بعدك يابوي اصبحت دنياي عرجاء بلا عكاز

17

يوم جديد على ابطالنا ، عند البنات ..
وريف سكرت الشنطة : خلصنا ترتيب
ليلى بتوتر : يمه بنات احسني احلم كيف بروح معه لحالي ببيت
سُلاف : زي مارحتي ورا المزرعه معه
التفتوا كلهم على ليلى ..
جودي : شنو شنو ماسمعت
وجود حطت يدها عند فهمها تمثيل للصدمه : وخزياه وش هالحركات
وريف بقلة حيله : لا حول ولا قوة الا بالله
ليلى عصبت : يابزر ياسُلاف لازم تعلمينهم يعني
سُلاف : اسفه
جودي ضحكت : ماتوقعت منك هالحركات
ليلى : ياخي خلاص زوجي
وجود : ماعليك منهم استانسي
ليلى رجعت تتوتر : وريف وش لازم اسوي معه علميني
وريف تربعت بحماس : خلك طبيعي لا تتوترين يعني خلي ببالك سوا هالليلة ولا بعدين صايره صايره وعيشي هاليوم بشكل طبيعي لا تبالغين بتوترك
ليلى : يارب ساعدني
سُلاف : مارحتي حرب تراه عرس بتقعدين مع واحد طول عمرك وبتجيبين عيال منه
وجود : ماقصرتي سُلاف ليتك ساكته
سُلاف انسدحت : تكبرون المواضيع سهله بسطوا الأمور حبايبي
وريف : في هذي صادقه سُلاف ترا الموضوع بسيط والي بيساعدها اكثر شخصية جابر احسه حليل يعني ماهو صعب صح؟
ليلى : ايوا صح
وريف : اجل ريحي بالك
ليلى : سُلاف زيني وجهي
سُلاف : اكيد بنضبطك ماراح تروحين بقميصك الروز
جودي ضحكت : سُلاف خير وش فيك عليها
سُلاف حضنتها واهي تضحك : اسفه ليلى مدري وش فيني عليك
ليلى تتصنع الزعل : مفروض تدلعوني قبل اروح
وريف : اكثر من اننا ندرنا معك السوق ايام و رتبنا ملابسك واغراضك وبنضبط شعرك وش تبين؟
ليلى : نفسيًا نفسيًا حفزوني
سُلاف : اقول قوموا ناكل جعت
وجود : ماسويت غدا
وريف بصدمه : اليوم يومك يابزر
وجود : اخذت راحة من الكرف الي كرفته مع ليلى
سُلاف : طيب علمينا
وجود : يعني ماتشمون مافيه ريحة اكل بالبيت
جودي قامت : خلاص بسوي انا الاكل ياكثر هواشكم
ليلى : بساعدك
وريف : اقعدي العروسات ما يشتغلون
سُلاف : حتى انا عروس
وريف سحبتها : قومي قومي قال عروس قال
-
ببيت ابو نايف ..
وضحى تكوي ثوب جابر وتعطره : جابر خلصته
جابر باس راسها : مشكوره
وضحى : علقه لا يعتفس
جابر : طيب
حليمه من المطبخ : وضحى تعالي
دخلت عليها وضحى : وشو
حليمه : اجلسي معي مليت
وضحى : وين نايف؟
حليمه : طالع القهوة
وضحى : امحق زوج
حليمه ابتسمت : تبين شاهي؟
وضحى : سوي
لفت حليمه تسوي الشاهي وتسولف مع وضحى..
وضحى بهمس : حليمه
حليمه واهي تحرك السكر بالشاهي : ها
وضحى : انتي حامل؟
حليمه لفت عليها بسرعه : وش دراك؟
وضحى : يعني حامل زي ماتوقعت
حليمه مسكتها وتسحبها لعند المخزن : وش دراك؟
وضحى : بطنك بارز شوي
حليمه مسكت بطنها : لا مستحيل صغير بطني
وضحى : اذا لفيتي من على جنب كأنه منتفخ..وبعدين ليش خايفه وماتبين احد يدري كأنها جريمة
حليمه عضت شفايفها: طلبتك وضحى لا تعلمين احد ، طلبتك
وضحى مستغربه : ابشري بس ليش يختي وش عندك!!
حليمه بتصريفه : اسمعي انا عندي فكرة ببالي افاجئهم بهالخبر كلهم مره وحده بس مو الحين
وضحى ابتسمت : اثر الموضوع كذا اجل ابشري
حليمه : اوعديني مايطلع هالموضوع لأحد الين انا اتكلم
وضحى : من عيوني بس لا تطولينها يعني من حق نايف واهلنا يعرفون
حليمه بتسليك : اكيد! بس انتظري انا مخططه على وقت اعلمهم
وضحى بحماس : يازينه او يازينها المهم افرح واصير عمه
حليمه ابتسمت بحزن : ان شاء الله
دخلت ام نايف مستغربه : وراكم مندسين بالمخزن ياكافي
طلعت وضحى واهي مبتسمه : ابد خذتنا السوالف لعنده
ام نايف : اطلعوا عندي سولفوا معي لحالي طفشانه
حليمه : من عيوني
طلعت ام نايف ولحقوها للملحق ..وخذتهم السوالف وحماسهم لـ بكره عشان جابر و ليلى ..
-
بالقهوة ..
زايد : جابر هذا واهو للحين ما اخذها ما نشوفه
نايف : خله يجهز ماعاد فيه وقت
صقر : وش يجهز؟
نايف : اغراضه
صقر بستغراب : موب ودوا اغراضهم للبيت؟
نايف : ظني بقى كم غرض
صقر : الله يوفقه يارب
الكل : امين
نياف : اقول نشف حلقي من هالقهوة ابي شاهي
زايد : قم اطلب
ثامر وقف : انا بطلب
جابر جاء لعندهم واهو يربت على كتف زايد وصقر ومبتسم : ها كيفكم الليلة؟
زايد : جسمي مهدودد
نايف : من الطيحه الي طيرتك
زايد : اي والله ذا الغشيم خذاني معه بطيحته
نياف : اهم شي استانسنا
ثامر جاء وجلس : محد مستانس الا جابر
جابر تنهد : الحمدلله لا تحسب هالعرس جاء بسهوله خلني استانس
الكل : الحمدلله ، الله يتمم لكم على خير
ثامر : عقبالي
نايف ناظره بطرف عين : ان شاء الله
ثامر : تقولها من غير نفس وش يعني ماتشوفني كفو؟
نايف : لا والله كفو بس انت شاك بعمرك
نياف تحمس : جوي بيتهاوشون
جابر : القهوة و الشاهي على حسابي هالمره
زايد ابتسم : كفو
صقر : كل يوم تزوج اجل
ثامر : الي يشوفك ناقصه فلوسك يومك تفرح
صقر مسوي بيضربه : اذكر ربك
ثامر : ماشاء الله
-
الصباح عند البنات ..
جودي مشغله الأغاني ومعليه عليها وترقص مع وجود ..
سُلاف واهي تمسح وجها : يالله صباح خير
جودي سحبتها : ارقصي ارقصي
سُلاف بكسل : خليني عجزانه
وريف طلعت بصينية الفطور واهي تأشر بـ طفوه
جودي قصرت عليه : وشو؟
وريف : قصري خلي ليلى تشبع نوم وتعالوا افطروا
وجود جلست جنبها : متى بيجي ياخذها؟
وريف : ام نايف قالت العصر
سُلاف بحماس : ياربي متحمسه اكشخها اخليها اجمل واجمل من ملكتها
جودي : اجل نصحيها من الظهر
وريف : طيب ، افطروا
وجود بتعب : ابي مويا تعبت من الرقص
مدت لها سُلاف : خذي
وجود : شكرًا
استمروا ياكلون وبينهم هدوء عجيب داهمهم ..
سُلاف رفعت عيونها : وش فيكم هادين؟
جودي رفعت كتوفها : مدري
وجود : لاحظتي تو يدور بخاطري ليش ساكتين
وريف مسحت دموعها على طول ولاحظوها البنات الي طلوا بوجها واهي تنزله : وخروا ياخي
جودي : تبكين صح؟
وريف هزت براسها بـ اي
فجأه سمعوا شهقت وجود وبكت ..
سُلاف بصدمه : ياربي امس جودي تبكي والحين انتم
جودي خنقتها العبره : ياخي بنشتاق لوجودها بينا شوفي الحين اهي نايمه بغرفتها واحس بفراغ كيف واهي عند زوجها
وريف تحاول تهدي نفسها : سنة الحياة سنة الحياة يابنات
سُلاف تنهدت : الله يوفقها يارب
وريف : لا تروح واهي تشوفنا نبكي ويضيق صدرها حاولوا تمسكون انفسكم عندها
البنات : طيب
خلصوا فطور ودخلوا المطبخ ينظفونه ، على اذان الظهر ..
سُلاف فتحت الباب بقوه : ليلى
فزت ليلى بخوف : وشو؟
سُلاف : يلا قومي تسبحي نجهزك
ليلى حطت يدها على قلبها : بسم الله خوفتيني
سُلاف بحماس : يلا يلا متحمسه اسوي حركات جديدة عليك
ليلى بخوف :سولافوه انتبهي ترا هالليلة مهمه لا تقعدين تلعبين فيني
سُلاف : روحي روحي تسبحي بس وتعالي خلنا نخلصك
ليلى قامت وفتحت دولابها تطلع لها ملابس ..سُلاف واهي طالعه : اذا خلصتي ناديتي
راحت لعند البنات ..
وريف : قومتيها؟
سُلاف : ايه
وجود وقفت : بروح اشيك على فستانها
جودي : وانا على اغراضها لايكون ناسين شي
وريف : انا بسوي شعرها
سُلاف : وانا مكياجها
-
بعد الظهر ، ببيت ابو نايف..
حليمه تبخر نايف قدامهم..
ام نايف واهي مبتسمه : يافرحتي بعيالي زوجت نايف والحين جابر ماعاد بقى الا وضحى ونياف
ابو نايف : و يمتلي البيت كله احفاد
ام نايف : وين جابر مختفي؟
وضحى : طالع مع نياف على اذان الظهر للحين ماجو
نايف : يستهبل طالع بدال لا يتجهز
ام نايف : وش يتجهز اخوك متحمس من جينا من المزرعه مرتب كل شي
وضحى : الله يوفقهم
ابو نايف : وضحى دقي عليهم شوفي وينهم وقولي يجون للبيت
قامت وضحى للتليفون تتصل على جوال جابر ..
جابر : هلا
وضحى : وينك؟
جابر : جاي بالطريق
وضحى : وين كنت؟
جابر : بالحلاق
وضحى : زين اجل لا تتأخر ابوي يقول خله يجي
جابر : ليه يبي شي؟
وضحى : لا ما اظن بس قصده يعني تجهز
جابر : يلا جاي
خمس دقايق ودخل البيت اهو ونياف وام نايف تستقبل جابر بالتبريكات ..
نياف: وانا مسحوب علي
ام نايف : انت لا جاء وقتك بنبارك لك بعد
نياف ابتسم : ان شاء الله
جابر : طيب يلا خلوني اتسبح واخلص ونكمل احتفال لا يروح الوقت علي
نايف بتدقيق: جابر مقصر شعرك؟
جابر : قصرته شوي لا يصير شكلي غبي
ام نايف : شكلك كذا ارتب
ابو نايف : خلوا عنكم السوالف وخلوه يتجهز لا يتأخر على المره
دخل جابر لغرفته و اتجهوا للملحق كلهم ..
حليمه جلست جنب وضحى وقبالها نايف ..
وضحى تكلم حليمه : بان وجهه يوم انه قصر شعره
حليمه بعفويه : اي يازينه كذا زان وبانت ملامحه اكثر
وضحى اتسعت عيونها : بنت
حليمه حطت يدينها عند فمها واهي تحت الجلال و عجزت تقدر تلف عيونها على نايف ..اهي متعوده تمدح عيال عمها بس بما انها تزوجت نايف ماينفع تتكلم كذا عشان ما تصير درامات
ام ونايف وابو نايف ونياف الي يسولفون ومتأكده مالاحظوا وش قالت بس نايف ماتدري لأنه من جلس ساكت ماتدري باله معهم ولا مع ابوه وامه الي يسولفون
وضحى تبي تلطف الجو : المهم ترا ابوي قايل بنطلع البر
حليمه تنحنحت : جد متى؟
وضحى ناظرت ابوها : يبه متى بنطلع للبر؟
ابو نايف : اشوف عمك ونقرر
ام نايف : بنمرح هناك؟
ابو نايف هز راسه : ما ظنتي بس نروح بذا الاجواء الزينه ولا ماتبون الطلعه؟
وضحى بحماس : الا يبه نبي نطلع
ام نايف : اذا بيوسع صدور هالعيال نطلع ليش لا
ابو نايف لنياف : رح شف اخوك وش يسوي
نياف قام : اتمنى يجيني هالاهتمام بصير اسعد انسان
ام نايف : رح رح لأخوك الله يرحم حالك
حليمه واخيرًا قدرت تحط عينها على نايف ، رغم انها تحت الجلال وماراح تبان بس من توترها ماقدرت ، شافت ملامحه طبيعيه ويشرب الشاهي ومتسند على المركى ..زفرت براحها
وضحى : وخري الجلال نياف طلع
نايف قام يرد الباب عشان اخوانه ما يدخلون : وخريه
وخرته واهي تحطه على كتوفها وتعدل شعرها ..
وضحى : وجهك احمر
حليمه حطت يدينها على خدودها : احس بحرارة
وضحى : اما عاد
حليمه : احسني مكتومه
وضحى فزت : مايصير ل..
حليمه رفعت حواجبها تنبها : عادي عادي
وضحى جلست واهي تمسح وجها وتزفر براحة ..
ام نايف : وش فيك انتي؟
وضحى ببتسامة وهقه : مافيني شي
ام نايف لفت لخالد وبدت تسولف معه ونايف يدخل يشاركهم وحليمه و وضحى يسولفون مع بعض ..الين دخل عليهم جابر وبعده نياف
وقفوا كلهم واهم مبتسمين لكشخته ..
ام نايف : رزه ولدي رزه
حليمه : الله يوفقك يا جابر ويكتب لك كل خير
جابر : امين وياك انتي و الجميع
الكل : امين
جابر : يلا بطلع اخذها ..
ام نايف بفرحه ماسكته لعند الباب : الله يوفقك يارب ويكتب لك الخير ، انتبه بالطريق وانتبه لبنت الناس
جابر باس راسها : ابشري
وراح يبوس راس ابوه وودع الكل بمصافحة الا حليمه من بعيد ..
-
عند البنات ..
وريف شبكت شعرها : وبكذا خلصنا
ليلى تناظر نفسها بالمرايا وحطت يدها على شعرها : ماتحسينه مبالغ؟
وريف ضربت يدها : وخري يدك وخريها لا تلمسينه وتخربينه
جودي واهي مبتسمه : بالعكس يجنن عليك
جت سُلاف واهي تركض : ياربي اخيرًا لقيته
فتحت الروج واهي تحطه لها ورجعت تعدل بالمكياج اكثر ..
وجود جت واهي ماسكه الفستان : يلا البسي
ليلى وقفت واخذته منها : طيب اطلعوا بلبس
طلعوا البنات واقفين عند الباب ينتظرونها تخلص ..مرت خمس دقايق
سُلاف بملل : ليلى عجلي علينا ترا ملينا
ليلى فتحت الباب واهي مبتسمه : وش رايكم؟
وريف بإنبهار : تبارك الرحمن
وجود شهقت : يجنن! ماشاء الله
جودي حضنتها : قمر قمر ياليلى
سُلاف ابتسمت واهي تتأملها : شكلك اليوم غير عاد
ليلى : شكرًا انتوا الي بدعتوا
وريف : لا والله جمالك الي بدع
ليلى ضحكت بخفه : ترا استحي
وجود : يلا يلا بقى ابخرك
وركضت للمطبخ تجهز البخور ..وليلى اخذت عبايتها وطلعت للصالة معهم وجلسوا ينتظرون جابر..
جودي واهي تهز رجولها بتوتر : تأخر
وريف تناظر الساعة : وش تأخر تو الوقت
سُلاف : وجود يلا بسرعه
جت وجود تركض واهي ماسكه المبخره : ليلى وقفي
بدت تبخرها واهي تدعي لها وتذكر الله عليها
ليلى خنقتها العبره : بنات احس بصيح
سُلاف صرخت : لا تكفين لا تعبت وانا اضبط عيونك
ليلى تنفست بعمق : خلاص خلاص
وريف : لا تلفين طرحتك بقوه عشان شعرك مايخرب
ليلى : طيب
جودي : وترا حطيت لك المكياج بالشنطة البنيه الصغيره اذا بغيتي تعدلين هناك ولا بترجعين تسوين
ليلى : طيب
وجود : وكل ملابسك ترا كويتها لك وسفطتها زين يعني ما اظن بتحتاجين تكوينها الا اذا قدر الله يعني
ليلى بتوتر : تمام
وريف مسكت كتوفها : وش قلت لك لا تتوترين هدي
ليلى : مدري هديت ورجعت اتوتر
جودي : اجلسي طيب لا توقفين
سُلاف قامت : بجيب لك مويا
ثواني بس ودق الباب وفزت ليلى بخوف : يمه بنات جاء
وريف بحزم : بنت اركدي والبسي عبايتك يلا
جودي : بفتح الباب
جت سُلاف مسرعه وعطتها المويا وشالت مع جودي اغراضها توديها لعند الباب عشان يشيلها جابر..
وجود : اصبري لا تطلعين الين يحط الشنط ويعدل شكله لا يحتاس
ليلى ابتسمت بتوتر : وانتي عارفه كل هالحركات
وجود ببتسامة ثقة : وش رايك فيني؟
فتحت الباب جودي واهي تحط الشنطة : جابر الله لا يهينك ترا هذي اغراض ليلى
جابر اخذها : طيب
سُلاف مدت الثانية لعند عتبة الباب : وهذي انتبه شوي شوي عليها
جابر : حاضر
جابر واهو يعدل شماغه : وين ليلى؟
جودي : يلا الحين بتجي
ردوا الباب وركضوا لداخل وجابر ضحك بخفيف واهو يسمع صوت خطواتهم المسرعه ..
دقيقة الا وتطلع له وعيونها بعيونه ..
جابر ابتسم : خواتك ورا الباب؟
سُلاف بسرعه : ايه
جابر ضحك : والله اني حاس
وجود من ورا الباب : جابر انتبه لليلى تكفى لا تزعلها
سُلاف : ترا اذا زعلتها بنزعلك
جابر ابتسم واهو يناظر ليلى : من يزعل ليالي دنيته؟
وجود صرخت بخفيفه : الله يجنن
وريف ضربتها : يالخفيفه
جودي : يلا بالسلامه
ليلى : مع السلامة بنات
الكل : مع السلامة
ركبت ليلى مع جابر ومشى ..
وريف سكرت الباب وبكت على طول وبكوا وراها ..
سُلاف تضحك بدموعها : ما صدقنا تروح عشان تنفجر هالمشاعر
وريف مسحت دموعها: اف ودي اسحب جابر اخليه يسكن عندنا ولا ياخذها
جودي : وين الي تقول هذي سنة الحياة
وريف : اهي فعلًا سنة الحياة
وجود : يلا امشوا عاجبتكم الجلسه عند الباب
-
ببيت ابو زايد ..
ام فرح : اني بزور ام نايف بكره اسلم عليها امشي معي
ام زايد : ودي والله بس بنيتي بتجيني ابي استقبلها
ام فرح : منهي حليمه ولا جميلة؟
ام زايد : جميلة
ام فرح استانست : جد والله؟
ام زايد ابتسمت : اي والله توها متصله الصباح معلمتني انها بتجي
فرح : يمه مدي لي الزمزميه
مدت لها وكملت سوالف مع ميساء "ام زايد" : متى قالت بتجي ؟
ام زايد : ماحددت بس بكره ان شاء الله عندنا
فرح : توصل بالسلامة
ثامر من ورا الباب : ياولد
تغطت فرح على طول ودخل انسدح على رجل امه ..
ام زايد مستغربه: وش فيك تعبان؟
ثامر بتعب : شكله منهد حيلي
ام زايد تفحصت وجهه : حار
ام فرح ناظرتها : فرح وانا امك جيبي كمادات
فرح : كمادات بذا البرد بيتعب زيادة
ام فرح : جيبيها
ام زايد بتوبيخ : بتقعد هنا متدفي ماتطلع للبرد مع ذا الهايتين
ام فرح : وين اخوانك ؟
ثامر واهو يكح : بالدكان مع ابوي
طلعت فرح تجهز الكمادات واهي عارفه بيت خالها ، لأنها متعوده تشتغل فيه مرات..دخلت عليهم واهي شايله الصحن الي حاطه فيه قطعة قماش مدته لأم زايد ..
ام زايد ببتسامه : ماتقصرين الله يسعدك
فرح : وياك
ام فرح : اجل انا اترخص اذن المغرب خلنا نرجع البيت قبل يظلم الشارع
ام زايد واهي تحط الكمادات على راسه : خليكم اقعدوا هالليلة ونسوني
ام فرح : بعدين ان شاء الله الحين ما تجهزنا وجايين ببدل وحده
ام زايد : يلا اجل مع السلامة
ام فرح : ثمور ماتشوف شر
ثامر بتعب وصوته المزكم : الشر مايجيك
فرح : ماتشوف شر ثامر وبعلم وجود خلها تستانس
ام زايد ناظرته مستغربه : وش دخل جود وليه تستانس؟
فرح بوهقه طلعت وامها لحقتها ..
ام فرح : وش فيها وجود؟
فرح : ثامر لاحقها بالخيل وبس
ام فرح ضحكت ..
بالمحلق..
ام زايد : وش جاب سيرة وجود؟
ثامر الي تعبان وتوهق بسبب فرح ويدعي عليها : مافيه شي يا يمه ماتعرفين فريح تتكلم ولا تدري وش تقول
ام زايد بشك : ايه زين
-
ببيت جابر ..
دخلت ليلى و وراها جابر واهو شايل الشنطتين معه ..حطها بالأرض
وليلى وقفت تناظر البيت مبهوره ان هالبيت لها ..
جابر مبتسم : عساه عجبك؟
ليلى ابتسمت ولفت عليه وعيونها تدور حول البيت : مره ماشاء الله
جابر : وانا شكلي بصير اعلمك تفصخين اللثمه بكل مره اشوفك ، هالمره زوجتي على سنة الله و رسوله
ليلى ضحكت بخفه : طيب بس قبل ابي المرايا
جابر اخذها لغرفتهم وطلع للملحق ..
ليلى فصخت عبايتها ولثمتها وحطتها على جنب وشافت شكلها مكياجها ولا غلطه بس شعرها انحاس وعدلته سريع سريع..
ليلى بتوتر : ياربي اطلع ولا انتظره؟
مرت عشر دقايق واهي جالسه على طرف السرير ..
ليلى تكلم نفسها : يعني انتي سألتي وريف كل شي ونسيتي تسألين اذا تطلعين ولا
طق الباب وفزت بخوف ..
جابر : ادخل؟
ليلى وقفت واهي ترتب فستانها : ايه
دخل ومن طاحت عيونه عليها والابتسامة شاقه وجهه ..
جابر بصوت واطي : وانا بكل مره اشوفك تحلوين يا ليالي دنيتي؟
ليلى ابتسمت بخجل ونزلت راسها ..تقدم لها جابر واهو يبوس راسها..
جابر : الحمدلله دايم و للأبد انك حلالي
ليلى لازالت منزله راسها ومبتسمه ولا تكلمت ..
جابر : لا تقولين انك تستحين مني؟
ليلى رفعت راسها بهدوء : شوي
جابر حضنها واهو يحس بكمية راحة ماهي طبيعيه ..
ابعدها عنه شوي واهو يناظر عيونها ..
جابر : اتعبتيني معك لو ماتحسين
ليلى بخجل : ما سويت شي
جابر ابتسم : ايه انكري مصيرك بتلاحظين اني تعبت معك
ليلى بدلع عفوي : ما استاهل الواحد يتعب عشاني يعني؟
جابر مات من الحب : الا والله تستاهلين كل شي يا نظر عيني
ليلى ابعدت عنه واهي تزفر بخفيف..
جابر بستغراب : وش فيك ابعدتي عني؟
ليلى بتوتر تحاول تسيطر عليه : وش رايك اجيب لنا مويا ؟
جابر ابتسم عرف انها تصرف وعطاها على جوها : يلا جيبيها ونجلس بالملحق
ليلى براحه وضحت عليها : يلا
طلعت وجلس على السرير يضحك واهو يكلم نفسه : هذي خايفه مني صدق!
ثواني بس ونادته ليلى وراح لها ..
-
عند البنات .. العشاء
سُلاف منسدحه على جنبها وتاكل حب "تفصفص" : تهقون يابنات صار الي صار؟
وريف ضربتها : بلا قلة حياء يالوصخه انتي
سُلاف جلست : وش ماقلت شي غلط حلالها
وريف : انطمي بس ولا عليك منها
جودي : عاد الصدق ما ظنتي احس ليلى بيغمى عليها
ضحكت سُلاف : ياعمري عليها
وريف ناظرتها بطرف عين : ليت هالجراءة الي فيك تجي لها
سُلاف بغرور : لا خليها لي اذا رحت لرجلي تبيني اتنافض عنده من الخوف
وجود : لا ماينخاف عليك انتي فيك ما يكفي من قوات الوجهه
جودي : اقول سُلاف ما تلاحظين انهم نشبوا لك
سُلاف : الا واضح منقهرين مني
وريف : عشتو!
سُلاف : صبي صبي الشاهي ولا يكثر
جودي بحماس : ومن تتوقعون الثانية بتتزوج؟
وجود : يلا كل وحده تأشر على الي ببالها
سُلاف اشرت على وريف ، وريف اشرت على جودي ، وجودي اشرت على نفسها ، وجود اشرت على سُلاف..
وجود : خير محد اشر علي يعني ماراح اتزوج
سُلاف شهقت بقوه قاطعت سالفتهم : بنات ماقلت لكم
وريف : سمي بالله لا تشهقين كذا
سُلاف عدلت جلستها : صقر قالي فالح خاطب
جودي : بذمتك
سُلاف : والله
وريف : وليش يقولك؟
سُلاف بلعت ريقها : كنا نسولف
البنات بصدمه : تسولفون؟
سُلاف تسوي نفسها طبيعيه : اي نسولف وش فيكم
وجود : ما اصدق
سُلاف : لا تصدقين
جودي : طيب وخطط المستقبل الي رسمتيها مع هالفالح وش صار عليها؟
سُلاف : زعلت اول مادريت انه خاطب حسيت بشعور مدري شلون بس الحين احس عادي
وريف : احسن لك الله يفكم يابنات من هالحب الي ماله فايده
جودي بضحكه : انا بديت اخطط على نياف بس يوم شفته يعامل بنت عمته بميانه تراجعت
وجود: ليه؟
جودي : مدري حسبت انه لطيف معي لأن عينه علي بس طلعت غلطانه
وريف : يعني استوعبتي ان شخصيته كذا مع الكل؟
جودي : تقريبًا
سُلاف تنهدت : ايـه الله يعين
-
الصباح ..ببيت ابو نايف ..
طلعت حليمه من الحمام واهي تمسح شعرها ..ونايف كان يناظرها من طلعت من الحمام لين وقفت عند الدولاب ولما راحت للتسريحة..
حليمه لفت عليه وعلى وجها ابتسامة خفيفه : اول مره تشوفني يعني ولا كيف؟
نايف بملامحه الجامده : وش عندك ذا اليومين على اللبس الوسيع؟
حليمه : تبيني البس ضيق يعني وانا ببيت فيه اهلك؟
نايف قرب منها وكأنه قافط عليها شي ، بلعت ريقها بخوف وحطت يدينها الي ماسكه المشط لعند صدرها..
نايف بنبرة غريبة : ولا لا يكون الي ببالي صحيح!
حليمه قامت الدنيا تدور فيها : وش الي ببالك؟
نايف قرب اكثر : ماتبيني المسك؟
حليمه من غير شعور زفرت براحة انه ماشك بحملها ونزلت يدها وتكلمت بتصريفه : البس هالملابس لأنها جديدة ومرتاحه فيها
نايف رجع على ورا واهو يتنهد : سوي لي شي اكله
حليمه : بنسوي الفطور وتعال
حطت المشط فوق التسريحه واخذت جلالها ومسكها من يدها بسرعه..
حليمه انصدمت : وش فيك؟
نايف حك دقنه بيده اليسار : وش الي قلتيه عن جابر امس؟
حليمه بهدوء : حقك علي معليش
نايف ترك يدها : خلصي شغلك وتعالي ابيك
حليمه : وش تبي؟
نايف راح ينسدح على ظهره وحط يده تحت راسه : قلت لك خلصي وتعالي
حليمه بتوتر : طيب
طلعت واهي تسكر الباب وسرعت خطواتها للمطبخ وشافت وضحى تسوي الفطور..
وضحى واهي تسوي البيض ومبتسمه : صباح الخير
حليمه مسكتها بسرعه واهي تاخذها للمخزن..
وضحى بصدمه : ياويلي شوي شوي وش فيك!
حليمه تضرب خدها بشويش وتتكلم بهمس : بيدري بيدري ياوضحى
وضحى مستغربه : وشو؟
حليمه : اذا خلصنا الحين الفطور تعالي معي لغرفتي مع نايف على اساس بضبط شعرك و وجهك وتكفين لا تروحين الين مايطلع من الغرفة يطفش
وضحى : تستهبلين انتي ماراح ادخل غرفتكم سلامات
حليمه شدت على يدها : وضحى طلبتك! بيدري وانا مابيه يدري الحين
وضحى الي فهمت عليها : خلاص علميه يا حليمه لا تعقدين الامور
حليمه بترجي : هالمره بس و اوعدك اني بعلمه بس مو الحين
وضحى : يعني متى؟
حليمه بكذب : يومين قد خلصت تجهيز الي بسويه
وضحى تنهدت : طيب الله يعيني عليكم طيب
حليمه باستها براحه : احبك
وضحى ابتسمت : خلي حبك بعدين لا البيض يحترق و يسوي لي سالفه ابوي
حليمه ضحكت بخفه : يلا يلا نخلص بس
-
بـ بيت جابر و ليلى..
بعد ما سوت ليلى سوت الفطور بمساعدة جابر ..
جابر : انتي صامله؟
ليلى : ايه تكفى بعد مانرجع من طلعة البر معهم نسافر
جابر تنهد : الله يعين يعني الحين الغي التذاكر عشانك
ليلى ابتسمت : والله ودي بجمعتهم دامني عندهم هنا بالديرة
جابر : ابشري
ليلى : وانت بعد منها تشوف الشباب وتجلس معهم قبل السفره ، شهر بعيد عنهم ماهي سهله
جابر : صحيح ، بس دامني معك ذا يكفيني
ليلى تأملته ولازالت مبتسمه : قاص شعرك صح
جابر هز راسه بـ ايه وكمل : عاجبك؟
ليلى : اكيد
جابر : ودي اتكلم بموضوع بس حاسك بتستحين
ليلى : لا عادي تكلم
جابر بنبرة تأكيد : متأكده؟
ليلى من سمعت نبرته توترت : لا خلاص لا تقول
قام يضحك : داري فيك عشان كذا سألتك
ليلى ابتسمت من ضحكته : لو ماسمعت هالنبرة كان ماعليه
جابر : اجل بجيك مره ثانية بأسلوب احن
ليلى بهدوء مفاجئ : جابر
جابر ناظرها : لبيه
ليلى : من متى تحبني وكيف كذا بغيتني؟ احس غريب
جابر ابتسم لها : تتذكرين يوم انك تبيعين بالمحل؟
ليلى هزت براسها بـ ايه
جابر : يوم شفتك بقيتي ببالي صحيح مافيه مشاعر بس ملامحك رسخت
ليلى : بس هالموقف يعني؟
جابر : لا ، لما ابوي نوا يخطبك لنايف حسيت قامت شياطيني كنت متأكد اني ما احمل مشاعر لك بس لمجرد ماحسيت بأنك بأي لحظة بتنوخذين مني ما رضيت سوا اخوي ولا غيره
ليلى ابتسمت بخجل : الحمدلله
جابر ارتكز بوقفته : رغم انك قشرا ترا وتعاندين واجد
ليلى بدلع : لا تلومني يعني لو ابوك يافع كان قلت افكر بس ابوك خالد
جابر ناظرها ..ليلى ابتسمت بفشله : ما قصدت اسيئ له ياقلبي
جابر هزت راسه : كملي
ليلى : غير كذا ماكنت اعرفك كنت احسبك زي خالي "ابوه"
ناظرها للمره الثانيه ..وضحكت ليلى بقوه : وربي مو قاعده اغلط
جابر ابتسم على ضحكتها الي اول مره يسمعها بهالقوه : ادري بس واضح انك ماخذه فكرة شينه عن ابوي
ليلى ناظرته : تلومني؟
جابر : لا ، بس مع الوقت بتعرفينه ترا حليل صح شديد وفيه حركات ها بس يجي منه
ليلى ضحكت : حلوه يجي منه
جابر : بيني وبينك مرات يفجرها فينا يا عياله وعيال اخوانه بس طوفيها له
ليلى : ان شاء الله
جابر : واذا على امي ..
ليلى قاطعته : ادري خالتي مع الوقت وضح لي انها كويسه ممكن الكلام الي انقال عن ابوي الله يرحمه كرها فينا بس هالأيام تعاملها معي كويس
جابر ابتسم براحة : الحمدلله ..وانا واعدك وعند وعدي لك دامك معي مايضرك احد ولا يزعلك
ليلى تقدمت له واهي تحضنه ..جابر انصدم ما توقعها منها بس بادلها الحضن بشدة اقوى..
ليلى واهي بحضنه : تعودت على هالحنان من ابوي وخواتي ، امي الله يرحمها ماتت من بدري ما اتذكرها كويس ابوي كان مدلعنا دلع لا صار ولا ستوى و من بعد موته صرت اشوف هالحنان من خواتي والحين جيت انت تضيف لحناني حنان
جابر همس لها : تحبين الحنان؟
ليلى تمتمت بـ ايه
جابر ببتسامة خفيفه : اجل وش رايك نجيب لنا حنان؟
ابعدت عنه ليلى بسرعه واهي تعدل تنورتها : خير
جابر ضحك بقوه على توترها : ماقلت شي هدي
ليلى تبي تضيع الموضوع : يلا يلا نخلص المواعين ونروح نتقهوى
جابر واهو متبسم : من عيوني
-
ببيت ابو زايد ..
ثامر بعصبيه : نويصر يالقزم امش
جميلة : ثامر ياشينك لا تعقد ولدي
ثامر يوريها راسه : شوفيه فالقني
ابو زايد : لا تحط عقلك بعقل بزر
ناصر بغرور : بس انا رجال مانيب بزر
ابو زايد ناظره وناظر ثامر : انا اقول قم قم اجلده
ركض ناصر لورا امه واهي تصد ثامر عنه..
ثامر : فكيه مسوي رجال اطلع الرجال مايتخبى ورا ظهر امه
جميلة : ثامر يا حمار شف سلوى مرتاعه اهجد لا تبكي
ثامر ناظر سلوى : وانتي صيحي يلا يالبزر
ابو زايد رمى عصاه على ثامر : الحين وش دخل ذا المسيكينه
جميلة : ثامر خل عيالي اعنبوك من خال اقشر
ثامر : مره ثانيه حطي هالاصلع عند ابوه لا يجينا
ناصر من ورا ظهر امه : بيت جدي اجيه بكيفي
ام زايد طلعت من الملحق بعصبيه : ثامر وصقه
ثامر لف عليها : لبيه
ام زايد : اناديك كأني انادي لي جدار امش اشرب دواك
ابو زايد رفع صوته : اقول ترا بكره رايحين للبر لا اشوف واحد فيكم ما خلص
جميلة جلست واهي تتنفس براحة بعد ماراح ثامر ..
جميلة : اقول يبه من قمت ماشفت زايد وصقر وينهم؟
ابو زايد : زايد بالمزرعه و صقر بالدكان
جميلة همست : يبه خل ثامر يروح المحل بدال صقر طفشني بعيالي مغير يحارشهم
ابو زايد : امسكي ورعك وماراح يحارشهم
جميلة لفت على ناصر تضربه بعد ما استوعبت : ياقليل الحياء لا عاد اشوفك ماد يدك على خوالك ولا والله اخليهم يجلدونك الين تعض الأرض
ناصر : جدتي ميساء تجلدهم لي
جميلة : وجدتك رايقه لك انت وبثارتك
ابو زايد : اقول ما كلمتك حليمه؟
جميلة : الا يبه كلمتني
ابو زايد : زين ..هالله هالله فوخيتك يابنيتي تراها اختك الصغيره انتبهي لها و نبهيها لا غلطت ولا سوت شي طايش
جميلة هزت راسها : ابشر يبه
-
عند البنات ..
وريف : حسبت ليلى بتسافر غريبة والله
سُلاف : صدقيني اهي الي قالت يأجل السفره اختي واعرفها
جودي : وانا اوافق سُلاف
وريف : يلا ماعليه منها نجتمع قبل تروح على خير
سُلاف : الحين وش لازم اخذ للبر؟
جودي : ماراح ننام هناك صح؟
وريف : ايه
جودي : اجل الي بناخذه خفايف
وريف : ايه لا تكثرون كأنكم مهاجرين
سُلاف : اقول نادوا وجود نايمه من بدري ولا صحت للحين
جودي انسدحت : انا والله عجزانه
وريف : حتى انا
سُلاف : الصدق حتى انا
وريف لفت عليها : سُلاف ماقالك صقر من خطب فالح ومتى العرس؟ غريبة مادرينا
جودي : صادقه احس سوالف الديره كلها تتناقل مع الهواء
سُلاف : واحنا خلينا الهواء يجينا خلصنا من مزرعة ابو زايد ورحنا لمزرعة ابو نايف والحين بنروح للبر
وريف ضحكت : اي والله
جودي بفضول : والله ودي اعرف منهي
سُلاف بتمثيل عشان تعصب وريف : ياخي اف كنت ابيه
وريف بنبرة حزم : سُلاف
سُلاف ضحكت : امزح لا تبكين
سمعوا صوت الباب ينفتح ..
جودي : ها ست الحسن والجمال شرفت
وجود دخلت عليهم و وجها مفقع نوم : وراكم ما قومتوني؟
وريف : تعيجزنا
جت وجود وانسدحت معهم : وربي جسمي مكسر مدري كيف بنروح للبر بكره
وريف : حتى انا مالي خلق بس عشان ليلى والله
-
ببيت ابو نايف بغرفة حليمه و الباب مفتوح ..قدام التسريحه
حليمه واقفه و وضحى جالسه على الكرسي وحليمه تعمل شعرها "تجدله"
نايف واقف جنبهم واهو متكتف : ياكثر خرابيطكم يالبنات
حليمه ابتسمت له : اصبر بقى اضبط وجها وتشوف مهاراتي
وضحى ساكته طول الوقت خايفه نايف يحجرها بكلمه وخايفه تقول بطلع وتزعل منها حليمه واهي عارفه زعل حليمه..
نايف الي واقف من ربع ساعة فوق راسهم يناظر كيف حليمه تعمل شعرها واهي متعمده تبطي سرعتها ..
نايف عدل وقفته : اقول انا تعبت من الوقفه بروح عند ابوي
حليمه ناظرته : ايوا روح وبنلحقك اذا خلصنا
طلع واهو يسكر الباب ..وقفت وضحى على طول
وضحى : يلا
حليمه مسكتها وجلستها : امشي يا بزر بيدري اننا متفقات خليه شوي ونطلع
وضحى : قلبي تجمد من الخوف
حليمه : خايفه من وش؟
وضحى : خفت يكسحني
حليمه ضحكت : لا ماعليك شوفي عدا الموضوع بسهوله
وضحى : الله يستر منك يا حليمه وتعدي هاليومين على خير ويدري وتفكيني
حليمه ابتسمت بتسليك : بيدري بيدري
وضحى : ها يلا نطلع؟
حليمه جت قبالها : اصبري اسوي اي شي بوجهك عشان تمشي هالتمثيليه
وضحك بملل : اف
حليمه عصبت : حتى انا تعبت ترا من الوقفه واصابعي اوجعتني وانا اتمطط بشعرك
وضحى لفت عليها : يوه نسيت انك حامل! لا تتعبين عمرك
حليمه : يلا بس خليني اخط كم خطه بوجهك
وضحى بتفكير : حليمه انتي بأي شهر تتوقعين الحين؟
حليمه وقفت واهي تحسب بأصابعها : اذا على حسبتي وطلعت صح فأنا الحين بالثاني
وضحى صفقت بفرحه : وناسه الله يتمم جيته او جيتها على خير
حليمه : امين
وضحى تأففت : يختي ما احسك فرحانه بحملك
حليمه تتصنع الصدمه : استغفرالله وضحى وش ذا الحكي ! بالعكس طايره من الفرحه بس قاعده احاول اخلي الوضع طبيعي لحد ما اتكلم للجميع
وضحى : وش اخترتي اسم؟
حليمه رفعت كتوفها : لحد الآن مدري
وضحى : سميها وضحى اذا بنت
حليمه ابتسمت : يصير خير
وضحى : تسلكين بس يلا ماعليه
حليمه ابعدت عنها : ايوااا بكذا خلصنا يمدينا نطلع الحين وتتحررين مني
وضحى وقفت بسرعه : يلا يلا قبل يرجع ويمسكك و وقتها صدق مالي دخل فيكم
حليمه ضحكت : يلا
-
الصباح الساعة ٥:٣٠ ..
اتفقوا يركبون بـ ثلاث سيارات ..
الجمس الأول فيه : نايف مكان السائق و ابوه جنبه والمرتبة الي ورا فيها ام نايف و وضحى ونياف و بالمرتبة الأخيرة ليلى و وريف وحليمه
الجمس الثاني فيه : صقر مكان السائق وجنبه ابو زايد و المرتبة الثانية ام زايد و ام فرح وفرح وجميلة وعلى رجلها سلوى وبالمرتبة الأخيرة سُلاف و جودي و وجود
والسيارة الثالثة : السائق زايد و بجنبه جابر و ورا ثامر وناصر
وقف نايف جنب سيارة صقر..
ابو نايف فتح الدريشه: ها يا يافع انت الي بتمسك الطريق ولا احنا؟
ابو زايد واهو يناظر قدام : ظني فيه من بيمسكه
ناظروا كلهم قدام الا سيارة زايد متقدمه عنهم بمسافة ويضرب بوري لهم ..مشى نايف وراه وبعده صقر..
بسيارة صقر ..بأخر مرتبة
جودي بألم : فكي
سُلاف بهمس : انا شاريته والله ماتاكلينه
جودي : فكي شعري طيب
سُلاف : فكي البسكوت اول
وجود : بنات عمى اسكتوا تحسبونا بالبيت..
ام زايد واهي تناظر الطريق : وش عندكم يابنات تتهاوشون؟
وجود بضحكه متوهقه : لا خالتي ما نتهاوش
لفت عليهم واهي تشوف سُلاف ماسكه شعر جودي و جودي ماسكه كرتون البسكوت..
ام زايد ضحكت : لا واضح ما تتهاوشون
ابو زايد : وانا هنا اسمع مناقرتهم
وجود بفشله : معليش على الازعاج
فرح : عن نفسي انا تعودت عليكم
جودي واهي تعدل لثمتها بهمس : بزر طلعتي خشمي
سُلاف : من زينه
جودي بعصبيه : خلينا ننزل اوريك شغلك يا ام عيون
ام فرح : يابنات بسكم هواش ياكافي وش خليتوا لكم حيل للبر
جودي واهي تناظر سُلاف بنظرات توعد : بقى بقى كثير
فرح : صقر شغل لنا اغنية
صقر : ابشري
-
بسيارة نايف ..الي كان مشغل اغنية بطلب من ابوه ومعلي على صوتها نوعًا ما ..
بالمرتبة الأخيرة على اليسار حليمه وبالوسط ليلى واليمين وريف الي حاطه راسها على الشباك وواضح انها بنومه عميقه..
ليلى بهمس : ها وش صار؟
حليمه : زي ما اهو الوضع
ليلى : تأكدتي انك "وأشرت على بطنها "
حليمه هزت راسها بـ ايه وأشرت بأصبعينها "بمعنى الشهر الثاني"
ليلى همست : وش بتسوين؟
حليمه : مصيره بيكبر وبعلمهم
ليلى : تحسين وجود هالروح ببطنك بيعدل الوضع بينكم؟
حليمه : علاقتي فيه متوتره انا وياه مو فاهمين بعض واهو مصمم على الطلاق وانا ماني مستعده اتمسك فيه دامه ما يبيني ، انتظر هالست شهور تخلص وكل واحد بطريق
ليلى تنهدت : الله ييسر اموركم
حليمه ابتسمت : وانتي كيف جابر؟
ليلى ابتسمت ببتسامة عذبه : الحمدلله يارب مرتاحه
حليمه : الله يتمم لكم على خير يارب
ليلى : امين وياك
-
الساعة ٨ الصباح
بعد طريق دام ساعتين ونص ..وقفوا بمكان اعجبهم بعد ماداروا البر كله..
نزلوا من السيارات واهو يتمغطون ..
سُلاف حاطه يدها على ظهرها : اه ياظهري ظهرااهه
جودي : ابي الحمام
وريف جتهم واهي يالله تمشي : رجلي شدت علي من جلسة السيارة
وجود : وين ليلى؟
لفوا كلهم اتجاه جابر الي واقف عندها يكلمها..
سُلاف : شكله بيستلمها الحبيب
فرح من بعيد : ليش واقفين؟ امشوا افرشوا معي
تقدموا البنات يفرشون الزوالي و العيال حطوا زي الحاجز بينهم وبين البنات ..
صقر بصوت عالي : يمه وين القهوه؟
ام زايد طلعتها : فرح عطيه اياه
قامت سُلاف بسرعه اخذتها : انا بوديها
راحت له سُلاف واهي ماسكه الطرحه على نص وجها : تفضل
صقر مسكها : زاد فضلك
مشى وخلاها من دون لا يناظرها ..
سُلاف همست : يعني حسبالك بهتم اذا تجاهلت
ليلى من وراها: لا واضح مو مهتمه
سُلاف فزت : خوفتيني
ليلى : امشي وخليك بعيده عنه عشان اذا سوا لك شي ماتسوي دراما علينا
سُلاف ضاق صدرها ماتدري ليش بس ليلى صادقه : طيب
حليمه وقفت : مين تمشي معي؟
وضحى : انا
قاموا الثنتين ..ومشوا بمسافة عنهم
نايف الي لاحظهم ورفع صوته : هـيه وين بتروحون؟
وضحى لفت عليه وترفع صوتها : بنمشي
نايف : لا تبعدون وانتبهوا من السيارات
زايد قام : امشوا نلعب كوره
قاموا كلهم و نايف كان الحكم ..
ابو زايد : ابعدوا عنا لا تجينا
ابعدوا عنهم بمسافة والمكان الي يلعبون فيه نازل تحت وبكذا يحجب رؤية الكبار عنهم ..
صقر بحماس : شوت
ثامر واهو يركض بالكوره وصرخ : بعد انت وشنبك
صقر بعصبيه وصوته العالي : شوت يا ابو اذاني
الشي الوحيد الي كان يثبت وجود العيال اصواتهم العاليه..
فرح بحماس: بنات امشوا نروح لهم
قاموا تحت تنبيهات ام فرح انهم يكونون بعيدات عنهم لا ينشاتون
قربوا لعند العيال وفرح تنطط :نياف نياف
نياف جاها يركض : نعم
فرح : بنلعب صح بنات؟
وريف انصدمت : لا لا وين
فرح مسكتها : الا بنلعب
سُلاف شمرت اكمامها بحماس : قدام
جودي ابتسمت : يلا انا معكم
وجود : كيف بتلعبون بغطاويكم تستهبلون!
فرح : يابنت الحلال عادي امشي نستانس بس
وريف مارضت تجي الا بعد تحت اصرارهم وافقت..
نياف قرب عند العيال : ياعيال البنات بيلعبون
زايد : وين تلعبون بعباياتكم
فرح : قلت بنلعب يعني بنلعب
نياف : خلها خلها تلعب ونشوف من بيفوز
نايف بصوت عالي : يلا العيال على اليمين والبنات على اليسار..
وريف لفرح : فرح اقسم بالله لو صار شي يفشل اذبحك
فرح ضحكت : يختي استانسي الحياة مو لازم رسمية..
جتهم وضحى واهي تركض وتصارخ : بـلعب بـلعب
و وراها طلعت حليمه الي تكتفت وابعدت عنهم ..
سُلاف : حليمه ماراح تلعبين؟
حليمه : لا
جابر بصوت عالي : ياعيال الكوره شوي شوي حبيبة قلبي لا تعورونها لا اكسر ضلوعكم
ليلى رحت ورا جودي بخجل وضحكوا كلهم ..
وحليمه تناظرهم ومبتسمه وطاحت عيونها بعيون نايف الي يناظرها ووخرت عينها على طول ..
صقر رفع ثوبه على خصره : والله يا بيجيكم تقبيع يالبنات
سُلاف تخصرت : جرب اشوف
وجود : سُلاف لا تتحدين تكفين ترا قلبي بيطير
سُلاف لفت عليها : حتى انا خايفه بس لا تظهرين ضعفك لهم
ضحكوا البنات على عفويتها تحت انظار الشباب الي يناظرون مستغربين من ضحكهم المفاجئ..
نايف بالوسط: يلا واحد اثنين ثلاثة
الكورة كانت مع فرح وبدوا البنات يهجمون على مرمى العيال ..
صقر واقف ويناظرهم : ياحليلهم سلاحف
فرح مسكت الكوره بيدها ورمته عليه : انطم
نايف قام يضحك : هيه يالحبيبه العبي زين
فرح : لا يقعد يتكلم معنا خله يلعب
صقر : طايله يدك يافريح انا اوريك
ناصر الي كان موقف عند المرمى : اخلصوا علينا
الكوره هالمره عند صقر رماها بقوه واهو يركض لها اهو ونياف وتلحقهم وضحى و فرح ..
نياف بضحك : عطني عطني
عطاه الكوره بس شاتها بقوه واتجهت لحليمه الي لفت على طول تعطيها ظهرها ..
ليلى شهقت بقوه : حـليمه
وضحى ركضت لها : حليمه فيك شي؟
حليمه مسكت كتفها من ورا بألم : لا لا
ليلى جتها واهي تلفها عليها : فيك شي؟!!
جاء صقر واهو يضحك : ماشفت يختي معليش
نايف جاها واهو يمسك المكان الي ماسكته وتكلم بهدوء وعاقد حواجبه: يوجعك؟
حليمه ناظرته والعبره خانقتها : لا ، بروح عند امي
مشت ولحقتها وضحى ..
وضحى بخوف : تكفين يوجعك شي؟
حليمه : لا والله بس كتفي
فرح جت لصقر : قلنا لك شوي شوي ترا ماهي مصارعه
صقر رمى عليها الكوره : اقول العبي العبي
فرح اعطت الكورة لسُلاف : سُلاف وريهم شغلك
سُلاف ناظرت خواتها : اطلع الماضي عليهم؟
وريف بحماس واهي عند المرمى : ايه
لفوا البنات يناظرونها وضحكوا على وريف الي كانت مقهوره من العيال..
سُلاف رفعت جلابيتها وطلع بنطلونها الطويل ..
فرح ناظرتها : شكلي بسوي مثلك عشان يمدينا نركض اكثر
صقر بصراخ : يابنت نزلي ثوبك
سُلاف بعناد : مالك دخل
صقر بعصبيه توجه لها ولما شافته جايها رمت الكوره وركضت وركض وراها وتصارخ : وريف شـوفيه
صقر واهو يصارخ : نزلي لبـسك !!!!
جودي قعدت بالأرض تضحك على اشكالهم ..
وليلى راحت لجابر : الحق الحق ولد عمك لا ياكل اختي
جابر و اهو يضحك : ماعلي منهم
ليلى بنرفزه : جابر روح الحقه!!!
فرح الي رفعت جلابيتها ومحد قالها شي ..ابتسمت : ياحلو شعور عدم الاهتمام فيك
نياف : يا ورعه لا تفلينها نزلي
فرح بملل : ياليل جاني ذا
نياف : اقسم بالله اعلم عمتي
فرح نزلت جلابيتها بسرعه : خلاص خلاص نزلتها
نياف : ادب
جودي الي وقفت ضحك واهي تشوف حركة نياف معها الي ما تفسرها الا انها غيرة ويحبها ..
ثامر جاء لعند وجود واهم مبتسم : اهلين زوجتي
وجود بصدمه : وع! زوجتك بأحلامك
ثامر بمزح : والله يازوجتي لك فقده
وجود بعدت عنه وتتصنع القرف : ماعاد بقى الا انت اتزوجك
ثامر : يحصل لك يالارنب
عند سُلاف الي استمرت تركض الين ما ابعدت ووراها صقر ..تعبت من الركض
سُلاف واهي تركض : خلاص خلاص
صقر بعصبيه : وقفي لا ترفعين ضغطي
وقفت سُلاف واهي تضحك وتلقط انفاسها : تعبت والله
صقر مسك طرف جلابيتها واهو يحسبها ويطيحها وتكلم بصراخ : اقسم بالله اشوفك مسويه ذا الحركه مره ثانية اكسر رجولك لك
سُلاف الي وقفت ضحك و اختفت ابتسامتها : خير ان شاء الله تهدد وتكلمني كذا مسوي واحد من الأهل
صقر وصدره يرقى وينزل من العصبيه والركض الي ركضه ، مد اصبعه السبابه بتهديد : والله يا سُلاف اشوفك مطلعه شي منك عند العيال اقسم بالله مايصير لك طيب
سُلاف:  والله لو افك شعري وافك اللثمه مالك دخل
مشت تعدته واهو يمسكها وتكلم بعصبيه : جـربي اشوف تسوينها
سُلاف واهي تناظر وريف و فرح جايين : البنات جو
فكت يدها منه بالقوه وراحت لهم ..
وريف مستغربه : وش صاير؟
سُلاف : يقول لا عاد ترفعين ثوبك
فرح مسكتها ومشت : امشي بس ماعليك منه
سُلاف ناظرت لورا وتشوفه ماشي وراهم ..
نياف : يلا بنات ياتلعبون زين يا روحوا اقعدوا
فرح : خلاص ماراح نلعب معكم يالسبايك
العيال بصدمه مره وحده : سبـايك!
ركضت فرح ولحقوها البنات واهم يضحكون ..
ليلى ماسكه بطنها من الضحك : ياربي وجيهم ضحكتني
ام زايد : وش فيكم تكركرون كذا؟
وضحى مبتسمه عليهم : شكلهم رفعوا ضغط العيال وجو
ام نايف : اجلسوا اجلسوا تقهوو بس وخلوا عنكم الرجه
جميلة : وريف ناصر معهم؟
وريف جلست : ايه معهم
جلسوا البنات حول بعض واهم يسولفون ومستانسين وبعد فترة جو العيال وجلسوا بالجهه الثانية مع ابو زايد و ابو نايف..
نايف من ورا الحاجز : حليمه
قامت حليمه له : هلا
نايف بهدوء : كتفك؟
حليمه : كويس مافيه شي
نايف تركها بدون لا يقولها شي..
حليمه مستغربه : موب صاحي ذا
مر الوقت مابين سوالفهم مع بعض و مابين هواش البنات والعيال مع بعض ..
-
جاء الليل الساعة ٨:٣٠ المكان اظلم وما ينيره الا الأنوار الي شغلوها العيال حولهم وحول البنات ..
وقت العشاء الي اخروه لهالوقت متعمدين، انقسموا فيه النسوان يقطعون ، و الرجال يطبخون..
سُلاف واهي تمسح دموعها : ياربي الف بصله عيوني راحت
ليلى : جيبي اقطع
سُلاف اعطتها السكين على طول : خذي فكيني
ام نايف جتهم : ها خلصتوا؟
سُلاف : بقى شوي
ام زايد بصوت عالي : وحده منكم تجي تغسل هالصحن مافيني شده اشيله..
جتها وريف واهي تشيله : بغسله انا
ام زايد ابتسمت : كثر الله خيرك يابنيتي
ثامر جاء عند الحاجز ومعطيه ظهره : يمه
ام زايد : هلا
ثامر : ابي الملح
جميلة : ثامر خذ سلوى معكم تبيكم
ثامر : تعالي سلوى وجيبي الملح معك
عند فرح و حليمه الي يقطعون اللحم..
حليمه قالبه كبدها من الريحه ومنكتمه وقفت واهي تهز راسها : مستحيل ما اتحمل
فرح : امشي بلا دلع قطعي معي
حليمه الي حست بشعور الترجيع وراحت تركض بعيد عنهم واستفزغت..
فرح : يالله يالدلع والخماله الي فيك
ام زايد راحت لها : بسم الله عليك وش فيك!
حليمه واهي تمسح فمها : حامت كبدي من الدم وريحته
جت وضحى تركض تغطي الموضوع ومسكت ميساء تمشيها : خالتي روحي اقعدي
ام زايد : طيب لا تدفين يختي يالله امشي ترا
وضحى لفت على حليمه : اذا ماشكوا الحين بيشكون بعدين
حليمه : وش بيخليهم يشكون بلا استهبال
وضحى : طول عمرك تقطعين لحم وقفت على هالمره
حليمه : وضحى خلاص قلت لك بعلمهم لا تقعدين توتريني
وضحى مشت وتركتها : بكيفك
حليمه الي شافت انشغالهم باللحم و التقطيع وريحة المكان الي عجت قررت تبعد عنهم شوي ..
-
بعد ساعتين من الحوسه ، البنات قطعوا كل شي و العيال ركبوا العشاء وخلوها تطبخ على النار ..
وضحى واهي تتقهوى : يازين هالقهوه من مسويها؟
وريف ضحكت : والله من الكرف صرتي تتطعمين القهوه
وضحى : اي والله
ام نايف : حليمه مسويتها الله يجزاها الخير
ليلى رفعت راسها : الا وين حليمه صدق؟
تلفتوا ، كل وحده تشوف الي بجنبها ..
جميلة رفعت صوتها : حليمه!
مافيه رد مايسمعون الا سوالف وضحك الرجال من الجهه الثانية ..
فزت جميلة بسرعه واهي تقرب للحاجز : ياعيال
صقر : سمي
جميلة بتوتر : نايف وينه؟
نايف : هنا وش بغيتي امري
جميلة لفت على البنات : ياويلي نايف هنا
سمعوا كلامها الرجال و وقفوا مرتعبين!
ابو زايد واهو جالس وعيونه على الحاجز الي واقفه خلفه جميلة : وش بلاك يابنت!!
جميلة : حليمه ماهي عندنا
نايف : بذمتك
صقر بعصبيه : يعني وين بتروح!!!!
نياف : تغطوا يابنات
تغطوا البنات بسرعه واجتمعوا كلهم مع بعض ..
ام زايد بكت : ياربي بنيتي
ام نايف : شيكوا على السيارات يمكن انها دخلت تنام فيها
ليلى ركضت لأقرب سياره فتحتها ولا لقتها نزلت واهي تقول : فاضيه
ركض ثامر للسيارة الثانية والثالثه يتفحصها : موب هنا
ام زايد مسكت راسها : يمه بنتي يمه
ام نايف تهديها : اذكري الله اذكري الله
نايف بعصبيه : قاعده عندكم شلون غابت عيونكم عنها!
وضحى بتوتر : لهينا كنا نشتغل
صقر طلع الكشاف من السياره وراح يركض يدور عليها بأعلى صوته ولحقوه جابر و نياف و نايف وثامر وزايد راحوا من جهات مختلفه واهو ينادونها بأعلى صوته ..
ابو زايد بخوف : لا حول ولا قوة الا بالله لا حول ولا قوة الا بالله
ابو نايف : نتصل على الشرطة ان رجعوا مالقوها
ام زايد انهارت بكي ولحقتها وضحى والباقين متوترين واعصابهم تلفت من انتظارهم للعيال
جاهم ثامر يركض : جتكم!!!
الكل : لا
ركب السيارة واهو يضرب بالبوري لعل وعسى اذا كانت قريبه تسمع ومن رنه للبوري رجعوا له العيال..
جابر : لقيتوها؟؟
صقر واهو يرمي شماغه على الحاجز : البنت مالها حس
وضحى بكت اقوى من خوفها عليها وليلى جلست تهديها ..
سُلاف : بجي معكم ادور
صقر بعصبيه : محد يتحرك منها ويضيع الي دال هالدرب يجي
ابو نايف بخوف : اتصل على الشرطة
جابر طلع جواله واهو يجهز الرقم : اذا جو الباقي ومامعهم حليمه ببلغ
خمس دقايق وجو يركضون ..
ابو زايد : لقيتوها!!
زايد واهو منحني من التعب : لا
ام زايد : وين يعني انشقت الارض وبلعتها..ياربي بنتي
ام نايف بخوف : استودعتها الله استودعتها الله
نايف بعصبيه وبأعلى صوته : من اخر واحد شافها!!!
عم الهدوء مافيه الا شهقات وضحى ..
رجع يسأل بحزم : قلت من اخر واحد شافها!
وضحى وقفت وصوتها مخنوق من البكي : انا
نايف : وين كانت؟
وضحى اشرت على الشجرة الي وقفت عندها تستفرغ : وقفت هنا تركتها وخليتها وانشغلت
ونايف : وبعدين؟؟؟
وضحى : مدري جلسنا نتقهوى ولاحظناها ماهي موجوده
ابو زايد : جابر اتصل بلغ بسرعه
ابعد جابر عنهم بمسافة واتصل يبلغ..
زايد : برجع ادور
نايف : بجي معك
وضحى وقفت واهي تبكي : نايف
نايف ناظرها ينتظرها تتكلم ..
جودي بتوتر : وضحى تكلمي شايفتها رايحه لمكان انطقي!
وضحى هزت راسها : لا ما شفتها وربي
نايف بأعصاب تعبانه : اجل وش تبين مناديتني!!!!
وضحى وعيونها تلمع من الدموع : خايفه يصير فيها شي
نايف قرب لعند وضحى ومسكها من كتوفها : تكلمي لا تلعبين بأعصابي
ام نايف وقفت تمسك يده : نايف
وضحى صرخت : حـلـيمه حـامل خايفه صار لها شي
نايف طاحت يدينه بصدمه من على كتوفها والكل شهق..
وضحى كملت حكيها واهي تبكي : قالت بتعلمكم بكره بحملها
ليلى جت لعندها تحضنها : خلاص وقفي بكي
وضحى : انا الغلطانه شفتها تستفرغ وخليتها وانشغلت ماقعدت فوق راسها اخاف مغمى عليها او طايحه بمكان
ام نايف مسكن راسها : يارب سترك يارب
ابو زايد مسح على وجه وبعصبيه : دقيت على الشرطة!!
جابر : ايه ياعمي اتصلت
نايف رجع يمسك وضحى بقوه : من متى حامل!!!
ابو نايف : يعني ماتدري عن مرتك حامل؟
وضحى : قالت شهرين شهرين والله كانت بتعلمكم
زايد قام يركض مثل المجنون يصارخ و يدور عليها وصقر ركب السيارة يولع انوارها ..
نايف راح ورا السياره جلس واهو ماسك راسه بصدمه وكأن شريط الذكريات تمر على باله ، لبسها الوسيع رفضها انه يقرب منها مسكها مرات لبطنها واشياء كثيرة واضحه وتشكك بس اهو ليش ما استوعبها الا متأخر؟ ..
جاه نياف وجلس جنبه : هونها وتهون وانا اخوك ان شاء الله انها بخير
نايف : حامل ولا دريت
نياف سكت واهو يطبطب على كتفه لأن ماعنده اي رد عليه ..
قاموا ورجعوا يدورون خلال ساعة تواجدوا الشرطة و كثفوا البحث حول المنطقة..
والبنات لما شافوا الموضوع جدي و كثرة الأشخاص الي يدورون عليها بالكشافات بكوا ماقدروا يتحملون ..
ثامر : اركبوا السياره بسرعه
فتح لهم السيارات وركبوا ..
ام نايف : يارب انك تحفظها يارب
ثامر الي واقف عند البنات اهو وجابر مايبون يبعدون عنهم ..
جابر رفع جواله : هلا ..بذمتك!!..وينكم؟..يلا يلا جايين
ثامر : وش صار؟؟؟
جابر واهو يركض للسيارة : لقوها لقوها متوجهين للمستشفى
ثامر مسك راسه : يالله
ركب السيارة الثانية ولحق سيارة جابر الي عارف وينهم..
خلال ربع ساعة وقفوا عند اقرب مستشفى..
دخلوا كلهم دفعه وحده وباين عليهم الخوف ..
ابو زايد جاهم واهو يأشر لهم : هدوا هدوا البنت بخير
ام زايد : وين بنتي ابي اشوفها
صقر مسك امه ودخلها لها ..بكت لما شافتها نايمه وعلى وجها جرح ..
ام زايد واهي تبكي : وش فيها؟
نايف : زلقت واغمى عليها
ام نايف ناظرته : والي ببطنها
ابو زايد بهدوء : بخير
كلهم زفروا براحة الا نايف الي كان فوق راسها ويناظرها بنظرات غير مفهومه
دخلت الممرضه منصدمه من عددهم : شخص واحد بس يقعد معها
كان بالغرفة نايف وامه وابوه وصقر وابو زايد وام زايد والبنات عند الباب وراهم جابر ونياف
وزايد عن الشرطة و صقر يخلص معاملات اوراقها..
ابو نايف : الحمدلله على سلامتها وسلامة الي ببطنها
بعد ربع ساعة والكل تطمن عليها رغم انها لازالت نايمه وفاقده للوعي ..
رجعوا الكل للبر ياخذون اغراضهم ومتوجهين لبيوتهم وزايد حط مفتاح سيارته مع نايف وركب مع الباقين ..
ونايف عند حليمه واهو متكتف يناظرها ، ما يدري اهو معصب ولا عتبان ولا خايف عليها بس الأكيد شعور ماهو مريحه ، جلس على الكرسي واهو يستغفر..
ثواني وفتحت عيونها وهمست : ويني فيه؟
وقف واهو يقرب لها بهدوء : بالمستشفى
حليمه فتحت عيونها اكثر ومسكت راسها بألم : وش صار!
نايف : طحتي
حليمه من غير شعور حطت يدها على بطنها : كيف!!
نايف واهو متكتف : لا تخافين الي ببطنك سليم
اتسعت عيونها بخوف : نايف
نايف : برري موقفك لأن احس بصير مثل القنبله وافجر بالمكان
حليمه خنقتها العبره : والله كنت بعلمك
نايف مسكها من بلوزتها : شهرين شهرين! متى كنتي بتعلميني اذا ولدتي!!!!
حليمه رفعت يدها ليده : تكفى يا نايف تكفى
نايف بعصبيه : ليش ماعلمتيني!! عاجبك موقفي قدامهم اني ما ادري بحمل زوجتي الي لها شهرين
حليمه بكت : ما كنت عارفه الا قريب مابغيت اتكلم الا لما اتأكد ولما تأكدت انت قررت تطلقني خفت خفت كل شي ضدي يا نايف
نايف بعصبيه : مالك مبرر عندي لو تعطيني الف عذر
حليمه ناظرته وعيونها غرقانه دموع : والله كنت بعلمك بس كنت خايفه
نايف : خايفه؟ تخافين تعلمين اب بضناه!!
حليمه بكت بكل مافيها : كنت خايفه من كل شي من علاقتي فيك ومن موضوع الطلاق ومن الي ببطني منك ومن كيف بيعيش بين ام واب منفصلين خفت كيف بصير ام خفت اذا انا استاهل اصير ام خفت من المشاكل الي بتصير بين عمي وابوي من طلاقنا وعلاقة عايلتنا خفت اكون السبب بفراقهم خفت من كل شي حسيت اني احمل الف حمل على كتافي صدقني لو بيدي هالحمل اني ما اخترت اني احمل
نايف بحزم : استغفري
حليمه بانهيار : استغفر ليه استغفر انا ما ابي هالحمل ما ابيه يجي ويتعذب مابيه مابيه كله منك ليش تزوجتني ليه دامك ماتبيني!! ، ليه تهددني بالطلاق ليه بايعني ليه مرخصني انا مو بس زوجتك انا بنت عمك يانايف انا كيف بعيش حياتي بعدين وانا فيه شي يربطني فيك
بكت واهي تضرب بطنها ومسك يدها بقوه نايف واهو ينادي على الممرضات ..ودخلوا يركضون واعطوها المهدئ وطلعوا..
حليمه واهي بنص وعي بهدوء : دامك ماتبيني ليه تخليني ارتبط فيك؟
نايف : خلاص
حليمه : دامك ماتبيني ليه تترك بجوفي شي يربطني فيك؟
نايف تركها تتكلم واهي تحت تخدير المخدر ..
حليمه غمضت عيونها وبهمس : تعبتني تـ..عـ..بـ..تـ..نـي
جلس بالكرسي و اهو يتأمل ملامح وجها المورده من البكاء وقف واهو يحط يده على بطنها واهو يتحسسه ..