لعبة القدر

البارت الخامس

#لعبة_القدر
رند/الوو
الرقم/السلام عليكم
رند/وعليكم السلام منو
الرقم/انتي شتصيرين من الحجيه اني من الناصريه وصار حادث سير سياره راجعه من الناصريه لبغداد وشفت رقمج اخر اتصال بتليفونها هسه نقلناهم للمستشفى
رند/بقيت ارجف بحاله صدمه نمت على صوت ماما صبحت على خبر متعرضه لحادث كوتله اني بتها بس كولي ماما بيها شي الله يخليك
الرقم/حالتها خطره لو تلاحكيلها لو لا
رند/عطت بعلو صوتي ماماااا ماااماااا
مهند/فزيت على صوت عياط رند لان جنت نايم بالهول علمودها لان تخاف وحدها بالبيت جوه فزيت واسمعها تصيح ماما ماما رحت اركض فتحت الغرفه لكيتها بالكاع كاعده وشعرها مفتوح تبجي وتناشغ
مهند/ركضت كعدت كدامها شكوو رند شكوو شبيج
رند/ماما تعرضت الحادث وهسه خابروني
بقيت ارجف وابجي حضنت نفسي وخليت راسي بين رجلي ماما راح تعوفني وتروح مثل ماعافني بابا
مهند/لاول مره ينكسر خاطري على ابنيه من بعد هذيج السالفه الي صارت شفتها شكد مكسوره وتبجي بحركه وعيونها حمر تقربت عليها واخذت راسها بحضني مااعرف شلون اواسيها اني اكثر وحد اعرف الفقدان شلون وجعه

كاافي رند انشالله مابيها شي زين انطيني رقم الرجال الي خابرج اخذت تليفونها ونقلت الرقم واتصلت وهي مخليه راسها بحضني فتح خط
مهند/الوو ها خويه بخصوص الحادث الي صار
المره الي خابرت على بتها قبل شويه شلون وضعها
سمعته كال والله ما لحكت توصل للمستشفى بالطريق وتوفت البقيه بحياتكم
سديت الخط وبقيت بحاله صدمه صفنت على رند وهي تباوع بعيوني تريد اطمنها
رند/هااا مهند شكلك ماما مابيها شي مو
مهند/بلعت ريكي ودمعت عيوني اعرف صعبه عليها بس مجبور اكلها
رنوده البقيه بحياتج
شفتها تهسترت من البجي وتملخ بشعرها حاوطتها بيدي ولزمت ايدها حضنتها حيل وهي تصرخ ماما لتعوفيني مالي غيرج بهالدنيه وهوايه حجي يمرد الكلب
بقت دموعي تنزل عليها حسيتها انتهت من البجي والعياط بقت تناشغ بدون صوت وجهه وعيونها حمر  خلت راسها على رجلي واني بالكاع كاعد بقيت امسد بشعرها تذكرت شعر رنوده نفس الشقار ونفس النعومه تخايلت رنوده نايمه بحضني وتبجي كلبي عصرني امسح بدموعي وتنزل لا ارادياً مااسيطر عليها صرت
رند/حسيت بحطام وكسره من بعد بابا مابقالي احد غير امي وهاي امي اليوم راحت مني هم راحت لاختها مريضه وحضرت فاتحتها ومالحكت ترجع لبيتها بسرعه لحكت اختها رفعت راسي عليه مهند حباب اخذني الها
مهند/ماشي كومي لبسي شي بين ماابدل ونروح يله بسرعه
عفتها وصعدت للغرفه لبست بنطرون وتيشيرت ونزلت لكيتها لابسه جبه وحجاب وواكفه ودموعها تصب
كلتلها يله اطلعي
قفلت البيت وصعدن بالسياره توجهنه للناصريه اخذت اتصلت على الرقم نفسه كتله بيا مستشفى ووين صايره بالضبط احنه جاين بالطريق
اخذت اسم المستشفى واخذت مكانها ﯙيـن بالضبط  كال الجثه بالثلاجه مخلينها لحد ما تجون تستلموها
سديت الخط ومشيت بسرعتي للناصريه اتصلت على ابويه خبرته وكتله اني رايحه للناصريه خاله ابتسام توفت بحادث سير
كال لوما بعدني ممكمل شغل جان اجيتكم للناصريه بس بعدني يومين ياله ارجع
الطريق كله رند تبجي ابد ما نشفت دموعها
وصلنه للمستشفى وسلمونه تليفونها اتصلت من تليفونها على ابن اختها نص ساعه والمستشفى انكلبت كلهم اجوي ولد اختها وكرايبهم استلمو الجثه وطلعو للنجف كبل رند بقت ويايه بسيارتي وطلعنه وياهم للنجف غسلوها ودفنونا يم اختها وولد اختها قامو بكلشي بعدهم هستوني مكسورين على امهم لنوب على خالتهم عرفتهم بنفسي وكلتلهم اني شاصير منها عرفو امي كلتلهم مسافره انشالله بس ترجع من السفر اجيبه واجي