آشــين الحُــب

البـارت الأخير

" آشين الحُب "
فاطمة أحمد

" البـارت الأخيــــــــــــــــــــــــــــــــــر "

" انتهت قصتنه ماچانت سعيده
وغيرك اخذ ڪلبي الما تريده
أذيتك ما گدرت احچيها لـ الناس
بـَسہ مجبور اسولفها بـ قصيدة
اصعب لحضه من تفارگ چفوف
الروحك بيده غيرك لازم ايده "

كاعدة على الكرسي .. جسمي يرجف و گلبي مايرضى يهدأ .. اطگطگ بـ أصابعي من التوتر والقلق مسيطر على كل خلية بـ جسمي ..

دخلوا أهل العريس .. باوعتلي اختة شذى اسمها ، والتفتت لـ اخواتها :- شنو أنتِ رايحة صالون وبدلة وشعر؟

باوعت الها مستغربة :- ايي؟

التفتت شذى على امي :- أنتم ما كلتوا عقد؟ كلتوا بس قراية فاتحة ؟

خولة ـ والله احنا ماندري شنو موصليلكم بس احنا اجانة عمي فرات وكال انتم  تريدون نسوي خطبة مستعجلين..

عوجت حلكها والتفتت تتهامس وي امها واخواتها ..
صاحولي على العقد .. رحت كعدت ورا الباب وبدوا يعقدون النا ..

رغم عقدنا بس لحد الان مااعرف عنه اي شي غير بس اسمة .. وهو " أيـاد "

خلصوا  العقد وقراية الفاتحة وطلعوا بدون حتى مااشوفة ولا حتى نلبس حلقات ..
كالوا لان وفاة الإمام العسكري  مانسوي خطوبة واجلوها على غير يوم ..

قبل لا يطلعون حددوا أنُ يوم الثلاثاء هو الحفلة ..

دخلت لـ الغرفة غسلت وبدلت ورحت تمددت ، احس جسمي متكسر من التعب ..

لفلفت نفسي بـ البطانية ..  ورجعت ذاكرتي لـ قبل أيام ..

جنت كاعدة بـ المطبخ اغسل مواعين واندك الباب .. راحت هدى تركض .. شوي ودخلت :- هذول نسوان بـ الباب

ـ امشي صيحي لـ ماما ..

رحت استقبلتهم .. دخلتهن للاستقبال ورحت اجيبلهم التقديم .. اجت امي وراي :- ترا هذول خطابة جايينج يعني مو خطار !

ـ شنو !! ليش هيج يجون بدون موعد ؟

ـ فرات جايبهم وكال لـ أبوج ، بس ابوج مامنطينا خبر .. المهم رتبي نفسج يالله تدخلين ..

سحبت نفس .. مليت من سوالف الخطوبة وكل يوم عارضيني على وحدة عبالك سلعة .. بس بـ نفس الوقت هي الوسيلة الوحيدة الي اكدر اتخلص بيها من عيشتي وي أهلي ..

.. مر يوم وبابا ردلهم خبر يجون الزلم حتى يتفقون .. وبقوا كل شوي يتصلون فَ انطاهم الموافقة .. وكالوا نريد خطبة بسرعة لأن خاف أحد يموت أو يصير شي ..

كعدت صافنة شنو هَـالسرعة؟ حياتي راح تنگلب فوك تحت واني على جهة مخليني وكأني ماعندي رأي ..
حتى ماحسيت بـ طعم فرحة!

اجة الولد شافني وتعارفنا جان اسمة "اياد" 
وبسرعة بسرعة صارت الخطوبة ..

سحبت نفس واني اتمدد أحاول اعوض هوسة الأيام الفاتت .. بس هوسة عقلي جانت أكبر ..