صدفة مستشفى توام

16

نش سيف الصبح وكالعاده اول ما ينش يمسك فونه يشوف منو رمسه وجان يشوف ف الركويست مسج الانستا شي غريب

: مرحبا سيف بغيتك ف موضوع مهم رد عليه ضروري
سيف : امرني؟
: سيف وخر عن لطيفه تراها تكلمك وتكلم عشره غيرك
سيف : ومن حضرتك؟
: اول شي انا مب ريال ثاني شي هي قالت لي انها بس تستانس وياك بس ما تحبك وعندها غيرك وايد
سيف : وانتي شو تبين الحين شو مصلحتج
: تقدر تقول معجبه
سيف : شكرا
وسحب عليها مع انه كان في شك بسيط بس تجاهل الموضوع
وتصل ف لطوف الي بعده فوها مشغول وهنيه كان بينفجر

شوي وردت هي اتصلت له
لطوف : الوه
سيف : لا الشيخه لو ما رديتي منو ترمسين من البارحه؟
لطوف وهي صوتها باين انه توها ناشه : محد كنت حاطه نمط ليلي
سيف : شو فيج
لطوف : كان فيني صداع نصفي
سيف : والحين شو تحسين
لطوف : احسن
سيف : عيل تعالي بيت اميه عوشه بنتريق هناك
لطوف تتعلث عشان ما تسير : لا ماقدر عندي كلاس الصبح
سيف : خلاص عيل انا بنش اتسبح وبروح الدوام
لطوف : اك نتلاقى فليل
سيف : ان شاءالله

سكر سيف عنها وكل شكوكه تبخرت لانه واثق فيها ومايبا يخسرها، اما لطيفه كانت وايد متضايق ما تعرف كيف تقوله انها تبا تبتعد عنه هالفتره وما تعرف كيف تصارحه بالي فيها.

نشت تسبحت لبست لها توب اسود مع لقينز اسود بعد وشوز ابيض وعباه مسكره فيها شغل خفيف ع الاطراف بالابيض، ما حطت ميكب اليوم مجرد واقي شمس ومرطب وتعطرت وطلعت
لطوف : انتي بعدج ما خلصتي؟
ميروه : روحي انا بسير عقب ما عندي كلاسات الصبح
سحبت عليها لطيفه وطلعت وقبل ما تركب السياره شافته طالع هو بعد، ركبت السياره وهي قلبها يعورها.
دخلت الانستا وطرشت له
لطوف : انته ع عمرك وعن السرعه ما بيطير الدوام
سيف : من عيوني تامرين امر
ف خاطرها تقول (فديت عيونك انا) ومن كثر ماهي سرحانه كتبة الجمله ف الجات وطرشتها له
سيف : الله الله من وين طالعه الشمس اليوم تتفديني؟
توها تستوعب الاخت : ما تفديتك تفديت عيونك
سيف : يعني تفديتي

ما ردت عليه لانها وصلت الجامعه ونزلت ونشغلة بيوم صعب وطويل

فليل كان الكل ف بيت العم مبارك (ابو ناصر ومنصور) الا سيف الي توه  دخل لانه كان مداوم
سيف : السلام عليك
ردوا عليه السلام دخل ووايهم وقعد واول ما قعد لطيفه طالعت ف عمها علي الي كان مشغول ف فونه وقالت للبنات
لطوف : قوموا نروح داخل نسولف الحين بيهزبونا ان تكلمنا
قامن البنات مع بعض بدون اي اعتراض لانه صدق اول ما يبدا يسولفن يهزبونهن ع اصواتهن العاليه، قعدن البنات داخل يسولف ويضحكن مع بعض الا لطيفه كانت وايد هاديه ع غير العاده
ودوم : الحين انتي مدخلتنا عشان تسكتين؟
يزوي : نفسيه هذي اليوم شوفي ويها
لطوف : مب نفسيه بس تعبانه من كراف الجامعه عندي كلاسات من الصبح اليوم
ودوم : والله كلنا مكروفين ماشي باقي ع الميدتيرم
دانه : اييه صح ماشي باقي وعقبه سيده عرس يزوي ومنصور
يزوي : وتخيلن حتى الحين باقي لي وايد اشياء
ميروه : يزوي ليش ما نسير نبات ف دبي ونخلص كل شي بسرعه قبل الامتحانات
عنود : ما اعتقد بيخلونا
ودوم : لا اذا يزوي كلمة امها وقنعتها عادي كلهم بيوافقون
لطوف : نحنا قبل لامتحانات بنروح عند خوالي خلوها عقب
ميروه : صحححح نسيت
دانه : لا تسيرن قعدن ويانا خلن خالوه وعيالها يسيرون
لطوف : عن نفسي ابا اسير من زمان ما سرنا ميروه اذا بتقعد عندكن برايها
ميروه : اميه ما بتخليني اذا انتي بتروحين
يزوي : ماعليه بعده شي وقت بنشوف
قعدن البنات يسولفن ويخططن لين ملت لطيفه وطلعت سايره بيتهم مشي
في حد وراها : الشيخه ممكن تعطينا ويه
لطوف : بايخ
سيف : افا انا الحين بايخ
لطوف ساكته ماقلت شي
سيف : شو فيج ليش طلعتي اصلا
لطوف : مليت ومالي نفس اقعد وياهم
سيف : فيج شي
لطوف : لا مافيني شي
سيف : تعالي بنقعد ع الدرفانه (كانت في درفانه في حديقة بيت قوم لطيفه جيه ع طرف ما تنبان يعني اذا حد دخل وطلع ما يشوفهم)
لطوف : اك
سيف : شو سويتي اليوم
لطوف : ماشي كله ف الجامعه رديت نمت شويه ونشيت رحت بيت عمي
سيف : تدرين انه التعب مبين ع ويهج
لطوف وهي تطالع فيه : مستويه خسفه صح؟
سيف : احلا خسفه شفتها
تمت ساكته وقعدوا شوي وهي ما تطالع فيه كله تطالع ف الارض
سيف : لطوف
طالعته بنظرات غريبه
سيف : شو فيج ممكن تقولين لي؟
لطيفه بدة تنزل دموعها بدون ما تقاومها
سيف : شو مضايقنج خبريني؟
لطوف وهي تنش بتدخل : ماشي مضايقني
نش سيده وراها ومسك ايد كندورتها : والله ترمسين
لطوف وهي بعدها صاده عنه : ممكن تخليني مافيني شي!
سيف : مب قبل ما عرف شو فيج
قابلته : الله يخليك سيف خلني ف حالي عقب بنتفاهم
فجها سيف وسارت عنه داخل

سيف وايد محتار ووايد مستغرب من تصرفاتها ومايعرف كيف يتعامل وياها بس قرر انه ما يكلمها لين هي تكلمه وتقوله كل شي بنفسها.

ومرة فتره ع هالحال لا هو يكلمها ولا هي تكلمه وصارت تتعمد ما تروح بيت يدتها عشان ما تشوفه واذا كلهم كانوا موجودين ما تقعد قدامه ولا تحط عينها ف عينه وكثر ما تقدر تتجنبه لين يا اليوم الي بتروح فيه بيت خوالها

كانت حاطه سماعتها وتحوط ف الغرفه تعدل اغراضها
لطوف : والله من اسبوعين ما كلمته
شويخ : حرام عليج لطوف شو ذنبه هو
لطوف : ماقدر اكلمه
شويخ : تقدرين ع الاقل روحي بيتهم قبل لا تروحون شوفيه
لطوف : ماقدر
شويخ : بتقدرين ما تشوفينه اسبوع كامل؟
لطوف : شيخوه بصفعج ازعجتيني الحين ما عرف شو نسيت
شويخ : نسيتي سيف
لطوف : لو شفتيه مستانس ولا فتكر فيني تخيلي كل يوم اشوفه يرمس حد ف الفون ويضحك ولا كنه شي مستوي وحتى هو ما سأل عني ولا كلمني من اخر مره كنا ف حديقة بيتنا
شويخ : انتي قلتي له خلني ف حالي اكيد ما بيكلمج وبعدين انتي فتحتي له المجال
لطوف : ما فتحت له المجال لشي
شويخ : تخيلي تكون هذيج الخايسه ترمسه
لطوف : ما تقدر
شويخ : انا حذرتج
لطوف : جب جب جلبي ويهج خليني اسكر شنطيه وبروح بيت يدوه
شويخ : لا تنسين تروحين بيتهم بعد
لطوف : ما بسير يالله باي
سكرت لطيفه شنطها وحطتها عن باب الغرفه عشان الخدم ينزلون هن ووقفت قدام المنظره تشوف شكلها كانت لابسه كندوره مخوره يديده بيضاء وشيله دجى الليل بيضاء
لبست لها كعب ابيض من ساره جسيكا باركر وكثرة من العطر وطلعت تسلم ع يدتها

لطوف وهي تحضن يدتها : بشتاق لج امايه
اليده : فديت ويهج يا امايه وانا بتوله عليج
لطوف : يالله فديتج شي ف خاطرج انا بروح
اليده : سلامتج
طلعت لطيفه من عند يدتها وهي تفكر تروح بيت عمها ولا لا وعقب تفكير دخلت بيت عمها وراحت فوق لقت ف الصاله الي فوق عنود وحصه واليازيه
يزوي : هلا والله بالي بتروح وبتخلينا
سلمت عليهن لطوف وهي ماسكه اعصابها عقب ما شافت حصه
عنود : يا حماره اسبوع وايد
لطوف : عشان تشتاقون لي
يزوي : زين انج يتي قبل لا تروحين ولا جان استوى كلام ثاني
لطوف : انا اقدر اروح بدون ما اشوفكن
عنود : فديتج
حصه كان ساكته طول الوقت بس تطالع لطيفه تباها تروح
نشت لطيفه عشان تروح : يالله فديتكن بروح شي ف خاطركن
عنود : هيه ردي بسرعه
لطوف وهي تضحك : من عيوني
حضنا بعض ونزلت لطيفه وهي نازله شافت سيف توه داخل بيروح فوق وكان منزل راسه يلعب ف الفون ولا شافها
لطوف : السلام عليكم
رفع راسه وهو يسمع صوتها : وعليكم السلام
لطوف وهي خانقتنها العبره : شحالك؟
سيف : بخير الحمدالله شحالج
لطوف : نحمدالله
نزلت وهو راح فوق بدون ما يقولون شي ثاني
وقبل ما ترد البيت استحت ترد البيت ولا تروح تسلم ع ودوم ودانه وراحت بيتهم
دخلت غرفة ودوم
ودوم : لا لا لا لطوف لا تقولين اليوم بتروحين
لطوف : هي بروح عقب شوي
يت ودوم وحضنتها : جلبه كيف بنقعد فليل بدونج انتي وميروه
لطوف : والله بشتاق لكن
ودوم : اكثر يا جلبه
لطوف : دانوه وين
ودوم : نايمه
خلاص عيل انا بروح سلمي عليها
ودوم ويت بطلع عندج
طلعن ودوم ولطوف مع بعض لين الباب وعقب راحت لطوف وهي ما كان ودها تروح وهي تدري انه حصه ف بيت عمها راشد.

سيف ف هالاسبوعين تقرب وايد من هذيج الي كلمته ف الانستا وكل وقته يسولف وياها وبذات عنها كانت تهتم فيه وتقوله كلام حلو الي ولا مره سمعه من لطيفه الا اذا كان بالغلط وكتشف قبل يوم انه هذي البنت تكون حصه وستانس اكثر لانها اتي بيتهم ويشوفها.