بعدك يابوي اصبحت دنياي عرجاء بلا عكاز

20

بعد يومين .. بـ بيت ام فرح ..
فرح رفعت الطرحه على شعرها واهي رايحه للباب : طيب طيب
فتحته على طول واهي تطل بنص وجها : مين؟
فارس ابتسم : هلا والله فرح
سكرت الباب بقوه بوجهه وركضت لعند امها : يـمـه!
ام فرح فزت بخوف من صلاتها : بسم الله وش بلاك!
فرح عضت اصابعها بتوتر : يمه فيه واحد عند الباب
قامت واهي تطوي سجادتها وملامح الاستغراب على وجها : ماتعرفين منهو يعني!
طلعت و وراها فرح من خوفها تحس قلبها يرقع : الله ياخذه يحسب الدنيا لعب يجي متى ما يبي
استوعبت امها الي اشرت بيدها : تفضلوا
دخلت على طول غرفتها ماتبي هالضيوف يشوفونها وثواني بس ودخلت امها عليها واهي تسكر باب الغرفة وبنبرة مستغربه : دخلوا ثنتين ما اعرفهم
فرح وقفت عندها : ليش تدخلينهم طيب!
ام فرح : مدري شفت معه ثنتين وقلطتهم
فرح : قومي زيني القهوة و الشاهي بسرعه
قامت دخلت للمطبخ تضبط القهوة واهي تزفر براحة : الحمدلله امي ما كلمته
خلال ربع ساعة شالت الصينيه و توجهت للملحق الي دخلت عليهم وبدت تسلم..
ام فرح تناظرها متبسمه : اجلسي
جلست تضيفهم و هي مو مرتاحه من هالجلسه اول مره تشوف هالثنتين ..
ام فرح : خلاص فروح روحي ارتاحي
قامت فرح على طول ودخلت غرفتها واهي مو فاهمه امها ليش طلعتها بالعاده تجلس الى النهاية ، لوهله كأنها فهمت وشهقت من صدمتها : لا يكون بتزوج!
سحبت التليفون تتصل بحليمه وتكلمت بحماس : بنت اسمعي
حليمه : هلا
فرح بحماس : الحين تجيني ركض انتي وكرشتك الحين
حليمه : تعالي عندي بنات سليمان و وضحى فيه
فرح : عمى لو ما اتصلت ما علمتوني!
حليمه : يختي توهم وصلوا مالهم عشر دقايق
فرح : خلاص سكري يلا
لبست عبايتها وطلت من الباب واهي تشوف امها تسكر باب الشارع و متوجهه لها مبتسمه : فرح
استغربت من عبايتها : على وين ان شاء الله!
فرح بتوتر : البنات مجتمعين ببيت خالي يافع
ام فرح قربت لعندها : عندي لك بشاره
فرح عضت شفايفها : خطبوني صح؟
ام فرح الي بدت تزغرط بفرحة وكملت : ايه
فرح ابتسمت على فرحة امها : مين هم وايش اسمه ؟
ام فرح : امه و اخته و اسمه فارس
فرح حست الدنيا تدور توها فاتحه الباب ما لمحت الا اهو من وين جو اهله ..
ام فرح هزتها : وش فيك انخطف لونك!
فرح بتوتر : وش قلتي لهم؟
ام فرح جلست وجلستها معها : الرجال و النعم فيه تدرين انه من سكان الرياض و يشتغل بالبنك! ما بقى الا نسأل عليه وهالمهمه على خوالك
فرح ارتكزت بسرعه : لا يمه مستحيل اخليك و اروح
ام فرح بحزم : انا مو قاعده لك طول حياتي يوم انك بتلازميني وبعدين كل فترة بتجيني شوفي جميلة
فرح ضاق صدرها : بس خالتي ميساء عندها حليمه وعيالها و زوجها وانتي ماعندك الا انا لا تقارنين
ام فرح وقفت ولازالت على اسلوبها : الرجال لحد الآن انا مرتاحه لطاريه بكلم خالك خالد ونضبط اموره
فرح : ماراح اتزوج واحد برا الديره!
ام فرح بعصبيه : يا اهو يا زايد و استخيري
طلعت تاركتها متوجهه لبيت اخوها خالد ، اما فرح الي طلعت بعد امها متوجهه لبيت خالها يافع عند البنات ..
-
عند البنات بـ بيت ابو زايد ..
حليمه سكرت التليفون: ياربيه ذا البنت تبي تتشره على اي شي
وضحى : ماعليك منها انا اتصلت عليها الظهر ولا ردت كنت بقولها تجي
غاصوا بالسوالف مع بعض الا سُلاف الي كانت تتقهوى على الصامت واهي تسمع سوالفهم وكيف ترد بكلمه بس عشان ما يحسون عليها ..
حليمه وقفت بصعوبة : سُلاف تعالي ساعديني بالمطبخ
قامت معها ودخلت : اساعدك بأيش يا ام سامر؟
حليمه ابتسمت : على طول قررتوا انه سامر
سُلاف الي تبي تخش بالجو : يعني عندك اسم غيره؟
حليمه جلست على الكرسي واهي ماسكه يدها : اقول اجلسي خلني اكلمك
سُلاف جلست بفضول : صاير شي مع نايف؟
حليمه ابتسمت : لا نايف راح بسلامته خلاص وطويت صفحته
سُلاف بستغراب : اجل؟
حليمه اتسعت ابتسامتها اكثر : بس خلك هاديه
سُلاف عدلت جلستها بتوتر : وشو بسرعه ترا ما اتحمل هالتشويق!
حليمه ضحكت بخفه : صقر
سُلاف بتوتر : فيه شي؟
حليمه غمزت لها : يعني اني مو متفقين ها
سُلاف عقدت حواجبها بستغراب : وش تقولين انتي ترا والله ماني فاهمه عليه
حليمه تسندت واهي تتنهد : اقول والله شكلك ماتدري ياعمري
سُلاف وقفت بعصبيه : حليمه اخلصي علي صقر فيه شي!!!
حليمه ضحكت : تراه خطبك
سُلاف جلست على الكرسي منصدمه : وشو؟
حليمه : شفتك متكدر خاطرك على روحته قلت اونسك بشي يسعدك الين ما يرجع حبيب القلب
سُلاف بهدوء : لمين قاله ؟
حليمه : قالي انا على ما يرجع و يفاتح اهلي بالموضوع و الأكيد بيوافقون
سُلاف ابتسمت بخجل : قولي والله
حليمه ابتسمت : اول مره اشوفك مستحيه
سُلاف فركت يدينها واهي تناظر الأرض : خير وش شايفتني عاد
حليمه وقفت واهي ماسكه بطنها : المهم عجلوا بالعرس لا تخلونه على ايام شهري الأخيرة
فزوا على صوت الباب الي يدق بقوه وطلعوا من المطبخ ..
وضحى فتحت الباب ودخلت فرح بدفاشه : يا قليلات الحياء يالي ماتعزمون ولا شي
وضحى ضحكت : وش هالدخول العنيف سلامات
فرح جلست واهي تنادي حليمه و سُلاف الي وقفوا يناظرونها
خلتهم كلهم يجلسون و يناظرون لها بحماس ..
فرح بحماس : بعقد اجتماع معكم سري ضروري
وريف : يلا تكلمي نسمع
فرح علمتهم عن فارس و جيته للبيت مع اهلها ..
جودي ماتت من الضحك : مسكينه تحسبه راح طلع مدخل اهله بالبيت
فرح كشرت : ما يضحك يا بزر
وريف : شوفي اذا خوالك سألوا عنه وطلع كويس تزوجيه
وجود : بعدين انتي فجرتي روسنا بالعرس ويوم جاء هونتي!
فرح : انا ليش هونت! لأنه بالرياض يابنات امي وش اسوي فيها ما ابيها لحالها
حليمه : عمتي ماراح يصير فيها شي وبعدين هذا نصيبك ارضي بالأمر الواقع
فرح : لا ماهو نصيبي امي تهددني اذا ما تزوجته بتزوجني زايد
حليمه ضحكت : ياحليلها عمتي للحين تبيك لزايد!
فرح : والى بعد عشرين سنة الله يعيني بس
وريف بفضول : وزايد يبيك؟
فرح بسرعه : اكيد لا
وريف تسندت واهي تتذكر كلام زايد لها وتكلمت بينها وبين نفسها : اجل فرح اهي المقصوده يا زايد
فرح : انا ودي اوافق على فارس لأن صراحه يهبل بس الي يردني امي
وضحى مسكت يدها : امك ببيتها معززه مكرمه وكلنا حواليها بيتها جنب البيت وماراح تضيع من دونك خلي هالكلام بأذنك ، امك تبيك تتزوجين وتفرح فيك لا تضيقين صدرها
فرح بهدوء : بس ياخي مدري
حليمه : مو مجبوره تراك عليه استخيري وشوفي قلبك وش يقول واذا على امك زي ماقالت وضحى البيت جنب البيت و الله يعافي التليفونات الي تخلينا نتواصل مع بعضنا
فرح : صبوا صبوا لي قهوة نشف ريقي من السوالف
طق الباب وتغطوا البنات الي عارفين انه ثامر ..
دخل و اهو مبتسم : السلام عليكم
الكل : و عليكم السلام
دخل على طول لغرفته و البنات دخلوا للملحق عشان ياخذون راحتهم اكثر ..
-
بعد عشر ايام من الأحداث لفرح الي وافقت بعد تفكير على فارس بس طلبت ملكتها تكون بعد رجعة صقر واهله
و مع حوسة موعد لصقر و تدبير اموره الي تعبوا كثير واهم يحاولون يحجزون اقرب موعد لعمليته ..
بالرياض ، بالمستشفى..
ام زايد جنب سرير صقر وماسكه يده وتقرا القرآن بصوت هادئ ..
دخل زايد مبتسم وجلس جنب امه وانتظرها الين ما خلصت..
زايد : يمه
ام زايد ناظرته : لبيه
زايد : بكره عمليته
ام زايد ناظرت لصقر واهو نايم : استودعته الله ، وين ابوك؟
زايد : يصلي
فتح عيونه صقر واهو يلف وجهه لناحيتهم ..
زايد كشر : صحيناك؟
صقر هز راسه بـ لا
ام زايد طبطبت على يده : نام ياوليدي كمل نوم
صقر تنهد بملل : اذا مافيه مواعيد لي قريبة خلاص نرجع للديره الين ما يقرب موعدي
ام زايد ابتسمت و الخوف متملكها : عمليتك بكره
فز صقر : والله؟
زايد : اي ابشرك جلستنا هنا ايام ماراحت عبث
صقر سدح راسه و ابتسم : الحمدلله يارب
زايد : بنطلع الحين وانت ريح
طلعوا وسكروا الباب وجلس صقر بالغرفة البارده بنورها الخافت و اهو يعد الأيام عد على شوفتها ، ابتسم على ذكراها وتنهد تنهيدة طويلة : يـارب
-
الصباح بـ بيت ابو زايد ..
حليمه منسدحه واهي تبكي و الوحام تحسه صار اقوى عليها و متعبها ..
دخل ثامر واهو يشوفها كذا وركض لعندها : وش فيك؟
حليمه جلست على حيلها : هرومونات الحمل لعبت في نفسيتي
ثامر جلس جنبها واهو يتنهد براحة : اقسم بالله حسبت اهلي فيهم شي
حليمه ضربته : يعني و انا مو من اهلك؟
ثامر ضحك : لا بس مقصدي خوفي على البعيد انتي قدام عيوني
حليمه حطت راسها على كتفه : اليوم الظهر عمليته
ثامر مد يده لوجها واهو يمسح دموعها : بسيطه لا تشيلين هم
حليمه قامت : بروح للبنات ما ابي اقعد لحالي
ثامر : زين خليني اوصلك
طلعت بعبايتها وركبت مع السيارة ..و على طريقهم شافوا جابر و نياف و نايف واقفين عند الباب و يسولفون
وقف ثامر واهو يفتح الدريشه : عندكم شي؟
جابر : لا
ثامر : يلا اودي حليمه و اجيكم
مشى بالسياره و عيون نايف لاحقتها ودخل البيت على طول تحت استغرابهم ..
نياف : شكله حان
جابر تنهد : الله يهديهم فيهم عناد هالاثنين يكسر صخر
نياف : امش امش ندخل
-
عند البنات ..بعد اذان الظهر
جودي بتملل : ياربيه الحين اشيل هم عملية صقر ولا اشيل هم ملكة البثره ذي
فرح رجفتها : عن الغلط
سُلاف ناظرت حليمه و التوتر ماكلمها : اسألي شوفي وش صار
حليمه مدت يدها : عطوني تليفونكم اتصل
اتصلت مره مرتين ولا ردوا وسكرت واهي متضايقه..
ليلى بهدوء : ماعليه يمكن لاهين معه اصبروا شوي
فرح : الله يفرحنا بروجعه وبكامل عافيته
الكل: امين
حليمه ناظرت للساعة : بنات من تجي معي موعدي؟ مهدود حيلي ما ابي اروح لحالي
ليلى : انا ، بتصل على جابر
حليمه : لا لا ثامر بيوديني بس تعالي انتي
ليلى : بكلم جابر اشوف
سكرت المكالمة واهي تناظر حليمه بأسف : مصر يودينا كلنا
حليمه : خلاص قولي له لا بروح مع ثامر
بعد مناوشات بينهم استسلمت حليمه وخلال دقايق ركبت ليلى حليمه مع جابر متوجهه للمستشفى ..
جابر : ماشاء الله حليمه بأي شهر؟
حليمه : دخلت الثامن اليوم ابشرك
جابر : الله يجعله من الذريه الصالحه
الكل : امين
دقايق ونزلوا و جابر جلس ينتظرهم و ليلى مسكت يد حليمه متوجهين للقسم الخاص بالحوامل و الولادات..
الدكتورة ابتسمت لما شافت حليمه : متأخره يومين عن موعدك تحبين تعاندين يعني
حليمه بتعب : والله اعذريني يا دكتورة بس صدق ما قدرت اجي طول الوقت منسدحه تعبانه
الدكتور طلبتها تنسدح واهي تشوف البيبي بالأشعة : تشوفينه؟
حليمه ابتسمت : ايه ، ليلى شوفيه
ليلى الي كانت واقفه معها مبتسمه: صغير مره
الدكتورة : ايه صغير قلت لها من قبل وارجع اقول لها انتبهي لأكلك
حليمه بصدق : والله صرت حريصه حتى على ادويتي
بعد نصائح الدكتورة لها وقفت حليمه بتطلع ..
ليلى : دكتورة انا ابي اشوف
حليمه لفت عليها بسرعه : وشو؟
ليلى ببتسامة خجل : انا حامل بس مدري اي شهر
حليمه ابتسمت بفرحة وحضنتها : ليش ما علمتينا!
ليلى : والله توني اشوف التحليل امس ولا ابي افرحكم وانا مو متأكده
الدكتورة ضحكت بخفه عليهم وطلبت من ليلى تنسدح وبدت معها الأجراءات ..
الدكتورة جلست على كرسيها واهي مبتسمه : كتكوت جنينك
ليلى بفضول : بأي شهر؟
الدكتورة : بالأول بعد اسبوعين بتدخلين الثاني
ليلى حطت يدها على بطنها واهي تناظر حليمه المبتسمه : مبروك ليلى
ليلى ابتسمت لها : الله يبارك فيك
بعد ما خلصت الدكتورة من ليلى طلعوا كلهم الثنتين..
حليمه : لا تعلمين جابر عن حملك وانا معكم
ليلى ناظرتها : ليه؟
حليمه : عشان المسكين ما يخبي فرحته فيك قدامي ويسوي نفسه ثقل خله يعيش شعوره
ليلى ابتسمت : طيب
-
بـ بيت جابر و ليلى ..رجعوا بعد ما عرفوا ان صقر طلع من العمليه وتمت على خير ..
جابر منسدح و اهو مستانس : يعني ماعاد بقى الا كم يوم ونشوفه
ليلى مبتسمه: ان شاء الله
جابر ناظرها واهو يتربع : ليلى ماودك تكلمين حليمه ترجع لنايف؟
ليلى بسرعه : لا ماودي اتدخل بأي شي
جابر: ليه؟
ليلى : انا اعرف حليمه ترا من النوع الصبور و يعني عقلها كبير ما تطلقت الا انها مره ما ارتحت مع اخوك
جابر تسند : تصدقين عاد شاك انه يحبها
ليلى قربت لعنده بفضول : نايف؟
جابر : ايه ماتشوفين عيونه عليها بكل مره تكون قدامه
ليلى : لو انه صاحي كان عرف يكسبها
جابر ناظرها : هيه تراه اخوي لا تفلينها واجد
ليلى ضحكت بخفه : معليش نسيت .. صح عندي مفاجئه لك
جابر : وشو؟
ليلى : توقع و اقولك
جابر طال تفكيره و اهو يقولها وكانت ترد عليه بـ لا ، غلط
جابر بملل : وشو طيب؟
ليلى بخجل : رحت من وراك للدكتور وكشفت
جابر تقدم لها و نقطة وبينفجر من الحماس ينتظرها تأكد الي بباله : ايوه؟
ليلى ابتسمت : حامل و اسبوعين و ادخل الثاني
حضنها بقوه و اهو يصـرخ : الحـمدلله الـحمدلله يارب
ليلى : نزلني نزلني لا اطيح
نزلها واهو يمسح على وجهه : بذمتك ليلى ماهو مقلب!
ليلى ضحكت : والله العظيم صادقه
جابر حضنها واهو يبوسها : يـالله
وبادلته الحضن واهي ميته فرحه من فرحته وردة فعله الي ما توقعتها كذا ..
-
يوم جديد الصباح ، عند البنات الي كانوا يفطرون بالحوش..
طق الباب وتأففت بملل وجود ووقفت : هذا واحنا مقطوعين من شجره و الباب ٢٤ ساعة يطق
فتحت الباب ودخلت ليلى تشيل لثمتها ومبتسمه : السلام يا جماعة
جودي : وش جابك انتي ماعندك رجال وبيت يضفك؟
ليلى ضربتها برجلها : مالك دخل
وريف : اجلسي افطري
ليلى بغرور : افطرت انا وحبيبي
جودي ناظرتها : عشتو
ليلى : خلصوا فطور عندي لكم اخبار حلوه
سُلاف بحماس : تكفين قولي صقر تكفين
ليلى : مدري والله عن صقر
وريف : اجل اخبار وش؟ لا تقولين ملكة فرح تكفين مو رايقين هالفترة
ليلى وقفت واهي تتأفف : يوه منكم غبيات انتوا فكروا شوي
وجود متسنده على المركى و تناظرها : طيب قولي وش عندك لأن حاليًا تونا صاحين من النوم وطبيتي عندنا
ليلى مسكت بطنها وابتسمت : بتصيرون خالات
صرخوا البنات بقوه لدرجة ليلى تبي تسكتهم لا يسمعونهم الجيران : اسكتوا اسكتوا
جودي الي قامت وطاحت بصينية الفطور ولبسها كله توصخ وحضنت ليلى : مــبروك
وريف لفت وجها واهي تمسح دموعها ولاحظوها البنات الي ضحكوا عليها بعدها بكوا معها من فرحتهم ..
وريف تسمح دموعها واهي تضحك : على الأقل كملوا شماته مو تلحقوني وتبكون
سُلاف جلست جنب ليلى وماسكه بطنها : ياروحي يارب انه بنت
وجود : لا يارب ولد
جودي قامت : انتوا تضاربوا وانا بغير ملابسي الي اكلت معي..
وريف : دروا اهل جابر؟
ليلى : بروح لهم الظهر ان شاء الله ونعلمهم
وريف صفقت بفرحه : الحمدلله يارب بنشوف اطفال في بيتنا رايحين جايين يردون الروح
ليلى ناظرتهم وناظرت لجودي الي جايه ومبتسمه : عقبالكم كلكم يارب ، عقبال ما نجتمع كلنا بعيالنا حولنا
سُلاف رفعت يدها : اميــن
جودي غمزت لها : من صقر ولا غيره
سُلاف ناظرها بطرف عين : ومن نياف ولا غيره؟
جودي : اص انطمي مالك دخل
ضحكت ليلى عليهم : والله حالتكم صعبه ..
-
بالرياض ، بالمستشفى ..
ابو زايد جالس على الكرسي و مسند راسه على عصاته ويحوقل ، بينما زايد متكتف و يناظر الناس بهدوء ، وبجنبهم ام زايد الي كانت كل شوي واقف تقرب لغرفته وتناظره من بعيد ..
ابو زايد : يا ميساء لا تصجين روسنا بروحتك وجيتك
ام زايد : بشوف ولدي يعني ما اشوفه
ابو زايد : الدكتور قال بيصحى خلال هالساعتين يعني اجلسي وعيني من الله خير
جلست واهي تدعي له ولفت لزايد : اتصل على اخوانك بكلمهم
طلع زايد جواله واهو يتصل على تليفون البيت و ردت عليه بسرعه حليمه ..
زايد بضحكه : جالسه جنب التليفون انتي
حليمه : ها بشر صحى؟
زايد : لا توه البنج ما خف ، خذي امي تبيك
مد الجوال لها وكلمتها الى ما طالت المكالمة من حرص امها عليها ..
ام زايد : ترا جميلة كلمتني تقول بتجي عندك
حليمه : متى بتجي؟
ام زايد : والله ناسيه متى قالت تحري لها ذا اليومين وانتبهي لأخوك وحملك
حليمه : ابشري
سكرت منها واهي تنسدح بتعب ..
ثامر دخل عليها : انا طالع تبين شي؟
حليمه : لا سلامتك
ثامر بحرص : ماني متأخر واذا حسيتي بتعب ولا شي اتصلي علي على طول
حليمه ابتسمت له : روح لا تشيل هم
طلع و عدلت سدحتها الي ماصارت مريحه بالنسبه لها من كبر بطنها و حاسه بالثقل و الأرهاق ماودها تسوي شي ابد ..غفت ربع ساعة و ما صحها الا صوت الباب وقامت له بصعوبة وحاسه بالثقل : هذا وحجمك صغير و متعبني
وقفت ورا الباب واهي تسأل مين ..
نايف : انا
حليمه مسكت قفل الباب : ثامر ماهو بالبيت
نايف : ادري افتحي الباب بتكلم معك
حليمه بخوف: لا وما بينا حكي روح لا احد يشوفك
نايف ونبرته بدت تتغير : بتفتحين ولا شلون؟
حليمه بحزم : لا يا نايف ماراح افتح الباب
ماعاد سمعت له صوت و زفرت براحة انه راح : اول مره ما يعاند
رجعت للملحق بترجع تنسدح فيه مالها خلق تدخل الغرفة جلست واهي تعدل اللحاف عليها وفزت بخوف واهي تشوف باب الملحق يفتح عليها وتغطت بسرعه باللحاف واهي تصرخ ..
نايف خاف على الي ببطنها : هدي هدي انا نايف
قامت بسرعه من غير شعور انها بلا غطوه وضربته على صدره : مجنون! بغيت تطير قلبي
نايف ابتسم بخفيف على شكلها الي من زمان ما شافه : ياه يا حليمه حرمتيني منك ست شهور! يا مقسى قلبك
حليمه رجعت ورا الباب بسرعه بعد ما استوعبت وعصبت : اقسم بالله ان الي صار بيوصل لأبوي تدخل بيوت ناس ماهي مرحبه فيك
نايف اخذ الجلال ورماها عليها : تغطي بكلمك وبروح
تغطت على طول وطلعت له : وش تبي ؟ بسرعه لا يجي ثامر ويصير تصرف ثاني معك
جلس وأشر لها : اجلسي
جلست واهي تحاول تسرع الوقت وتختصر من العناد عشان يطلع ..
حليمه : شلون دخلت ؟
نايف : نطيت من السور
حليمه بلعت ريقها : وش تبي طيب؟
نايف : خلينا نرجع لبعض و نربي الولد
حليمه هزت راسها بـ لا وكملت : مستحيل الغلط اكرره مرتين
نايف اشر على نفسه : انا غلط؟
حليمه ناظرته : ايه علاقتي فيك كلها غلط نايف نحمد ربنا هالطلاق مافرق العايلتين لا ترجع و تزيد الطين بله
نايف : اخوانك ما يحطون عينهم بعيني وحتى السلام ثقيل عليهم وتقولين ما يفرق عايلتين!
حليمه : كل شي من تحت راسك حاولت افهمك و اتفاهم معك بس انت انسان ما تنفهم و خلاص كمل حياتك وتزوج و انساني
نايف بصدمه : اتزوج؟
حليمه : ايه تزوج مو انت الي قلت لي مو صعبه اجيب الثانية و الرابعه
نايف والقهر يحسه بقلبه من قوة شعوره : تقولينها صادقه يا حليمه؟
حليمه : وفي لعب بهالسوالف
وقف واهو يعدل شماغه : طيب ، مع السلامة
طلع بسرعه ولا سمع ردها وفتح باب الشارع وسكره بقوه ولا همه من بيقابل بوجهه ولا وش بيقولون عنه من قوة عصبيته ابعد لمكان شبه مهجور ورمى الحجر بقوه واهو يصرخ : غـبي! تروح لوحده ماتبيك
جلس على الأرض واهو ماسك راسه بألم..
-
بعد اسبوعين من عملية صقر و مرحلة العلاج مع الطاقم الطبي الخاص فيه بالعلاج الطبيعي و فرحة الجميع بخبر حمل ليلى الي دخلت للثاني و خطبة فرح الي صارت رسميًا من فارس و بقى بس الملكة ..
فرح سكرت التليفون بسرعه من سمعت خطوات امها ..
ام فرح بستغراب : وش تسوين؟
فرح وقفت واهي تعدل لبسها : كنت اكلم وضحى
ام فرح بشك : طيب تعالي ساعديني بالمطبخ بنروح لبيت خالك يافع
فرح ناظرتها : رجعوا؟
ام فرح : بروح اشوف بنات اخوي
دخلت فرح مع امها المطبخ وكان الهدوء بينهم غريب ..
ام فرح تركت الي بيدها : ما اقدر اسكت
فرح استغربت : وش فيك؟
ام فرح : تكلمين فارس صح؟
فرح بلعت ريقها : لا
ام فرح : لا تكذبين ادري من عيونك فرح يا عيوني انتي ترا الرجال لا كلمتيه قبل العرس بيقول هذي ماهي مضبوطه انتبهي على نفسك خلاص الملكة بتصير تصبروا ماراح تطيرون عن بعض
فرح بتوتر : يمه ما اكلمه وش ذا الحكي الي تقولينه
لفت واهي تغسل المواعين تهرب بنظراتها عن امها..
ام فرح تنهدت : هذاني قلت لك
فرح : بس مو كل الرجال زي بعض
ام فرح : بس وش يضمنك انك طحتي بواحد تفكيره ماهو كذا ؟ ابعدي عن الشر و المشاكل
فرح تنهدت : ان شاء الله
-
بـ بيت ابو زايد ..
حليمه جالسه و سلوى تهمز رجولها..
حليمه مبتسمه: خلاص حبيبتي لا توجعك يدك
جميلة جلست : والله يا حليمه واضح حملك متعب ما اتذكر اني تعبت بعيالي كذا
حليمه رفعت عيونها واهي ماسكه بطنها : وش اسوي يختي والله تعبانه مره مو طبيعي الوضع
جميلة : تحسين بوجع ولا شي؟
حليمه : لا بس احسني مرهقه و ودي بس انام وانسدح حتى الأكل اتغصبه بس عشان صحته
جميلة : الله يكون بعونك يارب
دخل ثامر و ناصر مع بعض ..
جميلة : وش عندكم هالمره ماتهاوشتوا!
ثامر ناظره و اهو مبتسم : لا ماعليك صار صديقي الحين
ناصر : ما بينا فرق الا ١٣ سنة يعني بسيطة صح يا خالي؟
ثامر : لا والله ماهي بسيطه احسني شايب عندك
ضحكت جميلة عليهم وجلسوا يتقهوون مع بعض الين ماجتهم عمتهم اهي وفرح ..
ام فرح مستغربه : يختي حليمه انتي صاحيه ولا وش بلاك؟
حليمه ضحكت بتعب : صاحيه صاحيه ماعليك
فرح: تخيلي تولدين قبل ملكتي
حليمه : يكون احسن عشان احتفل معكم وانا خفيفه
ام فرح : الله يهونها عليك
حليمه ابتسمت و التعب واضح عليها : امين
فرح : تصبري شوي الين ما تدخلين التاسع و اطلقي
حليمه : تحسين عندي زر تحكم حتى انا على ذا التعب احسني بولد الله يستر من طلقي
فرح : اعوذ بالله من هرمونات هالحمل شبت بوجهي
حليمه : تشمتي تشمتي كلها كم شهر و اشوفك مثلي
فرح : ياليل هذي بعير تحقد على طول
ضحكوا كلهم على كلام فرح ..
-
بـ بيت ليلى وجابر و عندها البنات يرتبونه معها ..
سُلاف بتعب : صدقيني الكرف الي تعبته الحين بخليك تكرفينه ببيتي بس انتظري
جودي جلست تشرب القهوه بشراهه : القهوه حلوه ولا انا عطشانه؟
ليلى : على ذا الشرب مو بس عطشانه الا مجففه
وريف : ليلى اقعدي يختي ترا طفشتيني من كثر ما اقولك
ليلى جلست : يختي اساعدكم
وجود : مالك دخل احنا جايين برضانا نساعدك ماله داعي تحوسين معنا
ليلى : الله يخليكم لي يارب
وجود انسدحت على بطنها واهي مبتسمه : حبيب القلب متى ناوي يشرفنا؟
ليلى ضحكت : اصبري ماندري بنت ولا ولد
وجود : يارب ولد
جودي : متى بتعرفين ؟
ليلى : الرابع
وريف : يعني الله يعينا شهرين زيادة من الفضول
ليلى : وسوو حفلة ترحيب بولدي ولا بنتي يعني انكم خالات سنعات
وريف : ابد الحفلة علي انا بس اولدي على خير
ليلى : ان شاء الله
-
عند صقر ..
الي بدا يمشي بخطوات ثقيلة و بمساعدة العكازات الي كان يحط حيله فيها ..
الدكتور المسؤول عن حالته سمح له انه يمارس حياته طبيعي ويرجع للديرة بس يحاول قد ما يقدر انه ما يعتمد كليًا على العكازات و يمشي بمساعدة احد من اهله كم خطوه ويرتاح ، الى ما يلتأم جرح العملية و تتعود عضلاته واعصابه على المشي للمره الثانية..
زايد واهو شايل الشنط و يدف صقر بكرسيه لأنهم كانوا مستعجلين و صعبه يركضون بـ صقر واهو حالته كذا ..
ام زايد بخطوات سريعه تلحق زايد : اعنبوك من ولد طيرتنا اصبر شوي
زايد واهو مستعجل : اسرعوا الطياره لا تقلع
ناظر لصقر الي كان متمسك بالكرسي خايف انه يطيح وشكله خلاه يضحك ..
زايد : وش فيك خايف؟
صقر رفع راسه له : مجنون انت مطيرني خايف اهبد على وجهي
وقف واهو يشيل صقر و يمشيه واهو ماسك يده اليسار و بيده اليمين ماسك العكاز ويمشي بصعوبة بينما ام زايد و ابو زايد دخلوا للطيارة متوجهين لمقاعدهم ..
زايد جلس جنب صقر واهو مبتسم : فرحان؟
صقر تنهد : وكيف ما افرح وانا بعيد عن شوفتها حول الشهر
زايد : مره مصمم بالموضوع؟
صقر ناظر لقدام : وجدًا بعد
زايد حط يده على يد صقر : اجل الله يقويك
صقر : يارب
ربطوا الاحزمه عليهم بعد طلب الكابتن منهم ، و اقلعت الطيارة معلنين عودتهم لديارهم ..
-
بـ بيت ابو زايد بالحوش ..
حليمه رايحه جايه من حماسها : ياربيه متى بيجون !
جميلة : اجلسي لا تمشي وتطلقين علينا
حليمه جلست واهي تفرك يدها بتوتر : بس ما كأنهم طولوا؟
ثامر دخل عليهم البيت مستعجل و اهو مبتسم : جو جو
سمعوا صوت السيارة توقف عند الباب واتجهوا بسرعه ورا الباب ينتظرونهم يدخلون ..
دخلت ام زايد واهي تحضن بناتها بحرارة و شوق ولفت تناظر احفاده الي حضنوه وباسوا راسها ويليها ابو زايد وثواني بس ودخل صقر بعكازاته واهو مبتسم وجنبه زايد الي ماسكه ..
حليمه خنقتها العبرة ولمعة بعيونها الدموع وجميلة على طول حضنته : طولت الغيبه يا نظر عيني
صقر ابتسم واهو يحط يد وحده ورا كتوفها ويلمها: هذاني جيت
ابتعدت عنها و اهو يشوف حليمه الي كبر بطنها عن الشهر الي فات وكيف متأثره : ماودك تجين؟
قربت لعنده واهي تحضنه وبكت من الفرحة واهي تشوفه واقف على رجوله : الحمدلله
ابو زايد : يلا زايد دخله لا يوقف واجد
دخل الكل للملحق واهم ملتمين حول بعضهم والتركيز اكثر شي على صقر الي كان مبتسم على غير عادته بالفترة الي راحت ..
ناصر : والله يا خالي اني اشتقت لك كثير
صقر باس راسه : يا حبيبي والله
حليمه وقفت : يلا ترا جهزنا غرفكم روحوا ريحوا لكم
صقر ناظرهم كلهم : عندي لكم شي
ام زايد ناظرته بفضول : امر
صقر ناظر لحليمه الي فهمت وتذكرت وش كان يبغى وابتسمت له تطمنه بأنه يتكلم عادي ..
صقر ناظر لأبوه و امه : والله فيه موضوع بخاطري ومستعجل فيه
ابو زايد و الفضول : ايه تكلم طيب
صقر : ابي اخطب سُلاف بنت سليمان
ام زايد ابتسمت و من شاف ابتسامتها ارتاح كثيير وكأن اعصابه كانت طول الوقت مشدوده ولا كان حاس بهالشي..
صقر واهو يناظر ابوه الي مابدر منه اي ردة فعل : ها وش ردكم؟
ابو زايد بهدوء : دامني اعرف البنت انها كفو ليش لا
صقر بفرحة : و انتي يمه؟
ام زايد ضحكت بخفه : ومنين بلاقي وحده تناسب بثارتك الا سُلاف
صقر ابتسم واهو يتذكر حركاتها الطايشه ..
زايد بفرحه : يعني نقول مبروك؟
ابو زايد : نشوف رد البنت اول
بدال لا يروحون يرتاحون من السفرة الي كانت ٤ ساعات جلسوا كملوا سوالف عن طول الأيام الي ابعدوا فيها عن بعض ..
-
يوم جديد على ابطالنا بـ بيت ام فرح الي عزمت الكل بمناسبة رجعة صقر وسلامته ، وكالعادة الرجال بملحق و البنات بملحق..
جودي : فرح من انخطبت واهي هاديه ما توقعت العرس بيسوي فيها كذا
جميلة بمزح : مو اهي كانت اعصابها مشدوده طول الوقت تحتري العرس
فرح ضربتها : اسكتي لا احد يسمعك من الرجال يسحبوني صدق ميته على العرس وانا صدق ميته عليه
ضحكوا كلهم ..
ام نايف الي ابتسمت واهي تناظر حليمه : شكلك على وشك الولادة
حليمه : والله مدري الحين انا بأخر الثامن
جميلة ناظرتها : يعني توك مادخلتي التاسع؟
حليمه رفعت كتوفها ببلاه : نسيت اعد
جميلة طلبت من فرح دفتر وقلم وبدت تعد مع حليمه الايام و البنات كانوا مندمجين بالسوالف مع بعض..
جميلة ارتكزت واهي تننهد : حليمه يا قلبي لك يومين داخله التاسع
حليمه مسكت بطنها بخوف : لا تقولينها
فرح تبي تعصبها : ياويلك ياويلك
حليمه ناظرتها بطرف عين : بعدين قولي لي بعير تحقدين
ام نايف : اجل انتبهوا لها خلكم حولها لا حسيتي بدا الطلق يحتر ولا حسيتي بأي الم غريب عليك خبريهم
حليمه بتوتر : يالله تكفون غيروا السالفه
ام زايد : خلاص ياخي لا تروعون بنيتي
قامت وريف للمطبخ مع فرح الي نادتها تساعدها بالقهوة تسوي جديدة ..
وريف تناظرها مبتسمه : وكيف فارس معك؟
فرح قربت لعندها واهي تهمس : يهبل
وريف ضحكت بخفه : كنتي تحلمين بفارس الأحلام وجاك فارس فعلًا
شهقت واهي توها تستوعب : ايه والله توني استوعب
ام فرح دخلت عليهم : فرح تعالي معي
طلعت فرح ولحقتها ام فرح ورجعت على طول لوريف : حبيبتي تغطي لأن زايد بيجي ياخذ القهوة
وريف تغطت على طول وتعمدت ما تطلع تبي تكلمه انتظرته وسوت نفسها تشتغل وكأن الموضوع صدفه ..
دخل زايد ورجع خطوه : اوه معليش
وريف ابتسمت وبانت من عيونها : اخبارك؟
بادلها الابتسامه واهو متضايق منها شوي : الحمدلله
وريف ضيقت عيونها واهي تناظره بتدقيق..
زايد توتر واهو يمسح على لحيته : فيه شي؟
وريف حطت يدها على دقنها : ما اشوفك زعلان!
زايد ناظرها لثواني يستوعب خرابيطها : وانتي ليش تبيني زعلان؟
وريف بهمس : مو انت تبي فرح بس اهي ماتبيك؟
زايد بانت عليه الصدمه : صاحيه انتي؟
وريف هزت راسها بعفويه : لا بس مو انت الي تبيها!
زايد مسك راسه : يقلع ام الغباء الي فيك
وريف ابتسمت ببلاهه : ليه!
زايد قرب ياخذ القهوه من وراها وابعدت عنه على طول..
وناظرها و اهو شايل الدله : لا صحى عقلك النايم حاكيني
طلع بسرعه واهي تناظره مستغربه : هاو وش فيه ذا حط الحره فيني
طلعت متوجهه للملحق عند البنات ..
الي كانت شايفتهم بحاله يرثى لها من عدم التصديق وجلست جنب ليلى ..
وريف همست : وش ذا الهدوء وليش وجيهم كذا؟
ليلى ضحكت وهمست : تخيلي تو يافع جاء وكلم سُلاف يخطبها لصقر
وريف شهقت وضربتها على طول ليلى : عمى اسكتي
وريف لفت على سُلاف الي جالسه جنب وضحى و وجها احمر من الحياء..
وريف ضحكت : وش قالت هالمرجوجه؟
ليلى : لا تعجبك هالمره سكتت وقالها بنسمع ردك بعد يومين
وريف فركت يدها بفرحه : الحمدلله يعني هالاحضان ماجت الا لواحد بيصير حلالها
ليلى : بس ذا الي همك!
وريف : اكيد ولا تبينها تقرب من واحد واخر شي تتزوج واحد ثاني
ليلى : خلاص اسكتي لا يسمعون
عند الشباب ..
دخل ابو زايد و اهو مبتسم واهو حاس بنظرات صقر الي تلاحقه من دخل رفع عيونه عليه : يومين و الرد يكون عندك
زفر صقر براحه واهو يناظر ثامر الي ابتسم له : ودي اقول مبروك من الحين بس ماودي بالكسحه
صقر الي كان عارف بموافقتها لأنها تبيه بس مايدري ليش فيه نوع من التوتر : بارك لا تبخل علي
اختلطت سواليف ابو نايف و ابو زايد بسوالف الشباب و هواشهم ..
-
الساعة ١:٣٠ الليل ..
كان الكل نايم بـ بداره الا حليمه الي ارتفعت حرارة جسمها و طفشت واهي تمسح نفسها وتعلي المروحه عليها وتوجهه لها ، جلست بتعب واهي تمسك بطنها بألم : يالله
انسدحت مره ثانيه وزاد الوجع عليها و جلست بسرعه واهي ماسكه بكيتها ماتبي تصحي احد من اخوانها على الفاضي و يودونها للمستشفى كالعاده ويطلع المغص الي تعاني منه بين فترة و فترة و قررت تتحمل لأنها تعودت يشد عليها و يخف بعدين ، مرت عشر دقايق ، ربع ساعة نص ساعة واهي للآن تتلوى من الألم ناظرت لتحت بصدمه واهي تحس بشي ينزل الا و تشوف المويا صرخت بخوف : يــمه
وبلمح البصر اشتد عليها الألم اضعاف وصرخت اقوى ماعندها تنادي الكل الي ركضوا لعندها ..
جميلة مسكت راسها : موياتك نزلت!!!!
زايد ركض لغرفته يلبس ثوبه و ثامر شالها واهو ينزلها ويوصلها لباب الشارع تحت صراخها الي متأكدي الكل سمعه ، جت جميلة تركض بعباية حليمه وتلبسها بسرعه وبشكل مهمل : السيارة السيارة
ركب الكل الا جميلة جلست عشان صقر الي كان يناديها و طلع اخر واحد و التوتر ماليه : بتولد؟
جميلة جته واهي تمسكه : يارب يارب على خير
صقر تنهد بضيق من حاله الي ماخلاه يسبق الكل لها واهو يعرف انه اول من يفز لأجلها ..
جميلة ابتسمت : هونها و تهون
عند حليمه الي نزلوها من السيارة وعلى طول الى السرير ..
و ثواني وطلعت الممرضه مستعجله ...
ام زايد مسكتها : تكفين وش صاير؟
الممرضه تتكلم بسرعه : خلاص بتولد راس الجنين واضح
ابو زايد جلس على الكرسي يدعي لها و ام زايد متوتره ..
ثامر : يمه الله يهديك الي يشوفك اول مره تصيرين جده
ام زايد : اني خايفه عليها انها بكريه اول مره تذوق الألم بسم الله على قلبها
زايد : اكلم عمي ؟
ابو زايد : لا خلها لين تولد وعطهم خبر
بعد ساعتين من صراخ الوجع الي سمعوه من حليمه وخلت ثامر و زايد يبعدون من خوفهم عليها مايبون يسمعون وجعها اكثر ، دخلوا مره ثانيه عشان يتطمنون بس استوقفهم صوت الطفل الي اعلن خروجه للحياة ولله الحمد..
زايد بعدم تصديق : هذا اهو
ام زايد ناظرته و ابتسمت : ايه الحمدلله لك يارب الحمدلله
استمروا يسمعون بكائه و هدوء حليمه الي ماعاد لها حس
دقايق وطلعت الدكتوره واهي مبتسمه : ابشركم المريضه حالتها مستقره اهي و طفلها ، مبروك
ثامر حضن زايد بقوه واهو يصرخ : الحمدلله
ابو زايد وقف مبتسم : نقدر نشوفها؟
الدكتوره : حاليًا لا انتظروا نوديها لغرفتها الخاصة وقتها تشوفونها ..
مر الوقت بطيئ عليهم من حماسهم للحظة شوفتهم ..
اتصل جوال زايد الي ضرب راسه واهو تون يتذكرهم..
جميلة متوتره : ها بشر ولدت؟
زايد بفرحه : ايه ولدت ابشرك
فجأه سمع غاريطها و صقر الي اخذ الجوال : عطني اكلمها
زايد : اذا امداني لأن للحين ما شفناها
كلمه منه ومن صقر وسكر الجوال واهو يشوفهم مطلعينها بالسرير ونايمه ..
ام زايد فزت لها : يا حبيبتي يا نظر عيني
وحليمه كانت نايمه و التعب و الارهاق باين بوجها ..
منعوا دخولهم عليهم خلال هالثلاث ساعات لأجل راحتها بما انها نايمه و انتظروا طول الوقت و منها اتصلوا على ابو نايف يبشرونه الى حد ما سمحوا لهم ودخلوا على واهو يشوفونها صاحيه وابتسمت لما شافتهم ..
ام زايد باست راسها : مبروك
التموا عليها واحد واحد واهو يباركون ولفوا على حس ابو نايف و ام نايف و وضحى الي دخلوا ..
وضحى ناظرتهم : هذي الغرفة
دخلوا بسرعه واهو يباركون لها وام نايف بكت فرحة لشوفة اول حفيد لها و ابو نايف كان متماسك ومتأثر من لحظة دخوله عليهم ، دقايق وطلبوا منها تتغطى ودخل نايف الي كان يناظر بالأرض وبقلبه نار تحرقه : حمدلله على سلامتكم
حليمه بهدوء: الله يسلمك
ام نايف : تعال شفه
قرب لعنده واهو يشوفه بالسرير الصغير وكيف ملفوف ونايم امتلت عيونه دموع وغطاها بطرف شماغه واهو يلف عنهم لأجل ما يلمحونها ..
ابو نايف : وش بتسمونه؟
حليمه ونايف بنفس الوقت : سامر
لفوا على بعض بصدمه ونزلت عيونها بسرعه ..
ابو نايف ابتسمت : سامر سامر على بركة الله
ابو زايد يلطف الجو بينهم : متفقين على الاسم من ورانا؟
نايف : لا والله ياعم بس صدفت
ام نايف : ايه زين تصدف نفس الاختيار احسن من الاختلاف
مر الوقت ورجع الكل الا ام زايد الي قعدت معها ..
-
بالصباح انتشر الخبر للكل .. بـ بيت ابو زايد
فرح : اشوا انها ولدت قبل ملكتي
سُلاف ضحكت : وقبل ملكتي انا بعد
فرح ناظرتها : يعني موافقه؟
سُلاف هزت راسها :ايه
فرح : مبروك بيصير يلاحقك طول الوقت عشان بنطلونك لا يطلع
ضحكت سُلاف واهي تتذكر ركضه وراها وعصبيته ..
وريف وقفت واهي تسمع سيارتهم رجعت : شكلهم جو
جميلة وقفت وفتحت الباب لهم : وين حليمه؟
ثامر : بكره بتطلع
وشهق واهو يشوف وجود : اوه زوجتي هنا
بلمح البصر انخبط على ظهره بالعصى واهو ناسي ان ابوه معه : وش قلت يالسربوت!
ثامر حك ظهره بوجع : استهبل معها
زايد ضحك عليه وطاحت عيونه بعيون وريف و ابعدها على طول ما توقع ولا واحد بالميه انها فاهيه كذا وما تستوعب بسرعه
ابو زايد متوجهه للملحق لصقر ولف لسُلاف : اقول ورا ما تزيدين فرحتنا فرحة وتردين علينا الحين بدال بكره؟
سُلاف مسكت يد وريف واهي تضغط على يدها منحرجه ..
جميلة تفشلت : يبه لا تحرج البنت
فرح قامت على طول : موافقه البنت موافقه
ابو زايد ابتسم وناظر لسُلاف : صادقه هالهبيله موافقه؟
سكتت وناظرت للأرض واهي تتمنى الأرض تنشق وتبلعها موقف لا تحسد عليه اخوانه موجودين واهو اكيد انه يسمع دامهم فتحوا باب الملحق الي جالس فيه ..
ابو زايد ضحك على خجلها وينادي لصقر بصوت عالي : مبروك يا صقير
دخل ابو زايد للمحلق واهو يعلمه ردها الي طار من الفرحه ولو الود وده انه يركض لها ويشيلها قدام الكل ويصرخ ..
ليلى ناظرتها : نلتي مرادك يالسوسه
سُلاف ضربت خدها : ماعاد قدرت اتنفس من الحياء واهو يسألني
جودي : حتى انا استحيت وانا مالي دخل
وجود ضحكت واهي تتذكر ضربة ثامر ولفوا عليها مستغربين..
ام فرح وقفت : امشوا داخل دام العيال جو اكيد عيال خالد بيجون بعد
-
يوم جديد ..
دخلت حليمه شايله سامر وركضت لها جميلة تحضنها وتاخذ منها سامر : ياحبيبي بسم الله على قلبه
ام زايد : خليها تجلس
جميلة أشرت على غرفتها : روحي ترا مجهزه كل شي لك
اخذت سامر توديه لصقر وتحطه بحضنه واهو يبوسه ويشم ريحته : لبى قلبه
وجت حليمه واهي تحضنه وتسلم عليه ..
جميلة : ترا البنات بيجون اذا فيك حيل للجمعه
حليمه ابتسمت : حياهم الله
بعد ساعة ونص بدوا يتجمعون ..
وضحى و اهي شايله سامر و تهزه على خفيف : مره صغير حجمه يخوف
حليمه واهي منسدحه : على صغره الا ان طلعت روحي من ولادته
وريف ناظرتها : الا صدق انتي من متى حسيتي بالطلق؟
حليمه : ماقدرت انام حسبته وجع عادي بس ما طار عقلي من الخوف وعرفت انه طلق الا يوم شفت المويات تنزل و الوجع احتر
ليلى بخوف : يــمه
ام نايف : لا تخوفونها خلاص
ليلى : خالتي سكتيهم تكفين
ام فرح بمزح : يلا عقبى هالخوف لفرح وسُلاف
فرح و سُلاف صرخوا بخوف : الله لا يقوله
-
مر الأسبوع عليهم سعيد و خفيف تحت تجهيزات لملكة فرح و بعدها بيوم ملكة سُلاف و الي اتفقوا يكون زواجهم مشترك برضى من كل الأطراف " فرح و فارس - سُلاف و صقر"
الظهر بـ بيت ام فرح الي كان الكل متحمس لها و تجهيز الشباب للحوش و فرش الزوالي ..
زايد مسك ظهره بتعب : كذا يبه؟
ابو زايد أشر بعصاته : ضبط ذا
ثامر على اساس بيبكي : يارباه اليوم وبكره بنكرف زي ذا الكرف
ابو زايد : اقول خل عنك السوالف و افرش الزوليه زين
دخل نايف و اهو شايل ولده ..
ابو نايف : وانت وراك تمشي بهالصغير بذا الشموس رجعه لأمه
نايف : خله يبه عندي
جت وضحى واهي تركض بعبايتها : هاته ياويلك من حليمه
ابو زايد : عساه ماخذه واهي ماتدري؟
وضحى ناظرته : لا ياعمي تدري بس ماتدري انه جابه هنا
نايف : يعني انتي الحين لاحقتني من بيت عمي لهنا عشان تاخذينه
وضحى واهي مستعجله : اخلص علي والله تذبحني لو تدري انك مطلعه حرام صغير الشمس قويه عليه
اعطاها اياه و اهو متملل من هالحركات وخوف حليمه الزايد على سامر بكل مره ياخذه يجي احد يسحبه منه بحجة ان حليمه ما ترضى ، اخذته على طول واهي راجعه لأمها الي كانت تتجهز بـ بيت ابو زايد مع البنات و فرح و امها رايحين للمشغل ..
-
العصر بـ بيت ام فرح ، تجمع الكل حتى حليمه جت رغم رفض امها عليها انها نفاس وماينفع تطلع من البيت وايش بيقولون الناس عنها ..
طلع ابو نايف واهو شايل الكتاب بيده وينادي فرح الي جته مبتسمه وكالعاده وقعت و اعلنت موافقتها للمأذون و وقعت وبدت الاحتفالات و فرحة البنات الي التموا عليها و يغنون تحت نظر اهل فارس الي كانوا مبتسمين على لمة اهلها عليها ..
الجوهره "اخت فارس الكبيرة " : تبارك الرحمن اهلها حافينها حوف
ام فارس : ايه والله
جلست فرح واهي تشوف بس امه واخته الكبيره الي تعرفهم واهي مستغربه اخته الصغيره ليش ماجت بس ما فكرت كثير واهي تلاحظ وحده دخلت و واضح انها مستعجله وبدت تسلم على الكل بحرارة وحماس ..
وقفت عندها واهي تمد يدها مبتسمه : مبروك فروحه
فرح اتسعت عيونها بصدمه : انتي!
سديم ضحكت بخفه : ايه انا
فرح بلعت ريقها اهي عارفه ان فارس له اخت بهالأسم بس ما توقعتها اهي ..
الجوهره سحبتها : سلامات وش ذا التأخير!!
سديم همست : يختي فستاني انشق وقعدت اخيطه كتبوا الكتاب؟
الجوهره : ايه وفاتك كيف احتفالهم فيها يهبلون ماشاء الله
سُلاف ناظرت فرح الي منصدمه : وش فيك؟
فرح واهي توها تستوعب لفت عليها تناظرها : شفتي الي دخلت؟
سُلاف : ايه؟
فرح : هذي كانت المسؤولة بسباق الفروسيه الي اخذت كل معلوماتي عشان تسجلني صارت اخته الصغيرة
سُلاف ضحكت : يعني اهي الي مضبطته
فرح بشك : مدري انا كل ما اسأله شلون عرفت بيتي يقول بعلمك بعدين
ام فرح جلست جنبها : خلاص يابنت لا تتكلمين واجد و يقولون عنك جريئة
سُلاف : اوووه يا مريم خليها تسولف وتفرح ، بالعرس بتسكت ماعليك
الأحتفال الكبير كان للرجال برا اما البنات اكتفوا بوجودهم بس مع ام و خوات فارس و اخوانه و ابوه الي كانوا معه..
عند الشباب صقر جالس وعكازاته جنبه ومبتسم لفرحة فارس ورزته واهو يتخيل شكله لبكرا بملكة من سُلاف ..
ثامر بتعب بعد ما قهوى كل الموجودين : تكفى يرحم امك بكره لا تعزم احد بالملكة يكفي عرسكم
صقر ضحك : لا حبيبي ملكة وعرس كبير كلها لعيونها
ثامر : الله يقلعكم ياشيخ مسوين حبيبّه
وقف من جديد واهو يدور للمره المدري كم على المجلس يصب القهوة للرجال ..
انتهت هالليلة السعيدة على الجميع بكل خيرها و تعبها و حماسهم لليلة القادمة لملكة سُلاف الا على العيال الي كانوا يتحلطمون من التعب و الكرف لأن كان ابو نايف و ابو زايد ناوين يعزمون الكل من الرجال بينما النسوان اكتفوا تكون بينهم الا بالزواج وقتها بيكون الاحتفال كبير ..
-
الساعة ١٢:٣٠ الليل ، عند فرح
واهي حاطه سماعة التليفون عند اذونها وتمسح مناكيرها : وليش ما علمتني ان سديم نفسها المسؤولة؟
فارس ابتسم : انصدمتي؟
فرح : ما توقعت ابد انها معلمتك بيتي احس شوي غريب
فارس ضحك بخفه : ما علمتني الا عن حارتك ولا الباقي اجتهاد شخصي
فرح : ليش؟
فارس : الصراحه مستعجل بالرجعه للرياض وقلت اخذك معي
ابتسمت بخجل : يلا عاد بروح انام بكره عندنا ملكة
فارس عرف انها استحت : تصبحين على خير
سكرت السماعه واهي تحط يدها على خدودها وتحس انها احترت : يالله انا خفيفه مره
عدلت فراشها و انسدحت بعد تفكير عميق بكل تفاصيل حياتها و ابوها الي مستحيل يغيب عن بالها بالذات هالفترة رجعت لها تخيلات زوله رغم فرحتها بهالشي لأنها فاقدته الا انه مضايقها بنفس الوقت لأنها تعرف ان الحاله النفسيه الي عاشتها بفترة وفاته ماهي سهله ولا تبي ترجع لها وقاعده ما ترجع للوقت الصعب ذاك..
بالغرفة الثانية عند مريم امها ..
طوت سجادتها واهي تمسح على وجها و البكاء مورم بوجها ، ما قدرت تنام و لا قدرت تفكر بحياة بنتها الجديدة و تدعي لها و كانت تتمنى لو سلطان موجود بهاللحظة و يفرح ببنته مثل ما فرحت اهي ..
انسدحت واهي تتنهد بضيقه : يا مكبر الفراغ الي حطيته بقلبي يا سلطان بعد موتك الله يرحمك ويغفر لك
غمضت عيونها و الدموع لازالت تنزل ..
-
الصباح بـ بيت البنات ..
ليلى نامت عندهم عشان تجهز البيت مع البنات و الحوش عشان الظهر يجون العيال و يضبطونه عاد بلمساتهم ..
سُلاف تخصرت بعتب : ياويلكم من ربي يوم ان كل وحده فيكم تزوجت وما شالت شي عشانها بتعرس وانا كارفيني معكم من صباح الله
جودي : اقول نظفي وانتي ساكته
سُلاف رمت عليها المكنسه و شهقت جودي بوجع : تضربيني؟
سُلاف : ايه اضربك وش بتسوين؟
مشت متوجهه لها وصرخت وريف : بـنـت انـتي ويـاها!
وقفت جودي واهي تناظر لوريف الي تناظرهم معصبه وكملت حكيها : نشتغل كلنا ولا والله العظيم ان انتم الثنتين بتكملون الباقي على ظهوركم
ليلى : بنات سامحوني بس والله تعبت من الشغل بروح انسدح
وجود مسكتها: اجلسي والله العظيم ناسين انك حامل
سُلاف : هين من اول يوم بحمل دام هالدلع بيجيني
جودي ضحكت : لا احد يسمعك
لفوا على صوت الباب وطلعت وجود تفتحه ودخلت و وراها البنات "حليمه و ولدها وجميلة وسلوى و وضحى و فرح"
فرح : هـاي
سُلاف تتصنع الملل : ياليل هذي وش جابها
فرح : احمدي ربك بساعدكم
حليمه واهي شايله سامر : انا جايه بس اكشخ عندكم ماراح اشتغل ترا
وجود : احمدي ربك انك نفاس
فرح حطت شنطتها : يلا انا بساعدكم
وريف لحليمه : روحي اجلسي بالملحق مع ليلى
توجهت لليلى وبدت تسولف معها واهي تسمع ازعاج و صراخ البنات الي تتهاوش والي تفكهم ..
بعد ساعة ونص خلصوا و جلسوا بتعب ..
سُلاف ناظرت للساعة : بقى ساعة على الصلاة
جميلة : ايه ترا سامعه ابوي قايل بيجون بعد الصلاة على طول وبيوديك زايد للمشغل
سُلاف شهقت : لا فشله عندنا بشير ليش قلتي له!
حليمه ناظرتها : والله قلنا له ترا بس صقر اصر وبعدين ماهو غريب زايد اخو زوجك عادي
اذن الظهر وبدوا البنات يجهزون ملابسهم و يكوونها وبعدها بيبدون بالكشخه
عند العيال بالحوش ..
جابر شايل الزوليه على كتفه بتعب : وخروا بسرعه ثقيلة
جاء نياف يركض شالها من ورا عشان يساعده بس شيلته كانت قوية وخلتها تخبط براس ابو نايف ..
ابو نايف مسك راسه بعصبيه : وجع شق جبهتك يالعاق
نياف كاتم ضحكته وباس راسه : يشهد الله اني مادريت
ثامر دخل ومعه الأنوار : هذي وين اعلقها ماعندهم مواصير
ابو زايد : علقها بأذانيك ذا الكبار اخلص علينا بس
نايف ضحك واخذها منه : جب انا ادبرها
بدا كل واحد يشتغل تحت اشراف ابو زايد و ابو نايف الي كل شوي معصبين على العيال ..
-
العصر كالعادة جاء المأذون و جنبه صقر الي اخذ الكتاب و وقع وشال الكتاب ابو زايد متوجهه لداخل واهو ينادي جميلة الي اخذته واعطته سُلاف ..
وقعت واهي ترجف وتناظر البنات الي كانوا مبتسمين ..
وريف حضنتها واهي خانقتها العبره : مبروك
بادلتها الحضن : الله يبارك فيك وعقبالك
وريف ابعدت عنها بنظرات غير عن الي اعتادتها وكأنها تذكرها ماعاد تفتح هالموضوع ..
فرح جابت السماعات واهي تشغل الأغاني بأعلى صوتها وترقص بفرحة لأنها ماقدرت تاخذ راحتها بملكتها امس بوجود اهل فارس واليوم بتطلع الحره دبل و متجاهله الرجال الي كانوا برا ويسمعون للأغاني ..
ام فرح واهي تصفق وتناظر بنتها ترقص بشعرها وتلعب بفستانها وقامت معها سُلاف وجلسوا البنات وتركوهم الثنتين مع بعض و ام زايد تصفق واهي تناظر سُلاف مبتسمه وناظرت جميلة : تهبل
جميلة هزت راسها مبتسمه واهي تأيد كلام امها..
طلعت حليمه برا عن الصخب تبعد سامر الي بدا يبكي بسبب الازعاج ، واهي تهزه بحضنها ..
حليمه تمسح وجها بأصبعها : خلاص حبيبي
استأذنت من وريف تدخل غرفتها وجلست على الكرسي ترضعه وتقرا عليه الى ان سكت وتنهدت براحة : الحمدلله
خافت ترجع مره ثانيه ويرجع يصحى من الازعاج ويبكي بس وقفت واهي تفتح الباب لوضحى الي قالت لها تعطيه اياه توديه لنايف ترتاح منه شوي و اهو يبعد عن الاغاني بعد..
حليمه : لا خليه معي
وضحى : ماراح ياكله ترا بياخذه شوي ويرجعه منها ترتاحين انتي بعد
حليمه : جيبي جلال طيب انا بوديه
راحت وجابت لها وتغطت واهي تتقدم للباب الي كان واقف متكتف عنده ينتظر ..
حليمه بهدوء: نايف
فز على طول واهو يناظرها : لبي.. هلا
حليمه بحرص : انتبه له لا تعطيه احد ابد
نايف مد يده : هاتيه
حليمه : ولا تخليهم يقربون منه و يبوسونه
نايف واهو عيونه على سامر وتكلم ببرود : هاتيه طيب
مدته له وبالغلط تلامست يدينهم ببعض بس ما ابعدتها خوف على سامر لا يطيح على طول اخذه وطلع من دون لا يناظرها..
رجعت للبنات وجلست واهي تناظرهم مستانسين بالسوالف و الرقص ..
-
الساعة ١٠ الليل ..بـ بيت ابو زايد
حليمه وجنبها سامر : خلاص عاد ارضى ما تسوي علي!
صقر بزعل : يرضيك ماشفتها!
حليمه : ياخي توترت البيت كله عجه وخفت احد يشوفكم
صقر تنهد : الله يهديك بس والله لو فيني حيل ما انتظرت تجيبينها لي
حليمه شالت سامر وكأنها تنرفزت : خلاص صقر انت عارف لو اني حاسه يمديك تشوفها جبتها لك زي العادة بس صدق ماقدرت
صقر مسح على وجهه واهو ينسدح ويحط عكازاته جنبه : طفي النور وسكري الباب
طلعت وتوجهت لغرفتها مع ولدها..
تربعت على مفرشها واهي تناظره ومبتسمه وتلاعبه واهو يضحك ..
ناظرته بتأمل وعيونها بدت تمتلي دموع واهي تتذكر لما ضربت بطنها عشان تجهضه ماتبيه تنهدت بوجع : يا مقسى قلبي يوم كنت بفرط فيك
قربت لعنده واهي تبوسه بخده وتسمي عليه وكملت : ما تخيلت بيوم ان ربي بيرزقني الدنيا ومافيها
شالته تسدحه جنبها رغم تحذيرات امها انه تبعده عنها وقت النوم عشان تنقلب عليه
-
الصبـاح ..بدكان ابو زايد
ابو زايد : امسك اقرا المكتوب انعمت عيوني
اخذ ثامر الدفتر وبدا كعادته بالحسابات وابوه جنبه و عمه ابو نايف يناظرهم و يشرب الشاهي وعيونه تطل كل شوي على برا يناظر لدكانه اذا نياف موجود ولا انحاش كعادته ..
دخل ابو راجح واهم مبتسم : صبحكم الله بالخير
قاموا كلهم يسلمون وجلس وجاب له زايد الشاهي وبدت سوالفهم مع بعض و ثامر ماسك الدفتر ولاهي فيه ..
ابو راجح حط البياله فوق الطاولة و تنحنح : الا يا ابو زايد بيني وبينك عاد موضوع
ابو زايد بفضول : ايه ابد ابشر وش تامر بي فيه؟
ابو راجح ارتكز بجلسته : جاي اطلب ايد بنتكم حليمه لولدي راجح للمره الثانية
ابو نايف شد يده على بيالته واهو يناظر بأبو راجح ولا بدر منه اي ردة فعل ، و صدمة ثامر وزايد ما تقل عنه الي وقفوا شغلهم وناظروا ابوهم الي وجهه انقلب ١٨٠ درجة ..
ابو راجح ابتسم بخفيف : ما كأن ودك ؟
ابو زايد منحرج من توقيت جيته بالذات و اخوه عنده : والله يا خوي يا صافي ولدك رجال ما ينرد بس لزوم نشوف رد البنت
قام ابو نايف بعصبيه وطلع من الدكان داخل لدكانه ..
ابو راجح وقف واهو يرتب ثوبه : ابد اخذوا راحتكم ان شاء الله هالمره ..
ابو زايد مسكه من يده يوقفه : انت داري ان حليمه مطلقه وعندها ولد صحيح؟
ابو راجح هز راسه : اكيد اني على علم ببنت ابيها لولدي ، وبنتك والنعم فيها يا يافع بس لا تطولون بالرد
طلع وجلس ثامر بسرعه واهو منصدم : يبه بتوافق؟
ابو زايد تكدر خاطره : بكلم اختكم اشوف
زايد جلس جنبه وحط يده على كتفه : يبه لا تضيق خاطرك هذا نصيبها لو وافقت الله يوفقها دامه عارف ان عندها ولد
ابو زايد قام و الضيقه خنقته خنق : انتبهوا للدكان انا راجع للبيت
طلع من دون لا يناظر دكان اخوه الي كان متأكد انه كان يناظرها ، وصل للبيت ودخل واهو يشوف جميلة وميساء قاعدين بالحوش ومعهم صقر ..
ام زايد : وش عندك راجع بدري؟
ابو زايد جلس و وجهه متغير : وين حليمه؟
جميلة : نايمه شكل ولدها ما خلاها تنام بدري
طلعت حليمه واهي شايلته مبتسمه : لا صحيت خلاص
ام زايد : امشي اجلسي اشربي هالحليب
جلست وصقر مستغرب سكوت ابوه ..
صقر : يبه صاير شي بالدكان؟
ابو زايد ناظر حليمه : بنت
حليمه حطت الكوب بالأرض وناظرته : لبيه
ابو زايد : تذكرين راجح؟
حليمه هزت راسها : الي خطبني قبل؟
ابو زايد هز راسه : قبل شوي جايني ابوه يخطبك مره ثانيه
انصدم الكل وناظروا بحليمه الي ما تحركت عيونها عن ابوها : وش رديت عليه؟
ابو زايد و الود وده انها ترجع لنايف بس ما يبي بنته تنذل ولا يخليها تعيد التجربة الغلط مره ثانيه لما اصر على زواجها من نايف : قلت اسأل البنت
حليمه شدت سامر بحضنها : ما اخلي ولدي
ابو زايد وقف متوجهه لغرفته : يدري ان عندك ولد و الواضح انه راضي انتي فكري وردي لي
ام زايد لحقته وسكرت الباب : و اخوك يا يافع؟
ابو زايد مسك راسه بألم : الود ودي ترجع لولد اخوي بس انا وش يضمني انه بيحافظ على بنيتي ولا يأذيها مره ثانيه؟ قلت القريب اولى بس القريب جرحها يا ميساء
ام زايد جلست جنبه وحطت يدها على يده : لا تكدر خاطرك وخلها على هواها
بالحوش..
حليمه ساكته وتناظر للأرض بصدمه ما توقعت ولا ١٪؜ انها تتزوج مره ثانية ، صحيح ما فكرت توقف حياتها بس ما توقعت بهالسرعه توها ما كملت سبع شهور على بعضها متطلقه ..
صقر بحنيه : اذا ماتبينه منتي مجبوره عليه
حليمه ناظرته ببتسامه هاديه بدون لا ترد..
جميلة مستغربه : ياخي غريبه وش له يرجع مره ثانيه يخطب
صقر ناظر لأمه الي طلعت من الغرفة و واضح متضايقه : وش فيكم ياهوه متكدرين ؟ وحده انخطبت عادي خلاص ماتبيه لا تبيه قولي ايه
جميلة قامت واهي تناظرها : بسوي فطورك لا تروحين غرفتك
ام زايد جلست ..
حليمه ناظرتها : يمه ابوي زعلان؟ مايبيه يعني ولا كيف؟
ام زايد تنهدت : يمك ابوك خايف من زعل اخوه عليه ولا موضوع الزواج كله بإرادتك محد مجبرك على شي ذي حياتك واختاري الي تبين
صقر ابتسم : كفو
حليمه ناظرته واهي تبتسم بمزح : على هالتعزيز شكلي بوافق
ضحك صقر بخفه واهو يوقف وبعكازاته وده يمشي شوي بالحوش بدال هالجلسه وناصر معه خايف انه يطيح ويساعده ..
-
يوم جديد العصر .. بـ بيت ابو نايف
من امس جالس بينهم طول الوقت و وجهه اسود من الزعل و الغضب ماوده يناظر بوجه اخوه ابد توقع بيلقى رده الرفض بس بالعكس خاب ظنه وشافه كأنه مرحب للموضوع ومعطي الموافقة الكاملة لحليمه ..
ام نايف تناظر نياف وهمست : وش بلاه ابوك قالب وجهه؟
نايف ناظره : يبه وش فيك؟
ابو نايف بهدوء : ولا شي
وضحى جلست جنبه واهي تبتسم : الحلو وش عنده زعلان؟
ناظرها بطرف عين وعلى وجهه طيف ابتسامة من حركتها : مو شغلك
وضحى بوزت بمزح : هذا جزاتي بعد
ام نايف ابتسمت : طيب يا خالد بقولك شي بيحسن مزاجك
ابو نايف ناظرها : وشو؟
ام نايف ناظرت لنايف ولازالت مبتسمه : نايف كلمني اليوم ..
نايف كمل عنها : ابي ارجع حليمه
ابو نايف ارتكز منصدم : وش؟
ام نايف استغربت : يقولك برجع حليمه بيحاول يراضيها بدال هالزعل الي ماله داعي
ابو نايف فك ياقة ثوبه : لا عاد تطرون هالطاري مره ثانيه
نايف استغرب : وليه يا يبه ؟ يومني برجع بنت اخوك رفضت
ابو نايف بعصبيه : وما رجعتها الا بعد هالمده! وين ضميرك ما صحى الا بعد هالشهور
نايف : وين المشكلة اذا برجع زوجتي و ولدي!
وقف ابو نايف واهو يأشر بعصاته : بنت اخوي ماعاد هي لك
وقف نايف واهو مو فاهم اسلوب ابوه : وليش ماعاد هي لي! زوجتي وام ولدي
ابو نايف : ام ولدك ايه بس ماهي زوجتك طليقتك ، طليقتك الي رجع ابو راجح يخطبها و الظاهر انهم بيوافقون عليه وانت اقعد هنا فكر ترجعها بعد هالشهور
نايف فصخ شماغه بعصبيه : وش تقـول؟
ابو نايف : هذا العلم جاك ، ولا بعد انخطبت وانا جنب ابوها يا حسافة والله يا حسافة
نياف وقف ومسك يد نايف : تعوذ من ابليس
فك يده بقوه ولف عليهم لما لحقوه..
ابو نايف مشى بعصاته اخر واحد و بهدوء : لا تحاول ترجعها الحين بعد ما سمح عمك لواحد غيرك يلعب بالساحة يا نايف هذا ان كان براسك عقل
نايف و وجهه احمر من العصبيه وامه ماسكته : اقسم بالله ما ياخذها لو على جثتي والله ما ياخذها
طلع من البيت و وضحى تبكي : نيـاف الحقه تكفى الـحقه
ركض نياف وراه واهو يناديه ولا كأنه يسمعه ..
-
بنفس الوقت بـ بيت ابو زايد ..
طلعت جميلة بعد ماغسلت المواعين واهي تحط دلة الشاهي بينهم و الكل ملتم ويسولفون طبيعي رغم ضيقة ابو زايد الي ملازمته من امس ..
ابو زايد : ها وش ردك؟
حليمه : والله يابوي ا..
طق الباب بقوة وفزوا يتغطون واهم يسمعون صوت نايف ، فتح له الباب ..
زايد مستغرب : عسى ماشر!
نايف بأعلى صوته : قل لأهلك يتغطون
حليمه تغطت بجلالها واهي تاخذ سامر من امها وتحضنه بقوه
ابو زايد وقف وتوجهه للباب بخوف : اهلك فيهم شي؟
دخل نايف بعصبيه واهو يصارخ : الي سمعته صحيـح!
ام زايد مسكت حليمه ..
صرخ مره ثانيه بعد ما رد احد عليه : قولوا الي سمعته صحيح؟
صقر بهدوء : ايه صحيح
نايف بتهديد لعمه : اقسم بالله يا عمي لو اشوفها معه ان توصل للدم
زايد مسك يده بقوه واهو معصب : تهدد ابوي؟
نايف فك يده ودفه وناظر لحليمه : حليمه هذاني اتكلم قدامهم كلهم يا ترجعين لي يا ان تشوفين دم راجح عند رجليك
دخلت ام نايف بخوف ومسكته : تكفى نايف لا تكفى
فك امه الي كانت متمسكه فيه وتكلم بعصبيه : بترجعين معي الحين ولا اجيبه لك بدمه؟
حليمه بكت وبكى معها سامر وجميلة حضنتها : لا تخافين يهدد بس يهدد
نايف طلع المسدس : ما اهدد
ام نايف صرخت : نــايـف
ابو زايد ناظر لعياله : ابعدوا عنه
نايف بغضب : ايه انهبلت ولا تبوني اشوف مرتي مع غيري واسكت؟
نياف مسك يد نايف الي كان ماسك بها المسدس : نـايف امي لا يرتفع ضغطها
نايف ولا اهتم لأي احد واهو يناظر حليمه : بــترجعـين؟
ام نايف ركضت لعندها واهي تترجاها : تكفين يا حليمه تكفين طلبتك لا تضيع سنينه بهالسجون تكفين ارجعي اهو يبيك يبيك
حليمه بكت واهي تناظر كيف منظر اهلها الخايفين و نايف ماسك مسدسه و يهدد..
دخل ابو نايف ومعه وضحى : نــــايــف!
لف عليه و العرق يصب منه و ملامحه المحتده ..
ابو نايف مد يده : هات المسدس
نايف : والله اني ما اطلع من هالبيت الا واهي معي يا ان كلكم تذنبون معي بدم راجح
ابو نايف : اقــول جب المسدس!!
ام نايف مسكت يد حليمه : تكفين طلبتك
ابو زايد بعصبيه : و انا مجنون اسلم بنتي لواحد يهدد بالمسدس؟
نايف رمى المسدس على الأرض بعيد عنه : اليوم بترجع لي
ركض نياف للمسدس واخذه من الأرض ..
الكل ناظر حليمه ، الي شدت ولدها بحضنها واهي تناظر ام نايف الي جالسه عن رجولها تترجاها خايفه على ولدها من الغلط رفعت عيونها لسامر واهي تتخيل تعيش موقف هالخوف بولدها وناظرتهم : برجع معه
ابو زايد تقدم لها : حـليمه
حليمه جت لعنده وباست راسه : تكفى يبه هالمره خلني اختار وش ابي بنفسي
صقر : حليمه لا تغلطين!
ام زايد واهي تبكي : بنتي نفاس خلوها عندي
ام نايف وقفت واهي تحط يدها على صدرها : انا انا اهتم فيها زيها زي وضحى بس خلوها تجي تكون معنا تكفون
حليمه ناظرت لجميلة : تعالي بجهز اغراضي
نايف جلس على الكرسي وبصوت مسموع : انتظرك
ناصر ماسك ثامر بخوف : خالي
ثامر ناظره : ها
ناصر : كيف ترجع له واهي تطلقت؟
ثامر انحنى لمستواه وتكلم بهدوء معه : طلقها طلقه وحده
حضنه يهديه واهو توه يستوعب ان المفروض اخذه ودخله الغرفة مايشوف هالشي بس من الخبصه معد الواحد يفكر ..
طلع ابو نايف من البيت و وضحى مسكت امها الي كانت طايحه بالأرض وتبكي : كذا سويت في امي كذا؟
نايف تجاهلها ونياف دخل المسدس بجيبه واهو يشيل امه بيرجعها للبيت..
ام زايد لحقت بناتها للغرفة واهي خايفه : حلميه تكفين لا ترجعين
حليمه تاركه سامر على المفرش وتدخل اغراضها بالشنط ولا ردت عليها ..
ام زايد : حليم..
حليمه صرخت واهي تغطي اذونها بيدينها: خلاص خلاص اتركوني بحالي خلاص
حضنتها جميلة وبكت بحضنها : متى برتاح؟ تعبت يا جميلة تعبت والله ما استاهل اعيش هالعيشه
جميلة خنقتها العبره وشدتها بحضنها : اذا ماتبين لا تروحين
دخل زايد معصب : حليمه وش سويتي؟ بتروحين مع هالمهبول!
حليمه ابعدت جميلة : تكفون لا احد يضغط علي اقسم بالله تكه وبيصير فيني شي خلوني بحالي اذا محد مساعدني اطلعوا
قامت ام زايد شالت سامر وركضت حليمه اخذته منها ..
ام زايد استغربت : يبكي الولد!
حليمه بحركة غريبة : محد يشيله بس انا
جميلة ناظرتهم بمعنى خلوها بحالها واضح متوتره نفسيًا..
طلعت ام زايد و زايد واهم يشوفون نايف بالحوش وجنبه ابو زايد يكلمه و واضح الموضوع بينهم محتد و صقر يناظره بحقد ولو بيده قام و كسر العكاز فوق راسه وثامر متكتف ويناظرهم بهدوء ..
بعد نص ساعة طلعت حليمه بكم شنطة بمساعدة جميلة وزايد ووقف نايف واخذ الباقي وتوجهه لباب الشارع..
صقر بتهديد : نايف
لف عليه يناظره بدون لا يجاوبه ..
صقر : اختي لا تزعل مره ثانيه لأنها بتكون الأخيرة والله لو تقلب هالدنيا ما ترجع لك
نايف هز راسه وطلع وركب السيارة الي جابها نياف لهم واهم يشيلون الأغراض ومعه حليمه وسامر ..
-
بـ بيت ابو نايف ..
دخل خالد و جلس بالحوش ينتظر رجعتهم واهو متوتر من ردة فعل نايف بس ما يبي يوضح وجو عنده ميثاء ونياف و وضحى ..
نياف اخذ مفتاح السيارة : بروح له
طلع وجلست ام نايف تبكي : بغى يقطع قلبي ولا رحمني اعنبوه هالولد قلبه حجر قلبه من وش ! مارحم امه
وضحى : يبه حليمه بترجع بس اخاف نايف ما يعاملها كويس
ابو نايف : ماعاد لي دخل فيهم
بعد فترة دخل عليهم نايف و وراه حليمه الي حضنتها وضحى على طول..
حليمه ابعدتها عنها وتوجهت لغرفتها بدون لا تسلم على احد و شافتها زي ما اهي ماتغير فيها شي ابدًا لأن نايف استمر ينام فيها ..
حطت سامر على السرير واهي تنزل عبايتها وترتب شعرها الي احتاس من الحجاب ودخل نايف وراها يقفل الباب وابعدت عنه ..
نايف يحاول يتمالك اعصابه : وش بينك وبينه؟
حليمه بستغراب : ايش؟
نايف قرب منها : لا تلعبين بأعصابي علميني وش بينك وبينه!
حليمه : تستهبل انت وش تخربط!
نايف رص على اسنانه بغضب : خطبك قبل ولكني تزوجتك ويوم طلقتك رجع لك مره ثانيه بينك وبينه شي؟
حليمه اتسعت عيونها بصدمه : انت مستوعب وش تقول؟
نايف جلس على الكرسي واهو يناظرها وماسك راسه : ويوم تزوجتك مارضيتي بالعيشه معي لأنك تبينه صح؟ ويوم طلقتك وجيتك بنفسي ابي ارجعك ورفضتي لأنك تنتظرين تولدين ويجيك صح؟
حليمه قربت لعنده واهي تمسك ياقة ثوبه بعصبيه : ياخسيس انا زوجتك زوجتك كيف تقول عني كذا!!!!
نايف مسكها من كتوفها وعيونه بدت تدمع : قولي مابينك وبينه شي ريحي قلبي
حليمه خنقتها العبره : ليش تشك فيني؟
نايف شد على كتوفها وبنبرة غضب : قولي الصدق!
حليمه بكت ونزلت راسها بالأرض وهزت راسها : ما بيني وبينه شي والله ما اعرفه والله
حضنها بقوه و وجهه برقبتها واهو يشم ريحة عطرها ، ابعدته عنها بغضب : ابعد
ابعد عنها ورجع يجلس على الكرسي واهو مغطي وجهه بكل يدينه ويستغفر ويتعوذ من الشيطان قام واخذ له لبس ودخل الحمام يتسبح وحليمه انسدحت جنب سامر ماتبي تطلع برا ولا تشوف اي احد فيهم و نايف عندها تعامل ثاني معه ..
-
الصباح الباكر .. بـ بيت البنات
بالحوش تحديدًا
سُلاف مدت يدها : عطيني الجبن
فز الكل الى دق الباب وركضت وريف تفتحه ودخلت فرح واهي تشيل شيلتها من وجها : الحقـوا
سُلاف واهي تحاول تبلع لقمتها من روعتها ..
جودي : خير يالله صباح خير مين يجي للناس بذا الوقت
فرح جلست بحماس : مادريتوا؟
وجود بفضول : وش؟
فرح الي عرفت كل شي من وضحى و من حماسها ركضت لبنات سليمان تعلمهم الي صار ..
وريف : والله مو صاحي ماتوصل يرفع المسدس
سُلاف : صح انه غلط بس اكيد غار عليها
فرح تربعت : اقول ماعليكم من ذا كله وضحى تقولي ان ابوها وعمها واضح بينهم زعل
جودي ناظرت سُلاف : ماعليه كذا الاخوان يتضاربون و يتصالحون
سُلاف رفعت ابهامها و اهي مبتسمه : صح عليك
وريف بشكل مفاجئ : الحين امك تدري انك عندنا؟
فرح رمشت عيونها ببراءة : لا نايمه
وريف : الله يقلعك روحي كلميها لا يزوغ قلبها عليك
قامت متوجهه للتليفون الي تعرف مكانه وتتصل تعلمها رغم انها متأكده ان امها بتقطعها هواش ..
-
بـ بيت ابو نايف العصر ..
جتهم ليلى وجابر و انصدموا بتواجد حليمه بس سكتوا وكأن الموضوع طبيعي رغم المليون استفاهم فوق روسهم لما شافوها دخلت عليهم بالملحق بجلالها و ولدها وسلمت وجلست جنب ليلى ..
جابر واهو يناظر نياف بعدم فهم ونياف يأشر له انه بيعلمه بعدين ..
حليمه وقفت واهي تشيل ولدها : ليلى تعالي ساعديني فيه
دخلت ليلى وراها وسكرت باب الغرفة ..
ليلى مصدومه : يابنت وش السالفه! متى رجعتي وكيف وليش انا ما ادري
حليمه حطته الصغير بالسرير وناظرتها : سالفه طويلة
ليلى عدلت جلستها : تكلمي
قالت لها كل شي وليلى رحمتها ..
ليلى مسكت يدها : انتي مقتنعه؟
حليمه خنقتها العبره : لا بس تعبت من المشاكل وخفت اذا رفضت نايف يبتلي بولد الناس
ليلى : يهدد صدقيني ماراح يسويها
حليمه بتعب : واذا سواها؟ ولدي بيعيش حياته بدون ابوه؟ انا من عند اهلي وانا اعطيه ولده عشان يشم ريحته ويميزه ما ابيه ينحرم من حنان ابوه كيف لو غاب عن دنياه؟
ليلى حضنتها واهي فاهمه شعورها : الله يجبر بخاطرك يارب
حليمه واهي تبكي بهدوء : والله تعبت مع هالانسان ماني فاهمته يبيني او ما يبيني
ليلى ابعدت عنها وتكلمت بهدوء : دامه جاك واخذك من بين اهلك عشان ما تتزوجين غيره يبيك
حليمه تنهدت واهي تسمح دموعها واهي تسمع كلامها ..
ليلى ناظرتها : انتي تبينه؟
حليمه ضحكت بخفه من بين دموعها : والله مدري حتى رجعتي له ماكان بسبب اني ابيه لا والله مافكرت الا بسامر وخوفي عليه
ليلى ابتسمت بزعل : ماعليه انتي حاولي تنتبهين على نفسك دامك نفاس وكل شي بيتصلح حبه حبه
حليمه : ان شاء الله
ليلى وقفت : قومي نطلع لوضحى مو زين نقعد كذا
حليمه : اطلعي انتي ودي اقعد لحالي
طلعت ليلى واهي تسكر الباب وتشوفهم بالملحق مجتمعين ودخلتهم عليهم بلثمتها وجلست جنب وضحى الي بدوا يسولفون طبيعي ..
-
الساعة ٩:٣٠ الليل عند حليمه الي بعد ماخلصت شغل وترتيب بغرفتعا وتأكدت ان سامر نايم قفلت باب الغرفة واهي متوجهه للحمام بس استوقفها صوت الباب الي دق وفتحت لنايف ..
حليمه ببرود : انتبه له على ما اطلع
سكرت الباب واهي ما تسمع صوته بالغرفة وتوقعته نام ، طلعت وفعلًا شافته منسدح و الواضح انه نايم بدت تتحرك بالغرفة رايحه جايه واهو ولا تحرك فيه اصبع استغربت جموده بس ما فكرت كثير لما حست ولدها بدا يصحى واهو جنب ابوه جت على السرير واهي تلعب معه وتضحك واهو مبتسم لها ..
حليمه بلطافة : حبيبي
حطت شعرها ورا اذونها لما حسته تضايق من خصلاتها : اسفه يا روحي اسفه
فتح عيونه فجأه وقال : طفي المروحه
قامت بسرعه بخوف : مو نايم انت!
نايف يقلد اسلوبها بملاطفة سامر : حبيبي
وكمل : فيه احد ينام كذا؟
مسكت نفسها لا تضحك ماتبي تعطيه وجه : اذا منزعج من وجودنا اطلع برا
نايف قام واهو شايل سامر وحطه بسريره تحت نظر حليمه : خير ابيه قريب لا تبعده
ما رد عليها واهو يتلحف وسحبها بقوه وخلا ظهرها بحضنه واهو ماسكها من خصرها بقوه : نامي
حليمه تبي تبعد : وخر مافيني نوم
تجاهلها واهي لا تزال تحاول تفك يده من عليها ..
حليمه بتعب : ابي امشط شعري فكني
نايف : خليه اذا صحينا
حليمه بعصبيه : ما احبه مفكوك ابي اربطه
نايف : ما راح افك لو تصايحين ، نامي وريحي راسك
استسلمت واهي تتنهد بتعب وعيونها على سرير ولدها ..
بعد دقايق طويلة ماقدرت تنام ومتأكده انه مانام بسبب شدة يده عليها ما ارتخت ابدًا ..
حليمه بملل : لا الي انت نمت ولا خليتني امشط شعري
نايف ابتسم و وجهه مدفون بشعرها : بكيفي
حليمه حطت يدها تحت راسها واهي طفشانه وتتمنى لو سامر يبكي يبغى رضاعه عشان تقوم بس خاب ظنها لما شافته رجع ينام بهدوء ..
حليمه تتكلم بينها وبين نفسها بقهر واهي تناظره : تزين لا ابوك ياولد ابوك
-
بعد اسبوع من الأحداث الهادية ، ورجوع جميلة للدمام و قدرة صقر على المشي بعكازه وحده طبعًا بمساعدتهم و حليمه الي تجيهم بين كم يوم و تحاول ماتوضح توتر علاقتها بنايف لأهلها و سُلاف الي ملت من انتظار شوفة صقر ، وفرح الي استمرت تتكلم مع فارس على التليفون يوميًا رغم تحذيرات امها ، و هدوء علاقة ليلى وجابر  ، و رضى ابو نايف على ابو زايد ..

العصر بـ بيت ابو نايف بتواجد البنات بالحوش ..
دخل ثامر وعيونه بالأرض واهو ينادي ابوه الي كان بالملحق مع عمه..
حليمه ناظرته : وش تبي فيه؟
ثامر ناظر لأبوه الي طلع : يبه عادل ولد مشاري جاء ببضاعته الجديدة الحق قاعد يحتريك بالدكان
ابو زايد ابتسم : ياحليله وش جابه بعد هالغيبه!
وقفت وريف بخوف واهي تناظر خواتها والكل يناظرها مستغربين من ردة فعلها..
وضحى : وين بتروحين؟
وريف عدلت لثمتها وطلعت من البيت بسرعه وخواتها لحقوها حتى ليلى  ..
حليمه بعصبيه : تستهبلون انتم!
الكل يناظر الموقف مستغربين وطلعوا العيال من المحلق وزايد ماسك يد صقر ..
حليمه وقفت بعصبيه واهي ترفع عبايتها : ثامر يعني ماتعرف عادل اهو طليق وريف!!
ثامر مستغرب : وخير يا طير وان كان طليقها ماقلت شي غلط
حليمه واهي تتذكر حكي وريف عنه وكيف كان سيئ معها : حتى ولو مالك داعي
ثامر بعصبيه : وانا وش يذكرني انه طليقها
ابو زايد مسكه : يلا مشينا له
فرح مسكتها : حليمه هدي وش فيك عصبتي
جلست واهي متضايقه تتخيل وش قاعده تسوي الحين ..