السحابي

-7-

نرد شوي ورا ... عند اول ما ظهرو المعاريس من الفندق*
دق فلاح لأمه بس هالوقت كانت شنطة امه عند الدماني لانها راحت الحمام ... الدماني حست بالفون يرن ويوم قرت الاسم كان مكتوب * حبيبي الغالي فلاح❤️* لا ارادي يتها ضحكة من الاسم بس كتمتها وردت عليه
الدماني: الوه ؟
فلاح بهدوء: مرحبا ... وين اميه ؟
الدماني: امك فالحمام عزك الله
فلاح: ماعليه من تظهر اترياكم تحت
الدماني: ان شاء الله
سكرت عنه الدماني وفتحت هنيه فون ام فلاح اللي كان بليا باس وعلطول سارت صوب اسم فلاح في جهة الاتصال عشان تظهر رقمه... طول هالفترة ماعنده رقمها ولا هيه عندها رقمه وشكله بيفضحهم لو تمو على هالحال !
سيفت الرقم وكتبت عليه *فلاح* حرفييًا كتبت اسمه جيه حاف بدون حتى قلب او أي شي تقول علاقتهم الناشفة اللي في الواقع ... ييت بتظهر من جهات الاتصال الا بالغلط ادق عليه بس علطول سكرت
لكن من سوء حظها انه وصل له الاتصال ورد اتصل فيها لانه رن اكثر عن رنه فعشان جيه وصل له اشعار
تلومت بس ردت عليه وقالت بفشله: الوه
فلاح: هلا الدماني ... خير صاير شي ؟
الدماني تنحت ... ومن تناحتها قالت: انته عندك رقمي شوه؟
فلاح استغرب: صاحية انتي ؟ فيه ريال ماعنده رقم حرمته
الدماني عقدت حياتها: بس ...
فلاح تم ساكت وهيه حست انها يابت العيد وسكتت ... بس اللي انقذها ظهور ام فلاح من الحمام في هاللحظة
ام فلاح: حبيبتي الدماني فلاح ما دق؟
الدماني باحراج رفعت فونها ع السريع وقالت: يالسه ارمسه فديتج عموه يقول انه تحت
ام فلاح ابتسمت: ايه يلاا عيل خلينا نروح
الدماني سكرت في ويه فلاح من الفشله والتوتر ونزلت مع عمتها ام فلاح ... اول ما وصلو صوب موتره علطول الدماني قالت
الدماني: عمتيه يلسي قدام انا بيلس ورا
ام فلاح: لا حبيبتي انتي اقعدي يم ريلج انا بقعد ورا
الدماني: لااا عمووه
ام فلاح ما عطتها فرصة وفتحت الباب لي ورا: قلت لج قعدي جدام يعني قعدي جدام ولا بزعل عليج
الدماني ابتسمت: ان شاء الله فديتج كل شي ولا زعلج
ركبت الدماني حذال فلاح وام فلاح ركبت ورا ... اول ما دشن سلمن عليه وهو رد عليهم السلام وبعدها بحركة سريعة سحب ايد امه من ورا وباسها
فلاح بنبرة عذبة: ما بغيتي اتذوبين عنادج واتيين معانا
ام فلاح ابتسمت ... تحب ولدها يوم يدلعها وايد: شو اسوي حبيبي انشغلت مع عرس ولد خالك
فلاح: يالله يا امييه الحينه تنشغلين بالدنيا كلها وتنسين ولدج وحيدج !
ام فلاح: مستحيييل انسى ولدي حبيبي الغالي مالي غيره في هالدنيا

كانت الدماني طول الوقت تسمعهم بس ساكتة ... واضح جدًا انه فلاح دلوعها وهو بعد مش مقصر مدلعنها
تمو طول الدرب لين وصلو البيت وهم يسولفون وهيه تحس خلاص صدعت خاصة من الذهب اللي لابستنه تحس روحها ثقيلة
نزلت اول وحده وتوجهت علطول صوب حجرتها وخلت فلاح مع امه ... دخلت الحجرة وعقت العباة والشيلة ... وقفت مقابلة التسريحة عشان تعق الذهب بس دخل في هاللحظة فلاح عليها وفزت !
مش متعوده اييها الجناح نادر جدًا لو بي اصلًا حتى ما يرقد وياها ! ما توقعت دخوله ابدًا ...
بلعت ريقها بخوف وارتجفت من دخلته عليها وماعرفت تسوي شي خاصة مع الاظافر الطويلة اللي مركبتنهن كانت تعيق عليها أي شي تسويه
قرب منها وهيه كل ما يقرب منها تحس بارتباك اكثر ... قرب لين وصل وراها بالضبط وهيه كانت تشوف هالشي من انعكاس صورتهم في المرايا بس يوم وصل قريب منها شمت ريحة عطره اللي تسللت غصب لقصبتها الهوائية ... كل أطرافها الباردة في هاللحظة انقلب حالها للعكس ... اما هو فرفع الذهب عن راسها وبعدها يمع شعرها ع ينب اللي كانت مخلتنه طايح ستريت عشان مايزيد من دفاشة اللوك خاصة انه الفستان رغم انه كان مخصر وماسك ع جسمها بلونه النود الفاتح الا انه فيه قطعة ثانيه عليه فيها ريش ابيض فكان شعرها منسدل ورا ع الريش هذا والذهب كاسر اللون الهادي
بعد ما زاح شعرها ع ينب نزل عنها ثقل المرتعشة وبان هنيه صدرها اللي كان مخفي تحت الذهب وكان شكلها هادي حتى لو ميكبها كان ثقيل ...
ماقدر يتأملها اكثر من المرايا ولفها صوبه من خصرها المنحوت وهنيه قدر يتأملها وهيه في حضنه !
نزل لمستواها خاصة بسبب فارق الطول بينهم وباس شفايفها بوسة طويلة ... وهاذي كانت اول مره يقرب فيها منها !
بعد ما طبع البوسة اللي ع شفايفها نزل لصدرها المزموم ووطبع طبعته عليه تحت صدمتها هيه وتهيج المشاعر اللي فيها من حركاته الغير معهودة اللي حركت فيها فطرتها الانثوية
بس ما طول وابتعد عنها وهو يقول بهدوء: تسمحين ادخل اسبح قبلج عشان انام بعدها وانتي تاخذين راحتج؟
هيه من زود ما كانت تحت التخدير هزت راسها بموافقة
وهو من سمحت له علطول دخل الحمام وهيه هنيه توها تستوعب اللي صار ومسكت راسها بصدمة
ابدًا مش عارفة شو يدور في راسه ... يقرب مرة منها وبعدها يشرد !
تكره هالحيرة علطول تذكرها بحيرتها مع سليّم
بلعت ريقها بغصة ويلست مقهورة من اللي صار ... بدت تحس عمرها صدق انها لعبة !
اترييته يظهر من الحمام ومن ظهر شافته طالع بس بالفوطة القصيرة اللي لافنها ع خصره ... تجاهلته متعمدة رغم انها ما تنكر جاذبيته وهيبته بس كرامتها فوق كل شي ...