بتتمشى في الشقه من تعب الحمل ف شهرها التاسع ومش قادرة تتحمل اكتر من كده وحطت أيدها ع بطنها واتكلمت بوهن وعدم رضا:
ـ او نو انا يحصل فيا كل ده؟ آااه ياربي مش قادرة اتحمل؛البيبي تعبني قوي، لأ اكتر من قوي كمان، ونضال مش حاسس بيا، آاااه بليز يارب ساعدني علشان متألمش مش عايزه اقلق الجيران، هيبقى اسلوب غير متحضر لو صرخت دلوقتي، بليززز.
مسك كوباية الشاي وبيشرب بصوت عالي وده نرفزها جداً، وراحت لعندو وهى بتتالم واتكلمت بضجر لكن صوتها كان هادي:
ـ نضال! ألف مرة قولتلك بلاش طريقتك وأنت بتشرب الشاي بالطريقة البيئة دي! أرجوك كده اسلوب مفتقر وهمجي وغير متحضر كمان ، لحد امتى هفضل انبه عليك تتنبه اكتر لتصرفاتك؟
حط الكوبايه وبيكمل الفيلم وقال بتريقه:
ـ عارفه ياحبيبتي، احسن حاجه في الدنيا دي ايه؟
قعدت جمبه بهدوء وردت بلباقه وقالت:
ـ احسن حاجه في الدنيا دي انت يا نضال.
هز راسه بالرفض ورد بنفس اللباقه مغلفه بتريقه:
ـ لأ،غلط. أحسن حاجه في الدنيا إنك تعيشي برحتك، تشربي وتاكلي بمزاجك، أيوه أصل الاكل والشرب ده مزاج، انتي متعرفيش شفطة بُق الشاي ده من ع طرف الكوبايه، بتعدل الدماغ ازاي! يسلاااام تقوليش حقنة مهدىء للأعصاب، ولا بقى لما اغمس الملوخيه بودن القطه وتنقط كده ع هدومي، ياااااااه ع المتعه، ده حتى المثل بيقول! كل ع مزاجك والبس ع مزاج الناس، هو مثل غلط اه، بس ف نفس ذات الوقت صح يسلااام عليك يانضال، والله..!، ها والله بقول حكم.
رجاء بتسمعه وف حالة عدم استيعاب من طريقة وصفه وبالنسبالها طريقه بشعه جدا وغير مقبول أنها حتى تتوصف بالشكل ده ف بيتها، وهمست بتعجب واشمئزاز ف نفس الوقت:
ـ شفطة بُق الشاي؟! و ملوخيه ودن القطه؟! نو؛نو أنا مستحيل اكون ف الواقع وبسمع الاشياء دي، أكيد انا ف حلم؛ لأ حلم ايه؟ ده كابوس؛ كابوس فظيع جدا، ايه ودن القطه دي كمان؟ لأ انا لازم افوق او ماَماَااا ايمبوسيبل.
نضال بص ليها بتركيز وكاتم الضحكه ومش قادر ميضحكش، وحب يصدمها اكتر وكمل كلامه بنفس الطريقة:
ـ عارفه ياجيحي ياحبيبتي، لما تولدي وتقومي بالسلامه انا هعزمك على غدا محصلش!
رغم اشمئزازها،ردت بخجل:
ـ هتعزمني اكيد ف مطعم ذا ماستر شيف مش كده ياحبيبي نضال!
بصلها نضال ورد عليها بتوعد:
ـ لأ ياحبيبتي، عزومتك هتكون في مسمط ارض اللوا ف امبابه؛ هتاكلي احلا ممبار وسمين مكلتهوش ف حياتك كلها ، دانتي هتاكلي صوابعي وايديا وراهم مش صوابعك وبس!
رجاء من اللي بتسمعه كأنها اتكهربت حرفياً وفتحت عينيها ع الآخر ومن الصدمه صرخت بصوت عالي جداً:
ـ اووووه نوووووو، آاااااااه اولا لا لااا، لااااااااء.
ـ اتصل بمآمآاااا و بآبآااااا انا بولد يانضاااال، آااااه بليز ساعدوني اوه نووووو.
