နွေရောက်ပြီလေ.....
ရိုးတံကျဲကျဲ
ပင်အိုတို့ အလှချင်းလည်းပြိုင်..
လေရူးလေး အဝှေ့..
ရွက်ဝါတွေ လိပ်ပြာတွေရယ်....
အကချင်း ပြိုင်နေသလိုပင်...
ဖော်မစုံကျွမ်းသူမှာ ...
လွမ်းစရာ့ မြိုင်တကြော
ရွှေဥသြသံ နှောတော့လေ....
ရင်မှာ လှိုက်ဆူငိုချင်သူ...
လက်တို့နေသလိုပင်....
လွမ်းစရာ့ နွေပန်းချီကား...
တိမ်ညို မိလ္လာ ဆေးရေးခြယ်ထား..
တိမ်သားမီးခိုး လွင့်မြောမဆုံးပေ
နွေရဲ့ ကောင်းကင်ကြည်လင်စွာ
လှပနေတယ်လေ....''''''
သဲ့သဲ့တိုးဝင်လာသော သီချင်းသံကြောင့် လွင် ပြတင်းပေါက်ကို အသာထဖွင့်လိုက်သည်။ လတ်ဆက်သည့်လေနှင့် စင်ကြည်သောအလင်းရောင်ကို တိတ်တဆိတ်ခံစားလိုက်ရသည်။ ကောင်းကင်ကြီးက တကယ်ကိုကြည်လင်နေတာပဲ။ တဖန် နွေပင် ရောက်တော့မှာပါလား။
သီချင်းသံသည် ဟိုဘက်ဆီမှ ပြတင်းပေါက်ဘောင်ပေါ်က ရေဒီယိုအိုလေးထံမှ ထွက်နေခြင်းပင်။ တချက်တချက် လေလှိုင်းသံတဂျီဂျီက ရောနှောလျက်ရှိသည်။ ရေဒီယိုပိုင်ရှင် ဘယ်ဆီမှာများလဲ။ မျက်လုံးလေးဝှေ့ကာဝှိုက်ကာ လိုက်ရှာကြည့်သော်လည်း နွေဦးနဲ့တူသော ထိုလူကို ရှာမတွေ့ပေ။
နွေ...။တစ်နှစ်ပတ်လုံး နွေတစ်ရာသီသာရှိရင် ဘယ်လောက်ကောင်းလိုက်မလဲ။
" ဒေါက်..."
ငြိမ်သက်နေသည့်အခိုက် စက်ဘီးဒေါက်ဖြုတ်သံကို ကြားလိုက်တာကြောင့် လွင် ဝရံတာကို ပြေးထွက်လိုက်သည်။
ဖြူလွလွရှပ်အင်္ကျီရယ်၊ကချင်ပုဆိုးရယ် တွဲဖက်ဆင်ယင်လျက်။
" အဲ့စက်ဘီးကြီးကို တကယ်သုံးတာပဲ "
ဘယ်၊ညာခြေတံရှည်တို့က အပေါ်ရောက်လိုက်၊အောက်ရောက်လိုက်။ဘီးလေးက တရွေ့ရွေ့။ ဦး ရဲ့ကျောပြင်ဟာနွေဦးလို နွေးနွေးထွေးထွေး။
ကြည်လင်သောကောင်းကင်၊သာယာသောနံနက်ခင်း၊ဒီရာသီဟာ ဦးနှင့်သိပ်ကိုလိုက်ဖက်သည်။
" Technical University of Myanmar (TUM) ဟာဆိုရင် 2014 ခုနှစ်တွင် Dr.Jayden မှ စတင်တည်ထောင်ခဲ့ပါတယ်။ TUM ဟာဆိုရင် နိုင်ငံတကာအဆင့်မီကျောင်းဖြစ်ပြီး နိုင်ငံတကာအသိအမှတ်ပြု PFI ( Perfect Future Intelligence) Organization နှင့်ပူးပေါင်းလျက် IT ပညာရှင်များစွာကို မွေးထုတ်ပေးလျက်ရှိပါတယ်။ TUM ရဲ့ ပဲ့ကိုင်ရှင် Dr.Jayden ဟာဆိုရင် Ph.D in Software Engineering (UK) , Master of Business Administration (MBA) ......."
