بعدك يابوي اصبحت دنياي عرجاء بلا عكاز

7

-

عند الشباب الساعة ٩:٣٠ الليل..
صقر : ابوي لو يدري اننا موب بالبيت بيسوي سالفة
نايف : يا رجال فكنا من تحركات العساكر ..مليت من الروتين
زايد : تزوج طيب
نايف : عليك ربط المواضيع ببعض شنيعه
زايد ضحك : الروتين بيتغير لادخلت حياتك وحده تدللك
صقر واهو يتذكر سُلاف : قال دلال قال والله ياخوفي يطيح بوحده تصحيه وتنومه على كفوف
نايف بضحكه : ليه مجرب؟
صقر فز عدل جلسته : تعقب الي تمد يدها علي بس
ثامر واهو يربت على كتفه : ايه اخوي صقر صقر الكل يهابه
صقر الي لف عليه واهو عارف انه يتطنز : فاهمك مانيب غبي
ثامر : زين اجل اختصرت علي
جابر كان دقيقة معهم وخمس دقايق ينشغل بأفكاره ، قام نياف من مكانه وقعد جنبه : وش بلاك؟
جابر تنهد : ما ابي اوجع راسك
نياف : افا وانا اخوك!
جابر : بكره ردها وما ادري وش بترد وما ادري ليش انا متوتر اصلًا!
نياف همس له : انت تودها؟
جابر ناظره : بداخلي بعثره ماني فاهم شعوري ..يوم ابوي قال لنايف يتزوجها ما تحملت وانا ماعمري فكرت بالعرس والحين انتظر ردها على احر من الجمر مدري اهو حب ولا خوف من ردة فعل ابوي لرفضها!
نياف مسك يده وشد عليه : بينك وبينها شي؟
جابر تربع ولف بكامل جسمه لنياف وسرد له موقف لما شافها بالمحل و لما شالها للمستشفى : هذا الي بيني وبينها بس
نياف بإبتسامة غريبة : ايـه ياخوي شكلك طحت على وجهك انا الصدق استغربت فزتك لموضوع الزواج وانك بتتزوجها اثرك طالع شايفها يالحبيب
جابر : لا تخليني اندم اني تكلمت
نياف : لا خذ راحتك كب الي عندك كب سرك ببير ماعليك
جابر : ادع لي تكفى ان ما وافقت ربي يفكني من المشاكل وتطلع من بالي وان وافقت ان يحسن نية ابوي لها
نياف : تتيسر تتيسر ياخوي لا تشيل هم..امش نقرب للعيال ونخش معهم ماهوب زينه قعدتنا كذا
تقدموا جابر ونياف والتموا كلهم وبدت سواليفهم ما دقت الساعة ١٠:١٥ والا و الكل رايح لبيته ..
-
بالصباح الباكر ..و الشمس اشرقت على بيت ابو البنات (سليمان) مع صوت العصافير و الرياح المائلة للبارده تعلن دخول فصل الشتاء ..
سُلاف واهي شايله الصينيه : تعالوا الفطور بالحوش
طلعوا البنات وبدأوا ياكلون بدون موضوع يتناقشون فيه على غير عادتهم ..
ليلى تبي تقطع هالصمت : من تروح معي للمحل نشوف وش مسوي بشير؟
جودي بملل : مالي نفس للطلعه انا
سُلاف : خلاص بجي معك
وريف : ودي اعزم البنات نغير جو شوي وش رايكم؟
ليلى : بكيفك بس حرصي تجي فرح ترا من زمان عنها
كملوا اكل وكل وحده بدت تشيل معها واليوم الدور على وجود بغسيل المواعين و تصليح القهوة و الشاهي ..
وريف : بساعدك نسوي حلا وخرابيط
وجود بهدوء على غير عادتها لأنها بالعادة ماتحب احد يدخل المطبخ معها : طيب
مروا ليلى و سُلاف قدام المطبخ ..ليلى : ترانا طلعنا
وريف : بسلامتكم
طلعوا وليلى ملاحظه سُلاف مكحله عيونها ومستانسه : وش عندك داقه الزين ؟
سُلاف بعفويه : خلينا نمر على ابو فالح
ليلى ضربتها من غير شعور : تعقـبين!
سُلاف حطت يدها بمكان الضربه : تكفين طلبتك تكفين ليلوشي
ليلى : انتوا انهبلتوا ياخي! ماشفتي وش صار على وريف و وجود وتبين تكملين طريقهم!
سُلاف : بس انا غير اول شي شخصياتنا تختلف كليًا وثاني شي ترا قلت بشوفه ماراح ابوسه
شهقت ليلى بقوه لدرجة التفتوا الي حولهم : لعنه تلعنك يا وصخه
سُلاف ضحكت : خلاص اسفه ..بس يكون بعلمك رايحه رايحه
ليلى استسلمت : الله يصبرني عليك يارب
رفدان جاهم يركض وبيده الكوره والابتسامه شاقه وجهه..
ليلى : مستانس انت ووجهك يوم فقعت راسي
مارد عليها رفدان واهو يناظر سُلاف : قلت له يا ابو راس
ضحكت سُلاف واهي تنزل لمستواه ومسكته من يدينه وتكلمت بحماس : وش قال؟
رفدان واهو يقلد ملامح صقر : تخيلي حواجبه صارت كذا "عاقدها" وقالي مين قالك هالحكي؟
سُلاف: ايوا وش قلت؟
رفدان : قلت من بنت حللوه
سُلاف : بس كذا! ماقالك شي؟
رفدان : لا مسكني من اذني بس فكني منه ثامر ولا كانت بتنقطع
سُلاف باسته بقوه : يسلم من رباك ياشيخ
ليلى الي كانت متكتفه وتناظرهم مصدومه وكأنها فهمت وش مسويه سُلاف : ابوك يا ابليس محرشه الولد عليه بعد!
سُلاف وقفت واهي تنفض التراب من عبايتها : خلني استفزه وش وراي
مشوا مع بعض الين محل ابوهم وتطمنوا ان كل شي ماشي كويس ، واهم راجعين ..
ليلى لفت عليها : ملزمه يعني؟
سُلاف : اي
تقدموا كم خطوة بس والا وصلوا لمحل ابو فالح ..
ليلى تقدمت : سلام ابو فالح اخبارك؟
ابو فالح قام من كرسيه مستانس : بخير يابنتي وانتي وش اخبارك؟ سُلاف بعد وش شلونك؟
سُلاف ابتسمت : بخير يا عمي
ليلى : جينا نشوف وش جديدك
ابو فالح : اي حياكم الله بأي وقت
طلع فالح من المخزن واهو شايل شنطة ثقيلة حطها بالأرض وابتسم لما شافهم : ها يا سُلاف الغساله ماعاد خربت؟
سُلاف ضمت يدينها ببعض وتكلمت بخجل : لا
وهمست : ليتها تخرب
ليلى دقتها من جنبها يعني اسكتي ومسكتها ومشوا : عمى
سُلاف : ليــه! ماخليتيني اتمقل بهالزين يختي
ليلى : وبعدين انتي من وين طلع ذا الخجل والحيا؟ ياكبرها عند ربي
سُلاف بعصبيه : خير ماني انثى ماني بشر استحي وانعجب
ليلى : الله يعيني انا اداري مين واخلي مين امشي قدامي امشي
مشوا مع بعض واهم كانوا تحت اناظر شخص شايفهم من البداية..
-
ببيت ابو زايد ..
طلع من الحمام واهو ينشف وجهه : يالله صباح خير
فتح الدريشه كعادته واهو يشوف ثنتين طالعين وعرف وحده منهم : القشرا
لبس بسرعه وطلع يركض تحت صوت امه الي تنبهه بشويش..
مشى وراهم واستغرب من جيت رفدان لهم وبدأ يتكلم : طلع انتي يالسوسه..
كمل مشي واهو يتصدد ويحاول يمشي طبيعي لأجل ما يلاحظونه الناس ويتكلمون ..شافهم وقفوا عند ابو فالح قرب لعندهم بحيث يسمع وش يبون وتسند على الجدار واهو ماسك الجريده رافعها لحد وجهه لأجل مايبان..سمع وشاف الي دار كله و اكبرها صدمة عليه بعد ماسمعها تقول ابوسه اهو خجل سُلاف ولمعة عيونها لفالح ..عض شفايفه بقهر : هذي مالها رجال يدق راسها!
مشوا البنات وعيونه عليهم وقلبه يغلي غلي ..انتظرهم يبعدون وراح لمحل ابو فالح ..
صقر بغضب مكبوت : يـافـالـح
فالح : هلا صقر
صقر : مين الي كانوا واقفين تو؟
فالح : بنات سليمان
صقر : وش يبون؟
فالح : يشوفون وش الجدي
صقر : تعال معي
طلع فالح من المحل واهو مستغرب ..ابعدوا شوي وتكلم صقر بقهر..
صقر بدون مقدمات من غضبه : بينك وبين سُلاف شي؟
فالح انصدم : صاحي انت!
صقر بغضب : سؤالي واضح ورد عليه!
فالح مافسر هالموقف الا ان صقر يبي يحارش ويسوي مشكلة للبنات بسبب سمعة المشاكل الي بين عوايلهم : مابيني وبينها شي وبنت الناس متربيه وماشفت منها شي
صقر رص على اسنانه وقرب لفالح : والله لو اشك بس ان بينكم شي لا اقطعك بأسناني
فالح تنرفز : تهددني؟ بزر عندك انا ..توكل على الله
مشى وتركه واقف بمكانه وعروقه طالعه من العصبيه وبدأ يحس بحرارة بجسمه مشى لدكان ابوه يبي يريح لأن يحس بدوخه وتعب..
ابو زايد : وينك تأخرت؟
صقر بتعب : معليش
ابو زايد : فيك بلا؟
صقر : دوخه بسيطه ماعليه
قام ابو زايد يتحسس على وجهه : حار ..قم للبيت ارتاح قم
صقر : لا يابوي خلني مرتاح كذا
ابو زايد بعصبيه : اقولك قم وناد ثامر يجي بدالك
صقر وقف : ابشر
طلع وتوجه للبيت واهو يسحب رجوله ، مايدري وش هالتعب الي داهمه فجأه
-
عند البنات ..
دخلت ليلى بسرعه واهي ترمي عبايتها بأهمال : تعالوا يابنات شوفوا اختكم العاشقه
جودي تربعت واهي حاسه الموضوع فيه فالح : ايـه هالفالح لعب بقلب بنيتنا والله و سواها
سُلاف جلست تلعب بخصلة شعرها وتقلب عيونها : ما انفع للحب يعني؟
جودي : لا حبي زي ما انتي تبين بس خلك متوقعه اي شي
ليلى : وبعدين انتي كيف تحبين شخص وانتي عارفه ماراح يصير بينكم نصيب!
سُلاف وقفت بعصبيه : وانتي وش دراك انه ماهو من نصيبي!
ليلى : لا نلعب على بعض الكل هِنا يتحاشونا كـ شريكات حياة حتى لو عاملونا كويس
سُلاف : بسوي نفسي ما سمعت كلامك ياليلى ما ابي ازعلك بكلامي
وريف واهي شايله الملابس : يالله صباح خير اصواتكم اسمعها وانا بالحوش ورا
وجود جت بهدوء وقعدت وسندت راسها على يدها ..بينما خواتها استمروا يتكلمون..ليلى بعد ما قالت لهم الي سوته
ليلى : من ابتسم لها واهي وجها مورد
وريف ضحكت : اهوه سُلافوه ما هقيتك خفيفه
سُلاف تتدلع : اصير له اخف من الريش لو يبي
جودي مسكت راسها وصرخت : يـع يـع تكفين مايليق يمكن ليلى اي بس انتي لا
ليلى : وانا وش دخلني الحين
قامت سُلاف شالت المركى ورمتها على جودي ..رغم الم جودي بس ضحكت : ايه ها هذي سُلاف الي اعرفها
لفت وريف لوجود واهي تبي تدخلها بجوهم : وش رايك بتصرف سُلاف؟
التفتوا كلهم ينتظرون ردها ..
وجود ناظرت سُلاف : دامك ببداية الطريق لا تحاولين تتعمقين ولا تبذلين جهد ..اتكلم معك الحين وانا قلبي يدمي واحسني مخنوقه
ليلى جلست جنبها وحطت يدها على مكان قلبها : بسم الله عليك ..الله يجبر قلبك ويقويك
وجود تنهدت : امين
وريف : فترة صدقيني شوي شوي و بترجعين طبيعي
وجود خنقتها العبره : و بتتحملون نكدي بهالفترة؟
وقفت سُلاف على طول وراحت لعند رجلها : نتحملك كلناا بس انتي ارجعي وجود الي نعرفها
وجود : بحاول
جودي حطت رجل على رجل : وبهالمناسبة عندي لكم نكت..
قاطعتها سُلاف : ياليت تسكتين ارحمينا من هالعباطه
جودي : والله ماعلي منك بتكلم
سُلاف : تعانديني يعني؟
جودي : تسكتيني يعني؟
وتشابكوا هالثنتين كالعاده ووريف تبعدهم وليلى تسكر الباب عشان اصواتهم ماتطلع لبرا ، ووجود تناظرهم واهي تضحك
-
العصر ..ام نايف ووضحى يتجهزون لروحتهم لبيت ابو البنات..
وضحى كانت متوترة من زمان ماشافتهم ومتوترة من ردهم عليهم ..
ام نايف وقفت عند الباب وبعصبيه : بتجين ولا بتنطقين واقفه كذا؟
وضحى ركضت لناحية الباب واهي تغطي عيونها ..طلع جابر : انا بوديكم
ام نايف ناظرته بطرف عين : اقعد مالها داعي جياتك
مشت وضحى جنب امها الي كانت طول الوقت تدعي يعدي اليوم على خير ..وصلوا ودقوا الباب دقيقتين الا ويسمعون صوت..
وجود : ميـن؟
ام نايف : ام نايف
فتحت الباب بشويش واهو ماسكه لثمتها على وجها : هلا؟
ام نايف : مافيه تفضلوا يعني؟
وجود بتردد : ا .. طيب تفضلوا
دخلتهم للمحلق وراحت لخواتها ، فزت سُلاف اهي و وريف ودخلوا لعندهم ، وجودي فضلت تقعد مع ليلى الي انخطف لون وجها ..
وريف : السلام عليكم
ام نايف ووضحى : وعليكم السلام
وريف ناظرت وضحى : اخبارك يا وضحى؟
وضحى : بخير انتي وش اخبارك؟
وريف : الحمدلله
ام نايف لاحظت تجاهل وريف لسؤالها عن حالها و كبتت غضبها بداخلها وتكلمت : ماجيناكم الا نبي رد اختكم يابنات سليمان
سُلاف : ردنا واضح من زمان قلنا لا ما تغير
ام نايف براحة : بس ابي اسمعها منها اهي
سُلاف قامت واهي تنادي ليلى وجتهم والتوتر ماليها : السلام عليكم
ام نايف وقفت تناظر جمالها وهمست بداخلها تبارك الله : وعليكم السلام ..وش اخبارك يابنت ابوك؟
ليلى ناظرتها بنظرة قوية وردت بهدوء : بنت ابوها بخير وماعليها خلاف
ام نايف : مالنا بالطويلة يا ليلى انتي عارفه الموضوع كله ..وجايه اسمع ردك
ليلى : جابر رجال والنعم فيه بس ماله نصيب عندنا الله يستر عليه
ام نايف وقفت بفرح واهي تمسح وضحى : اجل انا اترخص عن اذنكم
سُلاف سبقتها للباب وفتحته وأشرت لها بيده بمعنى يلا ..
ام نايف لسُلاف : محد بيفتك من اذاك
وضحى خافت ومسكت يد امها : يلا يمه نطلع
سُلاف : امسكي هاللسان وصدقيني ماراح تشوفين زولي حتى
ام نايف ضحكت باستهزاء ومشت ..ولفت على وضحى الي تسحبها : انهبلتي يابنت تسحبيني كذا قدامها كأني ولا شي
وضحى : يا يمه تكفين مانبي مشاكل خلنا نروح للبيت
-
ببيت ابو نايف ..
جابر قاعد على الكرسي ويهز رجوله بقوه..
نايف : ياخوي خف على نفسك لا تنقطع رجلك
جابر : متوتر قلبي ماهو متطمن
نايف استغرب منه : انت تبي البنت صح؟
جابر لف عليه بسرعه وشتت نظره : وش ابيها يا رجال بس اني خايف من ابوي لو رفضت
نايف الي سند ظهره واهو يتنهد : واضـح
دخلت ام نايف ووراها وضحى واهي تفصخ عبايتها : شفت الي ماتستحي على وجها وش سوت!
جابر فز من مكانه : وش صار؟
نايف : يا يمه بالهداوه بالهدواه
ام نايف تقلد صوتها : جابر رجال والنعم فيه بس ماله نصيب عندنا الله يستر عليه ..تحصلها هالعايبه
جابر بهدوء غريب : ليلى قالته لك؟
وضحى : اي ليلى اهي الي تكلمت
ام نايف : فكه يا وليدي انا ازوجك احسن منها وش تبي فيهم
جابر جلس بهدوء وحط يده على راسه لأن فعلًا الحين فكر بردة فعل ابوه ..
دخل ابو نايف البيت واهو يدور على ام نايف بعيونه : يـامره
جت ام نايف واهي تمسح يدها بالمنشفه : تعال اقولك
وعلمته ام نايف بكل شي حصل ..
ابو نايف بهدوء الي ماتوقعوه منه : ان البلا ما طاحت على رجال يعرف يسحبها من خشمها من البداية
فز جابر بعصبيه : وش قصدك يابوي؟
ابو نايف وقف وضرب عصاه بالأرض : ترفع صوتك علي؟
جابر رفع صوته اقوى : انا مانيب رجال؟
ابو نايف ناظره بعيون تقدح شرار : وان قلت ايه وش بتسوي؟
جابر : انا تهيني عشان بنت سليمان رفضتني؟
ام نايف بخوف : جابر يمي تكفى هد تكفى
ابو نايف اعطاه ظهره : العب بذيلك يا ولد خالد وجبها لي للبيت
الكل انصدم من كلامه الي معناه يخلي جابر يتقرب لها عشان تحبه وترضى تتزوجه ..
نايف تنرفز : يا يبه وش هالحكي! خاف الله ببنت الناس
وضحى مصدومه : لا مستحيل
ابو نايف : ان كان تبي رضاي سو الي قلت لك عليه
طلع وتركهم ..
وضحى بكت : ابوي قاسي مايخاف الله
ام نايف قعدت على الأرض واهي تحس نفسها مكتومه ماهي راضيه عن كلامه..
جابر لف عليهم وبهدوء : انا طالع
ام نايف دفت نايف : روح الحق اخوك لا تخليه تكفى
وضحى تمسح على وجها وناظرت امها : يمه ابوي صدق ناوي يحبب ليلى بجابر! ليش يسوي هالحركات حــرام!
ام نايف : ابوك انهبل وماعاد به عقل ..الشر صار يقدح من راسه حتى لو هو على غلط يبي كلامه اهو الي يمشي
وضحى بتوتر : اقول للبنات؟
ام نايف فزت وعصبت : انتبهي ! لا توطين روسنا بالأرض ولا عاد اشوفك متواصله معهم ولا والله يا وضحى ان اعلم ابوك وتعرفين وش بيسوي فيك
سكتت وضحى بخوف ..ولكن كانت مرتاحه نسبيًا ان جابر ماهو من هالنوع بس بيشيل بخاطره كثيير وماراح يسامح بسهولة
-
بالقهوة الداخلية كان نياف ونايف وجابر مع بعض ..
نايف كان يسرد لنياف الي حصل وعيونه على جابر الي شابك يدينه الثنتين ببعض وحاطهم فوق الطاولة ..
نياف بصدمه : لا ابوي زودها
نايف مسك يد جابر وشد عليها : بتهون وانا اخوك بتهون
جابر رفع عيونه عليهم : هد حيلي بكلمته ..انا ابوي يقولي منت رجال؟
نياف لف وجهه على طول ما يبي يشوف كسرة خاطر اخوه ..
نايف : ماتعرف ابوي من صغرنا وهذي قسوته بكلامه لا تعطيه وجه و طوف له
جابر : وبنت الناس؟ ابوي حاطها براسها عناد ولا مو حب فيها يبيها زوجه لي
نايف تنهد : ليتك يا جابر ما دقيت الصدر وقلت باخذها كانك مريح راسك ومبعد عن المشاكل كعادتك
جابر : لا والله ما تتزوجها
نايف استغرب : كيف؟
نياف تكلم بهدوء : جابر يبيها اصلًا
جابر ناظر نياف بنظره قويه وبعدها تكلم نياف : وشو ! تراه اخونا وخله يعرف ان ليلى بخاطرك من زمان
نايف : يعني من البداية عيونك على البنت؟
جابر : لا والله بس اني شفتها بالغلط وبقت براسي حتى زواج منها مافكرت بس يوم ابوي فتح موضوعها معك انعمت عيوني
نايف ابتسم : زين انك تكلمت ولا كان اخذت محبوبتك
جابر ناظره بطرف عين : تعقب والله
نياف واهو يشرب شاهيه : جوي الغيور
ضحكوا عليه و ولكن غصة جابر للحين توجعه هالكلمة ماجت من اي احد عشان يطوفها ..جت من ابوه بس قرر يتجاهل ويكمل طبيعي حياته بس بيحاول يبعد ليلى عن الأذيه
-
بالليل عند البنات
بعد ما ارتاحوا وكأنه هم و انزاح ومادروا عن نوايا ابو نايف الخبيثه ..
وريف : دخت انا بروح انام
وجود مدت يدها : خذيني معك
سحبتها وريف معها وراحوا هالثنتين لغرفهم ..
جودي : وجود مره مكتمه يا عمري
سُلاف : ما تنلام ماهي سهله اربع سنين تنطوي بهالسهولة
جودي : الله يعين بس
ليلى الي كانت سرحانه وتلعب بشعرها طول الوقت ..
سُلاف : هيه لا يكون ندمانه انك رفضتي فارس الأحلام؟
ليلى بملل : يوه انتي وين وانا وين
جودي : قبل تصير مشكلة انا رايحه انام تصبحون على خير ..قامت وتركتهم
سُلاف ناظرتها : وش عندك؟
ليلى : هالهدوء قلبي ماهو متطمن منه ابو نايف مستحيل يعديها
سُلاف : الدنيا موب على كيفه ماتبين ولده خلاص غصب هو
ليلى : الله يستر بس اقسم بالله قلبي مقبوض حاسه بيصير شي
سُلاف : روحي توضي وصلي ركعتين ونامي ريحي لك
ليلى واهي توقف وتنفض قميصها : منتي نايمه؟
سُلاف : الا بس ارتب المطبخ قبل
ليلى : زين
توجهت سُلاف للمطبخ تبي ترتبه لأنه تركته العصر ما نظفت فيه شي..بعد ربع ساعة طق الباب وذا الي خلاها تخاف لا يكون ابو نايف ..
سُلاف : الله يستر علينا
طلعت واهي تسحب رجولها تبي تصحي خواتها وبنفس الوقت ماتبي تخوفهم ..تسحبت للباب شوي شوي واهي تهمس..
سُلاف : مين؟
صقر : افتحي يا سُلاف
سُلاف رفعت لثمتها وضبطتها وفتحت الباب واهي متسنده عليه بيدها اليسار ومتخصره بيدها اليمين : نعم يا ولد يافع وش تبي بنصوص الليالي على بيت كله بنات؟ يا محترم
صقر ناظرها من فوق لتحت : ما تخافين تفتحين لي؟ ولا متعوده
اعتدلت بوقتها بصدمه واتسعت عيونها : وش تقول؟
صقر : ولا لو اني فالح رضيتي فيني؟
وللمره الثانية من غير شعور طلعت واهي ناويه تعطيه كف اقوى من الي اعطته بالمره السابقه .. بس هالمره حفظ افعالها مسك يدها قبل توصل لوجهه
صقر واهو ماسك يدها بقوه : انا موب زلابه عندك تطلعين وتمدين يدك عليه وتدخلين!
سُلاف بخوف واهي تسحب يدها : اتركي والله لا اصارخ الم الناس عليك
صقر ماترك يدها وعيونه للحين عليها ..فقدت الأمل انه يتركها وكانت بتصرخ بس لفها الين صار ظهرها على صدره واهو ساد فمها بيده سحبها لمكان قريب من حارتهم واهي كانت تصارع بين يده وتحاول تصارخ ..
صقر دفها لعند الجدار وقرب منها واهو ساد فمها لدرجة مايفصل بين وجه ووجها الا يده..
صقر : بوخر يدي بس تذكري انك لحالك معي هنا لو صارختي شوفي وش بيصير ..فاهمه؟
هزت راسها سُلاف بـ اي
وخر يده واخذت نفس لثانية ولاحظ انها بتصارخ بلمح البصر باسها بقوه من شفايفها ويدينه على جسمها تقربها منه اكثر و اكثر ، بينما اهي كانت تصارع بحضنه ومن غير شعور بكت ودموعه ملت وجها..
بالقوة ابعدت وجهه عنها عشان تستنجد فيه تكلمت بصوت باكي وعيونها تلمع دموع بهالظلام : صقر تكفـى لا تكفى
ماوقف صقر الا نبرتها رفع راسه لعيونها واهي تدمع ما استوعب الي سواه الا لما شاف عيونها ابعد عنها بسرعه وطاحت بالأرض تلملم نفسها وتبكي بصوت غير مسموع قامت بسرعه بتروح ومسكها ..
صقر بخوف : سُلاف
سُلاف واهي تبكي : وخر عني والله ما اعديها لك والله اذبحك
صقر يمسكها من كتوفها : اسف والله ماوعيت على نفسي والل..
اعطته كف وصارخت بوجهه : جعلك تموت والله اذبحك والله
حسوا بحركة بالشارع وسحبها لعنده عشان محد يشوفهم بس سُلاف كانت منهاره وماهي مهتمه دفته بأقوى ماعندها ورجلينه تعكرفت بين الصخور وطاح ..ركضت للبيت ودخلت غرفتها على طول وسكرت الباب عليها ..فصخت ملابسها ببكاء قوي ودخلت الحمام تفرك جسمها واهي تصارخ : الله يــاااخذذذك الله يـااااخذذكك
ركضوا لها البنات واهم مو فاهمين شي وقلوبهم ترقع من الخوف وينادونها ..
جودي ركضت تجيب العده وطلعت آلة قويه وقامت تخبط بالباب..
جودي بخوف : ابعدوا عن الباب
طقت مره مرتين خمس وانهد حيلها ..وجود اخذت منها : جيبي
وريف واهي ماسكه راسها وتنطط من مكانها : يمه اختي يمه اختي وش فيها
ليلى واهي تبكي : سُلاف افتحي تكفيين افتحي
وجود بعد ما انهد حيلها كسرت مفتاح الباب ودخلوا الحمام كلهم دفعه وحده..
شافوها جالسه بالأرض ولامه نفسها وتبكي بقهر ..وريف ركضت تجيب لها فوطه تغطي جسمها
طلعوها من الحمام واهم يسمون عليها ..اخذت ليلى ملابسها وجلست تلبسها ..
جودي بخوف : وش فيك وش صاير لك؟
سُلاف ميته من البكي ماعرفت وش تقول لهم حتى ..وبعد ساعة من بكاها والبنات يترجونها تقولهم..
سُلاف قالت لهم كل الي حصل ..
ليلى وقفت واهي تشهق وحطت يدها على فمها : سواها!
سُلاف تمسح على وجها وتنفي الي جاء براس خواتها : لا لا مالمسني من تحت والله مالمسني
وجود قامت بتروح لبرا : وينه ؟؟ وينه ولد جهنم
ليلى مسكتها : لا تروحين
وريف انهارت قوتها وطاحت بالأرض : وصلت فيه يلمسك!
سُلاف : والله بذبحه يابنات والله ما اخليه
جودي حضنتها واهي تتفحص جسمها : حسبي الله عليه حسبي الله عليه
سُلاف بكت بقوه : لا تتركوني انام بالحالي خلكم معي
ليلى وقفت تناظرها وعيونها سيلان دموع اول مره تشوف سُلاف تبكي هالقد ومنهاره اول مره تحس انها فعلًا انكسرت اختهم القويه وصل حالها كذا ..
وريف : بنبلغ الشرطة عليه
سُلاف فزت : لا ! والله ما اسامحكم معه لو وصل الموضوع للشرطة
وريف : وبتسكتين له!!!!!
جودي خافت من الي يدور براسها بالأخير ماتبي تخسر اختها : لا توصخين يدك بدمه النجس..
جلسوا البنات يقنعونها تبلغ الشرطة بدون لا تسوي شي مايبون يخسرونها ..بنص انهيارها رجعت تهدا و اقنعتهم انها ماتبي تنفضح ولا تبي الشرطة تدخل بالموضوع وبتسكت..
رغم ان البنات ماهم راضيين يعدون الموقف بدون لا يبلغون ويتعاقب بس اصرار سُلاف خلاهم يستسلمون ..
ليلى : ادري بتسوين شي بس يكون بعلمك لو تسوينه من ورانا ماراح نسامحك
وريف : خلينا نساعدك
سُلاف : ما ابيكم تساعدوني
جودي ناظرتهم بمعنى اسكتوا لا تزيدون حالتها : ابشري