دشت الواتس بسرعة وهدت التوست لي في ايدها وتمت تشوف الرقم عدل بس صدق ولا مره قرت هالرقم وحتى مش حاط صورة !
حطت له استفهام وهو كان اونلاين فرد عليها علطول
كتب لها: انا خلفان
ورد كتب تحت: ولا نسيتيني ؟
اول ما قرت اسمه انتفض جسمها وسكرت فونها علطول ... مليون سؤال وسؤال خطر في بالها
ما كملت دقيقة من سكرت فونها الا والفون يهتز بين ايدينها وكان نفس الرقم فسكرت في ويهه علطول
وصل لها اشعار واتس قرته من قفل الشاشة
خلفان: ما بطول ... ردي ضروري
ارتبكت ودقات قلبها زادن ... رد دق وهالمره ردت عليه بس تمت ساكته
خلفان: الوه ؟
ظبية تمت ساكته
خلفان: ظبية تسمعيني ولا لا ؟
ظبية بجمود: شوه تبغي ؟
خلفان: ظبية وبعدين وياج ؟
ظبية: خلفان لو داق تلومني وانته تدري انك انته الغلطان ف انا بسكر
خلفان: غلطان فشووه ؟ اني رمست بنت عمج وانا مقصديه كان اني اطمن عليج ؟
ظبية بسخرية: انته كنت ادور سوالف ... ودامك رمست بنت عمي ما استبعد تكون ترمس غيرها وغيرها ، انته ما حشمت حتى لي بيني وبينك !
خلفان احتدت نبرته: انتي تعرفييين شوه في خاطريه صح يا ظبية ولا لا ؟
ظبية: من عقب لي صار ؟ لا والله ماعدت افهمك ولا أبا افهمك حتى خلاااص خوز عن دربي
خلفان: هذا اخررر كلامج !! اخوز عن دربج وخلاص ؟
ظبية داست ع قلبها: هيه هذا اخر شي بقوله
خلفان: انزين اسمعي ... اذا هذا اخر كلامج انا كلامي بعده ما خلص ... وجانج تبيني اخوز عن دربج انا هب خايز ولا مروح في النهاية فيه وايد أشياء غير الحب تربطنا
ظبية رفعت حايب: نعم نعم اانته ايه شو يالس تخربط !
خلفان بخبث: مانع ويانع ... حتى اخوج مطر نفسه
ظبية بلعت ريقها بس قالت بقوة: شوه يعني تهددني اونك ؟ اعلى مافي خيلك اركبه
خلفان: انا مش يالس اهددج ... ولاحظي علفكرة ولا اني طلبت منج تظهرين معايه ولا قلت بطرش صورج وحركات ٢٠١٠ هاذي ... كل اللي اباه منج يوم ادقلج ولا ارمسج تردين عليه
ظبية بعناد رغم خوفها: مابااااا
خلفان ضحك: كيفج عيل انتي حرة يا ظبية
ظبية بلعت ريقها: شوه يعني بتخبر خواني ؟
خلفان ابتسم: انتي تعرفين اني لو ذكرت اسمج عند خوانج شوه بيسون فيج فكييف وانا اعرف كل شي عنج ؟ ... حتى لو تشوفينهم متفهمين بس كل شي عندهم ولا حد يمس شرفهم ترا ف ففكري عدل في الموضوع يا -وكملها بسخرية- حبيبتي ظبية
ظبية تمت ساكته ... اما هو فضحك ضحكة مستفزة وسكر الخط !
-نرد لبيت فلاح ... عند الدماني بالتحديد
بعد ما تأكدت انه فلاح ظهر وراح المطار خلاص متجه لـ *قطر الحبيبة* عشان يخلص أموره وبعدها من قطر بيسافر ألمانيا
سارت غيرت اللي عليها ولبست جلابيه خفيفة ومريحة وعليها عباة خفيفة ودورت أي شيلة في الكبت مكوايه وسحبتها ونزلت تحت
كان باب القسم العزول مفتوح فدخلت دايركت وشافت الريم منسدحة ع وحده من غنفات صالتها ومغطيه ويها بايدها
الدماني استغربت: ريمووه تصيحين ؟!
الريم فزت علطول واعتدلت بيلستها: الدماني ! يممه روعتيني اتحرا فلااح
الدماني ضحكت: فلااح راح فديتج -وتغيرت ملامحها- انتي شبلاج تصيحين كنتي شوه ؟
الريم تمت تفرك عينها: لا بس رمشة دخلت فعيني
الدماني ابتسمت: علينا ؟ شكلج من الحين متولهه ع فلاح
الريم ضحكت: الدماني ياخي ...
الدماني تنهدت: اسمعييي ... قومي تلبسي يلااا بنسير الشمالية
الريم توسعت عينها: شوووه !
الدماني طالعتها باستغراب: قومي ! بنسير انا وانتي وبنخطف ع الدّيمة الحين عشان ادلينا درب بيتكم ! مع انه ولا مره ضربت خطوط بس لعيونج والله تم اهم شي تلاقين هلج
الريم بلعت ريقها: الدماني ... مابا اسوي شي من ورا فلاح
الدماني: ريموه ! الفرصة ما بتييج مرتين تراها
الريم تنهدت: احس ... مافيني والله يسد اني تعبانه
الدماني عقدت حياتها: مايخصني ! انا اليوم سايره الشماليه سايره
الريم طالعتها بحيرة: انزين شوه رايج انتي تسيرين مع الدّيمة اليوم واذا عرفتي المكان باجر انا وانتي نروح رواحنا ؟
الدماني بشك: ما تبين الدّيمة تعرف عنج شوه ؟
الريم نزلت راسها لاصابعها: اذا كتب الله ووصلت لامايه وسلمت عليها وبعدها رديت هنيه ماشي مشكله ... بس احس دامنا مش ضامنين اللي بيصير ف احسن ماتعرف من الحين
الدماني استغربت: ويييت بس ترا هلج يعرفون انج معرسه وماخذه فلاح
الريم تنهدت: مافيني اسمع منها رمسه تلومني ... تكفين الدماني خلااص
الدماني بلا مبالاة: ع راحتج ... انا سايرة توصين ع شي
الريم: تحملي بعمرج يالدماني ... وشوي شوي فالدرب
الدماني: ان شاء الله ان شاء الله ريموه
ظهرت الدماني وخلت باب القسم وراها مفتوح وراحت ركبت موترها وتوجهت لبيت عمها مطر طييييارة
