الدينيرو

6

عم الصمت في المكتب , صهيب تيشوف بتأمل وتركيز كبير في سيڤي ديالها و تيعض شفايفو بتأني كأنه تيفكر بعمق ، و تيلعب بستيلو في إديه ..

في المقابل ، جالسة حادرة راسها تتسنى منه يكسر هاد الصمت لي وترها ، في لحظة هزاات عينيها تتفحص فيه .. رجل في عقده الرابع وسيم ، شعره فيه بعض الخصلات بيضين ، تيبان عليه الوقار.. بلاما تحس بفكرة مهبولة هبطات عينيها لإديه تتقلب على الخاتم

صهيب ( حط الستيلو تيشوف فيها و أخيرا نطق و فيقها من سهوتها ) :آش غادي نقوول ليك !! (تكا على الكرسي و تنهد ) الصراحة ما عندكش دي كومبيتونص بخوفيسيونيل (كفاءات مهنية) ، تنتأسف بزااف على خبرتك في الطب لي هنا ما غادي تفيدك في والو .. ولكن عجبتيني مني ما ستسلمتيش و عندك الرغبة تبدااااي من الزيرو (دفع سيڤي من قدامه تيشوف فيه ) هادشي لي كاين هنا غادي نساوه (حركات راسها بمعنى نعم ) هادي نقطة !! و النقطة الثانية ، أنا غادي نحطك عند ناس غادي يفورميوك على البوسط لي عندنا فيه حاليا خصاص وإيلا لقيتك في نيڤو لي طالبين نحطك مباشرة تخدمي معانا بعقد مؤقت حتى تبيني خدمتك و يكون خير وهادشي غير بليزير مني و على وجه سي العماري ، هذاك السيد ديالنا و عطا بزااف للأوطيل، أول مرة يطلب منا شي حاجة ، غادي غير نغامرو معاه .. المهم أنا غير بغيت نحطك في الصورة .. أما نوغمالمون غايخصك ديبلوم ولا على الأقل شي درجة جامعية في إدارة الاعمال

أماني (بإبتسامة) : الله يبارك فيك، سا مو فوغا بليزير نسطاجي عندكم ، و ميغسي بوكو على ثقتكم فيا ، ان شاء الله غادي نعجبكم ونكون عند حسن ظنكم ..

صهيب (بادلها الإبتسامة) : نبغي تخدمي على راسك بهادشي لي غادي نعطيوك هنا في الاوطيل و حتى فاش تمشي للدار تنزلي على الغوشيش و تعمري راسك لو ماكسيموم بوسيبل(إلى أقصى حد ممكن) ، ربعة وعشرين ساعة على ربعة وعشرين ، ما تسنايش منا نعطيوك كلشي ، كملي راسك و الورقة و ستيلو ديما في اديك ..

خرجو من المكتب دخلو قاعة فيها مكتب لاسق حدا مكتب فوقهم حواسيب كلشي غارق في الشاشة لي أمامه و كاين لي تيجاوب عبر الاتصالات .. جمع جميع الموظفين لي تما و عرفهم على أماني كسطاجير جديدة معاهم وطلب من مدير الحسابات يمشي معاه البيرو وأماني صيفطها تاخد بادج ديال سطاجير تبقا تدخل بيه و معاه حتى التوقيت وحتى الغد عاد تبدا معاهم إن شاء الله ..

"بعد مرور شهرين"

لابسة نظارات وقائية ضد الأشعة و حادرة راسها في الحاسوب تتسجل جميع العمليات المالية لي تتم في الفندق و في نفس الوقت تتجاوب في الفيكس على الشركات المتعاقدة مع الفندق في حالة تأخير الدفع أو مشكل في الدفع .. تركيزها كامل مع هاديك الشاشة لي أمامها ، حتى كيقاطعها صوت ما يخفاش عليها و لفات تسمعه هاد المدة كاملة لي دوزات معاهم ..

صهيب : لالة أماني .. تعلمتي تخدمي في الفيدليو (برنامج الحسابات)

أماني (هزات عينيها بابتسامة) : بونجوغ موسيوه صهيب .. صافا راني غادة ..