جهاد و سلامة.
تُعلن دار الافتاء أن غدًا الإثنين بإذن الله غرة رجب
اللهم بارك لنا في رجب وشعبان وبلغنا رمضان 🤲
عَنْ طَلْحَةَ بنِ عُبْيدِ اللَّهِ ، أَنَّ النَّبِيَّ ﷺ كانَ إِذا رَأَى الهِلالَ قَالَ: " اللَّهُمَّ أَهِلَّهُ علَيْنَا بِالأَمْنِ والإِيمَانِ، وَالسَّلامَةِ والإِسْلامِ، رَبِّي ورَبُّكَ اللَّه، هِلالُ رُشْدٍ وخَيْرٍ " رواه الترمذي
بسم الله نبدأ
محاسن ونبويه قاعدين ومعاهم عبقرينو،كانوا قلقانين على جهاد واتكلمت نبويه بحزن وقالت:-يا عيني عليك يا حليم يابني!!! بقى اللي تتقصف في عمرها عنايات! كانت عايزه تولع في الورشه؟!
ردت عليها محاسن بغلظه:- ومش بس كده يا نبويه؛ دي كانت عايزه تحسر حليم على الورشه وتولع فيها الهي تولع فخادك ياعنايات يابنت الرفدي.
نبويه بتعجب:- يووه!! امال انا بقول ايه يا محاسن انتي كمان؟ المهم قُصره، والواد جهاد يا كبدي عليه بيقولوا فخاده بقت على الفحم.
محاسن بنفس النبره:- ومش بس كده يا نبويه، دي كمان عنايات مسلطه العيال يولعوا في إبن زينات، الواد اللي جابلنا الشندوتشات دي!!! اااه والنبي كانت حلوه وطعمها حلو.
نبويه ضربت كف بكف وقالت بنفاذ صبر:- عوض عليا عوض الصابرين يا رب، دي واحده بتكرر الكلام وبتزود الطين بله.
محاسن بقلق ع جهاد قالت:- كبدي عليك يا بهاء يا ترى عامل ايه دلوقتي؟ جعان ولا شبعان؟ مشوي ولا مسلوق؟ حاكم بيقولوا انك بقيت نص سوا، استرها يا رب وما يكونوش حطوا عليه بصلتين ورشه ملح وشوحوه.
عبقرينو كان بيضحك عليهم و قام وقف وقال بعدم استيعاب:- ياستي انتي وهي، ايه اللي انتوا بتقولوه ده؟ بقى الراجل عرض نفسه للمـ-وت!!! وانتوا هنا قاعدين تقلشوا عليه؟ ده بدل ما تدعوله دعوه حلوه؟
محاسن بتنهيده:- اه والنبي على قولك يا حسين الكلب انت, ربنا معاه, ويتم شفاه على خير؛ الواد ده باين عليه انه مش وش مرمطه.
نبويه:- على قولك يختي الواد ده من ساعه ماجه المخروبه دي! وهو ماشافش يوم عدل، ياترى مين داعي عليه في ليله القدر بالنحس.
الباب خبط، عبقرينو فتح وكانت فاتن وقالت:- سلامو عليكوا، ازيك يا عبقرينو، امال فين امك؟
عبقرينو:- عليكو السلام يا خالتي، امي مش هنا، راحت المستشفى تشوف المهندس جهاد تطمن عليه بعد اللي حصل.
فاتن قعدت جنب محاسن وقالت بوهن:- يلا ربنا يشفيه يا رب، والله اهل الحاره كلهم بيدعوله، واول ما عرفت سبت اللي ورايا ونزلت جري، ومنها لله عنايات وش شر من يوم مارجليها خطت الحاره، بس قدر ولطف الحمد لله.
محاسن شافتها قاعده وباين عليها الزعل وقالت بتعجب:- مالك يا بت يا فاتن؟ زعلانه ليه كده وشايله طاجن ستك؟ اصل مايخلش عليا انك زعلانه على الواد مهاب؟ انتي اصلا ما بتحسيش زي امك روحيه راديو.
