بعدك يابوي اصبحت دنياي عرجاء بلا عكاز

5

عند البنات ..
ليلى منسدحه و شاده اللحاف عليها : سكري الباب
وجود : خلاص قومي تستهبلين الساعة ١٠
ليلى بتعب : جسمي متكسر
قربت منها واهي تتحسس وجها : حرارتك مرتفعه
ليلى : مدري
وجود : انا اعلمك ما اسألك
اصبري اسوي لك شي تاكلينه واعطيك دواء ..طلعت وتوجهت للمطبخ وشافت سُلاف تغسل المواعين ..
وجود : صبح صبح
سُلاف ابتسمت : نمت نومه ماحسيت على نفسي الا صاحيه قبل نص ساعة
وجود : افطرتي؟
سُلاف : ما اشتهيت الحين ..لمين تسوين؟
وجود : ليلى
قامت تصلح الأكل و غناء سُلاف مملي المكان بصوتها العذب ..قاطعتها وجود واهي تسألها : وين خافظ الحرارة؟
سُلاف تأشر : تلقينه بالثلاجة
وجود :مالقيته
سُلاف واهي تغسل يدها من الصابون : اصبري
توجهت للثلاجة واهي تدوره : شكله خلص
وجود : مو وقته ليلى حرارتها مرتفعه
سُلاف : جد؟
طلعوا من المطبخ لغرفة ليلى ودخلوا عليها زي ماكانت لما تركتها وجود ..
سُلاف قربت منها واهي تسمي عليها عشان ماترتعب حطت يدها على جبينها ولفت لوجود : اي والله حاره ..ببدل بروح لأبو صالح
وجود بخوف : لا لا تروحين
سُلاف : ليه؟
وجود : جودي او وريف يروحون احسن
سُلاف تخصرت : شكلك خايفه من صقير وبعدين لا تخافين مايقدر يسوي شي بس كلام
مشت وتركتها راحت تبدل ملابسها و لبست عبايتها : يلا انا طالعه
وجود : لا تتأخرين
طلعت واهي تناظر الأطفال : رفدانوه تعال تعال
رفدان : وشو
سُلاف : صقر ولد يافع وينه؟
رفدان واهو يرفع كتوفه : ما شفته
سُلاف : اذا شفته قل له ( يا ابو راس ) قول الي تقول هالكلام عنك وحده بنت بس انتببببه انتبه تقول انه انا
رفدان ابعد عنها وضحك : خير
سُلاف مسكت كتفه تقربه منها : والله اني صادقه قول له اذا شفته مو تنساني ..وبرجع لك بعدين اسألك عن وش سوا
رفدان : طيب بس عطيني فلوس
سُلاف دفته بخفه من كتفه : اقول امش بس انا زين معي حق الدواء
مشت بخطوات شبه سريعه لدكان ابو صالح : ابو صالح
طلع لها صالح : امري اختي؟
سُلاف : وين ابو صالح؟
صالح : مشغول وانا ولده ماسك الدكان وش بغيتي؟
سُلاف حطت يد على يد واهي تعلك : ايـه ..ايوا ابي خافظ حرارة
صالح : مشروب ولا حبة؟
سُلاف : الي مفعوله زين عطني اياه
دخل صالح وجابه لها : تفضلي
حاسبت عليه واهي ماشيه واعطت رفدان نظره واهي تأشر له بمعنى (ياويلك اذا نسيت)
رجعت للبيت وعلى وجها ابتسامة ماتدري لأيش بالضبط يا انها بترفع ضغطه ولا عشان تشوف ردة فعله بعد الي بيقوله رفدان له..
-
ببيت ابو زايد ..
جميلة لسلوى : لا تحوسين يا ماما ماعادك صغيره
سلوى : ابوي متى يجي؟ طفشت من هالطين
ام زايد ضحكت : ايا المدلعه يا بنت بيوت البلك
جميلة : ماعرفت لها ذا البنت واحنا هناك تهوجس فيكم ويوم جينا بغت الدمام
ام زايد : خليها على راحتها
جميلة : وين حليمه؟
ام زايد : من كلمها ابو عن سالم واهي متكدره مدري وش عندها
جميلة بمزح : شكل ببالها واحد غيره
ام زايد ضربتها : اسكتي لحد يسمعك
جميلة : خلاص سكتنا سكتنا
دخل ناصر : بطلع العب مع عيال الحارة
جميلة بخوف : لا ولا تعتب الباب
ام زايد : يمه الله يهديك خليه ترا ماعليه خوف مثل شوارع الدمام
جميلة : حتى ولو يمه بقعد على اعصابي
ام زايد تنهدت : الله يهديك
ناصر رفس المركى وطلع ..وجميلة صرخت : ولعنه ياولد
شفتي قليل الحياء؟
ام زايد : خليه يستانس لا تحكرينه بالبيت
جميلة : عناد فيه ماراح يطلع عشان يتأدب مره ثانيه
سلوى : ماما شوفي وش سويت
تقدمت لها جميلة واهي تلاطفها بالكلام وتلعب معها تحت نظر ام زايد الي مبتسمه لأحفادها ..دخل ثامر وبيده اغراض من السوق
ثامر واهو يحطها بالأرض : والملك وصل و جاب الفريسه
ام زايد : كثر الله خير يالملك بس ودها المطبخ
شالها من على الأرض : والملك الحين بيوديها للمطبخ
جميلة ناظرت فيه وبعدها لفت لأمها : وش فيه مو صاحي؟
ام زايد الي ضحكت بقوه : ماتعرفين خباله
طلع ثامر و قابل صقر : هلا بالامير
صقر : هلا فيك ..وش هالروقان؟
ثامر : ابد حبيت اصير ايجابي هاليومين
صقر : يعني النكد مانفع معك؟
ثامر :لا والله وجع راس
صقر يربت على كتفه : استمر استمر
طلع لغرفته واهو يفتح الدريشة ، صار روتين عنده يفتح يحاول يلمحها بس لعل انتظاره طال بس فز لما شافها تفتح باب البيت بتدخل ..صار عارفها ويميزها بطريقة مسكتها للعبايه ولثمتها و طولها ومشيتها تنهد واهو يقول : اخ يا بنت سليمان اخ
شافها دخلت واختفت عن نظره سكر دريشته وفي قلبه براكين غضب حاول يكبتها ويعدي الموقف الي حصل ويخلي الغلط عليه اهو لأنه تكلم فيهم وطبيعي ماراح ترضى بس كان كل دقيقة بالنسبه له يحس هالغضب يتجدد ويقوى يحسها اهانة رجولته بهالصفعه : اعوذ بالله منك يا بليس
-
ببيت ابو نايف ..
وقفت ام نايف بذهول وغضب : ماتدخل بيتي وحده من بنات هالحرامي
ابو نايف وقف وبغضب اقوى منها : كلمتي اهي الي تمشي هنا ماهم كلمتك
ام نايف : والي بتزوجه يكون ولدي الي تعبت عليه الي ابي افرح بعرسه من وحده تسوى و..
قاطعها ابو نايف بصراخ : اســكـتـي!
كل هالموقف حصل تحت انظار ..نايف و جابر و وضحى و نياف ومذهولين ومنصدمين من كلام ابوهم لهم ..
وقف نياف واهو يمسك امه : اجلسي هدي شوي
ام نايف سكتت والعبره خانقتها جلست تناظر فيه بحقد وغضب ..تجاهل نظراتها الحارقه ابو نايف وكمل كلامه ..
ابو نايف أشر لنايف : البنت الكبيرة مطلقه ولاني براضي تاخذها ، بتاخذ الي بعدها ..لــيلـى
نزلت على مسامع جابر مثل الصاعقه ..ليلى؟ ليش ليلى بالذات؟
نايف بهدوء رغم العاصفه الي بداخله : بس يابوي لا تبلشني بالبنت انا ما ابيها
ابو نايف : كلامي اهو الي يتنفذ انا قاعد امركم ما استأذنكم
نايف بلع ريقه وماسك عصبيته : تبيني اتزوج ، تم بس مو من بنات سليمان
ابو نايف : بتتزوج وغصبًا علي..
جابر وقف واهو يقاطع ابوه : انا يابوي بتزوجها
ام نايف حطت يدها على فمها وبكت بصوت غير مسموع
ابو نايف ناظره مستغرب : انا قلت نايف
جابر بثقه وخلفها توتر من رفض ابوه : ونايف ما في باله العرس ، وانا مستعد اتزوج ليلى
ابو نايف وقف ثواني يتأمله : تفزع لأخوك يعني؟
جابر نزل عيونه للأرض وماكان عنده رد ..
ابو نايف تنهد ولف لأم نايف : بكره تروحين تخطبينها
جابر بتوتر : لمين؟
ابو نايف ناظره وتكلم بصرامه : لـك
طلع ولا انتظر رد واحد فيهم ..لف جابر وجهه وتنهد براحة بس من غير شعور جته ضيقه تداهم قلبه ماكان يفكر بالزواج ولا حتى بليلى ليش فجأه ما ارتاح لفكرة انها ممكن تكون زوجة اخوه؟ ليش فز قلبه؟
نايف ربت على كتفه : ماكنت مجبور ياخوك تحط نفسك بذا الموقف
جابر لف عليه وبهدوء عكس الي بداخله: انا راضي
طلع وتركهم وكانت ام نايف تبكي ونياف يواسيها ، اما وضحى الي كانت شايفه وسامعه كل شي ومنصدمه وماعندها اي تعليق بألي حصل ..
-
ببيت البنات ..
دخلت جودي تتطمن على ليلى : اشوا الحين كأنك احسن
ليلى ابتسمت : الحمدلله
جودي : فيك حيل تطلعين معنا للحوش؟
ليلى قامت بكسل ماكان فيها حيل بس ملت من الغرفة : يلا
طلعت مع جودي وجتهم وريف بالشاهي : يالبيه يالوجه السموح الي طل علينا
ليلى ابتسمت بخجل ..وتكلمت جودي : شكرًا من ذوقك
وريف : اقصد ليلى ما اقصدك
ليلى ضحكت بقوه ومسكت بطنها الي اوجعها فجأه : آه!
وريف : بسم الله عليك انسدحي
جودي : بنادي الباقين..
راحت جودي وبقت وريف الي حطت تحت راس ليلى مخده ولحفتها : كذا اريح لك
ليلى : مشكوره حبيبتي
جو البنات وقعدوا وكل وحده تتهاوش مع الثانية الا ليلى الي كانت منسدحه وتناظرهم ومبتسمه بتعب..
ليلى : شكلي بموت
شهقوا البنات بخوف من كلمتها المفاجئة..
سُلاف : بعيد الشر بسم الله على قلبك
جودي : يا حيوانه عمى لا تقولين كذا
وجود : شكل ارتفعت حرارتها
وريف : اي والله شكلها طقت مليون
ضحكت ليلى وتكلمت بهدوء : مدري حسيت
وجود : اعوذ بالله من فالك اسكتي
ليلى : على خشمي
وريف تبي تضيع الموضوع : بالله ما اشتقتوا لحليمه ووضحى وفرح؟
جودي و وجود : الا والله
وريف : اعزمهم؟
جودي : وضحى استحاله بس ممكن حليمه و وفرح
وجود : اعزمي واذا جو زين
كانوا يتكلمون تحت انظار سُلاف الي تشرب الشاهي وساكته ولا تكلمت ..مرتاحه انو خواتها ماعاد يروحون لبيت ابو زايد وماتهتم اذا جو بناتهم عندهم اهم شي ما يروحون..
-
ببيت ابو زايد ..
ام فرح واهي تحط بيالتها بالأرض : الله يستر من خالد مدري وش يفكر فيه
ام زايد : اي والله كلنا مستغربين
فرح : اذا بيت ماخلاهم يدخلونه كيف كذا بيزوجها ولده
ام زايد : الله يستر بس..ماودي بالمشاكل ابد ابو زايد خلقه تعبان
ام فرح : خلنا نتفائل خير لعل هالعرس فاتحة خير على العايلتين
ام زايد : ياليت
فرح : خالتي وين حليمه وجميلة؟ تأخروا
ام زايد : بيجون يمك بيجون تلقينهم بالطريق
دخل زايد واهو يتنحنح ، تكلمت امه بعد ماشافت فرح تغطت : ادخل
دخل وسلم على امه و عمته : وش اخبارك يا عمه؟
ام فرح : بخير جعلك بخير ..وش عندك قاطعنا؟
زايد : والله مشغول اعذريني
ام فرح : لو عندك زوجه قلنا بس عزابي ماوراك الا شغل الدكان وانا عمتك
ابتسم ونزل راسه بالأرض واهو عارف انها تلمح يتزوج فرح ..بينما فرح الي كانت برضو فاهمه عبست بقوه واهي تعض شفايفها بحرج من حركة امها وهمست بنفسها : دايم تفشليني
قطعت ام زايد الصمت الي عم ثواني عليهم واهي تبتسم : بيتزوج بيتزوج ان شاء الله و افرح فيه
زايد : ان شاء الله ..توصون على شي؟
ام فرح : سلامتك
ام زايد : خواتك ماجو؟
زايد : لا ماشفتهم تلقين ثامر الحين حايسهم حوس
ضحكت فرح واهي تتخيل شكل ثامر واهو يحارشهم بعبايتهم لأن هذي حركاته
ام فرح استغربت : علامك تضحكين مثل المجنونه؟
ضحكت زيادة فرح من غير شعور : ولا شي
ام زايد ضحكت من ضحك فرح : خليها تضحك
وزايد شبك معهم وضحك على خفيف من ضحكهم : يلا انا طالع
ام زايد : تعال قبل تطلع وانا امك مد لي ذي من فوق
قرب للدلال المصفوفه فوق واهو ينزلها لأمه..بينما
ام فرح ضربتها وهمست لها : اثقلي عنده خله يلتفت لك مو تكركرين كذا كأنك مرجوجه
فرح بهمس : يوه يمه ما ابيه ولا يبيني مو غصب وبعدين خليني اضحك على كيفي
ام فرح : خبله ماتعرفين مصلحة نفسك
فرح : اي خبله
طلع زايد بعد ما اعطى امه الي تبيه ..ورجعوا يكملون سوالف وفرح بانتظار جميلة وعيالها من زمان ماشافتهم..
-
بالصباح عند بيت ابو نايف ..
الجو كان كئيب على ام نايف و مريب لجابر و ترقب على ابو نايف و استغراب لنايف ووضحى ونياف..
جلست وضحى واهي تحط اخر طبق : يلا سموا
كان الوضع هادي ومتوتر بينهم وكل واحد سرحان بشي..
نياف تنحنح يبي ينعش الجو : الا يبه وش صار على طلعة البر؟
ابو نايف بهدوء : كل شي بوقته زين ، كل
نياف نزل راسه : ابشر
نايف : انا اليوم بطلع للمزرعه اشيك عليها تبي شي منها؟
ابو نايف : وصهم على التمر يعزلونه زين
نايف : ابشر
ابو نايف لأم نايف : العصر ان شاء الله نروح لبيت سليمان
ام نايف بغصه : ان شاء الله
جابر رفع راسه واهو يتأمل تعابير امه الحزينه ، كانت دايم تخطط لحياة عيالها الزوجيه وترسمها بسعادة مع الزوجات الي قلبها يختارهم ولكن حصل العكس الحين ..نزل راسه واهو متوتر انه اخطأ بالقرار بس حتى ولو فيه شي اقوى واكبر من انه يرضى ان ليلى لنايف..
وضحى : طيب واذا ما وافقوا؟
ابو نايف ضحك باستهزاء : ما ظنتي
وضحى مستغربه : احس بوضعهم يعني اول فكرة تطري على البال انهم بيرفضون
ابو نايف رجع لهدوئه : ماراح يرفضون
نايف غمز لوضحى تسكت لا يهاوشها ابوها : على خير ان شاء الله
نياف قام : بروح مع ثامر توصون على شي؟
كلهم : سلامتك
قامت وضحى للمطبخ ولحقها جابر : ليلى درت اني بخطبها؟
وضحى : مدري ما اكلمهم انا
جاء بيطلع ووقفته وضحى ..
وضحى مسكت ثوبه : وقف
عقد حواجبه : وشو؟
وضحى : لو رفضت وش بتسوي؟
جابر : ولا شي خلاص بكيفها
وضحى بتوتر وهمست : واذا ابوي اصر وحصل هالزواج غصب؟
جابر : اتزوجها وانتهينا
وضحى خنقتها العبره وفكت ثوبه ونزلت عيونها للأرض ..
جابر استغرب منها : وش فيك؟
وضحى : خايفه
جابر جلسها على الكرسي وجلس قبالها : من ايش؟
وضحى : جابر تكفى اذا تزوجتها خاف الله فيها بنت الناس طيبه وماعمري شفت منها شي وانا حاسه سالفة ابوي يزوجك منهم فيها نية شر وانا خايفه عليها ..
قربت منه واهي تمسك يده وعيونها امتلت دموع : تكفى صون بنت الناس ولا تسمح لأبوي ولا امي يضرونها تكفى
جابر فك ياقة ثوبه وتنفس بقوه ولف وجهه : الله يكتب الي فيه الخير
طلع ودخل غرفته على طول وجلس واهو ماسك شعره ..كأنه وعى ان نية ابوه ماهي سليمه لليلى واكيد جابر بيمر بفترات سيئة بهالزواجه واهو الوحيد من بين الكل الي كان يبتعد عن المشاكل العائلتين ويتجاهل كثير ..تنهد بقوه : وش حطيت نفسي فيه !
وقف واهو يضرب الارض برجله : لا حول ولا قوة الا بالله
-
عند البنات ..العصر
وريف تضرب جودي برجلها : افتحي الباب يالعجازه
جودي منسدحه تحت رجل وريف : لا ترجفين قومي انتي
وريف صرخت : وحــده تـفتـح البـاب يابـنات
طلعت وجود من المطبخ واهي تناظرهم : اكيد انا الي بفتح بواب البيت مو وجود
وقفت عند الباب : مين؟
سكوت ثواني ..ورجعت تسأل بصوت اعلى : ميـن؟
ام نايف : احم ..ام ام نايف افتحي
وجود ابعدت عن الباب وعيونها طلعت لبرا من الصدمه مسكت قلبها وركضت لداخل : بـــنـــات
جوها يركضون مرتعبين ، جت ليلى واهي يالله تشيل نفسها : كم مرن نقولك لا تصرخين كذا!
وجود واهي تحاول تاخذ نفس والباب للآن صوته يطق ..
وريف بسرعه : مافتحتي الباب ليه؟
سُلاف مشت بتفتحه وصرخت وجود : لا لا
جودي بخوف : تكلمي مين!!!!
ليلى واقفه وماسكه بطنها بألم ..تكلمت وجود بعد ماتعلثمت بالكلام واجد..
وجود : ام نايف ام نايف
شهقوا البنات برعب ..مايتقابلون مع هالأنسانه الا مسويه لهم سالفه ومايسلمون من لسانها ..
وريف منصعقه : وش تبي؟
سُلاف واهي تشمر اكمام قميصها : جت للي يعرف لها
جودي مسكت قميص سُلاف من ورا : تكفين لا خلنا نشوف وش تبي
وريف راحت وركضوا البنات وراها :
فتحت الباب واهي حاطه اللثمه عليها وطلت من الباب : وش بغيتي؟
ام نايف : فيه موضوع بيني وبينكم
وريف : مابينا مواضيع ، الله يستر عليك روحي
جت بتسكر الباب ولا قدرت استغربت وناظرت لتحت لقت عصى بين الباب عشان ما يتسكر ..
ابو نايف : قالـت لك في موضوع بينكم ، افتحي يا مره
سُلاف بغضب قربت للباب : واحنا قلنا مابينا كلام
طلعت يدها وشالت عصاه من الباب وسكرت الباب بقوه ..انصدم ابو نايف من فعلها وناظر ام نايف الي كانت اقوى منه صدمه من جراءة سُلاف ..
ابو نايف بصوت مسموع للبنات : افتحوا الباب يابنات سليمان ، اذا تبون تعرفون سوالف ابوكم
ركضت جودي من سمعت طاري ابوها ومسكتها سُلاف وناظرتها بعيون حاقده : لا تفتحين اذا انتي بنت ابوك
تراجعت لورا خطوتين وناظرت ليلى الي كانت تبكي بصمت من ألم بطنها و خوف من ام وابو نايف الي جيتهم ماتبشر بالخير
ردت عليه وجود بصوت مهزوز يتصنع الثقه : كمل دربك الله يستر عليك وخلنا فحالنا..
دخلوا البنات واهم ماسكين ليلى الي كانت شبه منهاره من تعبها ..
سُلاف : لازم تروح المستشفى
وريف : يلا قومي انا وياك نوديها
جودي و وجود : بـنـروح
وريف ناظرت فيهم واهي ماتبيهم لحالهم بالبيت بعد جيت ام وابو نايف : يلا تعالوا
كل وحده توجهت تلبس عبايتها وجابوا عباية ليلى ولبسوها ..
سُلاف : البنت وجها اصفر لا تغطينها خليها تتنفس
جودي و وريف واهو يشيلونها : يلا
ركضت وجود واهي تفتح الباب لهم عشان يطلعونها ..
-
عند ابو نايف وام نايف بعد ما مشوا خطوتين عن بيت بنات سليمان ..
ابو نايف بغضب : سود الله وجيهم
ام نايف خانقتها العبره : قلت لك مامنهم رجا شوف كيف هانوا كرامتنا عند عتبة بيتهم هذا الي تبيه
ابو نايف : اقصري صوتك عند العربان لا اقص لسانك
جاء جابر مستغرب وقفتهم : وش تسوون هنا؟
ابو نايف : انت الي وش تسوي هِنا؟
جابر بتوتر : اء ..ج ، جيت مريت من هنا ولقيتكم واقفين ليش مادخلتوا البيت؟
ام نايف واهي عارفه انه كذاب : ما استقبلونا وانا امك
جابر دخل يدينه بثوبه : وليش ان شاء الله؟
ماكمل كلامه الي قاطعه صوت باب بيت سليمان انفتح بقوه و اصواتهم تختلط ببعض ..
لفوا عليهم مستغربين الي شايلينها بيدهم وكأنها جثه ،
جودي التفت رجولها بحجره وطاحت واهي تصيح بألم وماسكه ليلى عشان ماتطيح منها : يـالله لا!
سُلاف وخرتها : وخري وخري
عند جابر وامه و ابوه الي كانوا يناظرون الي صاير ومستغربين..
ابو نايف سرع خطواته لمهم : وش صاير؟
سُلاف ناظرته تحت لثمتها وتكلمت بنبرة قوية : وخر عن الدرب البنت تعبانه
ليلى الي كانت بحالة اغماء بس صحت على صوت سُلاف الصارم مع ابو نايف بكت خوف انه تصير مشكلة ..
وريف بخوف : وش يوجعك؟
وجود رفعت صوتها : وخروا عن الطريق خلونا نمشي
ام نايف بخوف : جابر شلها شلها لا تطيح منهم
جابر توتر وابتعد خطوتين : لا مستحيل
ابو نايف عرف ان الي تعبانه ليلى وعشان ينفذ الي يبيه صرخ والتفت لجابر : شـلـها للمستشفى بسرعه
انصدم جابر وانصدموا البنات ..وتكلمت وجود : لا لا مايلمسها ابعدوا
وريف انهارت قوتها : شيلها
التفتوا البنات عليها بصدمه وتكلمت بنبرة بكى : لا نأذيها اكثر من ماهي تعبانه ، مانقواها
قرب جابر ويدينه ترتجف تحت اصرار ابوه : شـلها اقول
اخذها بين يدينه واهو يرفعها ، طاح راسها على صدره ولا شعوريًا ناظر ملامحها ..هذي ليلى؟ اي والله ماغيرها
ركض بها للسيارة وركب ابو نايف معها و وريف و جودي لأن السيارة ماراح تكفيهم كلهم..
ام نايف توجهت لبيتها بسرعه بعد ما قال لها ابو نايف تروح للبيت وتاخذ سُلاف و وجود معها عشان يجيبهم نياف بالسيارة الثانية لأن البنات اصروا يروحون كلهم بس السياره ماكفتهم ..وقفت بنص الطريق و خافت ربي يعاقبها اكيد خايفين على اختهم لا يصير فيها شي ..رجعت لهم واهي تقول : تعالوا معي نروح بالسيارة الثانية
سُلاف من غير تفكير سحبت وجود معها الي كانت متوتره :تعالي
مشوا مسرعين خطواتهم لبيت ابو نايف ..
سُلاف وقفت لعند الباب : وين السيارة؟
ام نايف : ادخلي الين ما اكلم نياف
سُلاف : لا ابنتظر هنا
وجود : خلينا ندخل تكفين شوفي كيف يناظرونا
رفعت عيونها سُلاف للي كانوا يناظرون كل الي حصل وكأنها توها تستوعب ، مسكتها وجود ودخلتها وسكرت الباب ام نايف وتوجهت على طول للتليفون..
-
بالمستشفى ..
وريف بتوتر للدكتور : طمن يا دكتور وش فيها؟
الدكتور : تعرفينها؟
وريف و جودي : خواتها
الدكتور : كل شي سليم الحمدلله ..بس الواضح انها مرهقه جدًا كان مفروض من تعبت تجي لهنا
ابو نايف : يمدي ادخل لعندها؟
الدكتور : بصفتك وش؟
ابو نايف : ابو خطيبها
وقفت وريف واهي منصدمه : وشـو؟
الدكتور تنهد : تفضل بس لا تطول ، تحتاج ترتاح
التفت ابو نايف واهو يكلم جابر : خلك هنا لا تجي
مشت وريف لعنده واهي تقول : وش خطيبها؟
ابو نايف : نتفاهم بعدين يا بنت سليمان ..وخري عن طريقي
وقفت جودي قدام الباب : ماراح تدخل ..مشكورين ماقصرتوا وصلتونا لهنا والحين انتهى شغلكم
ابو نايف بهدوء : بدخل وتعالوا معي عندي كلام معكم
ابو نايف مد عصاه لجنب جودي واهو يبعدها عن طريقه ودخل واهو يتنحنح..
دخلت وريف واهي تغطي ليلى وتسمي عليها وهمست بأذنها : ابو نايف
فزت ليلى كأنها مقروصه ..وقعدت جنبها جودي : تفضل وش بغيت؟
ابو نايف : اول شي الحمدلله سلامتك يا ليلى
ليلى بهدوء وتعب : الله يسلمك
ابو نايف بكذب : ادري ماهو وقته بس ما خليتوا لنا خيار ، جيتكم اليوم بنفذ وصية ابوكم
التفتوا البنات على بعض بصدمه : وصيـة؟
ابو نايف : ابوكم كان صديق لي اكيد انكم عارفين وجرتنا الدنيا و تعدوينا ..وانا ماعاد بقى بالعمر شي وابي نبي نبدا صفحة جديدة..ابي ليلى زوجة لولدي جابر
فزت ليلى وطاحت اللثمه من وجها : مستحيل
ابو نايف وقف واهو يضرب العصى بالأرض ونزل عيونه : اذا كنتي تبين رضى ابوك بقبره وافقي ، بنجيك بعد يومين قدك تحسنتي ان شاء الله وفكرتي ، وان ما قبلتي ماخسرت شي سويت الي علي جيت انفذ وصية المرحوم ولكن لا تنسين انك الي رديتي هالوصية يلا استودعكم الله..طلع وسكر الباب و انتبه لجيت سُلاف و وجود الي تعدوه ودخلوا الغرفة ..
تنهد ابو نايف : امش يابوك
مشى جابر ورا ابوه وطلع معه متوجهين للبيت..
سُلاف خبطت يدها بقوه : كذاب كذاب مستحيل ابوي يقط وحده فينا هالقطه عليه كذاااببب
وجود : اش سُلاف لحد يسمعنا
وريف الي كانت تهدي ليلى من بكائها الصامت : قلت لكم احسني بموت اليوم .. هـذاني مت
جودي بكت وحضنتها : لا تكفين تكفين لا تقولين كذا الله يخليك
وريف غطت وجها ولفت عن ليلى ماتبي تشوف دموعها كذا..
وريف الي كانت تهدي ليلى من بكائها الصامت : قلت لكم احسني بموت اليوم .. هـذاني مت
جودي بكت وحضنتها : لا تكفين تكفين لا تقولين كذا الله يخليك
وريف غطت وجها ولفت عن ليلى ماتبي تشوف دموعها كذا..
وريف بحزم : ماراح توافقين يا ليلى ، ما ارميك بالنار وانا اختك
ليلى حضنتها براحة : خلوني بينكم ما ابيه يضرني
وجود مسحت على كتفها : مايضرك شي بأذن الله وخواتك حولك
جودي : وبعدين يا ليلى هدي بالأخير رأي لك انتي محد بيجبرك
ليلى مسحت دموعها وابتسمت بتسليك
-

ببيت ابو نايف ..وعائلة ابو زايد متواجدين
الرجال كلهم بالملحق .. و النسوان بملحق اخر
ام نايف بعد ماقالت لهم كل شي : وبس هذا الي حصل
وضحى : الله يستر عليها يارب
حليمه بخوف : لازم نتطمن عليها
وضحى ناظرتها بمعنى اقنعي امي اروح معكم ..
جميلة تكلمت : خالتي ام نايف خلي وضحى تجي معنا اذا زرناها
ام نايف ناظرتها لثواني : تستأذن ابوها
فرح فزت : يعني انتي موافقه ؟
ام نايف بقلة حيله : اذا ولدي بيتزوج بنتهم وقفت على روحتها
ام زايد حطت يدها على فخذها وابتسمت : زين تسوين ياوخيتي
ام فرح : الله يمسح على قلبك الراحة
حليمه بضحك : شكلها بداية خير الحمدلله
جميلة : اي بداية خير و المسكينه متكرفسه حتى قبل تدري عن خطبتها
ضحكت وضحى وبعدها استغفرت وسكتت..كملوا جلستهم سوالف ويحاولون يتجنبون طاري سليمان وبناته..
عند الرجال بالملحق ..
ابو زايد : وانت ضامن موافقتها؟
ابو نايف : قلت لها الي عندي وان شاء الله انها بتفره براسها زين
ابو زايد بفضول : لو اني اعرف وش قايل بيرتاح قلبي
ثامر بعفوية : تلقاه مهددها يا تقبل يا يمسطها بالعصى
ضحك ابو زايد : اسكت ياولد
ابو نايف : لا والله ان هالعصى بيتمسط به ظهرك عشان تعرف ان الله حق
ثامر : اسف يا عمي ماقصدت
نايف ميت ضحك : خبل انت وش طلع هالحكي من فمك
صقر : بايع عمره ببلاش
زايد لف لجابر : قهوتك بردت
جابر شربها مره وحده ومد الفنجال : صب
اخذ فنجاله وصب له وجلس جنبه : منت راضي على العرس؟
جابر : لا بس مشغول بالي عليها
زايد ابتسم : هذي بدايتها
جابر انحرج : لا وين بس كانت تعبانه مره
زايد تنهد : الله يشفيها
جابر : باذن الله
نياف همس لثامر : اليوم وانا ماخذهم اوديهم للمستشفى عيوني طاحت على عيونها بالمرايا يا عليها عيون تذبح الطير من السماء
ثامر : اعقب يالخسيس هذي سواياك
نياف واهو يحط يدينه ورا راسه ويتسند : وان ماخاب ظني ان اسمها سُلاف اذا تم موضوع جابر واختها شكلي بخطط عليها
ثامر ضحك : لا ماشاء الله العايله شكلها كلهم مخططين على الخوات وين الكره وين العداوه؟
نياف واهو يتنهد : راحت من جمال عيونها
كانوا يتكلمون هالأثنين تحت نظر صقر الي كان قريب منهم ويسمع همسهم واعصابه تفور و تفجرت فيه براكين وقف بسرعه وطلع من البيت ويحس نفسه مخنوق جلس عند عتبة الباب واهو يتنفس بقوة وبصوت مسموع ..طلع نايف وراه : وش بلاك ياولد طرت بالعجه؟
صقر مارد عليه ولازال يتذكر غزل نياف فيها وبعيونها و كيف تجرأ تطري على باله اصلًا ..
صحى على كفوف نايف على خده : ههيييه ياولد نايم انت!
صقر بغضب : نايف يرحم امك ابعد عن وجهي لا اشيل وجهك بكف
نايف رفع يده لفوق : هوب هوب بعدنا بعدنا ..بس وش فيك؟
صقر : مافيني شي خلني بحالي شوي و راجع
نايف دخل وتركه لأن عارف صقر عنيد وماراح يتكلم بس مستغرب خروجه السريع من المحلق وحب يتطمن عليه ..خبط بجسم حس بتفاصيله يلامس جسمه وطاح وتأوهت بألم وقامت على طول دخلت واهي تضرب جسمها وتنفض ملابسها: وع وع وع لاا
ام نايف مرت من عندها وهي مستغربه : حليمه وش بلاك؟
حليمه : ولا شي خالتي ولا شي
وقف مبلم مكانه واهو يتذكر تعابير وجها المتوجعه وركضتها ..عرفها اهي حليمه غسل وجه واهو يبتسم ماتغيرت بثارتها للحين على حركاتها ..دخل الملحق واهو يمسح على وجهه يحس للحين تفاصيل جسمها ناشبه بجسمه هز راسه يبعد هالأفكار عنه ويتعوذ من الشيطان وانها بنت عمه ..