دعنا نُبرم عقدًا لا شروطَ جزائيةً فيه؛ لأن إمكانية فسخه مُحالة.
ستكون مستمعًا حسنًا يشاركني كل هذه التفاصيل المملة دون ملل.
ومُضيك قِدمًا نحو أول فصل هي إمضاؤك بالموافقة على جميع شروطي.
-تحديثٌ شِبهُ يَوميِّ، فصوله تكتب بعد منتصف الليل.
رقم واحد في...
بينما أنا قاعدة في أمان الله محشورة في الفيزياء عشان عندي امتحان بكرة وقرفانة من نفسي، لقيت موبايلي بيرن للمرة التالتة في أقل من أربعة وعشرين ساعة، ودي ظاهرة غريبة جدًّا، ليه؟ أقولكم.
أغلب إللي يعرفوني عارفين إنه موبايلي على طول معمول ميوت، ومش باخد بالي من المكالمات إلا بعد ما بفتح الجهاز نفسه؛ فبيختصروا على نفسهم ويبعتوا على الواتساب.
والأرقام الغريبة إللي بتتصل الفترة دي هم مساعدين مستر الجيولوجيا عشان يسألوني للمرة العشرتلاف أنا سنتر ولا أونلاين.
فغالبًا يعني مش بستعمل الخط، ولما أرقام غريبة بترن مش برد في وقتها غير لما أشوف الميسد كول وأرن أنا، ودا إللي حصل من إمبارح لحد النهارده.
لكن لقيت إنه الرقم عمال بيتغير وواضح إنه في إصرار يعني، فقلت أرد يمكن حاجة مهمة.
فتحت الخط، وإذا بصمت رهيب، قلت ممكن الشبكة فاصلة عندي، بس الوضع استمر كتير وفي صوت آهات خفيفة كدا مكانتش واضحة، فرحت قفلت الخط وأنا أصلًا مخنوقة ومش طايقة نفسي.
لقيت الرقم بيتصل تاني، تجاهلته، فاتصل تاني، فتحت الخط وأنا بحاول أسمع إيه إللي بيتقال من وسط صوت الأنفاس دا، لحد ما سمعت صوت راجل بنبرة مش مضبوطة، آسفة يعني مُحن يمكن، وأنتو أكيد فاهمين قصدي، مش حابة أوضَّح.
قال: مش هتيجي بقى؟
أنا لحد اللحظة دي مكنتش مستوعبة الموضوع، وكنت في قمة عدم تركيزي، ومفكرة إني لخبطت في معاد الامتحان، وكدا اسمي متسجل عندهم غياب؛ فبصيت في تاريخ الموبايل طلع لأ ملخبطتش.
فقلت له: آجي فين مش فاهمة؟
راح قال: مش هتيجي زي كل يوم بقى؟
شوف يا أخي رغم كل ال vibes الغريبة ونبرته المايعة إللي لا توحي إلا بإللي فهمتوه، إلا إني فهمت بس من كلمة كل يوم دي إنه دا ملوش علاقة بالدروس؛ لإني معنديش دروس كل يوم.
وحقيقي أنا بعيب على نفسي قدرة استيعابي البطيئة في المواقف دي، إللي هو صباح الفل يا خلايا مخي، لو مش هنزعجك إحنا بنتعرض للتحرش لو مش حاسة.
المهم استوعبت أخيرًا إنه كمان صوته دا عشان كان بيعمل masturbating على الأغلب لإن دا مش صوت حد عادي.
الموقف أربكني جدًّا، و بس المرة دي الارتباك طلع معايا بعصبية وأنا شاكرة لنفسي جدًّا إني اتكلمت بنبرة حادة وعالية وقلت له بالضبط: بقولك إيه يا روح أمك، أنا مش فايقة لك، هي كلمة واحدة، لو مقفلتش الخط دلوقتي هبلغ عنك المباحث ويبقوا يعرفوك هم هاجي ولا لأ.
وأخيرًا قفل الخط وأنا كان نفسي أهزأه أكتر، بجد حاجة في قمة قلة الأدب والقذارة، ذنبي إيه أنا بجد إني أتعامل مع الأشكال المقرفة دي!
بس الجميل في الموضوع إن دي كانت واحدة من أجرأ الحاجات إللي قلتها، وفرحانة إني انتصرت الانتصار دا، عشان في أغلب المواقف دي أنا باخد الصدمة ومش بستوعب إيه إللي بيحصل، وبدي الموبايل لبابا وهو يتصرف، لكن المرة دي عرفت اتصرف.
أنا كنت مترددة جدًّا إني أحكي حاجة زي كدا، بس قلت لحد إمتى يعني هنفضل ساكتين عن التحرش بكل طرقه؟ ولحد إمتى هنفضل خايفين من المتحرش مع إنه هو المعتدي أساسًا وبس بنكتفي بالسكوت؟ وبالمناسبة دا تحرش لفظي، ودي جريمة فعلًا بيتعمل لها محاضر ولها عقوبات.
بس حقيقي أنا فخور بنفسي لإني اتعرضت لموقف شبه دا وأنا صغيرة جدًّا، والموضوع عمل لي تروما لفترة مش قليلة، وأنا محكتش عن تفاصيه لحد دلوقتي أبدًا، بس أنا قدرت أتخطاه بصعوبة رغم إني لسة فاكرة إزاي أنا كانت خايفة وقتها واتجدد لي الشعور النهارده، بس رد فعلي النهارده أكد لي إني فعلًا تخطيته ومبقتش أخاف زي الأول.
هو لو الموقف عدى على حد مننا بالسكوت هيخلي المتحرش يتمادى مع حد تاني، ويبقى الموضوع مش إننا سكتنا عن حقنا وبس، دا كمان إدينا له فرصة إنه يعتدي على حد تاني وإحنا موقفنهوش عند حده.
والجديد إنه عندنا واجب تطبيقي على الفصل دا عشان أشوف فهمتوه ولا لأ.
النهارده برضو معرفش في إيه، جاتلي الماسدج دي زي ما هي ظاهرة قدامكم في السكرين شوت، ومطلوب منكم أنتو تردوا عليها.
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
صاحبنا عايز يعرف إزاي يحتوي الست، ممكن تساعدوه؟ مع العلم إنه دا استدراج واضح لشات مش تمام.
بعدين إيه سيكولوجية الست دي؟ كلمة الست دي قتلتني ضحك معرفش ليه، بس مضحكتيش أكتر من كلمة خبيرة في نفسية الست.😂
