بعدك يابوي اصبحت دنياي عرجاء بلا عكاز

4

ببيت ابو نايف ..
جابر حاط راسه على رجول امه واهي تلعب بشعره : شعرك طال
جابر : اي انا ابيه يطول
وضحى واهي تمد له القهوة وتبي تجس النبض : وش صار مع ابوي وعمي؟
جابر استغرب : ليه وش صاير؟
وضحى : يوم ابوي عصب على عمي يافع انه مستقبل بنات سليمان
ام نايف : الله يقطع سيرتهم
وضحى عضت على شفايفها : طيب وش صار؟
ام نايف : انا لو ادري وش محببك فيهم كان ارتحت
وضحك رفعت كتوفها : من الله
جابر ما يبي يعلم انهم باعوا اليوم بالسوق : ابد ماصار شي
وضحى : اشوا بعد لا يتهاوش معه ويقطعني من حليمه وجميلة
ام نايف : اقول عاد روحي شوفي نايف رجع ولا توه
جابر واهو يوقف ويشيل اغراضه : انا طالع
وضحى : وين ؟ ابي اروح لحليمه
جابر : خمس دقايق وتكونين هنا ولا رحت وخليتك
ركضت وضحى تجيب عبايتها ..والتفت جابر لأمه : الا يمه انتي عارفه اشكال بناته؟
ام نايف استغربت : وش عندك تسأل؟
جابر : اشوفك بتتذكرينهم ولا
ام نايف : اي عارفتهم وبعدين توني قبل شهرين مصادفتهم ببيت ام عزيز
جلس جنبها وبفضول : وليلى كيف شخصيتها؟
ام نايف رمت عليه الخداديه : وخر عن وجهي بس
سرع خطواته للباب واهو يضحك والتفت عليها لما نادته..
ام نايف نغزها قلبها : يا يمه لا ادري انك شايف لك شوفه من بنات سليمان ترا مافيه نصيب لا موافقة مني انا ولا من ابوك انتبه وابعد عنهم
جابر الي ماكان يفكر بالزواج اساسًا بس الفضول قاتله : ابشري على خشمي
طلع وسكر الباب ينادي وضحى : كـل هـذي عباية
وضحى طلعت بعبايتها من المطبخ وشايله الصينيه : كنت ارتب الحلى ..يلا مشينا
جابر واهو يمشي بالشارع وعلى يمينه اخته وحط يدينه بجيبه : الا اقول وضيح
وضحى : ها
جابر : وش رايك بليلى؟
لفت عليه بسرعه : وش فيها؟
جابر : اسألك وش رايك فيها؟
وضحى ابتسمت : يازينها اكثر وحده احبها ببنات سليمان ..صح انها مزاجيه مرات تكون هاديه ماينسع لها حس ومرات تفقع راسي من بثارتها بس تهبل
ضحك جابر وكملت وضحى : والله اشتقت لهم ياخي جابر ليش انتوا كذا حارميني من جمعتهم؟ والله انهم يهبلون
جابر نزل راسه واختفت ابتسامته : ابوهم يا وضحى ابوهم ولا تنسين ان ابوي حالف
وضحى : طيب انت وش دخلك تكرهم؟ و اخواني وامي مافيه مبرر
جابر : انا ما اكرهم ، بس لا تنسين وش صار بأبوي بسبب ابوهم
تنهدت وضحى وحبت تسكر الموضوع ماتبي تطوله ..ولاحظت نياف جاي لعندهم ..
نياف : وش عندكم؟
وضحى : بروح لحليمه
نياف ياخذ الصينيه منها :اعطيني ارجعها للبيت
وضحى تمسكت فيها : وخر يالمشفوح
ضحك جابر واهم يبعد نياف : وخر وكمل طريقك
تركوه ومشوا واهم يسمعونه : بترجعين وتسوين لي ولا بعطيكم عين تتسممون
-
ببيت ابو زايد ..
ام زايد تزغرط وماليها الفرح : فرحتي الأولى جايه جايه
حليمه واهي تحط الصينيه بالأرض ومبتسمه : امانه متى؟
ام زايد : تقول اليوم واهي عندنا ان شاء الله
حليمه : توصل بالسلامة يارب
ثامر واهو يصب القهوة له : الله يعينا على بثارة عيالها يـوه
ام زايد تضربه : اسكت انت لا اشوفك محارشهم
حليمه : يمه ترا وضحى بتجيني
ام زايد : ايه حياها الله وفرح بتجي؟
حليمه : قلت لها وقالت بشوف لأن عمتي تعبانه
ام زايد بخوف : ليه وش فيها؟
حليمه : تقول حرارتها
ام زايد : عطيني التليفون خلني اتطمن
مدت لها التليفون ودخل زايد : السلام عليكم
كلهم : وعليكم السلام
زايد : يـاه يا ريحة القهوة بالراس
حليمه تضرب صدرها : سناعة اختك
زايد واهو يعدل المركى تحته : اقول يالسنعه ترا جايك عريس
حليمه رفعت راسها : وشو؟
زايد بضحك على ردة فعلها : عريس عريس
ام زايد : منهو ولده ؟
زايد : ولد راجح اليوم مكلم ابوي وطالب يدها
ام زايد : اي واحد من عياله؟
زايد : سالم
ام زايد : ايـه الله يكتب فيه الخير
ثامر يصفق بيده : واخيرًا بنرتاح
ام زايد : لو راحت اختك محد بيسوي الأكل الا انت
ثامر عبس : لا اجل لا توافقين
ضحكوا عليه ..ودخل صقر : وش يضحكم؟
ام زايد : اختك انخطبت وثامر مستانس بس شكله هون يوم درا انه بيمسك شغلها بالبيت
صقر ناظر وضحى : اقــعـد والله البزقه بتتزوجين يعني؟
حليمه بحيا: وش اتزوج توني
زايد : توك ! عمرك ٢٨ الي بعمرك معيلين
وضحى بعصبية : وانت ٣٠ ليش ماتزوجت ؟
زايد : انا يفرق رجال انتي بنت
وضحى انقهرت : اسكت بس
ثامر : خلاص زوجوني انا
ام زايد : اذا ركدت ابشر
صقر : وانا يمه؟
ام زايد : انت بس قل تم وادور لك اياها
صقر ابتسم على فزت امه لأن يشوفها غاسله يدها من زواج زايد الي ما يبي طاريه وماعندها الا صقر ووضحى ..وثامر صارفه النظر عنه هالكم سنة على قولتها
-
عند البنات ..بعد ما جمعتهم ليلى تهدي الوضع بينهم..
ليلى : ترانا خوات وكثرت هالمشاكل ماراح تنفعنا
وجود لفت لسُلاف : انتي وش مضايقك بالضبط عشان نعرف؟
سُلاف : مضايقني روحاتكم مع عيال ابو زايد و ابو نايف
وجود لفت لوريف : وانتي وش مضايقك الحين؟
وريف : قلة احترامها معي
جودي : خلاص تصافوا و تعوذوا من الشيطان طفشت يومين والبيت هادي من دون سواليفكم اعوذ بالله
ليلى ابتسمت : ماراح يصير الا كل خير ان شاء الله
وريف : من بعد كلام صقر ما ظنتي نروح لعندهم لو تبي وضحى تجي اهي وبنت عمها وبنت عمتها فرح غير كذا لا
سُلاف فزت من مكانها : ايــه ها هذا الكلام السنع وينكم طول هالسنين
وريف ناظرتها: توقعت ماتروحين بس عشان المشاكل الي بين الأباء ماتوقعتهم يذبون الكلام عليك
سُلاف : عيال ابو زايد ما اشوف منهم الا نظرات ولا عيال السكني ابو نايف ماخلوا شي فينا
جودي ضحكت : اي هين ابو نايف غاسلين يدنا منه مانجيه خير شر
رن التليفون و قامت وجود له ..وكملوا البنات سوالف بعد ما تفاهموا مع بعضهم ..
وجود : الو
حليمه : السلام عليكم
وجود : وعليكم السلام
حليمه : تعالي انتي وخواتك عندي وضحى جت
وجود بوهقه : اعذرينا اليوم مايمدي مشغولين بتنظيف البيت
حليمه بترجي : تكفين حااااوليييي خلوه بعدين البيت امشي
وجود : سلمي لي على وضحى وتعذري منها والله ما نقدر نجي هالليلة
حليمه : خلاص اجل المره الثانيه ولا بزعل
وجود ضحكت بتسليك : ابشري
سكرت منها وراحت للبنات ..
ليلى : مين؟
وجود : حليمه عازمتنا تقول وضحى جت عندها
ليلى : وش قلتي لها؟
سُلاف : ماتدري عن سواد وجه اخوها وتتصل ولا اهي زيه قوية وجه
جودي : خلاص سُلاف سكري السالفه
وجود : قلت بننظف البيت مايمدينا
وريف : اي زين
ليلى : اي صح اتصل بشير ترا قالي بيرجع هالليلة
وريف : جد؟؟ وش صار على مرته
ليلى : يقول انها بخير وصارت احسن
وجود : يعني بكره لا تروحون للمحل ماراح يضر يوم
ليلى : اليوم حصلنا ماشاء الله ماينفع لازم نروح
سُلاف : اذا جاء بتفاهم معه لو تشوفون يابنات شلون مقربع المحل ما الومهم ما يجون يشترون
وريف : وكل ماكلمناه قال كويس عارف اننا مانجي نشيك وراه
سُلاف : خلاص نصير اسبوعيًا نحدد يوم ندخل عليه نشوف احوال المحل
كلهم ايدوا حكيها ، وكملوا شرب قهوة وسوالف
جودي بملل : تبون نكته؟
سُلاف : تونا مروقين لا تخربين مزاجنا
جودي : انتم الخسرانين
-
عند الشباب بمجلس بيت ابو نايف ..
نايف : يبغى لنا طلعه كذا للبر نغير جو ولا وش رايكم شباب؟
زايد : انا من الحين اقول تم تم
ثامر : هذا مايصدق على الله
جابر : بس ما ظنتي يوافقون نروح كلنا والدكاكين من يمسكها؟
نايف : يوم واحد مايضر ياخوك
جابر : اجل انت ابخص
زايد : اذا عزمتوا يلا خلنا نقول لأبوي وعمي
نياف : بس ترا احتمال يجون معنا اهالينا يعني مو بس شباب
زايد : وش دراك؟
نياف رفع كتوفه : يعني ماتعرف ابوي وعمي لازم نطلع جميع ولا نقعد جميع
جابر : اي والله صادق وبعدين ماعليك نطلع نتونس ونونسهم نغير جو
ثامر تلفت : وين صقير؟
نياف : مع ابوي وعمي
زايد ضحك : الله يكون بعونه تلقاهم ماسكينه الحين مستقعدين له
ثامر يرفع يده : الحمدلله ماني بمكانه
دخل ابو نايف واهو يدف الباب بعصاه : ايا الردي لو انك ولدي محطتك
فز ثامر من مكانه : اسلم يا عمي حياك اقلط
ابو نايف: ايه بقلط في مجلسي اكيد
ضحكوا الشباب على وجه ثامر الي تغير..
صقر واهو يبتسم ويمد فنجاله لـ ابو زايد : سم
ابو زايد : ابوك اول
ابو نايف : عمك اول
صقر وقف واهم يتناولون الفنجال بينهم ..نفذ صبره وتكلم : بتاخذونه ولا شربته؟
ضحك ابو نايف الي كان اغلب وقته جدي : جبه جبه
نايف : لا يا صقر وش مسوي بأبوي لاعب بالإعدادات
صقر : عشانا نمون صح ولا ياعمي
ابو نايف : اقول تراك ماتنعطى وجه عاد
ضحك جابر ورفع طرف شماغه على وجهه وطلع من المجلس عشان يضحك وما يقلب عليه ابوه ..والباقين كاتمين ضحكتهم على كسحة صقر
ثامر يهمس لنياف : نسف جبهتي والحين حول على صقر
نياف ميت ضحك : اسكت لا يجيني الدور
ابو زايد رفع نظره له : الا مادريت يا خالد حليمه انخطبت؟
ابو نايف نزل فنجاله بفرحه : استحلفك بالله!
ابو زايد : اي والله بس للحين ما سألت البنيه ولا رديت خبر لهم ..محتار
ابو نايف : اذا فيه الخير خلها تشوف نصيبها وبعدين لا تنسى بنتك ماشاء الله كبيره ماهيب صغيره
ابو زايد : يصير خير يصير خير
-
في يوم جديد ببيت ابو زايد ..
طلعت جميلة واهي تسحب ولدها من اذنه : نويصر توضى قبل يروح ابوي وخوالك
ناصر بألم :آي آي خلاص مصحصح فكيني
ابو زايد بغضب : فق على عمرك يـا ورع!!
ارتكز ناصر بوقفته واهو يمسح وجهه : ابشر
ابو زايد : دقيقتين ما اشوفك عند الباب ، ارجع من الصلاة بهالعصى على ظهرك
جميلة : اي كفو يبه عليك فيه تعبني
ابو زايد : الا من الاهمال و الرباده فيك وفرجلك ماعلمتوه وعلقتوا قلبه على الصلاة بالمساجد
جت حليمه واهي تمسك ابوها من كتفه : امش يا نظر عيني امش ماعليك منهم
ابو زايد مستغرب : وش عندك؟
حليمه بهمس بأذنه : الشيخ وش يبي فطور اليوم؟
ابو زايد : الموجود انا ماني بخالف
حليمه : خلاص ابشر انت روح وترجع تلقى كل شي جاهز
مشى ابو زايد واهو يأشر : قولي للمصروع يلحقني لا يتأخر
تخصرت جميلة واهي تقرب لحليمه : وش قلتي لأبوي؟
حليمه : تراه ابوي مو بدر مايحتاج تغارين
جميلة ضحكت : وقـحه
ام زايد طلت من دريشة المطبخ : اشوف حلت الجلسه لكم تعالوا ساعدوني قبل يجون
تقدموا للمطبخ كلهم ، وبعد عشر دقايق وقفت جميلة واهي تمسح يدينها بقميصها : بروح اشوف سلوى اصحيها
ام زايد : اي يمه عجلي
ماهي الا دقايق بسيطة رجعوا من الصلاة ..
صقر دخل المطبخ : اساعدكم بشي؟
حليمه : لا مشكور
صقر : موب اذا قعدت الحين ناديتني
دخل زايد : وين جميلة ما تمد يدها معكم؟
ام زايد : توها طالعه من عندنا انت اسكت ورح للمجلس بس
ضحكت حليمه و صقر كاتمها ..لف عليه زايد : اضحك وش مانعك
ماكمل جملته الا وضحك صقر..
زايد باس يده وجه وقفى : الحمدلله والشكر
وطلع من المطبخ..لفت حليمه على امها
حليمه بضحك : والله يا يمه فشلتيه كفو عليك
ام زايد : وانتي بعد اعقلي معه لا امصع اذانك
صقر واهو يرفع ثوبه : ظني بطلع الحين قبل تحول علي الوالدة
ابتسمت ام زايد بخفيه ولفت عليه : ايه اطلع وش مدخلك عندنا
صقر : اسـلم والله كأنها حولت ولا يتهيئ لي؟
حليمه : اي والله شكل جاك الدور اطلع اطلع
طلع صقر واهو مبتسم ويشوف ابوه و ثامر و زايد وناصر ملتمين على السفره وجتهم جميلة وبنتها سلوى جلسوا واهم غايصين بالسوالف وعن حال جميلة بالدمام ..ركضت حليمه لهم واهي شايله الطفريه تحت صوت امها : اركدي اركدي لا يطيح
زايد : اقول يبه بنتك ماركدت للحين لا تزوجها
ثامر : لا خلها تتزوج تفكنا
جلست حليمه واهي تسمع كلامهم ولا اهتمت بالعكس كانت تضحك ..
ابو زايد : اقول حليمه بعد الفطور وانا ابوك عندي كلام معك تعالي للمجلس
اختفت ابتسامتها واهي عارفه وش بيقول : ابشر
-
ببيت ابو نايف ..
ام نايف : يلا بقى الدور على وضحى شكلها بتعنس عندي
وضحى بضيقه من حكيها : طفشتي يعني؟
ام نايف : لا بس مشرفه على الثلاثيين وش يبون فيك بعدين
ابو نايف بصرامه : وش هالحـكي؟
ام نايف : استهبل محد يستهبل يعني
ابو نايف تنهد وناظر لوضحى : نادي اخوانك
قامت وضحى واهي متكدر خاطرها ، خلصت دموعها على البكي من طريقة تعامل امها معها ، وقفت ثواني واهي تستنشق الهواء..
نياف وقف جنبها : وش تستنشقين كلها تراب
وضحى بملل : مالك دخل و ترا ابوي يبغاك
راح نياف لأبوه وكملت وضحى طريقها لغرف اخوانها ودخلت على جابر : ابوي يبيك
جابر : وش يبي؟
وضحى رفعت كتوفها : مدري
تركته وراحت لغرفة نايف الي صادفها عند الباب : اعوذ بالله
وضحى : اعوذ بالله منك فيه احد يطلع من غرفته صاروخ كذا
ضحك نايف : وش تبين طيب؟
وضحى: ابوي يبيك
تركته ونزلت وراحت لغرفتها ماتبي تشوف امها ..
بالمجلس عند ابو نايف وام نايف و العيال..
ابو نايف بغضب : صدق الكلام الي سمعته ؟
نايف مستغرب : وش حاصل؟
ابو نايف : بنات سليمان طالعين يبيعون؟
بلع ريقه جابر واهي تطري على باله مثل الطيف..
صرخ ابو نايف بصوته العالي : اتكلـم انا
نياف بتأتأه : نسمع نسمع
نايف : اي يبه هذا الكلام الي ينقال ذا اليومين بالديرة
ابو نايف : امحق امحق تربية امحق
ام نايف واهي منصدمه : ماعاد بهم حيا
ابو نايف وقف واهو يعدل ثوبه : انا اعرف كيف اربيهم
جابر مستغرب : يبه لا تتدخل وش عليك فيهم!
مشى ابو نايف لناحيته ومسكه من ياقته ورص على اسنانه : سمعتهم من سمعة بنات عمك الي يجتمعون معهم ..ماسمعت وش قالوا عنهم الرجال بالمجالس يا قليل المروه
نايف فز : تكلموا ببنات عمي!
ابو نايف : تكلموا ببنات سليمان وان ما تربوا هالحكي بيمشي علينا كلنا
نياف ناظر بأخوانه ونزل عيونه للأرض ومستغرب من عصبية ابوه المفاجئة ، طول عمرهم واهم يتكلمون ببنات سليمان ليش هالمره اصر انه يتدخل؟ ..نايف زفر براحه لما عرف ان الموضوع ما مس بنات عمه وبنت عمته
جابر فك يد ابوه وتكلم بهدوء : وش ناوي تسوي؟
ابو نايف : العصريه بيجيكم العلم
طلع وتركهم محتارين وش ناوي عليه..
ام نايف : الحقوا ابوكم لا يسوي شي
طلع نايف ورا ابوه خوفًا على سكره وضغطه لا يصير فيه شي ..
جلس جابر واهو يصب له شاهي : على فكرة ابوك مبالغ مررره
ضحك نياف : اسكت ياخوي لا يجي يدعسنا هنا
ام نايف ناظرتهم بغضب : سكروا السالفه