بعدك يابوي اصبحت دنياي عرجاء بلا عكاز

19

عند البنات ، و بفرحتهم بتواجد ام عزيز وجمانه و جيتهم المفاجئة لهم ..
جمانه : والله اني فقدتكم وجيت مع امي ماتحملت
سُلاف : وكيف حياة الأمومه معك؟
جمانه واهي تشرح بحماس : تهبلل بمجرد انك تتأملينها شعور لا يوصف
ام عزيز : ليت ليلى فيه اشوفها قبل نمشي
سُلاف بزعل : يعني خلاص صممتوا تنقلون؟
ام عزيز بفرحة : عزيز لقى له من شهرين وظيفة وشرينا لنا بيت يلمنا هناك
جمانه : عشان كذا جيت مع امي اشوفكم ومنها اساعدها بشيل الاغراض وننقلها للمدينة
سُلاف : والله بشتاق لك خالتي
ام عزيز : يا بعد قلبي انتوا ريحة حبيبتي نوره "امهم" كيف بتركم؟ قلت لكم اجيكم وبتجوني
وريف : بس صعبه خالتي نجي للمدينة
ام عزيز : لا صعبه ولا شي ياكثر المواصلات الي تجيبكم وعلى حسابي
وريف ابتسمت بحرج : ما نقصد المادة بس الطريق طويل ولا نعرف شي
ام عزيز : عزيز وانا بنكون بستقبالكم يعني لا تشيلون هم بجيتكم
وريف : على خير كل شي بوقته زين
جودي بفضول : خالتي لقيتوا عروسه لعزيز؟
ام عزيز ضحكت بفرحه : ماقلت لكم
وجود بلعت ريقها تنتظر وش بتقول ..
ام عزيز كملت : اخت زوج جمانه شفتها تهبللل عاد خطبتها وتمت الشوفه الحمدلله بس ننتظر ردهم
وجود قامت على طول وطلعت ، والبنات قعدوا يصرفون الموقف..
جمانه : انا الي اخترتها لعزيز من تزوجت وانا عيوني عليها ماشاء الله تهبل
وريف ببتسامة تسليك : ايه الله يوفقه يارب
سُلاف لجودي بهمس : تبن عليه يقهر
جودي دقتها من جنبها وابتسمت بنفس الهمس : انطمي
ام عزيز وقفت : يلا جمانه ..يلا بالسلامة
وريف وقفت معها : ليه خالتي اقعدي توك جايه
ام عزيز : والله ورانا شغل بالبيت ماني تظلم الدنيا الا واحنا معزلين
جمانه واهي تشيل بنتها : يلا مع السلامة
ودعوا بعض وجت وجود تودعهم بعد ما نادتها سُلاف ..
-
بـ بيت ابو زايد ..الي كان متواجدين فيه ام نايف و وضحى
سكرت المكالمة وركضت للمحلق واهي تصرخ بفرحة: يمه المستشفى
ام زايد الي فزت بسرعه : ولدي
حليمه قربت لعندها : يمه صقر صحى صحى
ام زايد حطت يدها على صدرها : الحمدلله يارب ياربي لك الحمد
ام نايف ابتسمت بفرحة : اتصلي على بيتي العيال هناك
قامت حليمه بسرعه متوجهه للتليفون ..
وضحى بقلة حيله : ياربي هذي تراكض ما تحسب ببطنها شي
وقفت واهي ترفع السماعه وتنتظر الرد بحماس و تطق الطاولة بأظافرها ، اول ما حست الخط فتح..
حليمه بحماس : الوه
نايف ببرود : هلا
حليمه عضت شفايفها : ابي واحد من اخواني
نايف : ليه؟
حليمه بقلة صبر : بسرعه ابي واحد منهم
نايف ابعد السماعه واهو ينادي زايد الي جاء على طول ..
زايد : سمي وش بغيتي؟
حليمه بحماس : زايد المستشفى اتصلوا يقولون صقر صحى
زايد فز : استحلفك بالله؟
حليمه خنقتها العبره : تكفى تعال بسرعه نبي نروح له المستشفى
سكر التليفون واهو يركض لثامر يخبره وطلعوا بسرعه متوجهين لبيتهم واهم يركضون ، واستقبلتهم ام فرح وفرح عند الباب..
ام فرح ضحكت : يا دافع البلا هذا كبركم وتتسابقون
ثامر حضنها : عمه صقر صقر
فرح اتسعت عيونها : وش فيه؟
ثامر : قام قام
ام فرح دخلت البيت على طول واهي تشوف ام زايد وام نايف وحليمه و وضحى بعباياتهم بالحوش طالعين..
ام فرح مستانسه : صدق الي سمعته من المرجوج؟
ام زايد واهي تبكي : ايه يا مريم ايه
زايد الي نزل من تحت واهو معه المفتاح مستعجل : يلا الي بيركب معي والي بيركب مع ثامر عجلوا
حليمه : بس ابوي مين يعلمه ويجيبه؟
فرح : بجلس انا بالبيت اذا جاء بعلمه
ام نايف : واحد من عيالي يجيبه اهو و خالد
طلعوا بسرعه متوجهين للمستشفى ..
-
عند صقر بالمستشفى ..
الي بدت الحركة عليه وفتح عيونه بس كأنه بعالم ثاني يجاوب على الأسئلة متأخر و عيونه بالأرض بعد ما حس على نفسه فيه شي غلط بس ماهو قادر يستوعبه او انه قاعد يكذبه ، ما يبي احد يفاتحه بالموضوع لأنه بحالة نكران للواقع..
الممرض : الحمدلله على سلامتك اخ صقر
ماكان فيه استجواب من صقر ابدًا الا انه هز راسه ..
بشكل مفاجئ دخلوا اهله عليه وامه الي كانت متقدمه الكل واهي تحضنه وتبكي : يالله يارب الحمدلله لك الحمدلله انك فرحتني بشوفته الحمدلله
صقر لازالت عيونه بالأرض وبملامحه الجامده ..
ام زايد ابعدت عنه مستغربه انه مابدالها الحضن : وش فيك يمي تعبان؟
زايد الي كان ينتظره يرد : صقر؟
حليمه جلست جنبه ودموعها اربع اربع : صقر حبيبي يوجعك شي؟
صقر رفع راسه لها واهو يناظرها ببرود ورجع يناظر لتحت ..
حليمه ناظرتهم واهي مستغربه وناظرته : وش فيك؟
الممرض تنحنح وطلب منهم يطلعون ..وبمجرد خروجهم وقفوا ينتظرون الممرض يتكلم ..
ثامر بعصبيه : اخوي الله يهديك تكلم صلبت عظامنا
الممرض : اول شي الحمدلله على سلامته ثاني شي ..
حليمه : ايوا؟
الممرض : صقر تعرض لشلل بالجزء السفلي من جسمه
ام زايد شهقت وطاحت بالأرض : لا
زايد مسكها : اذكري الله اذكري الله
حليمه جلست على الكرسي واهي تذكر الله بهدوء ..
وضحى ناظرتهم : الحمدلله على كل حال ، اهم شي انه صاحي الحين وموجود بينا
ثامر تنهد بزعل وابعد عنهم وبكا لحاله ..وثواني دخلوا ابو زايد وابو نايف ونياف ونايف وفرح ..
ابو زايد بفرحه : بشروا وش صار؟
ناظر لميساء واهي تبكي منهاره : قولوا انها دموع فرح
زايد ترك امه ومسك ابوه يجلسه وجلس عند رجوله : يبه صقر بخير وصاحي وداري اننا حوله
ابو زايد بفضول : ايه وبعدين؟
زايد بهدوء : بس انه تعرض لشلل بالجزء السفلي
ابو زايد مسح على وجهه : لا حول ولا قوة الا بالله
نياف اتجهه لثامر الي مبعد عنهم ويبكي يهديه ويحضنه
نايف بهدوء : الحمدلله على سلامته
ابو نايف الي مو فاهم ومنصدم : وش يعني ماعاد يمشي؟
وضحى مسكت يده : ايه يبه
زايد وقف واهو يعدل غترته : لا توضحون زعلكم لصقر لأن اكيد الي فيه مكفيه
-
يوم جديد ..الظهر
وريف ركضت لعندهم : بنات بنات
جودي : لا تطيرين
وريف : صقر صحى
سُلاف قامت بسرعه : قولي والله
وريف : حليمه تو علمتني امس صحى
سُلاف حضنت وريف بفرحه : اخيرًا
وريف بادلتها الحضن لثانية وابعدتها : بس فيه شي
سُلاف هدت من حماسها وفرحتها : وشو؟
جودي بقلة صبر : يختي تكلمي ياشينك اذا قصدتي بالكلام
وريف : انشل
وجود غطت فمها واهي تشق بقوه : يمه
وريف ناظرتها بزعل : والله تقول ماعاد يمشي وبس قاعده تبكي ياعمري
سُلاف جلست بالأرض واهي تمسح وجها بصدمه ..
وريف : حتى تقول من كنا عنده ماتكلم ولا قال حرف واحد حتى ولا ناظرهم ابد
وجود بزعل : ياعمري عليه اكيد مو متأقلم انه صحى بعد هالمده وفاقد المشي
سُلاف قامت بهدوء متوجهه لعبايتها وناظرتهم : بروح له
وريف : شايفه الساعة كم تروحين له؟
طلعت واهي متجاهلتها ولحقتها جودي على طول : وقفي بجي معك
وجود : وانا بعد
وريف : اجل ماراح اقعد لحالي
دقايق بس وطلعوا كلهم لبشير الي وصلهم للمستشفى ودخلت سُلاف بسرعه قبلهم كلهم متوجهه لغرفته الي حافظه مكانها ..
الممرضة وقفت قدام الباب : غير مسموح الزياره
سُلاف والدموع متحجره بعيونها : بس دقيقة
الممرضة : الزيارة اليوم غير مسموحة للمريض
وريف بترجي : تكفين خليها دقيقة بس وبتطلع
الممرضة تنهدت واهي تناظر للمر الخالي من الطاقم الطبي : تفضلي بس لا تتأخرين عشان ماتصير لي مشكلة
دخلت سُلاف على طول واهي تناظره جالس ورفع راسه بهدوء لها ..
سُلاف خانقتها العبره : صقر
صقر نزل راسه واهو يغمض عيونه بقوه ويلف وجهه عنه ..سُلاف الي تقدمت له اكثر واهي تناديه : ما تسمعني؟
صقر بهدوء وبرود قاسي : اطلعي برا
سُلاف اتسعت عيونها من الصدمه : ايش؟
صقر رفع عيونه لها : اطلعي برا اقولك
سُلاف مسكت يده بيدينها الثنتين واهي تجلس على طرف السرير : صقر انا سُلاف! نسيتني؟
صقر فك يدها بقوه وصرخ : اطلـعـي بـرا!!!!
سُلاف بعناد : ماراح اطلع برا مو على كيفك انتظرك طول هالايام وتطردني!
صقر نزل راسه واهو يتنهد بغضب ..
سُلاف رفعت وجهه بيدها بجراءة : وش فيك؟
صقر وخر يدها من على وجهه واهو عاقد حواجبه : ما تسمعين الكلام انتي؟ اطلعي برا لا اناديهم لك يطلعونك
سُلاف حضنته بقوه و وجها على كتفه وبكت بهدوء : انتظرتك فوق الـ ١٥ يوم عشان اشوفك ويوم جيتك تردني هذي جزاتي؟
غمض عيونه بقوه واهو يسمع شهقاتها الهاديه وقربها الي خلاه يشم ريحتها وحركتها الي كانت اول مره ترضى يقرب منها وشد على قبضة يده واهو يبلع غصته ، ما يبيها تعاني معه واهو مشلول ما يبي يكون مثير للشفقه عندها
سُلاف ابعدت عنه واهي متمسكه فيه : حتى ماتبي تحضني؟
صقر يمثل الجمود : لا تعاندين واسمعي الكلام
سُلاف وقفت واهي تعدل لثمتها وتكلمت واهي تمسح دموعها : بطلع برا بس لا تنسى اني بغيتك و رديتني
لفت على طول متوجهه للباب ورفع يده وكأنه يبغى يوقفها مايبيها تطلع واهي زعلانه ولكن على طول نزلها ونزل عيونه لتحت لما لفت عليه ..
سُلاف ببتسامة الوجع ماليها : مع السلامة
طلعت وسكرت الباب الي تقدموا لها خواتها ..
وجود متحمسه : ها وش صار؟
سُلاف مشت بسرعه بتطلع من المستشفى والبنات يلحقونها ..
وريف مسكتها : بنت اصبري وش صاير؟
ركبت السيارة واهي تفتح الدريشة وتناظر الطريق ..
جودي همست : اركبوا اذا رحنا البيت نشوف وش سالفتها
ركبوا و توجهه فيهم بشير للبيت ، وخلال ربع ساعة وصلوا للبيت ونزلت على طول ودخلت واهي تفصخ عبايتها وترميها وشربت المويا بشراهه..
جودي مستغربه : سُلاف وش فيك؟
سُلاف جلست تهز رجوله ومتكتفه بعصبيه : طاردني ولا يبي يشوف وجهي حتى
وجود ناظرت جودي واهي مستغربه ..
وريف جلست جنبها بهدوء : لا تلومينه يمكن نفسيته سيئة اعطيه مهله يتحسن ويرجع زي قبل
سُلاف انفجرت واهي تبكي : وانا ؟ حتى انا نفسيتي تعبانه تعبت وانا انتظره تعبت وانا احلم فيه تعبت اعد الايام عشان اشوفه تعبت وانا افز لا سمعت صوت الباب يطق تعبت وانا افز لطاري اسمه تعبت وانا حاطه يدي على قلبي خايفه لا افقده مثل ما فقدت امي و ابوي ومع ذلك رحت له وانا الابتسامه شاقه وجهي والسعادة مو سايعتني بس وش استقبلني فيه؟ انه يطردني حتى بنظراته لي يحسسني كأني عدوه له
وجود حضنتها واهي تمسح على ظهرها : ماعليه
سُلاف : حتى حضني ما بادلني فيه ترك يده ولا احتواني فيها
وريف بصدمه : حضنتيه؟
جودي مسكتها وتأشر لها بـ اسكتي خليها
وريف همست : تحضنه؟ وصلت فيها
جودي : تكفين عديها شوفيها منهاره ماهي من عوايدها واضح واجعها الموضوع
وريف تنهدت بزعل وسكتت..
-
عند صقر ..
اول ماطلعت غطى وجهه واهو يصرخ بوجع و يحاول يحرك رجله الي ماكان يحس فيها ، صرخ كثير لدرجة التموا عليه الطاقم الطبي واهو يبعدهم عنه بغضب..
صقر دفه بيده : اتركني! طلعوني من هنا طلعوني
الممرض الي كان يحاول يكتفه : ضغطك يا صقر هد شوي
صقر الي كان صدره يرقى ويرتفع من العصبيه : اقولك طلعني لا تستغلون قلة حيلتي وتعاندوني
الممرض بطولة بال : بتطلع بتطلع بس اصبر هاليومين نتطمن عليك
جت الممرضة واهي ماسكه الأبره وغرستها بيده واهو كان يقاومها ويحاول يفك الممرض الي ماسكه بأقوى ماعنده وبدت تخف مسكته له لما حس صقر بدا يغيب عن الوعي وشدة جسمه ترتخي ..
الممرض ناظر للممرضة وتنهد : امنعي اي زيارات هاليومين
الممرضة نزلت راسها : طيب
-
بعد ثلاث ايام ..
فرح بزعل : لي اسبوع اقولك بشارك ورافضه ولا عندك سبب مقنع!
ام فرح بعصبيه : صاحيه انتي! تبين تركبين الخيل قدام الكل وتراكضين فيه
فرح : وابوي ماعلمني ركوب الخيل عشان اتخبى عن الناس وبعدين انتي ناسيه ابوي الله يرحمه كان يخليني اشارك بسباق الفروسيه!
ام فرح : تتكلمين عن ١٠ سنين ورا يومك بزر يا فرح لا ترفعين ضغطي
فرح بعناد : بشارك زيي زي الي بيشاركون و بفوز بعد
ام فرح : اعلى ما بخيلك اركبيه
فرح واهي طالعه : ايه بركبه
ام فرح تنهدت بزعل : ما امداني افرح انها تركت هالحركات وترجع لها مره ثانية
دخلت ام نايف بالصينيه : وش بلاها فرح داخله المطبخ معصبه؟
ام فرح : تبي تشارك بسباق الفروسيه
ام نايف : طيب خليها
ام فرح : البنت كبرت ما ينفع اخليها تتسابق مع الرجال
ام نايف : انا اقول خليها بنتك من صغرها و اهي هاويه هالشي لا تمنعينها
ام فرح : واخواني اذا رفضوا؟
ام نايف : وش عليهم في بنتك؟ الله يهديك مريم ماهقيتك كذا
ام فرح اخذت فنجالها : بفكر
ام نايف : عاد ارضي لأن واضح بنتك ناويتها اسمعها تو عند وضحى تتوعد انها بتروح
ام فرح : الله يهديها تعبتني
ام نايف : خليها و اعتبريها تتسابق مع عيال خوالها بالمزرعة
ام فرح : تهقين؟
ام نايف : ايه تروح برضاك ولا تروح غصب عنك
ام فرح : على خير
-
بـ بيت ابو زايد ..
حليمه الي حطت بحضن صقر صحن الشوربه واهو جالس على الكرسي المتحرك : كل
صقر : تو امي معطيتني
حليمه : بلا كذب لك خمس ساعات ماطب بطنك شي كل اخلص بس خلني اعطيك ادويتك
صقر رمى الصحن واهو معصب : قلت ما ابي
قامت حليمه واهي تشيل الصحن بطولة بال : طيب
كانت تحاول تتحمل تصرفاته من طلع بطلب من دكتوره الخاص الي حرص عليهم انهم يتحملونه لأن بفترة قاعد يستوعب الي حصل من الحادث و الغيبوبة و الشلل الي تعرض له ..
صقر ناظرها : حليمه خليه خلاص
حليمه لفت عليه واهي مبتسمه : ماعليه عادي
صقر مسح على وجهه : اعذريني والله ماكان قصدي
حليمه قامت واهي تبوسه بخده : حصل خير
صقر تنهد واهو يناظر رجوله وقامت لعنده حليمه واهي يدينها على كتوفها : تفائل الدكتور قال فيه احتمالية ترجع تمشي لا تشيل هم
صقر ناظرها : وش صار بهالأيام الي كنت غايب فيها؟
حليمه جلست قباله وحطت يدينها على رجوله واهي تشرح له وش فاته وتحاول تغير نفسيته شوي بالمواقف الطريفه الي حصلت و سالفه تجر سالفه ..
صقر بستغراب : وش تبرعه؟
حليمه تسندت واهي مبتسمه وتنهدت : اه ياصقر ماتدري وش صار فينا خوف عليك حتى بنات سليمان ارتعبوا معنا
صقر : فهميني سالفة التبرع!
حليمه : نزفت دم كثير وبغوا لك متبرع وتبرعت لك بنت سليمان الله يسعدها
صقر شد على يده : اي وحده؟
حليمه وقفت ماشيه للباب وناظرته : سُلاف
وطلعت وبقى و مسح على وجهه بقهر : بكل مره اقول بنساها يذكروني فيها
وكمل بقهر : ليه يا سُلاف تتبرعين ليه!
-
بـ بيت ابو نايف ..
زايد : عمتي خليها وش فيك عليها
ام فرح : ياخي البنت كبرت و ماصدقت على الله تهجد من هالسباقات وترجع مره ثانيه
زايد : خليها على راحتها ماسوت شي غلط وبعدين انتي عارفه بنات من المدن يجون عشان يشاركون هنا و الحين تمنعينها؟
فرح فزت : وانا قايله حتى لو رافضه بروح المسابقه بعد يومين يعني رايحه رايحه باذن الله
زايد ناظرها : خلاص بوديك
ام فرح زفرت بملل : الله يعيني
فرح قامت واهي مستانسه : بعلم البنات يجون معي بعد
ام فرح بصدمه : بتخلينهم يشاركون؟
فرح : لا بس يشجعوني ولا ناسيه المسابقه كبيره
ام فرح : الله يهديك كانك بتشقيني معك
فرح باستها : ماعليه
زايد وقف واهو يناظر نياف جايه : مشينا
زايد : مشينا
لف يناظر فرح : تجهزي قبل المسابقه نروح من بدري عشان تتدربين على المسار
فرح ببتسامه : طيب
ام فرح ناظرتها : شفتي اقولك انه طيب وابيه يتزوجك و..
فرح قاطعتها : قلت لك من عيال خوالي لا انسي
وضحى جت : يلا العشاء تفضلوا
-
يوم جديد عند البنات ..بالحوش
سُلاف الي كانت منسدحه وسط الجلسه وترسم ..
وجود لوريف : افتحي الباب
وريف بكسل : عجزانه
جودي ناظرت للباب وصرخت بـ : مــيـن؟
وريف فزت بسرعه وضربتها على راسها : وجع ان شاء الله قصري صوتك
جودي وقفت واهي تحك راسها بألم : اخلص من ليلى وتجيني انتي
فتحت الباب وشهقت لما شافتها داخله واهي مبتسمه : لـيلى!
حضنتها بقوه و التموا عليها بفرحة يسلمون عليها..
ليلى بتعب : خلوني اقعد تعبت
وريف مسكتها : تعالي تعالي
جلسوا حول بعض و سُلاف لمت اغراض رسمها على جنب وجلست بحماس تسمع سوالف ليلى الي غابت عنهم ٢٠ يوم ..
سُلاف : قلت نسيتينا حتى اتصالات بالقطاره
ليلى : وش اسوي صدق صعب اتصل عليكم وانتوا هنا بالسعودية وانا بماليزيا
وريف : خلي التشرهه بعدين وش رايكم بماليزيا حلوه صح؟
ليلى : اي والله تهبل طبيعتها
وريف الي كانت رايحه لها قبل مع عادل : ايه قلت لك تهبل
وجود جت بالقهوة و الشاهي : اليوم تقولين لرجلك بتنامين عندنا مالي دخل
ليلى : ان شاء الله بس دلعوني بما اني غبت عنكم كم يوم
وريف : ما يمدي ندلعك بكره بنروح مع فرح
ليلى استغربت : ليه وش عندها؟
وريف : بتشارك بمسابقة الفروسيه ومتحمسه مره لها وتبينا معها
ليلى بحماس : قدام بس بقول لجابر اول
كملوا البنات سهرتهم بضحك من سوالف ليلى بالمواقف الي تذكرها لهم و مقالب جابر لها ..
-
بـ بيت ابو زايد ..
فرح ماسكه يد حليمه : تكفين تعالي
حليمه الي بدت اعراض الوحام عليها تكون قوية من جت على نهاية الرابع : المسابقه بجيك اكيد بس التدريب مافيني حيل والله يافرح
فرح بوزت بزعل : خلاص كيفك
حليمه : عاد ارحميني وانا بكرشتي يختي والله ما توقعت الحمل يتعب كذا
فرح تنهدت : خلاص ماعليه
حليمه طلت بوجها : زعلتي؟
فرح بصدق : لا والله عادي بس كان ودي تكونين مع وضحى وبنات سليمان
حليمه : خلاص بجي ولا يهمك
فرح فزت : جد؟
حليمه هزت راسها واهي مبتسمه: ايه وتحملي اي تعب اتعرض له
فرح : لا بسم الله عليك ماراح يصير لك شي
دخل ابو زايد و وراه زايد وثامر وفرح تغطت ..
ثامر جلس واهو مبتسم : وخيلك وجبناه لأسطبل السباق ما عاد بقى الا تتدربين
ابو زايد بحرص : هالله هالله يافرح باللبس الساتر لا يطلع شي منك
فرح ابتسمت بخفه واهو تحت غطوتها : ابشر
ابو زايد تنهد : الله يهديك بس
حليمه قامت : امشي نروح لعمتي وامي
زايد : فرح ترا انا الي بوديك
فرح لفت عليه : بروح مع بنات سليمان
زايد استغرب : من بيوديهم؟
فرح : بشير
زايد هز راسه : لا خلاص انا اوديكم
ثامر : وانا بلحقكم بحليمه و وضحى
حليمه : خلاص اجل زين تقسمنا
-
الساعة ١٢:٣٠ الليل عند البنات .. بعد ما نامت ليلى عندهم
جودي و سُلاف بالسطح منسدحات على بطونهم ومو طالع الا روسهم يطلون على حوشهم و يرمون الحجر الصغير على الدرايش
جودي بضحكه : بتطير عقولهم
سُلاف حطت اصبعها السبابه عند فمها : اش لا يسمعون
اخذت حجر ورمته على الدريشه بقوه من غير شعور وانكسرت..
جودي مسكت راسها : الله يقلعك كسرتيها
سُلاف عضت شفايفها : مادريت
فجأه يسمعون صوت باب الحوش ينفتح ونزلوا روسهم عشان ما يشوفونهم ..
جودي همست وكاتمه ضحكتها : شوفي كشة وجود واضح مقومينها من النوم
سُلاف سكرت فم جودي بيدها وهمست : اسكتي
اتجهت نظراتهم على الثلاثة الي طلعوا ..وريف بالمقدمة وشايله عصى المكنسه و ليلى وراها ماسكه السكين و وجود متمسكه بظهر ليلى بخوف..
سُلاف نزلت راسها واهي تضحك : يبغى لهم صوره
جودي رفعت راسها تناظر : شوفي ليلى كيف تمشي
عند البنات ..
ليلى طلعت من الحمام واهي تسمع تخبيط غريب مشت لأقرب غرفة لها وكانت غرفة وريف وفتحت الباب بهدوء وتشوفها قايمه عند الباب..
ليلى صرخت : يمه
وريف فزت بقوه : ابو شكلك خوفتيني انتي الي تخبطين؟
ليلى بخوف : لا يمه مو انا والله
وريف طلعت من الغرفة وما امداها تسكر الباب الا ويحسون بقزاز الدريشه ينكسر وطاحوا بالأرض واهو يغطون اذانيهم : يــمه
على طول دخلوا غرفة وجود الي كانت قبالهم الي فزت بخوف : وش فيكم؟
ليلى سحبتها من قميصها : قومي قومي بسرعه
وجود قامت واهي مو فاهمه شي : وش صاير ؟ خوفتوني
ليلى جلست تنطط بخوف : سُلاف و جودي غرفهم بعيده يمه يمه كيف نطلع لهم
وريف : امشي نركض للمطبخ
وجود بصدمه : حرامي
صرخوا والتموا حول بعض...
وريف بخوف : وينه وينه؟
وجود ابعدت عنهم : انا اسألكم حرامي؟
ليلى اخذت الدفتر ورمته عليها : غبيه
ما امداها تكمل كلامها الا سمعت طقه ..
وريف واهي تستجمع قواها : امشوا للمطبخ بسرعه ركض
طلعوا واهم ماسكين بعض ويركضون بأقصى سرعه وكل وحده اخذت شي تدافع عن نفسها الا وجود الي ماكانت مصحصحه تمامًا معهم..
وريف تقدمت لباب الحوش وفتحته تناظر بعيونها دار ما دار..
وريف بهمس : مافيه احد
وجود بخوف : لا يمه لا نطلع تكفون
وريف تجاهلتها وكملت طلعت الين ما توسطوا الحوش واهو يناظرون بخوف وفجأه انرمت عليهم حجاره فرقعتهم عن بعض ..
ليلى ركضت لعند الغاز واهي تصرخ : يـمـمه
و وريف دخلت لداخل واهي تناديهم : امشـوا
وجود الوحيد الي ماتحركت جتها ام الركب وانحنت من الخوف : بنات تعالوا لي
بالسطح عند جودي و سُلاف ..
سُلاف نزلت راسها واهي تناظر للسماء وماسكه بطنها وميته ضحك : بـموت شعر وجود حكايه
جودي الي كانت مغطيه وجها بيدها وتضحك : يالله
سُلاف ناظرتها واهي تضحك : غبيات ما لاحظوا اننا مو بغرفنا
جودي مسكتها وقومتها : امشي نلبس عباياتنا
اتجهوا من الدرج الثاني عشان يدخلون من ورا البيت ياخذون عباياتهم ..وطلعوا على طول للسطح واهم يلبسون..
سُلاف بحماس : بيموتون من الروعه
جودي بتخطيط واهي تهمس : اسمعي اهم بيطلعون مره ثانيه للحوش خلينا ننزل من الدرج الثاني بسرعه ونخوفهم
سُلاف ابتسمت بخباثه : يلا يلا
ثواني و يسمعون وريف تتكلم ..
وريف تتصنع القوة : بلغنا الشرطة صح ياليلى؟
ليلى واهي تبلع ريقها : تراهم بالطريق
جودي ناظرت سُلاف واهي تضحك : خواتك سبايك لو انه حرامي صدق دخل واغتالهم ولا فيه احد يخوف بهالطريقة؟
سُلاف ضحكت : امشي ننزل قبل يدخلون
ركضوا لناحية الدرج واهو يرفعون عبايتهم فوق روسهم ويغطون فيها وجيهم وركضوا لناحية البنات واهم يصارخون ..
وريف وليلى و وجود الي كانوا حول بعضهم ويناظرون الحوش المظلم بخوف كان بدايته منور بسبب انوار الصالة الي فتحوها و على الاطراف ظلام ما ينور فيه الا نور القمر ، فجأه بدوا يسمعون خطوات سريعه جايه لمهم..
وجود بأعلى صوتها : جـنـي!!!!
ليلى غطت اذونها من بدت تلمح الشي الأسود الي بدا يقرب لعندهم  وصرخت : بـسم الله
وريف مسكت ليلى بقوه وعيونها على الي جايهم وكأنها تعلن استسلامها ..
بلمح البصر بدوا يسمعون ضحكات مألوفه عليهم ..
جودي نزلت العبايه من على راسها واهي تضحك : مساكين
سُلاف انسدحت بالأرض ميته ضحك : تحفه تحفه اشكالكم
وجود بكت من الخوف : الله ياخذكم يالمتخلفات
ليلى بعصبيه : تستهبلون انتوا! هذا تسمونه مزح الله يقلعكم يالغبيات
وريف مسكت العصى الي طاحت من ليلى و صارت تضرب سُلاف و وجودي بأقوى ماعندها : شايفينا ناقصين تطيرون عقولنا
سُلاف تضحك وتتألم بنفس الوقت : والله والله اسفين خلاص
و وريف مستمره تضربهم من غير شعور تبرد الي بقلبها : انطمي
وريف وقفت واهي ترجع شعرها ورا اذونها وتكلمت بعصبيه : هذي ثاني مره امد يدي عليك انتي وجودي لو ماتعقلون اقسم بالله تصير عاشر والف مره فاهمين؟
جودي واهي ماسكه يدها بوجع ونزلت عيونها لتحت : فاهمين
وريف مسكت ليلى و وجود ودخلتهم ووقفت عند الباب : اليوم تنامون بالحوش ولا اسمع نفس لكم
سُلاف تقدمت : وري..
سكرت الباب بوجها ويسمعون صوت القفل ..
ليلى بشماته : يلا جمدوا برا
وجود واهي تعلي صوتها : انسدحوا على الفرشه و العبايه خلوها لحاف لكم
سُلاف ناظرت جودي : هذولي ما ينمزح معهم!
جودي واهي تحك يدها : اوجعني ضربها
سُلاف رجعت لعندها وضحكت فجأه : شفتي وجه ليلى صار اصفر
جودي وملامح الألم واضحه عليها ناظرت سُلاف وضحكت : ماشفتي كشة وجود كأنها متكهربه
سُلاف لمت عبايتها عليها وانسدحت على الفرشه : والله وريف كل يوم تصدمني بشخصيتها
جودي انسدحت جنبها : انا من بعد الكف الي اعطتني اياه صرت اتوقع اي شي منها
سُلاف غطت وجها بالعبايه : خلينا ننام
-
بالصباح الباكر ..
وقف زايد سيارته قدام بيت بنات سليمان..
وريف طلعت واهي مستغربه : وش صاير؟
زايد ابتسم لها : مافيه السلام عليكم؟
وريف لمت عبايتها على يدها واهي ترفع اللثمه كويس على خشمها : السلام عليكم
زايد دخل يدينه بجيوبه واهو ملاحظ استغرابها : بوصلكم انا مع فرح
وريف : بس بشير اهو..
زايد قاطعها : انا الي بوديكم
ناظرت وريف الدريشة الي انفتحت وطلعت منها فرح : زايد بيودينا و حليمه و وضحى وامي بيجون مع ثامر
وريف ببرود : اها زين اجل
طلعوا البنات و ركبوا مع زايد ..
وريف : زايد شغل اغنية
زايد بهدوء : ابشري
فرح ناظرتها واهي مبتسمه : شكلك صرتي تمونين على زايد ولا بالعاده ما تكلمين عيال خوالي
وريف بلعت ريقها وهمست : فريح اعقلي
زايد ابتسم واهو يسمعها تهمس لفرح وعيونه على الطريق ..
سُلاف : اسمعي ترا لو ماتفوزين بالأول ذبيتك من الوادي
فرح ناظرتها بسرعه : بسم الله علي وبعدين ترا كل مسابقاتي افوز فيها بالأول عمري ما خسرت
وجود فصخت لثمتها : ماعاد اتنفس
وريف صرخت : بنت تغطي
وجود ناظرتها : فرح على رجلي محد بيشوف
وريف ناظرت لزايد واهي تشوف عيونه من المرايا وكان مركز بالطريق ..وتسندت براحة واهي تسمع صوت الأغنية يخالطها سوالف البنات ..
فرح بعفويه كعادتها : وريف قررت قرار
وريف لفت عليها واهي تشرب المويا وهزت براسها بـ معنى وش عندك؟
فرح ابتسمت لها : بزوجك
وريف شرقت بالمويا : وشو؟
جودي ضحكت : مالقيتي الا وريف تزوجينها
وريف ناظرت جودي : هذي موب صاحيه
فرح واهي مستانسه : اقسم بالله صادقه بزوجك بس قولي موافقه
وريف مستغربه : صاحيه انتي؟ وش تزوجيني وبعدين منهو عريس الغفله
فرح قربت لعندها تقنعها : شفتي ابو سمير؟
وريف عقدت حواجبها : ايه؟
فرح : عنده بنت المهم انها صديقتي عاد قالت اخوي وده يتزوج وجاء ببالي انتي
وريف بنرفزه : اقول بدال لا تزوجيني الرايح و الجاي زوجي نفسك
فرح عضت شفايفها وهمست : انا لو اشوف فارس احلامي قلت له نتزوج ما انتظرته يخطبني
زايد تنحنح : وريف
وريف ناظرت لناحيته : هلا
زايد : ماتبين تتزوجين يعني؟
وريف بملل : لا تقولي بعد عندك زوج لي
زايد ضحك : واذا عندي وش بتسوين؟
وريف اشرت بيدها  : لا تكفى يا زايد لا تجيب احد لي
زايد ضحك بخفه : ماراح اجيب تطمني
وريف حطت يدها على صدرها وتنهدت : الحمدلله
سُلاف قدمت نفسها وتكلمت بحماس : ماعليك منها اذا فيه رجال كفو خله يتزوجها
وريف عصبت : سُلاف انطمي
سُلاف تقهرها: بكيفي انا ابيك تتزوجين
وريف فتحت الدريشه بعصبيه وتكتفت واهي تناظر الطريق..
وجود رحمتها : خلاص ماراح نزوجك
وريف لفت عليها : وكأني غبيه بطاوعكم
فرح : خلاص يختي ماقلنا شي اخته كلمتني و ماجاء ببالي الا انتي
وريف تبي تسكتهم وعيونها على الطريق : خلاص افكر و اشوف
ليلى فزت : يعني بتتزوجين؟
وريف بتسليك : ايه افكر و ارد لكم
فرح صفقت بفرحه : اخيرًا
عند زايد الي سند يده على التكايه واصابعه تلعب بشاربه وماسك الدركسون بيده اليسار بقوه واهو يسمع فرح تخطط متى بتكلم صاحبتها و موافقة وريف للوضع ..
-
بمحطة السباق ..
فرح تناظره و اهو جاي لعندهم : ثامر وين خيلي؟
ثامر مشى لوجود واهو مبتسم : كيف حال ام عيالي؟
وجود كشرت : وعوه يا ثامر فكني من شرك
فرح ناظرتها : ثامر ولعنه اكلمك انا
ثامر لف واهو يرفع شعره: اسألي زايد
مشت فرح واهي تكلم نفسها : والله وين القى هالزايد
وقفتها وحده واهي مبتسمه : هالمنطقة للمشاركين بس
فرح : انا مشاركه
سديم : وين رقمك؟
فرح استغربت : ما معي
سديم اخذتها لمكان التسجيل واهي تسجل معلومات فرح : رقم ١٠
فرح اخذته ولبسته كان مثل السلسال الكبير وثبته على عبايتها ..
فرح مسكت غطوتها وبملل : كيف بركب الخيل فيه والله البلشه
طلعت واهي تركض متوجهه للبنات وخبطت بواحد وصرخت بألم : آي
طاحت بالأرض وقفت واهي تنفض عبايتها : ماتشوف اعمى انت!
وقف واهو ماسك خيله ولا تحرك فيه شي ببرود : والله العميانه الي جايه تركض ولا تشوف
فرح ناظرت رقمه وكان ٨ ورفعت عيونها لوجهه : اقول اسكت بس
مشت وخلته ووصلت للبنات واهي تطلبهم لثمه ..
سُلاف : تستهبلين جايه هنا ولا فكرتي باللثمه الا الحين؟
فرح بملل ومستعجله : يالله يابنات ترا اخر مره شاركت قبل الف سنة وش بيذكرني بغطوتي
ليلى وقفت واهي تفصخ طرحة فرح : بسويها لثمه لك وبكره جيبي لك مثل لثمنا احسن عشان ما تنفك
جتهم ام فرح وشهقت : بتتلثمين؟
فرح واهي واقفه و ليلى تلف الطرحه عليها : يعني بغطي عيوني وانا اتسابق عشان ادخل بالجدار
وريف : خالتي خليها كلها لثمه ترا
ام فرح بعصبيه : انا قايله هالمسابقة مابها خير اولها بتلبسين البنطلون وتطلع رجولك عندهم والحين لثمتك صدق انك قليلة حياء
فرح انصدمت : يمه تستهبلين انتي وش ذا الحكي! تراني ما تفصخت انا
وريف غمزت لفرح بـ اسكتي ماعليه
فرح انقهرت : وبعدين شوفي بنات سليمان لابسين لثم ولا عمرك علقتي عليها بس انا لا
ام فرح : انا وش علي ببنات الناس انتي بنتي يعني ارضى بالغلط و اسكت وش بيقولون الناس عنك!
ليلى بهدوء واهي منقهره من كلام ام فرح ، لفت وناظرتهم : من معها مشبك؟
وجود فتحت شنطتها ومدته لها ، شبكت طرف الطرحه وثبتته..
ليلى : خلاص كذا تمام
فرح باستها : مشكوره حبيبتي انقذتيني
طلعت مسرعه و البنات توجهوا للمدرجات وجلسوا يشوفونها طلعت بالخيل واهي ماسكته من اللجام وتلوح لهم مبتسمه ..
سُلاف وعيونها على فرح الي تتدرب و حولها المتسابقين : كلام امها قهرني
ليلى همست : حتى انا
جودي الي كانت جنبهم وناظرتهم : ماعليكم بنات تجاهلوها اول مره تسوي حركة مالها داعي و بعدين لا نكسر فرحة فرح شوفوها مستانسه..
سُلاف لفت لورا الي كانت جالسه وضحى وحليمه و وريف وام فرح : كيف حال الحامل الجميلة؟
حليمه ابتسمت : متعبني هاليومين الله يعيني على الشهور الأخيره
كانوا يسولفون شوي و شوي يركزون بفرح وتدريبها للمسار ..بينما نظرات زايد عن وريف الي كانت تضحك ولا همها موضوع الزواج الي احرق قلبه وين الي تقول مستحيل اتزوج والحين ماعندها مشكلة؟
-
عند فرح الي طلعت خيلها من الأسطبل واهي تعلق عليه الرقم ١٠
ولفت تلوح لهم بفرحة رغم انهم بعيدين عنها بمسافة كبيره ..
ركبت الخيل واهي ترفع عبايتها لنص فخذها و بنطلونها الأسود طلع واهي تهمس : امي لو تركز بتنهبل علي
وابتسمت بخفه واهي تسرع خطوات خيلها وبدت تدربه على المسار و تتعود عليه رايحه جايه ..لفت لجام خيلها للجهه الثانية لأن تحس ما اخذت راحتها بالتدريب و المتسابقين و الخيول موجودين بنفس المسار ..راحت لمكان رملي و طويل ومشت فيه شوي شوي تناظر الطريق وبعدها رجعت من البداية وبدت تركض بسرعه و ترفع صوتها لخيلها واهي تعزز له ..
فرح واهي تضرب رجولها بالخيل على خفيف : يلا يالرعد ، يلا يا رعدي
و بدأ الرعد يزود سرعته واهي تضحك مستانسه وتصرخ : كـفو
ثواني بس وناظرت بنظره سريعه لجنبها الايمن خيل ثاني يستابق معها ..
فرح استغربت بس ناظرت لقدام واهي مستمره تعزز لخيلها يسرع اكثر الين ما تعدته و وقفت واهي تربت على راس الرعد واهي مبتسمه : شاطر حبيبي
جاء لعندها بخيله واهو يناظرها : وش اسمه؟
فرح لفت اللجام واهي تناظره : الرعد
ابتسم : خوش اسم
فرح مشت متجاهلته ..
ومشى جنبها واهو يناظرها : وش اسمك؟
فرح شدت اللجام ووقف خيلها : مهتم تعرف وش اسماء المتسابقين الي معك؟
فارس ضحك بخفه : ايه
فرح بملل : فرح
فارس مد يده يبيها تصافحه : فارس
ناظرت يده ورفعت عيونها عليه : تشرفنا
مشت بالخيل ولحقها ولفت عليه بعصبيه : جايه اتدرب هنا لحالي لا تزعجني لو سمحت
فارس الي كان عارف خطر هالطريق : ماشفتي اللوحة ببداية الطريق؟
فرح : لا
فارس رفع الخوذه من على راسه يعدلها : روحي شوفيها و ارجعي لمسار التدريب وانتبهي على نفسك
مشى ولحقته بخيلها واهي تلمح لوحتين بس تبي تتقدم اكثر عشان تقراها .. وكان مكتوبه بخط احمر " منطقة خطرة" " ممنوع الدخول لغير الخبيرين "
فرح ناظرت للطريق واهي تزفر براحة : الحمدلله ما ابعدت اكثر
رجعت تدخل واهي تشوف البنات وقفوا واهم بالمدرجات وعرفت انهم فقدوها وأشرت لهم بمعنى كل شي تمام
مشت لعنده واهي ماتبي توضح لهم انها تكلمه وكانت تمسح على راس الرعد : شكرًا
فارس ناظرها : العفو يا ام غطوه و لثمه
ناظرته فرح واهي ترفع حاجبها الظاهره للكل بسبب لثمتها وابتسمت بخفه : ويه كأنك صرت مميزني؟
ضحك باستفزاز : عرفتك من رقمك
فرح مشت كملت تدريب متجاهله المتسابقين الباقين الي كانوا معها واهي حاسه بالنرفزه ماتعرف تتدرب و الوضع كذا حوسه بس مجبوره تعود الرعد وتتعود لأن بكره خلاص السباق ..
-
عند البنات ..
وقفوا ينتظرون فرح تجيهم ..
زايد وملامحه واضح انه معبس : وريف
وريف لفت عليه : هلا
زايد : تعالي لو سمحتي
مشت وريف له واهي تاركه البنات الي كانوا يسولفون و ثامر يحارشهم ما انتبهوا لها ..
وريف : سم وش بغيت؟
زايد يده اليسار بجيبه واليمين يلعب بشاربه ومحتار اذا يتكلم ولا ..
وريف استغربت : وش بلاك؟
زايد نفخ صدره واهو يتصنع الثقه وبداخله الي يصير يصير : ادري هالموضوع غلط ينفتح هنا بس باخذ رايك
وريف لمت عبايتها بيدها واهي تسمع له بانصات : لا امر وش تبي؟
زايد : امشي نبعد عنهم شي
مشت وريف لاحقته وكانت جنبه وابعدوا وصدوا عنهم ..
زايد والتوتر واضح عليه : بيني وبينك فيه موضوع بفاتحك فيه وابي نصيحتك
وريف استغربت : وحليمه وجميلة وينهم ليش انا بالذات؟
زايد : خواتي ما ابيهم يعرفون
وريف : تمام علمني وش عندك؟
زايد : خاطري بوحده
وريف اتسعت عيونها : وشو؟
زايد ابتسم بخفه : اقولك عيوني على وحده بس ماني ضامن موافقتها
وريف : طيب خل امك ولا وحده من خواتك يسألونها يجسون النبض
زايد : جسوا ورفضت
وريف تنهدت واهي تتذكر رفضها للعرس و التمست عذر للمقصوده الي يتكلم عنها زايد : والله مدري وش اقولك بس هالموضوع مايجي بالغصب
زايد واهو يناظرها بتدقيق : بس كأنها لانت لموضوع زواجها من واحد ثاني
وريف ضاق صدرها عليه : اجل الله يعوضك منت المنشود لها انت خاطرك فيها واهي خاطرها في غيرك
زايد بلع ريقه ودخل يدينه بجيبه : تهقين؟
وريف هزت راسها : مافيه غير هالكلام دامها رافضه الزواج منك بس من غيرك وافقت يعني ماودها فيك ، ادري بيوجعك الكلام بس انت تبي نصيحتي وماودي يعني اجاملك
زايد والعصبيه وضحت عليه : طيب
مشى ووقفته على طول وطلت بوجهه ببراءة : زعلت؟
زايد لف وجهه عنها : امشي لا نتأخر عليهم
وريف ماتحب احد يزعل منها ولا تبيه يمشي واهو كذا ومسكت ثوبه توقفه : اصبر
لف عليها وشالت يدها على طول : اسفه والله ما دريت بضيق صدرك
زايد واهو يعدل شماغه : ماقلتي الا الصدق يلا مشينا
وريف وقفت قدامه و اهي مضيقه عيونها : بالله زعلت؟
زايد الي كانت النار تحرق بجوفه واهو يحسها عارفه انه يقصدها بس تستغبي و كأنها اعطته الرفض المباشر : لا يا وريف مازعلت
وريف مقصدها تواسيه : زي ما جت يجي غيرها لا تكدر خاطرك
زايد واهو ماشي : ما ابي الا اهي
وريف شافته يبعد عنها وتنهدت : الله يعينك اجل دام حبك من طرف واحد
ومشت وراه وركبت مع البنات واهي كل شوي تناظره وكان جامد ولا كأنه الي معصب قبل شوي..
-
بـ بيت ابو زايد ..بعد ما عزمتهم حليمه عندها
حليمه ماسكه بطنها وميته ضحك على مقلبهم : والله لعبوا بحسبتكم
جودي منسدحه بتعب : والله قسى قلبها علينا وخلتنا ننام بهالأرض القاسيه حتى مخده ما اعطتنا
وريف : تستاهلون هذا جزاتكم ولا فيه احد صاحي بأنصاف الليالي يسوي مقلب كذا
فرح واهي تعمل شعر وضحى "تجدل" : لو اني فيه كان اكتمل المقلب
وضحى لفت عليها : عاد انتي راس الشر الزعيمه الكبرى
فرح شدت شعرها و وضحى صرخت بألم ..
قامت حليمه على صوت ثامر الي يناديها يعلمها ان صقر يبيها ..
حليمه سحبت صقر للملحق الثاني بطلب منه : لو انك قاعد مع العيال مو افضل
صقر مسح على راسه : بروح بس بطلبك طلب
حليمه ابتسمت : من عيوني وش تبي؟
صقر : نادي لي سُلاف ولا تعلمينها اني ابيها
حليمه ناظرته ثواني مستغربه وبعدها تكلمت : وش تبي فيها؟
صقر تكلم معها بخصوص علاقته مع سُلاف بشكل سطحي جدًا ..
حليمه حطت يدينها على فمها : هذا كله صار من وراي وبعدين صقر الله يهديك البنت جايتك وتطردها ليش؟
صقر بملل : ناديها يرحم امك ولا تقولين لها اني ابيها خليها تدخل وبكلمها
حليمه وقفت : خلاص ابشر
طلعت وخلال دقايق بس دخلت سُلاف وصقر كان وراها ، سكرت الباب حليمه ولفت سُلاف تبي تفتحه..
سُلاف ضحكت بخفه تحسب حليمه بتمقلبها : والله اني داريه..
طاحت عيونها على الي كان وراها وعلى الكرسي ، ارتجف قلبها واهي تشوفه اخر مره شافته قبل اسبوع و كان اللقاء سيئ وجرحها كثيير وجرح كبريائها واهي كل شي عندها الا كبريائها وكرامتها ..
صقر واهو يناظرها : سُلاف
سُلاف حاولت تفتح الباب بس كان مقفل وعصبت : حليمه يابزر والله ما اخليك
صقر تقدم لعندها واهو يمسك يدها : لا تتجاهليني
سُلاف ناظرته بقهر : انا جيتك وطردتني والحين جايبني لعندك وحابسني بالغصب مو على كيفك ولا امشي على مزاجك انا!
صقر سحب يدها بقوه ومسكها من عند كتوفها : اسمعيني وبعدها سوي الي براسك
سُلاف وقفت واهي تفك لثمتها وتفل شعرها عنده و تناظره بعيونها بجراءة : ماراح تطردني اذا سويت لك هالحركات صح؟ اعرفك انا
صقر ناظرها مصدوم وكأن مويا بارده صبت عليه : وش تسوين؟
سُلاف جلست عند رجوله واهي تناظره وتتكلم بقهر : سويت الي تبي فيني لمستني وقربت مني و تكلمت معي بلهجة المحبين وما وعيت على نفسي اني احبك الا يوم تنومت كنت مثل المجنونه انتظر خبر عنك وجيتك اتطمن عليك قلت بيستقبلني بحنانه الي كان يوهمني فيه بس وش سويت فيني؟ طردتني
وقفت واهي ترجع شعرها ورا اذونها : و اوهمتني بالمشاعر الي ماهي موجوده فرجاءً صقر لا عاد اشوفك تناظرني بهالنظرات الي يشوفك يقول انك مغرم فيني
تقدم لها واهو يمسك يدها بقوه واهي تحاول تفكه وسحبها لمستواه واهو يتأمل عيونها الي تلمع وواضح انها بتبكي : انا ما اوهمتك اني احبك
سُلاف غمضت عيونها بقوه ماتبي تشوف عيونه ونزلت دمعتها ورفع يده لخدها ومسحها : ناظريني
سُلاف ابعدت عنه بس كان اقوى مسكها وقربها لعنده الين ما طاحت بحضنه وقامت بسرعه واهي تعطيه كف : وصخ نذل حتى وانت عاجز مايردك انك تقرب مني من دون رضاي
صقر انعقدت حواجبه بغضب واهي تذكر كلمة "عاجز"
طردها بالمستشفى بسبب خوفه من نظرتها له من شفقتها عليه ولما تجرأ بمواجهتها له الحين انلذع من كلمتها ..
صقر واهو يأشر على نفسه : انا عاجز؟
سُلاف بلعت ريقها واهي توتها تستوعب كلمتها وسكتت ..
صقر كمل واهو معصب : تتهزين فيني يا سُلاف!!!
سُلاف دمعت عيونها و ودها تقوله ماكان قصدها بس تحس نفسها مجروحه منه كثير كثير وتبيه يحس حتى لو بهالطريقة الخطأ ..
صقر مسح على وجهه ولف بكرسيه للجهه الثانية يطلع المفتاح الثاني للملحق ويمده لها : خذيه واطلعي وهالمره صدق لا عاد اشوفك عندي
سُلاف وقفت تناظره ، وهز المفتاح لها و اهو ماده : خذيه
سُلاف اخذت المفتاح وتوجهت للباب ولفت تناظره كان منزل راسه ورجعت له على طول وجلست عند رجوله و خانقتها العبره : صقر
رفعت وجهه بيدها واهي تشوف عيونه حمراء و فايضه دموع عدلت جلستها واهي تناظره : ماقصدتها والله
صقر ناظرها و الغصه بحلقه : عطيتك المفتاح اطلعي يابنت الناس ماعاد بيني وبينك شي و اوعدك اني ما اتعرض لك حتى وانا عاجز
سُلاف شهقت وحضنته بقوه : والله اسفه ما قصدت
صارت تسمع شهقاته الخفيفه الهاديه واهي حاضنته ولا بادلها الحضن للمره الثانية انتظرته الين ماحست انه هدا ولازالت حاضنته..
سُلاف شدت عليه والخوف ياكل قلبها من انها تطلع مخذوله بس متأكده مهما كان الجواب ماراح تتراجع فيه : اذا تبيني ارفع يدك واحضني واذا ما تبيني اوعدك ابعد عنك للأبد ولا تشوف زولي حتى
مرت ثانتين اربع ولا رفعها واهي تنتظره ..
ارخت شدة يدها على ظهره واهي تبعد ورفع يده بسرعه واهو يرجعها لحضنه وصوته كاسيه الحزن : ابيك
سُلاف ارتخت بحضنه ودموعها مثل السيل عيت توقف والابتسامه على وجها..
صقر ابعدها عنه واهو يناظر وجها الي كان خصلات من شعرها جايه عليه ودموعها ما وقفت وطيف الابتسامة الي مرسوم على ثغرها..
صقر بهدوء: اسف
سُلاف مليت وجها ببراءة وعيونها تلمع : وانا بعد اسفه
-
يوم جديد الصباح ..
اتجهه الكل بدون استثناء للمسابقة ، الرجال بمدرج مخصص و النسوان بمدرج اخر ..
وريف واهي تناظر التجهيزات من المدرج وبحماس : فرح وينها ما اشوفها
سُلاف : ما اظن انها طلعت توها
ليلى جت وجلست بسرعه : السلام عليكم
الكل : وعليكم السلام
ام نايف : وراك تأخرتي؟
ليلى : جابر الله يهديه اهو الي اخرني
حليمه جالسه وتلاعب بطنها بأصابعها ومبتسمه ..
وضحى : يتحرك؟
حليمه هزت راسها بـ ايه
وضحى حطت يدها على بطن حليمه واهي تنتظر تحس بحركته..
حليمه : يتحرك فجأه ترا
وضحى وخرت يدها بملل من انتظارها لحركته : واضح ثقيل دم
حليمه اتسعت عيونها بصدمه : خير تسبينه ترا ما ارضى
وضحى ضحكت وهي تقرب لحليمه وهمست : ثقيل دم زي نايف
حليمه ناظرتها بطرف عين : اقول لا تشبهين ولدي فيه
جودي فزت واهي تناظر فرح دخلت واهي ماسكه خيلها : دخلت دخلت
سُلاف وقفت واهي تصفق وناظرتهم : قوموا صفقوا سلامات
وقفوا البنات يصفقون لها واهي تلوح لهم مبتسمه..
عند فرح ..
واهي تلبس وتناظر حولها ، كان عدد المتسابقين ١٠
٤ بنات ومن ضمنهم اهي و ٦ اولاد..
المسؤولة سديم دخلت واهي تناظرهم : جاهزين يا شباب؟
الكل بحماس : جاهزين
الا اهي كانت تفصخ بالقفازات و تلبسها وتعدل خوذتها كل شوي من توترها الواضح لفت للمرايا الي وراها واهي تعدل لثمتها وبدت تقرا اذكارها للمره الألف..
فارس جاء جنبها واهو مبتسم : اهلًا بالرقم ١٠
فرح ناظرته : اهلين فيك يا ثمانيه
فارس مد يده يصافحها ، ولا مدت يدها له..
فارس رفع حاجب : شكلك مغروره
فرح : المسك بأي صفة؟
فارس حك جبينه وابتسم بحراج : اها اوكيه تعودت على الي حولي نتصافح عادي مابينا تفكير اخر
فرح : وانا مو من ضمن الي حولك
مشت و وقفها لما ناداها..
فارس :نتراهن؟
فرح : بخصوص ايش؟
فارس : اذا فزت انا تعطيني بمركز اعلى منك تعطيني شي اتواصل فيه معك
فرح بصدمه : ها!
فارس ضحك على ردة فعلها : واذا فزتي انتي برضو تعطيني شي اتواصل معك فيه
فرح ميلت راسها بستغراب : صاحي انت؟ تحسبني جايه هنا اتعرف
فارس : وانتي متوقعه اني جاي من الرياض عشان اتعرف؟ شفتك وفرصة سعيدة اني استغلها
فرح هزت راسها بـ لا وتكلمت : بس انا مو فرصة وبعدين واضح انك ملكع وما اداني هالطبع
فارس رفع كتوفه : بكيفك
مشى وخلاها ورجعت تناظر نفسها بالمرايا : يارب افوز يارب
دخلت للاسطبل واهي تشوف خيلها جاهز وابتسمت وقربت لعنده واهي تلمس راسه وتبوسه : يارب مانخيب ظن بعض
سحبته لبرا واهي تدخل فيه للساحة وتشوف البنات الي فزوا لها يصفقون وبادلتهم التلويح و الابتسامة وناظرت للناحية الثانية واهي تشوف خوالها وعيالهم جالسين يناظرونها ..
عند الشباب ..
ثامر ماسك اذن نياف : ارجع ورا
نياف : دز امها جاي قبلك
ابو نايف ناظرهم : بتعقلون ولا خليتكم بدال هالخيول يركبون عليكم يالسلق
زايد لف وجهه كاتم ضحكته ولما شاف وجه جابر الي جالس جنبه ونفس حالته ضحكوا مع بعض
ابو نايف ناظرهم بستنكار : بلا الخفه بذا العقول
صقر الي كان جنب الكراسي بكرسيه المتحرك و نايف كان يمد له الي يبيه من اكل و شرب ..
لف صقر على سُلاف الي كانت تحت نظره طول الوقت واهي توقف مستانسه وتلوح وابتسم واهو يناظر لفرح الي دخلت بالرعد ..
ابو زايد مبتسم: استودعتك الله
نياف بحماس : بنت العمه كفو يارب ترفع روسنا
ابو نايف والصدمه نزلت عليه من منظر فرح : لابسه بنطلون جعلها السكني
ابو زايد لف عليه بسرعه : بسم الله على بنت وخيتي ياخي احسن دعاويك
ابو نايف بعصبيه : انت شايف لبسها! هذا لبس بنت ساتره
ابو زايد الي ماكان مقتنع بهاللبس بس هذا الأنسب عشان ما تتعرض للخطر : اقول لبسها مافيه شي وشف بلوزتها الين ركبتها وش تبي بعد قميص واهي بتركب الخيل
ثامر ناظره : وبعدين لبسها اسود بأسود كأنه عبايه
ابو نايف تنهد واهو يناظرها تركب لخيلها : لي كلام معها
نايف بعدم اهتمام فيهم واهو يناظر وضحى تلمس بطن حليمه و واضح مستانسه وتنهد بزعل على هالحال الي ماكان يتمناه بس مجبور انه يسوي اي شي المهم مايطلع قدامهم انه متمسك بوحده ماتبيه ، يحس بكذا يكون اهان نفسه
عند فرح ..
الي كانت المسابقة عبارة عن سباق المرحلة الأولى بخمس اشخاص
والمرحلة الثانية بخمس اشخاص
والمرحلة الثالثة تعتبر النهائية بسباق الشخصين الي فازوا بالمرحلتين السابقة ..
وقفت بخيلها بعيد واهي تناظر اصحاب الأرقام ١،٣،٥،٧،٩
يستعدون بدخولهم للدكه المخصصه لهم ويبدأ العد و ركضت احصنتهم بأسرع ماعندهم واهي تناظرهم بحماس كيف كل واحد اسرع من الثاني ..
جاء جنبها فارس واهو يناظر السباق ومتكتف : شخص واحد من المرحلة الأولى بيفوز ، وبيتراهن مع الشخص الفائز من المرحلة الثانية تتوقعين انتي ولا انا؟
فرح ناظرته واهي متوتره ان اهلها يشوفونها : ابعد عني اهلي ترا يشوفون لا تحطني بموقف سيئ
ابعد عنها بمسافة واهو عيونه على السباق : ابشري
لفت تناظر السباق الي بدا صراخ المشجعين لكل متسابق يكون متقدم مسكت لجام خيلها بقوه واهي تشوف رقم ٥ متقدم عنهم كلهم واهي تردد : يارب لا مو اهو يارب لا
فارس ناظرها : ماتبينه يفوز؟
ضحك بخفه يستفزها : ما الومك تخافين منه واضح انه قوي وخيله اقوى
فرح تتصنع الثقه : من قال خايفه منه؟ لا تقعد تتوهم
لفت بسرعه واهي تناظر المدرج قاموا مجموعة يصارخون ويشجعون بقوه وانتبهت ان صاحب الرقم ٥ فاز بالمرحلة الأولى ..وزفرت بتوتر واهي تهمس لنفسها : يارب تكفى يارب
بعد دقايق من تجهيز الدكات و المسار للمرحلة الثانية ، سحبت خيلها وركبت عليه واهي تدخل لدكتها الي كانت اخر وحده على اليمين ..تعمدت ما تلتفت ماتبي لا تشوف اهلها ولا تشوف المتسابقين الي كانوا على يسارها ..
فرح قربت لعند اذن الرعد واهي تعرف طبايع خيلها : لا تغدر فيني
الرعد بدا يصهل وكأنه يستجيب لكلامه وفاهم عليها..
ارتكزت لما سمعت العد التنازلي .. ٥-٤-٣-٢-١ انطلاق
انفتحت الدكات بسرعه وركضت الخيول بسرعة رهيبه وكانت متقدمتهم صاحبة الرقم ٦ و فرح كان كل تركيزها على المسار و الخيول لا تصتدم ببعض واهي تتذكر نصائح ابوها زمان لها وتنفذ كل شي يقوله ..
اسرعت اكثر وبدت تقرب لصاحبة الرقم ٦ واهي مبتسمه وتصرخ : يلا يالرعد يلا
بشكل مفاجئ السرج انفك ومالت فرح معه و الرعد لازال يركض بأقوى سرعته ، تمسكت فرح بقوه برقبته واهي تصارخ : لا لا
طاح السرج بالمسار وركض احد الطاقم يشيله عن الطريق واهو يشوف فرح كيف نازله عن ظهر الخيل ومتمسكه برقبته : رعد لا لا
شدت على نفسها بقوه واهي ترجع لظهره ولازالت متمسكه برقبته بس رجعت تطيح من سرعته و الخوف ياكل قلبها لا تجي لفة المسار واهي مايله كذا ما تبي تتأذى ولا تأذي الرعد ، شدت للمره الثانية واهي تنط بأقوى ماعندها وتوسطت ظهر الرعد و تمسك اللجام وترجع تركيزها للسباق وركضت أسرع و قربت لنقطة النهاية واهي تشوف نفسها متقاربة بالمسافة مع المتسابقين
عند البنات ..
سُلاف الي وقفت ويدينها عند فمها والتوتر واضح عليها : يارب يارب تفوز
وريف وقفت جنبها تناظر بحماس : بدوا!!!
بدوا يشوفون السباق الين ما طاحت من على ظهر الخيل وتعلقت برقبته
وقفت ام فرح بخوف واهي تصرخ : فــرح! يمه بنيتي
حليمه حطت يدينها عند اذونها وصرخت و وضحى حضنتها ولفت وجها ماتبي تشوف : يارب يارب احفظها
والكل جمد من منظرها الي حسوا انها تصارع تحت الرعد ..
جودي بكت من الخوف وصرخت : اتركيه اتركيه
سُلاف ناظرتهم مرتعبه : اهي ليش متمسكه فيه ليش!!!!
وريف نزلت لتحت واهي تعض اصابعها بخوف : استودعتك الله استودعتك الله
ثواني بس شافوها رجعت لظهر الرعد وزفروا براحة..
ام زايد واهي مبتسمه ولونها مخطوف من الروعه : يمه بسم الله عليها جت سليمه جت سليمه
ام فرح الي انهارت خوف عليها : يارب مالي الا اهي يارب انك تحفظها
ام نايف مسكت يدها تهديها..
عند الشباب ..
الي وقفوا كلهم من الخوف واهو يناظرونها طايحه تسحب رجولها بالتراب ..
زايد مسك راسه : يـاساتر
ابو نايف قام من مكانه بدون عصاه واهو متمسك بالكرسي الي قدامه و يحس اعصابه نشفت من الرعب وناظرهم واهو يصرخ : تحركـوا انـزلوا لبنت عمتكـم
نياف بفرحه قام ينطط : قامت قامت
ثامر و الفرحه ماليه عيونه وصرخ بأعلى صوته : كــفـو
ابو زايد جلس واهو ماسك قلبه : ابي ماء
ناوله نايف المويا وشربها ..
جابر بخوف واهو يمسح وجهه : نشفت عروقنا
صقر صرخ بفرحة واهو يشوفها تعدهم : كـفو كفـو يلا!!
عند فرح ..
صرخت بأذن الرعد : همتك يا رعد همتك
وكالعاده وكأن خيلها يفقه تعزيزاتها له اسرع لدرجة تعداهم بشكل ملحوظ وثواني بس وتعدت خط النهاية ..
وارتفعت اصوات المكبرات يعلنون
الآنسة فرح آلـ ، صاحبة الرقم ١٠ الفائزة بالمرحلة الثانية
وقفت بخيلها واهي تناظر اهلها الي كانوا واقفين و اصواتهم واصله لعندها ..
وأشرت لهم انها بخير ونزلت من الخيل تمشي لعندهم لأن تعرف ان امها الحين بحاله صعبه وتبي تتأكد منها ..
ام فرح قامت واهي تبكي بفرحه : الحمدلله الحمدلله يارب انك تحفظها
رجعت لداخل واهي تجلس على الكرسي وتشوف رجلها اليمين الي تحس بألم فيها ..
دخل واهو يركض وجلس عند رجولها : فيك شي؟
فرح ابعدت عنه بسرعه : لا
فارس مسك ساقها وسحبه لعنده ويرفع بنطلونها وبحزم : بشوف
فرح تألمت ومسكت يده تبعدها : اوجعتني
خفف فارس من مسكته لساقها واهو يتفحصها وكان مثل الكدمه ورديه..
فارس ناظرها مستغرب : ليش ما ربطتي السراج! من متى ينفك اهو
فرح والتعب واضح عليها : والله رابطته هذي اول مره تصير لي
فارس وقفت واهو مبتسم : مبروك لك شدي حيلك للمرحلة النهائية
فرح تسندت بتعب : ان شاء الله
فارس : بنادي الطاقم الطبي لك
طلع و دقيقة بس ودخلوا عليها يركضون يشيكون على رجولها ..
الطبيب : رضه بس راح تعلم على رجلك ككدمة
فرح : بس راح اكمل سباق صح؟
الطبيب : تقدرين اكيد
فرح زفرت براحة : الحمدلله
دخلت سديم واهي تنزل السماعه عن اذونها : فرح يلا بسرعه المرحلة الثالثة بتبدا
نزلت فرح بنطلونها تغطي ساقها الأيمن العاري واهي تحاول تمشي طبيعي لأجل ما يلاحظونها اهلها لأنها متأكده بيسوون سالفه ، ومتأكده انهم يحاولون يطلعون من المدرجات بس الأمن رافضين ..
راحت للرعد واهي تشوف السرج حاطينه عليه ورابطينه زين بس ماتبي تكرر الخطأ ورجعت اهي بنفسها تتأكد ..
ثواني بس واهم يعلنون بالمكبرات عن المتسابقين الي بيدخلون للمرحلة النهائية
صاحب الرقم ٥ ، فهد آلـ
و صاحبة الرقم ١٠ ، فرح آلـ
فهد جاء لعندها : الحمدلله على سلامتك
فرح بلعت ريقها من توترها ان هذت منافسها : الله يسلمك
فهد ابتسم بخفه : حتى انا متوتر اني بنافس وحده قدرت تكمل السباق بدون السرج ماشاء الله
فرح حكت براسها واهي تهمس لنفسها : لهدرجة واضح توتري منه
ورفعت صوتها له : بالتوفيق
مسك خيله واهو يتعدها واهي تشوف فارس جايها : وش يقولك؟
فرح ناظرت فهد ورجعت تناظر فارس : بيني وبينك خايفه منه
فارس عقد حواجبه : قايل لك شي؟
فرح بسرعه : لا لا بس احسه قوي
فارس حط يدينه ورا ظهره : بالسباق ناظري المسار بس و احرصي على سلامتك و سرعة الخيل ولا تفكرين بالمنافس
فرح ناظرته واهي تتنهد : طيب
سديم جت لفرح : يلا مستعده؟
فرح مسكت لجام الرعد : ايه
مشت وراها واهي تدخل الدكه وسكرت عليها واهي تناظر على يسارها فهد الي لف عليها مبتسم واهو يعدل خوذته : بالتوفيق يا عشرة
فرح ابتسمت له بتسليك و الخوف متملكه ، وكعادتها رجعت تتذكر نصائح ابوها لها وكأن اصوات الكل غابت عنها لما شافت هيئته واقف ورا السياج يشجعها غمضت عيونها بقوه واهي تبلع غصتها ..
فرح هزت راسها : مو وقتك فرح مو وقتك
لف عليها فهد واهو مستغرب : تكلميني؟
ارتكزت بجلستها وهزت براسها بـ : لا
رجعت تناظر لورا السياج الي كان خالي الا من الطاقم الأمني الي واقفين وراه وزفرت براحة ، ثواني بس وبدأ العد التنازلي وكان كل تركيزها على المسار وهمست : يارب
اعلنوا بالمكبرات : انطلاق
انفتحت الدكات وبدأ سباق الخيلين مع بعضهم ، وكانت فرح تسمع فهد واهو يعزز لخيله وكان متعديها..
فرح مسكت اللجام اقوى تحاول تقارب المسافة بينهم على الأقل ..
قربت لعند اذن الرعد : لا تخسرني يا رعد اسرع اكثر
جت بجبنه ولف عليها فهد يناظرها بنظره سريعه ورجع يناظر للطريق واهو يسمعها تقول لخيلها بصوت عالي وحماسي : واحد اثنين ثلاثة يــلا
اسرع خيلها بشكل جنوني وتعداه بشكل ملحوظ وبدت تسمع صراخ اهلها وابتسمت وعيونها على الطريق : رعد يلا يلا
ركضت واهي مو حاسه على نقطة النهاية الي تغيرت لونها للون الأخضر وصوت المكبرات تعلن فوزها : فرح بنت سلطان آلـ الفائزة بالمركز الأول ..
وقفت خيلها واهي ترفع يدها بفرحة تلوح لأهلها الي تشوفهم جاينهم يركضون ..
نزلت من الخيل واهي مبتسمه وعلى طول حضنتها امها واهي تبكي : يا حـبيبتي
فرح بادلتها الحضن : الحمدلله يمه الحمدلله
وكان البنات حولها يصفقون ويحضنونها والعيال اصواتهم العاليه يرقصون ومسببين ازعاج بالمكان..
ابو نايف جاها واهم مبتسم و ضربها بخفه بعصاه : مبروك يالصايعه
فرح ضحكت واهي تحضنه : الله يبارك فيه خالي
باست راسه وراس خالها يافع واهي تناظر فرحة العيال وضحكهم ..
سديم المسؤولة : فرح تفضلي للتكريم
فرح تركت حضن سُلاف ومشت ورا سديم واهي تنزل خوذتها بفرحة ولفت تناظر و السياج : بعد ست سنين شفت هيئتك توقعت اني تخطيت يابوي
نزلت راسها تمسك العبره بس رفعت نظرها واهي تسمع صوته : مبروك فرح
فرح هزت راسها لأن لو تكلمت بتبكي..
فارس قرب لعندها : يوجعك شي؟
فرح عضت شفايفها وهزت راسها بـ لا
سديم بحزم : فرح يلا اصعدي على المنصه
اخذت الميداليه و الشهادة واهي تشوف اهلها للآن مستمرين بالفوز ووقفت على جنب تنتظر تكريم فهد الي فاز بالمركز الثاني..
فهد جاء جنبها واهي ماسك شهادته : مبروك يا غريبة
فرح ناظرته واهي رافعه حاجب : الله يبارك فيك
نزلت من على المنصه واهي رايحه لأهلها تتفاخر بالميدالية : فزت
نياف بفرحه : والله رفعتي روسنا يابنت العمه
فرح بخجل : تسلم
حليمه جتها واهي فاتحه يدها : يلا بقى دوري عاد
بادلتها الحضن واهي تضحك : عاد مايمديني احضنك بقوه لا ينعصر الي ببطنك
حليمه مسكت بطنها وضحكت بخفه ورجعت لورا واهي تشوف نايف مدخل يدينه بجيوبه ويناظرها وتعمدت تبعد عنه وتكون ورا البنات عشان ما يشوفها..
وريف مسكتها : اقول ولد عمك ماشال عينه عليك
جودي غمزت : شكله فاقد حلوم
حليمه بعصبيه همست : اش انطموا لا احد يسمع الحين
جودي ضحكت واختفت ابتسامتها لما شافت نياف جاي لعندها ..
نياف و اهو مبتسم : كم لي ماشفتك؟
جودي ابعدت عنه خطوتين : ليه؟
نياف ضحك : وش ليه؟ الواحد ما يفقدك يعني ولا شلون
ناظرت وريف مصدومه من كلامه وقدام اختها بعد..
نياف ضحك على ردة فعلها : خلاص ولا يهمك ماقلنا شي بس لا تتغلين واجد
جودي ببلاهه : طيب
راح وتركها تمسكت بيد وريف بخوف : يمه هذا وش يخربط!
وريف الي ما اعجبها تقربه منها بهالطريقة : لا تعطينه وجه
ام نايف تناديهم من بعيد : يلا مشينا
راحوا لبرا وكل واحد انقسم بسيارة ..
و وريف كانت تنتظر حليمه الي راحت مع سُلاف لدورة المياه وفرح الي تغير ملابسها ..
زايد : وريف
وريف لفت عليه : هلا
زايد وقف قدامها وتوه بينطق الا وحليمه طالعه و وراها سُلاف ومشى عنهم راكب لسيارته ..
وريف استغربت وركبت على طول : زايد وش فيك؟
زايد يصرف : كنت بسألك عن الباقي بس شوفيهم جو
وريف الي صدقته : تمام
-
بـ بيت ابو نايف العصر .. الي عزم الكل بمناسبة فوز فرح
زايد : بالرياض دكتور بيعرف لحالتك قل تم بس
صقر : ما اقول لا ان كان بيساعدني من هالحال
زايد ربت على كتفها : بكلم امي و ابوي اقولهم بعدين وبعدها ابشر نروح له
صقر بتوتر : مافيها ضرر علي؟
زايد شد على يده : انا من دريت عن حالتك وانا امشي و اسأل ومالقيت الا ذا الدكتور بالرياض والمدح عليه كبير نروح ونشوف
صقر هز راسه : على بركة الله
ثامر قام واهو يعدل شماغه : بروح اشوف مرتي
صقر ناظره مستغرب : وشهو؟
ثامر ضحك على شكله : اصبر بوريك مرتي "زوجتي"
دق الباب على البنات الي كان اصوات سواليفهم طالعه لعندهم بالحوش ..طلعت وضحى واهي متغطيه : هلا
ثامر : نادي وجود بالله عليك
شوي وطلعت وجود واهي متلثمه : ها
ثامر ناظر لزايد و صقر الي جالسين وبجنبهم نايف و نياف وجابر  : هذي اهي مرتي
وجود لفت عليهم وعيونها بتطلع من مكانها بصدمه ولفت تناظره : خير انت وش ذا الكلام!
ثامر ضحك ورجع يناظرهم : بس انها خجوله شوي
وجود فصخت شبشبها وضربته فيه : انقلع عن وجهي يا قليل الحياء
ودخلت على طول للبنات ، وثامر لف على العيال الي كانوا يضحكون ..
ثامر واهو يصرف : ماعليه اتزوجها و اعقلها
جابر ميت ضحك : والله ما ظنتي بتعقلها اهي الي بتعقلك
ثامر شرب شاهيه واهو متجاهل ضحكهم عليه ..
عند وجود ..
دخلت واهي ترمي طرحتها بعصبيه : حليمه اخوك قليل الادب مناديني قدام اخوانك وعيال عمك يقول شوفوا زوجتي جعله الجني الوصخ!
حليمه بصدمه : بذمتك
وجود جلست معصبه واهي متكتفه : ترا زودها والله اعلم امك عليه
حليمه ضحكت : ياعمري خلاص بهاوشه
قامت واهي تلبس جلالها : ثامر
وقفت واهي تشوف عيال عمها جنب اخوانها ولفت من الجهه الثانية ..وثامر الي معطيها ظهره : ادري وجود مشتكيه عندك علميها عشان مدت اليد ماراح اعقل
حليمه : تستاهل يالمغازلجي بعلم امي عليك
ثامر ببرود : علميها
دخلت حليمه واهي تشوف وجود منسدحه ومعبسه بملامحها واضح انه فشلها قدام الرجال ..
فرح وقفت : برقص لكم
ليلى : شكل فرح مو بس خياله حتى رقاصه
فرح تخصرت : فيه مانع اكون متعددة مواهب؟
ربطت على خصرها واهي ترفع قميصها وطلعت كدمة ساقها ..
وضحى شهقت : بنت وش الي برجلك!
نزلت قميصها بسرعه وجلست : اسكتوا امي لا تدري
التموا البنات عليها سدحوها و سحبوا ساقها واهي تصارخ تبعدهم عنها ..
سُلاف الي ماسكه ساقها بقوه : اصبري نشوف
فرح بألم : توجعني الله يقطعكم من بنات قطعتوا رجلي
ام نايف دخلت وانصدمت من شكلهم : هاو يابنات وش فيكم متجمعين كذا كأنكم نمل!
ليلى وقفت بسرعه واهي تعدل قميصها وتاخذ عبايتها ولثمتها : خالتي يلا نطلع قبلهم
ام نايف مسكتها من كتوفها واهي تناظر البنات : ايه يا زين مرت ولدي اهي السنعه فيكم
طلعوا ولفوا على فرح الي باقيه على وضعها سادحينها جودي و وجود عند راسها ماسكينها و سُلاف و وضحى ماسكين رجولها يناظرونها ..
وريف : الكدمه كبيره فرح! روحي للمستشفى
فرح رجفت سُلاف ابعدتها عنها : وخري
وقفت واهي تعدل شكلها تأففت بملل : رضه عاديه بتروح خلاص فكوني
-
دخل الكل عند الكبار ، الرجال من جهة اليسار و النسوان من جهة اليمين..
سُلاف وعيونها صقر مبتسمه..
ليلى همست : خلاص نشف وجهك من الابتسامة
سُلاف ناظرتها بطرف عين : مالك دخل
ابو زايد بفرحة : زيادة على فرحة فوز فروحتنا عندي لكم خبر
الكل ناظروا ينتظرونه يكمل كلامه..
نياف : اسلم
ابو زايد : قبل شوي زايد علمني عن دكتور بالرياض بيعرف لصقر ان شاء الله
ام زايد فزت بفرحه : استحلفك بالله!
ابو زايد هز راسه ولازال مبتسم : اذا تم ان شاء الله نروح للرياض بأسرع وقت
ثامر ناظره : متى؟ انا بوديكم
ابو زايد : لا انت اقعد مع امك و اختك لا بغوا شي انا وزايد بنروح معه
ام زايد بحزم : لا والله ما اقعد هنا و ولدي بعيد عني
ابو زايد : بس حل..
حليمه تكلمت عشان امها : عادي يبه انا وثامر نكون بالبيت ماعليه
ابو زايد : بس يختي حملك من بيهتم فيك
ام نايف : يا كافي يا يافع شايله حفيدي تحسب ماني منتبهه لها
حليمه رجعت تتسند ونزلت راسها من الموقف كانت حاسه عيون نايف عليها بس ماتبي تتقابل نظراتهم ..
ابو زايد ناظر زايد : اجل احجز اربع تذاكر للرياض بأقرب طيارة
زايد : ابشر
عند البنات ..
سُلاف مسكت يد ليلى بقوه وهمست : بيروح عني ويخليني مره ثانيه
ليلى حطت يدها فوق يد سُلاف بدون لا ترد عليها
عضت شفايفها بحزن واهي تناظر صقر الي كان مبتسم ويناظرها ويهز راسه وكأنه يطمنها
ومر الوقت الين ما اذن العشاء ..
صقر بالملحق ..
حليمه دخلت عليه : ها تحسبنا ببيتنا بعد تبيني اناديها
صقر مسك يدها واهي واقفه قدامه : ناديها على شاني
حليمه بطولة بال : طيب
طلعت وعلى طول جت له سُلاف : فيك شي؟
صقر لف عليها مبتسم : قلت اكلمك وجه لوجه احسن
سُلاف جلست قدامه : امر
صقر تسند على كرسيه واهو يتنهد : هالسفره بتطول قولي شهر
سُلاف : لا مره طويل صقر!!!
صقر مسك يدها واهو مبتسم : لا تخافين تراها بسيطه
سُلاف مسكت بكيتها عشان ما تضيق صدره : ان شاء الله
صقر اتسعت ابتسامته اكثر : واذا رجعت بيكون معي هدية لك بتعجبك
سُلاف : اهم شي سلامتك ارجع وهذي اكبر هدية
صقر هز راسه : ابشري
دخلت حليمه وانصدمت من مسكتهم ليد بعض وشهقت : عمى خير
سُلاف وقفت واهي تمسح يدها باحراج ..حليمه ناظرتها بطرف عين واهي ماسكه الباب : يلا خواتك بيروحون
طلعت وراحت لصقر واهي تسحب كرسيه : ماكان له داعي تقرب منها واهي ماهي حلالك
صقر ابتسم بتسليك : ولا يهمك
ابو زايد واهو عند الباب : ساعه
حليمه : معليش يابوي
طلع الكل متوجه لبيته ..