Unicode
🦋သက္ကရာဇ်တစ်ခု၏ညှို့ချက်များ🦋
အပိုင်း✨🍁(၆)
အလုပ်သင်များအတွက် မဲနှိုက်၍ လူအယောက် ၃၀ကို ၅ယောက်စီ တစ်ဖွဲ့ အဖွဲ့ခွဲပေးရာ လေးညှို့နှင့်စိုင်းပြည့်စုံတို့မှာ အဖွဲ့ကွဲသွားသည်။စုစုပေါင်း(၆)ဖွဲ့ဖြစ်သောကြောင့် ကြယ်ကြယ်၊သက်စုနှင်း၊မင်းသုတ၊မရွှန်း၊မင်းခန့်မောင်မောင်တို့က တစ်ဖွဲ့စီတာဝန်ယူလိုက်ရာ လေးညှို့စိမ်းပါဝင်သည့်အဖွဲ့ပဲ ခေါင်းဆောင်မရှိသေးတာဖြစ်သည်။
ကြယ်စင်နှင်း အဖွဲ့တွေကို သေချာတစ်ယောက်စီတာဝန်ပေးပြီးနောက် ရုံးခန်းထဲကနေထွက်မလာသေးသည့် Bossကို စောင့်နေလိုက်သည်။ပုံမှန်တိုင်းလည်း အလုပ်သင်များလေ့ကျင့်ပေးရာတွင် Bossရှိနေတတ်သော်လည်း သီးသန့်အဖွဲ့ကိုဦးဆောင်လေ့မရှိ။အကုန်လုံး၏လိုအပ်ချက်များကိုသာစီစဉ်ညွှန်ကြားပေးလျှက်ရှိသည်။ယခုမူ သီးသန့်အဖွဲ့တစ်ဖွဲ့ကိုဦးဆောင်မည်ဟူ၍ ပြောလာသောကြောင့် ဟိုမျက်ဝန်းစိမ်းနှင့်ကောင်လေးပါသည့်အဖွဲ့ကို Boss ဦးဆောင်မှုအောက်ရှိစေလိုက်သည်။အင်ဝာာဗျူးတုန်းက ကြုံတွေ့ခဲ့ရသည့် အခြေအနေမျိုးနှင့်ဆိုလျှင် Bossလက်အောက်ထားတာကပိုသင့်တော်သည်။မဟုတ်ပါက သူတစ်ခွန်းပြောလိုက်တိုင်း သူမတို့စွန့်အနေရသည်နှင့်ရှေ့ရောက်တော့မည်မဟုတ်ပေ။
စိုင်းပြည့်စုံ လေးညှို့နှင့်အဖွဲ့ကွဲသွား၍ မျက်နှာကိုစိတ်မကောင်းဖြစ်သည့်ပုံဖမ်း၍ လေးညှို့ပုခုံးကိုလက်နှင့်ပုတ်လိုက်ရင်း အနားနားကပ်ကာ...
“လေးညှို့...သူငယ်ချင်း...ညီလေး...အခုတော့ မင်းနဲ့ငါခွဲရပြီပေါ့...ငါနဲ့ဝေးဝေးမှာ မင်း လိမ်လိမ်မာမာနေနော်...အဖွဲ့သားတွေနဲ့တည့်အောင်ပေါင်းနော်...ငါမပါဘဲ မင်းတစ်ယောက်ထဲရပ်တည်ရမယ့် အပြင်ဘက်ကမ္ဘာမှာ သောက်ကျိုးမပြေတာတွေကသိပ်များတော့သည်းခံရမယ်နော်...တစ်ခုခုဆို ဟောဒီကအကိုကြီးကိုဖုန်းဆက်လိုက်နော်... ရောက်ရာအရပ်ကနေ truckကားကြီးမောင်းပြီး ဂျိန်းစဘွန်းလိုရောက်လာပေးမယ်...”
လေးညှို့သူ့ရင်ဘတ်သူပုတ်လိုက် ပုခုံးကိုလာပုတ်လိုက်နှင့် မှာတမ်းချွေနေသောစိုင်းပြည့်စုံကိုစကားတွေအများကြီးနှင့်တုံ့ပြန်မနေတော့ဘဲ စိတ်မရှည်စွာ လက်ခလယ်ထောင်ပြလိုက်သည်။ယခုမှ မိခင်ကြက်မကြီးရင်အုပ်အောက်က ထွက်လာသည့်ကြက်ပေါက်စလေးများလိုသူ့အားမှာကြားနေသည့် ကြက်မေမေလက်သစ်စိုင်းပြည့်စုံကိုကြည့်ပြီး လေးညှို့ ရယ်ချင်သွားရသည်။
သူ၏ပုံစံဘယ်လိုပဲနေနေ၊ဘယ်လိုပဲဆက်ဆံခံရခံရ စိတ်ထဲတစ်စက်လေးမှမထားသည့်အပြင် ငယ်ငယ်ကတည်းက သူ့အနားအကောင်းဆုံး မိသားစုတစ်ယောက်လိုရှိနေပေးခဲ့သူဖြစ်သောကြောင့် စကားတွေအများကြီးနှင့်ထုတ်မပြောတတ်ပေမယ့် ငစိုင်းက သူ့အတွက် တန်ဖိုးထားရသည့် လူတစ်ယောက်ပဲဖြစ်သည်။
