بما إنه الليلة دي مش باين لها نوم، وكالعادة مبعرفش أنام قبل أي امتحان عندي، تعالوا أحكي لكم حكاية غريبة عملت لي overthinking طوال الأسبوع.
في إحدى الكواكب في أرض عليها دول فيها مدن فيها شوارع فيها بيوت فيها شقق فيها أوض فيها طالب ثانوية عامة.
عارفة إنه نفسك اتقطع وأنت بتحاول تقرأها كلها مرة واحدة، وأحب أقولك إنك وأنت بتجري ورا الكلام دا عامل شبهي وأنا عاملة الحصة على سرعة 3x وبحاول ألقط أي حاجة من الكلام.
لكن في شيء استوقفني في الحصة وهو كلام الدكتور على مرض ناتج عن الـ Hyperthyroidism، وهو زيادة إفراز هرمون الثيروكسين من الغدة الدرقية ودا بيسبب تضخم في الرقبة وجحوظ في العين كأعراض ظاهرية.
لكن كل دا مشدنيش قد ما عرفت إنه أحد المصابين بيه هي أم كلثوم!
آه، مسألتوش نفسكم ليه أم كلثوم في أواخر أيامها خست بشكل ملحوظ وكانت بتلبس نظارة سوداء أغلب الوقت وكانت بتغطي رقبتها بشال؟
بالضبط! دا أحنا طلعنا دكاترة وبنعرف نشخص أهو.
كانت عينيها جاحظة ورقبتها منتفخة، والمرض دا بيخلي الشخص يحرق طاقة كتير وبالتالي مش بيخزن دهون ودا سبب نحافتها.
طبعًا أنت بتسألني ليه مناخدش أم كلثوم على أقرب مستشفى ونعالجها؟ هل هي محتاجة فلوس مثلًا نلملها في صندوق تحيا مصر؟
تؤ تؤ، متوقعتش السؤال دا منك، لإنك لو ركزت شوية هتعرف إنه الغدة دي في الرقبة، ولو قررنا نستأصل جزء من الغدة دا ممكن يؤثر بشكل أو بآخر على حبالها الصوتية، وكدا مش هنقدر نسمع كوكب الشرق التاني.
قدامك خيارين، يا تضحي بحبالها الصوتية ومتسمعش أم كلثوم ثاني، يا إما تخليها تتعايش مع المرض ومتشوفهاش تاني غير بالهولوجرام في باريس.
ودا إللي حصل فعلًا، هي معملتش أي تدخل جراحي، ولو حتى قررت تعمل، مكانش في طبيب هيجرؤ إنه يعمل العملية دي عشان ميدخلش الطبيب من أوسع أبوابه تحت مسمى الطبيب إللي حرمنا من صوت أم كلثوم.
موقفها من العملية خلاني آخذ أنا كمان موقف. ليه ممكن شخص ياخد الرِزك في موضوع حساس زي دا، ليه ممكن يفضل إنه يقصَّر أيام حياته في مقابل إنه بيعمل حاجة الناس بتحبها؟
أو خلينا نبص لها من منظور إيجابي شوية، مع إني أشك في كونه إيجابي، بس ليه روح التضحية المبالغ فيها دي؟ ولا هي مش تضحية وهو مجرد حب للشهرة والأضواء، لأنها بعد العملية أكيد مش هتقدر ترجع زي الأول.
هل يا ترى دا جشع منها ولا حب تملك؟ ولا تضحية وإيثار؟ ولا مجرد قلة وعي بأهمية العلاج؟
أنا شفت كتير ناس ترفض تعمل عملية فيها نسبة خطورة بسيطة بس هتأثر عليهم هم بس مش حد حواليهم، ودا شايفاه منطقي شوية، طبيعي الواحد يحاول يبعد الضرر عن نفسه، لكن إنه يفكر في حد غير نفسه عليها علامات استفهام.
ومفيش تعارض بيها وبين إنه الناس لما بتكبر بتحس إنه أيامها بقت قليلة بالفعل، وإنه أكوام شرايط الدواء إللي بياخدها أو العملية إللي هيعمل هي تحصيل حاصل، أو تعلق فاشل بحبال الحياة، فيقرر يوقف العلاج ويعيش أخر أيامه وهو بيعمل الحاجة إللي بيحبها.
بس يمكن الفرق الوحيد بين أي حد وأم كلثوم إنه أم كلثوم فنانة، والفنان هو إللي عنده الجرأة إنه يعمل حاجة زي كدا حتى لو التمن هو سعادته وسعادته إللي بيقدروا فنهم.
إللي بيخليك تعيش حياتك بالفن بتاعهم، وينسى يعيش حياته هو، أو ممكن يعرض حياته للخطر عشان يكمل الحياة الأطول بين صفحات التاريخ وأذهان الناس.
ممكن يعمل لك رسومات تفكرك بحاجة في حياتك وتربطها مواقف عشتها قبل كدا. ممكن يكتب لك رواية تفضل تعيش في تفاصيلها وتطبق مواقفها في حياتك، وينسى هو حياته إللي واهبها لك في تفاصيل عمله.
عشان هو في اللحظات دي قرر يوقف حياته شوية عشان يوريهالك بعدسات عينه إللي بيستقبلها عقلك مباشرةً.
وغالبًا لما بقرر أكتب عن حاجة محيراني أنا بوصل للجزء دا وبكون جاوبت على كل حاجة محيراني، لكن أنا لحد دلوقتي مش لاقية إجابة شافية لكل إللي بسأله دا.
هل لما الواحد يكون موهوب بيدخل سجن الفن وتبقى حياته وَقف للناس إللي عجبهم فنه؟
هل الفنان ملوش حرية الاختيار إنه يوقف وقت ما هو عايز من غير ما يلاقي هجوم كبير عليه وعلى أي حد ساعده في قراره دا؟
عشان خروج المجال مش زي طلوعه، فهو لما يطلع منه لازم تطلع معاه روحه؟
كل دي أسئلة مش لاقية لها إجابة، وأنا عارفة إنك أنت كمان مش عارف إجابة السؤال إللي هسأله دا:
أنت إيه رأيك في موقف أم كلثوم؟
أنت تقرأ
تدوينة
General Fictionدعنا نُبرم عقدًا لا شروطَ جزائيةً فيه؛ لأن إمكانية فسخه مُحالة. ستكون مستمعًا حسنًا يشاركني كل هذه التفاصيل المملة دون ملل. ومُضيك قِدمًا نحو أول فصل هي إمضاؤك بالموافقة على جميع شروطي. -تحديثٌ شِبهُ يَوميِّ، فصوله تكتب بعد منتصف الليل. رقم واحد في...
