صدفة مستشفى توام

20

مر اسبوعين ع الموضوع وخطبة سيف وخلصن امتحانات البنات وماشي باقي عن عرس اليازيه ومنصور.

يزوي : ميروه اختج وين ؟
ميروه : ف البيت ما بتي
عنود : هذي مستويه نفسيه ما تينا
ودوم : خلكم من لطوف متى بنروح دبي؟
يزوي : كلمة امهاتكن قالن عادي برايكن متى ما تبن سيرن
ودوم : خلاص باجر الاحد بنروح احسن عن الويكند
عنود : ويت بتصل للطوف خل اتي بنتفق مع بعض
ميروه : لا تتعبين نفسج ما بتي لابسه بجامه وقاعده ف الفراش
يزوي : خل نروح لها يمكن فيها شي

قامن البنات بيطلعن بس في صوت وقفهن
راشد (ابو سيف) : وين سايرات العشاء بينحط الحين
ودوم : لا عمي فديتك ما نبا بنسير عند لطوف
راشد : ليش شو فيها لطيفه
يزوي : مافيها شي
مبارك : من ين لمتحانات ما تعشت ويانا
ميره : تنش من الصبح وتنام من وقت
اليده : برايكن سيرن صوبها
وطلعن البنات

سيف كان موجود وقال ف خاطره (تقعد ف البيت بروحها بس عشان ما تشوف ويهي لهادرجه كارهتني يعني ولا مستغنيه بغيري؟)

كانت لافه نفسها ف الفراش تبا تنام بس مب قادره من الصداع وفجأه اندق الباب ، قعدت وتتريا حد يتكلم بس ما سمعت شي غير اصوات مب مفهومه وخافت وثواني ورد الدق مره ثانيه، مسكت فونها ما تعرف شو تسوي من كثر ماهي خايفه وهي تعرف انه بيتهم فاضي ومحد فيه ، اتصلت ع اول رقم طرا ع بالها شوي ورد : الو
لطوف تصيح وبصوت خفيف : انا بروحي ف البيت وفي حد يدق الباب
سيف : فتحي الباب البنات يايات صوبج
لطوف وهي تشاهق : قول والله 
سيف : هدي شوي والله البنات
لطوف بصوت عالي شوي : منوه
عنود : انتي واعيه؟
لطوف عقب ما ستوعبة : اسفه ع الازعاج
وسكرت عنه ومسحت دموعها وفتحت الباب
لطوف : الف مره قلت لكم لا تدقون الباب بدون ما تتكلمون خوفتوني
ميروه : ع بالنا نايمه كنا بنروح
يزوي : شو فيه ويهج ليش كنتي تصيحين؟
لطوف : ماشي فيني صداع فضيع ماخلاني انام دخلن
دخلن البنات وقعدن ع الكراسي الي ف غرفة لطيفه (كانت غرفتها وايد كبيره لدرجه قاسمتنها صاله وغرفه وع طرف كان في كورنر كوفي وثلاجه وهالحركات)
لطوف : غريبه يايات صوبيه
عنود : عشان نخطط لسيرة دبي مع بعض
يزوي : يقولن يبن يسيرن باجر
لطوف وهي تسوي لهن كوفي : ليش لا عادي ونغير نفسيه مره وحده عقب لمتحانات
ميروه : عيل حجزن من الحين الفندق
يزوي : فليل بحجز تعالي لطوف قعدي بروحه راسج يعورج
لطوف : ويت خلصت شو تبن سويت ولا سويسرول
عنود : قعدي قعدي الي تبا بتاخذ روحها
يزوي : ممكن نعرف شو فيج؟ من رديتي من بيت خوالج وانتي متغيره
لطوف : تعرفن كان عندنا امتحانات وتونا مخلصين وجدوليه ملخبط
ودوم : ابدا مب عذر
دانه : حتى شوفي ويها كيف ضعفان
ميروه : لانها ما تطلع من غرفتها غير الصبح تروح بيت اميه عوشه وترد
لطوف : الحين انتن بتسولفون عادي ولا اطلعكن برا
قعدن من بعدها البنات يسولفن ويخططن لطلعه باجر لين تأخر الوقت وراحن البنات معدا عنود تمت وياها
لطوف : شو فيج تطالعيني
عنود : رمسي رمسي ابا اسمع كل شي
لطوف ما تعرف تجذب وحد يطالع فيها : ماشي
عنود : بترمسين ولا كيف
لطوف : بقولج بس يتم بيني وبينج ؟
عنود : رمسي اسمعج
لطوف : ترى محد يعرف شي عن الموضوع
عنود : خلصي
لطوف : برمس بس لا تقاطعيني
سكتت شوي تفكر كيف تقولها الموضوع : انا وسيف كنا نحب بعض وكنا دوم نتلاقى ف بيت امايه عوشه ودوم نسولف مع بعض وعقب تذكرين يوم قلتي لنا تعالن حصه هنيه وكلنا ينا بيتكم؟
عنود : هيه!
لطوف : يوم دخل سيف كانت تدلع قدامه وتسوي حركات وقلت لسيف لا يطلع من الغرفه قبل مايقولي
عنود : عشان جيه قلتي خلينا ننزل؟
لطوف : هيه بس حصوه دخلت غرفتج ويوم طلع سيف سمعتنا نرمس مع بعض ويوم راح ودخلت عليها قالت لي تهني فيه الحين لاني باخذه منج وبخليه يكرهج ويكره طاريج
عنود : حيواانه حسيت انه وراها شي
لطوف وهي تصيح : تخيلي عنود تخيلي جذبت ع اخوج يتحراني راعية شباب ويشك فيني وهذاك اليوم سمعته يكلمها يقولها شو تبيني اطلع من العايله عشان ما اشوفها
عنود وهي تحضن لطوف : حياتي لطوف وليش ما تكلمتي ليش ما قلتي لي من زمان
لطوف : حيوانه خلته يكرهني ولا يبا يشوفني من عقب ما كان يشوفني صبح وليل وبعده يقولي ماشبعت من ويهج عنود ماتعرفين شكثر حبيته وتعلقت فيه وهو بكل بساطه يشك فيني وتخلى عني جيه
عنود : اهدي فديتج بيعرف انه خسرج عشان وحده ما تسوى والايام دواره
لطوف : وايد كسرني عنود
عنود : الله بيعوضج بالي احسن عن سيف لا تبينين له انج زعلانه عليه وتعالي وقدي قدامه وبيني له مايهمج وخليه هو يروح يبا يروح مب انتي الي تنخشين هنيه عشانه
لطوف : تعرفين شو يقول؟ يقولي ماهمج لانه عندج غيري ويوم ما اقعد يقول هيه حبيبج يغار
عنود : ماعليج منه سيفوه مرات يستوي سخيف خليه

تمت عنود ويا لطوف لين هدت شوي وعقب نزلن مع بعض عشان عنود تروح بيتهم
لطوف وهي واقفه عند باب البيت : عنود دخيلج لا تبينين له انج تعرفين شي ولا تقولين حد
عنود : عن لستهبال ترى مثل ماهو اخويه انتي بنت عميه واختيه بعد ماعليج منه هالحمار
بتسمت لطوف وراحت عنود بيتهم

سيف كان قاعد ع الدري الي برا بيتهم والمكان ضلام ماغير نور القمر ف الكان
سيف : لو ما رديتي
عنود : شو تسوي هينه؟
سيف : ماشي قاعد
عنود قعدت عداله : سيف الحين انته مقتنع بحصه؟
سيف : عنود اذا بترمسين روحي داخل مب ناقصنج
عنود : تقدر تقولي شو فيك متضايق
سيف : مافيني شي
تموا ساكتين ولا واحد فيهم تكلم لين ملت عنود وراحت داخل كان سيف يطالع القمر ويتذكر لطيفه يوم كانت تتريا القمر ف كل شهر وتقعد برا تطالعه حتى لو كان الجو مب حلو

وفي الطرف الثاني كان لطيفه قاعده بعد ع دري الي برا تطالع القمر وتشكي له همومها وتصيح بهدوء وكانت لابسه قميص نوم وسيع لين الركبه ولقنز برمودا وفاجه شعرها الي واصل تحت ظهرها كانت شوي تغطي ويها بأيدها وتصيح وشوي ترفع راسها تطالع القمر
سيف كان يشوفها لانه ليتات بيتهم كانت شغاله بس هي ما كانت تشوفه لانه قاعد ف الظلمي، وعرف انها قاعده تصيح اتصل عليها بس ما ردت لانه فونها ما كان عندها قعد يطالع فيها ويتأملها لين لقى نفسه ساير صوبها

كانت مغطيه ويها وتصيح بحرقه تصيح ع كل شي استوى تصيح  قهر وغبنه ،واول ما رفت راسها شافته واقف قدامها
سيف نزل وقعد قدامها ع ريوله : دموعج هذي كلها عليه؟
مسحت لطيفه دموعها : لا
سيف : جذابه
لطوف : ع ثقتيه الي حطيتها فيك وضاعت ع غبائي انته ما تستاهل اصيح عليك سيف
سيف : لطيفه انا حبيتج بس ماقدر اعيش معاج ما قدر اوثق فيج فهمي هالشي
لطوف : انا شو سويت عشان ما تقدر توثق فيني شو فهمني عطني سبب واحد ما يخليك توثق فيني؟
سيف تم ساكت عقب فتره بسيطه : ليش بتعتي عني
لطوف : لاني مابا اخسرك لاني كنت خايفه يحرموني منك لو عرفوا بس انته الي حرمتني منك سيف انته الي ضيعني
وقامت وخلته مكانه
سيف بصوت مخنوق : دخيلج لا تروحين لطوف
وقفت مكانها وهي عاطيتنه ظهرها
سيف : لطوف انتي ما تعرفين انا شكثر احبج واغار عليج حتى من روحي ادري انج حلوه وادري انه مستحيل حد يشوفج ولا يتأملج كل شي فيج حلو وهالشي وايد يتعبني ووايد يشككني
ردت لطيفه ونزلت لين عنده وحطت عينها ف عينه : سيف انته لو كنت تشوف كنت بتشوف انه محد ملا عيني غيرك بتعرف انه من بين الكل ماشفت غيرك انته انا يوم ادخل مكان عيني ما تدور غيرك لين تلقاك ف حياتي ما سويت شي غلط عشان تشك فيني
سيف : مب بأيدي
لطوف : ولا بأيدي شي انا بعد اسويه
وراحت عنه