بعدك يابوي اصبحت دنياي عرجاء بلا عكاز

8

الصباح ببيت ابو زايد ..
جميلة واهي ترتب اغراضها : حليمه الله يجزاك خير مدي لي جزمة سلوى
حليمه مدتها لها وقعدت قدامها : وماراح اشوفك الا بعد سنة اف
جميلة ابتسمت : وش دعوه يختي ترا كل شهرين ثلاثة اجي
حليمه : وهذي مده قصيره بالنسبه لك؟
جميلة : الشكوى لله يختي وبعدين الي يشوفك بمشي اليوم ترا بكره خلنا نستانس الحين ونكلم البنات اذا بيجون خلني اودي سلوى لهم اوفي بكلامي لهم
حليمه : فرح بتجي بعد شوي نقعد شوي ونتصل عليهم نشوف اذا بيجون ولا نروح لهم..
جميلة : زين اجل
قامت تصحي بنتها وتعدل شعرها لها وتلبسها ..اما حليمه طلعت من الغرفة الا وتلقى ثامر وناصر قبالها ..
حليمه تربعت بالحوش معهم : وش سواليفكم؟
ناصر : خاله لا تتلقفين موضوع بيني وبين خالي
ثامر : اسـلم
حليمه زمت شفايفها : اوريك يالأصلع
ناصر يمسك راسه : بيطول واجي اهفهفه بوجهك
حليمه : ياخي قليل ادب انت تراني خالتك
ناصر : يازينك بس
حليمه استحت وتكلم ثامر : وخفيفه بعد كملت
ضربته : مالك دخل
دخل ابو زايد مع زايد واهو شايل الأغراض وراه ابوه : السلام عليكم
كلهم ردوا السلام ..ابو زايد : ماشفتوا هالغبر وينه طاس؟
حليمه عرفت قصده : ماشفته
ابو زايد لثامر : قم اقحص شف اخوك بغرفته ولا وينه
قام ثامر ودخل الغرفة وشافها ظلام ، وهمس : صقر! ياولد قم ابوي يدورك!
صقر وراسه تحت المخده : اطلع وشوي وجاي
سكر الباب ..وقام صقر واهو يمسح وجهه من دموعه من تأنيب الضمير عمره ماتخيل يسوي هالفعل ..ليش ماتحكم بنفسه قدامها؟ لو ما سمح لها تنطق وتتكلم لو ماسمع نبرتها لوين كان بيوصل؟ ..قام غسل وجهه ولبس ونزل لتحت وشافه ابوه..
ابو زايد : للحينك تعبان؟
صقر : شوي
ام زايد مدت يدها واهي قاعده : تعال يمك اشوف حرارتك
انسدح وحط راسه على رجولها ولفت ام زايد : حليمه جيبي كمادات
قامت حليمه تسوي الي قالته لها امها ..زايد : سلامات ، تبي المستشفى؟
صقر لازال منسدح على رجل امه : لا مالها داعي
ابو زايد ناظر لثامر وتوه بيتكلم وقاطعه ثامر : داري انا بمسك المحل اليوم
ابو زايد : زين حافظ الدرس طيب يلا قم
ثامر : امش ياناصر معي
راح ناصر لأمه يستأذنها انه بيروح للدكان مع خاله ثامر..
طلعت جميلة : ثامر حبيبي انتبه له تكفى لا يغيب عن عينك
ثامر : ابشري
-
ببيت ام فرح ..
ام فرح : والله ونورتي بالجيه يا ام عزيز
ام عزيز : النور نورك يا وخيتي
ام فرح : وش اخبار جمانه مالها نيه تزورنا؟
ام عزيز : الا بنيتي بتجي نفاس عندي بس قولي شهرين حولها كذا ان شاء الله
ام فرح : ايه يا عمري عليها تذكرت انها حامل يلا الله يسهل عليها ويفرحك بشوفتها وشوفة حفيدك
ام عزيز : امين يارب
ام فرح فقدت فرح ونادتها : يا بنت وينك غطستي؟
فرح جت واهي تعدل شعرها وابتسمت لأم عزيز : هلا خالتي وش اخبارك؟
ام عزيز : بخير يابنيتي ..بسم الله عليك قمر قمر مايحتاج تضبطين
فرح : صدق والله؟ البنات مجتمعين ودي بالكشخه الصح دامني ماشفتهم من زمان
ام عزيز ابتسمت لها : اجل ياحظهم دام قمرهم بينهم
استحت فرح وناظرت امها الي كانت تناظرهم وتبتسم ..
قامت فرح : يلا يمه وخالتي استأذنكم لا اتأخر على البنات
طلعت تلبس عبايتها وبيدها فطايرها وحلاها الي مسويتهم..زايد جاي لبيتهم واهي توها طالعه..
فرح همست : اشوا طلعت قبل امي تجمعني فيه وتفشلني عنده
زايد رفع يده : هلا والله
فرح : هلا
زايد : عمتي فيه؟
فرح : اي فيه بس ترا ام عزيز عندها
زايد : لا تقولـينها!
فرح : اي ..تبي شي اروح اجيبه لك؟
زايد : لا الله يسلمك بس جايها اسلم عليها اجيها مره ثانيه
فرح : زين
مشت وتركته واهو توجه للقهوة مع عيال عمه نياف ونايف..
-
عند جميلة وحليمه و وضحى و فرح ..
جميلة : اخيرًا اكتملنا مابغينا
حليمه بضحك : انا الوحيده الي اكون موجوده يا جميلة بالدمام يا وضحى عمي ماسكها يا فرح امها تعبانه
جميلة : اي والله صادقه
وضحى متضايقه من الي حصل بس ماودها توضح : اي واذا تزوجتي ماعادنا بنشوفك
حليمه : يوه اي عرس اي بطيخ رفضته مادريتي!
وضحى فزت : لا والله مادريت خير ليش ماتعلموني
فرح : انتي كبري المخده كل يوم ماتدرين عن الدنيا اصلًا
وضحى : اسكتي بس
جميلة : اقول بلا كثرة حكي يلا نروح لبنات سليمان قبل يجي عمي خالد ويسحب وضحى
وضحى مسكت قلبها : بنات قلبي بيوقف اخاف يدري عنا
جميلة : امشي بس ساعة ولا ساعتين وراجعين ماراح يدري
فرح : امشي يلا ولا تفكرين واجد
قاموا كلهم ولبسوا عبايتهم وتوجهوا لبيت البنات بعد ما اعطوهم خبر بجيتهم ..
فتحت وجود واهي تبتسم : ياهلا والله تو مانور البيت
جميلة : منور بهله
وجود سلمت عليهم كلهم ونزلت تسلم على سلوى وشالتها معها واهي تدخلهم لداخل..بدوا البنات يجون الا سُلاف الي كانوا خواتها متوترين من انها تسوي شي لحليمه وجميلة دامهم خوات صقر ..بس صدمتهم لما دخلت واهي مبتسمه ما كأنها المنهاره امس بالليل ، رجعت سُلاف الواثقه بملامحها المعتاده..
قاموا البنات يسلمون عليها واهي ترد عليهم ، وكملوا جلستهم طبيعي وعيون وضحى على ليلى واهي تفكر قد ايش ابوها بيظلم هالبريئه ودها تعلمها وش يخطط بس خايفه ينقلب كل شي على راسها ويعاقبها ابوها اشد عقاب ..وسُلاف على غير عادتها كانت تتقرب من حليمه وجميلة الي الكل كان ملاحظ انها داخله بالجو معهم هالمره..
وجود همست لوريف : اقول اختك براسها شي والله
وريف بنفس الهمس : ادري من عيونها تعرفين وش بتسوي
وجود : الله يستر
ليلى وقفت واهي تنادي سُلاف : تعالي ساعديني
طلعوا وليلى مسكت يد سُلاف وسحبتها معها للمطبخ ، وقفت وتكتفت : وش يدور ببالك؟
سُلاف رفعت حاجب : ايش؟
ليلى : تذكري خواته مالهم ذنب يا سُلاف عندك شي رديه لصقير مو خواته
سُلاف : ومين قالك اني مخططه على خواته؟ ريحي بالك
ليلى : طيب بس انتبهي
ليلى صبت جيك مويا وراحت دخلت عندهم وبعدها لحقتها سُلاف ..
-
عند زايد ونايف ونياف بالقهوة ..
نايف : من تغير الجو ذا اليومين ماينلام اذا تعب
زايد : اي والله بدا الجو يبرد
نايف : شكل روحة البر مطوله
زايد : خلها بعدين الوضع مكركب الحين
نايف : اي ذا الي قلته
دخل جابر واهو يتلفت يدورهم بين الناس الجالسه بالقهوة ..
رفع يده زايد واهو ينادي : هِنا ياجابر
قرب وسلم عليه وجلس معهم ..
نياف : وين كنت؟
جابر : اشم هوا
زايد : عشانها ؟
جابر لف عليهم يناظرهم ..نايف : ماجبنا طاريها حتى
زايد يناظرهم : صاير شي؟
جابر تنهد : لا بس رفضت
زايد : بذمتك! وعمي وش قال؟
نياف يصرف : ردة فعله هاديه على غير عادته تصدق
زايد : انه لو مسوي اعصار اهون من هالهدوء الي ينخاف منه
نياف : اذا صار شي ترا بكلمك تكلم عمي يتفاهم معه
زايد : ابشر
نايف : بمر المزارع تخاوون؟
نياف : ما يمديني بروح للدكان عند ابوي لا يفلم فينا
نايف : و الباقين؟
زايد : والله مافيني شده بس يلا معك معك
نايف : كفو
جابر : عمتي مريم تبيني بروح اشوف وش عندها مايمدي
زايد : ليه وش تبي؟
جابر : والله مدري قالت لي تعال
زايد : يلا زين سلام ..نايف قم يلا
قاموا وجلس جابر لحاله يشرب قهوته وعيونه على الآوادم واصواتهم الي تتخالط ببعضها ..وصراخ ولعب البزران بالشارع..
-
المغرب ببيت البنات ..
سُلاف واهي تفك شعرها وتنثره وتناظر شكلها بالمرايا وتتأمل تفاصيلها واصابعها تتحسس شفايفها : هالنجس يبي ينجسك معاه
لفت للباب وقفلته ومن غير شعور بكت ، ماتدري وش تسوي بالضبط تبي تحرق قلبه للحين آثار فعلته برقبتها ..قامت تمسح رقبتها بقوه لعلها تخفيها وتنسى لو شوي .. دخلت الحمام وغسلت وجها وهدت نفسها واهي حالفه انها تأذيه ولو بدمه ما يهمها ..طلعت من غرفتها وكانت هادية بشكل طبيعي
وريف : تعالي شوفي جميلة وش جايبه معها
سُلاف : وشو؟
وريف تطلع جلابية : حلوه صح؟
سُلاف مسكتها وابتسمت : تهبل لمين؟ومتى جابتها!
وريف : تخيلي واهي طالعه قبل شوي ثامر جايبها تقول نست تعطينا اياها
سُلاف : شكلها جايبتها من الدمام
وريف : اي ياحليلها حتى عارفه المقاسات
سُلاف : ماتقصر
جت واهي تركض : وريني وريني
صرخت الله ابي هذي ..
وريف : الحين تبين اصواتنا ماتنسمع وذا لسانك
ليلى ضحكت : من الحماس ماحسيت
اخذت جلابية لونها سماوي و مطرزه بذهبي و ماسكه على الخصر ..
ليلى : تدلعنا واجد ام عزيز مقضيه لنا ملابس وش كثرها والحين جميلة جايبه ذي معها
جودي واهي طالعه من المطبخ وتفك شعرها : وش رايكم نروح للرياض ولا المدينة؟
ليلى : ولو فيك قل صح
جودي : ليه؟
ليلى : يبغى لها ماديه ولا ناويه تنامين بشوارعهم؟
جودي : اقتراح بس اقتراح
سُلاف : امنعينا من اقتراحاتك
جودي : انتي اص ما كلمتك
وريف واهي تتمدد : خلاص يا بزر انتي وياها وقوموا قاوسوا الملابس خلني اشوفها عليكم
ليلى ناظرتها ولفت على وسُلاف وجودي: سبحان الله كأنها ام
وريف ضحكت : كنت بصير ام بس ربي ماكتب
اختفت ابتسامة البنات لذكرها ذا الموضوع بس ماحبوا يوضحون وقاموا على طول يقاوسون الجلابيات عليهم
-
عند بيت ام فرح ..
جابر : يالبيه يا عمه من زمان عنك
ام فرح : يالبى قلبك ياوليدي تعال قرب
جابر : لبيه؟
ام فرح : دريت ان ليلى رفضتك عسى الموضوع ماهو مأثر عليك؟
جابر واهو يفك ياقة ثوبه : لا تطمني كل شي بخير
ام فرح ما تطمنت : ما ابي اضغط عليك ولكن ان بغيت شي تذكر اني عمتك وبفزع لك
جابر : جد؟
ام فرح : اي ياوليدي جد
جابر باس راسها : ماتقصرين ..ببالي شي يدور بس ماودي اخطي هالخطوة الين ما اكون متأكد
ام فرح : اجل متى ما استعديت تعال لي
طق الباب ..وفز جابر : انا بفتح
ودخلت فرح واهي تناظر جابر مستغربه : السلام
جابر: وعليكم السلام
لف لجهة عمته : يلا يا عمه توصين على شي؟
ام فرح : سلامتك
طلع و فرح سكرت الباب وركضت لأمها : وش يسوي جوجو هنا؟
ضربتها بكتفها : رجال و كبره وتنادينه جوجو استحي على وجهك
فرح : طيب وش يبي؟
ام فرح : انا ناديته ابي اتطمن عليه بعد ما رفضته ليلى
فرح : اهاا
ام فرح : وكيف جمعة البنات؟
فرح بفرحة : وناااسسه وسعة صدري الحمدلله
ام فرح : تعالي قربي
فرح قامت وجلست جنب امها الي حاوطتها بيدها وباستها : الله يحفظك يا بنيتي
فرح : الله يخليك لي يارب
ام فرح : ولي ، يلا عاد امسحي هالغبر عن وجهك وتعالي تقهوي معي
فرح : ابـشري دقايق بس
-
بالصباح ببيت سليمان
بغرفة سُلاف لبست عبايتها واخذت غطوه وفتحت الباب بشويش تناظر بعين وحده خواتها كلهم بالمطبخ لاهين طلعت على طول وسكرت وقفلته من برا وركضت للشارع واهي تسكره بشويش ..مشت بخطوات سريعه واهي تناظر الغطوه بيدها اليمين ولما قربت لسوق الديرة دخلت بأقرب مكان مخفي عن الأنظار ولبست الغطوه فوق لثمتها وطلعت واهي تتسحب لمحل ابو زايد ..
لاحظت صقر بثوبه الأبيض ورافع اكمامه لعند كوعه ويأشر بيده لواحد واهو يبتسم ، وهمست : وتبتسم يا ضعيف النفس
دخل صقر للمحل وقربت تشوف اذا فيه احد داخل معه ولا لا ولما تأكدت ان مافيه احد دخلت على طول وسكرت الباب وهالحركة خلت صقر يفز من مكانه ويتقدر : خير يا اختي وش تبين؟
ساكته وتناظره وعيونها تكه وتنفجر من الدموع بس مسكتها وتكلمت : ماعرفتني؟
رجع صقر خطوة يستوعب شكلها بالغطوه ..فكت الغطوه وبقت لثمتها : والحين كذا عرفتني؟ ولا مايحتاج حافظني انت
صقر قرب منها بهدوء : سُلاف خليني افهمك
ما وقفته سُلاف من انه يقرب منها كانت تبين يجيها اصلًا ..كمل صقر واهو يقول : والله اني انهبلت وغلطت غلطة عمري ماك..
ما حس الا بحرارة تسري بيده بشكل سريع ..كانت حرارة دم يده الي غرست فيه السكين طاح من طوله من الألم الي داهمه بشكل كبير.. نزلت لمستواه واهي ماسكه السكين طلعتها واهي تبكي وكانت ناويه للثانية بس ماقدرت شافته مستسلم لها ويتنفس بقوه وملامحه مليانه الم ، تكلم بصعوبة : حقك حقك خذي روحي لو تبين
ابعدت عنه واخذت السكين وغطت نفسها بالغطوه بسرعه وطلعت تركض مثل المجنونه وهذا الي خلا اصحاب المحلات يشكون بوضعها وراحوا يركضون لمحل ابو زايد ..شافوه طايح بالأرض وماسك يده اليسار والأرض غرقانه واهو شبه مغمى عليه ..صارت حالة استنفار وشالوه بأقرب سيارة للمستشفى على طول ..
عند سُلاف .. الي دخلت بأقرب جحر وشالت الغطوه ودخلتها لشنطتها ودخلت يدها الملطخه داخل اكمام عبايتها وطلعت تمشي عادي ومن خوفها تسمع صوت قلبها ..جاها واحد يركض وتشنجت بمكانها : ماشفتي وحده متغطيه مرت من هِنا؟
سُلاف بتوتر : لا
راح يركض وتركها وسرعت خطواتها للبيت وفتحت الباب بسرعه وسكرته وتسندت عليه واهي تزفر ..
ليلى واهي شايله الصينيه وقفت تناظر باب غرفة سُلاف وناظرت سُلاف : انتي مو بالغرفه؟
طاحت عيونها على يد سُلاف وطاحت منها الصينيه ..شهقت بقوه واهي تحط يدها على فمها : سُلاف وش هذا؟
سُلاف تناظرها وعيونها دموع وترجف ..ليلى : ردي هذا وش!!!
طلعت وريف وغطت عيونها من المنظر وتسندت على الجدار..
ركضوا لها وجود و جودي يتفحصونها : من وين تنزفين من وين!!!
سُلاف ببكاء : ماهو دمي
سحبتها وجود لداخل وركضوا وراها ، وجود بعصبيه: وش مسويه!
سُلاف : طعنته
ليلى مسكت راسها وبكت : لا سُلاف تكفين لااا
جودي بهدوء من صدمتها : مات؟
سُلاف بتوتر : مدري طاح بالارض مدري مدري
جودي انخطف لونها من الخوف وجلست بالأرض لما حست الدنيا تدور فيها !!
وريف بعصبيه واهي تبكي وتضربها من صدرها بكل مره تتكلم : انا لما اقولك لا تأذينه ماهو خوف عليه! انا ما ابي اخسرك ! انا خسرت امي وخسرت ابوي وخسرت جنيني تعبت من اني اخسر تتعبت ياسُلاف ليش منتي فاهمه اني ابيك ما ابي اخسرك! خايفه عليك ليش توجعين قلبي وقلوب خواتك ليه يا سُلاف كفايه خساير تعبنا خساير
طاحت بالأرض مغمى عليها وسُلاف نزلت تشيلها واهي نظرها مشوش من دموعها وصوت بكاها : وريف قومي
وجود سندت وريف واهي تضرب خدها بشويش وترش المويا عليها ..
جودي صرخت : لو مات يا سُلاف لو مات!
سُلاف غطت اذانيها : خـلاص كفـايه خلاص
ليلى حضنتها بقوه رغم ماهي راضيه عن فعلتها وودها تضربها بس شايفتها منهاره وماهو وقت عتاب وغضب..
بعد نص ساعة صحصحت وريف واهي سانده راسها على يدها وتبكي ..قربت منها سُلاف : سامحيني
وريف لوجود واهي متجاهله سُلاف : كلمي حليمه شوفي وش صار عليه
وجود ركضت للتليفون ..
-
ببيت ابو زايد ..كانوا يفطرون وجميلة مستعدة تمشي العصريه للدمام ، طق الباب بقوة واهو ينادي : يا اهل البيت يا اهل البيت
فز زايد من مكانه بسرعه ولحقه ثامر وفتح الباب : وش صاير؟
الرجال : الحق يا زايد اخوك صقر انطعن واخذوه للمستشفى
ام زايد سمعت الكلام وضربت صدرها : ياويلي ولدي!
حليمه عضت شفايفها واتسعت عيونها بقوه..اما جميلة الي سحبت سلوى ودخلتها مع ناصر للغرفة وطلعت تداري امها الي انهارت تمامًا..ابو زايد واهو يسحب خطواته بثقل من الروعه الي جته : ولدي جاه شي ؟ جاه شي؟
الرجال : ودوه للمستشفى الـ
ام زايد ركضت : خذوني لولدي
حليمه : وانا بعد
ابو زايد : امك بس انتي اقعدي بالبيت
طلعوا زايد وثامر وامهم وابوهم بسرعة البرق وتوجهوا للمستشفى..بقت حليمه وجميلة وعيالها
بعد ساعة ونص ..سكرت حليمه التليفون وتنهدت براحة : الحمدلله لك يارب الحمدلله
جميلة بخوف : وش قالوا تكفين؟
حليمه : حالته مستقره الحمدلله والجرح ماهو عميق
جميلة : يارب تستر عليه وتطول بعمره ياررب
ماهي ثواني الا ويتصل التليفون..
وجود : اخبارك ياحليمه
حليمه بضيقه : وش اخباري ياوجود
وجود : صحيح الي سمعناه؟
حليمه : ايه
وجود : وكيف الحين؟
حليمه : توني مسكره من زايد يقولي انه طيب الحمدلله والجرح ماهو عميق
وجود كأن انكبت عليها مويا بارده : الحمدلله..عرفتوا من طعنه؟
حليمه : توهم مبلغين الشرطة
وجود شهقت ولفت ناحية البنات وعضت شفايفها : خلاص اجل لا اطول عليك
سكرت وجود التليفون واهي متجهه لهم : تقول بخير والجرح بسيط بس ..
ليلى بخوف : بس وشو؟؟؟
وجود : بلغوا الشرطة
فزت سُلاف من مكانها بخوف وسحبتها جودي للحمام تسبحي بسرعه ونظفي نفسك  ..ليلى : وين السكينه ؟
سُلاف : بالشنطه
اخذتها ليلى واهي تشوف الشنطة من داخل ملطخه ..اخذت السكين واهي تعطي وجود الشنطة : نظفي الشنطة بسرعه..
توجهت سُلاف مع جودي للحمام و وجود تغسل الشنطة وليلى تغسل السكين ،اما وريف على حالها يدها على راسها واستسلمت بأي لحظة يدخلون وياخذون سُلاف ..
-
ام فرح فزت من مكانها : يمه وليد اخوي بسم الله على قلبه
جتها فرح تركض وتعطيها العبايه : يلا يمه
لبسوا وطلعوا بخطوات سريعه متوجهين لبيت ابو زايد ..الي شافوا وضحى وام نايف موجودين ويدينهم على قلوبهم من الخوف..
ام فرح : السلام عليكم ..صار شي جديد؟
وضحى : لا يا عمه مافيه شي اجلسي لا تطيحين
ام فرح : طحت من طولي ..انفضخ قلبي يالله تستر عليه يالله
فرح تكلم جميلة بهدوء : وش قالوا؟
جميلة : على اخر اتصال ان كل شي تمام بس بيجلس بالمستشفى والشرطة تحقق
ام نايف : حسبي الله ونعم الوكيل بهالمجرم حسبي الله
ام فرح : فيه احد متعدوي له؟
حليمه : لا والله ياعمتي صقر مره ماله بالمشاكل مدري من وين جاء هالمشكلة
فرح التفت لوضحى : وين العيال؟
وضحى : نايف وجابر ونياف وابوي كلهم راحوا للمستشفى
فرح : عسى محد منصاب منهم بعد؟
وضحى : لا لا بس صقر
فرح تنهدت : الله يشفيه يارب
-
بعد خمس ساعات هادئة على الكل و الجو مكتوم ..ببيت البنات
سُلاف : وريف ارضي تكفين
وريف : لا تكلميني لأني مو طايقه اشوفك
سُلاف : الي فيني مكفيني لا تزيدين همي همين!
وريف : تروحين تطعنينه يا سُلاف تطعنينه!!
سُلاف بعصبيه : اهو الي قرب مني يستاهل ماجاها يستاهل
وريف ضربت خدها : ماهمني اهو ماهمني انا افكر فيك الشرطة لو عرفتك وش بيصير لك!
ليلى : لو حصل وما تنازل بتكلم للشرطة انك دافعتي عن نفسك واثار فعلته للحين فيك
سُلاف رفعت ملابسها على رقبتها وناظرت للأرض بحزن ..
جودي : ياعسى تمر هالليالي سليمه
وجود : امين
جودي توجهت للتليفون : اتصل اتطمن ولا مالها داعي؟
ليلى : خليها بكره يكفي اتصال واحد
رجعت مكانها واهي تهز رجولها : ما افطرنا تبون ناكل؟
ليلى : رغم مالي نفس بس سوي شي خفيف
قامت وجود معها للمطبخ يسوون لهم شي ،وراحت ليلى تنظف الفطور الي طاح بالحوش توها تتذكره ..
سُلاف قربت من وريف وباست خدها : اسفه
وريف غصب عنها ابتسمت : طيب
سُلاف ابتسمت : رضيتي؟
وريف : وكيف ما ارضى عليك؟
سُلاف حضنتها : والله من قهري على نفسي يا ختي ولا وما تعرضت له
وريف واهي تمسح على شعرها : يارب الأمور تمشي تمام وماتتعقد ..ماني مستعده تبعدين عني
رفعت سُلاف وجها الي كانت حاطته على حضن وريف وناظروا بعيون بعض : بيتنازل
وريف : ليش واثقه؟
سُلاف : تدرين وش قالي يوم طعنته؟
وريف ابعدتها عنها : وش قالك؟
سُلاف بتصريفه : مدري نسيت بس يعني كأنه يقول معك الحق
وريف : الله يسمع منك يارب
-
بالمستشفى ..
صقر واهو ماسك يده الملفوف عليها : خلاص يا يمه بسك بكي نشفوا دموعك
ام زايد : كيف ماتبيني اصيح وانا اشوفك تتوجع
صقر : مافيني الا العافية ها شوفيني بكامل صحتي قدامك
ابو زايد دخل : الشرطي بيدخل
تعدل صقر بجلسته واهو يرد السلام على الشرطي ..
الشرطي : الحمدلله على السلامة يا استاذ صقر
صقر : الله يسلمك
الشرطي : بما ان حالتك مستقره الحمدلله ، باخذ اقوالك
صقر : تفضل
الشرطي : مين الي طعنك؟
صقر : ما اعرفه
الشرطي : الكل يقول انها مره "انثى"
صقر بتصريفه : لا رجال
الشرطي : طيب شاك بأحد؟
صقر : لا
الشرطي : بترفع شكوى تعال للقسم و..
صقر قاطعه : لا مانيب رافع شكوى
ام زايد فزت وهمست : تستهبل ياولد!
ابو زايد : لا بالله فيك قل صح
صقر : يا يمه يا يبه انا غلطت على الرجال واحتد الكلام بينا وطعني خلاص
ابو زايد : حتى ولو لزوم يتعاقب
صقر واهو يناظر للشرطي : معليش اخوي بس ماراح ارفع شكوى وانتهى الموضوع
الشرطي طلع واهو يسكر الملف : راح نستمر ندور عليه ، وفي حال بترفع شكوى زي ماقلت تعال للقسم
طلع وابتعد زايد عن طريقه ودخلوا كلهم عليه ..
ثامر : وش صار؟
ابو زايد : اخوك المهبول رافض يرفع شكوى على الي طعنه
ثامر انصدم : صادق يا صقر!
صقر : لا تضغطون علي خلاص قلت سكروا الموضوع يعني سكروه
زايد : خلاص خلوه على راحته الدكتور يقول لا يضغط على نفسه
ام زايد : الله يهديك بس
صقر : متى بطلع؟
زايد : بكره
صقر : الله يعين
طلعوا ثامر و زايد ودخل ابو نايف وعياله يتحمدون بالسلامة لصقر ويتطمنون على حاله ..
ام زايد : بكون مراقق معه
جابر : لا يا خاله انا بكون معه انتي روحي ريحي بالبيت
صقر : اي بيوجعك ظهرك وانتي لازم تتمددين
بعد اصرارهم استسلمت وراح الكل واحد ورا الثاني وماعاد بقى الا جابر معه ..
-
بييت ابو زايد ..
وضحى تصب القهوة للكل : جاين بالطريق تحروا وصولهم
فرح : صقر معهم؟
حليمه : لا بكره ان شاء الله بيطلع
جميلة الي اجلت سفرتها ليومين زيادة عشان تتطمن على صقر ويرتاح قلبها ..
سلوى : ماما خالي صقر تعبان؟
جميلة : لا حبيبتي جرح بيده وبيطيب بكره تشوفينه ان شاء الله
ام فرح : ماراح ارتاح الين اشوفه ويرتاح بالي
فرح : كلنا والله يمي
ام نايف : والله يا انها روعه الله لا يرده من موقف صبت عظامي ماعاد قدرت اتحرك
وضحى : الي زاد الطين بله اني سمعت اصوات الرجال برا حالتهم حاله وبعدها بدقايق بس جانا الخبر
حليمه : اجل وش تقولين عن حالنا واحد خبط الباب بغى يكسره يصارخ طعنوا اخوكم زين ماوقف قلبي
وضحى ضحكت : ياعمري
ام نايف : وانتي بالمواقف الجديه مغير تضحكين
وضحى : لا اله الا الله
فرح وقفت بتطلع..
جميلة : فروح حبيبتي تكفين شوفي ناصر وينه
قامت فرح واهي تدوره : نصور ..ناصر
ناصر جاها يركض : هلا
فرح : امك تبيك
مشى للملحق واهي توجهت للمطبخ ..
فرح اخذت مويا وركضت بسرعه لداخل اول ماسمعت صوت الباب ينفتح : ياويليي العيال
ثامر بصوت مسموع : درب
ام زايد تقدمت تشوف لهم الطريق ودخلوا لملحق الرجال..
دخلت عليهم واهي تسلم وجلست تقولهم الي صار وعن تنازل صقر الي صدمهم وماكانوا راضين فيه
-
بالمستشفى عند جابر و صقر..
جابر سند ظهره على الكنب : قصة انك منت عارف الشخص الي طعنك ما مشت علي
صقر : طيب
جابر تقدم : صاحي انت! مهددينك خايف منهم؟ علمنا نساعدك لا تسكت
صقر حط يده اليمين على عيونه : جابر جالس عندي عشان تشغلني اطلع
جابر تكتف : مانيب طالع
صقر : اجل اسكت
جابر : مصيري بعرف وش وراك
صقر : الله يقويك
دخلت الممرضة تطمن على علاماته الحيوية ..
جابر : كل شي كويس؟
الممرضة : ايوا الحمدلله
صقر : مايمديني اطلع اليوم؟
الممرضة : لا الدكتور سامح بخروجك بكره ..خلك ست ساعات زيادة عشان نتطمن ان حالتك مستقره
صقر تنهد بملل ..جابر : زين
طلعت الممرضه وجابر نقز جنبه بسرعه ويلمس يده : توجعك؟
صقر : وش بلاك نقزت كذا!
جابر :ياخي ماودك تقول؟
صقر : يا ابن الحلال كلمتي وحده اهو رجال ما اعرفه ولا ابي اشتكي لأني غلطت من البداية ولاني تحت تهديد ولا شي فكني من شرك يا جابر
جابر راح للكنب انسدح : انت ابخص بعمرك
-
عند البنات الساعة ٨:٣٠ الليل..
ليلى : تقول بكره بيطلع
وريف بتوتر : و الشرطة؟
ليلى ابتسمت براحة : تنازل
كلهم : الـحـمدلله
جودي قامت واهي شايله العصى ولحقت سُلاف ، وركضت سُلاف واهي ميته ضحك على شكل جودي واهي تركض وراها ..
وجود واهي تعزز بأعلى صوتها : عليـك فيها
ليلى ضربتها وتناديهم : فضحتونننا
وريف : خليهم خليهم يغيرون جونا
ليلى لفت عليهم : جودي لا توجعينها
جودي بعصاها واهي تحاول تمسك سُلاف الي كانت تدور حول الطاولة وتضحك بكل قوتها ..قامت جودي نقزت على الطاولة بسرعه وضربت سُلاف الي صرخت بألم..
جودي واهي تتنهد : عشان تعقلين
سُلاف ماسكه فخذها من ورا : الله يقلعك حاره
جودي : احسن خلني ابرد على قلبي
وريف فرحانه : بردتي قلوبنا كلنا
جودي استانست : تبين زياده؟
وريف : لا لا الله يخليك
سُلاف تخصرت : مستقوين على اختك الصغيره!
وجود : اختنا الصغيره الي ناكبتنا
سُلاف جتهم وتربعت : يستاهل والله لولا الخوف على نفسي اني قطعت شفايفه الوصخه
قامت وريف تشوف رقبتها : وريني اشوف
ابعدت بسرعه واهي منحرجه : لا
وريف شدت واهي تسحبها : جيبي اشوف
ليلى : بدت تخف
سُلاف : خلاص بنات ابعدوا
وجود مسكت ليلى من يدها وابعدتها بمعنى لا تحرجونها ..
جودي انسدحت على بطنها بنص جلستهم : الحين نروح نتحمد بالسلامة واحنا طاعنين ولدهم؟
وريف : ضاقت الأماكن تنسدحين هنا قومي
ليلى الي ضحكت واهي تتخيل اشكالهم رايحين لهم ..
سُلاف بثقه : بنروح وانا بنفسي اتحمد له بالسلامة
وريف صرخت : ماعقـلتي!!
سُلاف : خير بس بتطمن عليه
وريف : ولا وحده فينا بتروح اصلًا يكفي نتصل وبعدين يستاهل عشان ما يتعدى على بنات الناس
-
اخر الليل بالمستشفى ..جابر على الكنب والهواجيس تاكله اكل يتحرك يمين ويسار..
صقر واهو مغمض عيونه : جابر تراك ارهقتني انثبر
قام جابر : ياخي ماقدرت اغفى افكرر
صقر : قلت لك شكوى مانيب شاكي
جابر : لا ياخوي ما افكر فيك
صقر رفع راسه : اجل؟
جابر سحب كرسي صغير وقربه للسرير : بقولك وعطني رايك
صقر : اسلم
جابر علمه بكل شي حصل من رفض ليلى لـ إهانة ابوه له وطلبه الي مايرضي الله ..
صقر مسح على جبينه : عمي يقول كذا؟
جابر : اي والله
صقر : طيب وش بتسوي؟
جابر : ياخي مدري وش اقولك بس خايف اذا ماسويت الي يبيه يزوجها بنايف غصب
صقر بنفي : لا لا مستحيل نايف يرضى..لو يبيها من البداية وافق عليها
جابر بضيقه : ياخوي ماتعرف ابوي انت
صقر : طيب دامك خايف انها تنوخذ وش تنتظر؟
جابر : اقولك البنت ماتبيني غصب اهو!
صقر واهو يتسند : تغصبها عليك ولا تروح لأخوك
جابر : مابي اغصبها على شي وبنفس الوقت خايف ابوي يسوي لها شي
صقر : تراك حستني معك! تبيها روح كلمها وقلها يابنت الحلال انا ابيك وشاريك ولا تقعد كذا
جابر : كيف اكلمها صاحي انت!
صقر : تدل بيتهم
جابر : خلاص سكر الموضوع..تصبح على خير
صقر : وانت من اهله
-

العصريه عند البنات ..
ليلى واهي ترفع عبايتها تحت يدها: بروح لأبو صالح من تجي معي؟
وكلهم ماكان لهم خلق ..طلعت واهي تتمشى وتناظر الناس : الجو يجنن
صالح من جنبها : اي والله
فزت بقوه من الخوف : بسم الله
صالح ابتسم : خوفتك
ليلى : من وين طلعت لي انت!
صالح : واقفه قدام دكانا جيت اكيد تبين شي
ليلى : اي زين بس لا عاد تسويها طيرت عقلي
صالح وعيونه بعيونها : بسم الله عليك
ليلى توترت وبدت تطلب الأغراض الي تبيها بسرعه عشان تروح ، اهي من زمان ملاحظه نظراته وحركاته معها بس تتجاهله توقعت اليوم ابوه ماسك الدكان بس خاب ظنها ..
صالح واهو يمد لها الأغراض : لا تتأخرين بالجيه
تركته من دون لا ترد واهي تهمس بنفسها : قليل حيا مسوي مراهق على ذا الحركات
قربت للبيت و استوقفها صوته : ليلى
جمدت بمكانها ماقدرت تلف ونادها مره ثانية وثالثه ، عرفته هذا صوته والله ماغيره..
قرب خطوتين : ابي نتكلم
ليلى رجعت على ورا واهي تتذكر وش حصل لسُلاف : مابينا حكي
جابر : يابنت الحلال كلمتين بس وروحي الله يستر عليك
ليلى : وش بغيت يا جابر ؟ لا تحرجني قدام الناس
جابر : ماجيتك الا ابي اكلمك على انفراد واعطيني فرصه
ليلى : وش بغيت؟
جابر بتردد : وش سبب رفضك لي؟
ليلى استغربت : انت تعرف مين ابوك و امك؟
جابر : وغيره؟
ليلى : ما اعرفك عشان احطك سبب بس كفايه علي ان ابوك خالد و امك ميثاء
جابر : وافقي ولك بيت لحالك و اوعدك ما يقربون منك
ليلى انصدمت ماتوقعت احساسها صحيح : يعني ناوين تأذوني!!
جابر نزل عيونه : دامك بعيده عني يمكن يأذيك ابوي
ليلى بعصبيه : وش قاعد تخربط انت! فكني من شرك يا جابر تراني انسانه كافيه خيري وشري عن الناس لا تسبب لي مشاكل
جابر تنهد : اخر كلامك يعني؟
ليلى : كلامي واضح
جابر بهدوء : اجل الله يستر عليك واستري على ما واجهتي ..وان حصل شي من ابوي علميني
مشى واهو شايف هذي اخر فرصة يفتح الموضوع معها وكفايه انه بنفسه شاف ردة فعلها الي واضح انها ماتبيه بالمره ، ماعاد تهون عليه نفسه اكثر من كذا انرفض ثلاث مرات والثالثة انقالت بوجهه..ليلى وقفت بمكانها تناظره الين ما اختفى عن نظرها ما تدري ليش زعلت عليه ودها تناديه وتقوله لا تزعل بس اهي خايفه ماتبي تدخل بيت ابو نايف ولا شي يخصه ماتبي تخاطر بنفسها وتأذي عمرها بالذات انها ماتعرف جابر ولا تثق فيه ..
ليلى ضربت راسها : خلاص
مشت للبيت ودخلت واهي تحس ان الي حصل هم على قلبها ..