه وش فيك؟
حليمه تمسكت فيه : تكفى يا زايد لا تخليني عنده
زايد قرب لعندها واهو يمسكها : مشينا
نايف بأعلى صوته : والله يا حليمه ان طلعتي من هالبيت ان ورقتك توصلك من بكره
زايد : تهددها؟
ابو زايد بصراخ : بـس انت وياه !! ..ناظر نايف بعصبيه : تهدد بنتي قدامي؟
حليمه صرخت : هذي مو اول يهددني بالطلاق مو اول مره
مسكها زايد لا تطيح لأن واضح مهدود حيلها ..
ابو زايد ناظره : صدق الي تقوله؟
نايف : الي ما تحترم خصوصية بيتها ما ابيها عندي
صقر : ولا تحلم تكون عندك
نياف بتوتر : يا جماعة الخير ترانا اهل..
مشى زايد واهو ماسك حليمه ووراهم صقر الي شايل شناطها ..
نايف بحزم : حــليـمه
لفت عليه وعيونها بعيونه وسكتت تنتظر كلامه ..
نايف شد على يده بقهر : انتـي طـالق
ابو نايف بعصبيه : تعقـب والله ماتطلق بنت اخوي
نايف واهو يناظرها : سمعتيها ولا اعيدها؟
حليمه تمثل القوة : سمعتها واسمع مني بعد ، الحمدلله ربي فكني منك
ابو زايد الي ما حب يكسر كلام اخوانها ووقفتهم معها ويستصغر حليمه عندهم ويرجعها بالغصب ، ارتكز بوقفته بعصاه واهو يتصنع الجمود : يلا يا عيال مشينا
نياف مسكه : عمي
ابو زايد ناظر لأبو نايف : انت اخوي وعزيز علي بس عيالي خط احمر يا خالد ، ولدك نطقها قدامنا كلنا وبنتي ماهي رخيصة علي وهذي اهي الحين راجعه لبيت ابوها معززه مكرمه والوجه من الوجه ابيض
ابو نايف شد على كتفه واهو متوتر : ماهي القطاعه صحيح ياخوي؟
ابو زايد ابتسم بزعل : وانا لي غيرك يوم اني اقاطعك انت اخوي يا نظر عيني
ابو نايف حضنه تحت نظر ام نايف و وضحى الي كانت تبكي و نياف المتوتر ..
-
ببيت جابر وليلى ..
سكرت الشنطة واهي مبتسمه : اخيرًا
جابر دخل واهو يرمي جواله وجلس ماسك راسه ..قربت لعنده بخوف..
ليلى : سلامات وش فيك ؟
جابر واهو يهز رجوله : نايف
ليلى قربت لعنده اكثر وبفضول : وش فيه؟
جابر : طلق حليمه
ليلى شهقت وحطت يدينها عن فمها ..ناظرها جابر وقال : اخوانها صقر وزايد اهم الي اخذوها
ليلى بتوتر : وخالي و ابو زايد وش صار عليهم؟
جابر تسند : ماقالي شي بس الواضح اكيد صارت حساسية
ليلى بزعل : لا حول ولا قوة الا بالله
جابر يحاول يضيع الموضوع : خلصتي؟
ليلى ناظرت للشنط : ايه
قام جابر بيطلع من الغرفة ومسكته من يده : جابر
جابر ناظرها : لبيه
ليلى نزلت عيونها : عادي اذا سلمنا على خواتي واهلك اروح اشوف حليمه قبل نسافر؟
جابر ابتسم والزعل واضح عليه : ابشري
ليلى فزت : جد؟
جابر : اكيد
حضنته ليلى واهي مبتسمه ..
-
بـ بيت ابو زايد ..
حليمه جالسه بينهم و ام زايد ماسكه راسها ..
جميلة بزعل واهي تربت على كتافها : ماعليه يا قلبي
حليمه ناظرتهم : ماني زعلانه على فراقه من البداية وانا ما ابيه وحتى طلبته اجيكم ورفض
صقر : لو اني داري من بدري ماخليتك عنده
حليمه ابتسمت له و التعب واضح على ملامحها : ماتقصرون كلكم والله ما تمنيت هالموقف بس اهو حدني
ابو زايد الي يبي يغير الموضوع : حليمه
حليمه : سم يبه
ابو زايد : كيف حال الي ببطنك؟
حليمه حطت يدها على بطنها : بخير يبه
ابو زايد : انتبهي لنفسك وله
وناظر ام زايد : ولا تتعبينها بالشغل
ام زايد خانقتها العبره : اكيد بداريها توصي ام على بنتها!
ابو زايد ناظر لثامر : شغلي هالمرجوج
ثامر شهق : لا بالله هذولي يحملون وانا اكرف بدالهم
جميلة ضحكت بخفه : اذكر الله
صقر تسند واهو يتنهد مبتسم : حليمه صبي لي قهوة
زايد : يبه بتحضر زواج فالح؟
ابو زايد هز راسه : ايه شوي ونطلع
ناصر : جدي
ابو زايد ناظره : ها
ناصر : يعني الحين خوالي ماراح يكلمون عيال عمي ابو نايف؟
ابو زايد ناظرهم : على هالطاري ، ذا المشكلة لا تبعدكم عن عمكم و نياف وجابر ولا نايف بالطقاق الي يطقه
زايد : ابشر
ابو زايد ناظر صقر و ثامر : سمعتوا؟
كلهم : ابشر
ابو زايد ناظر لحليمه : وانتي يا حليمه وجميلة وضحى اختكم مالها داعي القطاعه
جميلة ابتسمت : لا توصي حريص
قام واهو يعدل شماغه : يلا ياعيال لعرس فالح يلا
طلعوا الشباب ماعاد بقى الا ام زايد وجميلة وسلوى وحليمه ..
ام زايد مسكت يدها : مرتاحه الحين؟
حليمه ابتسمت براحه رغم التعب الي تحسه : كنت خايفه على نفسي تسوء نفسيتي ويتعب الي ببطني بس الحمدلله اني جيت عندكم
ام زايد هزت راسها بهدوء : الله يعوضك و يكتب لك كل خير
جميلة : امين
حليمه : ممكن نسكر السالفه و نرجع طبيعي؟ ساعدوني هالشهرين نفسيتي كانت متقلبه فيها بزيادة
جميلة : ابشري
حليمه واهي تتقهوى : متى بتروحين للدمام؟
جميلة ابتسمت :توني مطوله اسبوع
حليمه استانست : اشوا وش عنده مخليك تطولين؟
جميلة : رايح انتداب ونستغل هالانتداب بجيتي لكم
حليمه : احسن عشان تونسيني شوي
ام زايد : اجل طاح كرتي انا
حليمه قامت لها تبوسها واهي تضحك : لا عاد انتي عين السيح محد مثلك
ام زايد : ايه العبي على بهالكلمتين واصدقك
ضحكوا بخفه عليها وكملوا سوالف يحاولون يغيرون شوي من جو حليمه الي واضح من هالاتها و وجها الشاحب انها تعبانه..
-
بـ بيت البنات ..
سُلاف ركضت لعندهم : بنات يمه خبر يخوف
جودي انقبض قلبها : ليلى!!!
سُلاف بسرعه : لا لا حليمه
وريف سكرت اذونها : لا تقولين صار شي بحملها
التفتوا البنات على ردة فعلها وكأنها تتذكر سقوط جنينها ..
سُلاف بلعت ريقها : جنينها بخير بس..
وجود بتوتر : بس وشو؟ تكلمي خبصتي قلوبنا
سُلاف : تطلقت
جودي شهقت : يوه
وريف : لا حول ولا قوة الا بالله
وجود : شينه مره تطلق من ولد عمها عسى مايصير شي بينهم
سُلاف جلست قبالهم واهي تعلمهم وش صار بالتمام زي ماقالت لها وضحى ..
وريف ابتسمت : ياحلو اخوانها ما توقعت بهالديرة شخص صاحي
جودي ناظرتها : ولا انا الصدق ماقالوا لها ثلاث شهور متزوجة واقعدي ببيت زوجك
وجود : لأن ابوهم تراه كويس بعد تربيته زينه مو مثل اخوه خالد انسان تقليدي
سُلاف : الله يعين وضحى
وجود : الله يكتب لها الرجال الصالح وبس
الكل : امين
وريف : ودي اشوف حليمه بس اخاف اذا طلعنا تجي ليلى ولا تلقانا
جودي : الحين العشاء خليها بكره احسن من عصر نروح ونعطي خبر لليلى بعد
سُلاف بفضول : تهقون يوافق جابر يجيبها لطليقة اخوه؟
جودي : اذا ماجابها يعني الله يعين صدق ليلى طاحت بواحد زي ابوه
وريف استنكرت هالكلام : استغفرالله بنات لا تفاولون على اختكم كذا
جودي سكرت فمها : أستغفر الله والله ماكان قصدي
سُلاف ابتسمت : عاد الصدق صقر كبر بعيني ما توقعته كذا
وجود ابتسمت : لا كأننا بدينا هاا
جودي : اهووووه احنا بدينا وخلصنا اصلًا
وضحكوا على سُلاف الي كانت تسكتهم لأنها استحت من تنغيزاتهم بالكلام ..
-
بـ بيت ابو نايف ..
ام نايف : وضحى
وضحى رفعت راسها : لبيه
ام نايف : من كنتي تكلمين تو؟
وضحى : سُلاف
ام نايف هزت راسها : تعالي دلكي راسي مصدع
انسدحت ام نايف على رجل وضحى الي كانت تدلك راسها ..
وضحى : يمه نايف كيف له قلب يطلق والحين حاضر عرس؟
ام نايف فتحت عيونها واهي تناظر وجه وضحى واهي تدلكها : وش يعني يوقف حياته؟
وضحى : لا بس حليمه كانت كويسه معه واهو كويس على حسب علمي كيف ممثلين قدامنا انهم كويسين
ام نايف : راسي مصدع لا تصدعينه زياده
وضحى : طيب يمه اخر سؤال
ام نايف بملل : ها
وضحى : هالمشكلة بتخليني اقطع حليمه وجميلة؟
ام نايف : مين المتزوج حليمه؟
وضحى : نايف
ام نايف : ومين طلقها؟
وضحى : نايف
ام نايف : اجل مالك دخل ودلكي زين
وضحى ضحكت بخفه واستانست : طيب
-
بزواج فالح ..
صقر مد يده يصافحه وشد عليها : مبروك يا فالح
فالح : الله يبارك فيك
لف وجهه واهو مبتسم من ناحية فالح اتجاه سُلاف ..
ثامر وقف جنبه : والله العرس يوسع الصدر
صقر ناظره واهو يبتسم ..
ثامر استغرب : وش عندك مبتسم؟
صقر : ماتبيني افرح ولا كيف؟
ناصر جاهم يركض واهو ماسك شماغه : خالي
ثامر : حدد اي خال فينا
ناصر : كلكم
صقر : وش تبي؟
ناصر : جدي يافع بيرجع وانا بروح معه ترا
صقر : يلا واحنا شوي وجايين
زايد جاهم بعد ما لعب واهم مبتسم ..
ثامر يناظره : كأنك هديت حيلك باللعب؟
زايد : يا عليهم ردح
صقر وقف : دام ابوي مشى يلا سرينا معه
زايد واهو يشرب : مشينا
من الجهه الثانية الي كانوا فيها ابو نايف و نايف و نياف وجابر ..
نياف لاهي مع ابوه ويسولف معه ، وجابر مع مصلح بينما نايف كان جالس على الجدار المهدود ومتكتف يناظر عيال عمه بغضب ..
جابر جلس جنبه : وش اخبارك الحين؟
نايف ركز ظهره وناظره : زي ما انت شايف
جابر : الي شايفه واحد بينفجر من الغضب
نايف : انك ماجربت تنوخذ مرتك من بيتك يا جابر
جابر ناظره لثواني وهذا الي خلا نايف يأشر له : وش عندك؟
جابر : ماعمري شفت من عيال عمي شر وانت خابر الي بينا بس الواضح انهم شافوا منك العكس يا نايف
نايف وقف بعصبيه : وش قصدك؟
جابر وقف معه واهو يمسك يده : نايف اركد
نايف بعصبيه : علمني وش قصدك؟
جابر : لو انك محسن لأختهم ما وصلت ياخذونها من عندك ولا وش انك مسوي فيها!
نايف شد قبضة يده واهو يبعد يد جابر عنه بغضب : شوف جابر لا تخليني احط الحره فيك ابعد عني احسن لك
جابر ابعد عنه : بسلامتك
راح يجلس جنب ابوه الي كانت عيونه عليهم ولا اهم سامع وش يقولون من صخب المكان ..
ابو نايف : وش يخطط عليه اخوك؟
جابر : لا تخاف معصب بس
ابو نايف : قله يركد ولا يسوي شي ما ابي مشاكل مع يافع وعياله
جابر : ابشر بكلمه بكره لا هجد شوي الحين مسنتره شيطاينه عليه
لفت عيونهم عليه وكان لازال جالس والعصبيه واضحه بملامحه ..
نياف : يبه يلا نرجع
ابو نايف وقف واهو يتعنز على عصاته : مشينا
نياف أشر لـ نايف بأنهم رايحين و نايف اكتفى يهز براسه بهدوء بـ طيب
ما راحت عن باله ابد ، كيف تروح وتخليه؟ ليش تكسر كلمته قدام الكل؟ ليش تعانده ليش اخوانها اخذوها منه وليش وليش مسح على وجهه واهو يتعوذ من الشيطان من شعوره بالوجع الي اجتاح راسه بشكل مفاجئ و قرر بعدها للبيت..
-
يوم جديد ، العصر ..
بعد ما سلم جابر وليلى على اهله متوجه فيها لأخواتها ..
ليلى : وين بتروح؟
جابر : مع العيال اكيد بالقهوة
ليلى قبل تنزل من السياره باسته : مع السلامة
جابر ابتسم لها : مع السلامة
نزلت وانفتح الباب على طول وانسحبت ضحك جابر مايدري مين سحبتها بس واضح انها تنتظرها من زمان ..
ليلى واهي ترفع عبايتها : ول ول شوي شوي علي
جودي حضنتها بقوه : اشتتتققت
ليلى واهي تضحك : وش دراك اني جيت؟
جودي : شفتك من الدريشه وصوت السيارة
ليلى : وين البنات ؟
جودي مسكتها: داخل
اول مادخلت هجموا عليها بالأحضان واهي مبتسمه على لمتهم ..
ليلى : والله فقدتكم بيومي
سُلاف : اجل العم جابر مو مكفيك؟
ليلى : لا والله ياروحي اهو بس ياخي انتوا خواتي
وريف : ماعليك منهم لا تبررين كيف حالك ؟
ليلى ابتسمت : الحمدلله مرتاحه
الكل : الله يديمها..
سُلاف : بتطولين عندنا؟
ليلى : العشاء بروح
سُلاف كشرت : ياليل
ليلى : ترا الطياره الساعة ٩:٣٠ يعني لازم قبلها نروح بساعة افضل
وريف : توصلون بالسلامة يارب
ليلى : امين
وجود جت واهي تحط الأكل قدامهم : يلا امشوا نسولف بكل شي فقرتي المفضلة
ليلى ناظرتهم : دريتوا بحليمه؟
جودي : ايه وضحى علمتنا
ليلى: قلت بروح اشوفها قبل اسافر
وريف : حتى احنا بنروح
ليلى : وش رايكم نروح الحين؟ يمدينا شبعنا من الجلسه من بعض
سُلاف ناظرتها : وضحى بتجي؟
ليلى : ما ظنتي توني طالعه من بيتهم هدوء فضيع على غير عادته حتى نياف هاجد
جودي : وش اخباره؟
ليلى ابتسمت : بخير بخير بس عاقل ما ابثر خالي مثل عادته
وريف : ماشفتي نايف؟
ليلى : الا سلم وطلع على طول وجهه جاامد ماتدرين فرحان ولا زعلان
سُلاف : بدال هالجلسه قوموا نروح لحليمه اخلصوا
قاموا البنات يلبسون عبايتهم متوجهين لبيت ابو زايد ..
-
بـ بيت ابو زايد ..
ناصر : خالتي
حليمه طلعت من المطبخ : لبيه
ناصر حضنها : احبك
حليمه حضنته واهي تبوس راسه : حبيبي انت وانا اموت فيك
ناصر ابعد عنها : لا تزعلين
حليمه انحنت لعنده واهي تبتسم : دامك تحبني ماني زعلانه
ناصر : الي ببطنك ولد؟
ضحكت بخفه واهي تحط يده على بطنها : مدري انت وش ودك؟
ناصر : ابي ولد عشان العب معه
حليمه لازالت مبتسمه : وان شاء الله انه ولد عشانك
جميلة طلعت من الملحق : ناصر وش تسوي هنا؟
حليمه : اسولف معه
جميلة : قايله له يروح مع ثامر للدكان ترا مافيه روحه لحالك بالشارع عشان مره ثانيه تمشي معه
دخل ثامر بسرعه واهو مرتاع وشاف ناصر وفصخ جزمته واهو يلحقه : امـش
ناصر واهو يركض ومايدري وش السالفه : يمه اقسم بالله ماسويت شي
جميلة ركضت لناصر واهي تمسكه : خير وش فيك على ولدي؟
ثامر : ابن اللذينا احسبه وراي يوم لفيت مالقيته طار عقلي قلت الحين جميلة بتذبحني
جميلة ضحكت : ياعمري
حليمه ابتسمت : الله ثمور دامك خفت كذا يعني ما احاتي وليدي اذا جاء عنده خال كفو
ثامر دق صدره بغرور : ابد تحت امركم وعيالكم بينجلدون ٢٤ ساعة
حليمه كشرت : لا اجل امحق خال
جميلة لفت للباب الي دق : ثامر افتح الباب
لبس جزمته وتوجهه للباب وابتسم : هلا هلا والله ببنات سليمان نورتوا
وريف ابتسمت له : هلا فيك ، اهلك فيه؟
ثامر أشر لداخل : شوفيهم داخل
دخلوا البنات واخر وحده وجود الي مد يده لها : سلمي
وجود : موب صاحي انت
ثامر : عادي انتي زوجتي
وجود : اقول اعقل لا احد يسمعك
مشت عنه وقبل يسكر الباب جت فرح : اصـبر
ثامر يتصنع الملل : ياليل هذي وش جابها
فرح : مالك دخل
دخلت وسكرت الباب بوجه ثامر ..
ثامر ضحك وهمس : ياخي بجيحه ذا البنت
سلموا على بعض ودخلتهم جميلة للملحق ..
فرح : وش اخبارك العروسه بتسافرين خلاص؟
ليلى ابتسمت لها وتمازحها : اي تجين معنا؟
فرح : لا مو جوي اقعد بين متزوجين اصبري علي اتزوج
جميلة ضحكت : ياربي هذي للحين تهوجس بالعرس
فرح : اقول وضحى ماراح تجي؟
حليمه نزلت عيونها وسكتت ..
جودي بسرعه : فرح صبي لي شاهي
فرح اخذت الزمزميه واهي توها تستوعب سؤالها مره ماله داعي واهي عارفه وش حاصل ..صبت ومدته لها : تفضلي
جميلة تصرف : اي ليلى على وين بتسافرين؟
ليلى : ان شاء الله ماليزيا
حليمه ابتسمت : واو ماشاء الله يمدحونها
جميلة ناظرتها: اي والله تتهنين يارب
ليلى اكتفت بـ بتسامه واهي تناظر حليمه الي كانت تحاول تدخل بالجو وتسولف عادي بس اهي عارفه انها مو على بعضها  ، مو شرط زعل على نايف بس نفسية الحمل..
فرح : ليلى عادي اسألك سؤال ملقوف؟
ليلى : لا
فرح : احسن انتي الخسرانه
ضحكوا كلهم وليلى كملت واهي تبتسم : ادري وش بتسألين بس لا تسألين لأن الحمل يجي من الله
فرح ضحكت : فاهمتني يعني
ليلى هزت براسها بـ ايه
سُلاف : اقول والله الوضع مزري حليمه حامل وليلى بأي لحظه بتحمل وجميلة ياخوفي يعجبك الوضع وتلحقينهم تكفون لا تحملون كلكم بنفس الوقت اصبروا الين اتزوج ونحمل مع بعض
حليمه مسكت بطنها الي شد عليها من ضحكتها المفاجئة : لعبه اهي نحمل مع بعض
سُلاف تتصنع الزعل : عشان عيالكم ما يصيرون اكبر من عيالي ما ابي
جميلة : لاحقه لاحقه اذا عيالنا صاروا اكبر من عيالك باقي الصفه الي جنبك "خواتها وفرح و وضحى"
فرح ناظرتها : ماعليك سُلاف انا وياك عيالنا بيكونون بنفس العمر
سُلاف مدت يدها : كفو كفك
-
بـ بيت ابو نايف ..
فتح الدولاب واهو يدور طاقيته : ياليل الليل صدق
بدا يحوس بالملابس ولمس دفتر صغير سحبه واهو يفتح ..كان شبه مذكره لحليمه وتذكر لما قالت له عن رسمها غمض عيونه واهو يسكره ..وكان بيرجع بمكانه بس اخذه الفضول وبدأ يفتح صفحه صفحه بشكل عشوائي ونظرة سريعة..
الصفحة الثالثة كانت بعنوان : حملي
هالصفحة بالذات وقفته وبدأ يقرا فيها بتمعن وكيف كانت مسويه جدول تعد فيه الأيام وبأخر الصفحة كاتبة تاريخ اليوم والشهر وتحته " بهذا اليوم عرفت اني حامل بالشهر الثاني"
سكر الدفتر واهو يمسح على وجهه يعني كانت صادقه توها تعرف انها حامل بالثاني ، رمى الدفتر وانسدح بقوه على السرير يناظر للسقف ورجع ياخذ الدفتر ويفتحه من الصفحة الأولى ..
الأولى كانت بعنوان البداية وكاتبه فيها من خطبة نايف لها لليلة الزواج وبكل شي حصل فيها
و الثانية بعنوان بعثرة والي كتبت فيها عن تناقض شخصياتهم مع بعض وعدم التفاهم الي حاصل بينهم
استمر يقرا و يقرا الى ان وصل للصفحة السابعة ..
بعنوان : الطفل او الطفلة
كتبت : اتضح ان شخصياتنا لا تتناسب مع بعض و الضحية جنيني .. مستقبل مجهول لعلاقتنا بس املي بالله كبير ان الي ببطني يعيش حياة صحية ، النهاية .
سكر الدفتر واهو يشوف الصفحة السابعة اهي اخر ما كتبت فيه ، اخذ شهيق عميق واهو مغمض عيونه وزفر براحة ..رجع الدفتر لمكانه وطلع من الغرفة لأن حس نفسه اختنق ..
وضحى ابتسمت له : زين جيت كنت بناديك
نايف : وش تبين؟
وضحى : تعال تقهوو معنا
نايف : بروح للدكان
طلع وسكر الباب على طول تحت استغرابها..
-
بـ بيت ابو زايد ..
وريف و سُلاف وحليمه بالمطبخ ..
سُلاف بتملل : ياشين شغل المطبخ اكره يومي فيه والحين مدخليني هنا هذي الضيافه عندك ياحليمه
حليمه ناظرتها : محد قالك تجين
سُلاف : بجي متى مابغيت
وريف : خلاص اطلعوا وانا ازل القهوه واجي صجيتوا راسي
سُلاف وقفت وابتسمت : احبك انقذتيني
طلعت بسرعه واهي تركض ..
حليمه ضحكت : تبي الفكه
وريف : اهي دايم كذا ماتحب الشغل بس مجبوره تشتغل بيومها
حليمه تنهدت : ومين يحب الشغل؟
وريف ناظرتها : كيف نفسيتك الحين؟
حليمه : اشوا شوي
وريف ابتسمت بهدوء : الحمدلله انتبهي للي ببطنك
حليمه : ان شاء الله وعقبالك على خير
وريف ضحكت : وين يا حبيبتي خلاص انا قررت اكمل حياتي عزباء
حليمه : لا عاد حرام عليك تو عمرك ٢٧ حتى انا اكبر منك
وريف ضحكت : بينا سنة مو عشرين ترا
حليمه ابتسمت : حتى ولو اذا جاء نصيبك وافقي لا ترفضين
وريف ناظرتها : صرت اخاف وماعاد اتقبل اي ارتباط
حليمه : ما ادري وش مريتي فيه بس انتبهي تردين الرجال الكفو لاجاك
وريف تركت الي بيدها وتنهدت : لو اقولك يشيب راسك
حليمه بفضول : قولي وبيكون بينا
وريف ابتسمت بزعل : كان يمد يده علي حتى لما حملت بشهري الثالث ضربني ودفني من الدرج الين سقطت
حليمه شهقت بقوه : كنتي حامل!!!
وريف هزت راسها وابتسامة الأسى واضحه : ايه تخيلي كنت حامل
حليمه : الله لا يوفقه يارب
وريف : تلوميني لا كرهت الرجال؟
حليمه بهدوء : والله مدري وش اقولك بس اصابعك ماهي سوا
وريف : يلا ماعلينا الحين دوري انتظر خواتي يتزوجون وافرح فيهم
حليمه : واهم يبون يفرحون فيك
وريف : خلاص كفايه فرحوا فيني مره
حليمه : انتي يبغى لك جلسه طويلة اتفاهم فيها معك ما ينفع نوقف بالمطبخ كذا
وريف : لا تحاولين تقنعيني خواتي تعبوا كثير
حليمه تنهدت : الله يعين بس
وريف شالت الدله : يلا مشينا لا يداهمونا بهواشهم
طلعوا للمطبخ ..وريف وقفت بسرعه واهي ترفع الطرحه لنص وجها ..
حليمه استغربت : زايد وش تبي؟
زايد يحك راسه بإحراج : مادريت ان فيه احد
حليمه : بغيت شي؟
زايد : كنت مار وطلعتوا بوجهي معليش ..ناظر وريف : وش اخبارك وريف؟
وريف : الحمدلله بخير
جت بتمشي ووقفها سؤاله ..زايد : وش اخبار جرحك؟
وريف لف عليه : الحمدلله طاب
لفت على طول ودخلت للملحق وحليمه دفته بخفه : خلاص يلا كمل طريقك عاد
-
بالقهوة عند صقر وجابر ونياف ..
صقر : والله لو مو سفرتك كان قمت وخليتك انت و سوالفك المخيسه
جابر واهو يضحك : ماقلت شي بس انت حساس
صقر : المهم اعقل ولا عاد تعيدها
جابر : خلاص خلاص بنعقل لا تثور فينا
بلمح البصر بدوا يسمعون اصوات الرجال برا تعلى ويجتمعون حول بعضهم وهذا الي خلى الي داخل القهوة يطلعون يشوفون وش السالفة ومن ضمنهم جابر وصقر ونياف
نياف بستغراب : وش السالفه!
صقر دخل بين الرجال يبي يشوف وش سالفتهم و وراه جابر ..
مصلح واهو ماسك ياقة واحد من الرجال : والله لو اسمع بس سيرة ابوي على لسانك اقصها لك
الرجال لكمه على وجه بأقوى ماعنده ودفه وبدا يهجم على مصلح بكل قوته وتدخلوا يبعدونه ومن ضمنهم جابر الي وقف مصلح واهو مو فاهم شي : استهدوا بالله!!
التفت الكل على صوت السيارة الي واضح صوتها من مسافة بعيده وبدا كل واحد يسحب الثاني عن الطريق ولكن لسوء الحظ كان الضحية الأقرب للسيارة صقر و نياف الي ما قدروا يستوعبون وجود السيارة بينهم الا وتطيرهم ..
جابر مسك راسه وصرخ بأعلى صوته : لااااااا
ركض لعند صقر لأنه كان الأقرب واهو يصرخ : صــقــر
وركض لنياف الي كان ماسك يده و يأن بألم و النزيف براسه ..
جابر واهو مو قادر يستوعب الي حصل : نياف نياف تكفى رد علي
نياف بتمتمه يكسيها الألم : روح لصقر ، صقر يا جابر
جابر لف على صقر الي متجمعين عليه الناس و البعض كان يركض ورا صاحب السيارة الي داهمهم بشكل مرعب ..
ركض لصقر واهو يحط راسه على رجله ويضرب خده بخوف : صقر صقر تسمعني؟
وماكان فيه رد ابدًا وهذا الي جنن جابر وخلاه يصرخ بأعلى صوته : اتصلـوا بالأسعاف
احد الرجال بتوتر : اتصلنا اتصلنا
جابر وقف واهو ماسك راسه وعيونه تروح لصقر ونياف الي كانوا منسدحين بالأرض ..يروح لنياف يحاول يصحيه ويرجع لصقر..
-
بـ بيت ابو زايد ..
جميلة : خلاص زايد ماتقصر
زايد من ورا الباب : طيب
دق الباب بشكل قوي لدرجة فزوا الي داخل الملحق واهم يسمعون صوت يردد جملة " يـا ابو زايـد الحق الـحق"
ركض زايد للباب وفتحه بسرعه : وش صايـر؟؟؟
الرجال بأعلى صوته من التوتر : الـحق يا زايد اخوك صقر و ولد عمك توطتهم السيارة
جميلة صرخت واهي تنفي هالخبر : مـستـحيل
مسكتها وريف بسرعه وعيونها اتسعت من الخوف ..ركض زايد لبرا مع الرجال وبقوا البنات بصدمتهم ..
حليمه ركضت اخذت عبايتها ولحقت زايد ولحقتها سُلاف
و وجود ..
حليمه واهي تركض بأسرع ماعندها ..
وجود تلحقها : حليمه انتبهي انتي حامل
حليمه الي ماكانت تسمع شي من خوفها على اخوها شافت الرجال متجمعين وبدت تبكي اكثر ..
الرجال التفتوا عليها وابعدوا عن طريقها و بمجرد ماشافت جسد صقر المرمي بالأرض و الدم كاسيه صرخت : صـقـر
سُلاف طاحت بالأرض وعيونها عليه تجمدت ماعرفت تتنفس ، و وجود على طول مسكت حليمه : تكفين حملك لا يصير لك شي
حليمه فكتها بقوه وراحت تركض لصقر الي كان جالس زايد عنده ويبكي ويناديه ..
حليمه ببكاء : صقور حبيبي تكفى تكفى فتح عيونك
زايد مسك يده وشد عليها واهو يهز راسه بـ لا
حليمه ناظرته : وش تقول وش لا اخوي حي حي ما مات صقر ما مات لا تكذب علي
وجود تقدمت لها ومسكتها من اكتافها : قولي لا اله الا الله
حليمه : اقولك صقر مامات صقر ما يموت صقر مايخلينيي تفهمين مايخليني
جت ليلى تركض و وراها جودي وشافت منظر سُلاف الي طايحه بالأرض وتناظرهم بجمود و منظر صقر الي كان منسدح على رجول حليمه واهي تبكي ..
ليلى نزلت لسُلاف : فيك شي؟؟
لفت تناظر حولها بخوف وهمست واهي تترجى ما يكون الثاني اهو جابر : جابر تكفى تكفى وينك
دخل من بين الرجل وحضنها على طول : ليلى
ليلى واهي تبادله الحضن : الحمدلله الحمدلله
جابر والدموع تسيل من عينه : صقر ونياف
جودي سكرت اذونها لما سمعت اسم نياف وبدت تدور عيونها حول الموجودين و اهي تشوف الأسعاف جايه وبدت تشيل صقر ..
شافت نياف متسند على الجدار وماسك يده و الواضح ماهو بوعيه ركضت لعنده واهي تطبطب على خده : نياف
نياف بغير وعي : صقر صقر توجع اكثر روحوا له
جودي حوطت وجهه بيدينها ورفعته واهي تناظره وصرخت : نياف
نياف ناظرها وغمض عيونه و فعلًا وقتها فقد الوعي وتدخلوا المسعفين واهم يحطونه فوق السيارة ويركبونه السيارة ..
ليلى مسكت سُلاف وشالتها : امشي نرجع
سُلاف الي كانت متجمده بدون اي تعابير ولا اي ردة فعل غير انها مشت مع ليلى ولا تدري على وين رايحين ..
دخلوا للبيت ..جودي و سُلاف و ليلى و وجود..
فرح فزت بخوف : وش صار ؟؟؟
ليلى فصخت لثمتها واهي تبكي : اخذوهم للأسعاف
جميلة الي كانت منهاره تمامًا : يـاربي اخـوي
وريف : ومين ولد عمه اي واحد؟؟؟
ليلى : نياف
وريف ناظرت للبنات وكيف الصدمه كانت سيدة الموقف ..
فرح واهي ماسكه سلوى وتوقفها من البكي : خلاص خلاص يا ماما
جميلة : ابي اروح لأخوي الحين ابي اروح له
دخل ثامر للبيت و وجه اسود من الروعه : تكفون الي سمعته صح!!!
جميلة قربت لعنده واهي تبكي : ثـامر
حضنها بقوه : لا تقولينها يرحم امك
وريف تحاول تهديه : جميلة ماتدري الا انه صاير حادث بس
جميلة وخرت عنه : خذني له بسرعه تكفى
ثامر بخوف : يلا يلا
ركب السيارة و الكل معه وتوجهوا للمستشفى ..
-
بـ بيت ابو نايف .. الي متواجده فيه ام زايد و ام فرح بطلب من ام نايف وكأنها تثبت طلاق حليمه ونايف ماراح يأثر على علاقتهم..
وضحى : فنجالك عمه
ام فرح ابتسمت : تسلمين خلاص
ام نايف : اخوانك رجعوا؟
وضحى : ماشفت الا نايف
ام زايد : وضحى البنات كلهم مجتمعين وراك مارحتي معهم؟
وضحى ابتسمت بإحراج : ما امداني المرات الجايه ان شاء الله
ام زايد : ان شاء الله
ابو زايد من ورا الباب : يلا يا ميساء ويلا يا مريم ارجعك لبيتك
قاموا واهم يلبسون عباياتهم ..ودق الباب عليهم وقام له نايف
نايف فتحه : سم
الرجال بهدوء عكس شكله الي كأنه طالع من حرب : ابو نايف وينه؟
ابو نايف الي كان طالع مع ابو زايد : سم وش بغيت؟
الرجال : عندي لك خبر يا خالد ولدك نياف و ولد اخوك صقر بالمستشفى
نايف اتسعت عيونه بصدمه : وش فيهم؟
ابو نايف الي كشرت ملامحه : عد وش تقول!
ابو زايد بصدمه : صاحي انت؟
الرجال : داهمت الحارة سيارة مسرعه و صدمتهم والحين خذتهم الأسعاف للمستشفى الـ ..
نايف حط يده على راسه ولف يناظر ابو زايد وابو نايف الي كانوا يناظرون بعض بصدمه .. وفجأه سمع صرخة ام نايف : ولـدي
وضحى طلعت للحوش و لونه منخطف من الخوف : وش يهذري هذا!!
نايف : امشوا
طلع ولحقوه كلهم وتوجهوا للمستشفى ..
-
بالمستشفى ..
حليمه جالسه على الكرسي وتبكي و فوق راسها زايد الي ماكان افضل منها حال بس خايف عليها : حليمه يرحم امك خفي على الي ببطنك
حليمه ببكاء : صقر يازايد صقر
زايد واهو يمسح دموعه بعنف : بيصير بخير بيصير
جميلة الي متسنده على كتف فرح وتبكي وفرح تطبطب عليها وتسمي عليها : اذكري الله اذكريه
وثامر الي كان رايح جاي على الممر ، مره عند نياف ومره عند صقر
ليلى بخوف : وش صار على نياف؟
ثامر بتوتر : مدري للحين بالغرفة ما طلع الدكتور
تعدته ليلى رايحه لجابر الي كان واقف برا وينتظره ..
ليلى : جابر
جابر لف عليها ومسك يدها بخوف : وش صار على صقر؟
ليلى : للحين بالغرفة
جابر مسك راسه : يالله سترك يارب امي وابوي ما يجيهم الخبر
ليلى سحبته للكرسي : اجلس هد شوي شوف لونك مخطوف لا تدوخ
جابر وقف بسرعه واهو يشوف امه وابوه و الباقين داخلين بخطوات سريعه ..
جابر ركض لعندهم : يبه
ابو نايف الي كان بالزور شايل نفسه : وش صار ياجابر؟
جابر يحاول يهدي الوضع : داخل بغرفة العمليات ارتاحوا ارتاحوا
ابو زايد مشى بسرعه لناحية بناته : وش صار على اخواكم وش صار؟
جميلة غمضت عيونها ولا ردت عليه ..
زايد : يبه مافيه الا كل خير اجلس
ام زايد الي مسكتها وريف وجلستها بمكانها : اجلسي خالتي
ام زايد وقلبها متقطع من البكاء : آه يا صقر آه
ام فرح الي تشتت ما بين غرفة صقر و نياف ..
فرح قامت لها : يمه اجلسي خلاص
ام فرح بخوف : مدري وش حالهم مدري
فرح : اجلسي ونفهم من الدكاتره بعدين
حليمه كانت تبكي بحضن ثامر وعجزت تسكت واهي بكل مره تتذكر منظر صقر وثامر يهديها : استهدي بالله
طلع دكتور نياف وفزوا الكل له ..
الدكتور مبتسم : ابشركم حالته مستقره بس كسر بيده و رضه خفيفه بالراس
جابر زفر بهدوء : الحمدلله يارب
ام نايف واهي تبكي : بشوفه بشوفه
الدكتور : خلال هالساعة ممنوع دخول اي شخص عنده
ابو نايف مسح على قلبه واهو يتنهد : الحمدلله
ابو زايد قباله بمسافة واهو سامع هالخبر وناظر لأخوه : الحمدلله على سلامته يا ابو نايف
ابو نايف جاء لعنده : و العقبى للصقر
ابو زايد نزل راسه واهو يتسند على عصاه ..
نايف كان يناظر حليمه الي ماكانت حالتها تسر عدو تبكي بشكل مخيف وهذا الي اشغل باله ومخلي عيونه كل شوي عليها واهي بحضن ثامر ويمسح على راسها ..
جودي جلست جنب وجود واهي تتسند على كتفها وبكت : الحمدلله
وجود مسحت دمعتها : امسحيها لا يشوفونك
وجود لفت على سُلاف الي من جت ساكته ما تكلمت ابد ولا حتى نزلت دمعه منها ..
طلع الدكتور من عند صقر واهو مستعجل : انتوا اهل المريض صقر؟
الكل : ايه
جابر : بشر يا دكتور؟؟
الدكتور : نحتاج متبرع بالدم حالًا
وقفت سُلاف بسرعه ما احد توقعها : انا
الدكتور اشر لها : تفضلي معنا
دخلت وراه من دون لا تناظر احد ولا حتى خواتها ..
ام زايد بكت : اكيد ولدي فيه شي
ام فرح : الفال بالمنطق خافي ربك يا ميساء
حليمه وقفت واهي تمسك بطنها الي شد عليها بقوه وقام معها ثامر ..
ثامر : وين بتروحين؟
حليمه : ببعد شوي لا تجي
وقفت فرح بتلحقها و وقفتها بحزم : قلت لا احد يجي
وريف مسكت فرح وجلستها وهمست : خليها لحالها
مشت من عندهم تحت انظاره واهو منزل راسه ومتسند على الجدار..
حليمه شرت لها مويا وشربت ربعها وكبت شوي على يدها ورفعت غطوتها واهي تمسح على وجها وتسمي بالله ، جلست على اقرب كرسي واهي ماسكه بطنها بألم وتكلمت من غير شعور : ان كانك بتودعني قريب تكفى لا تكبر بداخلي وتعلقني فيك
وخرت يدها عن بطنها وتسندت وبكت خوف على اخوها وخوف على الي ببطنها من شدة الألم الي داهمها فجأه صرخت بخفه ورجعت تمسك بطنها : يارب
ركضت لها الممرضه : وش فيك حبيبتي؟
حليمه واهي تبكي : حامل حامل
الممرضه ناظرت بطنها الصغير : بأخر الشهور؟
حليمه هزت راسها بألم : الثالث
الممرضه ركضت تجيب لها كرسي متحرك وقعدتها فيه واتجهت على طول لأول غرفة كشف..
انسدحت على السرير واهي تبكي تحت استفسارات الممرضة..
الممرضة ابعدت عنها : قلتي لي انك بالثالث؟
حليمه مسحت دموعها : ايه
الممرضة : ليه حجم الجنين صغير كذا تغذيتك سيئه صحيح؟
حليمه هزت راسها : ايه
الممرضة : هذا خطر على الجنين لا سمح الله بأي لحظه ممكن يسبب لك اجهاض من سوء التغذيه ، انتي منتظمه بمواعيدك الشهريه؟
حليمه ناظرتها : لا
الممرضة تنهدت : لا حول ولا قوة الا بالله ، بكتب لك ادويه تنتظمين فيها و بشكل شهري لازم لك كشوفات انتبهي تتهاونين فيها
حليمه ناظرت للأرض : طيب
وقفت واهي تاخذ الورقة : اطلع؟
الممرضة بحزم واهي طالعه : لا ، استلقي ربع ساعة خلي مفعول الدواء يسري بجسمك
انسدحت من دون لا تجادلها لأنها حاسه بالأرهاق ومحتاجه تنسدح شوي وتبعد عن الجو المشحون ..فتحت عيونها على صوت الباب الي انفتح ..
حليمه : دكتوره خلاص؟
نايف فتح الستاره وفزت من الخوف واهي تتغطى : خير
نايف بهدوء : وش فيك؟
حليمه : ناسي انك طلقتني ولا لا ليش تدخل علي بهالطريقة
نايف دخل يدينه بجيوبه : جاي اتطمن على ضناي فيه شي؟
حليمه بملل : مافيه شي
نايف : و الدكتوره تقول عكس كذا
حليمه بنرفزه : دامك عارف من الدكتوره لا عاد تسأل
نايف : انتبهي للي ببطنك ان كانك تبين تكونين خير ام له
دخلت الدكتورة واهي مبتسمه: حليمه تقدرين تطلعين الحين
قامت على طول متوجهه للباب ولحقها نايف..
نايف : اذا يقالك تنتقمين مني بهالطريقة لا تخلين هالجنين ضحية
حليمه لفت عليه بقهر : ما هميتني عشان انتقم ، و انتقم في من؟ بولدي ولا بنتي والله انك مو صاحي صدق
نايف هز راسه : الحين احنا بوضع ما يسمع نتكلم و..
حليمه قاطعته : يسمح و لا ما يسمح لا عاد اشوفك مكلمني ما بيني وبينك شي من اليوم ورايح اتمنى ما تتعدى حدودك معي
مشت متوجهه لأهلها تاركته واقف ويناظرها الين ما اختفت عن عيونه ..
-
عند سُلاف الي اخذوا منها الدم و نقلوه لجسد صقر..
الممرضة واهي تناظر العصير ما انشرب منه الا كمية بسيطة : اشربيه كلها
سُلاف : طعمه مخيس
الممرضة : ولو حاولي تشربين لصحتك
اخذته سُلاف واهي تشربه ومكشره : كيف حالته؟
الممرضة رفعت كتوفها واهي ترتب الأوراق : ما ادري ماني من الطاقم الي ماسك حالته
سُلاف نزلت العصير وتكلمت بخوف : بس ليش طلبوا دم له؟
الممرضة : الأكيد انه نزف كثير وفقد دم فيحتاج متبرع والمهم اذا خلصتي العصير تقدرين تطلعين ، عن اذنك
سُلاف ناظرت للجهه الثانية الي كان فيها غرفة صقر ، دقايق وقفت وطلعت على طول وفزوا لها ..
ام زايد : وش صار يا سُلاف؟
سُلاف بهدوء : اخذوا دم مني و ودوه له ما شفته ولا قالوا لي شي عن حالته
ام زايد مسكت راسها : ياربي ولدي ياربي
ام فرح الي جتها بعد ماطلعت من غرفة نياف الي كان فيها اهله عنده ..
ابو زايد : وش اخبار نياف ؟
ام فرح : بخير الحمدلله صاحي الحين
قام ابو زايد متوجهه لنياف و لحقه زايد ..
-
بغرفة نياف ..
نياف يناظرهم : صقر وش صار عليه؟
ام نايف الي كانت جالسه جنبه بالسرير : للحين الدكتور ماطلع
نياف غمض عيونه و الدمعه نزلت ..
ابو نايف بخوف : يعورك شي يا بوي؟
نياف هز راسه بـ لا
جابر : اجل وش فيك؟
نياف واهو يتذكر الي صار : وقتها لمحت عيوني صقر الي كان متوسط السيارة وكيف طار بالهواء
ليلى مسكت جابر من يده بقوه وشد عليها جابر : باذن الله مايصير الا كل خير
نايف : وش سالفة راعي السيارة؟
جابر ناظرهم : مدري فجأه دخل بسرعته للحاره
ابو نايف : يعني ماكان قباله الا هالاثنين؟
جابر : لا كان الكل مجتمع بنص الشارع بس الاقرب له صقر و نياف
نايف : اكيد انه متعمد يأذي احد ولا من متى السيارات تمسك هالسرعه بالحارة و شايف الناس
ام نايف : بلغوا عليه خلوه يمسكونه المجرم
نايف : بلغنا يمي ارتاحي
ام نايف : الله لا يوفقه
نياف يحاول يجلس على حيله: ابي اطلع اشوف صقر
جابر سدحه : اجلس انا بروح اشوفه لك
-
خلال ساعتين من وجودهم بالمستشفى طلع الدكتور واهو يفصخ قفازاته و وقف قباله على طول ثامر الي ينتظره يتكلم واهو متوتر ..
الدكتور حط يده على كتفه وتكلم بهدوء : بغيبوبة حاليًا
ابو زايد : ان لله وانّ اليه راجعون
ام زايد ببكاء : وش فيه ولدي وش فيه؟
الدكتور : تعرض لكسور بجسمه و خبطه قوية براسه و اهي سبب غيبوبته
ام فرح : طيب يا دكتور متى مقدر له ويصحى؟
الدكتور تنهد بخفيف : والله العلم عند الله احنا بنسوي شغلنا و اللازم باذن الله
سُلاف واهي تسمع سندت راسها على كتف وجود الي مسكت يدها بقوه : لا تخافين
ثامر لف من الجهه الثانية واهو يمسح على وجهه : يا رباه
زايد قام : بروح اشوف الشرطة وش صار عليها
ام زايد : تكفى يا زايد لا ترجع الا وانت معك خبر انهم ماسكينه
زايد : ابشري
طلع زايد ..وجت ليلى مع جابر الي عرف منهم وش حاله وحاول يهدي عمه الي كان ثابت بس ملامحه ماتبشر بالخير ..
-
بعد اسبوعين ، من خروج نياف من المستشفى و تواجد صقر الي للحين بغيبوبه ..
ثامر واقف عنده ويتأمله : اصحى يا صقر تكفى البيت ما ينبغى من بعدك
زايد حط يده على كتفه : ادع له
ثامر نزل راسه وخنقته العبره : بيدخل بالأسبوع الثالث يا زايد ولا فاق
زايد حضنه : صقرنا قوي بيتحمل ويرجع زي مانعرفه
ثامر رفع راسه له : وش صار على صاحب السيارة؟
زايد ابتسم له : انمسك الله لا يرد فيه الروح
ثامر : وش سالفته؟
زايد : كان سكران
ثامر بصدمه : بذمتك
زايد : والله والحين ممسوك و بياخذ جزاه
ثامر تنهد بقوه : بروح لحليمه
مشى لعند القسم الي كانت متواجده فيه حليمه وقابلته بالممر..
حليمه بهدوء : كنت جايتكم
ثامر : وش قالت لك الدكتورة ؟
حليمه ابتسمت بتعب : سوت لي اشعة والحمدلله البيبي بخير
ثامر : بنت ولا ولد؟
حليمه : بعلمكم بس اصبر شوي
ثامر مسك يدها : مشينا البيت طيب
حليمه : لا بروح اشوف صقر اول
ما حب يعاندها وتوجهوا لصقر واهم يشوفونه من ورا القزاز ..
حليمه ونبرة الوجع واضحه : الله يشفيك و يعافيك يا عيون اختك
زايد : يلا نرجع البيت قبل ينشغل بال امي و ابوي
حليمه وعيونها لازالت على صقر : يلا
-
بـ بيت البنات ..
سُلاف الي كانت جالسه بينهم جسد بلا روح من صار الموقف ما بكت ولا ابدت اي ردة فعل حتى لو خفيفه ..
وريف : تعالي كلي
سُلاف هزت راسها بـ لا
وريف بعصبيه : امشي من قمتي ما اكلتي شي
سُلاف : ما ابي
جودي : مايصير الي تسوينه بنفسك تعالي كلي
سُلاف ناظرتهم واهي تتكلم بهدوء : ابي ازوره
وجود : تستهبلين؟
سُلاف : بتجون معي ولا اروح لحالي؟
وريف : لو شافونا عنده ؟ ماله داعي الموقف لو سمحتي سُلاف عن هالحركات الطايشه
جودي ناظرتها : بجي معك
سُلاف وقفت على طول : يلا تعالي
وريف واهي تعلي صوتها : لا يشوفونكم عنده وقتها وش يسلمكم من لسانهم
وجود مسكتها بهدوء : خليها تروح تشوفه واضح انها شايله همه
وريف تنهدت : ادري بس ما ودي تروح ويشوفها احد من اهله وش بيقول عنها
وجود : ماعليه خليها
طلعت سُلاف و جودي متوجهين لمحلهم عشان بشير يوصلهم ، وخلال نص ساعة دخلوا للمستشفى..
جودي وقفت الاستقبال: السلام المريض صقر بن يافع آلـ.. بأي غرفة؟
الرجال : غرفة رقم ٣٩
سُلاف مسكت جودي وسرعت خطواتها متجهه له..
جودي : اصبري نشوف اذا احد من اهله واقف
سُلاف الي استوعبت : طيب
مالقوا احد قبال غرفته و على طول دخلت سُلاف و جودي وقفت متكتفه تنتظرها واهي متوتره ..
عند سُلاف الي استقبلتها الممرضة ورفضت دخولها بس مع اصرارها اعطتها الممرضة لباس خاص فيها قبل تدخل الغرفة الفعليه الي متواجد فيها صقر ، فتحت الممرضة لها الباب واهي تشوف كيف الأسلاك والمغذيات تحاوطه من كل مكان و الأكسجين عليه ، وقفت عنده واهي خانقتها العبره و الرؤية انعدمت من دموعها الي بدت تسري على خدها حطت يدها بيده ..
وتكلمت سُلاف و الغصه بحلقها : كنت اكذب عليهم اني احبك بس ما هقيت والله اني صدق احبك
وقفت شوي واهي تنتظر منه اي حركة بس كان هادي وماتسمع الا صوت بكاها..
كملت حكيها واهي تبكي بهدوء : صقر ارجع راضيه نتهاوش كل يوم بس ما تغيب عن حياتي كذا
سكتت ثواني واهي تمسح دموعها وهمست : صقر
وكأنها كانت تنتظر رده الي تسمعه منه " لبيه"
حطت راسها على يده وبكت بقوه : صقر تكفى قل انك تسمعني
رفعت راسها واهي تزفر بتعب وكملت : راحت ايامي وانا انتظرك يا صقر انتظرك على بابي تجي وتحارشني اجتمع مع اهلك وانتظرك تطلع بوجهي وترفع ضغطي
ارخت مسكت يدها بيده واهي تودعه بهدوء : مع السلامة
شد على يدها بقوه قبل تسحبها وفزت بخوف : صقر تسمعني؟
رجع يشد على يدها وبكت من الفرحه : الحمدلله
كانت بتقوم تنادي الدكتوره بس شد على يدها للمره الثالثه وكأنه يقولها لا تروحين ..
سُلاف مسكت يده بقوه واهي تبكي من الفرحه : معك معك
استمر ماسك يدها لثواني و ارخى مسكته واهي تبتسم وتناظر ملامحه الجامده الي ماتحرك فيها ساكن قامت على طول تنادي الممرضة وتعلمها انه تحرك ..
الممرضة قربت لعنده واهي تكشف عليه : طبيعي ردات الفعل منه ، هذا ما يعني ان عنده استجابه
سُلاف واهي متأكده : لا لا سمعني والله
الممرضة واهي تناظر ساعتها : انتهى وقت الزيارة عزيزتي
سُلاف رجعت له ومسكته وهمست : ادري انك واعي على الي حولك برجع لك
طلعت واهي تفصخ الي عليها وحضنت جودي بفرحه : جودي مسك يدي مسكها
جودي شهقت : قولي والله
سُلاف والفرحه بوجها و الدموع ماليه وجها : والله والله قلت ابي اتأكد امسك يدي مره ثانيه ومسكها ثانيه وثالثه بعد
جودي حضنتها واهي فرحانه : الحمدلله يا سُلاف الحمدلله
سُلاف تنهدت بفرحه : يالله
-
بـ بيت البنات ..
وجود : اخلصي علمينا بنت ولا ولد؟
حليمه ابتسمت : بعدين اقولكم
وجود بحماس : ياشينك حليمه تكلمي بسرعه!!
حليمه مسكت بطنها وابتسمت : توقعي
وجود : بنت؟
وريف جت واهي تحط الصينية : انا اقول ولد احس وحامك وحام اولاد
حليمه ضحكت بخفه : صح ولد
وجود شهقت : ماشاء الله
وريف ابتسمت : مبروك يتربى بعزك ان شاء الله
حليمه : عاد محد يدري الا انتم
وجود : ابد ابشري سرك ببير
حليمه تلفتت : وين البنات؟
وريف بلعت ريقها : شوي ويجون ..خذي فنجالك
دخلوا البنات بسرعه واهم يسمعون اصواتهم تنادي وريف و وجود..
وقفت جودي عند الباب بسرعه لما شافت حليمه وابتسمت باحراج : اخبارك حليمه؟
ووراها سُلاف الي الابتسامة شاقه وجها : اخبارك؟
قامت لهم حليمه تسلم عليهم : بخير انا وش عندكم مستانسات كذا؟
سُلاف تصرف : طاحت جودي عند الباب وضحكت عليها
حليمه : ياعمري اوجعك شي؟
جودي : لا لا بخير
وجود تبي تغير الموضوع : بنات توقعوا حليمه حامل ببنت ولا ولد؟
سُلاف بحماس : بنت
جودي : انا اقول بنت بعد
حليمه : غلط ولد محد جابها الا وريف
وريف تتصنع الغرور : ذكيه
سُلاف فصخت عبايتها ورمتها وانسدحت : آه فرحانه فرحانه
وجود ناظرت لجودي بمعنى وش عندها؟
جودي أشرت لها بـ شوي خلي حليمه تروح
ابتدوا يسولفون واهم يتذكرون ليلى الي سافرت قبل ثلاث ايام بعد ما تأجلت سفرتهم كم مره ..
-
بـ بيت ابو نايف الي كان بينهم نياف ..
نياف بملل : يا يبه تكفى خلني اروح اغير جو جتني تكه من البيت
ابو نايف بحزم : ما تطلع الين ينجبر كسرك
نايف : يبه خله الله يهديك من جاء ماطلع
وضحى : عادي شوفني ما اطلع ولا واحد منكم قال ماتطلع طفشت
نايف : وش بيسكتها الحين ذي
ام نايف : اتصل على عيال عمك يجونك
نياف بملل : يالله منكم
وضحى : يمه بروح لبيت عمي يافع
ابو نايف : وش عندك؟
وضحك بفرحه : حليمه عرفت وش جنس الجنين وابي اروح اغصبها تتكلم
نايف عدل جلسته : عرفت؟
وضحى واهي مبتسمه ببراءة : ايه يوم دقيت عليها قالت تعالي واعلمك
نايف ناظر لأبوه معصب : وانا يا الأب ما دريت!!
ابو نايف : انا اكلمها و اعرف واعلمك
قام نايف ورمى الي بيده بعصبيه وطلع ..
ام نايف مستغربه : موب صاحي يبيها تكلمه تعلمه وش الي ببطنها
ابو نايف تنهد : الله يحسن الحال بس
وضحى : ها يبه عادي اروح؟
ابو نايف : روحي العصر فيه ادمي صاحي يسير الظهر
وضحى جلست بملل : طيب
ام نايف : بجي معك لا تطلعين لحالك
وضحى قامت : طيب
نياف : وانا بطلع بعد تكت روحي يا جماعة
ابو نايف : صجيتني خلاص اطلع وانتبه ليدك ولا والله اكسر يدك الثانية
نياف بفرحه : ابشر
-
عند حليمه الي طلعت من بيت بنات سليمان متوجهه لبيتهم ..
وقفت واهي تشوف نايف جاي ووقف عند الباب وكانت بتغير طريقها عشان ما يشوفها وناداها ..
نايف بحزم : حليمه
حليمه وقفت واهي مغمضه عيونها : يالله
نايف جاء لعندها : صدق الي سمعته؟
لفت عليه مستغربه : وش سمعت؟
نايف : الي ببطنك بنت ولا ولد؟
حليمه بلعت ريقها وعرفت ان وضحى النكبه تكلمت : ولد
نايف : وما كنتي بتعلميني بعد؟
حليمه : توني اعرف اليوم!
نايف تنهد : المهم كل شي يخصه تعلميني اياه اول بأول لا ادري من غيرك
حليمه بتسليك : طيب
مشت واهي تتعداه دخلت للبيت على طول وسكرت الباب وراها واهي تزفر براحة ان محد شافها معه ..
ام زايد : وش بلاك صيفتي؟
حليمه واهي تفصخ عبايتها : خذتني السوالف معهم يمه
ام زايد حطت بيالتها والضيق واضح عليها..
حليمه الي تبي تغير جو امها : عندي لك خبر حلو
ام زايد : بشريني هالبشاير لها اسبوعين غايبه عن دياري
حليمه ابتسمت بزعل : الي ببطني ولد
ام زايد شهقت : استحلفك بالله
حليمه هزت راسها بـ ايه
ام زايد بدت تزغرط بفرحة وطلع ثامر و زايد وابو زايد ينتظرونها تتكلم..
زايد : صقر ؟؟
ام زايد بفرحه : اختكم حامل بولد
ثامر صرخ بفرحه : الحمدلله
زايد ضحك بخفه : مبروك حليمه
حليمه وقفت واهي تحضنه : الله يبارك فيك
ابو زايد باس راسها : مبروك يا بنتي عقبال ما نفرح بجيته
ام زايد : امين
حليمه : لو جميلة ما راحت كان الحين ناصر قالب البيت
زايد :كلميها بشريها
حليمه : ان شاء الله
ثامر : وش بتسمينه؟
حليمه بحيره : والله مدري
-
عند ليلى و جابر ..
جابر : ما اعجبني هالمطعم ليتنا ما اخترناه
ليلى : ماعليه عادي
جابر :نرجع ؟
ليلى شالت شنطتها : يلا
جابر ناظرها واهي تمشي جنبه : ليلى
ليلى : هلا
جابر ماودك تغيرين لثمتك لغطوه كامله؟
ليلى ناظرته : لا
جابر : ليه؟
ليلى : اخذتني من بيت اهلي وانت عارف ان هذي عادتي انا وخواتي لثمه ما عمري اقتنعت بغيرها
جابر : بس حتى ولو يعن..
ليلى قاطعته بهدوء : لثمتي ساتره ومافيها شي و اريح لي
جابر تنهد : طيب
ليلى تبي تغير الجو : وش رايك نجلس عند هالنافوره شوي
جابر : تعالي
جلسوا قبال بعض واخذتهم السوالف رغم ان مافيه حولهم احد والكل بدا يدخل لمسكنه حتى المحلات سكرت..
ليلى : وش صار على صقر؟
جابر : للحين بغيبوته
ليلى عضت شفايفها واهي تتذكر سُلاف : ودي اكلم خواتي
جابر : ابشري بكره لا اصبحت الدنيا
ليلى : ان شاء الله
جابر ناظرها واهو يبي يفتح معها هالموضوع من فترة : ليلى ماودك تحملين؟
ليلى بلعت ريقها بتوتر : تو مالنا شهرين
جابر : شهرين نعمه ماتبين يعني مني عيال؟
ليلى هزت راسها : لا وش هالتفكير بس مدري
جابر : اذا عندك سبب اقنعيني
ليلى : تبي الصدق خايفه ودي نفكر بهالموضوع بعد فترة افضل
جابر ابتسم بخفه : الي يريحك بس لا تطولينها
ليلى وقفت : يلا نرجع للشقه؟
جابر مسك يدها : مشينا