تدوينة

يومياتي: تتجوزيني؟

3/3/2023
تاريخ مميزة جدًّا والمميز أكتر إنه كان هيبقى يوم خطوبتي، بس يلا محصلش نصيب.

عارفين لما يبقى لسانك مش مريحك؟ وكل شوية تقول كلام أنت مش قده ويطلع شكلك أهبل؟
إيه مناسبة تأنيب الضمير دا؟ تعالوا أما أحكيلكم.

غالبًا الرجالة لما بتكبر في السن لحد معين كدا جاذبيتهم بتزيد، فكنت دايمًا أقول بهزار لصحابي يا سلام، لو يبقى عندي شوجر دادي غني ووسيم زي روايات الواتباد.

من شهر تقريبًا اتحطيت في موقف جديد عليَّ وخلَّاني مش مستوعبة لحد اللحظة إللي بتقرأ فيها كلامي دا، مصدومة من الموقف نفسه، ومصدومة من فكرة هو أحنا كبرنا أوي كدا إزاي؟ وأسئلة كتير بدور لها على إجابة.

Marriage proposal!

ومش أي عرض جواز، دا صدمتين تلاتة في صدمة واحدة.

أول صدمة إنه حد يعرض عليّ حاجة زي كدا أصلًا، يعني لسة سني صغير، مش طفلة، بس برضو لسة مش جاهزة لخطوة زي دي وأظن يعني واضح عليّ.

والصدمة التانية إنه مش مناسب بالمرة، ومش فاهمة إيه إللي يخليه يسيب كل الناس المناسبين له ويمسك فيَّ أنا.

شخص عنده 33 سنة، تقريبًا قد عمري مرتين! غالبًا كان هياخدني يربيني ويوديني المدرسة.

بيقول إنه عنده سلسة محلات كبيرة، وإنه صاحب بيزنس ومرتاح يعني، وقاعد يحكي عن إنجازاته وكإن فلوسه مثلًا هتغريني وتخليني أوافق خلاص.
مؤهل عشان يبقى زوج وأب بطريقة مش طبيعية بصراحة. :")

الصدمة التالتة إنه العرض دا  كان على الفيسبوك، ما شاء الله بجد ابن أصول أوي، داخل الفيسبوك من أكاونته.

مين؟ الفيسبوك إللي بنشير عليه ميمز دا الناس بتتجوز منه؟

قعدت ساعتين قدام الرسالة مش فاهمة بجد أعمل إيه، وقلقت جدًّا وتفكيري اتشل، وعمالة أفكر في عشرتلاف حاجة، في حين إنه كان حدد كل حاجة في العلاقة دي، بس كان لسة بيشوف حل لمشكلة إننا في محافظات مختلفة، وقال إني هعيش عندهم، ودا كان حل المشكلة الباقية في الحياة بالنسبة له بعد ثقب الأوزون.

على الهامش: الشخصيات إللي بتاخد العلاقة وتطلع بيها قدام بخططها من غير موافقتكم، ويحددوا كل حاجة مع نفسهم، اهربوا منهم بسرعة.

ممكن الشخص تكون نيته كويسة ومفكر إنه كدا بيأكد لك إنه جاهز لخطوة الجواز وجاد جدًّا وحماسه دفعه، بس للأسف دا مؤشر مش مبشر للغة الحوار بينكم مستقبلًا.

لازم التفاصيل تتشارك، وفي فرق بين حد عنده قرار وبيقترحه وقابل للنقاش والتعديل، وبين حد عنده قرار واخده مع نفسه وجاي يفرضه.

أوافق طيب؟ دا حتى محدد تاريخ الخطوبة وعايز رقم والدي والراجل جاد يعني، وإيه المشكلة أما تتجوز؟ عادي أهو حتى ممكن يبقى عندنا شريك دراسة أو ندهن مووف مع بعض لمفاصلنا.

أوافق إيه بس والهم إللي ورانا دا؟ مش هيكون عندي وقت لحياة المرتبطين دي، وأنا لو كنت قلت لبابا مستحيل كان يوافق، دا لو مقفليش أكاونت الفيس يبقى خير.

فقررت بعد تفكير طويل، إن أنا كدا كدا لازم أرفض، بس مش عارفة أجيبها له إزاي من غير قلة ذوق.

كل شوية أكتب كلام كتير وأمسحه، وعمالة أحاول ألاقي صياغة كلام كويسة بس مفيش حاجة نافعة.

رغم إنه قالي أنا عارف إنك هترفضي، بس قلت أجرب وأشوف.

بس مظنش إنه يعرف سني الحقيقي، أغلب الظن إنه شاف كومنت ليّ في جروب معين وأنا أكيد كنت بتفلسف كالعادة فيمكن عطاه انطباع إن سني كبير مثلًا، وأنا قلقت ومعرفتش أسأله عرفني منين.

بس إللي كان نفسي أعرف حقيقي، هو إزاي المخرجين بيطلعوا لنا مشاهد عروض الزواج دي بشكل لطيف وعاطفي وفراشات ودنيا بمبي؟

الموضوع مرعب، مرعب لدرجة تخليكٍ مش عارفة تنطقي، أنا بقالي شهر لسة خايفة ولسة فاكرة أنا كنت متنحة إزاي قدام الشاشة.

بس أخيرًا خلصت الموضوع بشوية كلام أكلشيه كدا، إللي هو أنا مش مستعدة لخطوة الجواز دي نهائي، وأنت أكيد حد كويس -معرفش إللي مخليني متأكدة-، وربنا يرزقك ببنت الحلال ومش عارف إيه، وخلص الحوار لكن تأثير الصدمة مخلصش.

بس إللي فكرت فيه، بعد عشرين تلاتين سنة، هكون بناوله دواء الضغط والسكر، وفي نفس أنا على ماسكات شد البشرة والقضاء على التجاعيد المبكرة بمكونات في البيت؟ ضحك والله.

هيكون هو بيتكل على الله وبيودع، وأنا هبقى أرملة يا عيني وأنا لسة في عز شبابي؟ دا ينفع برضو؟

يلا، خسارة بجد، كان زماني عملت حاجة مميزة في يوم مميز، هنعوض في 4/4/2024

وبس، متقولوش كلام أنتو مش قده حتى لو بينكم وبين صحابكم عشان هيبقى شكلكم وحش قدام نفسكم دا أولًا، وأخيرًا قدام إللي حواليكم.

آه ياني ضيعت الشوجر دادي :"(

ما علينا، وبالمناسبة دي، بما إن كل مرة أحاول إني أعمل فيها حاجة مميزة في التواريخ المميزة دي وبفشل، أحب أقولكم إنه الأيام المميزة بتكون مميزة عشان أنتم نجحتوا فيها، أو كنتم مبسوطين فيها، مش عشان شوية أرقام زي بعض، وأنتم إللي بتخلوا أرقام ملهاش أي معنى أو علاقة ببعض تبقى يوم ميتنسيش.✨