آشــين الحُــب

البـارت التاسع

" آشين الحُب "
فاطمة أحمد

بدا الوقت يمشي ومحد يرد على اتصالنا
صارت ساعة ٣ والخوف بدا يدب بـ كلوبنا ..

التفتت لـ كوثر :- اتصلي على عمو حامد شوفي !

ـ مايرد .. صار ساعة واتصلت على دنيا وعلى امي وكلهم محد يرد .. گلبي راح ..

التفتت حايرة شسوي ياربي ..
محد يرد ومرت أكثر من نص ساعة زايدة ..

اجت وحدة من بنات عمومتهم ترجف وتصيح :- حااادث حاادث .. مسوين حادث ..

فزينا عليها  .. ركضت عليها ولزمت أيدها :- شش.. شنووو ، حادث شنو ، منو مسوي حادث احجيييي

ـ مم.. ماادري بس اتصلت بـ رجلي كال وحدة من السيارات الويانا سووا حادث ما.. مااعرف مال منوووو

شهـــد :
كعدت بـ الكاع رجلي ترجف .. يمة كلشي ولا اهلي يصير بيهم شي ، ربي احفظهم دخيلك .. واحفظ اختي من كل شر ومن كل عين ..

شوي وكالوا اجو الكل انخبص والهوسة صارت كلها يم الباب .. دفعت الواكفات ورحت اشوفهم .. عيوني تدور على اهلي  بـ خوف ، خاف ماكو واحد بيهم ..

اول مانزلوا ابرار ومسلم وركضت امي لزمت أيدها وعلى جهة هدى ورياحين ..

اتنفست بـ راحة .. وهمست الحمد الله ..
عدلت ملامح وجهي واتنهدت ..

رحت عليهم امشي والرجفة بعدها بـ جسمي ..
دخلت استقبلهم .. على ماكعدوا وامي اجت يمي .. حضنتها بـ قوة خايفة

باوستني والتفتت تسلم على النسوان ..
تقربت على ابرار .. ابتسمت الي واشرتلي تعالي

حضنتها حيل :- شلونج يَ عمري

ـ مشتاقتلج ولج ماتوقعت هيج البيت يفرغ بـ دونج !!

ـ اني صوت البيت أصلاً .. لج كوليلي شصار كالوا مسوين حادث!!

ـ لا ماكو شي .. بس وحدة من السيارات الويانا دعمت سيارة وهذاك نزل الا أسويها فصل والا اشتكي عليكم وهيج منكم وهيج وكطع علينا الشارع .. لحدما فضوها بيناتهم واجينا ..

ـ راح گلبي واني افكر .. لج ماتدرين شصار بية من كالوا صاير حادث

ـ سلامة گلبج

ـ ابرار لج شطالعة ! تخبلين والله كُلش حلوة ، التسريحة نازززكة ولايكتلج حييل والفستان كُلش حلو .. والمكياج بسيط وكُلش طالع حلو عليج

ـ صدُك؟

ـ اي والنبي

ابتسمت ودارت وجها تباوع للنسوان رجعت كالت :- لج شهد ..
حجتها والتفتت تباوع للنسوان .. ورجعت باوعتلي اشرتلي بـ عيونها ، تقربت عليها وهمست :- خااايفة ميتة حيييل

ـ شبيج يمعودة

ـ لاتعوفوني عفية نوب أبوية يكول اليوم ارجعوا ، جنت بـ وحدة صرت بـ إثنين