system 091

(7.8)

Unicode

ကွမ်ကျိုးမြို့၏ ညဘက်ဈေးပွဲတော်၌ အတော်လေးလူစည်သည်။ရှောင်ကျန့်နှင့်ဝမ်ရိပေါ်ဟာ တိုးဝှေ့နေကြသည့်လူအုပ်ကြားထဲ လူကွဲခြင်းမရှိစေရန် တစ်ယောက်လက်တစ်ယောက်တင်းတင်းကြပ်ကြပ်ဆုပ်ကိုင်ထားကြသည်။

ကွမ်ကျိုး၏ညဈေးကအတော်လေးလှ​သည်။လမ်းတစ်ခုလုံးကို မီးပုံးလှလှလေးတွေဖြင့်အလှဆင် ထားတာသည့်အပြင် မီးပုံးပျံတွေကိုလည်း ကောင်းကင်တစ်ခုလုံးဖုံးလွှမ်းမတတ်မြင်တွေ့နေရ၏။

ရှောင်ကျန့်၏ မျက်လုံးလေးတွေမှာ မျက်နှာဖုံးဆိုင်တစ်ခုရှေ့၌ရပ်တန့်သွားသည်။ရိပေါ်ကို မျက်နှာဖုံးဆိုင်ရှိရာသို့ဆွဲခေါ်လာရင်း ဝက်မျက်နှာဖုံးလေးတစ်ခုကိုသဘောတကျ လှမ်းယူလိုက်သည်။

"ခေါင်းငုံ့ပေး"

ရိပေါ်က ရှောင်ကျန့်စိတ်တိုင်းကျသူ့ခေါင်းကိုငုံ့ကိုင်းပေးသည့်အခါတွင် ရှောင်ကျန့်လက်ထဲရှိဝက်မျက်နှာဖုံးမှာ သူ့မျက်နှာထက်တွင် ဘုမသိဘမသိတပ်ဆင်ပေးခြင်းကိုခံလိုက်သည်။

"ဟီး...ဟီး....အခုရိပေါ်က ဝက်ကလေးနဲ့တူသွားပြီ"

အကယ်၍ရှောင်ကျန့်၏ထိုစကားကို မြို့တော်မှ အမတ်တစ်အုပ်သာကြားရင် သွေးတတ်ပြီးငေါက်ကနဲလဲသေသွားမည်ကိုစိုးရိမ်ရပေသည်။

ဘယ်သူကများ အင်ပါယာတစ်ခုလုံး၏ အာဏာရှင် ဧကရာဇ်မင်းကို 'ဝက်ကလေး' ဟုခိုင်းနှိုင်းပြီးပြောရဲပါမည်နည်း။

ဒါပေမယ့် အချစ်ရူးတစ်ယောက်ဖြစ်မှန်းမသိဖြစ်နေသည့် ဝမ်ရိပေါ်ကတော့ရှောင်ကျန့်စကားကိုကြားသည့်အခါတွင်ပျော်ရွှင်စွာရယ်မောလိုက်သည်။ သူချက်ချင်းပင် များစွာသောမျက်နှာဖုံးတွေထဲက ယုန်မျက်နှာဖုံးလေးတစ်ခုကိုမျက်စိကျသွားကာ ဆွဲယူ၍ရှောင်ကျန့်၏မျက်နှာထက်တပ်ပေးလိုက်သည်။

"ကိုယ်က 'ဝက်' ဆိုရင် မင်းက 'ယုန်' သေးသေးလေးပေါ့"

သူတို့နှစ်ယောက် တစ်ယောက်မျက်နှာတစ်ယောက်ကြည့်ရင်းရယ်လိုက်မိကြသည်။ ဆိုင်ပိုင်ရှင်၏အူကြောင်ကြောင်အကြည့်တွေကိုလျစ်လျူရှု့၍မျက်နှာဖုံး ဖိုး ပေးချေလိုက်ပြီးလျှင် လက်ချင်းတွဲချိတ်လျက် မီးပုံးတွေဝယ်ယူလွှင့်တင်ကြသည်။အရသာရှိတဲ့အစားအသောက်တွေဝယ်ယူ ကြပြီး ကွမ်ကျိုးမြို့လည်ရှိရေကန်၌ ကြာပန်းသဏ္ဍာန်စက္ကူ မီးအိမ်လှလှလေးတွေ ကိုအတူတကွ ရေထဲမြောဖြစ်ကြသည်။