الدينيرو

26

الدينيرو الجزء 19

رواية الدينيرو dinero
كانت راشقة ليه و غيراتو ، لعبات ليه على الوتر الحساس .. دار القب في راسو و هبط مباشرة عند الرعدة حيد بانطوفتو و تخشى حداه في سريره ، حتى داتو عينيه و فيقو ..

ذمام (تيحل عينيه بتثاقل ) : يااك لباااس ؟

همام (مهبط القب على عينيه و تيجر الغطى تيستعد للنوم ) : موحشك بزااف ، باغي نعس حدااااك ..

ذمام (دار على جنبه تيشوف خياله في الظلام و تيضحك ) : هههه مرتك آ خويا شوية هااارب ليها ..

همام (بهدوء) : مالها ؟

ذمام (تيحاول يهدن الوقت بيناتهم و شاد ضحكته ) : شحال فرعات ليا راسي ، گالت مشيتي ما عيطتي ما سولتي فيها ، واش مريضة واش واكلة واش خاصها شي حاجة ..

همام (غفى و تيهضر ) : زييييد !!

دمام (تيضحك) : غير شافت خبارك و فين كنتو و لي مات معاكم ، بدات تبكي لينا ، راجلي و عمارت داري مشا يمووت (تيكحب بالضحك و شاد في صدرو تيوجعو ) فضحاتنا بيك

همام (تيتنهد محتاج يسمع عليها بزاف ) : زيييد

ذمام حاول ينوض من بلاصته و حل المجر لي حداه و عطاه طابليت ديالو فيه الفيديو ديالها ، همام شدها من عنده ، تيشوف في أماني لابسة سيرفيطتها و جامعة شعرها و جامعة رجالو وسط الحديقة و تتهضر بجدية

أماني : أي إنسان تخلق في الدنيا تيغلط ، و أنا تنعتارف بغلطي ، غلطت في الهضرة لي قلت في همام قدامكم ، كنت معصبة و حاقدة على الوضع بدون سبب ما شعرتش براسي ، فمي جبدكم حتى نتوما ، تنتمنى تسمحو ليا و تنسحب هضرتي لي قلت فيكم و في خوكم همام ..

مريم (الوحيدة لي جوبات بين الملثمين ) : ماشي كلشي سمع هضرتك و مرت خونا حتى هي ختنا و السماحة و شكرا ما بيناتناش ..

أماني (حدرات راسها خاشية اديها في جيوبها ) : لحظة غضب و دازت (تنهدت و هزات فيها عينوهم ) كل واحد يشوف خدمتو و الموضوع يتسد هنا ..

أماني عيات تتقلب في مكانها ، روحها ما مرتاحاش ما قدرش النوم يزورها و هي مية فكرة وفكرة كاضور في راسها ، ناضت من مكانها و دخلات للدريسنغ لبسات كلون رياضي و ديباغدوغ ديالو لاسقين فيه صدريات رياضيين .. جمعات شعرها ديل حصان و لبسات سبرديلتها و هبطات في الدروج تتجري، المكان لي حطات فيه رجليها تيشعل الضوء ، غير قربات للصالون لمحات پانطوفتو محطوطة تنهدت و دازت من حداهم بلاما تشوف جيهتهم و مشات ..

همام (رد ليه الطابليت و جمع الوقفة و نطق بتساؤل ) : فين غادة هادي !؟

ذمام (رجع طابليت ) : تتمشي تريني مع أمجد ، هاد الشهر كامل فينما كان تيهبط كانت تتهبط معااه ..

همام (تيلبس في رجليه ) : زييييد

ذمام (تيدور عينيه) : واحد نهار عطبها في اديها ، لواها ليها و لا ما نعرف ، سيمانة و هي حازماها ..