بعدك يابوي اصبحت دنياي عرجاء بلا عكاز

9

ببيت ابو زايد ..بعد ما راح ابو نايف واهله..
صقر : يوه يايمه الله يهديك ساعتين بكاء خلصنا
ابو زايد : دلع
ثامر : يمه ما نشفت دموعك؟
حليمه : لا اله الا الله اذكر الله
ثامر : ماقلنا شي بس من امس واهي تبكبك
جميلة : بلاكم ما تعرفون شعور الضنا لا انوجع
ام زايد واهي تمسح دمعتها : اي بالله محد فاهمني الا انتي
حليمه : طيب خلاص يمه الله يرضى عليك فرحانين وضيقتي صدورنا
ام زايد : قلبي يوجعني لا شفت يده
صقر واهو يغطيها : ها وغطيناها
ثامر دخل : السلام عليكم
الكل : وعليكم السلام
ثامر : بروح مع نياف للمزارع توصون على شي؟
الكل : سلامتك
ام زايد : زايد وينه؟
ابو زايد : ماسك الدكان
حليمه لجميلة : ولدك وينه ماله حس؟
جميلة : مع زايد
حليمه : زين
سلوى جنب صقر : خالي يوجعك جرحك؟
صقر : لا حبيبتي ما يوجعني
سلوى : طيب ليش مغطينه؟
صقر : عشان ما يتوصخ ويوجعني
سلوى تطلع العابها : اذا كبرت بصير دكتوره و اعالجكم
ام زايد ابتسمت : ان شاء الله تصيرين افضل دكتوره
حليمه : اجل شدي حيلك بالدراسة

-
ببيت ابو نايف بعد ما رجعوا من بيت ابو زايد ..
ابو نايف : وش صار على اخوك؟
نياف : مين؟
ابو نايف بغضب : يعني من غيره ..تحرك ولا للحين بمكانه!
نياف : والله مدري يابوي
ام نايف : لا تضغط على الولد يا خالد خله في حاله
ابو نايف : كلمتي ما تتثنى اذا ما جابها للبيت اخوه يجيبها
نايف فز : لا يابوي الا ليلى
ابو نايف : ما كثر الله الا بناته طب وتخير
ام نايف : لعبه عندك اهم! خلاص خلهم فكنا من شرك وشرهم
ابو نايف : ميثاء اسكتي لا تسببين مشاكل بينا اخر العمر
نايف واهو يفرك يده : ما ابي وحده من بنات سليمان
ابو نايف : لا تخلي الدعوه عناد اذا ماقلت من تبي فيهم بتاخذ ليلى غصبًا عليك وعليها
نايف : ابي حليمه بنت عمي
ام نايف لفت عليه بسرعه : صادق؟
ابو نايف : مازانت بعينك بنت عمك الا الحين!
نايف : من فترة وانا ابيها بس ماجت الفرصه الا الحين
ابو نايف : بكلم يافع وان شاء الله تتيسر
نياف يهمس لوضحى : دام نايف بياخذ حليمه وابوي ماهو راضي عن جابر عسى ما يجيني الدور انا
وضحى بزعل واضح : الله يفكهم من شره نقطه وانفجر والله
ابو نايف قام على دخول جابر الي ما ناظر فيه ابد ..
ام نايف بفرحه : تعال ياوليدي ببشرك
جابر بهدوء : سمي؟
ام نايف : ابوك بيخطب حليمه لنايف
جابر بفرحه : بالله؟
نايف ابتسم : ايه
جابر حضنه : مبروك مابغينا
نايف واهو حاضنه همس : كله على شانك
استغرب جابر ومافهم وش يقصد وبانت بملامحه علامات الاستغراب وابعد عنه واهو يقول : الله يوفقك يالعضيد
نايف : آجمعين
نياف : يلا انا طالع مع ثامر
ام نايف : على وين؟
نياف : المزارع
ام نايف : استودعتك الله
-
ببيت البنات ..
وريف واهي حاطه يدها عند دقنها بعد ماحكت ليلى لهم الي حصل : غريب هالجابر
وجود : صادقه فجأه اخذ دور الحبيب ما يريح
جودي : ليلى لا عاد تعطينه وجه ولا توقفين تتكلمين معه
ليلى : طيب
دق الباب وكالعاده البنات يتعازمون من يفتح و الضحيه تكون وجود ..
وجود : مين؟
ام عزيز : انا يابنيتي افتحي
فتحت الباب واهي تتصنع الأبتسامة وعيونها تطل من الباب تبي تلمحه : حياك حياك
سكرت الباب بعد ما تلفتت تشوفه ومالقته : طبيعي ماراح يجي وليش تنتظرينه اصلًا؟
مشت لداخل البيت وتجمعوا البنات حول ام عزيز وضيفوها ..
ام عزيز : عشاني بكره ماشيه للمدينة قلت اسلم عليكم
وريف بزعل : افا ياخالتي توك راجعه
ام عزيز : والله جمانه تعبانه وهذي اخر شهورها قلبي عليها بروح اتطمن
ليلى : ما تشوف شر
ام عزيز : الشر ما يجيك حبيبتي
وجود وقلبها يغلي غلي من روحة ام عزيز تحس ماراح ترجع الا واهي معها خبر خطوبة عزيز..
سُلاف دقتها : لا توضحين شي
وجود همست : قاعده احاول
ليلى : الا خالتي بتدورين على العروسه وانتي هناك؟
ام عزيز رفعت كتوفها : والله مدري يابنيتي اذا حالة جمانه تسمح واذا عزيز لقى الوظيفة
وريف : مالقى ولا وظيفة ابد؟
ام عزيز : الا زوج جماعه متوسط له عاد منها يروح للمقابله ومنها اقعد عندها اشوف وش بلاها
وجود همست : يارب ما يتوظف
سُلاف : امين
ليلى ضحكت بتصريفه تبي تعلمهم ان همسهم واضح : وش تخططون عليه ترا اسمع اصواتكم
ام عزيز : الا قاوستوا الملابس كلها زينه عليكم؟
وريف : اي الله يسعدك كلها على مقاساتنا
ام عزيز : زين اجل ما يحتاج ارجع ونبدل
ليلى : عاد خالتي موب ترجعين وجايبه معك الي عندنا تكفي وزياده
ام عزيز بتسليك : ايه زين زين
وريف ضحكت : لا واضح بتجيب السوق كله
ام عزيز : ما اقدر يدي تحكني كل ما اشوف الزين اتخيله عليكم واجيبه
وريف : الله يكثر خيرك ويخليك لنا
الكل : امين
-
ببيت ابو نايف ..تحديدًا غرفة نايف
جابر : ياولد فريت مخي وش تقصد بحكيك؟
نايف يستغبي : وشو؟
جابر : قلت كله على شانك وش السالفه؟
نايف : مادريت وش يقول ابوي؟
جابر تغيرت نبرته : لا
نايف : قالها بوجيهنا ان ماجابها للبيت يجيبها اخوها ابوي يا جابر مستقعد
جابر : استحلفك بالله قالك كذا؟
نايف : اي بالله ويوم اني رفضت قال اختار وحده منهم ..اهو مصمم عليهم ومالقيت الا اني اختار حليمه بنت عمي
جابر : ياولد تستهبل!
نايف : فيه احد يستهبل بهالمواضيع!
جابر : اقصد انت اخترت حليمه وانت ماتبيها لا تظلم بنت الناس معك
نايف ربت على كتفه : لا تشيل هم حليمه من فترة وانا حاطها ببالي ..صحيح ماني مقتنع ١٠٠٪؜ بس اهون من اني اخذ وحده مالي خاطر فيها بالمره
جابر : صادق
نايف : طيب وليلى كلمتها صار شي؟
جابر علمه وش صار ..
نايف : الواضح البنت ماتبي القرب ابد خلها على راحتها والله يعوضك بألي اخير منها
جابر : امين ..يلا انا طالع
نايف : بالسلامة
-
ببيت ابو زايد ..
بعد ماطلعت جميلة و ودعوها ..
ام زايد جلست : توصل بالسلامة
الكل : امين
ابو زايد : يلا متى النوم ولا ناوين تخلوني اصبح لحالي!
حليمه : تصبحون على خير
كل واحد راح لغرفته يستعد للنوم الا صقر الي بقى جالس يلمس جرحه بأصابعه واهو مبتسم ..تأنيب الضمير ماكله بعد الي سواه بس كأنه ارتاح بعد فعلت سُلاف يحسها بردت خاطرها ولو شوي وتراوده افكار انه يكلمها بس تراجع بسرعه واهو يقول لنفسه : تبي هالمره تجي بعينك خلاص اهجد ياولد
دخل ثامر عليه وشافه يكلم نفسه : صاحي انت!
صقر ابتسم : بكامل عافيتي
ثامر : ياربي لك الحمدلله الي يشوفك تو كأنك مهبول
صقر : وش تبي داخل عندي؟
ثامر : اني مار واسمع حسك حسبت تنادي احد
صقر ضحك عليه : ماتقصر ما ابي شي
طلع وتركه .. وانسدح بصعوبه واهو يعدل اللحاف على جسمه ونام على طول من تعبه
-
الظهر ،عند ام عزيز..
ام عزيز واهي تدف الشنطة : عزيز يمك حمل ذي بالسيارة
عزيز : طيب
ام عزيز مسكت ظهرها وتأففت وناظرت حولها : وش بقى!
عزيز : خلاص حملتي البيت يالغاليه
ام عزيز ضحكت : اجل بريح لي شوي على ما يأذن العصر ونمشي
عزيز : على خير .. بطلع للعيال اجلس معهم شوي واجيك
ام عزيز : بحفظ الله
طلع من البيت وتوجهه لدكان ابو صالح ..
عزيز : يا مرحبا
صالح : تو ما نور الدكان يالي ماتنشاف
عزيز : يابوي ما امداني ارجع من المدينة الا وبنرجع لها
صالح : لا تقولها!
عزيز : اي والله
صالح : درب السلامة ..شكلك بتصير ولد المدينة وتنسانا
عزيز : ماهيب من فعايلي ولا تشك بي؟
صالح : لا لا رجال بسم الله عليك
عزيز : اني داري تاخذني على قد عقلي بس يلا بقوم عندي كم شغله اخلصها
صالح : بسلامتك
طلع من الدكان واهو يسرع بخطواته لبيت ابو البنات ..وبعد عشر دقايق فتحت له وجود ..
وجود : نعم؟
عزيز : اخبارك ؟
وجود : خالتي ناسيه شي؟
عزيز : لا تضيعين الموضوع ..ابي نصفي الي بينا لا يكون بخاطرك شي علي يابنت الناس انا بروح للمدينة ويمكن ما ارجع للديرة الا متى
وجود خنقتها العبره ودها تمسكه وتقوله لا تروح وتخليني : بسلامتك
وجت بتسكر الباب و وقفه بيده : سامحيني على الأقل
وجود : قلبي للحين مابرى من ذكريات اربع سنين ما ابي اكذب و اقول مسامحتك
عزيز سكت وماكان عنده رد وكملت كلامها : روح كمل حياتك واستقر بس تذكر الي وهمتها بحياة وكسرتها ..
وقفت شوي تاخذ نفس وكملت بالجملة الي نطقتها وقلبها ينطق بعكسها : روح يا عزيز ولا عاد تشوفك عيوني ابي انساك
عزيز : وجود
سكرت الباب بقوه وبسرعه ودخلت داخل وشافت جودي واقفه عند الباب وسمعت كل الي صار ..حضنتها بهدوء
جودي : زين سويتي
وجود بكت بحضنها : تكفين لا يروح ابيه
جودي تطبطب على راسها ولا تكلمت لأن مافيه جملة توصف شعورها واهي تشوف اختها تتألم من علاقة اربع سنين انمحت بلحظة..
-
العصر ..ببيت ابو زايد
دخل والأبتسامة شاقه وجهه ..
ام زايد : فرحنا معك يا يافع
ابو زايد : عندي لكم بشارة ..خصوصًا لحليمه
حليمه ابتسمت : صدق؟
ابو زايد ناظر لزوجته : نايف خطب حليمه
صقر بفرحه : اقعـد مبروك مبروك
ثامر قعد يصفق من فرحته و زايد يضحك..
ام زايد : حليمه وش بلاك ؟
حليمه الي اختفت ابتسامتها ماعمرها شافت نايف بنظرة غير ..ماتشوفه الا ولد عمها بس
ابو زايد : عاد هالمره مافيه رفض
حليمه : بس ياب..
ابو زايد اشر بيده : ولد اخوي ما ينرفض يا حليمه لا تسببين مشاكل بيني وبين عمك
ام زايد بهدوء : نايف ولد عمك وعارفينه زين
حليمه بتوتر : مدري
ابو زايد : استخيري وريحي قلبك بس ترا العرس بأذن الله بيصير بيصير
زايد : يابوي نايف رجال وماعليه خلاف بس اذا البنت ماتبيه لا تضغطها
ابو زايد : جاها غيره عشر ورفضتهم ولا قلت لها شي بس هالمره الوضع ماهو على هواها ..ماعادني متحمل لعب بزران
حليمه بعصبيه : دامني بزر ليش تزوجني ؟
طلعت وخلتهم ..
ام زايد ليافع : خلها اتركها ماعليه متوتره
ابو زايد : لسانها طايل
ام زايد : ماعليك منها تقهوو بس
وقف زايد يصب القهوه للجميع ..وصقر ينادي حليمه تجلس معهم بس عصبيتها من كلام ابوها لها الي ماتوقعته ولأول مره تحس ان ابوها عاد حتى الي جايينها ويبي الفكه منها "تفكيرها بهالموقف"
-
ببيت ام فرح ..
حليمه عند فرح بالغرفة ..
حليمه : نايف رجال وما يعيبه شي وماعندي مشكلة اوافق عليه بس ابوي قهرني بكلمته ماتوقعت اني هم عليه
فرح : يختي خالي اكيد مايقصد يوم قالك كذا يعني وده تتزوجين ويشوفك احفادك ويستانس فيهم
حليمه : وزايد؟ اكبر مني ولا اشوفه نشب له قد ما نشب لي
فرح : خلاص حليمه هونيها وتهون الله يهديك انتي بعد
حليمه تكتفت : اف
فرح : انتي تبين نايف ؟
حليمه : استخرت وعادي ماعندي مشكلة
فرح : الحمدلله الله يتمم اموركم على خير
حليمه : امين ..تحسين اهو الي يبيني ولا عمي الي اختارني له؟
فرح رفعت كتوفها : والله يختي كل شي جايز من خالي خالد وعياله اهم شي يعاملك كويس وتكونين مرتاحه معه
حليمه : اي والله
فرح سمعت صوت الباب : امي جت امي نطلع عندها
طلعوا وجلسوا كلهم بالحوش ..
ام فرح : توني جايه من عند امك ودريت بالموضوع
حليمه : والله ياعمه خايفه كل شي يصير بسرعه
ام فرح : ليه ياكافي ماتبين تخلصين من بدري؟
حليمه : لا اقصد كل شي صار بسرعه الحين يعني فجأه خطبني وابوي اكيد بيرد له اليوم او بكره وبيتحدد كل شي بلمح البصر
ام فرح : هذي من فرحة ابوك فيك ولو لواحد غيره بيماطل عشان يرتاح قلبه له ..ابوك اخوي وانا اخبر فيه
حليمه تنهدت : يعني؟
ام فرح : لا تشيلين هم ابوك ماهو مصر الا ان نايف ونعم الشريك لك وانتي طبيعي تترددين وتخافين بس لا تخلين هالشعور يعوق عليك طريقك
حليمه : ان شاء الله
فرح تسندت ودخلت يدها بشعرها : الله ياليتني اتزوج
ابتسمت ام فرح واهي ترفع يدها : يـارب اشوفك عروس و افرح فيك وازفك و اشوف بيتنا مليان بأحفادي
فرح ضحكت : يمه وش دعوه مليان تراني وحده بتحلبيني بعد
ام فرح غمزت لها : موب انا الي بحلبك
حليمه ضحكت بقوه من وجه فرح الي تورد ..
فرح بعصبيه : بتنحلبين قبلي ترا لا تنسين نايف
حليمه سكتت فجأه وكأنها تذكرت انها على وجه زواج وذا الي خلا ام فرح تضحك عليهم كلهم وقعدوا يتناقرون ..
حليمه واهي تلبس عبايتها : بروح لبيت ابوي ما اقعد مع قليلة الأدب هذي
فرح : انتي الي بديتي احسن
ام فرح سحبتها : اقعدي اقول وين بتروحين
حليمه تكتفت ولفت وجها بزعل ..فرح ضحكت : عشتو الحين زعلتي يومني ضحكت عليك وانتي كركرتك واصله لأخر الشارع علي تو
حليمه : انا اضحك عليك اي تضحكين علي لا
ام فرح : انا مجمعه بزران عندي!
فرح باستها : لا لا خلاص لا تزعلين يا أم فروحه
وباستها حليمه من خدها الثاني : و عمة حليمه
ام فرح ابتسمت واهم حولها : الله يسعدكم يارب
الكل : امين
-
عند البنات ..
سُلاف حاطه رجل على رجل واهي متسنده : بنروح للعرس؟
وريف : وش فيك مستعجله خلهم يملكون الحين ويصير خير وقتها
ليلى : يازينها حليمه تستاهل كل خير
جودي : بس ياخي قلبي مايرتاح لنايف
وريف : ليه ان شاء الله؟
جودي : مدري ملامحه موحشه
ليلى : ما يجوز تتكلمين عنه بهالطريقة
جودي : لا ما اقصد استهزئ فيه ..ملامحه جديه بزياده ذا مقصدي
سُلاف : ابوه من؟
جودي : خالد
سُلاف : ايه خلاص اغسلي يدك خالد وعياله حتى ملامحهم ماهي مريحه
جودي ابتسمت : لا صقر حلو مره
سُلاف لفت عليه بعصبيه : وقدامي يا جودي؟
جودي حطت يدها على فمها : نسيت ..اسفه
ليلى : يوه خلاص بسكم هواش
وريف : خلكم من الهواش الحين .. وجود وش فيها مكتمه بغرفتها ؟
جودي بزعل : عزيزوه جاء على الظهر وفتحت له ماتدري اسمع يقول سامحيني ومدري وش
سُلاف فزت : عساه بيسوي حبيب على راسها وبيرجع الوضع طبيعي؟
جودي : ياحليلك والله قوي وجه جاي يقول سامحيني يمكن ما ارجع للديرة
ليلى : حسبي الله
وريف : اي وش ترتجين من هالرجال
سُلاف تضرب فخذها بيدينها : اخخ بس لو اني انا الي فاتحه الباب كان سكرت الباب على خشمه
جودي ضحكت ..ليلى : طيب وجود وش قالت؟
جودي : بردت قلبي قالت لا عاد اشوفك بس ياعمري من سكرت الباب انهارت بحضني
ليلى : بعد عمري وخيتي ودي اروح لها
وريف : لا خليها اكيد تبي وقت لحالها ترتاح
ليلى : الله يصبر قلبها يارب
الكل : امين
-
بيوم جديد ببيت ابو نايف ..
وضحى تصرخ : يالله صباح خير يا نـياف ابعد عن وجهي
نياف محجر لها بالمطبخ واقف عند الباب وساده بيده : مافيه طلعه
وضحى بدت تعصب : نيافوه ابعد لا اخبط الطفريه براسك
نياف يستهبل بحركاته : لا يمه خفت يمه
فجأه انمسك من ياقة ثوبه : وش مسوي لها؟
نياف ارتعب : لا تخرب الهيبه يا ولد ابعد
وضحى ضحكت : ايه كفو كفو مستقوي علي ذا الشايب
نياف بصدمه : انا شايب! اعنبوك انا اصغر منك اجل انتي وش تصيرين
وضحى بدلع : بشبابي
جابر واهو للحين ماسكه من ياقة ثوبه من ورا : وش مسوي لك؟
نياف : مسوي تفزع لها يعني؟
جابر : ماصحيت الا على اصواتكم ابثرتوا امنا
وضحى : مدري عنه انهبل ابي اطلع من المطبخ ومحجر لي
جابر يناظر نياف : واضح فاضي ماعندك شغل
نياف : قلت وخيتي وحيدتنا ادلعها بس اهي ماتبي الدلع
وضحى بصدمه : الحين مانعني اطلع من المطبخ هذا تسميه دلع!؟
نياف : كنت بشيل الصينيه عنك بس يوم شفتك متنرفزه حبيت ازيدك
جابر : اجل هذا دلع
ابو نايف تنحنح : وش عندكم واقفين هنا؟
جابر لف على طول وراح لغرفته من دون لا يناظر ابوه ، وابو نايف ما اعطاه وجه وكمل : ودي الفطور لا يبرد الشاهي
وضحى : ابشر
نياف  واهو يعدل ثوبه : بنادي نايف وبجيكم
ابو نايف : نايف بالملحق انت الي تعال لا امحطك بهالعصى
وضحى تسمع كلام ابوها وضحكت واهي بالملحق : احسن
نايف : وش عندك مستانسه ان ابوي يهاوشه؟
وضحى : رفع ضغطي تو يستاهل
ام نايف جت واهي تبتسم لنايف : هلا بمعرسنا
نايف ابتسم بتسليك : تونا يا يمه خلنا نشوف وش ترد البنت
ام نايف : اكيد موافقه من يرفض عيالي
وضحى ضحكت : ليلى بنت سليمان
ام نايف عصبت : وضحى اكلي وانتي ساكته
نايف دقها من جنبها : لا تحارشين وانتي عارفه وش بيصير
وضحى : خلاص بسكت اف
-
ببيت ابو زايد ..عند حليمه بغرفتها واهي ساحبه التليفون لعندها..
حليمه : اقولك كل شي صار بسرعه
جميلة : اجل اسمعي اذا تم الموضوع خلاص اكيد خلي زايد يجيبك لعندي للدمام
حليمه بتردد : يختي اسواقنا تكفي
جميلة : يلا يا مجنونة تعالي شوفي اسواق الدمام فيها الي تبين صدق وبتنفع لك كعروسة جديدة
حليمه : بفكر
جميلة : لا تفكرين بيتم الموضوع وعلى طول بكلم زايد يجيبك
حليمه : طيب
جميلة : ياويلي من الوناسه من الحين بدور لي فستان
حليمه : كأنك متحمسه اكثر مني
جميلة : اختي وحيدتي خلني افرح فيك بتحاسبيني يعني
حليمه : لا خذي راحتك
جميلة : ابوي متى قال بيرد لهم؟
حليمه : بكره
جميلة : ايه زين على خير ان شاء الله .. يلا بسكر بدر يناديني
حليمه : مع السلامة
سكرت منها وطلعت من غرفتها واهي شايله التليفون ترجعه لمكانه ..
ام زايد : وش له ماخذته؟
حليمه : اكلم جميلة
ام زايد : طيب تعالي ساعديني ننفض الفرش ونعزل
حليمه بكسل : يوه يمه الحين؟
ام زايد : ايه الحين يعني متى تبين
حليمه : خليها بكره تكفين والله مكسله
ام زايد : اقول قومي وعن الرفاله بكره بتروحين لبيت رجلك خلك سنعه
حليمه قلبت عيونها بملل : ايه ايه طيب
ام زايد : يلا قومي
قامت واهي تسحب نفسها بالغصب ماتبي ترفع اصبع من الكسل الي تحس فيه..
-
عند البنات ..
وجود تغصب نفسها على الأكل لأنها حست بدوخه ..ماكان لها نفس تحط لقمه بس اصرار البنات الي كانوا فوق راسها
وريف واهي متخصره : يلا كلي اشوف
وجود عبست : بنات تكفون خلاص
سُلاف صرخت : كـلي الي بالصحن كله يلا
وجود : اكلت ثلاث ل..
ماكملت كلامها الا وحست نفسها بترجع قامت على طول ركضت للحمام ولحقوها البنات ، خمس دقايق وطلعت
وجود ووجها اصفر : قلت لكم مالي نفس الله يهديكم بس
سُلاف تتحسس حرارتها : لا يكون مسخنه
وجود : مسدوده نفسي بس
وريف : طيب تعالي اجلسي ريحي شوي
جودي طلعت من المطبخ واهي شايله كيكتها : اول مره اسوي هالنوع يارب ضبطتها
سُلاف : من الحين كلنا بنتسمم
جودي : انتي بالذات ماراح تذوقينها
سُلاف : بذوقها غصبًا عليك
وريف مسكت راسها : اه ياراسي
جودي : وش فيك؟
وريف : مستحيل يمر يوم وما تتناقرون؟
سُلاف : مانقدر مانقدر
جودي : تشوفيني والله ما اقول شي اهي الي تحارش
وريف : اقول جيبي الكيكه اشتهيتها
سُلاف : وين ليلى ؟
جودي : تتسبح
وريف : اجل اعزلي لها شوي على جنب
سُلاف : لا موب لازم محد قالها ماتجي
جت ليلى وخبطت بالباب : سمعتك
سُلاف تأشر على وريف : اهي الي تكلمت مالي دخل
وريف شهقت : سولافوه يا وصخه
جودي : مايحتاج وريف تبرر انتي عارفه اكيد
ليلى جلست واهي تتربع : ادري فيها تعلميني بسُلاف
سُلاف بثقه : عذال
وجود وقفت : بروح انسدح بالغرفة
وريف : اساعدك ؟
وجود : لا مايحتاج
-
العصر بعد ما وصل لنايف خبر موافقة حليمه..بالقهوة كعادة الشباب
نايف جالس بالكرسي ومدد رجوله على الكرسي الي قدامه وحاط يده ورا راسه مبتسم للرايح والجاي..
نياف يناظره مستغرب : انا لو ادري العرس يسوي كذا كان اعرست من زمان
نايف : لا يالحبيب ماله دخل العرس
نياف تقدم له : اجل؟
نايف : مالك دخل
نزل رجوله وحط يدينه على فخوذه وشبكها ببعض وابتسم ابتسامة جانبيه واهو يتذكر لما خبطت فيه وكيف تفاصيلها علقت فيه..
جاء ثامر يركض وبصوته العالي : مبـروك يا عريس
جلس على الكرسي بسرعه ..
نياف : لا ياو..
بلمح البصر الا ومنكسر و ثامر طايح بالأرض ..مسك ظهره وملامحه عبست وتكلم بألم : ي•• ام هالكرسي
نياف ماسك بطنه وميت ضحك ويالله يتكلم : مرجوج توني بعلمك انه منكسر
ثامر سحب الكرسي بيده اليسار بقوه بعيد عنه وبيده اليمين ماسك ظهره : ياوك يا ظهري دامه مسكور حاطينه عندكم ليه
نايف واهو يضحك : كنت حاط رجليني عليه
نياف قام سحب له كرسي وجلس عليه : لا تطمن ذا زين اجلس
ثامر : ما امداني استانس الا وبلطت بالأرض
نايف : شف كيف الناس ماسكه ضحكتها مايبون يفشلونك
ثامر لف يناظرهم : عاد ديره تموت بالشماته كأنهم اخوي زايد
نايف : الا وينه زايد؟
ثامر : اليوم دوره بالدكان
نايف : وصقر وش اخباره؟
ثامر : بخير و اي و حليمه بعد بخير
نايف : وش دخل حليمه؟
ثامر غمز له : يعني تسأل عن اخواني واحد واحد من بقى الا حليمه ولا حالك ما يهمها
نياف : لا تحرج الرجال
نايف ضحك : ما انحرج انا باسي قوي
ثامر : ترا حليمه تستحي اجل لا تحرجها ولا جيت كفختك
نياف : هيه الا اخوي عاد
نايف قام : تهاوشوا وانا بروح لزايد
-
ببيت ابو نايف ..
فرح ترقص وتدور بالغرفة ..وضحى تبوس يدها وجه وقفى : ياربي لك الحمد
فرح مكمله وتتكلم : ما فرحتي بأخوك يعني؟
وضحى : الا فرحانه بس فيه احد يرقص على ولا شي! شغلي اغنية طيب
فرح لازالت مستمره : اصبري بقى شوي
وضحى غطت وجها وضحكت : الحمدلله على العقل
فرح جلست واهي تشرب مويا بسرعه : الحين بكذا احسني تدربت على الرقص
وضحى : احسبك فرحانه اثرك تدربين
فرح بمزح مسكت جلابيتها من عند صدره على اساس بتشقها : ابـي اتـزوج
وضحى : خلاص بعد حليمه انتي الثانية ان شاء الله
فرح : بس ما ابي من عيال خوالي ابي واحد كذا حلو ورزين ويهبل
وضحى : خير يا بجيحه يعني اخواني وعيال عمي ماهم عاجبينك؟
فرح : لا مو عن كذا بس ما اشوفهم الا اخوان
وضحى : ايـه واضح
فرح : ماتدرين متى حددوا الملكة؟
وضحى : اكيد قريب
فرح : متحمسـه مره
وضحى : كلنا تستهبلين متى اخر مره صار عندنا زواج قريب!
فرح : ما تزوج الا جميلة فينا حتى من العيال ، محرومين من اجواء زواجات الأقارب
وضحى : حتى زواج وريف كان مره فخم تتذكرينه؟
فرح : اي ماشاء الله يجنن بس ربي ماكتب يكملون على هالفخامه كلها
وضحى: نصيبها والله يعوضها
فرح : بس واضح زوجها كان اقشر بس ما تكلموا عنه
وضحى : لا يتكملون احسن مواضيع خاصه موب اي لازم يعرف عنها
فرح : اي اكيد..المهم انا يارب هالشهرين الجايه اتزوج ابي احب وانحب
وضحى : مستعجله على رزقك ان ربي كاتب لك نصيب بيجيك قبل عرس حليمه بعد
فرح واهي تبتسم ويدها تحت دقنها : اويلي يا فارس احلامي
وضحى رفعت يدها تدعي : يارب ياكريم زوجها وفكني من حنتها
فرح : امين
طلعوا لبرا عند ام نايف و ام فرح الي نادوهم ..
-
بعد اسبوع على ابطالنا ..بأيام هادية و انشغالهم بتحضير زواج نايف وحليمه الي ابو نايف اصر فجأه يصير بعد ثلاث اسابيع ..وبكره بيملكون ، الساعة ١٢ الليل ببيت ابو نايف ..
حليمه تكلم جميلة : عجزت اناام تكفين الأرق اكلني
جميلة : يابنت الحلال اذكري ربك ترا كلها كتب كتاب العرس توه ماجاء وانتي مرهقه نفسك كذا
حليمه بتوتر : مو قادره احس صار الموضوع جدي خايفه من نايف
جميلة : وش بياكلك يعني!
حليمه : يختي وش فيك مستهينه بشعوري متصله عليك ابيك معي وانتي تقولين كذا
جميلة : انا اهديك ما استهنت اصبري فترة وبتضحكين على هالتوتر
حليمه : يعني انتي كنتي مثلي؟
جميلة : وزياده انا تزوجت واحد برا الجماعه ما اعرفه ولا يعرفني هذا زود اني بروح معه لبرا الديره بس شوفيني الحمدلله وانتي قاعده بالديره ومع ولد عمك الي تعرفينه يعني ارحمي نفسك ونامي
حليمه زمت شفايفها : طيب يلا مع السلامة
جميلة : لا تنسين بعد الملكة على طول تجين وجهازك معك نبدا نتقضى للعرس
حليمه : مانسيت مانسيت زايد قالي بنمشي بعد الملكة بيومين
جميلة بزعل : والله ودي اني معك بهالليلة بس وش اسوي شغل بدر ومدارس العيال
حليمه : ولا يهمك وبعدين قلتيها كتب كتاب لا شوفه ولا شي العرس ان شاء الله تكونين جنبي
جميلة : يـارب ان شاء الله
حليمه : يلا بسكر بنام لي شوي راسي صدع
جميلة : تصبحين على خير
-
الساعة ١:٣٠
تحت هدوء تام بكل مكان بالديرة و الظلام الي يسودها ..ببيت البنات تحديدًا
فزت من نومها واهي تلقط انفاسها برعب : بسم الله الرحمن الرحيم بسم الله
مسحت على وجها واهي تتلفت حولها قامت بسرعه وتشيك على خواتها ، كلهم نايمين والبيت هادي ما فيه الا صوت صرصار الليل ..غسلت وجها ومشت بهدوء لناحية المطبخ جلست تتذكر الكابوس : اعوذ بالله منك يا ابليس
من صحت واهي تحس نفسها مخنوقه من غير سبب واضح ، قامت توضت وصلت لها ركعتين وبكت بعد التسليم الي ما حست طلع مابداخلها.. غاب عنها النوم واهي تشوف الساعة توها ٢:١٥ : وش مصحيني انا الحين!
ليلى دخلت واهي تطل بالملحق بهدوء وزفرت براحة : يمه يا وريف وقفتي قلبي
وريف فزت ولفت بسرعه : انتي الي وقفتي قلبي
ليلى : وش مصحيك؟
وريف تنهدت : كابوس طير من عيوني النوم وانتي وش مصحيك؟
ليلى جلست جنبها : سمعت حس خفت لا يكون احد داخل
وريف ابتسمت : ياعمري معليش حاولت قد ما اقدر اكون هاديه
ليلى مسحت على ظهرها وبهدوء : وش حلمتي فيه؟
وريف ناظرت بالأرض وبزعل : جاني يزورني بعد هالمدة يا ليلى
ليلى عقدت حاجبها : وشو؟
وريف : كأني كنت اضربه على صدره واقوله انت سبب فقدي لجنيني واهو وجه غضبان فجأه خنقني صحيت من النوم مخنوقه وضايقه فيني الدنيا
ليلى : حسبي الله ونعم الوكيل ..الله ينتقم لك منه
وريف : يارب
دخلت جودي واهي شايله كوب مويا معها : وش مصحيكم؟
ليلى : انتي الي وش جابك!
جودي رفعت الكوب : نشف ريقي ..فيكم شي؟
ليلى أشرت بعيونها لوريف الي كانت لازالت بجلال صلاته ولا سجادتها متربعه ..جودي ناظرت وريف : وش فيك؟
وريف : عادل ..حلمت فيه وطير النوم من عيني
جودي : الله لا يربحه
وريف : خلاص ارجعوا ناموا قبل صلاة الفجر
جودي جلست قدامها : علميني وش حلمتي
علمتها بالحلم ..جودي تنهدت بضيق : الله يعوضك يابعد قلبي جنينك طير من طيور الجنة بأذن الله
وريف : حسبتني تخطيت ضربه لي واذيته بس هالحلم اثبت لي العكس
ليلى : الي حصل ماهو سهل ومدت يده لك مو بسهوله تنسى
وريف : سنتين يا ليلى سنتين مانسيت؟
ليلى وخرت عينها عن وريف الي حست عيونها بدت تغرق بالدموع ..من غير سابق انذار وريف غطت وجها وبكت : استغل بعدي عن ابوي ضربني وعذبني ويوم اني حملت حرمني فرحتي دفني من الدرج ماوعيت الا على نفسي فاقده ضناي حرمني فرحتي فيه
ليلى حضنتها : خيره خيره يا وريف خيره ماجاء هالضنا وابوه قاسي ومايخاف الله خيره ياوريف ماجاء هالضنا وشاف امه تنضرب كل شي خيره كل شي
وريف استمرت تبكي و جودي مدت لها كوب المويا : اشربي هدي شوي
وريف سكتت شوي : نكدت عليكم كعادتي
جودي ضربتها : خواتك احنا
وريف : والله مستحيل انسى وقفتكم معي انتوا وام عزيز وقتها الله يخليكم لي
ليلى ابتسمت : جيناك ركض حتى طول الطريق من هنا للرياض ماحسينا فيه
جودي ضحكت : بس سُلاف و وجود وقتها بردوا القلب جلدوه الين ماقال بس
وريف و وجهه محمر من البكي فطست ضحك : والله اتذكر سُلاف بالعصى تجلده والناس ماسكينه لا يجلدها
جودي ميته ضحك : اكثر لحظه ما تتفوت ومستحيل انساها يوم وجود اخذت الشبشب وبطبعتها بوجهه
ليلى انسدحت من الضحك واهي تتذكر كل هالمواقف ..صحيح تدخلوا الشرطة بالموضوع بس ما رجعوا للديرة بعد ما انجلد من البنات ..
وريف تمسح وجها بالمنديل واهي تضحك : طلعوا حرة ست سنين زواج تعنفت فيه
ليلى تدق الصدر : ايه عشان تعرفين ان عندك خوات مايرضون فيك وخله يدري هالودر محنا ساكتين له
وريف : كفو
جودي : اه من الضحك طار النوم مني
ليلى ووريف : كلنا والله