آشــين الحُــب

البـارت الحادي والعشرين

" آشين الحُب "
فاطمة أحمد

بعدني احجي ويا ودخلت امي :- ماكافي من الموبايل خلصت صلاة وأنتِ بعدج كلشي مامسوية ..

شمرت الموبايل بسرعة والتفتت على الطباخ :- اي يمة هسة عشر دقايق والعشا يجهز

ـ ديلااا فضيني ..

كملت العشا على السريع وتعشينا وبسرعة ركضت لـ الموبايل اريد افتهم السالفة لكيتة كومة دازلي رسائل عباله عفتة ..

كتبت اله :- اجيت جنت مشغولة شوي

ـ اي شهد أنتِ راح تتفهميني مو؟

ـ اي غير دكول شكوو!

ـ سويت علاقة وي زوزة الي جانت ويانا بـ الكروب وجنت كاعد اسولف وياها ونسولف كلام حب ونتغزل بـ بعض فَ صعدنا أتصال وشقة وضحك وفشار ودخل اخوها عليها وشافنا .. بقى يغلط عليّ وهددني الا يسويها عشاير ..
اسمي ورقمي وكلشي عرف وكال الا اطلع بيتكم واجيكم لو تشرد للمريخ ..
شهد لو أهلي يعرفون إلا يذبحوني نوب تصير عشاير واروح بيها والله ..
حذفت الفايبر وكل البرامج بس خايف حيلل ليل ماجاي اكدر انام

حرت مدري انقهر على نفسي مدري انقهر عليه!
سحبت نفس وكتبت اله :- ليش هَـالخوف هو راد بس يخوفك لا أكثر ! وين يكدر يطلع بيتكم على رقمك وين لاكيها هاي ..
لا تخاف وصير رجال وارجع عيش حياتك طبيعي لو كدر يحصلك چا اجاك من اول ما عرف بـ السالفة ..

بقيت كاعدة ويا لـ الفجر احاول أهدي وداخلي اضحك عليه .. معقولة حبيت هيج شخص جبان ! وماعندة شخصية ، الطفل أحسن منة!

نمت وكعدت الصبح لكيتة مرجع البرامج وكلشي طبيعي يسولف ويضحك بـ الكروبات وحتى ماكلف نفسة يعتذر علمود الي سوا لو يجامل على الأقل!

وضاف سحر بـ كروب النشر ..
هو جان عنده كروب بس اني ويا ننشر بيها .. ومن طلعت هسة ضاف سحر

اجذب لو كلت ما انقهرت واحترك گلبي .. داخلي يغلي والتفكير اكلني ، اكيد هسة يتراسلون خاص ويكوللها عسولتي وبنيتي وام بيتي نفس ماجان يكولي!

رحت على كروب البنات .. اول كروب دخلت بي جانت بي زوزه ومرايم وثريا وسحر ..

سلمت على البنات وبقينا نحجي وهنّ البنات جانن مخبوصات بـ النتائج  .. شي ناجحة وشي مكملة بـ كم درس واني اسولف وياهن ..

بقت بس سحر ينتظرنها لان هي هم سادس .. اجت كتبت "بنات ادعولي انجح ترا ابوية ناوي يبطلني بس ارسب .. اختي جاي تطلع اسمي بعدني ابحث "

اني بقيت احجي وي البنات ومااهتميت الها .. شوي ودزت بصمة تبجي :- بنات طلعت بـ ٤ دروس أبوية الا يبطلني والله!!

كلهن بقن يلومن بيها وشنو كلنا مو كلنا عوفي سوالف الحب خلي يفيدج الحب هسة !

ماانكر حسيت رجعلي ولو شوي من حقي على حركة گلبي بـ ذاك اليوم!