تدوينة

يومياتي: عايزة ورق؟

بقالي كام يوم مسحولة في شوية إجراءات مملة، فكنت في مكان على البحر واتطلب مني أصور بطاقتي زي أي إجراء ملوش أي لازمة.

رحت محل كبير كدا وشكله حلو أوي، الحقيقة أنا رحت على الشكل رغم إنه كان في أماكن أقرب.

المحل مكانش فاضي والناس داخلين طالعين يشتروا من عنده، والمشكلة همَّ أطول مني وأنا يا دوب شايفة الراجل من رُخامة عالية أوي حاطينها، وبمد إيدي بصعوبة.

ودون مبالغة، لإني زيي زيكم مستغربة الصدفة الغريبة دي. لقيت تلات شباب دخلوا ورا بعض أخدوا مكاني بما إنهم أطول وباينين أكتر.

الغريب إنه طلب التلاتة كان عبارة عن سجائر وورقة، وفجأة لقيت نفسي بحاول أوجد علاقة بين النيكوتين والتركيز في المذاكرة، بس بعد تحريات دامت لفيمتو ثانية عرفت إن قصدهم هو ورق بفرة!

وبعد ما مشيوا بسرعة أنا كنت لسة بقول للراجل إني عايزة أصور ورقة لبطاقتي، فصوتي مكانش واصل فوق بوضوح، وهو سمع كلمة «ورقة» بس، فلقيته بيقولي عايزة ورق بفرة أنتِ كمان؟

أنا اتخضيت من السؤال، نهار أسود في إيه، أنا عايزة أصور البطاقة يا عمو وأروح بيتنا ممكن؟ حد يطلعني من فيلم جعلوني مجرمًا إللي اتحطيت فيه دا.

للي ما يعرفش، ورق البفرة دا ورق شفاف شوية بيتلف فيه الحشيش غالبًا، أو أي مخدر عايزين يدخنوه، بيعملوا بيه سجاير يدوية، وغالبًا بتكون حاجات مخدِّرة ومُجرَّمة مش مجرد تبغ عادي.

بس إللي مجنني أكتر إزاي هم بيتعاملوا عادي كدا، ولا كإنه بيبع له ورق أذكار الصباح.

هو صحيح مش هيبيع له الحشيش، المشكلة مش في الورقة نفسها، الفكرة في استعمالها، ما أكيد مش هيحط فيها رز ويعملها محشي، بس هل يعتبر دا اتجار غير مباشر بالمخدرات؟ مش عارفة.

بعدين من إمتى ورقة التصوير ال A4 ب٣ جنيه؟ ورقة البفرة أرخص منها إزاي؟ يعني أنا كشخص بيدرس مثلًا لما ألاقي سعر الورق بقى غالي أوي كدا، أروح أجيب ورق بقرة أحسن لي ولا لا؟
أنتو بتعملوا فينا إيه؟ الشعب جاب آخره خلاص.

المضحك في الموضوع إنه المحل كان حاطط علب غريبة كدا شكلها فخم، أنا فكرتها علب نسكافيه أو لاتيه من براند أجنبي والحاجات دي، وكنت عايزة أجيب منهم، وأنا طالعة أخدت بالي إنها علب سجائر أصلًا.🤡

I don't feel safe in Egypt.