" ဦးမျိုးခန့်တို့ ကြွပါရှင် ကြွပါ ကိုမြတ်သျှံရေ ... ဦးမျိုးခန့်တို့ လာတယ် "
လူတွေစည်ကားကာ ပွဲတစ်ခုကျင်းပနေသော နှစ်ထပ်တိုက်အိမ်လေး၏အိမ်ရှေ့အဝင်ဝတွင် အဝါရောင်ချိတ်ဝမ်းဆက်လေးကို ကျော့ရှင်းစွာ ဝတ်ဆင်ထားကာ ဂုဏ်ကျက်သရေဖြင့် ပြည့်စုံနေသည့် အမျိုးသမီး ၊ တနည်းအားဖြင့်ဆိုရသော်ဆောက်လုပ်ရေးကုမ္ပဏီတစ်ခုက အင်ဂျင်နီယာချုပ်ကြီး၏ ဇနီးဖြစ်သူ
ဒေါ်သီသီနိုင်တစ်ယောက် မိမိ၏ခင်ပွန်းဦးမြတ်သျှံကို လှမ်းအော်ခေါ်လိုက်ရင်း
ကြွရောက်လာသော ဧည့်သည်တော်နှစ်ဦးအား ဝမ်းသာလှိုက်လှဲစွာ ကြိုဆိုလေသည်။
" ကိုမျိုးခန့် မတွေ့ရတာကြာပြီ လာဗျာ "
အသားခပ်ညိုညို ၊ အရပ်ထောင်ထောင်မောင်းမောင်းနှင့် အသက်ငါးဆယ်ခန့်အရွယ် ထိုအမျိုးအသားသည် ဦးမြတ်သျှံဖြစ်ပေသည်။ တန်ဖိုးကြီးသော ပိုးသားလုံချည်နှင့်လည်ကတုံးအင်္ကျီအား တွဲဖက်ကာ ခန့်ထည်စွာ ဝတ်ဆင်ထားလေသည်။
" ဂုဏ်ယူပါတယ် ကိုမြတ်သျှံ ဒီသတင်းကြားပြီးပြီးချင်း ကျွန်တော်တို့ဝမ်းသာလိုက်ရတာ "
ဧည့်သည်၏အဆိုသည် ကိုမြတ်သျှံနှင့်ဒေါ်သီသီနိုင်တို့ လင်မယားနှစ်ဦးအား အပြုံးတွေဝေဆာစေသည်။
" ကျေးဇူးတင်ပါတယ်ဗျာ "
" ဒါလေးက ဂုဏ်ပြုငွေလေး "
အဖြူရောင်စာအိတ်လေးကို ကမ်းလာတော့ ဦးမြတ်သျှံသည် မျက်နှာပျက်ယွင်းကာ အတင်းငြင်းလေသည်။
" ဟာ ဒါတွေမလိုပါဘူး ခင်ဗျားကလည်း တကူးတကလာပေးတာကိုပဲ ကျေးဇူးတင်နေပါပြီ "
" ယူပါဗျာ ကြိုးစားမှုကို ဂုဏ်ပြုတာပါ "
ဦးမြတ်သျှံငြင်းလေတော့ ဒေါ်သီသီနိုင်ဘက်သို့လှည့်ကာ အတင်းပေးပြန်သည်။ ကြိုးစားမှုရဲ့ ရလဒ်တစ်ခုလို့ပင်သတ်မှတ်ရပေမည်။
" သျှံ ဒီမှာ ဦးမျိုးခန့်နဲ့အန်တီသက်တို့ကို လာနှုတ်ဆက်ဦး "
ဒေါ်သီသီနိုင်ရဲ့အခေါ်ကြောင့် ရည်ရည်မွန်မွန် ကောင်ငယ်လေးဟာ အနားသို့ ရောက်လာသည်။ ထိုကောင်ငယ်လေးဟာ ဒီနေ့ဂုဏ်ပြုပွဲရဲ့အဓိကဇာတ်လိုက်ပင်။ ဟုတ်ပါသည်။ ဦးမြတ်သျှံနှင့်ဒေါ်သီသီနိုင်တို့၏ သားကြီးမောင်မင်းမြတ်သျှံသည် ဒီနှစ်တက္ကသိုလ်ဝင်စာမေးပွဲ၌ ခြောက်ဘာသာဂုဏ်ထူးဖြင့် ထူးချွန်စွာအောင်မြင်ခဲ့သည့်အတွက်ကြောင့် ဤကဲ့သို့တခမ်းတနားပွဲကျင်းပကာ ဂုဏ်ပြုခြင်းဖြစ်သည်။
