الدينيرو

8

عزام (تنهد): أنت تعرف ، أنا بعدا ما نشوفهاااش ..

الحاج تيشوف في أماني عاد لاحظ وجودها و غمزه بمعنى شكون هادي

عزام : عطيني عقلك آ الحاج و سمع هادشي لي غنقوول .. هادي أماني ..

أماني غير سمعات سميتها و جلسات قدمات ليه التحية براسها غير من بلاصتها و حتى هو بادلها ليها بابتسامة عريضة و نطق ..

الحاج (بتساؤل) : كيس كيليا ؟ (شنو كاين )

عزام شرع مباشرة في الشرح ، تيزرب في هضرته و على أعصابه .. باه ما قدرش يستوعب الموضوع بداه ليه من الوسط و هو يوقفه ..

الحاج : سطوب سطووووب سطووب .. جو كومخون با سو كو تي دي !! (ما فهمتش شنو تتقول)

عزام (بلا خاطر تنهد) : الا ما فهمتيش دبا ، نعطيك لو ماكسيموم خمسة السنين هاد الاوطيل يدير فاييت.. (بعصبية) حل معايا دماغك

أماني (وقفات و توجهات لعندهم تتهضر مع عزام ) : إلا بغيتي ، نقدر أنا نشرح ليه !؟

عزام (شاف فيه ) : التخطيط المالي و الحسابات و الأرقام ما يفهمهمش بالعربية ..

أماني (جلسات في الكرسي مقابلة معاه) : غير رتاح أنا نتكلف ..

بدات تتشرح ليه دقة دقة و باللغة الفرنسية ، عزام تيتمعن فيها ، فيها شي حاجة تتخليه منجاذب ليها ..

ما قدراتش توقف ، هزات غير وراق وستيلوات ملونين، تتفهم فيه و تتكتب و تدير في الاطارات ، طلبات من عزام يدور ليها الايكخون ديال بيسي بيرو، تتوريه بالخاطر و تتجاوبه بمنطق ، مدة لا بأس بيها و هي مسايراه حتى سالات ..

الحاج غير شاد على فمه مزال مصدوم

أماني (شافت في عزام ) : كأس الماء عفاك ، حلقي نشف .. (شدات بلاصة الجرحة) راسي وجعني بغيت نمشي نرتاح ..

عزام (مد ليها قرعة الماء ما مستعملاش و هضر باهتمام ) : يوصلك الشيفور؟

أماني (تتشوف في حوايجها مقطعين ) : يكوون احسن ..

خرجات مع الباب من بعد ما استئدنات و غادرت بهدوء ، ما عارفاش هادشي لي وقع ليوم فين غادي يوصلها ..

يوم بعد يوم ، صدمة ورى صدمة حتى ولى عزّام مفاتن مع الخدمة ، رجع تيحقق في جميع خدمات الفندق بأدق تفاصيلها .. تيهبط برجليه والطابليت في إديه لكل قسم من أقسام الفندق و تيسجل في التقارير .. هبط لقسم الغرف والمبيت ، حتى تيتفاجئ كذلك بأن مستلزمات الغرف تتخلص بأكثر من سعرها بأضعاااف ، دائما التقارير فيه خدمة صيانة الغرف وخ ما يكون حتى شي عطب و و و ... في كل قسم تيلقاها مرونة ، حتى من قسم الغسيل والكي ما فلتش من عملية النهب .. خاطيك عن الأقسام الأخرى بحال السبى(spa) ، الحسابات ، الأمن ، المبيعات ، الأطعمة و المشروبات و و و و .. تلف ما عرفش منين نزل عليه هادشي وما لقاااش ليه الحل .. ما عرف فيمن يشك وما عرف منين يبدا .. القصر الأسطوري بكل بساطة تيعيش أكبر اختلاس واحتيال مالي .. رجع المكتب دياله حاط سلاحه و مستسلم ، هاد المرة تلاشات كل أماله فأنه يلقى شي خطة يكافح بها هاد الإختلاسات ..