بعدك يابوي اصبحت دنياي عرجاء بلا عكاز

26 و الأخير

بـ بيت ابو نايف ، على اذان المغرب و الرجال بالملحق و أم فرح وام نايف وام زايد برا بالحوش..
ليلى بحماس : يلا جودي تكلمي
جودي بتأتأة : طيب انتوا توقعوا احسني مستحيه اتكلم
ليلى : لك ساعة تبينا نخمن
وضحى ضحكت : عن نفسي دريت بس ابيك تنطقينها
وريف ناظرتها : وانتي مو متحمسه تدرين؟
فرح رفعت كتوفها وابتسمت : مدري
جودي : خلاص بقولكم
سُلاف : يلا انطقي
جودي بخجل : انا حامل
صرخوا البنات لدرجة الأمهات جو لعندهم خوفًا عليهم..
ام نايف بعصبيه : تصارخون عند هالبزارين! موب صاحين اطلعوا يلا
ليلى ضحكت : خالتي تعالي لا يفوتك الخبر
ام نايف : ها وش عندكم؟
ليلى ناظرتها : يلا قولي
وقفت وباست راسها : خالتي انا حامل
ام نايف ضحكت وهي تغطي فمها : استحلفك بالله!
جودي هزت راسها بخجل ..ماكان عند ام نايف ردة فعل الا تحضنها وتبارك لها ومشت للبيت كله وهي تباشر عليهم بالحلويات بهالخبريه السعيدة ، وبكذا الكل عرف ..
ام فرح بضحكه : الحمدلله يارب هالفترة ماغير نتكاثر ماشاء الله
ثامر : من كثرنا بنضيق على الديرة ماعاد بتكفينا
ابو زايد بحزم : اذكر الله
ثامر : ماشاء الله لا تخافون عيني ماهي حاره
طلعت وريف من الملحق وهي تناظر وجود : تعالي
راحت لها وهي تشوف ام زايد موجودة وجلست وكأنها حاسه ان هذي اللحظة المنتظرة ..
ام زايد ابتسمت : اكيد وريف كلمتك بخصوص الموضوع صح؟
وجود ببلاها : ها
وريف غمزت لها وتنحنحت : ايه خالتي علمتها قبل امس وفكرت والحين بتسمعين منها
وجود وقفت بسرعه بتوتر : خالتي عن اذنك شوي بس ، وريف تعالي
طلعوا مع بعض وضربتها وهمست : كذابة ماقلتي لي ان ام زايد كلمتك!
وريف : ليش اعلمك؟ وانتي مخططه معه اساسًا خلاص سوي نفسك مستحيه وقولي موافقه
وجود : وهقتيني اف منك
سحبتها معها ودخلت عليها وهي تحضنها من كتوفها : خالتي اختي حيويه بس ماعليك اعتبريها موافقه
ام زايد ضحكت : ابي اسمعها منها دامني سمعت رفضها قبل
وجود بهدوء : موافقه
ام زايد وقفت وهي تحضنها وابعدت عنها : على بركة الله
وجلست وهي حاطه يدها على قلبها : تتوقعين متى بنملك؟
وريف بتفكير : زي العاده الملكة بعد اسبوع عاد انتي بكيفك تبين عرس ولا بس تكتفين بالملكة
وجود : مدري بفكر
وريف : طيب امشي نطلع عندهم جتني تكه
وجود طلعت وراها وهي تشوف عيون البنات عليها وعلى وجيهم رسمة ابتسامه ..
وريف ضحكت : خلاص بنات! حرام عليكم
فرح : مستانسين لا تلومينا
حليمه بملل : اقول انتي الحين بأي شهر؟ احسك طولتي
فرح : نهاية الثاني
ليلى : يارب انها بنت حرام مافيه الا سلوى وحنان البنات
ام نايف : كلهم خير وبركه
ليلى : ايه اكيد بس المقصد يتعادلون بالعدد الحين بنتين بين ثلاث عيال و تحري الأثنين الي بيجون بنات او عيال
وريف رفعت يدها : شوفي انا على حسب خبرتي بالوحام اقول جودي بنت
حليمه : انا اثق بخبرتك لأنك جبتيها بسامر
فرح بحماس : وانا؟
وريف : شكل بطنك يقول انك ولد بس اصبروا نتأكد
وضحى : دام عندنا كاشف حمل مايحتاج تروحون مواعيدكم وريف تكفي و توفي
وريف ضربتها وهي تضحك : خفيفة دم بسم الله عليك..
-
مرت الأيام لحد ما اتمت الأسبوعين ، و البنات يروحون ويجون مع وجود تخلص اغراضها وترتب امورها عشان الملكة الي ماعاد بقى لها الا يوم ، ورجعة الثنائيات من الرياض لأجل يجهزون مع الباقي للملكة الي بتكون بـ بيت ابو زايد ..
زايد : اجلس انت وش مطيرك؟
ثامر بحماس : ابيه احلى عرس وملكة صارت بالديره
زايد ابتسم : خلاص ولا يهمك اقعد لا تنكسر علينا وبعدها بتهون عليك
ثامر هز راسه بثقه : انا انسان من حديد
زايد بهدوء : الله يرحم حالك بس ، نم خلنا نصحصح ونضبط الحوش
صقر بملل : ياجماعة الخير اسكتوا خلونا ننام
زايد : ابشر
بالحوش..
نزل من السلم الخشبي وهو ينفض يدينه : اشوف هالأنوار كافيه ولا؟
جابر : ايه زين
نياف : يلا مشينا
طلع ابو زايد مع نايف وهو يشوفهم يشتغلون بهالوقت : وش عندكم؟
جابر ابتسم : ابد ياعمي قلنا نخفف شغل عشان بكره ما نشتغل واجد
ابو زايد : الحين المعرس و اخوانه ما اشتغلوا تجون انتوا ياعيال العم تشتغلون؟
نياف ضحك : كلنا واحد ياعمي وبعدين ما اشتغلنا الا بالأشياء الي بنسويها لا تخاف عيالك عندهم شغل واجد
ابو زايد هز راسه : يلا وانا عمكم روحوا لبيتكم وريحوا ماقصرتوا
سلموا عليه و طلعوا على طول ..
-
عند البنات ..
اجتمعوا كلهم هالليلة بدون استثناء حتى ليلى الي ماعاد بقى الا اسبوع وتخلص نفاسها ، بعد اصرار طويل وافقت ام نايف انها تطلع ..
وجود : سُلاف تكفين انتي الي بتضبطيني لا تلعبين بوجهي
سُلاف : يعني ماقد شفتي شغلي؟ بضبطك خلاص لا تزعجيني
وجود بعصبيه : وانتي بدال ماتاكلين بهالحلاو قومي طلعي فستانك واكويه
جودي ببرود : ماراح انام الا متأخر ، خليني اكل
ليلى بخوف : جودي حبيبتي انتبهي من سكر الحمل قللي من الحلويات
جودي : مو قادره اشتهيهم كثير
ليلى : حتى ولو لصحتك وصحة الي ببطنك ترا ماينفع
تركت الي بيدها بملل وابعدته : طيب خلاص بعدوه عني لأن ما اتحمل اشوفه
ليلى لفت على وريف الي جالسه قدام التوأم وتلعبهم : وانتي يا اخت وريف خلصتي؟
لفت عليها وهي مبتسمه : تسأليني انا؟ انا اول من يخلص ويرتب فيكم
سُلاف : وريف انتي بعد حامل؟ لأن اشوف وحامك على هالبزران
وريف لفت عليها وهي تضحك : بلا استهبال قاعده اللعبهم عادي ، عشان يتذكرون ان عندهم خاله تحبهم
جودي صفقت بيدينها : يلا الساعة ١٠ ، وقت النوم
كل وحده انسدحت بفراشها وبدت سواليفهم وذكرياتهم مع بعض وضحكهم الي حاولوا يمسكونه عشان ما يصحون عيال ليلى ..
-
الظهر بـ بيت ابو زايد ..
صقر بستغراب وهو يشوفه جالس بالحوش : انت متى صاحي؟
ثامر بحماس : من صليت الفجر ما غفت عيني
صقر بصدمه : اعوذ بالله من هالحماس
ثامر : لا جد مو عن حماس بس لأول مره احسني شايل هم جدي
جاه زايد من وراه وهو يربت على كتفه : توك تحس بالجديه؟
ثامر هز راسه بتوتر : ايه والله
صقر : اقول عاد هالله هالله فالبنت ترا ذا الي عندي متوعده اذا زعلتها تفلم فيني وفيك
زايد مات ضحك : افا ياخوي طلعت خواف؟
صقر بتكبر : مالك دخل
ثامر ضحك : اجل الحمدلله ان وجود زوجتي
صقر بنرفزه : ولد اعقل وعن هالنغزات الي مالها داعي
قام صقر للباب وفتحه كله وهو يشوف عمه والعيال جايين ورحب فيهم وبدا كل واحد يمسك شغلته ويرتبون ويفرشون الزوالي
و ام زايد اخذت اغراضها وراحت لـ بيت ام نايف عندها ام فرح وبنتها و وضحى وحليمه..
بـ بيت ام نايف : والله ياعمري هالجميلة ماغيرت تتمرمط بالروحه والجيه
حليمه : سلوى تعبانه ولا قدرت تجي
ام نايف : ايه ماعليه مايشوفون شر
ام زايد : اهم شي كلمت اخوها وتعذرت منه وباركت له
ام نايف : وثامر حليل ما ظنتي بيتشره
ام زايد بسرعه : لا وليدي ماله بذا الحركات
فرح : بس اكيد وده بأخته تحضر الملكة
ام زايد : هين خالصين من ذا الحكي بس عاد وش نسوي
دخلت وضحى وهي ترفع شعرها : خلصتوا؟ خلونا نروح نشوف وش جهزوا العيال
ام نايف : وانتي اذا خلصت هالليلة على خير تعالي بكلمك
وضحى : طيب
طلعت اهي و فرح توجهوا لـ بيت ابو زايد يشبون البخور و يصلحون القهوة والشاهي على مايخلصون الباقي ..
عند البنات ..
لبست سلسالها وسوارتها علقت بشعرها وصرخت بألم..
سُلاف مسكت راسها وصرخت : خربتيه!!
وجود بتوتر : لا تصارخين طيب
وريف دفتها : وخري انا اضبطه
تكتفت بملل : ساعة اضبط هالشعر واخر شي تخربينه
وجود : وش اسوي؟ مادريت ان السواره بتعلق
سُلاف : لو انك منتظره البسك
وريف بعصبيه : خلاص يابنت لا تصارخين عليها يكفي انها متوتره
سُلاف بهدوء : انا بطلع اذا خلصتوا اطلعوا نروح قبل يجون الناس
وريف : ايه لازم ندخلها قبل يجون ، اخذي فستانها معك تلبس هناك
وجود برجفه واضحه : كذا حلو خلاص
وريف مسكتها : وش فيك ترجفين؟ هدي وبعدين ترا ثامر ماهو انسان صعب واقشر عشان تخافين منه
وجود بتوتر : ادري والله بس يعني مدري شعور جديد علي
وريف باست راسها ومسكت كتوفها : ام عزيز جايه
وجود ابتسمت : الله يحييها
وريف : وبالنسبه لعزيز..
قاطعتها بهدوء : مسأله انتهت ولا عندي اي رغبة اعيدها او استنزف طاقتي فيها ..تركني وراح بسلامته والله بيعاقبه على مافعل
ابتسمت بزعل على اختها وتنهدت : زين تسوين
شالت شنطة الأغراض وطلعوا وهم يشوفون ليلى شايله حنان وجودي ريان ، والأغراض تقاسموها الثلاثة الباقين وتوجهوا بسرعه لـ بيت ابو زايد يدخلون من الباب الي ورا ..
-
بـ بيت ابو زايد ..بعد اذان العشاء
طلعوا البنات للحوش و بدوا يضيفون النسوان الموجودين ، اما الرجال كانوا على علم ان عددهم بيكون كبير و طلعوا للحاره و رفعوا الخيام و فرشوا الزوالي وبدت احتفالاتهم كالعادة الي واصله للكل باللعب و الدف القوي الي حمس الكل ، حتى الي ماحضر صاروا يشوفونهم من الدرايش طالعين ويناظرون العرس وحماسهم ..
زايد قرب لعند اذنه : ابوي يقول يلا
ثامر رفع صوته : ايش؟
زايد : دام ان الكتاب انكتب يلا ابوي يقول خذ مرتك الوقت تأخر
ثامر هز راسه : اجل كلم البنات يطلعونها لي
زايد : وانت قرب السيارة للباب الي ورا عشان تطلع
عند البنات ..
قبل ساعة ..
طلعت للكل تنزف وتحس ماكانت سامعه اي صوت ماعاد دقات قلبها الي رجف الف مره بكل مره تخطي خطوة من توترها ونظرات الكل لها ، لمحتها جالسه ولوحت لها واكتفت انها ترد لها ببتسامة هادية ..
ام عزيز : الله يبارك لها
وريف وعيونها على اختها : يارب
جلست على الكوشه وبدوا البنات يرقصون قدامها ويضحكونها ، رغم محاولات ترقيصها معهم بس رفضت من كثرة الناس واصوات الدف والأغاني الي اختلطت ببعض ..
فزت ام زايد وهي مبتسمه : ياهـلا والله!
ضحكت وهي ترتمي بحضن امها : هلا فيك
ام زايد خنقتها العبره : حسبتك منتي جايه!
جميلة : والله ماكنت بجي بس زين لحقت عليها قبل تروح ، بسلم عليها
اول ماقربت للبنات ولمحوها ركضوا لها منصدمين ، واتجهت لوجود الي كانت تناظرها بعدم استيعاب..
جميلة بستهبال : شكل ماودك اني جيت!
وجود بهدوء : حرام عليك! والله اني فرحت واكتملت الفرحة
باستها بخفه وابعدت عنها لأن حليمه و وريف بيطلعونها برا لثامر ..
ركبت السيارة ورا ولف عليها مستغرب : ليش ماركبتي قدام؟
وجود بهدوء : الفستان كبير
هز راسه ومشى لناحية الفندق ..
بالملكة و العرس ..
رنت الساعة ٩ وبدا المكان يخف من الناس حتى اصوات الدف وقفت واجتمعوا البنات حول بعض بفساتينهم وحوسة عيالهم ..
وضحى سندت راسها وتنهدت بتعب : والله ماقصرنا بالكرف يبغى لنا ننام اليوم كله مانصحى ونسوي فطور وقلق
ام زايد : ايه الترتيب خله لا صحينا وصحصحنا الحين المراقد تنادينا
وضحى عدلت جلستها : يمه وش تبين؟
ام نايف : والله مافيني شده الحين خلينا نرجع البيت وننام ومن اصبح افلح
وضحى بهدوء : يلا مشينا
اتجهه كل واحد لبيته يعلنون عن مدى تعبهم ..
الا جودي الي راحت مع وجود ونياف واخيرًا تنازل وتنام بالملحق عندهم بدال لا ياخذها معه لبيت اهله..
-
بالفندق ..
ابتسم وهو يشوفها طالعه من الحمام : انا اشوف ماينفع تستحين لأننا نمون على بعض ولا؟
رتبت اغراضها من دون لا تناظره : صح بس انت لا تزودها
وقف قدامها : وش رايك فيني بشهر وشوي رتبت الأمور و اقنعتك فيني؟
ضحكت بخفه وهي تربت على كتفه : تعجبني
تنحنح ومسك يدها ونزلها من كتفه : اليوم شكلك حلو
نزلت راسها وسحبت يدها بسرعه بتصريفه : اليوم تعب ولا ماحسيت؟
حاول يخفي ابتسامته من تصرفها : لا ماحسيت
وجود اشرت للمكان الي جنبها : يلا نام ولا ماودك؟
ثامر : بطلع للصاله وان جاني النوم جيت
انسدحت بسرعه وهي تلف اللحاف كله على جسمها وتسمع خطواته لحد ماطلع من الغرفة وزفرت براحه : الحمدلله
انسدحت على ظهرها وهي تناظر السقف وتتذكر كيف كانت بعلاقة مدة انتظارها اربع سنين ، وممكن كانت بتنتظر لو ما شافته على حقيقته و بالمقابل؟ ربي جازاها بواحد بلمح البصر سوا الي يبيه وتبيه من دون لا يطول انتظارها ..
قامت من السرير وهي تعدل شكلها وطلعت له بالصالة وكان مندمج بالمسلسل..
وجود بهدوء : ملل
ناظرها مستغرب : مو كنتي بتنامين؟
وجود : ماقدرت
زحف لها مكان واربت عليه : تعالي طيب
جلست جنبه من دون اعتراض وهي تحط اللحاف على جزئها السفلي لأجل تغطيه ، واثناء اندماجها بأحداث المسلسل اختلت موازين افكارها بمجرد ماحست بيده تخلخلت بين خصلت شعرها ..
لفت عليه بهدوء وتشوفه يتأملها ويبتسم وعلى طول شتت نظرها للتلفزيون..
ثامر : وش فيك؟
وجود بتوتر : ماتعودت عليك كذا
ابتسم : ولا انا بعد
وخرت يده بهدوء : ابي اشوف المسلسل من دون لا تشتتني
ابعد يده وبدا يلعب بشعره من دون لا يرد عليها..
وجود : وش قصته؟ مافهمت اهي ليه زعلانه منه الحين؟
ثامر بتركيز وحماس للأحداث بدا يشرح لها كل شي واندمجت معه اكثر ، وراح ليلهم متابعين المسلسل..
-
بنفس التوقيت ، عند زايد و وريف ..
انسدحت جنبه وهي تلمس كتفه بهدوء : زايد
لف عليها بسرعه وناظرها : هلا
سندت راسها على يدها وهي تنهد : ماتحس فيه شي غريب؟
عدل جلسته بهدوء وهو يلف جسمه كله لناحيتها : وشو؟
رفعت كتوفها : مدري انت حاول تكتشف
زايد بصدق ولازال على نفس الهدوء : والله مافيه شي غريب الا اذا حصل شي عندكم بالعرس
وريف تربعت على السرير : اقصد غريب بيني وبينك
جلس مثل جلستها وهو يناظر بعيونها بستغراب : وش بيني وبينك؟
وريف تأففت : ياخي من صارت اخر مشكلة من اسبوعين وانت مو زايد الي اعرفه
زايد بستغراب : مو احنا تكلمنا بخصوص الموضوع وانهيناه؟ كل شي رجع تمام وش الي تغير فيني؟
وريف بهدوء : ما احس اني اشوف لمعة الحب بعيونك مثل قبل لما تشوفني
مسح على وجهه بطولة بال : يمكن هاليومين منشغل بعرس ثامر وفهمتيني غلط
وابتسم وكمل : ولا مخزون الحب عندي فايض ، فايض بالحيل
هزت راسها بهدوء وهي تحاول ما تكثر دراما ولا تتعبه من افكارها الي تتعبها شخصيًا : طيب ، خلاص يلا نام
هز راسه بهدوء وسحبها لعنده : نامي معي
حضنها وبقت تناظر لملامحه بتوتر ، وفتح عينه وكأنه حاسه فيها : عندك شي بعد بتقولينه؟
وريف لفت وجها بسرعه : لا
مسكها من فكها وهو يبتسم : اخلصي علي وش عندك؟
وريف بتوتر : ودي اقولها لك
زايد : ايه قولي من ماسكك
وريف بهدوء : احبك
تجمد ثواني بمكانه وهو يتأمل ملامحها القريبة منه وهو يحاول يستوعب هالكلمة الي ياما تمناها تنقال له منها ..
غطت وجها بيدها بسرعه وضحكت بخجل : لا تناظرني
زايد بصدمه : انتي قلتيها؟
وريف : خلاص عاد نام اف منك
زايد : تتأمليني يوميًا ولا غطيت وجهي بس لا جاء الدور علي تغطيتي
وريف : استحي عاد وش اسوي
باس راسها ورجع يسدحها جنبه وغمض عيونه : يلا عاد لو تكلمتي حرف زياده بتعرفين وش بيصير
سكتت وهي تناظره بصدمه وماكان عنده رد الا يضحك على تعابيرها : استهبل يلا نامي عاد
تلحفت وهي تحتضنه وسرعان مانامت بعد ما قالت الي بقلبها فعلًا له ، وتجرأت فعلًا انها تعبر له عن شعورها ولو بهالكلمة البسيطه..
-
صباح جديد ، بـ بيت ابو نايف ..
وقفت حليمه وهي تشيل الصينيه وطلعت من المطبخ : انا بسبقك
وضحى وهي تركب القهوة والشاهي لأجل بعد الفطور تحطها لهم بسرعة ..
ام نايف : حليمه متى بتنقلون؟
حليمه : اسبوع اسبوعين ان شاء الله قريب
ام نايف : يلا هانت
وضحى : خلوا السوالف بس وعلميني وش تبين فيني؟
ام نايف : حليمه ماهي غريبة
وضحى بستغراب : طيب؟
ام نايف : ابيك تشوفين وش بين جودي و نياف لا تصير بينهم مشكلة ولا درينا عنهم
وضحى : وش دخلنا فيهم!
ام نايف بنرفزه : لا ماعندي وش دخلنا فيهم! شوفي يوم اني شلت يدي من حليمه ونايف وش صار بينهم خليني الحق على اخوك الثاني
حليمه سكتت وهي تناظر انفعال خالتها ..
وضحى : طيب وش تبيني اسوي؟
ام نايف : انا ادري فيهم لو سألت ماراح استفيد عشان كذا انتي تقربي منها وشوفي ان كان شكي فمحله عاد ذا وقتي اشوف وش وراهم
وضحى بملل : ياربي انا وش دخلني خلي حليمه
ضربتها بخفه بعصبيه : اعقلي واسمعي الكلام
تنهدت بستسلام : طيب ، بس ذا الي تبينه؟
ام نايف : ايه
حليمه بهدوء : ان شاء الله مافيهم الا كل خير
ام نايف : ان شاء الله
-
بعد العصر ، طلعت من بيت خواتها الي كانوا مجتمعين مع بعض
جهزت اغراضها وركبها بالسيارة : ليش ما انتظرونا؟
نياف : جده متصل وطار له
جودي بملل : وع ياشينه
نياف بستغراب : وانتي وش عندك معه؟
جودي : بس كذا
نياف ببرود : يلا بس نسلم على اهلي ونمشي
جودي: طيب
توجهوا لـ بيت ابو نايف ونزلوا وهم يشوفونهم بالحوش..
جلست بعبايتها ولثمتها وهي تشوف الكل فيه الا ليلى الي كانت عند البنات ..
وضحى قامت بسرعه بعد ماغمزت لها امها : جودي ابيك شوي
قامت معه ودخلوا لغرفتها وهي تسكر الباب ..
جودي : وش فيك؟
جلست جنبها بسرعه : ما احب اتدخل بهالأمور بس ودي اسألك سؤال وجاوبيني بالصدق
جودي بستغراب : ايه وش فيك طيب؟
وضحى بإحراج : فيه مشكلة بينك وبين نياف؟
جودي بسرعه : قايل لك شي؟
وضحى بتوتر : لا والله العظيم مافتح فمه بحرف ، بس انا حاسه و ودي اتطمن
جودي بهدوء : لا تطمني مافينا شي
وضحى : علميني وان قدرت اساعد بساعدكم
جودي بملل : كنا متهاوشين والحين الوضع هادي بالذات اني حامل الحين الوضع صار اهدا فعشان كذا تطمني
وضحى زفرت براحه : الله يريحك
جودي ابتسمت : شايله هم مو لك ريحي بالك بس
وضحى : ان شاء الله واذا احتجتي شي كلميني
جودي : ابشري
وضحى : اسمعيه ينادي يلا نطلع قبل لا يسوي سالفه
طلعت على طول وهي تودع الكل وركبت السيارة معه ..
نياف : وش تبي وضحى؟
جودي : سوالف بنات
نياف ابتسم : علينا؟
جودي ابتسمت على ابتسامته : وش دخلك خير البنت تكلمني مفروض ما تسأل
نياف : صح انا وش دخلني بسوالفكم
مدت يدها للمسجل وشغلت اغنية وبدت تحرك يدها مع الموسيقى..
نياف بعصبيه : نزلي يدك لا يشوفونك الرجال
جودي مستمره ترقص بهدوء : مارقصت فوق روسهم بالسيارة
طفى الأغنية بسرعه واستبدلها بقرآن : اسمعيه خل شياطينك تقر بمكانها
تكتفت بعصبيه وهي تناظره : والله انك بزر
نياف : فيك حرة رقص ارقصيها بالبيت مو بالسيارة
جودي : طيب شغل الأغنية وقصر عليها والله ما ارقص
نياف بعناد : لا اسمعي القرآن
سندت راسها وهي تناظره بعصبيه ..ضحك عليها : شكل شيطانك اهو الي يناظرني
جودي بملل : ياشينك نياف لا تعكر مزاجي خلاص عاد
نياف يمثل الصدمه : ماقلت شي! اسمعي القرآن وانتي ساكته
نزلت المرتبه وانسدحت وهي تناظره : انا بنام صحني اذا وصلنا
نياف : ايه نامي كل وقتك نوم اساسًا
جودي : زي ما كل وقتك دوام
نياف ابتسم : خلاص يابنت الحلال بدال لا اركز بشغلتين قررت اشوف بضايع ابوي يعني دوام طبيعي لا تشيلين هم
جودي تنهدت : تمام
-
مرت اربع شهور ، كانت هاديه على الكل من دون احداث تُذكر ، و روتين ملل على البعض ..فرح صارت بالشهر السابع و جودي بالشهر الخامس ، و انتهى كورس العلاج لصقر ويعتبر بمرحلة الأختبار لأستجابته للعلاجات ..وما كسر روتينهم الا اتصال جميلة عليهم وتشرها كالعادة انهم مايجونها..
بالمطار ..
فرح وفارس و نياف و جودي اكتفوا انهم يمسكون الخط للدمام متوجهين لجميلة بعد ما رفضوا الأمهات ان هالحوامل يركبون الطيارة..
ام الأفراد الباقين كانوا بقمة سعادتهم بدخولهم للمطار ..
ليلى وهي تتلفت : جابر وينه
وضحى اشرت لها : شوفيه
ابتسمت وهي شايفته شايل ريان معه وجاي : اجلسي لا تتعبين
ليلى : لا تروح وتخليني خلك معي
جابر وقف جنبها : ابشري
لفت عليهم مستغربه وهي تشوف سُلاف وصقر يتهاوشون : الحمدلله و الشكر مايكبرون هذولي!
صقر بعصبيه : يمه وخري هالبزر عني لا ادفنها قدام الكل
سُلاف وقفت جنب ام زايد : يمامي خوفتني
ام زايد : اعقلي يابنت الحلال وش بلاك على الولد من دخلتي المطار وانتي تنتفين شعره
سُلاف ضحكت : ابي اعصبه
ام زايد : الله يهديكم بس
قاموا بسرعه وهم يشوفون زايد جايهم يركض وراه ثامر : النداء الأخير بسرعه قبل تقلع الطيارة
سرعوا خطواتهم و وقفوا اول ماشافوا ان الكبار مافيهم شده للركض ..
ابو نايف بعصبيه : ولعنه تلعنكم حاطينا بالشيطان وتبون تطيرونا
نايف سحب عربيتين وركب امه و ابوه ودف ابوه و جابر دف امه
ووضحى شالت ريان وليلى حنان وركضوا بسرعه وهم يتلفتون لأبو زايد الي ماسك شماغه من سرعة ثامر فيه لا يطير..
ابو زايد : اركد اعنبوك من ولد
حليمه بتعب : سُلاف شيليه تكفين يدي اوجعتني
اخذت سامر وسرعوا خطواتهم ورا الباقين ..
وقفت ليلى بمكانها وهي ميته ضحك على اشكالهم..
وضحى بعصبيه : امشي! لا تطير
ليلى وهي تأشر عليهم : شوفي كيف يركضون
ام فرح وقفت وهي تناديهم : ليش وقفتوا! اسرعوا
وضحى لما استوعبت كيف يركضون والناس يناظرونهم ضحكت ومسكت ليلى وسرعوا وراهم متجاهلين نظرات الكل ..
وريف وهي تنتظر عند الباب بخوف وتوتر : يارب يارب يلحقون
ابتسمت وزفرت براحة من لمحتهم جايين من بعيد.
زايد بستعجال : يلا اركضي
وريف بستغراب : اركض؟؟
ضرب راسه بخفه : اقصد اركبي الطياره يلا
نزلوا الكبار من العربيات ودخلوا للطيارة والكل وراهم ..
وقف نايف وهو يناظر للكل : كاملين؟
الكل : ايه
سكرت وضحى جوالها وهي تناظر امها : يقول ساعتين و واصلين
ام نايف : ايه زين بنكون واصلين قبلهم
وضحى : حرام عليكم لو انكم مخلينهم معنا مو احسن؟
ام نايف بحزم : الحمّل مايركبون الطيارات
وضحى بهدوء : طيب
ربطوا الأحزمه و استعدوا للأقلاع وبدت حنان تبكي و جابر اخذها يهديها لا تزعج الناس وسرعان ما سكتت ..
ليلى زفرت بهدوء : الحمدلله سكتت
جابر : عسى نوصل بدري بدون ازعاجهم
ليلى : ان شاء الله
-
بنفس التوقيت بالطريق..
وقفوا جنب بعض بالسيارة قدام المحطة ونزلوا اربعتهم ..
فرح مسكتها : ابي اشتري كل شي
جودي : انا مانعيني من الحلويات تخيلي
فرح بستغراب : اما ليه؟
جودي : من كثر ما اكلت شكوا ان فيني سكر حمل
فرح بخوف : مجنونه! انتبهي لا يصير فيك وفيها شي
جودي مسكت بطنها : ماعليك بنتي بطله
نياف بملل واستعجال : ماودكم تمشون؟
فارس : ولا اركبوا السيارات واحنا بنجيب الي تبونه
فرح وجودي بسرعه : لا
نياف : اعوذ بالله من هالمزاج يلا عاد لا تمشون على بيض
تفرق كل واحد بمكان يشتري الي يبونه ، ودقايق وركبوا سياراتهم ..
فرح بتعب : تعبني ولدك
فارس ابتسم : تعبه راحه صح؟
فرح بملل :صح بس ما ينعطى وجهه
فارس : هانت شهرين ويشرفنا ان شاء الله
بالسيارة الثانية..
مد يده لها : هاتي الكيسه
جودي هزت راسها : لا
سحب الكيسه وهو يشوف الي شرته وابتسم لأنه ماشاف سكريات : شاطره تسمعين الكلام
جودي بملل : ارتحت؟
نياف : ايه اكيد برتاح دام اني بضمن صحة بنتي و امها
جودي ابتسمت وعينها طاحت على سيارة فارس الي مشت : يلا امش بس معهم
-
بالمطار ..
نزلوا من الطيارة وطلعوا برا عند البوابات ..
نايف : والله هذي البشله الحين وين نلقى مواصلات
ثامر : يبغى لنا قطار على هالعدد
ام زايد : لا اله الا الله ياثامر كم مره اقولك اذكر الله
ثامر ابتسم : ذكرناه ذكرناه
جابر ترك عربية امه ومشى : انا بدور اذا فيه احد بيوصل هالأمه
جلسوا على الكراسي يحاولون يقضون وقتهم بالسوالف و باقي العيال كانوا يوقفون اصحاب السيارات الكبيره لأجل يركبون كلهم مره وحده ..
ام نايف بملل : لو نستأجر لنا من هالسيارات الكبار بيمدي؟
ابو نايف : ايه بيمدي بس الحين مين فاتح لك
ام نايف تنهدت بملل : انكسر ظهري من الجلسه
جاء جابر وهو مستعجل : لقيت باص بسرعه قبل يجون ركاب ويمتلي
كل واحد شال اغراضه وبدوا يركضون للمره الألف وركبوا بالباص الي امتلى حرفيًا فيهم ..
ليلى وهي تضحك : اشكالنا تحفه ياليت فيه من صورنا
ثامر رفع شنطته : الكاميره هنا بلقطكم صور تذكاريه
وجود مسكته : اجلس السيارة تمشي
جلس جنبها وهو مبتسم : خايفه علي؟
وجود بتسليك : ايه اجلس بس
التفت وهو يشوفهم كلهم ورا مايشوفون وباسها على طول ..
وجود بصدمه : عمى يعمي العدو! استح على وجهك
ثامر بروقان : كيفي زوجتي
وجود تنهدت ببتسامة وهي تسمع سوالف الباقين من دون لا تلف عليهم ..
وضحى بملل : ليلى ياشينك انتي وعيالك القلق
جابر : حاطينهم فوق راسك جنبك تراهم
وضحى : من ركبنا بالطيارة وهم يسولفون وليت سوالفهم تنفهم
ليلى : وش دخلك خليهم ياخذون راحتهم
وضحى : خلهم يتعلمون من الكسول سامر طول يومه نايم واذا صحى قام يضحك ورجع يكبر المخده
حليمه : لا اله الا الله وضيح! وش فيك انتي مستقعده للكل
ابو نايف : بدال هالتشكي اتصلي على اخوك شوفي وينه
رفعت جوالها اتصلت عليه وسرعان ما سكرت : يقول نص ساعة
سكت الكل من تعبهم طول الطريق لحد ماوصلوا لبيت جميلة الي جهزت لهم قسم خاص فيهم ياخذون راحتهم..
-
قدام بيت جميلة ..
نزلت وهي تعدل لثمتها : وين اي باب؟
نياف ببتسامة : ايه توك تصحين ودك اني اخليك بالسيارة
جودي خزته وسكتت من شافت فارس قرب لعندهم..
فارس : فرح يدك فاضيه اتصلي عليهم قولي اننا وصلنا خل يفتحون الباب
اتصلت على امها ودقايق الا وناصر فاتح لهم : السلام عليكم
نياف ابتسم : وعليكم السلام يانويصر كيف الحال؟
ناصر : بخير ابشرك اقلطوا
دخلوا معه وأشر لهم : النسوان من هنا و الرجال من هنا
-
صباح يوم جديد ..
قامت وجود وهي ترتب فراشها وتحطه بزاوية الغرفة بهدوء وهي تمشي بهدوء لأجل ماتصحي البنات ، واستوقفها صرخة تعبر عن ألم فضيع : اه يابنت ، مين انتي؟
وجود بتوتر : اسفه ماشفتك
قامت وهي ماسكه يدها بألم : فيه ادمي صاحي يطامر بين النيام!
وجود جلست جنبها وهمست : تعالي برا اشوفها لك
طلعت برا وجلست على الكنب جنبها : وريني
وريف تنهدت : الحمدلله انها انا مو وحده من ذا الحوامل
وجود : خلاص ارجعي نامي
وريف : لا بروح اتسبح
التفتوا للباب الي طق بهدوء ودخلت وهي مبتسمه : صباح النور
كلهم: صباح الخير
جميلة بستغراب : ماصحوا؟
وريف : لا تعب الطريق مسدحهم
جميلة : اجل تعالوا برا اذا مافيكم النوم
طلعت معها وجود ودخلت وريف للحمام ومعها ملابسها وخلصت بسرعه وطلعت معهم بجلالها ، وقفت وهي تشوفهم من الدريش الكبيرة قاعدين بالحوش ..
زايد : وش تتأملين؟
فزت والتفت له : مدري سهيت بأشكالهم
زايد : غطي يدك
لفت الجلال عليها كويس وطلعت معه وهي تجلس بفرشة البنات بعيدين مسافة عن الرجال..
وجود بهدوء : احس الجو رسمي بوجود زوجك
جميلة ضحكت : ايه شوفي اخواني اساسًا كيف مترسمين معه
وريف بستغراب : ليه كذا العلاقة بينهم؟
جميلة : مابينهم الا كل خير بس الرسمية بالمرتبة الأول وكله بسبب شخصية بدر ترا من النوع الي كل حياته شغله واذا جيت لأهلي مايجي على طول يرجع عشان يشوف عملياته وشغله
وريف بهدوء : الله يوفقه
وفعلًا ما مرت ربع ساعة الا وقام وهو يسلم ويودع الكل تاركهم متوجهه للشغل وبدت النفوس تنفك اكثر ويرجع الوضع طبيعي بينهم وضحك و استهبال..
طلعت جودي وهي مغمضه عين ورافعه يدها لأجل تصد اشعة الشمس وابتسمت اول ماحست بيده تحاوط رقبتها ويمد يده فوق عينها : تبيني اشيل الشمس و انطلها بالجهه الثانيه؟
ضحكت وناظرته : نياف! وخر يدك شوفهم يناظرون
نياف : لا تحاولين توخرين يدي عشان ما ابوسك قدامهم و افشلك
تأففت بإحراج ومشت معه لحد ما انفصلوا بالجلسات..
جميلة ناظرت ساعتها : سلوى حبيبتي روحي صحيهم خلنا نفطر
وريف : طيب تعالي نساعدك بالفطور
جميلة هزت راسها : طلبت لا تشيلين هم
شوي شوي وبدوا البنات يطلعون ورا بعض لحد ما اكتمل الكل ..
عند الرجال ..
شافها قامت بسرعه ودخلت وكأنها مستعجله وقام وراها مستغرب ولكن وقف لأبوه الي يناديه وانشغل عنها دقايق واسرع لها لما حس انها طولت ولا طلعت ..
صقر بستغراب : سُلاف
مسحت دموعها بسرعه و وقفت قدامه : هلا
صقر رفع وجها : وش هالدموع؟ احد مسوي لك شي؟؟
سُلاف هزت راسها : لا
صقر بتوتر : علميني طيب
سُلاف شهقت ببكاء قوي : المستشفى ارسلوا لي بريد وقلت ماراح افتحه الا هنا
صقر بفضول : ايوه؟؟
ناظرته وعيونها حمراء من قوة بكيها : مافتحتها هناك لأني ما اهتميت
صقر بعصبيه : تكلمي بسرعه وش مكتوب؟
طلعت الورقة من الشنطة وهي تعطيه ومسحت دموعها : شوف
فتحها وهو يتأملها بعدم فهم : طيب وش ذا؟
غطت وجها ورجعت تبكي : صقر انا حامل
ابعد عنها خطوتين وهو يناظر حالتها ورفع الورقة مره ثانيه يناظر لصورة السونار : يعني ذا انسان؟
ردت بعصبيه وهي تستنشق الهواء : لا حمار
صقر بصدمه : شلون؟ مو قالوا بمرحلة اختبار؟؟
سُلاف مسكته : الحمدلله بعد سنة جانا الي نبيه صقر
صقر حضنها بقوه وهو يشد على لبسها بقبضة يده : الحمدلله يارب الحمدلله
سُلاف : ماني مصدقه اخيرًا!
صقر : بأي شهر؟؟
سُلاف : توني بالأول
صرخ وهو يركض لبرا ولحقته بخطواتها السريعه وهي تشوفه يحضن الكل ويضحك معهم ..
نايف بستغراب: وش فيك؟ وش سر هالفرحه؟
صقر وقف بالنص وهو يناظر للكل : الحمدلله بعد هالمده الحين الحين دريت بخبر وسع صدري لدرجة انه يسعاكم كلكم
جابر ضحك : ايه علمنا لعل صدورنا تتاسعى معك!
صقر نفخ صدره وزفر براحة : استقبل تبريكاتكم لأن بيجيني مولود بعد ثمان شهور
فزوا الكل بفرحه واعتلت ضحكاتهم ، فرحتهم هالمره غير لأن الكل ملاحظ تأخير الحمل بس ماحب يتدخل بخصوصيتهم واكتفوا بالسكوت ولكن بعد هالخبر انفجرت سعادتهم ..
وضحى تتصنع الملل : يالله يعني بيجينا زياده؟
ابو نايف : اعقلي انتي الثانية لا اخليك تلحقينهم بعد
وضحى اندعست بين البنات بإحراج وضحكوا عليها..
ام زايد مدت يدها :تعال و انا امك
ركض لعندها وارتمى بحضنها وباست راسه : الحمدلله ، الله يتمم لها على خير
بالجهه الثانية ..
ابعدت عنها وهي تبوسها للمره العاشره : فرحتك توضح ان الموضوع ماجاء بسهوله
سُلاف كتمت بكيتها : الحمدلله
ليلى ابتسمت : مو كنتي تقولين لا تجيبون عيال ابي عيالي اكبر؟
هزت راسها وضحكت : ايه
ليلى : يلا ماعليه اهم شي صاروا قراب من بعض
سُلاف : الحمدلله نعمة
قام ناصر وهو يركض للباب وهو يدخل الفطور بمساعدة سلوى و ثامر ..
ثامر بفرحه : يلا الحين نفطر واحنا مستانسين
قاموا البنات يجهزون السفره و يرتبون المكان للأكل وكالعاده زايد قام وهو يحط بينهم مثل الحاجز عشان البنات ياكلون براحتهم ..
-
العصر ..
بالملحق الخارجي ..
طلعت وضحى بجلالها وهي تشوف فارس طالع وقفت عند الباب : يبه موجود؟
ابو نايف : ايه تعالي
دخلت عليه على طول وسكرت الباب بطلب منه وهي تنزل الجلال من عليها : لبيه وش بغيت؟
ابو نايف بهدوء : اجلسي
جلست وهي تنتظره يتكلم ..تنحنح وكمل : اسمعي يابوك انتي شايفه ان الكل اعرس ماعاد بقى الا انتي
وضحى بهدوء : ايه؟
ابو نايف : اخو فارس خاطبك من كم يوم ودامني فضيت الحين قلت اناديك وافاتحك بالموضوع ..وش قلتي؟
وضحى بتوتر : اي واحد فيهم؟
ابو نايف : الي بعده على طول رايد
فركت اصابعها بخجل وعجزت ترفع عينها على ابوها..
ابو نايف : تبين تفكرين؟ لك يومين لأني تأخرت على الرجال بالرد حتى اخوه توه طالع مني يبي يشوف وش صار
وقفت وهي تلف جلالها عليها : بفكر و ارد لك
طلعت بسرعه متوجهه لأقرب وحده من البنات لأجل تعبر لها عن شعورها بصدمتها ..
وريف بألم : ياربي منك اخلص من وجود الصباح وتجيني انتي الحين!
وضحى ضحكت بخفه : وش اسوي طلعتي بوجهي على طول
سكتت شوي وسحبتها معها على طول : بكلمك بموضوع
وريف : ايه تكلمي
وضحى : شفتي رايد اخو فارس؟
وريف بستغراب : ايه وش فيه؟
وضحى بفرحه واضحه عليها : خطبني
وريف بصدمه : امـا عـاد!! تقولينها جد؟
وضحى : ايه والله
وريف : بينكم شي؟ لأن شوي وتطيرين من الفرحه
وضحى هزت راسها بسرعه : لا والله مابيني وبينه شي بس يعني قد حصل موقف قبل وقعدت فتره افكر فيه ويدور ببالي
وريف : فترة بس؟
هزت راسها : ايه وتناسيت الموضوع بس انصدمت انه جاء يخطب
وريف استانست : الحمدلله مبروك! والله فرحت لك
وضحى تنهدت : بس اصبري بستخير اول وبعدها بعطيهم الرد
طلعت فرح وهي ماسكه بطنها وتناظرهم بنص عين : وش تحشون فيه؟
وريف ضحكت : شكل وضحى بتلحقك انتي وجودي للرياض
فرح ابتسمت : ايه ادري من زمان بس فارس مسكتني لا اعلم احد
وضحى : مالك داعي! مستانسه كذا ابوي صدمني
فرح : مو كنتي حاطه عينك عليه؟ يلا نلتي مرادك
وضحى بفضول : وش رايك فيه؟ تحسينه كويس؟
فرح بجديه : تبين الجد؟ والله انه كويس اساسًا فارس واخوانه كويسين ماتحسين من النوع الي يرفع الضغط
وضحى ابتسمت براحه : اشوا
وريف وقفت وهي تنفض جلابيتها من التراب : انا بروح وانتي اقعدي علميها عن عريس المستقبل
دخلت داخل وهي تشوف الباقين جالسين مع جميلة وضحكهم واصل لأخر الشارع ..
وجود بضحك : وريف لا تفوتك سوالف خالتي
وريف بستغراب : وشو؟
ام زايد : قاعده اسولف لهم عن بثارة زايد يوم انه صغير
وريف بفضول : ليه وش مسوي؟
ام زايد : محد كان مشيب راسي اول الا اهو بس بعد ماجاء ثامر عرفت ان العرق دساس
وريف بحماس : وش كان يسوي؟
بدت تعيد المواقف لهم وهم يضحكون ومنصدمين بنفس الوقت ..
سُلاف : ياحياتي صقر يعني كان مثل اللعبه بيده
جميلة ضحكت : ياحليلك! كان يسمع كلامه وهو الي ياكلها
سُلاف ضربت وريف : اخذ حق ابو العيال الحين
مسكت كتفها بألم : تكفون خلاص تعبتوني اليوم كله اصابات! عظامي توجعني
ام زايد ابتسمت : عسى انك حامل بس؟
وريف ابتسمت بتوتر : لا خالتي ، تونا ريضين
ام زايد : وين ريضين ! لك متزوجه ست مدري سبع شهور
وريف : ايه تونا مانفكر بالأنجاب الحين وبعدين ماشاء الله تبارك الله ثلاث منجبين وثلاث حوامل يعني ليش الضيق؟
وجود ضحكت : صح وانا مع وريف
ام زايد بصدمه : لا بالله ان نسوان عيالي استخفوا!
ام نايف ببستامه : ماعليك منهم اصبري كم شهر وتجي وحده منهم تبشرك
ام زايد رفعت يدها : يارب الله يسمع منك
سُلاف : خالتي انا ما اكفيك؟
ام زايد : الا تكفين وزياده لبى قلبك
جميلة : انتي حليمه جيبي لولدك اخت ولا اخو ماشاء الله كمل السنتين الحين
حليمه بسرعه : لا فكيني بس يكفيني واحد
ام فرح وقفت وهي مستنكره كلامهم : يوم اننا كبركم مانعرف الا نمسك بيوتنا و نجيب عيال والله يا بنات هالزمن غريبين
وجود : بالعكس صار الموضوع اريح لنا ، ولنا حرية الأختيار
ام فرح تنهدت : ايه الله يريحكم بس
البنات : اميين
-
عند العيال ..
وكانت الجلسة رسمية كالعادة بوجود بدر بينهم ..
صقر : نبي نروح للبحر من جينا ماشفناه
فارس : ايه والله فكرة ممتازه
ابو زايد : دام انكم ناوين للطلعه عطوا نسوانا خبر يجهزون انفسهم
صقر بصدمه : الحين يبه؟ خلها بكره نروح من الصباح احسن لنا
ابو زايد : وش بيفرق الحين؟
صقر : على مانجهز الا قد اذن المغرب واحنا نبي نشوف البحر
ابو زايد هز راسه بهدوء : الي تبون اهم شي واحد منكم يعطي البنات خبر عشان يخلصون بدري لا يعطلونا مثل كل مره
جابر بهدوء : انا بكلم امي وتوصل لهم
وقف بدر مبتسم : وش رايكم نروح للمشب؟ كود يذكركم بريحة الديره
ابو نايف : ايه عز الله تسوي خير فينا
قاموا العيال متوجهين ورا بدر وهو يفتح لهم المشب ويولع انواره ، واخذ البخور من جميلة ومرره على الكل وبدت جلستهم فعلًا بسوالفهم اكثر و كأنهم متناسين رسمية العلاقة بينهم وبين بدر ..
مر يومهم بشكل ممتع تحت حماس البنات لوضحى وردها الي اصر الكل انها ترد لهم بكره دام الرجال له اسبوع ينتظر ..
-
يوم جديد ، بعد صلاة الفجر
رجعوا الرجال من المسجد وهم يشوفون اغراض الشوي و اغراض الطبخ بالحوش ..
صقر تنهد : لا حول ولا قوة الا بالله صدق دام هالقرشه كلها بنشيلها
طلعت جميلة بعبايتها وهي تضحك : شيلوا شيلوا بس
ابو زايد بعصبيه : ترانا موب مهاجرين يوم انكم تشيلون المطبخ كله ارفقوا على هالعيال
جميلة بصدمه : يبه! ترا عددنا كبير وهالأغراض كلها بتكفينا
صقر رفع صوته للعيال وهو يناديهم يساعدونه ، وبدا كل واحد يشيل معه بسيارات فارس و نياف و بدر..
اما الباقين اكتفوا يركبون الباص الي استأجروه ، ركبوا البنات ورا والعيال قدام وفتح الكل درايش البتص وبدوا يغنون ويصفقون بفرحة وسعادة ..
فتح نياف دريشته ودريشة جودي وهو يمشي بجنب الباص ويضحك على اصواتهم العاليه ..
جودي بفرحه : اخاف اشاركهم وتكسحني
نياف ناظرها ببتسامه : هالمره بسمح لشياطينك تطلع ، خذي راحتك
مدت يدها على طول للمسجل وهي ترفعه لأعلى صوت وبدت تصفق وتضحك وهي تشوف وضحى ماده يدها من الدريشه وتحركها ..
نياف : دخلي يدك لا اجيك بكف
علت صوتها لأجل يسمعها : مالك دخل
اما بسيارة بدر الي كانت متقدمتهم ولكن كانوا يسمعون صخبهم ..
بدر ببتسامه : اظن اهلك مستانسين بالزود
جميلة تنهدت بفرحه : الحمدلله الله يديمها
بدر : امين
مر الوقت عليهم طول الطريق بحوستهم والعشوائية لحد ما وقفوا عند البحر وهم ينزلون الأغراض ويفرشون زواليهم ..
جلس الكل وكالعادة النسوان بجهه و الرجال بجهه ..
ابو نايف وقف وهو يضرب عكازه بالرمل : اسمعوني عندي خبر للجميع
الكل انتبه له وعم الهدوء المفاجئ بينهم لأجل يسمعونه ..
ابو نايف بفرحه : فيه عرس قريب
صقر : اما مين؟؟
ابو نايف ناظر وضحى : وضحى بنتي ، وافقت على اخو فارس وان شاء الله قريب العرس
فارس : مبروك
غطت وجها بخجل وهي تسمع تصفيقهم واستهبالهم عليها ..
ام نايف تتصنع الجديه : لا تضحكون على بنتي! ترا ما اسمح لكم
نياف : هذي نشبه بتجي معي للرياض بعد الله يعين
فرح ببتسامه : يلا تجي وتكون قريبه مني ومن جودي
جودي : ايه وتنتبه لعيالنا اذا ولدنا
وضحى بصدمه : تعقبون! اخلص من عيال حليمه وليلى وتجوني انتوا تهبون والله
ضحكوا كلهم على انفعالها وسكتت فجأه لما استوعبت الي قالته ..
وريف همست : لا ترفضين مسك العيال عشان مايجي وتحتاجين من يمسك عيالك
وضحى بهدوء : وش اسوي انفعلت من غير شعور
وقف ثامر وهو يصفقك : يلا جبت الكاميره معي
ام فرح : وش بتسوي؟
ابعد عنهم بمسافة وهو يثبت الكاميره ولف عليهم بصوت عالي : تجمعوا
كل وحده مسكت ولدها وقربوا من بعض بحيث يطلع الكل بالصورة ، استعد للتصوير وهو يركض لناحيتهم و تسند على حضن وجود الي حطت يدها على صدره و شدته عليها ..ثبتوا على حركتهم لثواني لحد ما التقطت الصورة وقام بسرعه ياخذها ويفر الكاميره على الكل وكل واحد يضحك على شكل الثاني ..
جابر : ريان وجهه ماهو واضح
نايف : من بثارته والله
رجع يثبت الكاميره للمره الثانية واستعد الكل هالمره فعلًا لحد ما التقطت الصوره لهم وهو ياخذها : مين معه قلم؟
مد له بدر قلمه واخذه وهو يكتب من خلف الصورة :
" العائلة الكريمة ، بالشرقية قدام البحر تحديدًا ..
ابو نايف وزوجته وعياله واحفاده
ابو زايد وزوجته وعياله واحفاده
بنات سليمان و ازواجهم وعيالهم
الساعة ٩:٣٠ صباحًا ، تاريخ ٨/١٢ /١٣٨٩ هجريًا"
طفى الكاميره و طوى الصورة بأحد ادراج السيارة و بدا نصهم يستعد لتجهيز الطبخ والنص الثاني كان يسبح ..
وانتهى يوم سعيد و نهاية سعيدة لكل اطراف هالرواية..
"
الحمدلله دائمًا و للأبد ، اتمتت اليوم اول رواية لي بكل حُب
وشكرًا لدعمكم لي لحتى النهاية ، و ترقبوا كل جديد و تطور مني ..
اخذت مني هالرواية قرابة الثلاث اشهر لأختمها لكم
مع تحيات الكاتبـة : رهـف💛
"
بدأت 2022/7/21 ميلادي
انتهت 2022/10/1 ميلادي

شاركوني رأيكم بالرواية ككل و النهاية خصوصًا ؟