بعدك يابوي اصبحت دنياي عرجاء بلا عكاز

15

عند البنات ..
سُلاف سحبت الفستان : خذيه
ليلى بتردد : لا استحي البسه
سُلاف : تستهبلين ليش تاخذينه طيب من ام عزيز دامك منتي لابسته!
وجود : المشكلة انها اخذته واهي مقتنعه
ليلى : بس..
سُلاف : لا بس ولا اهم يحزنون بتلبسينه يعني بتلبسينه
وجود : يعني بتتملكين اكشخي البسي شي عمرك ما لبستيه
ليلى بزعل : بس بنات مره ضيق
سُلاف بعصبيه : تلبسينه ولا لا؟
ليلى : عوذه طيب بلبسه خلاص
وجود ضحكت : ايه ماتجين الا بالعين الحمراء
سُلاف وقفت : وانا بروح اجهز العده عشان ابدع بوجيهكم
وريف جت واهي ماسكه فستانين : احترت وش اختار؟
ليلى اشرت على الفستان الوردي : هذذا
وريف ابتسمت : جد؟
ليلى : اي والله
وريف : طيب
جودي تناديهم بالحوش مع الشاهي و القهوة : تعـالوا
ليلى طلعت واهي متخصره : ليش الصراخ؟
جودي بروقان : امشي روقي
ليلى جلست : خلصتي لم اغراضك؟
جودي ابتسمت : ياحليلك مخلصتهم من ساعة
ليلى : ياحظك
جودي : ليه ماخلصتي؟
ليلى : الا توني مخلصه
جودي وقفت : بقوم اناديهم
-
بالفندق عند نايف وحليمه..
حليمه سحبت اخر شنطة للصاله : بس هذولي
نايف : متأكده
حليمه هزت براسها بـ ايه
توجهت للغرفة ولفت عليه : متى قلت لي الرحله؟
نايف : ٣:٣٠ الفجر
حليمه ناظرت للساعة : اجل بريح لي ساعة ..ماتبي تريح؟
نايف : الا بجي الحين
دخلت للغرفة واهي تمشط شعرها وترفعه لفوق وتمسح مناكيرها واهي تدندن بروقان ..
نايف دخل واهو مبتسم : شكلك مروقه
حليمه ابتسمت واهي تمسح مناكيرها : الحمدلله
نايف انسدح بالسرير واهو يناظرها : وش السر؟
حليمه رفعت كتوفها : مدري
نايف غمز : ماتدرين ولا مستانسه لشوفة خوياتك
حليمه ناظرته : دامك داري ليش تسأل؟
نايف : بشوف بتجاوبين بصدق ولا
حليمه انسدحت جنبه واهي تتنهد : اف
نايف : وش فيك؟
حليمه : مهدود حيلي
نايف : اني ملاحظ اليوم كله وانتي مو على بعضك ..اخذك للمستشفى؟
حليمه : لا خلاص بلاها ساعتين وبنروح للمطار خلنا نرتاح
نايف وقف واهو يسحبها من السرير : قومي بس للمستشفى
حليمه بكسل واهي تتخبط بمشيتها واهو يسحبها : يوه يانايف
نايف : اخلصي البسي واطلعي احتريك برا
تجهزت حليمه وطلعت معه وتوجهوا للمستشفى ..بعد ربع ساعة
الدكتورة واهي تناظر الأوراق ناظرتها واهي تبتسم : علاماتك الحيوية جيدة بغض النظر عند الحرارة
حليمه ناظرته : الحمدلله شفت
نايف : وجهك اصفر اسكتي بس
الدكتورة كتبت لها وصفة طبية : بسبب ارتفاع حرارة جسمك يمكنك اخذ هذي الوصفة كل ٦ ساعات
حليمه اخذت الورقة وابتسمت لها : شكرًا
طلعت وطلع وراها واخذ الورقة منها : انتظري هنا بجيب الأدويه واجيك
حليمه جلست بتعب : طيب
راح وسندت راسها بتعب على الجدار ..وغفت من غير شعور وماصحت الا على صوته ..
نايف : حليمه ، حليمه
حليمه فزت : ها
نايف : امشي امشي الفندق واضح دايخه نوم
حليمه وقفت واهي تشيل شنطتها : اي والله ماحسيت على نفسي
-
عند الشباب بالمزرعة الساعة ٩:٣٠ الليل
صقر فتح الأسطبل : وش ذا الخيول السبايك
زايد : لا تصحيهم بقوه
صقر خبط بالحديده : قوموا يا ورعان
زايد بعصبيه : الله يقلع راسك يالغبي
دخل على الفرس واهو يشوفها حامل : ياحليلها حامل
زايد : اطلع لا ترفسك
ثامر جاء يركض ودخل لعندهم : يلا نتسابق؟
زايد : ما ظنتي المساكين نايمين
ثامر : يازين خيولنا بس مصحصحين بأي وقت
دخل نياف واهو حاط يدينه بجيوبه : كأنك تغلط على حلالنا؟
ثامر : وين جابر؟
نياف : نام الحبيب بكره ملكته يبي يصحصح
زايد : والله حتى احنا لازم ننام عشان شيابنا لا يستقعدون لنا
نياف : ترا مايدرون ولا حسوا فيكم
صقر واهو يأشر : ذي بأي شهر؟
نياف : الثالث
زايد : امشوا امشوا نطلع .. الصبح نستقعد لهم
نياف : اني جاي اطردكم اصلًا
صقر :بيض الله وجهك
نياف واهو ماشي بيطلع : بتطلعون ولا اسكره عليكم؟
طلعوا واهم يسولفون مع بعض يضيعون وقت مسافة الطريق بين الأسطبل وغرفتهم..
-
الصباح عند البنات ..
سُلاف واقفه بالشارع ومتخصره : بشيروه بيجي بكره شكله
ليلى لفت تناظر وجود : انتي ماقلتي له يجي الحين؟
وجود : الا والله قايله له ..بروح اتصل عليه
جت بتدخل الا وجاي بالسيارة..
سُلاف : ها شرف السيد بشير تعالي
وجود : اجل بنادي وريف و جودي
نزل بشير : سوري ماما سوري
سُلاف : طيب يلا شيل شيل
قاموا يساعدونه بحمل الأغراض وركبوا كلهم ..
وجود بألم : سُلاف يا كبر شحومك اوجعتيني
سُلاف : عمى اذكري الله
وجود : ماشاء الله بس عدلي جلستك ترا اوجعتي فخوذي
سُلاف بعصبيه : وين اروح يعني فوق راس بشير انا زين بتحمل ساعة كاملة بذا الجلسه
وجود : واحنا راجعين بجلس انا بمكانك
ليلى ناظرت لوريف : وش قالت خالتي ام عزيز؟
وريف : تقول ماتقدر جمانه بنتها ذا الأسبوع تحري ولادتها وتعبانه حيل
جودي: ياعمري عليها احسها شايله هم بنتها مره
وجود : اكيد اول احفادها
وريف بفضول : وش صار عليك وجود؟
وجود بستغراب : وشو؟
وريف : يعني وش صار على عزيز
وجود : مدري عنه ويختي لا عاد تجيبون طاريه
وريف : طيب
ليلى : الحين كيف ادخل عندهم احسني بستحي
سُلاف : انتي كل يوم تستحين ماوقفت على هالمره
وريف ابتسمت : محد بيستانس الا سُلاف جريئه اظن اهي الي بتبوس زوجها
وجود همست : خير يابنات ترا بشير يسمع ويفهم مو غبي
وريف حطت يدها على فمها : نسيت
سُلاف ناظرتها : ادب
خلال هالساعة كانوا يسولفون ويتهاوشون وبشير متحمل وساكت ..متعود عليهم من واهم صغار ، لأنه يشتغل عند ابوهم من ٢١ سنة
-
بالمزرعة ..
ام زايد : فرح قومي لأمك تناديك من صبح
فرح : والله؟
ام زايد : اسمعيها تنادي قومي
فزت على طول وطلعت ..ام فرح بعصبيه : صقه ماتسمعين!
فرح : والله ما سمعت
ام فرح : ارقي فوق هالكرسي جيبي المدخنه
فرح وقفت فوق الكرسي ومدت يدها نزلتها لأمها : بس؟
ام فرح بعصبيه : ايه بس وقومي انتي ووضحى نظفوا بنات سليمان بيجون
فرح : نظفنا خلصنا
ام فرح : ترا بجي اشيك
فرح : بكذب يعني وبعدين الملكة متى؟
ام فرح : يا اليوم المغرب او بكره
فرح : تكفين يمه خلوها اليوم
ام فرح : موب كيفي اذا لقوا المأذون اليوم بيكتبون
فرح بزعل : اف نفسي اكشخ واستانس
ام فرح : ماكفاك عرس حليمه
فرح : يوه يمه حليمه لها شهر متزوجة نبي شي جديد
ام فرح : طيب نادي لي وضحى
وضحى جت واهي تبتسم : وضحى جت
ام فرح : هالبنت تقول رتبتوا صادقه؟
وضحى هزت براسها : ايه امي قايله لنا ننفض المكان
ام فرح ابتسمت : ايه كفو عليكم سنعات
فرح تسندت على الكرسي : بقى بس اعرس
ام فرح اخذت الملقط : بعدي عن وجهي اقول
فرح انحاشت : احمدي ربك بعد اني ابي اعرس واجيب لك احفاد
وضحى ضحكت : بالله محد خطبها ؟
ام فرح ابتسمت : لا اهي تطلع الناس يشوفونها وقتها كله بالبيت
وضحى : النصيب بيجيها لو انها بجحرها
ام فرح : اي والله
وضحى : اعطيني عمه المدخنه انا ببخبر
ام فرح مدتها لها : يلا بعدي بنت اخوي
وضحى باستها وطلعت تبخر المكان ..
-
عند الشباب ..
جابر جنب ابوه : يبه تكفى اتصل بكل الي تعرفهم
ابو نايف واهو ماسك جواله وبملل : يا ابن الحلال اتصلت على السباك حتى كلهم مشغولين
جابر : ياليل الليل
ابو زايد يضحك عليه : كأنك ابوك مطيور مافيك صبر
ابو نايف ناظره : وقدامي تقولها
ابو زايد تسند : ماقلت الا الصدق
دخل ثامر واهو يركض وطاح من المركى الي قدام الباب ..ابو نايف ناظر لأبو زايد ..
ابو نايف : اذا ولدي طالع مطيور علي ذا الغشيم على من؟
جابر مات من الضحك وثامر يناظرهم واهو مو فاهم ويعدل ثوبه : وش السالفه؟
ابو زايد : اقعد اقعد كانك مشمت الناس فيني
جلس ثامر واهو لازال مو فاهم ويناظر جابر الي يضحك : وش تضحك عليه انت؟
جابر : انت شايف كيف داخل علينا ؟
ثامر ضحك واهو يستوعب طيحته : من الي حاط هالمركى بالوجه؟
ابو نايف : لا تحط اللوم على المركى لو انك تمشي مثل الأوادم ماطحت
ثامر بملل : اهيه الحين بيستلمني
ابو نايف قرب من عنده : وش قلت؟
ثامر بخوف : اقول الله يسلمك ياعمي
ابو زايد : قم اقحص ناد الباقين
جابر وقف : انا بقوم
-
الساعة ٩ الصباح تقريبًا ..بالمزرعة
وصلوا البنات وهذي المره الأولى لهم بمزرعة ابو نايف
وجود بإنبهار : تبارك الله
جودي : ياربي الحين وين نروح
وريف : اصبروا انا ادلكم الدرب
سُلاف بضحكة سخريه : يلا جتكم الاخت الكبيره
وريف مشت بغرور واهي تأشر : الحقوني
الطريق كان فيه نزله خفيفه واتجهت وريف لها اول وحده وبعدها بثواني لحقتها ليلى و جودي ..
جودي لفت لوجود وسُلاف : امشوا اخلصوا
وجود رفعت عبايتها : يلا توكلنا على الله..
بلمح البصر شافوا ليلى راجعه تصارخ ووراها وريف : كـلاب كـلاب!!
طاحت وريف وصرخت ورجعت لها ليلى سحبتها من طرحتها ولا قدرت تساعدها وتركتها وانحاشت تلحق جودي و وجود وسُلاف الي من سمعوا نباح الكلاب حطوا رجلهم ..
وريف بكت واهي تحاول تقوم : بموت رجلي ما اقدر
ليلى مشت مسافة الطريق وناظرت وراها مالقت وريف ورجعت لها تركض واخذت حجر وبدت ترميه على الكلاب واهي تصارخ ورجعت معها وجود واخذت حجره وخبطتها بجبهة وريف بالغلط وشهقت بخوف وركضت لها ..
وجود جلست عند وريف الي طايحه بالأرض : يمه وريف وربي اسفه ، وريف
وريف اغمى عليها من الخوف والخبطه الي جت بنص جبهتها ..
ليلى بخوف : دم دم
وجود فصخت لثمة وريف واهي تشهق من جرح جبهتها : ياويلي اختي
ليلى : شيليها بسرعه
ليلى اتجهت لعند رجلها ومسكتها و وجود عند كتوفها شالوها واهم مو مهتمين للكلابه الي ينبحون
اول ما رفعوها شافوا جودي و سُلاف راجعين يركضون وخايفين..
و وراهم على طول طلع صقر و زايد ..
زايد بخوف : وش فيها؟
وجود بكت : خبطتها بجبهتها
صقر مسك راسه من شاف الدم مالي وجها كله : يا رباه
زايد شال وريف بسرعه واهو يركض فيها لداخل ولحقوه ..
حطها بالأرض على طول من دخلها بالملحق واهو يضرب خدها : وريف وريف
وجود كانت تنطط وتصيح : وربي مادريت انها بتجيها مادريت
سُلاف مسكتها : خلاص اهدي
ليلى الي كانت عند رجولها : وريف تكفين قومي
زايد لصقر : جب مفتاح السيارة بسرعه
طلع صقر يركض يجيب المفتاح وعلى طلعته جو كلهم من العامل الي شاف زايد شايل وريف ..
ام فرح بخوف : ياويلي وش صار بالبنت!
زايد بعصبيه : ابعدوا خل الهواء يجيها
ابو نايف بعصبيه : قم ودها للمستشفى
زايد ناظر لصقر الي دخل : امش بفتح لك السيارة
سُلاف : بجي معها
زايد واهو شايلها : يلا
طلع صقر اول واحد فتح السيارة و سُلاف ركبت ورا وسدحت راس وريف على رجولها و قدام زايد وصقر الي كان يسوق..
ام زايد مسكت وجود الي كانت منهاره من البكي: خلاص يابنتي جرح بسيط
وجود : لا ضربتها بقوه والله ابغى اضرب الكلاب لأنها قريبه منها وجتها
ام نايف : خلاص ماراح يصير الا كل خير وقفي بكي
ليلى الي ماعادت رجولها تشيلها جلست بهدوء واهي تناظرهم وكأنها تحلم ..
ليلى بهدوء عكس الي بداخلها : وين رحتي انتي وسُلاف؟
جودي : مدري ركضنا ولقينا بوجهنا صقر و زايد
ليلى سندت راسها بيدها : اعوذ بالله
وضحى جلست جنبها ومسكت يدها : ليلى فيك شي؟
ليلى هزت براسها بـ لا
ابو زايد لنياف وثامر الي واقفين يناظرون مصدومين : يلا يلا ياعيال تحركوا
نياف همس لثامر : وين جابر؟
ثامر : يتسبح مسكين ماشاف الأكشن
طلعوا الرجال ..وليلى قامت وجلست جنب وجود : خلاص
وجود ببكي غريب : اخاف تموت وتتركنا مثل ما ابوي وامي راحوا تكفين ليلى والله ماقصدت
جودي نزلت راسها واهي تغمض عيونها بقوه وكأنها تتذكر لحظات وفاة ابوها..
ليلى حضنت وجود بسرعه : بسم الله عليها وجود لا تقولين كذا
فرح : فال الله ولا فالك ان شاء الله الحين نتصل على زايد ويعلمنا وش يقولون ..
-
بالمستشفى ..
زايد الي دخل واهو شايلها وحطها بالسرير ولف لسُلاف وناظرت ثوبه الي كان فيه دم وماقدرت تتحمل وبكت : ياربي
صقر انصدم : وش ليه تبكين!
سُلاف واهي تبكي : عشاني مستانسه يعني وش رايك خايفه على اختي
صقر : هذا وانتي زعلانه شرانيه
سُلاف بكت وحطت يدها على وجها ..صقر بخوف : امزح معك وش فيك انتي!
سُلاف : وين راحوا؟
صقر ناظر بعيونه : امشي
مشت وراه و وزايد كان واقف عند غرفة ويدينه على خصره ..
صقر : وش صار؟
زايد : ينظفون جرحها
سُلاف : ابي ادخل
زايد : رفضوا اصبري شوي
بعد ربع ساعة طلعت الممرضة : الخبطه سببت لها الأغماء بس بسيطه شوي وبتفيق
سُلاف : ابي اشوفها
الممرضة فتحت الباب : ادخلي
دخلت سُلاف واهي تمسح دموعها وتشوف وجه وريف وشعرها الي كان فيه بقايا من الدم همست : ماتحبين الدم اصحي عشان اغسله لك
وريف فتحت عيونها بشويش : اسمعك
سُلاف فزت : وريـف
ابتسمت وريف واهي تقول بنبرة ألم : تخافين علي ليش؟ قدني خسرت ضناي ورجعت طبيعي هالجرح ماراح يتعبني
سُلاف خنقتها العبره : وريف لا تزعليني بهالسيرة تكفين
وريف غمضت عيونها ..وسُلاف قربت من عندها : فيك شي؟
وريف : لا بس اكره المستشفيات ابي اطلع
سُلاف : لا اقعدي الين يسمحون بطلعتك
وريف : من جابني؟
سُلاف : عيال يافع
وريف بهدوء هزت راسها ..ولفت عليها : البنات وين؟
سُلاف : بالمزرعة
دخل زايد بعد ما دق الباب ، وتغطوا ..
سُلاف : ادخل
زايد : السلام عليكم
الكل : وعليكم السلام
زايد : ها كيف حالك الحين؟
وريف : بخير ، متى بيطلعوني؟
زايد : اقل شي ثلاث ساعات
وريف تأففت : يالله
سُلاف ناظرتها : اقعدي الين تتحسنين
وريف : مافيني شي والله خلاص صحيت
وريف لفت على زايد واستوعبت الي بثوبه : وانت وش فيك؟
زايد بتوتر : ا ..دمك
وريف ناظرت لسُلاف : وش جاب دمي بثوبه؟
سُلاف ابتسمت واهي تصرف : ماقصر زايد اهو الي شالك وجابك
وريف حطت يدينها على وجها واهي تعض شفايفها بأحراج ..زايد لاحظ ردة فعلها واستأذن وطلع ..
وريف : ليش خليتيه يشيلني!
سُلاف : مجنونه انتي نحسبك بتموتين رايقين نشوف من يشيلك ومن يحطك
وريف بعفويه : اخاف اني ثقيلة عليه
سُلاف ضحكت بقوه : انتي وين واحنا وين
وريف ابتسمت تلطف الجو : شكلي لازم اخفف وزن
سُلاف جلست تضحك ولفت بتطلع : بجيب مويا
صقر عند الباب : وين بتروحين؟
سُلاف : ابي مويا
صقر : تعالي معي
لحقته سُلاف واهي تناظر الناس ..
صقر ناظرها : تحبين تتمقلين بالناس؟
سُلاف : عادي
وقف واهو يشتري مويا ويمدها لها : خذي
سُلاف اخذتها : شكرًا
صقر استغرب من هالهدوء : العفو
جلست على اقرب كرسي وتنهدت تنهيده طويلة ..صقر يناظرها طول الوقت ..
سُلاف استغربت : مضيع شي فيني؟
صقر ابتسم : قلبي
سُلاف مسكت العلبه بقوه من جراءته وتكلمت : لا تحسب اني بستحي منك ترا وجهي مغسول بمرق
صقر ناظرها بطرف عين وببتسامه مايله : ومن قالك ابيك تستحين احبك جريئة كذا على جوي
سُلاف وقفت بسرعه : الله يقلع الي يسولف معك
ضحك صقر : وين الجريئه !
سُلاف : مالك دخل
مشت وتركته واهي تحنش فيه وزايد واقف عند باب الغرفة وعيونه عليهم ، تعدته ودخلت لوريف وزايد اتجهه لصقر ..
زايد : والله لو تحلف لبكره اني ماصدقت ان مابينكم شي
صقر تسند واهو يبتسم : يوه ياحليلك وينك انت!
زايد انصدم : فيه شي؟
صقر : اذا روقت اقولك
-
بالمزرعة ..عند الرجال
جابر متوتر بعد ماقاله نياف وش صار ..
ثامر : انت بيجيك شي من اعصابك التلفانه
جابر همس له : بالله ضبطني ابي اشوفها
ثامر : اقول اعقل
جابر : ثميروه اخلص ابي اشوفها
ثامر : تستهبل انت وشلون اخليك تشوفها!
جابر : انت تمون على اختها كلمها تخليها تطلع لي
ثامر : والله بتبلشني انت
نياف قرب منهم : وش تتساسرون عليه؟
ثامر : المطفوق ذا يبي يشوف ست الحسن والدلال
نياف : يخرب بيت جوك التعبان البنت تلقاها شايله هم اختها وانت تبي تشوفها
جابر بعصبيه : بتطمن عليها انا موب استعبط
نياف ابتسم : ياحليله اخوي حبيب
جابر : كأني ما ادري من رايح لبيت بعض الناس عشان يتطمن
نياف لف وجهه وابعد عنه يرجع مكانه ..ثامر ماهو فاهم : وانا كالعاده مدري وش هالنغزات
جابر ابتسم : انت خلني اشوفها واعلمك
ثامر : طيب
عند النسوان ..
ام زايد سكرت التليفون واهي تبتسم : ابشركم جايين بالطريق
وجود فزت ..وكملت ام زايد واهي تناظرها : و وريف مافيها الا العافيه صاحيه بكامل وعيها
وجود تسندت واهي تزفر براحه : الحمدلله
ليلى : طلعوا ولا بيطلعون؟
ام زايد : قالي بالطريق شكلهم خلاص طلعوا
فرح : الحمدلله كل شي مر على خير
ليلى : الحمدلله
جودي : ماراح ارتاح الين اشوفها قلبي ياكلني اكل عليها
وجود : وش تقولين عني انا الي صافقتها
وضحى : يلا عاد اشربوا قهوة روقوا خلاص شوي وبيجون
جودي : عطيني
ام نايف : ماتشوف شر
ليلى بهدوء : الشر مايجيك..
فرح : حليمه وصلت؟
ام زايد : ياويلي بنيتي نسيتها
سحبت التليفون واهي تتصل على رقم نايف بس مارد ..
ام نايف : تلقينهم بالطياره نتصل عليهم بعدين
ام زايد : ان شاء الله
وضحى : يمه بيجون هنا على طول؟
ام نايف : والله مدري عنهم بس يجون متى مايبون
-
بالسيارة ..
سُلاف تناظر الطريق : الله وريف شوفي
وريف تحس بتعب بس ماتبي تتكلم ابتسمت بتسليك : حلو
سُلاف مستغرب: تحسين بشي؟
وريف : لا بس ودي انام
سُلاف : نوصل ان شاء الله ونامي
زايد : اسمعي يا وريف ترا الشاش الي على راسك لزوم يتغير وقبل تغيرينه يتعقم جرحك
وريف بهدوء : ان شاء الله
صقر لف يناظر سُلاف بطرف عين الي كانت ورا زايد : اي غيريه زي ماكنت اغير جرحي
سُلاف : عساه ماطاب؟
وريف ضربتها : بنت
سُلاف همست : ماشفتي وش قالي قليل الأدب
وريف : اسفهيه
صقر ضحك : لا طاب ابشرك
سُلاف : اجل اعقل لا يجيك جرح اقوى منه
صقر واهو مبتسم : فدى ياشيخه
زايد لف يناظره مستغرب : وش السالفه ؟
صقر همس له : قلت لك اروق واعلمك
زايد : الله يستر منك بس
وريف : زايد الله يسعدك ماقصرت حتى انت يا صقر
صقر : ابد اعتبريني اخوك متى ماتبين شي علميني
وريف : كثر الله خيرك
زايد : ماسويت الا الواجب
وريف ناظرت لسُلاف : بنسدح على رجلك
سُلاف : ايه تعالي
انسدحت وريف وحطت راسها على رجل سُلاف ونامت من غير شعور ..
-
بالمزرعة ، نزلوا من السيارة ..
وسُلاف ماسكه وريف تساعدها ..
وريف بهدوء : خليني بمشي لحالي
سُلاف : لا بمسكك
وريف : تعاندين
سُلاف : حتى انتي تعاندين
دخلوا لداخل والبنات ركضوا لها ..
وجو واهي تحضنها وبكت : مت خوف عليك
وريف حضنتها واهي تمسح دموعها : شوفيني مافيني الا العافيه
تحمدوا الكل لها بالسلامة و دخلوها خواتها الغرفة الي بينامون فيها عشان تبدل ملابسها..
ليلى بفضول : يوجعك شي
وريف : لا والله تطمنوا مافيني الا العافيه
جودي ضحكت فجأه ولفوا عليها يناظرونها مستغربين..
سُلاف : وش يضحكك؟
جودي واهي تكتم ضحكتها وملامحها حمرت : تذكرت انها طقت الصدر ورجعت تركض من الكلاب
ليلى ضحكت وكعادتها انسدحت من ضحكها : انا ياعمري سحبتها من طرحتها حسبتها قامت ويوم لفيت وراي مالقيتها
وريف ابتسمت : شفت الموت انكتمت من سحبتك زود على روعتي وطيحت رجولي
وجود الي تمسح وجها : وانا الي زدت الطين بله جيت وفقعت راسك
سُلاف مسكت بطنها واهي تضحك تتذكر اشكالهم : انا وجودي ركضنا وماندري وين نروح بس نركض نركض
جودي هزت براسها بـ اي واهي تضحك
ليلى واهي تمسح دموع الضحك : وش صار على رجولك؟
وريف : عادي ما احس فيها الحمدلله
سُلاف : اجل شكله شدت عليك
وريف : اي اظن
جودي : طيب يلا نطلع عندهم مايصير
قاموا البنات وطلعوا ..
عند الشباب ..
جابر : هذي فزعتك لي؟
ثامر : ياخوي ماشفت وجود تبيني اناديها عندهم عشان يسوون سالفه لنا
جابر تأفف بملل ..
نياف : خلاص ولا يهمك بقول لوضحى تطلعهم للخيول وتسحبها لك
جابر استانس : كفو اخوي يلا قم
صقر واهو متكتف وقف جنب جابر : لاحظ انه قال تطلعهم مو تطلعها
جابر ابتسم : اني دراي بحركاته
زايد جاء عندهم واهو يلف شماغه على راسه : وش بنسوي؟
صقر : امش للخيول
اتجهوا للأسطبل وركبوا خيولهم ..
-
عند حليمه ونايف بالسيارة ..
حليمه : ماتوقعت الجو برد كذا
نايف مد يده لورا واهو يسحب لها جاكيته : البسي
لبسته حليمه وسندت راسها على الدريشة وسرحت بأفكارها ..
نايف :اكلمك انا
حليمه : معليش ما انتبهت
نايف : وش تفكرين فيه؟
حليمه هزت براسها : هواجيس ما تنفهم وش بغيت؟
نايف : اقول فيك شده نروح لهم ولا نخليها بكره؟
حليمه : بكره ابي ارتب الأغراض
نايف : الي تبين
وصلوا للبيت ونزلت حليمه واهي تشيل معها و نايف يساعدها ويدخلونه لغرفتهم الخاصه ..
حليمه ابتسمت : ريحة البخور موجوده
نايف : تلقين امي قبل تطلع مبخره
حليمه : الله يسلمها
لف عليها : بترتبين الحين؟
حليمه: ماتبي تاكل؟ جوعانه انا
نايف : الا والله ودي اكل
حليمه : خلاص بسوي اكل وشوي و اقوم ارتب الشنط
نايف : بساعدك
حليمه : يلا
نايف : بس قبلها خليني ابشر امي وخالتي اننا وصلنا
حليمه : لا تقفل المكالمة بكلم امي
-
بالمزرعة ..
وضحى ماسكه يد سُلاف متقدمين البنات بخطوات ..
سُلاف : الجو يجنن
وضحى : مره ودي نطلع نقعد
سُلاف : يلا نجيب الفرشه ونجلس
وضحى لفت على البنات : وش رايكم نطلع نقعد هنا؟
جودي تتلفت تدور نياف ..ليلى همست : تراك واضحه اعقلي
جودي ابتسمت : ابي اشوفه
و وجود كانت ماسكه يد وريف الي طلعوها بالغصب معهم..
فرح : بروح للأسطبل من تجي معي؟
سُلاف : اخاف اجي معك وتتركيني عند بعض الناس
فرح ضحكت لأنها فهمت : اذا حارشني وش اسوي يعني
سُلاف : اجل روحي لحالك
وجود : بجي معك انا
فرح : يلا
مشوا البنات للخيول وفرح ركبت الخيل ومسكت وجود وركبت وراها ..
وجود : من متى تعرفين؟
فرح : ابوي الله يرحمه كان معلمني ومن بعدها صرت اذا جينا بمزارع خوالي اركبها و بعد العيال ساعدوني اكثر
وجود : علميني
فرح : تم
جاء صقر بخيله واهو يبتسم لفرح : وين سُلاف؟
وجود تحجب نور الشمس عنها : وش تبي فيها؟
صقر : بركبها الخيل
وجود همست لفرح : لا اهو ولا اخوه صاحين
مشى صقر للجهه الثانية الي كانوا فيها البنات واقفين ويناظرون زايد وثامر ..
وضحى سحبت ليلى : امشي جابر يبيك
ليلى : وش يبي؟
وضحى : مدري امشي بسرعه قبل احد يلاحظ
توجهت ليلى مع وضحى لمكان صاد عن الباقي ..
ليلى توترت : وين بتروحين؟
جابر من وراها واهو يبتسم : خلها تروح
وضحى اشرت لها بـ مع السلامة
جابر لازال مبتسم : اخبارك؟
ليلى بحيا وبصوت يالله ينسمع : الحمدلله
جابر : تلفت اعصابي وانا ابي اشوفك الله يعيني بس
ليلى ناظرته مستغربه : ليه وش فيك؟
جابر : انشغل بالي وابي اتطمن على زوجتي فيها مشكلة؟
ليلى ابتسمت وهزت براسها بـ لا
مسك يدها واهو يجلسها على الكرسي الموجود وجلس جنبها : سولفي لي
ليلى : اخاف خواتي يفقدوني
جابر : ماعليه وضحى بتدبرها
سكتوا ثواني وطال النظر فيها ..
ليلى توترت : وش فيك تناظرني كذا؟
جابر : افصخي لثمتك
ليلى هزت براسها بسرعه : لا مايصير
جابر : بكره بتنكتبين حلالي اعتبريها الحين شوفة شرعيه
ليلى ابتسمت : غمض عيونك طيب
جابر غمضها ولفت وجها عنده واهي تفك لثمتها وتعدل شكلها وشعرها بشكل سريع ..
جابر : افتح؟
ليلى : ايه
فتح عيونه وجلس يتفحصها من فوق لتحت : تبارك الرحمن
ليلى مارفعت عيونها وتحس جسمها محتر من الحيا وخايفه احد يدخل ..
ليلى وقفت : يلا بروح خلاص
جابر سحبها وجلسها جنبه : مستعجله انتي
ليلى بتوتر : خلني اروح
جابر قرب لعندها واهو يحط يدينه تحت دقنها ويقربها اكثر لعنده ..
ليلى ابعدت على طول : وش تسوي؟
جابر ما رد عليها واهو يشدها اكثر له وباسها بكل قوه ومابدر منها اي رفض لأنها مو مستوعبه الي صار ..
ليلى ابعدت عنه بسرعه بعد ثواني واهي متوتره وتمسح فمها : ليش تسوي كذا!
وقفت بسرعه واهي ترفع طرحتها وتلبس لثمتها ، مسكها واهو يقول ..
جابر : بكره خلك جاهزه بنكتب الكتاب
ليلى تركته ومشت وتحس الدنيا تدور فيها ، ماتدري بأيش تحس اهو خجل اهو رفض لفعلته ولا ايش بالضبط..
بنفس الوقت عند صقر الي وقف عند البنات ويناظر سُلاف ..
صقر : بتركبين؟
سُلاف : بركب بس موب معك
صقر : اقول امشي اركبي
جودي : اركبي يختي عادي
سُلاف : انهبلتي انتي
جاء نياف يمشي لعندهم وعيونه تدور على فرح ، ثواني بس وجت فرح بخيلها اهي و وجود ونزلوا ..
فرح ابتسمت واهي جايه لعندهم : ياهلا ياهلا
نياف بتهديد : ياهلا ياهلا اجل
فرح ضحكت وجت بتركض ولحقها وكانت تصارخ : والله اسفه ما اعيدها
صقر يناظرهم مستغرب : وش مسويه له؟
وضحى الي حطت ليلى عند جابر وجت واهي تضحك : بينتقم منها كبت عليه المويا امس
جودي كانت ماسكه وريف وتفرك يدينها بقوه ..وريف : يدك بتتفتت شوي شوي عليها
جودي وعيونها عليه واهو يلحق فرح وهمست : اثره يتعامل مع الكل كذا وحسبتني مميزه عنده
وريف ناظرتها : قلت لك الله يهديك ماتسمعين الكلام
جودي تركت يد وريف وغيرت وجهتها بتدخل داخل ، ولحقتها وريف على طول..
وضحى الي كانت تكلم صقر ما انتبهت لروحتهم ..
سُلاف : تعلمني؟
صقر : اعلمك ليش لا
دخلت سُلاف بين السياج الحديد ووقف قباله : يلا
صقر مسك لجام الخيل وقربه لعندها : اركبي ولا اساعدك؟
سُلاف ركبت على طول وصقر ماسك لجام الخيل ويمشي فيها ويعلمها وش تسوي وسُلاف مبتسمه مستانسه من الجو و اول مره تركب لحالها ..
وضحى وقفت لحالها تناظر فرح ونياف الي لازال يلاحقها و وجود الي ميته ضحك على اشكالهم ..
وضحى : وجود امشي اطلعي لا يجيك الحين ثامر
وجود طلعت بسرعه : اي والله نسيته المجرم المرجوج
عند نياف الي ما يبي يمسكها بس يلحقها يخوفها اخذ الرمل ورماه عليها
فرح لفت وجها : لا مو بالتراب ياشين مزحك
نياف ينفض يدينه : تستاهلين وخلي ام كحله تنفعك
فرح رجعت لعندهم واهي تلقط انفاسها بتعب : اخوك مافيه عقل
وضحى : قلت لك بيردها ماراح يسكت
وجود لفت استغربت : وين راحوا ذول!
وضحى تذكرت ليلى وارتبكت : ا.. تلقينهم دخلوا
وجود : بروح لهم
دخلت داخل ..وبقت وضحى وفرح يناظرون سُلاف وصقر الي ابعدوا عنهم..
فرح : واضح صقر عيونه عليها
وضحى : حتى انا اقوله
عند صقر و سُلاف ..
صقر : بسألك سؤال وجاوبي
سُلاف : اسأل
صقر : بينك وبين فالح شي؟
سُلاف : لا
صقر لف عليها يناظرها : متأكده
سُلاف هزت براسها بـ اي وبعدها تكلمت : وش جاب طاريه؟
صقر : تدرين اني احبك
سُلاف التفت تناظر لورا ..
صقر : محد حولنا
سُلاف : رجعني
صقر استمر يمشي واهي شاده يدينها على اللجام خايفه يسوي لها شي..
صقر ناظرها : يعني متأكده مافي بينك وبين فالح شي؟
سُلاف تنرفزت : بكذب يعني
صقر : اجل ببشرك بشي
سُلاف : ايش؟
صقر : تراه خطب
سُلاف بلعت ريقها وشدت اكثر على اللجام : وش اسوي له؟
صقر ابتسم لها : بس ، ابيك تباركين له
سُلاف بهدوء : الله يوفقه
صقر وقف : انزلي
سُلاف : ليه؟
صقر : انزلي
نزلت واهي ترتب ملابسها : وشو؟
صقر تكتف : اثبتي لي انك ماتحبينه
سُلاف احتدت ملامحها : صقر انت وش سالفتك معي!
صقر بعصبيه : سالفتي اني شفت الغصه من طاري خطبته
سُلاف توترت : قاعد تتوهم .. وخلاص رجعني ابي ارجع
صقر : والله ما ترجعين الين تثبتين لي انك ماتحبينه
سُلاف مشت عكس وجهتهم بترجع للبنات ولكن اهو كان اسرع مسكها وسحبها لعنده : يعني ماتبين تثبتين؟!!
سُلاف فكت يده : لا عاد تلمسني وكأني حلال عليك استح على وجهك ما تشوف تصرفاتك واسلوبك معي!
صقر ابتسم : ايوا طلعي الي بقلبك
سُلاف : الي بقلبي اني ابيك تفكني من شرك
صقر : بس انا احبك
سُلاف بعصبيه انفجرت عليه : هذا مو حب هذا قلة حيا كل شي تبيه بالغصب وكل شي تبيه على مزاجك اسلوبك وحركاتك كلها ماتدل الا انك تشوفني بنت شوارع مو وحده تحبها لا تقعد تكذب علي بهالكلام حسبالك بصدقك انا مو غبيه
صقر : يعني ماتشوفيني احبك ؟
سُلاف صرخت : لا ما اشوف الا انك تبي تستمتع عشان كذا يا صقر ابعد عني وفكني من شرك
صقر بهدوء غريب : طيب ، اركبي ارجعك
ركبت للخيل لأن المسافة بعيده وخايفه تضيع .. ورجعها لعند فرح الي وقفت تنتظرها بينما وضحى دخلت مع ليلى ..
-
بالصباح..نزلت حليمه من السيارة واهي شايله شنطتها ..
نايف : اصبري يابنت
حليمه مبتسمه : مافيني صبر لشوفتهم
نايف يدخل المفتاح بجيبه : يلا مشينا
اول مادخلوا لقوا ام نايف رايحه للمطبخ شهقت من فرحتها وركضت تحضنهم : حمدلله على السلامة
حليمه : الله يسلمك
ام زايد طلعت على صوت حليمه : بنتي جت!
حليمه ابتسمت : جيت يا يمه
سلموا عليهم وتوجهوا لأبو زايد و ابو نايف وبعدها دخلت على البنات الي صرخوا اول ماشافوها ..
فرح بصراخ : اشـتتقققـت
ليلى : اقصري صوتك
حليمه ناظرت لوريف الي كانت مبتسمه : وش في راسك؟
وريف : سالفة طويلة
حليمه حضنتها : ماتشوفين شر ياقلبي
وريف : الشر مايجيك
جودي جلست : يلا يلا امشوا نتقهوى وتعلميني كل شي عن لندن
حليمه جلست واهي تضحك : ايييه فاتك فاتك
جودي : يارب اسافر لها
الكل : امين
التموا البنات حول بعض وطار الوقت والسوالف اخذتهم ..
حليمه لليلى : ها متجهزه للملكة؟
ليلى ببتسامه هاديه : اي
وريف :طيب يلا بيأذن الظهر الحين خلونا نتجهز
-
عند الرجال ..
نياف واهو منسدح : العصر بيجي يعني؟
ابو نايف : اقعد على حيلك وكلم الرجاجيل صح
جلس نياف زين لأن ماله خلق سوالف ابوه..
جابر : ايه ان شاء الله
ابو نايف : مصمم ماتبون عرس؟
جابر الي تكلمت معه ليلى وتفهم رغبتها رغم ان وده بالزواج الكبير : اي يابوي انا وياها متفقين الملكة وحفلة بينا تكفي
ابو زايد : الله يكتب لكم كل خير
نايف : يلا من قدك بتلحقني بعش الزوجيه
جابر ابتسم له: ان شاء الله يارب
ثامر : عقبالي
صقر : اقول انطق بس خلني اتزوج انا اول
ابو زايد : الي يشد حيله ويصير كفو للعرس بيتزوج
صقر ناظر لثامر : شفت
ثامر تربع قدام ابوه : يبه بالله عليك ماتشوفني رجال ينشد فيني الظهر؟
ابو زايد : انت ياوليدي مرجوج لو تعقل كدينا خير
ابو نايف : ايه والمره ماتبي واحد يدخل عليها من الباب متكرفع
ثامر : يعني الواحد مايطيح يالله الخيره بس
زايد بضحكه : وش سالفة الطيحه؟
جابر تذكره وقعد يضحك : فاتك جاي يركض وطاح بالمركى على وجهه
ثامر ضيق عيونه : مايضحك
جابر : كيفي بضحك
ثامر : الله يعين ليلى عليك
زايد : وانا اشوف وش الي بوجهك اثره من الطيحه
نايف :واهو الصادق يعني الانسان مايطيح
ثامر : ايه كفو عليك ياولد عمي وقف معي
نايف ابتسم له : كفوك الطيب
صقر وقف واهو يشيل شماغه معه ..
ابو زايد :وينك بتروح؟
صقر : بريح لي ربع ساعة واجيكم
ابو زايد : بالسلامة
طلع صقر من الخيمة متوجه لأحد الغرف ينسدح فيها شوي من بعد موقفه مع سُلاف واهو متضايق ، يدري انه اخطا معها كثير ومزودها بس ما توقع انها تكرهه وقد ايش تبي بعده..
انسدح صقر واهو يتنهد يكلم نفسه : ابعد عنها ياولد يافع وخلها بالحالها
-