أنا مين ؟!

٢٢ -جوازه مع وقف التنفيذ

بعد مرور عده ايام

الماذون : بارك الله لكما وبارك عليكما وجمع بينكما في خير ، زواج مبارك ان شاء الله

حنين : مبروك يا مى

مى : مبروك على ايه على  خيبتى السودا ، انا معرفش موقعى ايه فى الاعراب دلوقتى ، انا اتصنف ايه بالظبط عروسه و عريس ، ولا دبل مكس

صلاح : مبروك يا بنتى

مى بتمثيل بكاءء : عاااااا ، الحقنى يا صلوحه

صلاح: يخربيت صراخك ، اتهدى ، واسمعى منى الكلمتين دول ، يابنتى انتى دلوقتى المفروض اتجوزتى خد بالك من بيتك

مى: صلااح ، انت واخد بالك انا فى ايه ، عمرك شوفت بنت فى فرحها تلبس بدله ، ده احنا قولنا للماذون ان العريس مسافر و عامل توكيل لابوه علشان خوفا على مشاعر الماذون ليطلب لينا البوليس ، هيجى يجوز راجل ل واحد بصوت واحده ست

حنين : اعقلى كده وبطلى جنان مفهوم ، لحد ما نشوف هنعمل ايه

اسر وهو يقترب من حنين : عقبالنا يا جميل

حنين : اسر مينفعش اللى انت بتعمله ده

اسر: انا عملت ايه بس ده انا غلبان والله

حنين : اه اوووى

اسر : شوفتى بقى انك ظالمتنى

امجد : الف مبروك يا دكتوره وعقبالكم يااارب

اسر و هو يقبض على يد امجد بغل : الله يبارك فيك يا حماده والله عقبال عندك

امجد بغيظ : تسلم

حنين : هو اى حكايه حماده اللى انت بتقولها دى ع طول لامجد

اسر : هقولك يا ستى ، اصل فى واحد ميتخيرش عنه كده فى الغتاته اسمه حماده

حنين : يا سلام

اسر: امال انتى فاكره ايه ، بص يا حنون ، اهم حاجه ملكيش دعوه بيه حفاظا على ولادنا يا حبيبتى

حنين بتركيز : ولا د مين

اسر: عبدالصمد ، و مسعده

حنين : ااايه ، انا مش هسمى الاسامى ده

اسربمكر : اللاه ، ده انت واقع بقي

حنين بتوتر : اانا ، مقولتيش حاجه ، و تركته وذهبت

اسر: خدى يابت يا ام مسعده

شهاب : مسعده مين

اسر بدون تركيز : بنتى

شهاب: طب نلم نفسنا ولا ايه

اسر : طب ما تخف عليا وتخليك فى عروستك ، وتسبينى فى حالى

اقتصر الحفل على عائله مى و عائله شهاب فقط و بالطبع وجود عمران و وائل و دلال وبعد انتهاء الحفل اتجه شهاب و مى الى بيتهم

★★★★★★★★★★★★★★★★★★★★★★★★★★

رياض : خير

صابر: لقينا شيرين يا رياض بيه

رياض : تجبها و تجيلى فوراا ، واياك تهرب منك البت دى تانى

صابر : اوامرك يا باشا

★★★★★★★★★★★★★★★★★★★★★★★★★★

بعد وصولهم الى منزلهم السعيد

مى : هى دى الفيلا بتاعتك ، مش بطال ماشي حالها

شهاب : عندك اعتراض فى حاجه

مى : يعنى ، انا ممكن

قطع شهاب حديثها قائلا : خلى اعتراضك لنفسك ،مفهوم

مى : انت بنى ادم معتوه

شهاب : معتوه ! ، هو انتى اتعديتى من فخرى ولا ايه

مى : انا الاوضه بتاعتى فين

شهاب : عندك فوق اول اوضه على يمين السلم

مى: ياريت متعملش ازعاج و تحترم ان فى ناس عايشه معاك هنا ، ماشي

شهاب و هو يغل على اسنانه : امشي من قدامى

مى: سنانى دى اللى هتكسرها ماشى ، عديم الذوق

شهاب : البيت هنا ليه قواعد هتمشي عليها بالحرف الواحد

مى : على نفسك ، مش عليا ، و بعدين دكتور فخرى ، قالى اتصرف بطبيعتى

شهاب : لا وانتى الصادقه ، دكتور فخرى بتاعك ده قالى انك هتمشي على طريقتى انا علشان نزفت نخلص من اللى احنا فيه

مى : يعنى ايه

شهاب : يعنى انا هعد من واحد ل تلاته ، لو فضلتى قدامى ، انا مش مسئول عن اللى هيحصل

مى وهى تمثل القوه : ولا يهمنى

شهاب: وااااحد

فى ذلك الوقت اختفت مى و ذهبت الى غرفتها

شهاب بابتسامه : جبانه

مى: سمعتك ،انا طلعت بمزاجى

شهاب : طب اتكتمى احسلك

★★★★★★★★★★★★★★★★★★★★★★★★★★

مر حوالى شهر لم يحدث بيه اى تغير  و كان الوضع كما هو و كانت مى تفعل ما طلبه فخرى منها بالحرف الواحد ، كما كان يفعل شهاب ايضا ذلك و فى احدى المرات كانت مى تقف فى المطبخ

مى : يا سلام على ريحه الاكل بتاعك يا بت يا ميوشه تهبل

شهاب : انت بتهببى ايه

مى بخضه وكانت تحمل بيدها دقيق مما جعله ينكب على وجه شهاب ، او وجهها بمعنى اصح

مى: عجبك كده ، خلتنى ابهدل وشى ، اللى هو وشك ، يووووه على اللخبطه ، انت السبب ، استنى انفض الدقيق ده

كان شهاب ينظر اليها بنظره غريبه عليه ، و لاول مره لا يعتبر ان هذا الوجه وجه كان احساس بداخله ان يوجد شخص اخر معه يحركه ، ولم يستعد وعيه الا على صوت مى

مى: هييييه ، انت يا بنى روحت فين

شهاب : انتى بتعملى ايه

مى : بعمل فطار ، تاكل معايا

شهاب : لا انا مش مستغنى عن عمرى ، كفايه اللى حصلى

مى بغيظ : احسن ، ان شاله تموت

شهاب : ما انا لو موت انتى كمان هتموتى معايا

مى وبعد اصابتها كحه نظير الاكل الذى توقف فى حنجرتها : كح كح ،مياااه
شهاب: خدى اشربى

مى : شكرا

شهاب : احسن دلوقتى

مى : اه ، شكرا

شهاب : دكتور صلاح ع فكره اتصل عليكى كتير

مى : تلاقينى مسمعتيش الموبيل  ، بقولك صحيح ، خطوبه دلال بكرا

شهاب : اهلا وسهلا اعمل ايه

مى : اعمل حواجبك ، هو ايه اللى اعمل ايه ، دلال و صحبتى و وائل صحبى

شهاب بغضب: كلمه صحبى دى لو طلعت على لسانك تانى هقطعه فاهمه

مى: وانت مالك ،انت صدقت انك جوزى

شهاب : مى استهدى بالله احسلك ، ولو ع الخطوبه ،عمران خالها عزمنى

مى :  ولما انت هتروح ، بتتكلم معايا كده ليه ، بنى ادم غبى

شهاب : مااشي يا مى ، زودى فى حسابك اووى

مى : يا عم روح

شهاب: روح ! ، طب تعالى بقى

واخذ يركض شهاب وراء مى بكل قوته حتى خرجا الى الجنينه و سقطا فى حمام السباحه

★★★★★★★★★★★★★★★★★★★★★★★★★★

فى الاذاعه

سماح : لا بس كتر خيرك يا دلال ، والله وفيكى الخير ، جايه بنفسك تعزمينا على خطوبتك ، مش ناس اتجوزت من غير ما تعزم حتى

دلال : احنا مش هنلف و ندور على بعض ،السكه وفضيت ليكى مع مصطفى و رينا شطارتك بقي ، وابعدى عن مى

سماح بتفكير محدثه نفسها : ليه لا

ثم وجهت كلامها الى دلال: على العموم الف مبروك يا حبيبتى

دلال : الله يبارك فيكى ، عقبالك

★★★★★★★★★★★★★★★★★★★★★★★★★★

فى فيلا رياض

رياض : ازيك يا شيرين

شيرين : ابوس ايدك اخر مره يا باشا ،  اعتقنى وانا همشي مش هتشوف وشى تانى

رياض : طول عمرى بقول عليكى غبيه ، انا هئذيكى يعنى ، ثم امسك شعرها بقوه ، الورق فين يا بت

شيرين : معرفش معرفش

رياض : روحك هتطلع فى ايدى

شيرين : مع عمران يا باشا ، مع عمران الشاذلى

رياض : اخفوا البت دى فى اى داهيه لحد ما افضى ليها كويس ، وانت يا عمران دورك قرب معايا اوووى

★★★★★★★★★★★★★★★★★★★★★★★★★★

عوده مره اخرى الى شهاب و مى

مى بغضب : عجبك اللى انت عملته ده

شهاب : انتى السبب ، انت  هاااااطتشى

مى : يرحمكم الله ، هااااطتشى  ، عجبك كده

شهاب: امشي  امشي ، اعملى لينا اى حاجه نشربها علشااان ،  هااااطتشى

مى : كنت الخدامه بتاعتك انا ، كل واحد يعمل لنفسه

شهاب : سمعتى انا قولت ايه

مى : هااااطتشي ، لا

★★★★★★★★★★★★★★★★★★★★★★★★★★

يوم جديد و يوم مميز فهو حفل خطوبه دلال و وائل

ف بعد مرور الوقت و تحديدا قرب اذان العصر

دلال : ايه يا وائل اتاخرت كده ليه

وائل : غيرت رائى

دلال : لا والله

وائل : اه قولت لا دى بت نكديه و مش هينفع نكمل مع بعض

دلال بمكر : براحتك ، فارس موجود

وائل : نعممم يااختى

دلال بضحك : اهدى اهدى مالك بس

وائل : انتى بتجيبى سيره الزفت ده ليه ، مش كفايه انو هيجى

دلال : وانا مالى يا وائل ، ما هو خالو اللى عزمه ، ولا انت عاوز تنكد عليا وخلاص

وائل : ده انا بنى ادم قليل الادب ان زعلت حبيبتى منى

دلال : يا سلام يا اخويا

وائل : اخويا ! ، لا ده فال مش حلو خالص يا حبيبتى ، بعدين بقولك حبيبتى و عينى بتطلع عصافير ، وانتى تقوللى يا اخويا ، ايه هخطب عباس صحبى ، مش كده يا ام عنايات

دلال بغيظ : لو قولت ام عنايات دى تانى انت حر

وائل : طب بالنسبه للواد بورعى ايه ظروفه

دلال: وااائل

وائل بمكر : قلبه

دلال بدلع : يسلملى قلبه

وائل : الله اكبرررر ، ايه يا شيخه فى ايه بقي يا شيخه

دلال بضحك : طب خلاص بقى

وائل : ماشى يا ستى ، البت مى جت ولا لسه

دلال بغيظ : لا الست هانم نموسيتها كحلى ، لسه متصله عليا يتقولى احنا لسه صاحيين ، بتقولى واخدين دور برد هى و شهاب

وائل : لا الف سلامه عليهم

وبعد مرور الوقت و حضور الجميع

تم تلبيس الدبل بين دلال و وائل وسط اصوات الاحتفال و الفرحه

وكانت توجد اعين تراقب شخص ما بغلسه ، ولم يكن سوى فارس ، وكان يتابع ضحكات كريمه و خفه ظلها فى خلسه و على صعيد اخر كان يوجد من ياكله الغيظ وكان هذا امجد الذى وجد اسر يغازل حنين بكل اريحيه ، وهى كانت تتقبل منه كل كلمه غزل بسرور ، و بالطبع كان بطلنا شهاب المحمدى تتصاعد من عينه الابخره نظير نظرات مصطفى الى تقرابه من مى

وانتهى الحفل فى سلام

و انطلق شهاب و دلال الى منزلهم


يتبع ....