آشــين الحُــب

البـارت الثامن عشر

" آشين الحُب "
فاطمة أحمد

بعدما رحنا لـ أقارب أم يونس اسمها ام حسين .. انطتني كم شغلة وتحسنت هواي عليها .. الأحلام خفت وكمت أنام مرتاحةةة ماكمت اشوف أشياء ولا اي شي ..

صادف بـ هاي الفترة عرس عمتي حوراء .. وعيت على نفسي شكد فاتتني أيام ولا جنت احس بـ الوكت وهو يمر ..

كعدت الصبح بـ وجهي لـ الحمام .. سبحت بـ مي دافي  .. صار الحمام بخار .. نظفت جسمي وسويت عناية  .. جلفت جسمي جلف ..
لحدما خلصت طلعت واني المع لمع حسيت روحي خفيفة صرت ..

باوعت لـ الساعة بـ ٧ .. شوي ويكعدون أهلي .. لان بابا لازم يطلع للشغل ..
حطيت طاوة على النار وباوعت عدنا بس بيضتين وإذا اكلتهم مااخلص ..

طلعت طماطة .. كشرتها ترستها ملح وزيت وخليتها شوي تصير لاجعة ..
بـ هَـالاثناء شغلت الصوبة النفطية وحطيت الخبزة عليها حتى تگسب ..

كعدت ماما تباوعلي وتبتسم :- ها ولچ كاعدة من الصبح اليوم

ـ اي يمة شبعت نوم .. ولأن عرس عمة اليوم كلت اجهز نفسي ..

ـ اي عفية حتى تروحين لـ بيتهم تساعدين دنيا لان كوثر إحتمال تروح وي حوراء لـ الصالون ..

هزيت راسي وكعدت اكل .. وامي وكفت تحضر الريوك لـ أبوية .. كملت اكل وغسلت مواعيني ورحت لـ اخواتي كعدتهم واخواني ماقبلوا يكعدون ..

نظفت الغرف وسفطت الفراشات .. لحدما صارت ساعة قريب الـ ٩ ونص .. لبست فستان بسيط مال بيت ورحت لـ دنيا لكيتهم هوسة وهي دايخة ..

اقاربنا الي من بعيد جايين من البارحة بايتين وشي اجة الصبح وكل شوي واحد يريد ريوك والطباخ بـ الكراج يطبخ وهوسة وعازمين الدنيا كلها .. والخطار الي بـ الإستقبال والجاي والماي .. والكهرباء طافية ومشغلين الصوبة وريحة النفط تكتل بـ البيت ..

دخلت عليها واني متفاجاة :- صباح الخير!!

التفتت عليّ مستعجلة :- صباح النور .. هلا شهد .. تعالي عفية سوي جاي جديد على السريع عفية ..

نزعت صايتي ولزمت المطبخ اني وياها .. لحدما صار الظهر الناس كعدت تاكل واني وياها اكلنا لكمتين وكمنا ..

كفينا المطبخ وغسلنا الصالة على المطبخ ، والكراج الولد كالوا يغسلونة .. صعدت دنيا لـ غرفتها تحضر روحها ، راح تروح الزفة مابقى شي ..

واني غسلت وجهي واديّ ولفيت نفسي بـ الصاية.. اباوع الشباب كلها متجمهرة بـ الباب من كل عقلي اريد اطلع !!
خرب حظي اي والله ..

بعدني واكفة واجة بهاء يهز بـ ايدة ويأشرلي افوت للمطبخ .. بقيت متصنمة بـ مكاني

ـ شبيج هدهد محتاجة شي ..

ـ اريد اطلع عفية شلون هاي .. سويلي طريق!

ـ يمعودة الدنيا مگلوبة برة .. كوليلي شتردين اني اجيبلج ..