نرجع عند معاريسنا إلياس والظبي ...
ليلتهم الماضية كانت باردة ... وبزيادة !
من بعد التصوير ردت معاه ولكنها كانت تتعمد تتجاهله بشكل واضح ... وهالشي ما حبه إلياس لكن سايرها لانه ماله خاطر من اول يوم يضاربون وهو باله كله فالسفرة ... طول الوقت كان يدق لعبدالعزيز يتاكد منه ومن الأشياء ويدق لغياث بحكم انه ما بيسافر وياهم عشان يتم فالامارات ويشرف ع الشركة هنيه
أفكاره كانت متشتته بين السفر والدوام ... العرس كان خارج اهتمامته بس في باله انه الحينه صارت عنده امانة ولازم يحافظ عليها ...!
اما الظبي ؟
كانت هادية ... الهدوء هو الشي الوحيد اللي متمسكه فيه وكأنه سلاحها!
هدوئها اللي تسلحت فيه طول العامين لي مضو من فقدت مانع ويمكن ارتدت عنه شويه من رد لها مانع مرة ثانيه بس الحال اللي انجبرت عليه حاليًا خلاها ترد لـ هالهدوء...
هدوئها المتعجرف اللي محد يطيقه ...
كانت تحاول تتجنب أي حديث مع أي شخص غير تؤامها عشان ما تلمح نبرة ونظرات الشماتة منهم
خاصة انها شايلة فكرة العرس من بالها نهائيًا !
بس لأجل عين ؟ تكرم مدينة ...
اول ما دخلت شقتهم الخاصة فيهم روحهم بعيد عن ازعاج اهل البيت ... راحت صوب الحجرة الثانيه مش الأولى لانه الشقة فيها ثلاث حجر وصالة ومطبخ
الحجرة الأولى تجاهلتها لانه هو دخلها قبلها ولمحت انها مأثثها وجاهزة فعشان جيه دخلت الثانيه اللي ما كانت مأثثه بس فيها الشبرية والكبت وشكلها بعدها تحت الصيانة بس ما اهتمت ابدًا وعقت فستانها اللي ضايقبها وايييد وخذت شاور مرة وحده عشان تغسل شعرها وويها من الميكب اللي مسحته بعنف بالصابون وما اهتمت حتى لرموشها الكثيفه اللي كانت بتتقطع من طريقتها الخشنة لمسح الميكب !
من ظهرت قفلت باب الحجرة و استلقت ع الشبرية وحاولت تنام بس بدون جدوى ... تمت تتقلب وتتقلب لين دق الباب عليها وتروعت ...
قالت بحدة: منوه ؟
إلياس استغرب ... وقال بسخرية: منوه بعد ؟ زوجج يا مدام
الظبي ما ضحكت ع نكتته السخيفة وبالعكس زادت حدتها وقالت بجفا: شو تباه ؟
إلياس: تجهزي ... ربع ساعة وبنطلع للمطار
الظبي سفهته وسارت تتجهز ... ماعندها شي تجهزه اصلًا لانه كل شي جاهز وهاي شقتهم فعادي لو تخلي اغراضها، لبست تي شيرت ابيض مكتوب ع يساره بخط صغير بالاسود *لوف* وعليه جينز فاتح شبه واسع رجالي
لبست عبايتها الكحلية السادة وحطت الشيلة ع اكتافها وظهرت من الحجرة
إلياس كان يالس بثوبه القطري في الصالة يترياها واستغرب يوم شافها طالعه جيه
إلياس: وين اغراضج ؟
الظبي بلا مبالاة:شنطي عند مانع ويانع ... هم بيودونهم المطار
إلياس رفع حايب: يعني ما بتاخذين شي من اغراضج اللي هني؟
الظبي بحدة: لا
إلياس طنش للمرة الثانية وتقدمها ... هو بروحه كان مجهز اغراضه وحاطنهن فالسيارة من قبل بس كان يتريا اغراضها بس هو مايعرف انه الظبي تعمدت تودي شنطها مع تؤامها لانه الشنط اللي هنيه كل ياللي فيهن ملابس من اختيار أمها وظبية وطبعًا ذوقهن بناتي بزياده ويناسب أي بنت في الحياة ... الا الظبي !
نروح لمكان ثاني ... بيت بو إلياس
نشت المياسة من رقادها بسبة الحشرة اللي صايرة في بيتهم تحت ... ييت بتتقلب ع الشبرية بس حست بجسم صلب وراها وطاح قلبها !
خافت تلف ورا وتستوعب الجسم اللي وراها خاصة انه بدا يتحرك من تلامس جسمها بجسمه
تعوذت في خاطرها من ابليس وقالت بصوت عالي مرة وحده: اللهم ان كان سحر فابطله !
وصل لها في هاللحظة صوت لولوة النايم وهيه تقول بانزعاج:السحر اللي يبطل راسج ... هاذي انا لولوة
المياسة زفرت براحة ولفت بسرعة صوب لولوة تتأكد: لولووو يالكلبببه والله خرعتيني !
لولوة سحبت لحافها اكثر لها: جب خليني انام والله ميته تعبب ونوووم
المياسة: شحقة نايمه عندي ؟
لولوة: شنو اسوي ما ياني نوم في غرفتي قلت اجرب غرفتج
المياسة حكت عيونها: قومي قومي ... لازم ننزل تحت ما تسمعين الحشرة شكلهم بيطيرون عنا
لولوة عقدت حياتها وهيه مغمضه: تكفيييين أبا انام
المياسة سحبت اللحاف عنها: قوومممييي بنرد قططر يالمينونه
لولوة تنهدت من خاطرها من سمعت *قطر* ما تنكر انها تولهت ع بلادها واييييييد ... نشت في هاللحظة خاصة انه المياسة نشت وسارت الحمام ، لا ارادي جيكت فونها وهالحركة صارت من اعتيادتها
تبغي تتاكد هل وصل لها شي من مطر ولا لا !
تنهدت بيأس يوم شافت ولا اشعار منه وتذكرت علطول اللي صار البارحه وردت لها الضيقة اللي ما خلتها تنام في البداية ويوم رقدت صدق وتعمقت فرقادها وعتها المياسة فصدق ما رقدت شي
راحت حجرتها عشان تسير حمامها الخاص وتبدا تتجهز لانه واضح هيه والمياسة وايد وايد متأخرين ، لكن في هاللحظة وصل لها اشعار من مطر
ماقدرت تتجاهل الاشعار وبسرعة دخلت السناب وشافته مطرش صورة
مابغت تفتحها بسرعة بس الفضول ياكلها ... ما كان عندها غير انها تبند النت وتفتح السنابه وهنيه كانت الصدمة !
كان مصور لها تذاكر السفر لقطر وكاتب ع الصورة
*هاذي هيه كانت المفاجأة ... ما كنت ابغي اخربها لين أوصل قطر وانتي تكونين هناك واخبرج بس ما اقدر اخش شي عنج*
ابتسمت من خاطرها ونست كل الزعل اللي كان فيها لوهلة !
مطططر بيكون تحت السما نفسها اللي هيه فيها ! بغض النظر انهم الحينه تحت نفس السما بس يختلف الشي لانه هالمرة مطر بيكون في ديارها !
