على الساعة ست ونص الصبح ... رن المنبه وعاده هيه ماصدقت ، لازم تنش هالوقت بالتحديد عشان تسير تاكل وتخزن اكل لبعدين لانه تعرف خلاف بتتلوم تاكل جدام خوانها ولا غيرهم حتى لو عندها عذر انها تفطر بسببته ، فماشي غير انها تنش قبلهم كلهم خاصة انهم تمو للفير عشان يتسحرون وراقدين الحينه اكيد محد واعي غيرها
ظهرت لها من الفريزر كيكة الايسكريم وكان شي واييد اكل زايد من البوفيه مال امس ... طلعت لها اللي تباه وحطته فالميكرويف يسخن وظهرت لها بيبسي ويلست ع الطاوله
تحس عمرها يوعانه وهذا بسببة دورتها اللي تفتح لها شهيتها فما اترييت هالدقيقة الاكل اللي في الميكرويف يسخن علطول غرست الشوكة فالكيكة المتجمده وظهرتها غصب وخشت اللقمة الكبيرة في ثمها لانها ماقدرت تقطعها اصغر لانه الكيكة توه مظهرينها من الفريزر
سمعت صوت من وراها خلاها تغص: ما شاء الله ياهل انتي تفطرين ف صبح رمضان !
تمت تكح ورا بعض علطول فتحت الببسي اللي قدامها وشربته
طالعها باشمئزاز: كيكة ايسكريم وبيبسي من الصبح ... شوه من معده علييج
حست انها بلعت الكيكة الباردة وطالعته وهيه مصدومه متجاهله كرهها واشمئزازها من هالشخص: سعيييد ش هالدم اللي ع ثوبك !
سعيد كأن هذا لي كان ناقصنه ... حد يشوف هالدم ، علطول ردت به الذكرى لقبل ساعة ... ساعة وحده بالضبط!
كان متوجه باتجاه المزرعة ... ما اتواجد في هاليوم وطلع علثة عشان ما يحظر عقد قران اخته اللي ماقدر باي طريقة يمنعه وما هانت عليه نفسه يشوف حزن اخته في هاليوم !
تنهد من خاطره وقبل لا يرد يسرح لمح موتر ولد عمه متوجه بنفس اتجاه ... الحقد لي في صدره رد !
هو سبب حزن اخته !
لوهلة ورغم غياب الشياطيين في هالشهر الفضيل الا انه حقده الداخلي طغى عليه
دق لولد عمه هرنات وتم يديم له وخربط مشي سيره وولد عمه استغرب !
وقف سيارته ع طرف ونزل جامته واشر له بحركة انه *شوه بلاك؟*
لكنه ما ادرك الاعصار الهايج اللي نزل من موتره ولا اهتم اذا موتره تسكر ولا لا وسار بطل باب موتر ولد عمه وسحبه من ياقة ثوبه
ولد عمه قال باستغراب: شوه بلاك ياسعيييد !
سعيد وهو يرمس بكل غيض من غير أي مقدمات:اسمعنننييي زييين يا يانع ... على كثر ما حاولت اكنسل زواجك الفاششل هذا الا انه ما طاع بس والله يا يانع والله ! لو سمعت انك رديت لعلومك الخايسسسة والمرابع ورا البنات ولا صار فاختي شي شرات ما صار فالمرحوم ترا ما برحممممممك
يانع استفزته هالنقطه الحساسة اللي طراها سعيد ... كل شي ولا حد يرد يعايره بماضيه اللي تاب منه ومن خاطره بعد وبكل يقين !
يانع رفع حايب: ما اظن يا ولد عمي العود ان كل ما صار شي ترد تذكرني بشي صاار منزماااااان وخلاص
سعيد باحتقار: الله يعلم جان ما اخوك توفى بسبة خ**** ومرابعك ورا ال****
يانع توسعت عينه مصدوم من ولد عمه ... قال بكل استفزاز وهو مقهوووور من داخله
يانع: والله يا سعيد لا تنسى روحك ! ترا ماضيك العن عني بملييييون مره ولا نسييت بنت الييران اللي يوم خذت غيرك سرت ظهرت كل علومك وياها عند ريلها لين طلقها ! وليتك عاده بعد كل هذا خذتها وتسترت عليها فضيحتها لين اليوم الكل يدريبها -وكمل بخبث- وفلتكم اللي فالعين نسييت يوم كنت مخلنها سبيل لك ولربعك اللوث؟
سعيد مات في هاللحظة علطول ضرب يانع بوكس في بطنه وقال بعصبية: انتتتته يالهرم مالك حق تطري اشيااء قديمة
يانع تنرفز: عيييل ما شفت عمرك وانته تطري لي شي قدييييم !
سعيد: في فرق يييييا ياااانع انا موضوعي كان منزمااااااااااااان من اكثر عن سبع سنين وتبت وانته ادرى
يانع يا بيعطيه ظهره وبيسير عنه بس هالحركة ظهرت سعيد من طوره ... سحبه من جتفه جان يانع يعصب
يانع: انته اييه احترمتك وايييد انا !
سعيد بتعالي: غصصصبا عنك تحترمنييي يالهرم !
يانع ولع هنييه جان يسيير ويرد له البوكس لي ضربه إياه قبل ونقع البوكس بينهم كل واحد يضرب الثاني باقوى ماعنده بس اللي ما حسب حسابه سعيد انه اخر ضربه تلاقاها من يانع كانت صوب فكه وتم ينزف وايييد
ويانع رغم الكسور اللي حس فيهن الا انه اول شي سواه ركب موتره وابتعد عن سعيد وخلاه روحه !
نش سعيد وعلطول تم يحاول يظهر الدم اللي ينزف منه ... امتنع عن رغبته بالاستفراغ بسببة المنظر اللي يشوفه قدامه عشان يحافظ على صيامه اللي مايدري هو يصح ولا لا على كل اللي صار !
بس حط في باله انه بيكمله اليوم وبعد رمضان بيرد يقضيه ان شاء الله
ركب سيارته وبالغصب توجه صوب المزرعه ونزل علطول ساير المطبخ بيتمضمض وبيحط ثلج بس شاف المنظر اللي قدامه
وحده لابسه جلابيه بيت وشيلتها ويالسه تاكل كيكة ايسكريم وصوبها بيبسي بعد
وعته من سرحانه للمره الثالثه
المياسة: سعييد اكلمك انا!
سعيد فز: ها المياسة شووه بلاج
المياسة: انتت متهاوش مع حد صحح؟
سعيد رد حط راسه ع الطاوله بتعب: مايخصج
المياسة: سعيد انت وايد قاعد تنزف! لاززززم تفطر
سعيد بحده: خسيي! قالو لج المياسة افطر
المياسة تجاهلته ولا جنه يذب عليها: سعيد مو قاعده اتغشمر معاك
سعيد: المياسة جان بتمين تحنيين ع راسي بظهر ترا
المياسة انقهرت: كيفك بالطقاق عساااك تمووت أصلا انا اترياك تموت
