بعدك يابوي اصبحت دنياي عرجاء بلا عكاز

6

-
اليوم الي بعده بالصباح الباكر
عند البنات بالمستشفى الي كان يبعد عن ديرتهم بمسافة بسيطة ، بعد ما سمح الدكتور بخروج ليلى..
سُلاف : هذي والله الوهقه من بيرجعنا؟
جودي : ودي اقول نمشي بس الطريق بعيد
وجود : اف ليتهم ماجابوها لذا المستشفى
سُلاف : لو نمشي شوي ما اظن بيضرنا
وريف بخوف : لا الشارع فيه سيارات رايحه جايه اخاف
ليلى واهي على الكرسي وحاجبه الشمس الي على وجها بيدها : اتصلوا على بشير
سُلاف : اي والله
دخلت للمستشفى تاخذ تليفون تتصل عليه ..وطلعت لهم واهي متضايقه: مارد يابنات
وريف : اتصلي كم مره بعد
سُلاف : اتصلت اربع مرات
ابتعدوا خطوتين لورا كلهم بنفس الوقت بعد ماتقدمت سيارة لهم ونزل منها : اركبوا
سُلاف : خير انت وش جابك؟
صقر : اركبي خلني اوصلكم ولا عاجبتك الوقفه هنا
سُلاف : محد يبي مساعدتك روح
وريف مسكتها وهمست : مو وقته سُلاف الشمس حرقتنا
سُلاف بصوت مسموع واهي تتكتف : اركبوا انتوا ماراح اركب
صقر : بكيفك ..التفت للبنات وكمل : اركبوا عمي ابو نايف اهو الي موصيني اجيكم
جودي بعفويه : وعياله وينهم؟ ليش انت يعني
صقر : مشغولين ..اركبوا يلا
ركب السيارة وانتظرهم يركبون وكان ملاحظ انهم يناظرون بعض محتارين وماكان عندهم خيار اخر الا انهم يركبون..السيارة ماكانت تكفيهم واضطروا يركبون فوق بعض..
وريف بألم : آي يالدبا اقعدي زين
جودي فوق راس صقر : انطمي وين اروح يعني
وجود تقدمت لقدام واهي تناظر لبرا : سُلاف اركبي!
سُلاف صـرخت : ما ابـي
مشت لناحية باب المستشفى ودخلت وتركتهم ..صقر نزل ونادوه البنات خافوا يسوي شي..
صقر حس عليهم : بناديها وبجي ماراح يصير شي هدوا
ليلى بتعب : وجود فغصتي رجولي
ابعدت عنها واهي تضحك : معليش
دخل واهي مو حاسه انه ماشي وراها : وقفي
وقفت بسرعه واهي تلتفت : وش تبي ياخي؟ خلاص خذهم رجعهم
صقر بهدوء : امشي اركبي
سُلاف : ماتفهم انت ؟
صقر بدت اعصابه تفور : قلت لك اركبي احسن لك
سُلاف تكتفت وهمست له : والله ما اركب وش بتسوي؟
صقر ناظرها وبحقد كل المواقف الي بينهم وموقف نياف : عاجبك الترزز عند الرجاجيل اجل؟
سُلاف : تعقب والله
صقر : اجل ليش مطلعه عيونك ؟
سُلاف : هذي لثمتي وهذي غطاتي ماهو عاجبك ماهي مشكلتي
صقر يحاول يتمالك نفسه : امشي تأخرنا على خواتك بالشمس
سُلاف : رجعهم ما مسكتك
مسكها من يدها بسرعه واهو يسحبها ويتكلم : تحبين تعاندين وطحتي بألي اعند منك
كانت تحاول تفك يدها منه : فك الله يقرفك لا تلمسني فك
وصلها لعند السياره واهو يدفها لعند الباب تحت نظر خواتها المنصدمات من انه ماسكها بكل جراءة ..ركبت السيارة بعد ما وجود سحبتها : اركبي خلاص مانبي مشاكل
جودي : سُلاف تهاوشي معه بعدين الحين خلنا نضمن نرجع لبيتنا
سُلاف سكتت وصوت انفاسها واضح من العصبيه ..بينما البنات كانوا يتهاوشون من الزحمه..
ليلى : هذا وانا تعبانه داعسيني بجحر السيارة
وجود : ليلى اسكتي ازعجتينا
وريف : اسكتوا انتوا يكفي جودي قاعده بحضني خانقتني
جودي : وين اروح اطير يعني
سُلاف : انا وش خلاني اصلًا اجي معكم
-
في بيت ابو زايد..
حليمه : استخرت يا يبه ولا ارتحت
ابو زايد بحنيه : استخيري مره ثانيه الرجال له كم يوم يبي الرد
ام زايد : لا تضغط عليها يا يافع خلها ما ارتاحت في غيره عشر
ابو زايد تنهد : يعني ارفض؟
حليمه : اي الله يطول لي بعمرك ..ما ارتحت له
و اخوانها كانوا يناظرونها و ساكتين
ثامر: ياليل شكلها مطوله عندنا
جميلة : وانت وش عليك تنتظر نصيبها اكثر منها
ناصر ضحك : خالي شكل امي بتستلمك اليوم
ثامر : افزع معي وانا خالك افزع
ناصر رفع يده : مالي دخل
زايد : اقول جميلة متى بتروحين؟
جميلة استغربت : مضايقه البيت عليكم؟
زايد عدل جلسته : لا حشى وانا اخوك بس اننا ناوين نطلع للبريه ذا الكم يوم وابي اشوف متى بتروحين عشان نقدمها قبل روحتك
جميلة ارتاحت : اشوا حسبالي بعد
ام زايد : ظنك لو ما يبيك بالبيت هنا بسكت له
زايد : ياهوه الحين بتشب فيني والله ماقلت شي يا امي
حليمه : صيغة سؤالك كأنك طفشان منها يعني لا تلومها
ناصر واهو يحط رجل على رجل : حتى لو طفشان مننا بنقعد الين مانشبع
زايد : ابو لسان ذا يبغى من يقصه
ابو زايد : صقر ما كأنه تأخر؟
ام زايد : الا والله ..الله يستر عليه
جميلة : ليه وينه رايح له؟
ام زايد : مدري وصاه عمك على شي وراح له
جميلة : وعمي مريح عياله يعني ويشغل اخواني ولا كيف؟
ابو زايد : جميلة اقصري الشر مو من كثر طلبات اخوي لكم
جميلة سكتت ولفت تضبط شعر بنتها سلوى ..بينما زيد الي بدأ يتكلم بموضوع بنات سليمان..
زايد : الا يابوي تهقى يوافقون على جابر؟
ابو زايد : العلم عند الله
ام زايد : اني خايفه اخوك يتعدوى لهم زياده لا رفضوا
ابو زايد : الله يستر بس
حليمه : والله معهم حق يعني من طلعوا على هالدنيا هالمسكينات شاب فيهم والحين يبي يزوج البنت لولده ماش الموضوع غريب
قام ابو زايد تاركهم واهو بنفسه ماهو متطمن لأخوه وفعلته هذي يدعي ربه انه ما يضر بنت بريئة..
جميلة حست على ابوها وهمست لهم : شكل ابوي عارف شي مايبي يتكلم
ام زايد : ايــه ابوك هذا وجهي لو تكلم اصلًا
حليمه : طيب يمه ابي اروح لهم اتطمن على ليلى عادي؟
ام زايد : روحي
جميلة : بجي معك
حليمه : خلاص العصر نروح
-
عند البنات بعد ماوقفت سيارة صقر قدام الباب..
سُلاف نزلت بسرعه من دون لا تلتفت ..و بعدها وجود واهي تمسك يد ليلى وتمشيها معها ..نزلت جودي من رجل وريف ..
وريف : ماتقصر يا صقر كثر الله خير
صقر و عيونه تلاحق سُلاف : ماسويت الا الواجب
وريف بتردد : واعذرني على تصرف سُلاف اليوم يعني تعرف عصبيه وبرضو انت غلطت ترا لما مسكتها من يدها ماينفع
صقر يمسح على جبينه ويناظر قدام : ادري واعتذر طلعت من طوري
نزلت وريف وسكرت الباب ودخلت الا وتشوف سُلاف قدامها متكتفه : وش عندك تسولفين معه؟
وريف تعدتها : ما اشكره يعني
سُلاف : لا تشكرينه ولا تكلمينه
وريف : طيب تعالي ندخل
دخلوا واهم يحاولون يضيعون موضوع الخطبه عن ليلى الي ماهي على طبيعتها ابدًا ومستغربين هالشي منها ، لطالما كانت اكثر وحده فيهم تتحمل الألم ولا توضحه بس هالمره واضح انه مهدود حيلها ..
ليلى : جوعانه
قاموا البنات كلهم مع بعض وضحكوا بنفس الوقت..
جودي : وش هالدلع عقبالي اتعب
وريف ضربتها : اعوذ بالله من حكيك
قامت وجود تسوي الأكل و لحقتها وريف تساعدها..
جودي تربعت : اقول بنات بالله صقر من قريب ماهو مزيون؟
ليلى : وانتي كيف اكتشفتي؟
جودي واهي تلعب بخصلتها : كنت فوق راسه عاد الصدق ملامحه حلوه من قريب صراحه
ليلى : انهبلتي شكلك استحي على وجهك!
سُلاف تناظرها : عاجبك؟
جودي : تبين الجد اي
سُلاف : امحق ذوق
ليلى ضحكت : مالقيتي تمدحينه الا عند سُلاف
جودي قربت من سُلاف : بالله عاد جد سُلاف ماهو جميل؟
سُلاف وخرتها عنها : مالي خلق ذا السوالف ابعدي عن وجهي
طق الباب وقامت سُلاف تفتحه :مين؟
حليمه : حليمه وجميلة افتحي
سُلاف زمت شفايفها وفتحت واهي تتصنع الابتسامه : السلام حياكم
سلموا على بعض ودخلوا لداخل ..
سُلاف : بنادي البنات
-
ببيت ابو نايف ..
ام نايف جالسه وسانده راسها بتعب : وضحى زلي الشاهي
قامت وضحى واهي ملاحظه حالة امها ولا ودها تسأل عشان ما تاكلها بقشورها ..لمحت نياف جاي : نياف تعال
نياف : هلا؟
وضحى : امي مو على بعضها تكفى اسأل عن حال ليلى اذا حصل فيها شي؟
نياف استغرب : مارحتي مع حليمه وجميلة اليوم؟
وضحى : لا تخيل ابوي فجأه قلب وعصب قال ماتروحين
نياف تنهد : طيب
دخلوا كلهم عند امهم ومع السوالف تكلم نياف ..
نياف : وش صار على ليلى يا يمه؟
ام نايف : مدري عنها ..وتكفى فكني من طاريها راسي مصدع
وضحى بخوف : لا يكون فيها شي قوي؟
ام نايف : وش يعني ذبحناها! بلا هبال زايد
وضحى سكتت ...
نياف : الله يهديه ابوي ان كانه بيسبب مشاكل
ام نايف : ابوك راسه ماهو خالي الله يستر علينا منه
وضحى : الا الله يستر على بنات سليمان منه
ام نايف ناظرتها بعصبيه : قومي طسي عن وجهي
قامت وضحى واهي شايله بيالتها وقلبها يرقع خوف على ليلى لا يكون صاير لها شي ومالها الا تكلم حليمه اذا رجعت من عندهم تتطمن عليها ..
دخل نايف للبيت وقابلها : على وين؟
وضحى : غرفتي ...وين جابر؟
نايف : اخر مره شفته بالقهوة
وضحى : طيب ماقالك شي عن ليلى؟
نايف : لا ابد ماجاب السيره ليه وش عندك ؟
وضحى : خايفه على ليلى وابوي مو راضي ازورها
نايف : كلمي او روحي لحليمه طيب
وضحى : توديني ؟
نايف : والله تعبان ومنهد حيلي
وضحى تأففت ومشت وتركته طفشت من انها تطلبهم ويتهربون ويتعذرون ..ملت من جلسة البيت وملت من انعزالها المجبوره عليه..
-
عند البنات بعد ماتطمنوا على ليلى وبنص سوالفهم ..
جميلة : ليلى وانتي وش رايك بجابر؟
ليلى للآن تحس بخمول بجسمها بس تقاومه : ما اعرف الا انه اخو وضحى
جميلة : لا اقصد بشكله وش رايك فيه؟ ماقد حصل موقف بينكم استلطفتيه؟
حليمه استغربت : جميلة وش ذا الحكي ذا السوالف تصير بالدمام مو عندنا بالديره
جميلة انصدمت : الحب متواجد بالدمام بس!
وريف : حب وش وش ذا الخرابيط تقولك ماتعرفه
جميلة : ما اقصد انها تعرفه وتحبه لا اقصد ما قد توالف قلبها عليه!
ليلى بعصبيه هاديه : جميلة بديتي تخورينها انتي انتبهي لمنطوقك
جميلة : ياكافي ماقلنا شي خلاص سكتنا
ليلى تأففت وطاحت عيونها على سُلاف الي كانت تناظر جميلة بتمعن وواضح بفمها حكي يزلزل البيت عليهم ..ضحكت ليلى تغير الجو : و وضحى ليش ماجت؟
حليمه : كانت بتجي بس مدري وش عنده عمي عصب علي انا وجميلة
جميلة : اي والله الحمدلله والشكر ماتشوفينه اكلنا بقشورنا واحنا عند الباب ننتظر وضحى
وجود : شكله حقد بزياده بعد ما انرفض ولده
جودي ضحكت واهي تتخيل الموقف : ياروحي عليكم اكيد تفشلتوا
جميلة : اي والله تفشلنا ..قاعده اتلفت يمين يسار اشوف احد قاعد يشوف هالمنظر ولا لا
وجود ابتسمت : الا وش اخبار عيالك؟ ليش ماجبتي سلوى معك
جميلة : الحمدلله كلهم بخير ..خليتها عند امي انها بثره الله يهديها ولا ينفع اجيبها هنا
ليلى : يازينها من زمان عنها
جميلة : قبل ارجع للدمام نجتمع واجيبها تشوفينها
حليمه : ليش بترجعين قريب؟
جميلة : يومين ان شاء الله
وريف ابتسمت : لا يكون اشتقتي لأبو العيال
جميلة استحت : اي والله اشتقت
ضحكوا على وجها الي تورد ..ورجعوا يسولفون تحت صمت سُلاف الي تسمعهم وماخذه بخاطرها كثيير من مواقف كثيره..
-
بيوم جديد على الديرة .. الساعة ١٢ الظهر
سكرت التليفون وركضت للبنات الي مجتمعين بالحوش : ام عزيز بتجي اهي وبضاعتها
ليلى : طيب قصري صوتك يختي
وجود : خلاص تعودوا علينا الأوادم ماهو شي غريب
مرت ساعتين والبنات على نفس حالهم تغدوا واخذت سُلاف البخور وبدأت تبخر البيت عن ريحة الأكل ..رن الجرس وابتسمت : اكيد ام عزيز
دخلت ام عزيز واستقبلوها البنات واهم يبوسون راسها ويتحمدون لها بالسلامة ..
ام عزيز جلست : والله اني جيتكم وجبت معي اغراضي وانا مخصصه لكل وحده شي
جودي بفرح : جد؟ وش جبتي لي؟
ام عزيز بدت تفك اغراضها وتنثرها : هذا لك شوفيه متأكده على مقاسك
جودي بصدمه : واو! ماعمري لبست كذا
ام عزيز مدت يدها بفستان : وهذا لك ياليلى
ليلى قامت اخذته واهي مصدومه : ام عزيز ماعمري لبست ضيق!
ام عزيز : وعشان كذا جبته لك ..غيري البسي تدللي توك صغيره وتهبلين
ليلى اقتنعت : والله انه حلو!
جودي : صدقيني بيطلع عليك يهبللل
ايدوا البنات كلام جودي وبدت ام عزيز تطلع اكثر واكثر (بكل مره تروح للمدينة تجيب للبنات على حسابها تعاملهم مثل بناتها ماتقصر عليهم بشي تحبهم ويحبونها ، من بعد وفاة امهم ام عزيز ماقصرت معهم بأشياء كثيره )
وريف : الله يطول بعمرك ويخليك لنا ..والله فقدناك شهرين ماشفناك
ام عزيز : اي والله قعدت عند بنيتي هالفترة و منها عزيز قعد يدور له وظيفة بس مالقى للحين
وجود : الله يرزقه يارب ..يعني انتوا مصممين مره تروحون للمدينة؟
ام عزيز : اي يابنيتي جمانه تزوجت وراحت هناك وعزيز ناوي يتوظف هناك ويبي يستقر ويتزوج من المدينة و من بقى لي هنا؟
البنات كلهم انصدموا ولفوا على وجود الي ماكانت اقل منهم بصدمتها ..
تكلمت وريف بسرعه ماتبي ام عزيز تنتبه : افا واحنا وين رحنا؟
ام عزيز : انتوا بناتي ما اخليكم بجيكم وبتجوني ..
سُلاف بتوتر : بيتزوج عزيز؟
ام عزيز ابتسمت بفرح : يبي يتوظف اول بعدها بدور له
جودي : يعني ماهو حاط عيونه على وحده؟
ام عزيز : لا بس قالي يبيها من المدينة اهو بخاطره بزيادة يستقر هناك
جود بلعت غصتها وجلست تتأمل ام عزيز واهي تتكلم عن ولدها وفرحانه فيه ما تدري من كم وعود و اوهام اوهمها لوجود وبالأخير تنصدم كذا..
-
بييت ابو زايد ..على مشارف المغرب
جالسين كلهم ..
ام زايد واهي تلعب بشوارب صقر : حبيبي يا صقر قصره لا تطير منه
زايد ضحك بقوه وطلع الشاهي من خشمه : حلوه حلوه
ام زايد ناظرته بطرف عين : وانت تموت بالشماته!
جميلة الي كانت كاتمه ضحكتها لا تفشل صقر ..لف عليها صقر : ترا اسمع كركرتك اضحكي لا تكتمينها
جميلة ضحكت واهي تمسح على كتفه : يازين الي روحه رياضيه
صقر حط رجل على رجل واهو يقول لحليمه : جيبي المقص قصريه
قامت حليمه واهي مبتسمه : يلا تعال هنا
قام وجلس على الكرسي يبعد شوي عنهم وبدت حليمه تقصه تحت توتر صقر انها تخربه : انتبهي لا اقص شعرك لك
ناصر : خالي تراني دايم احلق لأبوي خلني ادبره لك لا تجيب العيد فيك خالتي
صقر أشر له : لا لا وانا خالك اقعد
جميلة : ليه ماتثق بوليدي؟
صقر : انا خلني اثق بأمه عشان اثق في ولدها
جميلة شهقت : سمعت يبه وش يقول؟
ابو زايد واهو يهز راسه وتكلم بهدوء : سامع
جميلة : دافع عني طيب لا تسكت
ابو زايد على نفس هدوءه واهو يشرب بيالته : عندك لسان تكلمي
ام زايد : لا تتكلمين بس تقعدون تتلاسنون
ثامر : خليهم يايمه يسون جو شوي طفش
ام زايد : تبي الوناسه على قفى هوشة اخوانك
حليمه واهي ماسكه شنب صقر ولفت تشرح لأمها : قصده يسوون حركة بسيطه مو مشكله مشكله كبيره
صقر الي كان على حاله ويناظر حليمه واهي ماسكه شنبه : اقول ماودك تكملين شنبي؟
لفت عليه تكمل واهي تضحك على استسلامه لها ..
زايد : يبه وش صار على خطبة جابر؟
ابو زايد : للحين ما ردوا البنات
ام زايد : وش تتوقع بيسوي اخوك لو رفضوا؟
ابو زايد : والله مدري عنه ..اخوي واعرفه ماهو قليل شر بس بحاول الين راسه شوي لو كانت بنيته شي
ثامر : اذا بنيته شي فهو اكيد فيه شي عشان كذا يالقائد السنايدي تجهز لتصدي المشاكل
ابو زايد ضحك عليه : خبل انت
جميلة : اي يبه عفيه حاول فيه يهجد هالشياطين الي فوق راسه
ابو زايد : انتبهي لكلامك
جميلة : ابشر
-
ببيت البنات ..
بعد صلاة المغرب ، كانوا البنات جالسين مع ام عزيز ويسولفون الا وجود الي التزمت الصمت وضايق صدرها ..
ام عزيز واهي ترتب اغراضها : يلا عزيز عند الباب
وجود فزت وناظرت لخواتها الي فهموها على طول وقعدوا يسايرون ام عزيز عشان ماتطلع على طول..ركضت وجود واخذت طرحتها ولفتها على راسها بأهمال ورفعت جزء منها لخشمها ، فتحت الباب ولقته واقف ومعطيه ظهره..
وجود : عزيز
التفت بقوه واهو يناظرها مبتسم : هلابك
وجود قعدت تتأمله ثواني ماهي مصدقه كيف واقف طبيعي قدامها وامها تقول يخطط يتزوج! : جد بتتزوج؟
عزيز طلع يدينه من جيبه ولمس لحيته ويناظرها بدون رد..
وجود : يعني صدق!
عزيز : وجود افهميني انا ابي اعيش بالمدينة مو بالديرة
وجود : وتوك تقولي انك تبي المدينة بعد اربع سنين يا عزيز اربع سنين!
عزيز : بس يا وجود الله يستر عليك ، جاء الوقت الي كل واحد فينا يمشي بطريق
وجود : هنت عليك لذا الدرجة؟ قبل شهرين قلت بجي بالوظيفة ونتزوج وجيتني بهالخبر !
عزيز ناظر للأرض : المشاعر تتغير يا وجود و ماهي بيدي
وجود ابتسمت وعيونها مليانه دموع : شايف لك شوفه صح؟
عزيز رفع عيونه بسرعه واحتدت ملامحه : وجود ادخلي ونادي امي
وجود : طيب يا عزيز تذكر زي ما اوهمتني اربع سنين بحبك والله ما اسامحك عليها ..ما ودي ادعي عليك لكن الله يجعلك تذوق حرقة قلبي الي احس فيها الحين
رجعت على ورا وسكرت الباب بوجهه ولا انتظرت رده ..
دخلت على طول للمطبخ عشان ماتصادف ام عزيز ..بعد دقايق بسيطة حست بحركة البنات بالبيت يدورونها..
وجود بصوت مخنوق : انا بالمطبخ
دخلوا عليها البنات وعيونها عليهم لا شعوريًا حطت يدينها على وجها وبكت بكت السكوت و الصمود الي صمدته قدام ام عزيز طول الوقت و قدام عزيز يوم كلمته..
وريف واهي تحضنها ودموعها تنزل : حسبي الله ونعم الوكيل
وجود بإنهيار : اربع سنين! اربع سنين! هانت عليه وراح وخلاني قالي شهرين بس بروح ادور وظيفة واجيك اخطبك ونعيش حياة ماعمر احد تمناها بس شوفوا وش صار غدر فيني وكسرني يابنات كسرنيي
سُلاف قعدت قدامها ومسكت يدها : يعقب ويخسى ما يكسرك شي انتي وجود! وجود القوية
وجود فكت يدها وأشرت لقلبها : ماني قويه قلبي يوجعني احسه بيطلع من مكانه ماني مستوعبه كل الي حصل بينا باعني برخيص!
ليلى تربت على كتوفها وتكلمت بهدوء : وجود الأيام مثل ماعودتك عليه بتنسيك اياه
جودي بضيقة : وش قلتي له يوم كلمتيه؟
وجود ببكاء : بكل بساطه قالي المشاعر تتغير ..يقصد مشاعره لي تغيرت وماعاد يهمه وجودي بحياته وانه يبي يستقر بالمدينة
جودي : الي ما يبيك لا تبينه
سُلاف : خله يطس بألي مايرده
ليلى بعفويه : اذا تبين تتزوجين بزوجك واحد بس اصبري ادور
التفتوا عليها البنات وتكلمت بفهاوه : وشو؟
سُلاف : صاحيه انتي داخله بقاله تدورين؟
وجود الي بنص صياحها ضحكت واهي تمسح وجها بالمنديل : ياربي منكم ماعندكم جديه انتم!
وريف حضنت كتوفها : اي عفيه خيتي ابتسمي واضحكي وطنشيه ..شوفيني انا بعد طلاقي حسيت قلبي ماهو موجود من وجعه بس الأيام عودتني
وجود : بس مانسيتيه صح؟
وريف : ما اتذكره حبًا فيه لا والله بس يوجعني قلبي اني انسانه كويسه وطحت بشخص مثله
وانقلبت جلسة البنات محل فضفضه لشعور كل وحده فيهم ..
-
ببيت ابو نايف ..
ابو نايف واهو يفصخ ساعته ويحطها بالأرض جنبه : بكره ان شاء الله تروحين انتي و وضحى لـ بيت سليمان وتفتحين الموضوع مره ثانيه مع بنتهم
ام نايف لفت عليهم واهي تعمل شعرها (تجدل) : انا متأكده بيرفضون لا تخليني اطق مشوار لبيتهم على الفاضي
ابو نايف : ايه لو انه السوق ماقلتي مشوار
ام نايف : الحين وش دخل ذا في ذا؟ واي صح تراك ذكرتني بروح للسوق اشتري لي وللبنات
ابو نايف تنهد : يا من شرا له من حلاله عله
ام نايف سكتت شوي وعيونها عليه ..ابو نايف الي ملاحظها : في فمك حكي طلعيه
ام نايف : ليش تبي منهم؟
ابو نايف لف واعطاها ظهره : لا تعكرين مزاجي
ام نايف : لا يحق لي اعرف ولدي الي تعبت عليه ليش بتزوجها فجأه من بنت الشخص الي سعيت ربع عمرك تتجنبه وتكره طاريه!
ابو نايف قام ولف عليها : انتي شايفه استهتار بناته؟
ام نايف تذكرت لما طلعوا يبيعون هذا غير لثمتهم الي بالنسبه لأهل الديرة جريمة (نساء الديرة عندهم يغطون وجهم بالكامل الا بنات سليمان) : شايفه ..ودام انهم مستهترات ليش تربط واحد من عيالي فيهم!
ابو نايف : لأني ابي ادبهم
ام نايف بغضب : تأدبهم بعيالي؟ وبعدين وش علينا فيهم!
ابو نايف : مزاج ، مزاجي مستقعد لهم اذا ما رباهم ابوهم اربيهم انا
ام نايف الي فقدت الأمل فيه وانسدحت واعطته ظهرها : تذكر تراهم موب سهلات بيوجعك راسك كثيــر وتذكر كلامي
ابو نايف ناظرها و كلامها يلف و يدور براسه ، عارف قوة بنات سليمان من قوة ابوهم ..
انسدح واهو يلحف نفسه ..ومرت دقايق واكتملت الساعة وغاص بالنوم بعد تفكير عميق..