تدوينة

يومياتي: إيه ولا A

من بعد امتحان والواحد الفيزياء بيتصرف بشكل غريب وغبي جدًّا تقريبًا استهلكت كل قدراتي العقلية في الامتحان ومبقتش قادرة أستوعب حاجة.

النهارده يعتبر لسة عيد والناس أجازة، وأنا روحت الموقف عشان أركب وأروح لقيت الموقف فاضي ومفيهوش حد، وقفت شوية لحد ما لقيت مشروع جاي فركبت فيه ومستنياه يحمل.

المهم كدا جت شلة شباب ركبوا ورا وباين عليهم إنهم ثانوية عامة زيي، تسألوني عرفت إزاي؟ بيبان على الوش على فكرة.

المهم السواق بتاع المشروع أصلًا ابنه في ثانوية عامة ولولا إنه عنده امتحان مكانش نزل، يعني مكنتش هلاقي حاجة أروح بيها تقريبًا. 🤝

فهو بيسألنا أنتو علمي ولا أدبي؟ أصل ابني في أدبي وعايز يتطمن على التاريخ، فقولنا كلنا إننا علمي.
حاسة إني كنت راكبة أوتوبيس مدرسة.

المهم شوية شوية كنت رامية ودني معاهم بصراحة وبسمع تعليقاتهم على الامتحان، وإللي فهمته إنهم لغات زيي.

المهم كان في اتنين كدا بيراجعوا الإجابات وعمالين يهبدوا وأنا هموت وأقولهم إنه كلامهم غلط.

لحد بقى ما كانوا بيراجعوا سؤال، وبيعتبر هو أصعبهم وقعدت فيه لوحده ربع ساعة، وبيتخانقوا هل الإجابة b ولا c

بيني وبينكم خلاص مبقتش قادرة أستحمل، فروحت بحركة لا إرادية ومن تفكير لجزء من الثانية، لفيت وشي وقايلة بانفعال شوية:

إيه!

أقصد إنه الإجابة كانت حرف ال a.

فواحد منهم فكرني بقوله إيه بمعني إني مصدومة إن إجابتي مش b ولا c وقالي اهدي طيب دا سؤال بسيط.

قولتله لا أنا قصدي إنه الإجابة الصح هي a.

وأسكت؟ أكيد لا، دا أنا قعدت أشرح لهم ليه اخترنا الإجابة دي عشان السؤال فعلًا كان صعب وعايز تفكير، ولقيت واحد منهم قالي أيوة صح كلامك أنا عملتها كدا.

طب أنت عارف الإجابة أهو سايبهم يهبدوا ليه؟ ما تصحح لهم! هتشيولنا المادة وإحنا قاعدين!😭

أنا معرفش أصلًا إيه العك إللي عملته دا، ومكانش مفروض أتكلم معاهم، بس عارفين خلاص لما تكونوا جبتوا آخركم ومش قادرين؟

وبصراحة بقى هي لا إيه ولا a هي اااه بجد.