على الساعة ٨ ونص .. في بيت اليد سعيد
دخلت بيت يدها وهيه بكامل كشختها .. رغم صعوبة الخبر اللي تلقته اليوم الا انها أصرت ما تبين انه فيه شي في داخلها لانه هذا اللي اساسًا لازم يصير لو تبغي تسوي اللي فرسها ؟!
بعد ما سلمت ع الحريم والبنات يلست في وسطهن جان تحتشر هنيه اليدة شمسة
اليدة شمسة: الظبي وينها ؟؟؟ لا تقولون لي طالعه بعد
ظبية: والله يدوه مادريبها وين .. بس لا هيه ولا مانع ولا حتى يانع موجودين الله يعلم وين سايرين
اليدة شمسة طالعت ام مطر: وين عيالج يا مريم ؟؟؟
ام مطر استغربت: والله مادري امايه شمسة
اليدة شمسة توسعت عيونها: كيف ماتعرفين وين عيالج !
ام مطر زاغت: الحينه بدق لهم صبري فديتج
توهقت ام مطر وتمت ادق ع مانع ويانع والظبي وياهم بس كله خارج الخدمة
ام مطر زاغت ليش ولا واحد فيهم رد عليها .. سوت عمرها عاديه وسارت دشت المطبخ ودقت لظبية عشان اتيها هناك ، ثواني الا وظبية سايرة عند أمها مستغربة
ظبية:هلا امايه شفيج؟
ام مطر بخوف: ظبوي صدق خوانج واختج وين!!! ولا واحد فيهم يرد عليه
ظبية: يمكن ما يبون يردون عليج ..
ام مطر شهقت: اياا الهرووم شو ما يبغون يردون عليه !
ظبية ضحكت: لحظة لحظة انا بدق الهم
ودقت هنيه ظبية عليهم بس نفس الشي
ظبية بدت تخاف: امايه ما شفتي مطر يمكن يعرف هم وين ؟
ام مطر ضربت يبهتها: هيه والله مطوور ! اصبري خليني ادق له
ودقت هنيه ام مطر ع مطر بس مطر مارد عليها وردت عليها شموس بنتها الصغيرة
شموس وهيه تدلع دلع البنوتات الصغار: الووووه
ام مطر استغربت:شموووس ! شو تسوين ماخذه فون مطور اخوج
شموس: فووني مسكور قلتلكم وودوه المحل محد سوالي سالفه ، جان مطور يعطيني فونه عشان اشوف مسلسلي
ام مطر: هييي يهااا يهال اخر زمن يتابعون مسلسلات بعد .. اقووول ردي ردي الفون بسرعة لمطر ضروري
شموس انقهرت:انزيييين
سارت شموس ودت الفون لاخوها مطر اللي كان يالس في ميلس الريايل
دخلت عليهم بدفاشة وركضت صوبه
شموس وهيه مبوزة:اندووك
مطر استغرب: انا قلتلج لا ترديين ع حد
شموس عصبت:مكتوووب الغالية يعنيي منوه بتكون حرمتكك مثلًا!
مطر مط اذنها وشل الفون عنها:لسااانج هذا يباله قص عنبوووه
شموس زاغت:هدنننننننني ايييه
بو مطر:مطرر هد البنيه
مطر هد اخته ورمس امه: الوه مرحبا اميه
ام مطر:انته جيييه عطيت البنيه فونك الحينه بتخربه لك مثل ماخربت فونها
مطر:كسرت خاطريه تبا تشوف مسلسلها ما هانت عليه عاد يسد طول الأسبوع تدرس حليلها
ام مطر: لا تبزييها انته بعد هيه يايه بيت يدها يعني تيلس مع أهلها مش تيلس تشوف لي مسلسلات
مطر كتم ضحكته: امريي انزين امايه ؟
ام مطر رد الخوف لنبرتها: فدييت روحك ماشفت التؤام خوانك ؟؟؟
مطر استغرب: لا امايه ما شفت لا مانع ولا يانع! ليش؟
ام مطر ماتت من الخوف: واااي عياللي اكيد استوابهم شي ولا واحد فيهم يرد ومبايلاتهم مسكرة !!!
مطر حاول يمسك اعصابه: استهدي بالله امايه تلاقينهم رايحين البر ولاشي وماشي ارسال عندهم !
شموس أدخلت: انتو عن منوه ترمسون؟؟
مطر تجاهلها: امايه ماعليج انا برمس ربعهم يمكن هم معاهم
شموس: ايييييه .. اذا تطرون منوع وينوع تراهم سافروو الفير وشلو الظبي وياهم
مطر توسعت عيونه: نعم!! وين سافرو وليش مارمسو!!
شموس وهيه سايره:مادررري بس انا سمعتهم يخططون الفير يوم كنت سايرة اسرق جرج من حجرة مانع
مطر عقد حياته ورد رمس امه: ماعليه امايه مردنا بنعرف وين مسترغديين
ام مطر: دخيلك طمني والله اني احاتيهم هالرغود
مطر: ان شاء الله امييه
شموس طالعت مطر وسوت له حركة بمعنى *هات*
مطر طالعها باستغراب: شوو؟
شموس عقدت حياتها: شو شوه ! سكر وعطني الفون بكمل الحلقة
مطر تنهد: لا حول ولا قوة الا بالله ... اقوول سيري سيري والله وايد عطيتج ويه
شموس توسعت عيونها: هببب ع كييفك !
وسحبت الفون بعنف منه وشردت وهو استسلم في هاللحظة لانه ابدًا ما يبا يضارب وياها وصدق يالس يفكر في اخوانه وسفرتهم ... رجوع مانع لحياتهم الطبيعية مخلي حركات يانع والظبي تصير مش طبيعية وهالشي هو ما يحبه بس مايقدر يرمس لانه مانع ما يسكت هب شرات يانع اللي كان يسكت ويحترم قوانينه اللي يفرضهن عليهم بحكم انه هو اكبر واحد فيهم
بعد ما سحبت عنه الفون سارت شموس عند الحريم مرة ثانية جان تشوفها عليا زاخه فون مطر وعرفته من الكفر
عليا بفضول: شمووس عطيني فون مطوور
شموس بصوت عالي تحرطمت: استغفرالله العظيم انا اليوم ما بشووف الحلقة يعني شووه !
عليا انصدمت: يالله انتوو شووه ... عايلة اخويه عبدالله كلكم لسانكم متبري منكم !
ام مطر بصوت عالي: شمووس عطي الفون حق علايه هب فونج تراه
شموس عطت عليا الفون وهيه مغتاضة بس ماتقدر تقول لا لامها بعد
عليا استانست قبضت الفون وعاده علطول دشت السناب جان تنصدم
عليا في خاطرها: وال ! ويقول منوه هاي وماعرفها وما شاء الله عليه مسوي ستريك وياها ولا بعد اسمها اول اسم ! خذت مكانيي
من زود فضولها دخلت المحادثة وشافتهم وايد مسولفين ... بس سوالفهم مش سوالف حبايب لا اغلبها ضرابه وفجاءة تلاقيهم يتناقشون بموضوع ويردون يضاربون وبعدين تهدا الأوضاع وعلى هالمنوال
