آشــين الحُــب

البـارت الثاني عشر

" آشين الحُب "
فاطمة أحمد

دنيـا مغرب والكهرباء طافية .. واكفة اجهز بـ العشاء ..
هدى كعدت يمي ورياحين تباوع تلفزيون واسماعيل ويوسف بـ الشارع يلعبون طوبة ..

التفتت الي هدى :- خل نطلع بره حار البيت
هزيت راسي مأيدة كلامها وطلعنا فرشنا فراش وكعدت اگشر بيذنجان .. 

بـ هالاثناء دخل بابا .. باوعلنا وسحب كرسي وكعد كبالنا التفت الي .. ها شني ما الله هداج واقتنعتي!

باوعتلة بـ طرف عيني ودنكت اكمل .. زفر نَفسة بـ عصبية واسترسل بـ الكلام :- وچ اقبلي .. فرات مجهز كُلشي ومشتري ذاك الذهب الماشايفتةةة بـ حيااااتج .. والغرفة ذيج الغرفة الراقية وبس الملابس كال الها مليونين تشتري الـ يعجبها ..

صفنت و بـ داخلي اضحك على تفكير بابا .. عبالة طفلة واتقشمر ..
اخخخ يابة ماتدري الكدامك صار گلبها قالب ثلج .. وعقلها اكبر من عمرها  ..

تنهدت بـ ضيق .. احس سجاحين تدخل گلبي .. اصرارة على تحطيم حياتي خلاني مااعرف شسوي ..

بلعت ريگي وهمست :- بابا .. مااريد!!

وكف ونتر الكرسي بـ الكاع يعيط ويغلط وانعل واصلخ ..
:- فهميني أنتِ منو علمج هيج توكفين بـ وجهي وترفضين ولج بكد النعال 

ابتسمت والدموع نزلت على خدي :- تريد تعرف منو علمني اوكف بـ وجهك !!
أنت يابوي .. أنت وكلشي سويتة بينا .. كلكم عفتوني وحدي .. عفتوني اصارع هَـالدنيا وحدي .. محد كال هَـالبنية شنو تحس شنو جاي تمر بية .. وكملتوها من أمي عافتنا وراحت وأنت ماتهتم بينا !! وأختي عافتني وراحت تلم حياتها لاتتشتت ..
واني صرت بـ هذا البيت الأم والاب والاخت .. شلت مسؤولية بيت كامل واني بعدني مامتجاوزة الـ١٧ سنة ..

أنت شدا تحجي يابةة!! اني هنا صارلي ٤٠ يوم محد سأل ومحد كال اولادنا منو الهم .. كل واحد التهى بـ نفسة ونسيتوا انتو أهل المسؤولية واحنا عائلتكم!!
اذا مو كد الحِـمل ليش تتزوجون؟!

امي دارت ظهرها وعافتنا المهم تنقذ نفسها! وأنتَ كل همك اتزوج تروح وترجع عليّ .. واخواني ياابه واخواني؟

رياحين تجيني خايفه لو هدى الي مخلصتها بجي .. وإسماعيل ويوسف الي صرت اخاف اطلعهم الشارع!!

مسحت دموعي حييل وعفتة ورجعت لـ غرفتي .. اليگتلني بقى ساكت ولا انطى أي ردة فعل !؟

دخلت لـ الغرفة وقفلتها عليه .. اااخ يا گلبي شتتحمل بعد ..
طلعت كل الي بـ داخلي .. بجيت وبجيت ..
داخلي دمار .. جاي اعيش صراعات داخلية محد يحس بية !!

كمت حطيت العشا لـ اخواني ورجعت للغرفة .. حاولت انام ماكدرت منا لحدما صار الفجر يالله غفيت .. كعدت الصبح جسمي متكسر ..

باوعت لـ بابا يفتر بـ المطبخ .. كلت صباح الخير وفتت
مارد عليّ .. سويت ريوك وكعدنا اني واخواني تريكنا وكمت نظفت البيت ..