A Poem Titled Us [ Completed ]

07 : when we were young

Everything just takes me back
To when you were there

•••••

ငယ်ရွယ်စဉ် အိပ်မက်တွေက စိတ်ကူးယဉ်ဆန်သည်။ ထိုစိတ်ကူးယဉ်မှုများကြားမှ ငယ်ရွယ်စဉ် ချစ်ခြင်းတရားသည် စစ်မှန်သော စိတ်ကူးယဉ်မှုအမျိုးအစားဖြစ်ခဲ့သည်။

ဂျောင်ဂုသည် အသက်အရွယ်ငယ်နု‌သေးသောအရွယ်၌ ကမ္ဘာကြီးကို နတ်သမီးပုံပြင်ထဲက ခမ်းခမ်းနားနား ရဲတိုက်ကြီးတစ်ခုဟု ထင်မှတ်ခဲ့ဖူး၏။ သူသည် ရဲတိုက်ကြီး၏ ငါးထပ်မြောက်တွင် နေထိုင်သော လှပယဉ်ကျေးသည့် မင်းသားလေးဖြစ်ပြီး သူ့တွင် အလွန်စည်းကမ်းတင်းကျပ်သည့် မိခင်ရှိသည်။

ရဲတိုက်ကြီးတွင်နေထိုင်သော မင်းသားလေး လွတ်လပ်ဖို့အတွက် ကယ်တင်ရှင်မင်းသားလေးတစ်ပါးလည်း ရှိပါသေးသည်။ ထိုမင်းသားလေးသည်ကား အလွန်ချောမောခန့်ငြားသည့် ထယ်ဟျောင်းပင်ဖြစ်လိမ့်မည်။

ဂျောင်ဂုငယ်စဉ်က ဂျောင်ဂု၏အမေသည် အရာရာတွင် ဂျောင်ဂုကို လိုလေးသေးမရှိထားသော်လည်း စာမေးပွဲအဆင့်နှင့်ပတ်သက်လာလျှင် အလွန်ဆတ်ဆတ်ထိမခံသည့် မိဘအမျိုးအစားများထဲတွင် ပါဝင်ပါသည်။

ဂျောင်ဂုသည်လည်း စာတော်သည့်ကလေးဖြစ်ပြီး ထိုလပတ်စာမေးပွဲတစ်ခုတွင်တော့ သင်္ချာတွင် အမှတ်အနည်းငယ်လျော့သွားမှုဖြင့် အဆင့်ကျသွားခဲ့သည်။ အဆင့်ကျသွားခြင်းဆိုသည်မှာလည်း တစ်ကျောင်းလုံး အဆင့်တစ်မှ အဆင့်နှစ်သို့ ကျသွားခြင်းဖြစ်၏။

ဂျောင်ဂုသည် စစ်သည့်စာမေးပွဲတိုင်း အဆင့်တစ်ရသည်အထိ စာတော်ပါသည်။ ထိုသို့ကလေးက အဆင့်ကျသွားသည့်အတွက် ဂျောင်ဂု၏အမေသည် သားသမီးအပေါ်ထားရှိသော မိခင်၏လောဘဖြင့် ဂျောင်ဂုကို ဒီရက်ပိုင်းအတွင်း အလွန်စည်းကမ်းတင်းကျပ်ထားလေသည်။

မိဘများ၏ ရှေးဟောင်းနည်းလမ်းများဖြစ်သော မုန့်ဖိုးလျှော့ခြင်း ၊ ဂိမ်းစက်သိမ်းခြင်း စသည်တို့ပင်ဖြစ်ကာ ဂျောင်ဂုအနေဖြင့် ဂိမ်းစက်သိမ်းတာကို သိပ်အလေးမထားသော်လည်း မုန့်ဖိုးလျှော့တာကိုတော့ တကယ်စိတ်ဆိုးမိသည်။