system 091

(7.14)

Unicode

ဝမ်ရိပေါ်၏ လက်ထဲတွင် ထက်ရှသည့်ဓားရှည်တစ်ချောင်းရှိနေပြီး ဓားထိပ်ဖျားကနေ သွေးတွေတစ်တောက်တောက်စီးကျနေ၏။ ရှောင်ကျန့်အပေါ် တိတ်တဆိတ်လုပ်ကြံမှုက ဝမ်ရိပေါ်၏ အဆုံးစွန်သောဒေါသနှင့် ဖုံးကွယ်ထားသောမျက်နှာမှန်ကို ဖော်ထုတ်သွားသည်။

ရှောင်ကျန့်က လေးကြိုးကိုဆွဲတင်လိုက်ရင်းသူ့နှုတ်ခမ်းထောင့်မှာ အပြုံးတစ်ခုဖြစ်ထွန်းလာသည်။ ဟုတ်တာပေါ့။ သူ့ယောက်ျားက သူ့အရှေ့မှာ အသုံးမကျတဲ့ ခွေးပေါက်ကြီး သဏ္ဍာန်အမြဲ ဖမ်းနေတတ်သော်လည်း ဒါက စွမ်းဆောင်ရည်ကင်းမဲ့တဲ့ ဧကရာဇ်တစ်ပါးဟု မဆိုလိုပေ။

ဧကရာဇ်မင်းက ဧကရီနဲ့အတူ တိုက်ခိုက်မှုတွင်ပါဝင်လာသည်။ ဝမ်ရိပေါ်ဟာ အနားကပ်လာသည့် လုပ်ကြံသူအားလုံးကို သူ့လက်ထဲက ဓားရှည်အား လွှဲယမ်း၍ အလွယ်တကူ တားဆီး သည်။ သူ့ဓားချက်မိလိုက်သူတိုင်း ရှောင်ချိန်ပင် မရလိုက်ပဲ အသတ်ခံလိုက်ရသည်သာ။

ရှောင်ကျန့်ရှေ့တွင်တစ်ချိန်လုံး ဖုံးဖိထားသည့် သူ့ရဲ့သွေးအေးရက်စက်သည့် ပုံသဏ္ဍာန်အမှန်မှာ ထင်ထင်ရှားရှားပေါ်ပေါက်လာသည်။

ဧကရာဇ်မင်းအပြင် ဧကရီကိုယ်တိုင် ဒီလောက်ထိ မကြောက်မလန့်တိုက်ခိုက်နိုင်လိမ့်မည်ဟုမည်သူမှမထင်မှတ်ထားပေ။ ဒါ့အပြင်နှစ်ယောက်လုံးက အရမ်းအတွဲညီညီလှုပ်ရှားကြခြင်းဖြစ်သည်။

လုပ်ကြံသူတော်တော်များများ ရှင်းထုတ်ခံလိုက်ရပြီးနောက် တစ်ခြားလူတွေနည်းတူ ပုန်းခိုနေသည့် အမတ်ယောင်ဟာ နောက်ထပ် အကူတွေထပ်ရောက်လာခြင်းမရှိကြောင်းသတိထားမိလိုက်သည်။ရုတ်တရက်ဆိုသလို အမတ်ယောင်၏ ဘေးဘက်သို့ မြှားတစ်ချောင်းဟာ ပြင်းပြင်းထန်ထန် စိုက်ဝင်သွားသည်။

ထိတ်လန့်ကြောက်ရွံ့သွားသည့်အမတ်ယောင်ဟာ မြေပြင်ထက်သို့ ဖင်ထိုင်ရက်ပြုတ်ကျသွား၏။ တရားခံကိုကြည့်လိုက်တော့ ဧကရီကိုယ်တိုင်ပင်ဖြစ်သည်။ ဧကရီ၏ မျက်နှာလေးမှာ လှောင်ပြုံးသေးသေးလေးတစ်ခုနဲ့အတူ သူ့ကို စိုက်ကြည့်နေလေသည်။