A Poem Titled Us [ Completed ]

03 : blue jeans

But our situations, it stopped our relations. Why did we end it?

•••••

နွေဦးရနံ့တို့ လေမှာတလွင့်လွင့်ဖြင့်။ သိသိသာသာပူနွေးလာသောရာသီဥတုကြောင့် ပင်လယ်ကမ်းခြေမြို့လေးသည် ပို၍ဆူညံလာသလိုပင်ထင်ရသည်။

နီညိုရောင်အထက်တန်းကျောင်းဆောင်ကြီးမှာ ညံ့သက်ဝါလွင်သောနေရောင်ခြည်အောက်တွင် ပို၍အသက်ဝင်လှပနေသကဲ့သို့ပင်။ ကျောင်းဝင်းကြီးအတွင်းရှိ ပင်ပျိုပင်အိုတို့တွင် ဥဩငှက်တို့ တေးသီဆိုနေကြလေပြီ။

ဆောင်း၏အရသာကို သဘောကျသော ကျောင်းသားများက နွေပေါက်လာတော့မည့် နွေဦးအချိန်ကို စိတ်ပျက်ကြ၏။ တစ်ချို့ကျောင်းသူများကမူ အနွေးထည်အထူကြီးများဝတ်ရသည်အား ငြီးငွေ့လှပြီဖြစ်ကာ စကပ်တိုတို၊ အင်္ကျီလက်တိုနှင့် အပီအပြင်လန်းလို့ရသည့် နွေဦးနှင့်နွေရာသီကို နှစ်ခြိုက်ကြသည်။

နွေဦးပဲဖြစ်ဖြစ် ၊ နွေရာသီပဲဖြစ်ဖြစ် ဂျောင်ဂုကတော့ ရေခဲမုန့်စားရသည်ကို သဘောကျသည်။ ဆောင်းဦးပဲဖြစ်ပါစေ ၊ ဆောင်းရာသီပဲရောက်ပါစေ ကော်ဖီပူပူသောက်ရသည်ကို နှစ်သက်သည်။ သို့ဖြစ်၍ ‌လေးရာသီတွင် သူမုန်းသည့် ရာသီဆိုသည်မှာမရှိပေ။

နွေဦးက နွေးထွေးသည့်အားအင်ကိုပေးသည်။ နွေရာသီက လန်းဆန်းတက်ကြွမှုကိုပေးသည်။ ဆောင်းဦးကမူ ဆိတ်ငြိမ်အေးချမ်းမှုကို ဖော်ဆောင်သည်။ ဆောင်းရာသီသည် ငြိမ်း‌ချမ်းသောအစပျိုးခြင်းနှင့် မိတ်ဆက်ပေးသည်။

တစ်ခါတစ်ရံ တိမ်စိုင်များအလိုကျ ရွာသွန်းတတ်သည့် မိုးပြေးတို့က ထိုရာသီလေးပါးစလုံးတွင် ဂျောင်ဂုအနှစ်သက်ဆုံးပင်ဖြစ်ပါသည်။

ဘဝကြီးက နေတတ်ထိုင်တတ်လျှင် ပျော်စရာသိပ်ကောင်းသည်။ တစ်နည်းဆိုရလျှင် ကိုယ့်အနီးအနားတွင်ရှိသော မှိန်ပြပုန်းလျှိုနေသည့် အလှအပများကို ခံစားတတ်လာလျှင် ပို၍ပျော်စရာကောင်းသည်။

ဘယ်အရာက ဆိုးသည်၊ကောင်းသည် ဆိုသည်မှာ ကိုယ်ကိုယ်တိုင်မြင်သည့်အမြင်တွင်သာ မူတည်ပါသည်။

ဗနီလာရေခဲမုန့်၏ အေးစိမ့်နူးညံ့သောအရသာသည် ဂျောင်ဂုကို မစားရမနေနိုင်အောင်ပြုလုပ်နေသည်။ ဘေးတွင် ငြိမ်ငြိမ်လေးပါလာသည့် ထယ်ဟျောင်းကိုပင် သတိထားမိရဲ့လားမပြောတတ်ပေ။ ထိုရေခဲမုန့်ဝယ်ကျွေးသူမှာ ထယ်ဟျောင်းဖြစ်ကြောင်းကိုလည်း မေ့ထားဟန်တူသည်။