El Grande Series 2: Theodore Granville|✔

CHAPTER 15

Chapter 15

Laurenz Pov

Wala akong naging imik sa buong byahe namin ni Senyorito Theo. Pinagsiklop ko lang ang palad ko at paminsan-minsan ay pinaglalaruan ko ang daliri ko upang mawala ang kaba at takot na nararamdaman ko. Idagdag pa ang kahihiyan.

Pasulyap-sulyap ako kay Senyorito Theo na nakatutok lang ang mata sa daan na patungo na papasok sa lupain nila. Naging shaky na rin ang sasakyan dahil bato-bato ang daanan.

Hanggang sa makarating kami sa barn house niya ay walang nagsasalita sa amin. Pinatay niya ang makina ng sasakyan pero nanatiling bukas naman ang ilaw noon. Sinadya niya siguro iyon dahil sobrang dilim. Sa aking pag-iisip ay di namalayan na nakababa na pala siya sa kotse. Kaya naman bubuksan ko na rin sana ang pintuan sa banda ko nang umikot ito at siya na mismo ang nagbukas ng pintuan para sa akin.

Bigla akong napayakap sa sarili ko nang humapas ang malamig na hangin sa mga kahoy na nakapalibot. Mga ugoy ng hangin  at huni ng mga insekto lamang ang naririnig ko sa buong paligid.

Ibababa ko na sana ang paa ko nang walang paalam akong binuhat ni Senyorito Theo sa paraang parang bagong kasal.

"A-ahm." Hindi ko na matuloy ang sasabihin ko at kumapit naman ako sa kanyang balikat.

Dumaan kami sa kanyang balkonahe na may tatlong hagdanan at saka walang hirap niya namang nahagilap ang susi ng barn.

Pagkapasok namin ay sunod niya namang sinara ang pintuan at binuksan ang ilaw. Nilapag niya ako sa kama.

"Ano..."

Sinubukan ko itong kausapin kaso tumalikod naman ito sa akin at tumungo sa kanyang closet. Pagbalik niya ay may dala na itong itim na t-shirt at isang puting boxer shorts.

"Change your clothes, and if you want to take a bath, just go to the bathroom." sabi niya at nilapag ang damit sa tabi ko.

"Senyorito."

"Lalabas lang ako. Papatayin ko ang ilaw ng kotse. Baka kasi maka-attract ng wild boars ang ilaw n'on."

Mas tumindi ang kaba at takot ko dahil sa sinabi niya sa akin. W-wild boars?

Natawa ito kaya napatingala ako dito. Ginulo niya ang buhok ko.

"Kidding, baby."

Niyuko ko nalang ang ulo ko para itago ang mukhang namumula at pinakiramdaman itong umalis sa harapan at lumabas.

Nang wala na ito ay saka pa ako tumayo at kinuha ang binigay niyang pwede kong maisuot. Tumungo ako ng banyo saka ako naghubad sa suot at naglinis sa paa ko na marumi. Napapadaing pa ako dahil humahapdi na ang sugat ko doon. Ngayon ko lang ulit naramdaman ang sakit. Siguro sa kalutangan ko kanina ay pati sakit nito ay di ko na naramdaman.

Tinupi ko ang aking nahubad na damit at sinilid iyon sa laundry basket na nandidito sa banyo. Sinampay ko naman ang coat ni Senyorito Theo. Naghugas ako ng kamay bago lumabas ng banyo.

At nagpupunas ako ng kamay ko sa likod ng suot kong t-shirt nang maabutan ko si Senyorito Theo na nakatalikod sa akin at naka-breathable pajama na kulay itim saka walang suot na pang-itaas. Siguro ay naghahanap ito ng masusuot na damit sa kanyang closet at sa bawat galaw niya ay gumagalaw din ang masels niya sa likod at pati na ng braso niya. Nagsi-igtingan ang mga masels nito.