صدفة مستشفى توام

1

السلام عليكم.. بعرفكم ع الشخصيات الاساسيه اليوم وشوي شوي مع البارتات اليايه بنتعرف ع الكل💖.

لطيفه : الشخصيه الرئسيه عمرها 21 فيها جاذبيه مب طبيعيه وجمالها ونظراتها الحاده تميزها عن الكل
سيف : الشخصيه الثانيه ولد عمها عمره 22 اسمراني طويل غير وعن شباب عايلتهم وشوي بعيد عنهم وهذا الي خلاها تبا تتعرف عليه اكثر
ناصر : بعد ولد عمها وعمره 30 بتعرفون عقب شو دوره ويانا + عنده توأم اسمه منصور
شيخه : ربيعة لطيفه الروح بالروح ومستحيل يستوي شي بدون ما تقوله لها

لطوف : الوه شواخه
شواخ : ايواااا قلتي شواخه يعني وراج شي اتحفينا
لطوف : شواخ والله لو تعرفين شو استوى اليوم ما تتخيلين شكثر مستانسه
شواخ : مادري متى بتخلين مقدماتج الي تقهر ارمسي انزين
لطوف : تذكرين ولد عميه الي قلت لج عنه من سبوعين
شواخ : هيه اممم شو كان اسمه ناصر
لطوف : لا مب هذا سيف الي قلت لج ف خاطريه الاقيه
شواخ : زييين
لطوف : اليوم تلاقينا لو دريت جان قلت ابا اشوفه من زمان
شواخ : اونه هذا مب كان عند عيال خالاته اكثر
لطوف : هيه بس اليوم تلاقينا يوم سرت اسلم ع عمي ف المستشفى مسوي عمليه وجان نتلقى عند الباب وعقب يوم دخلنا هو كان واقف عند عميه وانا ع الطرف الثاني متجابلين
شواخ : كملي انزين
لطوف : عقب كنت اساعد عميه يشرب وجيه ومشغوله عند البنات يرمسني ويوم شفت جداميه اشوفه يطالعني ويت عيني ف عينه ولا خوز عينه
شواخ : اونه ههههه
لطوف : والله انصدمت مادري حسيت الوقت وقف هذيج الحظه مادري هي ثواني دقايقه ساعات ما حسيت هههه
شواخ : ههههه اكيد انتي تنحتي وفشلتينا كملي انزين شو سويتي عقب
لطوف : ماشي والله بس هالنظره، وهيييه صح قبلها كنت طالبه فواله وقهاوي للمستشفى وخذت رقمه عشان المندوب يكلمه وعقب سيفت الرقم
شواخ : جذابه كيف خذتي رقمه يا سباله
لطوف : هو انا ما سرت وقلت ابا رقمه هم طرشوا رقمه ف قروب العايله لانه كان عند عميه وانا خذته من هناك عشان المندوب بعدين يالخايسه شو تشوفينيه قليلة ادب جدامج
شواخ : ههههه والله تسوينها عشان حبيب القلب
لطوف : مسرع استوى حبيب القلب بعدين تخيلي نظراته كانت غريبه جيه بدون ملامح ما عرفة المعنى منها بس ف نفس الوقت احس انه مستغرب او ماعرف كيف اقولج انه من زمان ما شافني
شواخ : انزين وولد عمج هذاك شو وضعه الحين
لطوف : عن لستهبال تعرفين اني مستحيل اوافق عليه فرق العمر الي بينا مب شويه وايد اخاف من هالشي وقلت له من اول مره كلمني يطلعني من تفكيره بس هو معشم عمره ع الفاضي عباله بالهدايا وكلامه الحلو بيب راسيه
شواخ : لطافي ياخي حرام عليج واضح انه صدق يحبج ولا مب كل يوم بيتعنا وبيمسك خط من بوظبي لين العين بس عشان يشوفج وتعرفين انه يبات ف بيت يدتج عشان يكون قريب منج
لطوف : انزين انا من البدايه قلت له ما لفيت ودرت وياه وبعدين استويت اكره اسير بيت ماما عوشه عشان ما اشوفه تخيلي اخر مره طرشليه (حلو السلسال الي ف رقبتج دوم اشوفج لابستنه شو معناه)
شواخ : كيف شافه
لطوف : نفس الشي سألته قال يوم تفجين شيلتج عشان تعدلينها المحه، مع انيه انا ما افج شيلتيه الا ثواني يوم ترتخي اعدلها ومادري انه جيه وايد يطالع لدرجه انه يشوف الي ف رقبتيه
شواخ : انزين وشو استوى غير
لطوف : والله ماشي بس جيه بس وايد مستانسه اليوم احس الدنيا ما توسعني
شواخ : اقول اذا خلصتي الي عندج اجلبي ويهج ورايه كلاس باجر بنام وانتي فكري ف حبيب القلب ولا اتصلي له وسولفي وياه
لطوف : جلبه اجلبي ويهج مب منج منيه انا الي يايه ارمسج بعدين لو اموت ما برمسه
شواخ : هيه هيه علينا كلها كم يوم وبتسحبين عليه عشان تسولفين وياه
لطوف : هو يباني يرمسني ما بسير ارمسه بعدين امكن اكون ف خاطره واذا رمسته اطيح من عينه ع باله انا من البنات الي يرمسن كل حد
شواخ : بنشوف
لطوف : جلبي ويهج
شواخ : ههه احبج يا زباله
لطوف : اموت فيه يا خايسه نوم العوافي بيبي

هذيج الليله لطوف ما نامت طول الليل كانت صدق واقفه في هذيج الثواني تفكر وتسأل نفسها شو كان يفكر وهو يطالعني جيه؟

بس بعد هذيج الليله ماكانت لطيفه الوحيده الي ما نامت سيف كان اول مره يسهر وباله مشغول

تبون تعرفون في شوه كان يفكر سيف؟ بنكمل ان شاء الله في البارت الياي اتمنى تكونون استمتعتوا