صدفة مستشفى توام

21

تعرفون اصعب شي ع الانسان اذا صار الي يحبه مب واثق فيه يحس حتى هو فقد ثقته في نفسه ويعرف انه لو شو ما سوى ولو كيف ما حاول مستحيل يرد كل شي نفس قبل، اذا تزعزعت الثقه مره وحده مستحيل ترد مره ثانيه والشي الي ينكسر مستحيل يرد نفس ماكان. وهذا بضبط حال سيف ولطيفه.

لطيفه في هذيج الليله تأكدت مليون بالميه انها خسرت سيف للابد، وعرفة انه سيف ما يستاهلها وهو مهوس ومريض لهادرجه

سيف عرف انه خسر شي وايد كبير ما قدر يتحمل كلامها واعترافاتها له وكيف بينت له حبها الكبير وندم ندم حياته انه تصرف بهالغباء

ما تحرك سيف من مكانه بعد ما راحت لطيفه، راحت وخلته في حسرته وهمه طول الليل مايدري شو يسوي وكيف يتصرف وفي وقت غلط اتصلت له حصه وسكر ف ويها وردت اتصلت لين رد عليها
سيف بصوت متضايق : نعم حصه شو تبين؟
حصه : شو فيك جيه ترمسني وتسكر ف ويهي
سيف : ليش متصله الحين
حصه : لا تكون تكلمها؟
بند ف ويها وبعدها قام من مكانه ، وهي كانت تشوفه من دريشة غرفتها وتنزل دموعها بهدوء ع ويها لين شافته وصل لدرفانه وقعد.

اتصلت له ورد عليها من اول رنه
لحظت صمت لهو الي تكلم ولا هي تكلمة وبعد دقيقه
لطوف : ف هالمكان الي انته قاعد فيه بدة المشاكل
رفع راسه لدريشتها ولمحها
لطوف : وتدري في هذاك اليوم قالت لي اشبعي منه
تصيح وترد تكمل : قالت لي باخذه منج وبخليه يكرهج ويكره ويهج وقدر..
يقاطعها سيف وهو مخنوق : والله ما كرهج الا اموت فيج لطوف انتي ما تعرفين كيف احبج
لطوف : تحبني تروح تخطب غيري سيف اي حب هذا
سيف : مستعد اسوي الي تبينه بس لا تحرميني منج دخيلج
لطوف : انا ما تصلت لك عشان ارد شي نفس ما كان انا اتصل لك بس عشان اقولك من اليوم ورايح انته مجرد ولد عمي ولا بيني وبينك اكثر اذا شفتني ف جمعاتنا سلم عليه عادي مثل قبل ولا كأنه شي مستوي
سيف : مستحيل ما تقدرين ولا انا اقدر
لطوف : تقدر مدامك خطبت غيري تقدر
سيف : باجر بكنسل الخطوبه اصلا كل الي استوى بينا منها هالخايسه
لطوف : حتى لو كنسلت الخطبه ما بنرد لبعض الي ينكسر ما يتصلح سيف بسكر عنك شي ف خارك بن عمي؟
سيف : انتي الي ف خاطريه
لطوف : ربي يحفظك
وسكرت عنه ودخلت توضت وصلت لها ركعتين ودعت من كل قلبها انه ربي يمسحه من قلبها والله يعوضها بالي احسن عنه وحطت ف بالها انه كل شي خيره وكل شي قسمه ونصيب واكيد ما طلع من حياتها الا وهو خيره لها وبيها الي ينسيها كل شي سواه سيف فيها

سيف راح بيتهم وطرش لحصه : عندج يومين يا تقولين لهم انج ما تبيني وتكنسلين الخطبه وتخلين عندج شويت كرامه ولا انا اقولهم ما اباج اختاري
وبعدها عطاها بلوك

وفعلا مرا هاليومين وكنسلت حصه الخطبه وعنود حاول اكثر من مره تقنع لطيفه عشان تسامح سيف بس مب راضيه
عنود : لطوف دخيلج لا تكابرين ع حساب نفسج وهو خلاص عرف غلطه
لطوف : عنود اسكتي الله يخليج اسكتي راسي عورني منج من يتي وانتي ع نفس الموضوع
عنود : والله ابا عشانج يا حماره مب لانه سيف اخويه
لطوف : اخوج ما يوثق فيني تعرفين شو يعني ما يوثق فيني الثقه اذا ضاعت مره مستحيل ترجه
عنود : عطيه فرصه عشان نفسج مب عشانه والله انج تحبينه وميته عليه
لطوف : ما انكر اني احبه بس ما قدر ارد له عقب الي صار وكيف تخلا عني وكسرني
عنود : انا بروح وفكري ف الموضوع برد افتحه مره ثانيه
لطوف : روحي روحي واذا بتفتحين هالموضوع لا ترجعين
عنود وهي طالع وتبتسم : حيوانه

راحت عنود بيتهم وتصلت لسيف
عنود : سيفوه انته وين؟
سيف : ف بيت اميه عوشه
عنود : تعال اباك ف موضوع مهم
سيف : خلي فليل
عنود : الموضوع يخص لطيفه
سيف : شو مستوي؟
عنود : تعال وبتعرف كل شي

دقيقه ووصل سيف عند عنود الي كانت تترياه عند باب سيارته
عنود : فتح السياره بنطلع شوي وبقولك
فتح سيف السياره وركب وطلع من البيت سيده بدون اي وجهه
سيف : شو فيها لطيفه
عنود : انا اعرف كل شي بينكم وعرف شو استوى بعد شوف سيف لطوف وايد تحبك ما تتخيل شكثر تحبك بس انته وايد كسرتها لدرجه ما تقدر تسامحك بسهوله
سيف : والله اردي اني حيوان ووايد غلط ومستعد اسوي اي شي عشانها
عنود : كلمتها ف الموضوع وايد بس معانده وانا احس انها تبا وقت لين تتخطى الي صار
سيف : عنود قولي لها اني مستعد اسوي اي شي عشانها بس ترضى 
عنود : تراني احاول اقنعها بس انته بعد خلك قريب منها حاول تبين لها ثقتك فيها وانك ندمان ع الي صار وبعدين لا تتحراني اسوي هالشي لانك اخويه انا ابا اردكم لبعض بس لاني ادري انه لطيفه بعدها تحبك

اما عند لطيفه الي امها زقرتها وقالت لها عن مايد الي خطبها وانه غصبا عنها بتوافق هالمره ومب ع كيفها كل مره ترفض وبدون سبب
لطوف : اميه انزين مابا مايد
امها : شو الي ماباه وين بتلقين احسن عن ولد اخويه
لطوف : مب غصب هو
امها : ولين متى بتمين ترفضين انشالله؟
لطوف : لين ربي يفرجها
امها : لطوف لا تطلعيني من طوري ف حد تبينه؟
لطوف : محد ولا ابا حد بتم ف بيت ابويه ولا تبون تروغوني بعد
سمعها ابوها الي توه داخل وهي تصارخ : لطيفه لا تعلين صوتج ع امج
قامت لطيفه وراحت غرفتها بدون ما تقول شي
امها : بنتك هذي تتفاهم عندها انا تعبت
ابوها : شو مستوي
امها : مايد ولد فالح اخويه خاطبنا ولا تباه
ابوها : خليها تفكر
امها : بنتك ما تبا تفكر تقول بتم قاعده ف بيت ابويه
ابوها : خليها انا بكلمها
دخل عليها ابوها الغرفه ولقاها تصيح : شو فيج
لطوف تمسح دموعها : ابويه مابا اعرس مب غصب مابا
ابوها : مب غصب بس ليش ما تبين
لطوف : مابا مايد
ابوها : انتي مب بس مايد كل حد ما تبينه
لطوف : بعدني صغيره
ابوها : ربايعج كلهن عرسن وعندهن عيال وانتي تعرفين هالشي ما قالن نحنا صغار
لطوف : ما يخصني ف حد ابويه الله يخليك مابا مايد
ابوها : انزين فكري بعطيج اسبوعين مب بس اسبوع

طلع عنها وخلاها ف همها ما تعرف شو تسوي صح بعدها تحب سيف بس بعد ما تقدر ترد له، ومايد واضح عليه انه معجب فيها من تصرفاته وياها اخر فتره وكيف طيب ومهتم فيها. كل همها الحين هي ما تبا توافق ع مايد تحس انه وايد غلط انها تحب حد وتاخذ حد ثاني بس بعد في مقوله تقول في حد ينسيك حد وهل هو مايد هالحد ولا لااء؟

(تتوقعون انها بتوافق وليش يعني؟)