نزل من سيارة ربيعه وويه مخطوف .. وصل له خبر الحادث ومن صدمته ماعرف شو يسوي بعد ما قالو له انه تؤامه فارق الحياة !
ان كانت الغيبوبة تهديد اولي لهم فاللي صار الحينه نهى كل شي !
دخل وع دخلته شاف اخوه مطر صوب ممر حجرته
ابتسم مطر ليانع: هااا يانع ما سرت الرملة عيل ويا مانع
يانع لف صوبه وعيونه اللي ترمس .. بلع ريقه بصوت عالي وقال وهو يحس لسانه ثقيل: مانع عطاك عمره
مطر ما استوعب فالبداية وطالعه بتناحه: شووه؟؟؟؟
يانع عيونه احمرت... ماقدر يتحمل الموقف اكثر ودش حجرته علطول وسكر الباب وراه بس مطر راح وفتح الباب بقوة وسحب يانع عشان يخليه يواجهه
مطر مصدوم: مانع كيييف مات؟ انته تستهبل صح ؟ توه مااانع مرمسني يباني اساعده !
يانع طاحت عينه اللي كلها لوم بعينه الامعه تعلن سقوط الدمع منها: سوا حادث وهو راد ... وما تم منه غير رماد!
مطر توسعت عيونه: احترق !
يانع هز راسه بضعف وماعرف شو يسوي .. مطر وده يهون على يانع وده يخفف عنه بس هو روحه وده في هاللحظه حد يخفف عنه هو!
ما صدق ع الله مانع ينش من غيبوبته والحينه يروح عنهم بكل سهولة!!
بغمضة عين ما يتم منه غير رماد !
تذكر علطول اخر مكالمة كانت بينهم يوم اتصلبه قبل ساعات لانه مغرز وهو كان فالعين فما رام يروح له وبعدها رد دق له يطمنه انه ظهرو ... كيف صار كل هذا ؟!
ندمـــان ..
والندم ما يفيده !
مانع خلاص عند ربه .. في اول مره يوم غاب عنهم سنتين في غيبوبته ما ودعه ... وهالمره فارقهم للابد وبعد ما استغل اللحظات ولا كان معاه !
من هول صدمته مش عارف شو يسوي ولا كيف يتصرف !
ويانع اللي قدامه !
صد عن يانع من غير لا يلمح ملامحه وظهر من حجرته لانه دموعه خانته ونزلت ... ومع نزولهن انفتح باب الصالة تحت وسمع صوت صياح !
الصياح كان غريب ! ما كان صياح كثر ما كان نواح انسان !
ماقدر يميز الصوت اللي طيح قلبه فسار بسرعة صوب الدري وشافها بكامل انهيارها تصيح وعبايتها مفتوحه وواحد من الاكمام نازل و الثاني مرتفع والشيلة طايحه ع جتف واحد وريلها حذالها يحاول يمسكها على وضعها عشان تتماسك شوية
مطر وعيونه جمر:الظبي
الظبي قربت من مطر وقالت بعصبية وسط صياحها: وييييييينه؟؟ مقلبب هذا صحح ؟؟؟
إلياس: الظبي اذكري الله
الظبي سحبت يدها بعنف: انتتتته خوووزز جذاااااب مانع في حجرته أصلا
