بعدك يابوي اصبحت دنياي عرجاء بلا عكاز

13

بعد اذان العصر بالمزرعة
بعد ما خلصوا لم اغراضهم و مستعدين للرحيل ..
ابو نايف : يلا يا ميثاء يلا ياوضحى مشينا
طلعت وضحى واهي شايله شنطتها : يلا يلا
ابو نايف بعصبيه: و امك وينها لازم تقفل المزرعه يعني!
ام نايف جت واهي ترفع عبايتها : جيت جيت اعوذ بالله من قل صبرك
ابو نايف : يلا امشوا قدامي نياف ينتظرنا
جابر حمل الأغراض معه بالسيارة ومشى و بقى نياف وسيارته ينتظر اهله ياخذهم ويرجع ..
وريف تناظر من الدريشه بتوتر : لا يكون ام عزيز نست تعلم بشير يجينا؟
ليلى : لا ما ظنتي بس اصبري شوي وبيجي تعرفين بشير يمشي حبه حبه
سُلاف جايه بعبايتها معصبه : ماتسمعون؟
ليلى : وشو؟
سُلاف : يلا اخلصوا بشير تحت ينتظر
وريف : ما اشوف سيارته!
سُلاف : انه برا مادخلها يلا شيلوا اغراضكم
بدوا يشيلون اغراضهم ويركبونها السيارة وكالعادة بشير يساعدهم
وركبوا السيارة وتوجهوا لبيتهم
عائلة ابو زايد ..و ام فرح
زايد واهو ينفض يده من الغبار : خلصت اغراضكم؟
ام فرح : ايه الله يعزك
زايد : اجل يلا مشينا
ركبت ام فرح وفرح مع زايد بيوديهم البيت
والباقين قسموا اغراضهم مابين سيارة صقر و ثامر والي ركب مع ذا والي ركب مع الثاني..
قبل اذان المغرب الكل وصل لبيته ..
وتبدا احداث الديرة من جديد برجوع ابطالي لها ..
-
على اذان المغرب ..ببيت البنات
واهو يرتبون اغراضهم بأماكنها المخصصه..ليلى كانت تقولهم وش قالها جابر
وريف بهدوء : والله شوفي ياليلى بالبداية كنت رافضه الفكرة بالذات انه ولد خالد وميثاء بس احس الحين لما انمدجت شوي مع عيالهم احس ماعليهم خلاف موب مثل امهم و ابوهم
جودي : بس يختي ام الزوج و ابوه مهم يكونون كويسين ولا ماراح ترتاح بحياتها الزوجيه بيتدخلون ويتمشكلون واجد
سُلاف : صح وجهة نظر اتفق معها
ليلى : قلت له كذا و ..
وجود واهي تنتظرها تكمل : و ؟ ايش؟
ليلى بهدوء : شرا بيت
وريف فزت : بذمتك؟
ليلى : اي والله قالي قبل فترة و مافكرت فيها والحين قالي انه شراه
سُلاف ابتسمت : يا حليله والله
ليلى بتوتر : بس مدري خايفه يابنات بالذات انه عصبي وانا تعرفوني بالقطاره اعصب
وريف : هذا الزين اذا انتي عصبيه واهو عصبي بتصير قنابل بحياتكم لازم طرف هادي
وجود ضحكت : يعني على سبيل المثال ابو صقر و سُلاف
سُلاف كشرت : اسكتي انتي اسكتي
ليلى : طيب بنات لو جاء وخطب وش اسوي؟
وريف : عن نفسي استخيري وشوفي قلبك وش يدلك عليه
جودي : دامه ابعدك عن امه و ابوه ريحي راسك هم و انزاح وفكري فيه لحاله كزوج
ليلى التفت لسُلاف و وجود : وانتم؟
سُلاف : بكيفك انتي الي بتتزوجين مو احنا
وجود : انا من كلام وريف استخيري
ليلى تنهدت : ان شاء الله
-
ببيت ابو نايف ..كانوا العائلة كلها مجتمعين
وضحى جابت القهوة وجلست : الحمدلله والله غيرنا جو و استانسنا من جلسة البيت
ام نايف بعد ما اتصلت على نايف وتطمنت عليه وعلى حليمه : اليوم انا مستانسه مافيه شي بيعكر مزاجي
نياف : وضحى صبي القهوة
ابو نايف : من بكره الدكاكين ترجع تنفتح اظن ثلاث ايام كفايه ترتاحون فيها
نياف همس لوضحى : نرتاح وش واهم كارفينا بخيام العرس
ابو نايف : وش قلت؟
نياف : سلامتك يالغالي
دخل جابر واهو يسلم و بدا يتقهوى ..دقايق وناظر ابوه
جابر بهدوء : يبه بكلمك بموضوع
ابو نايف : تكلم
جابر : برجع اخطب ليلى
ابو نايف ناظره : صادق؟
جابر : ايه
ام نايف بزعل : تبي العرس بزوجك وحده ثانيه موب ترجع لوحده رفضتك ياوليدي!
ابو نايف بغضب : ميثاء اسكتي و شوفي متى تكونين فاضيه وروحي اخطبيها
جابر ابتسم لأمه : يمه انا ابي البنت
ام نايف : وانت متأكد انها بتوافق ماهي برافضه؟
جابر لازال مبتسم : جربي ونشوف
وضحى لأمها : خلاص يمه دامه يبيها لا توقفين بوجهه تكفين
ابو نايف : اسمع من اهل الحارة ان ابو مصلح تعبان بكره تجي انت واخوك معي له
ام نايف : ليه وش فيك؟
ابو نايف : والله مدري عنه بس انه طالب هالجمعه مع عيال الديرة و خصصني انا و يافع
ام نايف توترت : الله يستر
وضحى : الله يشفيه
جابر ماحب يفتح سيرة البيت الين يتأكد من موافقة ليلى و يملك عليها عشان ما يستقعد ابوه له ويرفض هالزواجه لأن يعرف ابوه قد ايش متحكم بتحركاتهم ويبي يحطه عند الأمر الواقع..
-
ببيت ابو زايد ..
كانت تبكي وجميلة تهديها : يمه الله يرحم والديك انا بكره بمشي بتقعدين كذا بيرتفع ضغط ولا يجيك شي
ناصر : جده خلاص من جينا مغير تبكين
ام زايد : اشتقت لحسها بالبيت تعودت عليها
جميلة : بتسلين بتسلين
سلوى لأمها : جده ليه تبكي؟
جميلة : مشتاقه لخالتك
سلوى : وينها خالتي؟
جميلة : مع زوجها يا بنتي
ثامر : شكل ما ملينا عينك يا يمه
ام زايد : لا والله انكم كلكم بقلبي واحد بس وخيتك وحيدتي بالبيت تونسني وانتم طالعين الحين من بقى جميلة عند رجلها و حليمه لحقتها
جميلة ابتسمت بزعل : ادعي ان ربي يوفقها
ام زايد تنهدت : الله يوفقكم كلكم يارب وافرح فالباقي
ثامر : امـين اقولك زوجيني وماتبين
ام زايد : ليه فيني قل صح يوم ازوجك
ثامر : ليه وش ناقصني رجال وسناعه ومعي فلوس
ام زايد : ناقصك العقل اذا شفتك راكد زوجتك اما اني ابلي بنت الناس لا
ثامر ناظرها ثواني وقال : يمه ارجعي ابكي ارجعي
جميلة ضحكت : ياقليل الحياء
ثامر : شفتي كيف شرشحتني
جميلة : ماقالت الا الصدق
ثامر : خلني اروح بس للعيال وانتوا اقعدوا هنا لحالكم ذا جزات الي يبي يوسع صدوركم
ناصر : خالي وين بتروح؟
ثامر : امش معنا القهوة صقر وزايد هناك
ناظر امه و اعطته الموافقه وراح ..قبل يطلع ابو زايد جاء : ثامر خبر اخوانك اننا بكره بنروح لأبو مصلح
ثامر : ان شاء الله
-
مر اليوم طبيعي و اصبحوا يفطرون ..عند ابو نايف و ابو زايد وعيالهم
ابو نايف ينتظر ابو زايد قدام دكانه : يلا يا يافع ماصارت
ابو زايد طلع واهو يقفل الباب : اركد مطيور انت
زايد : يبه تبون السياره ولا بتمشون؟
ابو نايف : لا بنمشي ماهو ببعد بيته
خلاص ١٠ دقايق وصلوا للبيت الي كان ملحقه مليان بالرجال ..سلم ابو زايد و ابو نايف على ابو مصلح الي كان منسدح و التعب هاد حيله هد و وجهه متغير ١٨٠ درجة ، وسلموا عليه العيال..جابر وقف جنب مصلح..
جابر بهدوء : كيف حالك؟
مصلح بضيق : زي ما انت شايف
جابر مسك يده : ربي بيشفيه ويعافيه لا تشيل هم
مصلح تنهد : ان شاء الله
ابو مصلح واهو منسدح : يا ابو نايف ، يا ابو زايد عندي كلام لكم بقلبي من سنين
ابو نايف تعدل بفضول : قل الي بخاطرك ياخوي
مصلح فز يرفع ابوه يجلسه ..والعيون كلهم على محادثة ابو مصلح و ابو نايف وابو زايد..
ابو مصلح : ابيكم تحللوني وتبيحوني
ابو زايد ابتسم : ما اخطيت وانا اخوك يومنا نبيحك
ابو مصلح نزل راسه بزعل : انا على فراش الموت و احس ايامي معدوده وابي ابري ذمتي وابي اعتذر لكم قدام الكل
ابو نايف توتر : وش عندك يا سيف؟
ابو مصلح تنهد تنهيده طويلة : سليمان يا ابو نايف سليمان
ابو نايف : وش به سليمان؟ تحلل بقبره من سنين
ابو مصلح : سليمان يا خالد ماهو الي سرق ذهبك ولا الي تلاعب ببضايع اخوك
ابو نايف فز بسرعه : وش تقول انت!!!!
مصلح بصدمه : يبه علامك مضيع!
ابو مصلح لفت عيونه كلها للموجودين : زي ما سمعتوا سليمان الـ بريئ ، الخطأ كله علي انا الي سرقت الذهب من محلك يا خالد وانا الي تلاعبت ببضايعك يا يافع وخسرتوا هالمبالغ الكبير بذاك اليوم الي لو ينعاد اني لا امحيه ولا اسوي الي سويته
كان كل الموجودين مصدومين حتى ابو نايف ماعرف يرد ولا ابو زايد ..
كمل ابو مصلح : يوم شفت الديرة كلها قامت وولعت الدنيا خفت ، اي والله اني خفت ولا استرجيت اعترف ماكان بوجه المدفع الا سليمان الي دبسته بفعلتي هذي ..مات سليمان واهو مظلوم وانا بموت وانا ظالم ، اذا سليمان ربي خذاه قبل يسامحني سامحوني تكفون سامحوني
ابو نايف وقف بعصبيه : الي تقوله صدق!
جابر مسك ابوه : هد يابوي هد
ابو نايف رمى البياله : يا سيف تكلم الكلام الي تقوله صح!
ابو مصلح بأسف : اي والله صادق ..سامحوني سامحوني
ابو زايد وقف بعصاته ووجه احمر : حسبي الله ونعم الوكيل كانك خليت الرجل يموت من حسرته على نفسه ظلمته و ظلمناه معك
طلع وترك ابو مصلح يصيح ويناديه ..ابو نايف : اعقب يالخسيس لو ما انت طريح ماكان بريت ذمتك يا قليل الخاتمه ..شفتنا نعادي ابو البنات وساكت ! شايفنا خسرنا وساكت حاطها برقبة المرحوم؟
ابو مصلح بكى : الدنيا غرتني وانا اخوك سامحوني
ابو نايف : خل هالدنيا تنفعك ..اذا سامحتك انا سليمان بيسامحك؟ بناته الي الكل انهش فيهم بيسامحونك؟
طلع وتركه ولحقوهم العيال مصدومين ..
جابر واهو يلحق ابوه : يبه يبه امش شوي شوي لا يصير فيك شي تكفى
ابو نايف بغضب : لا اسمع لكم نفس ..ولف عليه : وين يافع!!
جابر : مدري طلع ولحقوه عياله
نياف جاء بسيارته : اركب يبه اركب
ركب ابو نايف قدام وجابر ورا ..
ابو نايف : رح للبيت
دخل البيت بسرعه وجلس واهو يفك ياقه ثوبه ووجه صار اصفر من هالخبر ..ناظر للسماء و بأعلى صوته : سامحني يا سليمان سامحني
ام نايف ووضحى جو يركضون ..ام نايف مستغربه : وش فيك؟؟
ابو نايف مكمل : خلوني اظلمك خلوني اعاديك سامحني يا خوي سامحني ، سامحني يا صديق دنيتي ، سامحني اني ماكنت لك خير صديق سامحني يابوي سامحني
وضحى غطت فمها بيدها ودمعت من منظر ابوها الي ماعمره شافته منهار كذا ، حتى لما خسر مبالغ ومشاريعه بدت تنهار كان واقف وصلب بمكانه ..جابر جلس جنب ابوه يهديه لا يصير فيه شي ..
ام نايف جلست : نياف تكفى علمني وش صاير!
نياف جلس وعلم امه بكل شي ، وابو نايف بكى بقلة حيله وتكلم : من مات مازرت قبره ولا عمري ترحمت عليه حسيت بالغدر منه و انه طعني بظهري اثري انا الي غدرت فيه وطعنته بظهره
وضحى حضنت ابوها وبكت : يبه تكفى خلاص ارحم نفسك
ابو نايف و دموعه على خده : كيف تبيني ارحم نفسي وانا ما رحمت حتى بناته اليتيمات؟
وضحى تركته ودخلت الغرفة تبكي على حال ابوها ..كانت دايم تشوف ابوها غلطان بحق بنات سليمان و مبالغته بمشاكله معهم بس هالمره لأول مره ترحمه ويحن قلبها عليه
-
ببيت ابو زايد ، بعد ما ثامر علمهم..
جت جميلة تعطيه المويا : يبه سم اشرب
ابو زايد ابعد يدها عنه : وخريه عن وجهي
ام زايد : يا يافع مايصير الي تسويه! اشرب بل ريقك شوي
ابو زايد بهدوء لزايد : قم ودني للمقبره
زايد : يبه خلها بعدين ارتاح
ابو زايد وقف : قلت لك انهض وعجل علي
زايد وقف : ابشر
طلع اهو وابوه ..ووقفت ام زايد لصقر : تكفى رح معهم وانتبه لأبوك
صقر : ابشري يمه
لحقهم وركبوا وتوجهوا للمقبره ، بالنسبه لأبو زايد هذي ثاني زيارة لقبر سليمان ..
ابو زايد انحنى للقبر ومسك ترابه بيده : نخيتك ياخوي سامحني
صقر حط يده على كتف ابوه وشد عليها ..
ابو زايد : جيتك بعد موتك بشهر وعاتبتك على فعل ماسويته واجيك هالمره ابيك تسامحني ..سامحني اني صدقت فيك
زايد : يبه ترحم عليه ترحم عليه
صقر قام وغطى وجهه بالشماغ يمسح دموعه ..
ابو زايد دمعت عيونه : ظلمناك وطلعنا احنا الي مو كفو ..ما اعطيناك فرصه تبرر ...عشر سنين ظالمينك ونصها وانت بقبرك سامحني يا ابو وريف سامحني
زايد حضن ابوه : خف على نفسك
ابو زايد بهدوء وعيونه تذرف دموع : اتذكره بيوم قالي " يا يافع لو الف الدنيا و ادور ما القى مثل خوتك" بس اني ماطلعت كفو وقد كلامي له ماوقفت معه يوم الكل ضده صدقت فيه يا زايد صدقت فيه
زايد سكت واهو يسمع ابوه يتكلم ويفضفض..
وام زايد بكت وجميلة تحضنها تهديها : لا حول ولا قوة الا بالله
ام زايد : خايفه لا يصير فيه شي
جميلة : بيجون الحين طولي بالك
بعد هالأحداث المليئة بالحزن لأبو زايد و ابو نايف بالذات ..
بعد ساعة دخل ابو زايد بهدوء : رايح انام
زايد أشر لأمه بـ خليه خليه
دخل الغرفة وسكر عليه الباب ..
عند ابو نايف ..الي كانت حالته كسيفه اكثر من او زايد وعياله فوق راسه ..
ابو نايف بهدوء : جب بناته عندي
ام نايف : وش بتسوي؟
ابو نايف : بيني وبينهم حكي
جابر : خلها بكره يابوي ..ريح لك شي
ابو نايف وقف بصعوبه واهو يرتكز على عصاته وراح لغرفته : لا احد يجيني ابي اكون لحالي
نياف : ابشر
-
انطوت هالليلة مثل غيمة ظلام مرت فوق ابو نايف و ابو زايد ..
اصبحوا وكان الجو ماهو مثل عادته فيه حياة ، البيوت هاديه على غير عادتها حتى بثارة ثامر ببيت ابو زايد ماكان له حس..
جميلة تقطع الهدوء الي حاصل : يمه العصر ترا بيجيني بدر
ام زايد : ان شاء الله
جميلة : والله ماودي اخليك لحالك بذا الحاله و..
ام زايد : لا يمك روحي لرجلك طولتي عليه مايصير كذا
جميلة تنهدت : ان شاء الله
ابو زايد وقف : تعالوا لعمكم
ام زايد : بجي معكم
تجهزوا كلهم حتى حليمه و عيالها وطلعوا لبيت عمهم ابو نايف الي كان مستعد لجيتهم..
سلموا على بعض و بهدوء تكلم ابو نايف : من يجيب بناته؟
صقر : انا بجيبهم
ام نايف : ماراح يجون ..خل وضحى تكلمهم يجون
ابو نايف لوضحى : فزي كلميهم
وضحى لجميلة : نسيت رقمهم
جميلة ملتها الرقم ..وثواني ردت عليها ليلى ..
ليلى : هلا ؟
وضحى وعيونها على اهلها الي كانوا يناظرونها : هلا ليلى وش اخبارك؟
ليلى : بخير يا روحي وانتي؟
وضحى بكذب : تعبانه انا شوي و ودي تجيني انتي وخواتك كلهم ينفع؟
ليلى استغربت : ليه وش فيك!
وضحى : محد عندي بالبيت وتعبانه تعالوا
ليلى : الحين؟
وضحى : اي انتظركم ، لا تتأخرون
سكرت بدون لا تنتظر ردها ..ليلى دخلت عن خواتها واهي مستغربه
تسندت على الباب وتلعب بخصل شعرها : بنات وضحى متصله تقول تعبانه ومحد عندي تعالوا لي
وريف : ياعمري شكله من الجو تعبت
وجود : ليه وين اهلها يروحون يخلونها!
ليلى : تلقين العيال طالعين وامها مسيره على احد
وريف : خلاص نروح لها
سُلاف : ببيت ابو نايف؟
وريف : ايوا؟
سُلاف : روحوا انتم
التموا البنات عليها يقنعونها وبالزور رضت ..
سُلاف : انا بتطمن عليها وبطلع ترا ماعلي منكم
وريف : اهم شي تجين دامها نادتنا كلنا
تجهزوا البنات مستعدين لروحتهم لبيت ابو نايف ..بعد ربع ساعة وقفوا قبال الباب يطقونه و الناس تمر وتناظرهم ..
جودي : عمى يعميهم ويا عيونهم
سُلاف : بفقعها لهم ترا
ليلى استمرت تطق الباب وفتحت الباب لهم اول مادخلوا لقوا الكل موجودين ..ابو نايف وعياله و ابو زايد وعياله وام فرح وبنتها
ام زايد : السلام عليكم تعالوا اجلسوا
البنات يناظرون بعض وهم مستغربين : وعليكم السلام
سُلاف تقدمت عن البنات وناظرت لوضحى : وش السالفه؟
وريف مسكتها من يدها ورجعتها : اصبري نشوف وش عندهم
ليلى بهدوء : عسى خير ؟
ابو نايف وقف واهو ماسك عصاته وناظرهم كلهم ولأول مره يناظرهم بنظرة كسير ..
وجود همست : بنات خايفه
سُلاف مسكت يدها : احنا مع بعض لا تخافين
وريف بثقة : وش له الجمعه؟
وضحى : بنات طيب اجلسوا خلنا نتكلم
وريف : لا خلينا واقفين وقولوا وش عندكم
ليلى : شايفين بعد علينا شي؟
زايد : ماشفنا منكم الا كل خير
ابو زايد تقدم لهم : تعرفون ابو مصلح؟
وريف على طول جاوبت لأنها تتذكره شريك مع ابوها والأخوين خالد ويافع : اي اعرفه
ابو زايد : اليوم زرناه طريح
سُلاف : الله يشفيه بس وش دخلنا؟
ابو زايد حكى لهم كل شي و ابو نايف مازال واقف بعصاته يناظرهم و وجهه احمر ..
جودي جلست على اقرب كرسي ويدها على قلبها وبكت بقوه : الله لا يوفقه
وجود حضنتها وحطت وجها على كتفها وبكت معها ..وريف قربت لعندهم وبهدوء وبقوه ثابته لفت تناظرهم كلهم : توكم تصدقون ان صديق عمركم بريئ من هالتهم؟
ابو زايد نزل راسه ودمعته طاحت : قلبي محروق على اخوي الثاني
سُلاف صرخت واهي تبكي : لا تقول اخوي لا تقوللل!!!!!
صقر بعصبيه : سُلاف لا ترفعين صوتك على ابوي
سُلاف : ويوم انكم و وقفتوا بوجهه ابوي ماكان واقف معه الا بناته عزوته
ابو نايف واخيرًا قدر ينطق بعد ما بلع غصته عشان ماتبان بحكيه : وانا اعتذر منكم
ليلى تقدمت له وبعيون دامعه : وينكم يوم ابوي يبي وقفتكم معه؟ وينكم يوم ابوي طاح بكل قوته! وينكم يوم الكل يمشي ويتكلم فينا!
وضحى مسكت ليلى ورجعت على ورا : هدي
ليلى جلست جنب جودي وحضنتها وجودي للحين تبكي قهر على ابوها ..
وريف لازالت الثابته بينهم وتتكلم بهدوء : ابوي مات من حسرته من هالظلم عشر سنين واهو شايل هم ماهو همه عشر سنين واكثر اهل الديرة يتجنبونه حتى واهو بقبره ، خمس سنين عاشها بضيم وخمس سنين نام بضيمه بقبره ..وين كنتوا انتوا!
ابو زايد جلس وبكى و جميلة حضنته ..ام فرح تناظرهم وتبكي على هالجو السيئ الي داهمهم بعد فرحه كبيره وفرح تناظر مصدومه ..
ليلى وقفت واهي ترفع عبايتها : بنات يلا مشينا
فتحت الباب والبنات اتجهوا لها ..
ابو نايف بصوته العالي : اعتذر منكم للمره الثانية
وريف : خل الايام تبري جروحنا ياخالد موب سهل علينا نسامح الي ظلم ابوي و موته حسره
ابو نايف : لو ادري ان ماله ذنب والله ما يعيش يوم مهموم وانا خالد خوي عمره
سُلاف بحسره : يا حسايف الخوه الي اول ما انرفعت الأصابع تتهم سليمان آل.. وقفتوا ضده
طلعوا وسكروا الباب تحت انظار الكل ..
صقر تنهد ونزل راسه بضيق وناظر جابر الي كانت عيونه على دموع ليلى وحسرتها على ابوها وكيف تداري خواتها ..مشى لناحيته ..
صقر بهدوء : ريح
جابر بكسرة خاطر : من بعد الي صار ما ظنتي بتوافق
صقر يربت على اكتافه : بتوافق بتوافق لا تشيل هم
ام فرح : اجلسوا لا توقفون كذا فوق روسنا
جلسوا كلهم حول بعض والسكوت سيد الموقف ..و الغصه بقلوبهم -
عند حليمه ونايف ..توهم راجعين للفندق ..
نايف انسدح واهو ضايقه فيه الدنيا بعد ماعرف الي صار ..
حليمه جلست جنبه : نايف خلنا نروح لهم
نايف : الوقت متأخر بكره نروح نسلم عليهم ونسافر
حليمه بصدمه : كيف بنسافر وصايره هالمشكلة ؟
نايف : خلينا نسافر ونبعد عن هالجو
حليمه بتردد : بس امي وابوي خ..
نايف بعصبيه : قلت بنسافر يعني بنسافر!
حليمه خنقتها العبره : وانا وش دخلني تصارخ علي!
قامت من عنده بسرعه وطلعت وسكرت الباب بقوه جلست بالصاله ودموعها بعينها وتكلم نفسها : لا تبكين لا تبكين بلا دلع
ثواني بس وطلع لها وجلس جنبها : اسف ماحسيت على نفسي
حليمه ساكته ومتكتفه ..وكمل نايف حكيه : لو جلسنا زياده نفسيتنا بتتغير من الجو الي حاصل وانا ما ودي بيني وبينك حساسيات
حليمه لفت عليه والدموع بعيونها : يعني تبينا ننحاش ونخليهم؟
نايف : مو ننحاش بس تقدرين تقولين نبعد عنهم ونعيش انا وياك بعالمنا
حليمه عقدت حواجبها مستغربه : مافهمت وش تقصد
حط يده على دقنها واهو يناظر شفايفها وهمس : بتفهمين الحين
قامت حليمه على طول واهي تنفض لبسها : بروح انام
لحقها للغرفه ومسكها من زندها : مو شايفتني زوج ؟
حليمه واهي تسحب يدها منه : ماله دخل بس عطني فرصه اتعود عليك
نايف ابعد عنها واهو يمسح وجها وانسدح على بطنه : طفي النوم وسكري الباب
سوت الي قالته وانسدحت جنبه وحسته نام وبقت اهي تفكر بألي سوته اهو صح ولا خطأ ؟ ..مو قادره تتقبل انه يقرب منها بهالسرعة تبغى وقت وبالنفس الوقت خايفه انه يمل منها ومن حياها الزايد..
-
عند البنات بالبيت ..اول ماوصلوا
جودي للحين تبكي بحرقه وجود تهديها : الله حسيبهم كانوا اذوه بحياته و اتعبوه
جلست تضرب وجها واهي تبكي : الله ياخذهم الله ياخذهم
ليلى ركضت لها تمسك يدها بقوه : مايجوز مايجوز لا تسوين كذا
وريف قامت غسلت وجها وطول الوقت تستغفر وتحاول تتمالك نفسها وتردد : خلاص بكيتي كثير ياوريف خلاص
وجود حضنت جودي بقوه واهي تسمي وتقرا عليها ..بينما سُلاف راحت لغرفتها وجلست ترسم كعادتها لتفريغ شعورها ..
ليلى وقفت واهي تتخصر وتتعوذ من الشيطان ..سمعت صوت الباب يطق وقامت على طول ..
ليلى : مين؟
نياف : نياف
ليلى استغربت : وش تبي؟
نياف تردد الف مره بجيته والحين جمد ماعرف يتكلم : اء كيف حالكم؟
ليلى : ماشي الحال ..بغيت شي؟
نياف : جودي كيفها؟
ليلى ابتسمت واهي متضايقه بس ماتوقعت يجي يتطمن عليها : جودي للحين تبكي بس شوي وتهدا وتصير كويسه
نياف : بالله؟
ليلى : اي والله
نياف : يمدي اشوفها؟
ليلى بحزم : لا يا نياف ما ينفع
نياف : بكلمها بس شوي
ليلى : تعال وقت ثاني البنت الحين مالها خلق لأحد ابد
نياف تنهد : خلاص وصلي لها سلامي
ليلى : يوصل
سكرت الباب وركضت لداخل وشافت جودي منسدحه على رجل وجود ومستمره تقرا عليها و وريف منسدحه وتلعب بشعرها ..
ليلى : تبون تاكلون؟
وريف : ابي شاهي بس
وجود أشرت لها بـ لا واهي تقرا قرآن على جودي الي كانت مغمضه عينها ..ليلى توجهت لغرفة سُلاف وجلست جنبها واهي تشوف الأوراق مشققه و مستمره ترسم واهي ضاغطه القلم بقوه..
ليلى بهدوء : ماهو حل
سُلاف : وش الحل برأيك؟
ليلى سكتت شوي وبعدها قالت : تبين اسوي لك شي تاكلينه ولا تشربينه؟
سُلاف ناظرتها : البنات بياكلون؟
ليلى بكذب : ايه ، وش تبين اسوي؟
سُلاف : الي تبين
قامت ليلى متوجهه للمطبخ وناويه تغصبهم كلهم على الأكل لأن عارفه بيطول حالهم كذا اذا ما وحده منهم تحركت ..
-
بالقهوة ..
جابر جالس مع مصلح الي ماسك راسه ويناظر لتحت ..
جابر تنهد : لين متى يا مصلح
مصلح : ماهقيتها من ابوي
جابر : اهم شي عرف خطاه واعترف
مصلخ : لو ماتعب ماتكلم ..سود وجهي يا جابر
جابر تعدل بجلسته : تعوذ من الشيطان وريح
مصلح تسند واهو يتنهد ويبي يغير الموضوع : وش صار على البيت؟
جابر يسايره : لا وافقت ان شاء الله بنفرشه على ذوقها
مصلح : تهقى بتوافق بعد مادرت بالي حصل؟
جابر : والله ان يدي على قلبي انها ترفض
مصلح : الله يسهلها يارب
جابر : امين
جاء نياف جلس واهو يسلم عليهم وردوا السلام..
نياف بملل : الجو مشحون بشكل ماني طايق نفسي
جابر : وين كنت؟
نياف : احوس بالشوارع
جابر : والعيال وينهم؟
نياف : ماشفتهم بس اكيد انهم مع ابوهم
مصلح : وانتوا وش عندكم منتوا عند ابوكم؟
جابر ابتسم : ماتعرف ابوي غير عن عمي ابوي لا ضاق مايبي احد حوله عمي يافع الين منه وخل عياله حوله يغيرون جوه
مصلح بضيق على ابوه : الله يحسن الحال
الكل : امين
نياف ناظر جابر : نايف ما اتصل عليك؟
جابر هز راسه بـ لا
نياف وقف : اجل انا اترخص
مصلح : وين ماخلصت شاهيك!
نياف : لا ما ابيه يصحصحني بريح لي دام الدكان اليوم مسكرينه ..مع السلامة
الكل : مع السلامة
-
بالفندق عند حليمه ..جهزت اغراضها البسيطة الي اخذتها حقت يومين و بتكملها اذا رجعت للبيت عشان السفر..
نايف :خلصتي؟
حليمه واهي تسكر الشنطة : ايه
نايف : يلا الأكل
طلع وطلعت وراه وكان ياكل بهدوء من دون لا يناظرها ..
حليمه مستغربه : صاير شي جديد؟
نايف ناظرها ورجع ياكل ..
حليمه بتوتر : نايف اكلمك! ليش تتجاهلني ؟
نايف بنبرة قاسيه : وش تبين؟
حليمه رفعت حاجب : ليش تكلمني كذا؟
نايف : اهلك مافيهم الا كل خير واهلي بعد تطمني
حليمه تركت اكلها وتكتفت ولفت وجها ..ناظرها واهو ياكل..
نايف : الزعل موب نافعك كلي لا تدوخين علي
حليمه : شبعت الحمدلله
نايف وقف واهو يمسح يده : الحمدلله
لبس شماغه بيطلع و واضح عليه العصبيه ..
حليمه لحقته : وين بتروح؟ صاير شي صح ماتبي تقولي!
نايف بعصبيه : قلت لك مافيه شي بطلع اشم هوا
حليمه بزعل : وش فيك تكلمني كذا! ماني عدوتك انا
نايف زفر بقوه : منتي عدوتي بس زوجتي الي للحين ماشفت منك شي
حليمه اتسعت عيونها : انت تعاملني بهالأسلوب عشان هالموضوع؟
نايف لف بيطلع ومسكت ثوبه : لا تتجاهلني! ديني ودين الي يتجاهلوني يا نايف
نايف : ما ابي تعطيني شي منتي واثقه انك تبين اخذه ..اذا فكرتي زين نتكلم
حليمه تكتفت بزعل : وش تبيني اسوي يعني!
نايف رفع كتوفه : انتي ادرى
طلع وسكر الباب و حليمه ضربت الأرض برجلها بعصبيه وراحت تشيل الأكل ودخلت غرفتها انسدحت بالسرير بملل ..دخلت الحمام تتسبح تبي تسترخي شوي ورجعت تفتح شنطتها تاخذ لها لبس ..ولمحت الي اشترته لها جميلة ترددت مليون مره قبل تمسكه وتطلعه من الشنطه بس لاحظت انها من جت معه ماتلبس الا طويل و وسيع ..ركضت لعند باب الغرفة تقفله ولبسته وناظرت نفسها بالمرايا وابتسمت : حلو!
بثواني بس نفضت راسها وفصخته ورجعته للشنطة ولبست شي غيره وطلعت للصاله تقلب بالتلفزيون بملل ..
ربع ساعة الا واهو داخل وتعداها من دون لا يناظرها حتى ..
لحقته : وين رحت؟
نايف واهو يطلع له ملابس من دون لا يناظرها : اتمشى
حليمه بملل : وخليتني لحالي طفشانه!
نايف ببرود : بكره بنمشي وبتشوفين اهلك و البنات وبيتغير مزاجك
دخل الحمام وسكر الباب واهي لازالت تناظر الباب مستغربه من تعامله هذا معها ..
جلست على السرير..توجهت لشنطتها وبدلت ملابسها وبعدها توجهت للتسريحه تعدل نفسها وجلست على الكرسي واهي تحس اطرافها نملت وبردت من تخيل ردة فعله ، خمس دقايق وطلع ووقفت بسرعه تناظره واهي تلعب بأصابعها ..كان يمسح شعره بالفوطه ووقف واهو يناظرها من فوق لتحت متعجب..
قربت منه والزعل مالي ملامحها : ذا الي بيخليك ترضى يعني؟
نايف ابتسم لها وهز بـ ايه
حليمه نزلت راسها بخجل ممزوج بمشاعر زعل ماتدري ليه
نايف بهدوء رفع راسها : قلت لك لا تعطيني شي منتي متأكده انك تبيني اخذه
حليمه لا شعوريًا منها وبجراءة باسته : راضيه
حضنها بقوه و اهو يبتسم ورفعت يدها على كتوفه تحضنه
-
الساعة ٧ الليل ببيت ابو زايد ..
بالملحق الي تواجد فيه ابو زايد و ابو نايف ، ورجع شعور الحنين للغناء لأبو نايف مره ثانيه بعد انقطاع طويل بفترة شبابه كان يحب يجلس بين الكل ويطربهم ..
ابو زايد ابتسم والضيق باين بوجهه : كأنك بديت تدندن؟
ابو نايف يهز راسه بـ ايه
ابو زايد تسند وقال : اجل سمعنا وش عندك
ابو نايف : موب رايق
ابو زايد الي كان يعرف اخوه زين : من متى تغني وانت رايق؟
ابو نايف بدأ يتنحنح و قال :